19 ШЫМЛЫШАШ СТАТЬЯ
22 МУРО Юмын Кугыжанышыже толжо!
Кугу орлык годым Иегова еҥ-влакым кузе судитлаш тӱҥалеш?
«Иктынат пытымыжым... [Иегова] ынеж уж» (2 ПЕТ. 3:9).
МЕ ШЫМЛЕН ЛЕКТЫНА
Кугу орлык годым Иегован лукмо решенийже-влак чын да справедливый лийыт манын, молан ме пеҥгыдын ӱшанен кертына.
1. Ме ойыртемалтше жапыште илена манын, молан каласаш лиеш?
МЕ ОЙЫРТЕМАЛТШЕ жапыште илена! Кажне кечын шинчана ончылно библийысе ончылгоч каласымаш-влак шукталтыт. Мутлан, ме ужына, кузе йӱдвел да кечывалвел кугыжа-влак тӱням вуйлатыме верч кучедалыт (Дан. 11:40). Тыгак ме ужына: Юмын Кугыжанышыже нерген поро увер чот шуко вере шаркалалтеш да миллион дене еҥ-влак Иеговалан служитлымым ойырен налыт (Ис. 60:22; Матф. 24:14). Эше ме шке жапыште моткоч шуко духовный кочкышым налына (Матф. 24:45—47).
2. Шушаш жап нерген чылажымат она пале гынат, мо шотышто ме пеҥгыдын ӱшанен кертына?
2 Иегова мыланна эркын умылаш полша, мо шушаш жапыште лиеш (Прит. 4:18; Дан. 2:28). Теве мом шотыш налаш кӱлеш: кызыт ме чылажымат она пале. Но ме пеҥгыдын ӱшанен кертына: кугу орлык тӱҥалме годым чыла кӱлешан шинчымашна лиеш, кузе ту неле жапыште Юмылан ӱшанле кодаш да иктылыкым аралаш. Тиде статьяште эн ончыч ончен лектына, молан ме кугу орлык годым лийшаш событий-влак нерген шонымынам вашталтенна. А вара мутланен налына, мом ме ончыкылык нерген палена да мом кавасе Ачана ышташ тӱҥалеш.
МОМ МЕ ОНА ПАЛЕ
3. Мом ме ойленна ту жап нерген, кунам еҥ-влакын Иегован калыкше дек ушнаш йӧн уже огеш лий, да молан ме тыге шоненна?
3 Ончыч ме тыге шоненна: кугу орлык тӱҥалме годым, кӧ Танык огыл, тудо Иегован калыкше дек ушнен да Армагеддоным илен лектын огеш керт. Ме тыгай иктешлымашым ыштенна, вет шоненна, пуйто Нойын жапыште лийше вӱд ташлымаш ончыкыжым лийшаш событий-влакын прообразше лийын. Ме тыге шоненна: кузе Иегова вӱд ташлыме деч ончыч ковчегын омсажым петырен, тыгакак кугу орлык тӱҥалме годым тудо, манаш лиеш, омсам петыра, да вара иктынат утаралташ йӧн огеш лий (Матф. 24:37—39).
4. Кызыт ме вӱд ташлымашым прообразлан шотлена мо? Умылтарыза.
4 Вӱд ташлымашым прообразлан шотлышаш улына мо? Уке. Молан? Молан манаш гын, Библий тыге шонашлан амалым огеш пу a. Чынак, Иисус толмо жапшым Нойын жапше дене таҥастарен. Но тудо каласен огыл, пуйто вӱд ташлымаш деч ончыч лийше событий-влак ончыкыжым кугурак масштабыште шукталтыт. Эше тудо ойлен огыл, пуйто кунам Иегова ковчегын омсажым петырен, тиде пророчестве семын лийын. Туге гынат тиде огеш ончыкто, пуйто Ной ден вӱд ташлымаш нерген историй мемнам нимоланат огеш туныкто.
5. а) Кузе Ной вӱд ташлыме деч ончыч ӱшанымашыжым ончыктен? (Еврей-влаклан 11:7; 1 Петрын 3:20). б) Таныклымашна Нойын служымашыж дене мо дене икгай?
5 Иегован шекландарымыжым колмеке, Ной ӱшанымашыжым ончыктен да ковчегым чоҥен шынден. (Еврей-влаклан 11:7; 1 Петрын 3:20 лудын лекса.) Тачат еҥ-влак, кудышт Юмын Кугыжанышыже нерген поро уверым колыт, колмо дене келшышын ыштышаш улыт (Ап. паш. 3:17—20). Петр Нойым чын нерген ойлышо манын (2 Пет. 2:5). Но кузе кодшо статьяште палдарыме лийын, лийшаш вӱд ташлымаш нерген кажныжлан увертарашлан Ной кугу таныклымаш кампанийым эртарен але уке, ме она пале. Таче Юмын Кугыжаныш нерген увер уло тӱня мучко йоҥга. Но чот шуко вийым пыштена гынат, тӱня пытыме деч ончыч ме кажне айдеме дене мутланен она сеҥе. Молан?
6, 7. Мучаш толмо деч ончыч кажне айдемылан поро уверым каласкален она керт манын, молан иктешлымашым ышташ лиеш?
6 Ончен лектына, мом Иисус таныклымаш паша нерген ойлен. Тудо ончылгоч каласен: «Кугыжанышын тиде Поро Увержым тӱня мучко каласкалат, тудыжо чыла калыклан таныклымаш лиеш» (Матф. 24:14). Тиде ончылгоч каласымаш эше нигунамат тынар чот шаркалыме лийын огыл. Юмын Кугыжанышыже нерген увер 1 000 утла йылме дене йоҥга, да jw.org сайтлан кӧра еҥ-влак гыч шукышт тиде уверым колын кертыт.
7 Но тыгак Иисус тунемшыж-влаклан те «чыла ола-влакым эртен огыда шукто» манын каласен (Матф. 10:23; 25:31—33). Тиде теве мом ончыкта: тунемшыже-влак Иисусын судитлаш тӱҥалмыж деч ончыч кажне айдеме дене мутланен налын огыт шукто. Таче миллионло еҥ тушто ила, кушто эрыкын таныклаш ок лий. Тыгак кажне минут шӱдӧ дене йоча-влак шочыт. «Чыла калыклан, тукымлан, йылмылан да йыжыҥлан» поро уверым каласкалашлан ме чылажымат ыштена (Почм. 14:6). Но мучашын толмыжо деч ончыч ме кажне айдемылан поро уверым каласкален она шукто.
8. Иегован ончыкыжым лийшаш пунчалже-влак нерген могай йодыш-влак лектын кертыт? (Тыгак сӱрет-влакым ончыза.)
8 Сандене тыгай йодыш-влак лектыт: «Иктаж-кӧн кугу орлык тӱҥалме деч ончыч поро уверым колаш йӧнжӧ огеш лий гын, тудын дене мо лиеш? Иегова да Эргыже, кӧлан тудо судитлаш властьым ӱшанен пуэн, нунын дене мом ыштат?» (Иоан. 5:19, 22, 27; Ап. паш. 17:31). Тиде статьян тӱҥ почеламутыштыжо возымо почеш Иегова «иктынат пытымыжым... ынеж уж», а чылаштынат ӧкынымыштым ужнеже (2 Пет. 3:9; 1 Тим. 2:4). Туге гынат ме она пале, кузе тудо тыгай еҥ-влакым судитлаш тӱҥалеш, кӧн поро уверым колаш йӧнжат лийын огыл. Иегова мыланна тидым почын огыл. Мутат уке, тудо мыланна ойлышаш огыл, мом тудо ыштен але ышташ шона.
Иктаж-кӧн кугу орлык тӱҥалме деч ончыч поро уверым колаш йӧнжӧ огеш лий гын, Иегова тудын дене мом ышта? (8 абзацым ончыза.) c
9. Мом Иегова мыланна Библий гоч почын?
9 Но Иегован мом ышташ шонымыжо нерген мемнан икмыняр шинчымашна уло. Мутлан, тудо Библий гоч почын: чын огыл ыштыше-влакым тудо илышыш пӧртылта, кудыштын поро уверым колаш да илышыштым вашталташ йӧнышт лийын огыл (Ап. паш. 24:15; Лук. 23:42, 43). Тиде икмыняр йодышым шочыкта.
10. Могай эше йодыш-влак лектын кертыт?
10 Кӧ кугу орлык годым кола, нуным Иегова ылыжта мо але нуно ылыжмашлан ӱшан деч посна курымешлан колат? Библийыште возымо дене келшышын, Иегован тушманже-влак, кудыштым тудо да кавасе войскаже-влак Армагеддонышто пытарат, ылыжтарыме огыт лий (2 Фес. 1:6—10). Но мом каласаш лиеш тыгай еҥ-влак нерген, кӧ кугу орлык годым пуштмо лиеш але черлан, шоҥгеммылан але эҥгекыш логалмылан кӧра кола? (Эккл. 9:11; Зах. 14:13). Нине еҥ-влак гыч южышт у тӱняште ылыжше чын огыл ыштыше-влак коклаште лийыт мо? Ме она пале.
МОМ МЕ ПАЛЕНА
11. Еҥ-влакым судитлыме годым да шорык-влакым каза-влак деч ойырымо годым Иисус мом шотыш налеш?
11 Но ончыкылыкна нерген икмыняр шинчымашна уло. Мутлан, ме палена: Иисус еҥ-влакым судитлаш да шорык-влакым каза-влак деч ойыраш тӱҥалеш. Тидын годым тудо шотыш налеш, кузе нуно шӱрымӧ христиан-влак дене шкем кученыт (Матф. 25:40). Кӧ Иисуслан да шӱрымӧ христиан-влаклан полшен шоген, шорыклан шотлалтыт. Эше ме палена: кугу орлык тӱҥалме деч вара шӱрымӧ христиан-влак эше икмыняр жап мландыште лийыт да каваш Армагеддон тӱҥалме деч ончыч каят. Шӱрымӧ-влакын мландыште илымышт годым яндар чонан еҥ-влак нунылан пашаштым шукташ полшен кертыт докан (Матф. 25:31, 32; Почм. 12:17).
12, 13. «Кугу Вавилоным» пытарымым ужмеке, южо еҥ-влакын, очыни, могай реакцийышт лиеш? (Тыгак сӱрет-влакым ончыза.)
12 Кугу орлык тӱҥалме деч варат, очыни, южышт, кӧ «Кугу Вавилоным» пытарымым ужеш, шарналта: «Иегован Таныкше-влак уже шукертак тиде событий нерген ойленыт». Тиде иктаж-кӧм Иегован могырышкыжо шогалаш тарата мо? (Почм. 17:5; Иез. 33:33).
13 Моисейын кечыже-влакым шарналтена. Египет гыч лекме годым израильтян-влак дене пырля тӱрлӧ калык гыч шуко еҥ каен (Исх. 12:38). Очыни, нунын гыч южышт лу казнь нерген Моисейын мутшо-влакын шукталтмыштым ужмеке, Иеговалан ӱшанен налыныт. Кугу Вавилоным пытарыме деч вара южо еҥ-влак Армагеддон тӱҥалме деч ончыч мемнан дек ушнат гын, тиде кумылнам волта мо? Конешне, уке. Ме кавасе Ачана гай лийнена. Тудо «поро кумылан да чаманыше, чытыше, ӱшанле йӧратымашан да чын дене темше Юмо» (Исх. 34:6) b.
Южышт, кӧ «Кугу Вавилоным» пытарымым ужеш, очыни, шарналтат: «Иегован Таныкше-влак уже шукертак тиде событий нерген ойленыт». (12, 13 абзац-влакым ончыза.) d
14, 15. Айдемын курымашлык ончыкылык илышыже кунам колымыж але кушто илымыж деч шога мо? Умылтарыза (Псалом 32:4, 5).
14 Южгунам тыгайым колаш лиеш: «Родем кугу орлык тӱҥалме деч ончыч кола ыле гын, сайрак лиеш ыле. Тунам тудын ылыжаш ӱшанже лиеш ыле». Мутат уке, тыгайым ойлышо порым гына тылана. Но айдемын курымашлык ончыкылык илышыже кунам колымыж деч ок шого. Иегова — эн сай судья. Тудо справедливый да чын решенийым луктеш. (Псалом 32:4, 5 лудын лекса.) Ме пеҥгыдын ӱшанен кертына: «чумыр мландын Судьяже» чын ышта (Тӱҥ. 18:25).
15 Эше теве тыгай иктешлымашым ышташ лиеш: айдемын курымашлык ончыкылык илышыже кушто илымыж деч ок шого. Таче миллион дене еҥ-влак тыгай эл-влакыште илат, кушто Юмын Кугыжаныш нерген уверым колаш йӧныштат уке. Тидым шотыш налын, Иегова нуным казалан шотлаш огеш тӱҥал (Матф. 25:46). Уло мландын чын ыштыше Судьяже мемнан дене таҥастарымаште нине еҥ-влак верч эше чотрак тургыжлана. Ме она пале, кузе Иегова кугу орлык годым событий-влакым виктараш тӱҥалеш. Но кунам тудо чыла калыклан святой улмыжым палдара, очыни, нине еҥ-влак гыч южышт тудлан ӱшанен налыт да могырышкыжо шогалыт (Иез. 38:16).
Кугу орлык «Кугу Вавилонын» пытарымыж гыч тӱҥалеш. Тиде иктаж-кӧм Иегован могырышкыжо шогалаш тарата мо?
16. Иегова нерген ме мом палена? (Тыгак сӱретым ончыза.)
16 Библийым шымлымылан кӧра ме пален налынна, мыняр чот Иегова айдемын илышыжым акла. Еҥ-влак курымеш илен кертышт манын, тудо Эргыжым пуэн (Иоан. 3:16). Ме чыланат ныжылге азапланымашыжым шижына (Ис. 49:15). Юмо кажнынан лӱмжым пала. Чынже денак тудо мемнан кажне ойыртемнам да кажне шарнымашнам пала. Сандене колена гынат, тудо мемнам ылыжтен кертеш (Матф. 10:29—31). Ме пеҥгыдын ӱшанен кертына: Иегова кажне айдеме шотышто чын пунчалым луктеш. Вет кавасе Ачана уш-акылан, чын ыштыше да чаманыше (Иак. 2:13).
Ме пеҥгыдын ӱшанен кертына: Иегова кажне айдеме шотышто чын пунчалым луктеш. Вет кавасе Ачана уш-акылан, чын ыштыше да чаманыше. (16 абзацым ончыза.)
17. Вес статьяште мом лончылен налына?
17 Нине рашемдымаш-влаклан кӧра ме умылена, мыняр чот кӱлешан таныклымаш пашана. Молан тыге каласаш лиеш? Тыршен таныклаш мемнам мо тарата? Нине йодыш-влаклан вашмутым ме вес статьяште пален налына.
76 МУРО Мом тый шижат, йолташ?
a Шукырак информацийым «Так было угодно тебе» статьяште муаш лиеш, «Орол башне» 15 март, 2015 ий, 7—11 стр.
b Кугу Вавилоным пытарыме деч вара, икмыняр жап эртымеке, Юмын калыкше ӱмбак Магог гыч Гог кержалтеш. Ту жапыште Иегован чыла служитлышыже-влак гына огыл, тыгак кугу орлык тӱҥалме деч вара нунын дек ушнышо-влакат тергыме лийыт.
c СӰРЕТ-ВЛАКЫШТЕ. Поро увер тӱня мучко шаркалалтеш гынат, чылашт огыл тудым колын кертыт. Теве кум амалже: 1) ӱдырамаш ила тыгай элыште, кушто тусо религийлан кӧра таныклаш лӱдыкшӧ; 2) еш мужыр ила тыгай элыште, кушто законлан кӧра таныклаш ок лий да лӱдыкшӧ; 3) пӧръеҥ тыгай кундемыште ила, кушко Иегован Таныкше-влак миен шуын огыт керт.
d СӰРЕТ-ВЛАКЫШТЕ. Самырык ӱдырамаш, кудыжо таныклымым да погынымашыш коштмым чарнен, «Кугу Вавилоным» пытарыме нерген библийысе ончылгоч каласымашым шарналта. Тиде тудым Иегова деч аралтышым кычалаш тарата, да тудо Танык улшо ача-аваж дек толеш. Языкым ыштыше-влакын Иегова дек пӧртылмыштым ужын, нунын верч куанымына шуэш да кавасе Ачана семын чаманыше да поро лиймына шуэш.
