MWAHA WOOSOMIYA 19
NCIPO 22 Omwene wa Muluku Orwe!
Isiyani hiiva nincuweleehu mananna Yehova cinhalaawe waahukhumu atthu?
“Yehova khaavo ntthu nompheelaawe umoona atankanyinyaka.”—2 PET. 3:9.
ITTHU INHALEEHU WIITTHUCA
Ulipihaca ukupali wihu wiira ukati Yehova nohalaawe waahukhumu atthu, noohala waahukhumu niisariya.
1. Kontha isiyani nineereehu wiira ninkhala ukati wootteeliha nrima?
HIIVA ninkhala ukati wootteeliha nrima cinene! Ula ukhanle ukati ninoneehu inatiri ciirannyaaka uhoolo wihu khula nihuku. Wootakihera, hi ninaamoonaka “mwene ooculu ilapo” ni “mwene oohitto ilapo” yaanaka wiira ukhitiri ulamulela ituninya. (Dan. 11:40, niwehero.) Ciicammo ninawoona ihapari co Umwene wa Nluku cilalennyaka ntuninyani motheene nimananna ootikiniha ni atthu enci anaathanla unswalela Yehova. (Isai. 60:22; Mat. 24:14) Ni ninawaakhela iyoolya yo mminepani ukati hiiva nimpheeleehu.—Mat. 24:45-47.
2. Isiyani inlamuliyeehu ukupali, masi isiyani inlamuliyeehu ucuwela?
2 Yehova naanikavihera vakaani-vakaani ucuwela citthu cofayita cinhala wiirannya woohipica. (Miru. 4:18; Dan. 2:28) Hi nihaana nikupaliki wiira ninaahala ucuwela itthu yoohala upanka waphiyaka ukati wo masakha moolupale wiira nihihiyerere umwiiwelela Yehova ni wiiwanana nimayamunneehu. Masi ikhanle itthu yofayita ucuwela wiira cihaavo citthu cikhwaawe cinhala wiirannya uhoolo hiiva nanlelo cihincuweleehu. Nhina ula mwahoola, ninaahala woona mananna cirukunusiyaaya citthu caakupaliihu khalayi. Ni ciicammo, ninaahala woopela mwaha citthu cikhwaawe cincuweleehu cinhala wiirannya uhoolo ni woona citthu Apaapeehu o wiirimu cinhalaaya upanka.
CITTHU NIHINCUWELEEHU
3. Khalayi, isiyani noolumeehu naacaka woopoliya waatthu ukati wo masakha moolupale, ni nlattuni?
3 Khalayi, neeraka wiira ukati unhalaaya wancera masakha moolupale, khaavo-tho aahala ukhalana iparakha yoothanla unswalela Yehova ni urwaa woopwa ukhottoni ya Harmacetom. Hiiva nooluma commo noopuwelaka wiira itthu yiirannyeele ukati wa Nowee ciicammo phaahala wiirannya wahoolo. Wootakihera, khampa ukati wa Nowee, ntthu wahaakhitiryaawe ukela nkalawani Yehova natthukileene nkhora, hiiva noopuwela wiira khaavo aahala ukhitiri uthanla unswalela Yehova ni woopwa yapaceraka masakha moolupale.—Mat. 24:37-39.
4. Kontha isiyani nihineereehu wiira citthu cotheene ceerannyeele ukati wa Nowee caari nthoonyero no citthu cinhala wiirannya uhoolo? Ntaphulele.
4 Niireke yaahala ukhala itthu yomaana hiiva uhimyeeha wiira khula itthu yeerannyeele ukati wa Nowee, naari nthoonyeero no citthu cinhala wiirannya uhoolo? Mena. Kontha isiyani? Kontha Ibiibiliya khinhimyeeha iyo. a Khweeliini, Yesu aholattaniha “mahuku a Nowee” nuukati waahalaawe uwa. Masi, uyo khenre wiira citthu ciirannyeele ukati wa Nowee, toko utthukiya nkhora wokalawa, canhala wiirannya wahoolo. Uhookhalaru commo, hi pooti wiitthucera cinene citthu ceerannyeele ukati wa Nowee.
5. a) Manannani Nowee aathoonyenryaawe waamini? (Maberewu 11:7; 1 Peturu 3:20) b) Manannani ulalyeera wo mahukwaala unlikanacaaya nuukati wa Nowee?
5 Ukati Nowee weewilyaawe moolumo a Yehova, uyo ahothoonyera waamini ni ahopacera uteka ikalawa. (Nsome Maberewu 11:7; b 1 Peturu 3:20. c) Inanna imocaaru, atthu yapaceraka wiiwa ihapari comaana co Umwene wa Nluku, ayo ahaana yeettelaka itthu ineetthucaaya wiira yoonihere waamini. (Mite 3:17-20) Peturu aheera wiira Nowee “aholalyeera isariya.” (2 Pet. 2:5) Khampa nonneehu nhina mwaha uvinre, hiiva khanincuwela wakhala wiira Nowee ahokhitiri waalalyeera atthu otheene o ule ukatyuule. Mahukwaala, hiiva ninaamananiha waalalyeera atthu enci ntuninyani motheene ni nimpanka iyo nimananna ankhitiriihu. Masi hataa nimananihaka manannani, hi khaninhala ukhitiri waalalyeera atthu otheene ila ituninyeela ihinaaya umalamalihiya. Nlattuni?
6-7. Kontha isiyani nineereehu wiira khaninhala ukhitiri waalalyeera atthu otheene uhinaphiya umwiiso waya ila ituninyeela? Ntaphulele.
6 Muupuwele itthu Yesu yuulumilyaawe aacaka nteko woolalyeera. Uyo enre wiira ihapari comaana cinaahala “ulalyeeriya nlaponi motheene unkhaliya.” (Mat. 24:14) Iyo inatiriiyo ineera yiirannyaaka. Ihapari co Umwene cinaalalennya niiluuka coopwahaka 1.000. Nhina isayiti jw.org, atthu enci pooti wiiwa ihapari co Umwene wa Nluku.
7 Masi, Yesu ahaahimerya attharyaawe wiira ‘khayaahala ukhitiri uvira yalalyeeraka isittatti cotheene’; maanaaya wiira ayo khayaahala unlalyeera khula ntthu uhinaphiya ukati waahalaawe uwa. (Mat. 10:23; 25:31-33) Itthu yaahimilyaawe Yesu ciicammo inawiirannya mahukwaala. Atthu enci ankhala mapuro ntekweehu woolalyeera unkhottihiyaaya niikuvernu. Uhiya commo, asaana anaayariya wokhula minuutu invira. Hi ninaapanka khula itthu inkhitiriihu para waaphwanya atthu “olapo cotheene, o maloko otheene, oluuka cotheene, ni apoovu otheene” ni waalalyeera ihapari comaana. (Apoka. 14:6) Masi uhimya ikhweeli, hi khaninhala ukhitiri waalalyeera atthu otheene uhinaphiya wuukhiceroni ila ituninyeela.
8. Nikohoni ninkhumelela nhina mananna Yehova cinhalaawe waahukhumu atthu uhoolo? (Nwehe ciicammo ilatarato.)
8 Masi ninaakhumelela nikoho: Vano atthu atthunaka ahinhala ukhalana iparakha yo wiiwa ihapari comaana uhinaphiya ukati wo masakha moolupale, isiyani inhala uwiirannyeela? Yehova nkhayi ni Mwanawe, nvahacenryaawe waahukhumu atthu wahoolo, anhala waawehera cani ayo atthwaayo? (Joau 5:19, 22, 27; Mite. 17:31) Iveerusu inoopeleehu mwaha inaahimya wiira Yehova “khampheela wiira ntthu atankanyinye.” Masi uyo nopheela wiira “atthu otheene attharuwe.” (2 Pet. 3:9; 1 Tim. 2:4) Nihaana nicuwelaka wiira Yehova khanaaya unihimeerya mananna nohalaawe urwaa waahukhumu atthu yahaakhalanne iparakha yowiiwa ihapari comaana. Khweeliini, khaavo nlamuliya unkhanyereriha Yehova wiira anihimerye itthu ipankilyaawe ni inhalaawe upanka.
Isiyani Yehova inhalaawe urwaa wapanka ale atthu yaahakhalanne iparakha yoowiiwa ihapari comaana ukati womasakha moolupale? (Nwehe iparaagarafu 8) f
9. Isiyani Yehova inhalaawe upanka uhoolo?
9 Avarelaka nteko Ibiibiliya, Yehova naanihimeerya citthu cikhwaawe cinhalaawe upanka. Wootakihera, hi ninaasoma wiira Yehova naahala uwunweleliha “ale yaheettenle” isariya awula atthu yahaakhalanne mananna owiiwa ihapari comaana ni urukunusa makhalelwaaya. (Mite. 24:15; Luka 23:42, 43) Vano, anaakhumelela makoho makhwaawe-tho ofayita.
10. Makohoni makhwaawe atthunaka ankhumelela?
10 Niireke atthu otheene anhala ukhwa ukati wo masakha moolupale, khanhala wunwelelihiya? Ibiibiliya inaahimyeeha sana-saana wiira atthu anhala unrukunuwela Yehova anaahala umalamalihiya ukati wokhotto yo Harmacetom ni khanhala wunwelelihiya. (2 Atesal. 1:6-10) Masi ukati wo masakha moolupale atthunaka ahaavo atthu anhala ukhwa nlattu wo citthu cikhwaawe, toko ireetta, wuuluvala, asitente awula wiiviya naatthu akhwaawe. Isiyani inhala uwiirannyeela ayo atthwooyo? (Ekles. 9:11; Zakar. 14:13) Niireke ayo atthwaayo anhala ukhala nhina ikhurupu yaatthu yaheettenle isariya anhala wunwelelihiya upeephoni? Hiiva khanincuwela.
CITTHU CINCUWELEEHU
11. Inavinre ikhotto yo Harmacetom, atthwaayo anhala uhukhumwiya manannani?
11 Hi ninaacuwela citthu cikhwaawe cinhala wiirannya uhoolo. Wootakihera, ninaacuwela wiira ukati wokhotto yo Harmacetom, atthu anaahala uhukhumwiya yaweheriyaka mananna caawacenryaaya asunnawe Kristu. (Mat. 25:40) Ale yaakavihenre mayamunna oothanliya ni Kristu, anhala uhukhumwiinya khampa ikhontwaa. Hi ninaacuwela ciicammo wiira mayamunna akhwaawe oothanliya anhala ukhala va watuninyani va ukati wo masakha moolupale ni anhala urwaa wiirimu ihinancera ikhotto yo Harmacetom. Ukhala wiira makristau oothanliya anhala ukhala va watuninyani va, unaahala ukhitirya atthunaka atthu ooreera nrima ukhalana iparakha yowaakavihera ayova ni waakavihera uvara ntekwaaya. (Mat. 25:31, 32; Apoka. 12:17) Kontha isiyani unaareera ucuwela nnya citthunnya?
12-13. Manannani atthwaayo cinhalaaya ukhala ukati unhalaaya woona ittiini cowootha cimalamalihiyaka? (Nwehe ciicammo ilatarato.)
12 Yapaceraka masakha moolupale, khweeliini, atthu akhwaawe anhala woona ukwanyulaciya “wottiini cowootha,” anaahala wuupuwela wiira Masaahiti a Yehova yahohimya wiira yanhala wiirannya iyo itthwiiyo. Niireke wiira ayo atthwaayo anaahala umwaamini Yehova?—Apoka. 17:5; Ezek. 33:33.
13 Iyo itthwiiyo yiirannyaakavale, inaahala unuupusera itthu yeerannyeele Wiciipitu ukati wa Moceesi. Muupuwele wiira atthu enci yahaavelela asarayeli ukati waakhumaaya Wiciipitu. Atthu akhwaawe atthunaka yahopacera umwaamini Yehova ukati wonnyaaya wiira moolumo Moceesi yaahimyaawe ohasara 10 yaheeranya. (Nkw. 12:38) Wakhalaka wiira commo phinhalaaya wiirannya ukati unhalaaya ukwanyulaciya ittiini cowootha, niireke ninaahala ukhala oonyoonyiya nawoonaka atthu yahaamwiiwelela Yehova yaanitakaneelaka uhinaphiya umwiiso wo ila ituninyeela? Khweeliini, hi khaninhala ukhala oonyoonyiya! Hiiva nimpheela waatakiha Apaapeehu o wiirimu, akhanle ‘Nluku okiriri, oothunku, oovilela ni arina nifento neekhweeli ni nookhuluvelya.’ d—Nkw. 34:6.
Atthu akhwaawe yaahala woona ittiini cowootha camalamalihiyaka, anaahala wuupuwela wiira Masaahiti a Yehova yanoolumaka ikhumelo yokhalayi (Nwehe iparaagarafu 12-13) g
14-15. Niireke wiira nipuro ntthuuyo ninkhalaawe pooti umwiiriha uvahiya awula uhaleela ukumi woohimala? Ntaphulele. (Isaalimu 33:4, 5)
14 Ukati nkiina atthunaka ninaawiiwa mayamunneehu yoolumaka co, yawaacaka amucyaaya: ‘Phataari anakhwile ahinaaya upacera masakha moolupale, kontha commo atthunaka anaahala ukhalana iparakha yoowunwelelihiya.’ Ayo atthunaka anooluma commo kontha anawaafenta amucyaaya. Masi ukati ntthuuyo unkhwaawe kahi phinhala umwiiriha uvahiya awula uhaleela ukumi woohimala. Yehova khanle Suwiisi omaana. Citthu cinlakelaawe khula ukati cinkhala cosariya. (Nsome Isaalimu 33:4, 5. e) Phimaana, pooti wankupaliihu wiira ‘suwiisi o ntuninyani motheene’ khula ukati naahala upanka itthu yomaana.—Upha. 18:25.
15 Ciicammo, pooti waneereehu wiira nipuro ntthuuyo ninkhalaawe kahi phi itthu inhala umwiiriha uvahiya awula uhaleela ukumi woohimala. Yehova khanhala waahukhumu atthu enci khampa “ipuri” ni waamalamaliha nlattu ayo atthwaayo wookhala mapuro ahilalyeeriye ihapari comaana. (Mat. 25:46) Wakhala wiira hiiva ninawaawacera ayo atthwaayo ni khawaahala unicivela wiira amalamalihiye, vano mmuupuwele suwiisi nasariya Yehova; uyo naatepa waawacera! Hiiva khanincuwela mananna Yehova cinhalaawe waawacera ayo atthwaayo waphiyaka ukati wo masakha moolupale. Atthunaka atthu akhwaawe yoonaka citthu cinhala wiirannya ukati wo masakha moolupale, anaahala upacera umwaamini ni ulakela ukhala mphanttyaawe ukati unhalaawe ureeriha ncina nawe ntuninyani motheene.—Ezek. 38:16.
Yapaceraka masakha moolupale, niireke atthu akhwaawe anaahala urukunusa moopuwelelwaaya?
16. Isiyani incuweleehu ya Yehova? (Nwehe ciicammo ilatarato.)
16 Usoma wihu Ibiibiliya, hi niheetthuca wiira Yehova naamoona ukhalana ifayita khula ntthu. Uyo honvaha Mwanawe wiira otheene cihu nikhalane iparakha yoophwanya ukumi woohimala. (Joau 3:16) Otheene cihu ninawoona mananna Yehova cinifentilyaawe. (Isai. 49:15) Uyo naacuwela ncina nawe khula ntthu ni naanicuwela sana-saana hataa nakhwaaka. Yehova naahala ununweleliha khampa caarihu ni uniturusela moopuwelelweehu! (Mat. 10:29-31) Hi ninaakupali wiira Apaapeehu o wiirimu anaahala unhukhumu khula ntthu niisariya, oocuwelaca ni okiriri.—Tiya. 2:13.
Hiiva pooti wankupaliihu wiira Yehova naahala unhukhumu wokhula ntthu nimananna osariya, ocuwelaca ni okiriri (Nwehe iparaagarafu 16)
17. Isiyani inhaleehu woona mwaha unttharelana?
17 Urukunusiya waya itthu yaakupaliihu wiitthucileehu unaanikavihera woona wiira nna co nihaana nivaraka wowaakuvyaaca nteko woolalyeera uvikana khalayi. Nlattuni nineereehu commo? Ni isiyani innikurumica ulalya ihapari comaana? Waakhuliya waya ala makohwaala ninaarwaa woona nhina mwaha unttharelana.
NCIPO 76 Ninkhalaka cani nalalyeeraka?
a Wiira ncuwele-tho nlattuni apankiyaaya ala marukunuswaala nwehe mwaha uneera: “Tthiri ti Siso Sitthunnyanyu” nhina irevista Owehaweha 15 yo Março yo 2015, ipaagina 7-11.
b Maberewu 11:7 Nlattu Nowee wo waamini, ukati waahimeriyaawe ni Nluku citthu caahala wiirannya nanlelo cihinaaya wooniya, ahoonihera wiira ammoova Nluku ni ahoteka ikalawa wiira awoopole amucyaawe; ni nlattu wo waamini wawe, ahohukhumu ituninya ni ahaakhela isariya waamini unwaanaaya.
c 1 Peturu 3:20 Yaahiile umwiiwelela Nluku ukati waavilelaawe mahuku a Nowee, yatekiyaka ikalawa, yaakavihenre woopoliya mmaacini atthu vakaani, atthu 8.
d Camalamalihiyaka ittiini cowootha, apoovu a Yehova otheene anaahala uttehattehiya ukati Gogue o Magogue nohalaawe waatuphela apoovu a Nluku. Ntthu nohala utakaneela naapoovu a Nluku cinamalamalihiyeene ittiini cowootha, ciicammo naahala uttehattehiya.
e Isaalimu 33:4 Yotheene impankaawe inkhala yookhuluvelyaa. 5 Uyo cinancivela citthu comaana ni isariya. Ituninya yotheene ihoocara nifento nookhuluvelya na Yehova.
f ILATARATO: Ilatarato tthaaru cinthoonyera nlattuni atthu ahinkhitiryaaya wiiwa ihapari comaana: (1) Athiyana amoca ankhala ilapo atthu enci uneettelaaya ittiini inrikarikiha ulalyeeriya ihapari comaana, (2) nlopwana ni amwaarawe ankhala ilapo unoopihaaya ulalyeera ihapari comaana kontha ikuvernu yo iyo ilapweeyo inawaateeliha, ni (3) nlopwana mmoca nokhala ncoko woorika uphinnya ni wootepa uttaliva.
g ILATARATO: Mwanthiyana mmoca aahiile unswalela Yehova nawuupuwela itthu yeetthucilyaawe nhina ukwanyulaciya ittiini cowootha. Uyo naalakela unturuwela Yehova ni nawaavya ukaviheriya naasithumwaane. Wahoolo, ntthu ahalaka unturuwela Yehova toko ule mwanthiyanoole, hiiva nihaana nintakihaka Yehova, Apaapeehu oofenta ni okiriri. Hi nihaana nirwaaka woonihera utteeliya nrima ni uwaakhelela saana ale anhala ulakela unturuwela Yehova.
