CIPANDE CA KUSAMBILILAMO 19
LWIMBO NA. 22 Ndakai Uwene Ukuteeka—Lekini Wize!
I Vyani Vino Twamanya Pali Vino Yeova Alapingula Antu Uku Nkoleelo?
“Yeova . . . asilonda umuntu ali wensi akononwe.”—2 PET. 3:9.
VINO TUMASAMBILILAPO
Tungasininkizya ukuti Yeova alapingula nu mulinganya nu ulungami.
1. Umulandu cii uno tungalandila ukuti ivintu vya kutiinya vikucitika sana ndakai?
Tukwikala umu manda yano ivintu vya kutiinya vikucitika sana. Nupya cila wanda tukalola kuno masesemo amuli Baibo yakufikiliziwa. Wakwe tukulola kuno “mwene wa ku katutu” nu “umwene wa ku kaeya” yakulwisyanya. (Dan. 11:40.) Tukalola kuno ilyasi ilisuma ilikalanda pa Wene Wakwe Leza likusimikilwa umu nsi yonsi nupya antu aingi yakuvwa nu kutandika ukuombela Yeova. (Eza. 60:22; Mate. 24:14) Nupya tukapokelela ivyeo ivingi ivya kutwazwa muli vyakwe Leza “pa nsita ilinge.”—Mate. 24:45-47.
2. I vyani vino tungasininkizya, nomba i vyani vino tulinzile ukwiusya?
2 Yeova watwalilila ukutwazwa ukuvwikisya ivintu ivicindame ivili nu kucitika likwene. (Mapi. 4:18; Dan. 2:28) Twasininkizya ukuti Lino ucuzi ukalamba utatala watatandika tulamanya vino tulinzile ukumanya pakuti tungatwalilila ukuya acisinka lino tukuzizimizya nupya alemane apa nsita yii lino ivintu vilatala sana. Nomba tulinzile ukwiusya ukuti kwaya vimwi vino tutamanya pali vino vilacitika ukunkoleelo. Umu cipande cii, tumalanda pa mulandu uno kwayelile ukusenuka muli vino twamanya. Lyene tumalanda na pali vimwi vino twamanya ivilacitika uku nkoleelo alino na vino Tata witu uwa kwi iyulu alacita.
VINO TUTAMANYA
3. Uzye twamanyile ukuti alilacii lino Yeova wali nu kupoka isyuko lya kutandika ukumuombela, nupya i cani calenzile tumanye vii?
3 Mpiti twamanyile ukuti ndi cakuti ucuzi ukalamba watandika antu atamanya icumi yatalakwata isyuko lya kutandika ukuombela Yeova nu kupusuka pa Amagedoni. Twamanyile vivyo pa mulandu na vino vyacitike lino kwali mulamba mukalamba. Wakwe, vino Yeova wayazile icisasa ca ciwato cino Nowa wapanzile lino mulamba mukalamba atatala watandika, vyalenzile tumanye ukuti, lino ucuzi ukalamba ulatandika, Yeova alayala icisaasa, kusi ali wensi alakwata isyuko lyakutaila muli Yeova nu kupusuka ndi cakuti ucuzi ukalamba watandika.—Mate. 24:37-39.
4. Uzye ndakai tukalola ukuti ivyacitikanga lino kwali mulamba mukalamba vikalangilila ivyali nu kwiza citika? Londololini.
4 Uzye tulinzile ukulaelenganya ukuti ivyacitikanga lino kwali mulamba mukalamba vyalangililanga ivyali nu kwiza citika? Awe. Umulandu cii? Apa mulandu wakuti kutaya ilembo ilikapeela ulondolozi uu. Yesu wakolinye “manda yakwe Nowa” uku kuyapo kwakwe, nomba atalozyanga umu kuti uu wali usesemo, nupya atalozyanga umu kuti vyonsi ivyacitikanga lino kwali mulamba mukalamba vyalangililanga ivyali nu kucitika nanti ukulanda ukuti vino icisasa cayazilwe vyalangililanga ivyali nu ku citika. Cii cisipiliula ukuti kusi vino tungasambilila ukwi lyasi lyakwe mulamba mukalamba.
5. (a) Umulimo cii uno Nowa waomvile lino mulamba mukalamba atatala watandika? (Aebele 11:7; 1 Petulo 3:20) (b) Uzye vino tukaomba umulimo wa kusimikila ndakai vyakolana uli na vino Nowa waombanga?
5 Nowa walangizye ukuti uvwilile Yeova nupya wamutaile lino wakuuzile iciwato. (Belengini Aebele 11:7; 1 Petulo 3:20.) Vikwene ali vino na antu auvwa ilyasi lisuma apa wene wakwe Leza yalinzile ukucita. (Mili. 3:17-20) Petulo walanzile ukuti Nowa wali a “kasimikila wa ulungami.” (2 Pet. 2:5) Nomba wakwe vino twalanzile umu cipande cafumako tutamanya ningo ndi cakuti Nowa wa wasimikile uku antu yonsi lino Mulamba mukalamba atatala watandika. Ndakai tukaomba umulimo uu nupya twaya acincile. Nomba nanti tungaomba uli tutalakwanisya ukusimikila antu yonsi lino impela itatala iza. Umulandu cii uno twalandila vivyo?
6-7. U mulandu cii uno tungalandila ukuti tutalakwanisya ukusimikila uku muntu wenga na wenga lino impela itatala iza? Londololini.
6 Elenganyini pali vino Yesu walanzile pa mulimo uno tukaomba ndakai uwa kusimikila. Wasoowile ukuti ilyasi lisuma lyali nu kusimikilwa “umu nsi yonsi ukuya unte ku yantu amu nko zyonsi.” (Mate. 24:14) Usesemo uu ukufikiliziwa sana ndakai ukucila vino cali mpiti. Ilyasi lisuma likusimikilwa umu ndimi ukucila pali 1,000, nupya pa mulandu na webusaiti wakwe jw.org, antu aingi yakwata isyuko lya kuvwa ilyasi lisuma.
7 Nomba, Yesu walanzile ukuti asambi yakwe yatali nu kumala ukusimikila ilyasi lisuma “umu misumba yonsi,” nanti antu yonsi (Mate. 10:23; 25:31-33) Amazwi yano Yesu walanzile yatwalilila ukuya acumi na ndakai kwene. Antu aingi yakwikala umu ncende muno yainda umulimo witu. Nupya cila wanda ana aingi yakavyalwa. Tukaombesya ukusimikila uku antu amu “nko zyonsi ni mitundu ni ndimi”. (Kuso. 14:6) Nomba icisinka icakuti tutalakwanisya ukusimikila uku antu yonsi wenga na wenga lino impela itatala iza.
8. Iuzyo cii lino tungayuzya pali vino Yeova alacita pa kupingula antu? (Loliniko ni vikope.)
8 Vino twalandapo vingalenga tuyuzye mauzyo aakuti: Cilaya uli kuli yano yatalakwata isyuko lya kuvwa ukwi lyasi lisuma lino impela itatala iza? I vyani vino Yeova alino na Yesu yalacita uku antu yaa? (Yoa. 5:19, 22, 27; Mili. 17:31) Ilembo apafumile icipande cii likuti “Yeova . . . asilonda umuntu ali wensi akononwe.” Lelo “akalonda antu yonsi yalapile.” (2 Pet. 3:9; 1 Tim. 2:4) Nanti icakuti twamanya ivintu vii pali Yeova, atatunena vino alacita ku antu atakweti isyuko lya kusambilila. Kwene tutanga tumanye vyonsi vino wacita nanti vino alacita.
I vyani vino Yeova alacita uku antu atalakwata isyuko lya kuvwa ukwi lyasi lisuma lino ucuzi ukalamba utatala watandika? (Lolini palaglafu 8) b
9. I vyani vino Yeova watusokolwela?
9 Yeova waomvya Baibo pa kutusokolwela vimwi vino alacita. Wakwe Baibo ikalanda ukuti Yeova alatuutulula antu “asi alungame” atakweti isyuko lya kuvwa ilyasi lisuma nu kusenuka. (Mili. 24:15; Luka 23:42, 43) Cii cingalenga tutandike ukuyuzya amauzyo na yauze acindame.
10. Amauzyo cii na yauze yano tungayuzya?
10 Uzye yonsi alafwa lino kulaya ucuzi ukalamba yatalakwata isyuko lya kutuutululwa? Malembo yakalondolola ukuti yayo aakakanya Yeova na yano alonona pa nkondo ya amagedoni yatalakwata isyuko lya kutuutuluka. (2 Tesa. 1:6-10) Nomba cilaya uli kuli yano yalafwa pa mulandu na mazanzo ya kuiponela nanti yano yalakomwa uku antu yauze? (Kasa. 9:11; Zaka. 14:13) Uzye antu yaa yangaya pa antu “asi alungame” alakwata isyuko lya kutuutuluka? tutamanya.
VINO TWAMANYA
11. Uzye lino kulaya Amagedoni, antu yalapingulwa ukulingana na vyani?
11 Twamanya ivintu ivingi pali vino vilacitika uku nkoleelo. Wakwe, twamanya ukuti lino kulaya inkondo ya amagedoni, antu yalapingulwa ukulingana na vino yacitanga uku ina yakwe Klistu. (Mate. 25:40) Yayo atungililanga apakwe alino na Klistu yalapingulwa ukuya imfwele. Nupya twamanya ukuti aina yakwe Klistu yamwi yalatwalilila ukuya pano nsi na pa cisila cakuti ucuzi ukalamba watandika lelo yalaya ukwi iyulu lino kwasyala panono ukuti Amagedoni atandike. Pa nsita yonsi ino apakwe yalatwalila ukuya pano nsi, antu yakwata isyuko lya kuyatungilila nu kuyazwa ukuombela pamwi umulimo uno yakaomba. (Mate. 25:31, 32; Kuso. 12:17) Umulandu ci uno icicindamila ukumanya vii?
12-13. I vyani limwi ivilacitika pa cisila cakuti antu yalola kuno “Babiloni Mukalamba” akononwa? (Loliniko ni vikope.)
12 Pa cisila cakuti ucuzi ukalamba watandika, yamwi yalalola vino “Babiloni Mukalamba” alononwa nu kwiusya ukuti ya Nte Yakwe Yeova ya lanzilepo pali vii. Uzye antu yaa yangaca yasenuke nu kutaila Yeova?—Kuso. 17:5; Ezek. 33:33.
13 Limwi ivilacitika vilakolana na vino vyacitike umu Ijipti umu manda yakwe Mose. Iusyini ukuti “impendwa ikalamba iya yantu yauze” yakonsile aina Izlaeli lino yafumanga umu Ijipti. Limwi yamwi yatandike ukutaila Yeova lino yalolanga kuno ivinkunka 10 vikucitika. (Kufu. 12:38) Uzye ndi cakuti ivyamusango uu vyaca vyacitika pacisila cakuti Babiloni Mukalamba ononwa, tulatandika ukwelenganya ukuti pasi umulinganya? Awe. Tulalondesya ukukolanya Tata witu uwa kwi iyulu, “Leza wa luse ni cikuuku, aasisoka zuwa, nupya uwaya sana nu kutemwa kwa cisinka ni cumi.” a—Kufu. 34:6.
Kulaya yamwi aliusya vino ya Nte Yakwe Yeova yalandanga lino yalola kuno “Babiloni Mukalamba” akononwa (Lolini mapalaglafu 12-13) c
14-15. Uzye ukukwata umi wa manda pe kwasintilila pa nsita ino umuntu wafwilapo nanti kuno akaikala? Londololini. (Masamu 33:4, 5)
14 Insita zimwi tunguvwa kuno yamwi yakulanda yakuti, “cingazipa ndi cakuti lupwa wane wafwile lino ucuzi ukalamba utatala watandika pakuti nkwate upaalilo wakuti alatuutuluka.” Kwaya ivikalenga yamwi ukulanda vivyo. Nomba ukukwata umi wa manda pe kutasintilila pa nsita ino umuntu wafwilapo. Yeova akapingula umumalilike. Upinguzi wakwe uwa mulinganya nupya ulungame. (Belengini Masamu 33:4, 5.) Tungasininkizya ukuti “kapingula uwa nsi yonsi” alacita icilungame.—Utan. 18:25
15 Ukukwata umi wa manda pe kutasintilila pali kuno umuntu akaikala. Yeova atalapingula antu akaikala umu ncende muno catala sana ukuvwa ukwi lyasi ilikalanda pa Wene ukuti “imbuzi”. (Mate. 25:46) Kapingula wa nsi yonsi mulungami wika sana amano nu ku antu kwene yaa. Tutamanya vino Yeova alacita lino kulaya ucuzi ukalamba. Antu yamwi yalakwata isyuko lya kusambilila pali Yeova nu kumutaila, lino alalenga izina lyakwe ukucindikwa.—Ezek. 38:16.
Pa cisila cakuti ucuzi ukalamba watandika, . . . Uzye kulaya alasenuka pa cisila ca kulola ivikucitika?
16. I vyani vino twamanya pali Yeova? (Loliniko ni cikope.)
16 Ukupitila umu kuisambilizya Baibo, twamanya vino Yeova wacindika umi wa antu yonsi. Wapeezile umwanakwe pakuti swensi kwene tungakwata isyuko lya kwikala amanda pe. (Yoa. 3:16) Swensi kwene twailolela vino Yeova watutemwa. (Eza. 49:15) Wamanya mazina itu swensi. Nupya watumanya ningo sana icakuti nanti twafwa alatutuutulula vi vikwene vino twali. (Mate. 10:29-31) Mu cumi, kwaya ivintu ivingi ivingalenga tusininkizye ukuti Tata witu uwa kwi iyulu uwaya nu kutemwa alapingula antu yonsi nu mulinganya nu luse.—Yako. 2:13.
Tungasininkizya ukuti Yeova alapingula antu yonsi nu mulinganya nu Luse (Lolini palaglafu 16)
17. I vyani vino tulasambilila umu cipande icalondelelapo?
17 Vino twasambilila vikulangilila ukuti umulimo uwa kusimikila iupamvya sana ndakai ukucila vino cali mpiti. Umulandu cii uno twalandila vii? Nupya i cani icikalenga twaombesya umu mulimo wa kusimikila? Icipande icalondelelapo cilasuka amuzyo yaa.
LWIMBO NA. 76 Uzye Mukauvwa Uli?
a Pa cisila cakuti Babiloni Mukalamba ononwa, aomvi yakwe Yeova yonsi yaleziwa lino yalazanzwa na Gogi wa ku Magogi. Yonsi alaya pa antu yakwe Yeova pa cisila ca kononwa kwakwe Babiloni mukalamba yaleziwa.
b ULONDOLOZI WA VIKOPE : Ivintu vitatu ivikalangilila ukuti tutalasimikila uku antu yonsi: (1) Umwanaci akaikala uku ncende kuno yainda umulimo witu uwa kusimikila, (2) Atwalane yakaikala uku ncende kuno kuli ivimvulunganya pa mulandu ni vikanza vya miteekele (3) Umonsi akaikala uku ncende kuno cingamutalila ukuvwa ukwi lyasi lisuma.
c ULONDOLOZI WA CIKOPE : Umwanaci uwatiile ukuombela Yeova wiusya vino wasambilile pa kononwa kwakwe “Babiloni mukalamba.” Wasenuka nu kutandika ukuombela Yeova nupya. Ndi cakuti vya musango uu vyaca vyacitika, Tulalondekwa ukukolanya Tata witu uwa kwi iyulu uwaya ni cikuuku nu kutemwa nu kuzangila pamwi na antu yaa.
