ICIPANDE CA KUSAMBILILAMO 19
ULWIMBO 22 Uwufumu Wukuteka—Lekani Wize!
Vino Yehova Alipingula Awantu ku Nkolelo
“Imfumu [e Yehova] . . . asilonda ukuti wumwi ayize alowe.”—2 PET. 3:9.
VINO TWANDI TUSAMBILILE
Twandi tusambilile pe vino vingalenga tusuwile ukuti e Yehova alipingula awantu icete swinya mu wulungamane.
1. Amulandu ci wuno tungalandila ukuti tukwikala mu mpindi zya nsansa?
TUKWIKALA mu mpindi zya nsansa! Amuno cila mpindi tukulola kuno amasesemo yakuficiliswa. Ku cakulolelako, tukulola kuno “imfumu ya kukambazwa ke kamani” ni “mfumu ya kukambazwa ke ndilo” zikulwisyanya pa kuti zipokane insi. (Dan. 11:40) Swinya tukulola kuno ilyasi lizima likuwizwa insi yonsinye, na wantu awavule wakuzumila ukwivwa nu kusolapo ukuwombela Yehova. (Ayize. 60:22; Mat. 24:14) Cinji acakuti, tukapocelela ivya kulya vya ku muzimu “pampindi” injanane.—Mat. 24:45-47.
2. Avyani vino twasuwila, swinya avyani vino tuzipizile twakwizuka?
2 E Yehova watwalilila ukutwavwa ukwivwicisya ivintu ivicindame vino vyandi vicitike nombanye. (Imilu. 4:18; Dan. 2:28) Twasuwila ukuti pa kuti uwucuzi wukulu wize wutalike, lyo twamanya ivintu ivivule vino viliwalondekwa pakuti tutwalilile ukuwa ni cisinka nu kusipicizya peyoyo impindi intale. Lelo tuzipizile twakwizuka nu kuti, kwawa ivintu vino tutamanya vyo vilicitika ku nkolelo. Acino mwe co-o icipande, twatalicila ukulanda pe vino vilenzile tupiluke mwe vyo twamanyile ukuti vilicitika ku nkolelo. Swinya twandi tulande na pe vino twamanya, na vino Umukwasi witu uwa kwi yulu alicita.
VINO TUTAMANYA
3. Twamanyile ukuti ciliwa wuli kwe wano asa Nte zya kwe Yehova nga ca kuti uwucuzi wukulu watalika, swinya acani cino calenzile tumanye wo-o?
3 Ku nsizi twamanyile ukuti uwucuzi wukulu nga watalika vye, wano asa Nte zya kwe Yehova wataliwa nu longo lwa kusuwila Yehova nu kupusuka pa Armagedoni. Twamanyile wo-o, pa mulandu wa kuti twalolanga ngati amazwi yano yakalanda pa ntalala awusesemo wuno wukalanda pe vino vilicitika ku nkolelo. Ku cakulolelako, twelenganyanga ukuti ndi wulyanye vino kutalinji nanti wumwinye wino winjizile mu ciwato pano Yehova wiyazile icisakati, avino kutaliwa nanti wumwinye wino aliwa nu longo lwa kusuwila Yehova nu kupusuka nga cakuti uwucuzi wukulu watalika.—Mat. 24:37-39.
4. Uzye pe yo-o impindi twandi twalola ngati vino vyacitisile pa ntalala awusesemo? Londololani.
4 Tutazipizile twalola ngati vino vyacitisile pantalala awusesemo we vino vilicitika ku nkolelo. Amulandu ci? Amuno kutawapo amawaliko ayali yonsinye yano yakalanda ukuti awusesemo. a Kweni e Yesu wakolinye ‘impindi yakwe Nowa’ ku mpindi ya kwiza kwakwe. Lelo atasuzile mu kuti vyonsinye vino vyacitikanga, ponga ngati akwiyala kwa cisakati, umuntu wenga na wenga wino walinjiko nanti ivintu vye vinji, vimililangako vino vilicitika ku nkolelo. Ko-o ukupiluka kutakusula mu kuti tutazipizile ukusambililako kwi lyasi lya kwe Nowa na kuntalala.
5. (a) Uzye e Nowa walanjizizye wuli ukuti walinji ni suwilo pano intalala yitani yize? (Waheberi 11:7; 1 Peter 3:20) (b) Uzye umulimo wa kuwizya mu mpindi ya kwe Nowa wakolana wuli na pe yo-o impindi?
5 Pano e Nowa wivwile ukusoka kwa kwe Yehova, wizile alanjizya ukuti walinji ni suwilo ukupitila mukutalika ukuzenga iciwato. (Wazyani Waheberi 11:7; 1 Peter 3:20.) Wonye avino cawa na mwe yanye amanda. Awantu wano wivwa ilyasi lizima pa Wufumu wa kwe Leza, wazipizile ukulanjizya ukuti wawa ni suwilo ukupitila mwe vino wakucita. (Imili. 3:17-20) E Peter walanzile ukuti e Nowa “wawizyanga ivyawulungamane.” (2 Pet. 2:5) Lelo ndi vino twasambilizile mu cipande cino cafumileko, tutamanya nga cakuti wawizizizye awantu wonsinye munsi wano walinjiko pano Intalala yitani yitalike. Nasweswenye mwe ya-a amanda, tukakwelezya ukuwizizyako awantu ukuzinguluka insi yonsinye swinya tukawombesya ukufika pano papelezile amaka yitu. Lelo nanti ciwe wo-o, tutanga tukumanisye ukuwizizya awantu wonsinye pano insilo yitani yize. Amulandu ci?
6-7. Amulandu ci wuno tungalandila ukuti tutalikumanisya ukuwizizya awantu wonsinye wenga na wenga munsi pano insilo yitani yize? Londololani
6 Lekani tulande pe vino Yesu walanzile pa mulimo wa kuwizya. Walandizile lyankani ukuti ilyasi lizima liliwizwa “munsi yonsi liwe achipanichisyo kumyiko yonsi.” (Mat. 24:14) Wo-o uwusesemo wukuficiliswa mwe ya-a amanda. Ilyasi lizima likuwizwa mu vitundu ukucila pe 1,000. Swinya awantu awavule ukuzinguluka insi yonsinye, wangasambilila ilyasi lizima pa Wufumu ukuwomvya e webusayiti yitu iya jw.org.
7 E Yesu wanenile awasambi wakwe ukuti pano atani ayize mukupingula awantu, alizana ‘watani wamale ukuwomba umulimo mu twaya’ nanti ukusambilizya awantu wonsinye. (Mat. 10:23; 25:31-33) Ya-a amazwi yakasula mukuti awasambi wakwe watalikumanisya ukuwizizya awantu wonsinye wenga na wenga munsi pano atani ayize mukupingula awantu. Amuno awavule wakakwikala mu ncende muno wawinda umulimo wa kuwizya. Swinya cila wanda awana wakukwatwa. Tukawomba ukufika pano papelezile amaka yitu ukuwizizya “awantu wamyiko namyiko, awandimi ndekane-lekane” ilyasi lizima. (Ukuwu. 14:6) Lelo icisinka acakuti, tutalikumanisya ukuwizizya awantu wonsinye wenga na wenga munsi pano insilo yitani yize.
8. Amawuzyo ci yano mpindi zimwi tungayikolowozya? (Lolani ni vikope.)
8 Mpindi zimwi tungayikolowozya ukuti: Uzye ciliwa wuli kwe wano walilanga watani wawe nu longo lwakusambilila icine pano uwucuzi wukulu wutani wize? Uzye e Yehova nu Mwana wakwe e Yesu wino wapa umulimo wakupingula, walicita wuli kwe wa-a awantu? (Yoha. 5:19, 22, 27; Imili. 17:31) Iwaliko pano pasimfilwe co-o icipande likuti e Yehova “asilonda ukuti wumwi ayize alowe” lelo “akalonda wonsi watontolokwe kuluwembu lwawo.” (2 Pet. 3:9; 1 Tim. 2:4) Ya-a amazwi yakatwavwa ukumanya vino Yehova akayivwa. Nomba tutamanya vino alicita kwe wa-a awantu. Nu kuwanye e Yehova asilondekwapo nu kutunena vino alicita.
Vino Yehova alicita kwe wano wataliwa nu longo lwakwivwa kwi lyasi lizima pano uwucuzi wukulu wutani wutalike. (Lolani paragrafu 8) c
9. Avyani vino Yehova watunena mwe Baibolo?
9 E Yehova wawomvya Izwi lyakwe e Baibolo pa kutusokololela vimwi vino alicita. Ku cakulolelako, watunena ukuti alizyulupula wano “wasa walungamane,” wano wasitela wawepo nu longo lwakwivwa kwi lyasi lizima nu kupiluka. (Imili. 24:15; Luk. 23:42, 43) Co-o icisinka cikalenga tutalike ukuyikolowozya amawuzyo na yanji.
10. Amawuzyo ci yanji yano tungayikolowozya?
10 Uzye wonsinye wano walifwa mu wucuzi wukulu watalizyulupuka? Amawaliko yatapita na mumbali ukulanda ukuti wonsinye wano wakakana Yehova, wano aliyonona pa Armagedoni, watalitela wazyulupuke. (2 Tes. 1:6-10) Nomba ciliwa wuli kwe wano walifwa pa mulandu na mawusanso, uwukote, ukulwalilila, ukuwakoma nanti pa mulandu vye na vinji vino viliwacitika? (Ekawi. 9:11; Zaka. 14:13) Uzye wamwi pe wa-a wangiza wawe pe wano “wasa walungamane” wano walizyulupuka munsi mpya? Kweni tutamanya vino ciliwa.
VINO TWAMANYA
11. Uzye awantu waliwapingula ukulingana na cani pa Armagedoni?
11 Twamanya ivivule pe vino vilicitika ku nkolelo. Ku cakulolelako, twamanya ukuti pa Armagedoni, awantu walipingulwa ukulingana na vino wacitanga ku wanyina wa kwe Klistu awapakwe. (Mat. 25:40) Wano walipingulwa ukuti ang’onzi awawo wano wakatunjilila e Yesu ponga na wapakwe. Twamanya nu kuti awapakwe wamwi walilanga wali munsi pawucuzi wukulu swinya waliya kwi yulu lyo kwasyalavye katici ukuti e Armagedoni yitalike. Fwandi wo-o vino walilanga wali munsi na pawucuzi wukulu, awantu walitwalilila ukuwa nu longo lwakuwatunjilila nu kuwavwa ukuwomba umulimo wawo. (Mat. 25:31, 32; Ukuwu. 12:17) Amulandu ci wuno ukumanya vyo-o ivisinka kwacindamila?
12-13. Avyani vino wamwi wangiza wacite nga walola e “Babiloni Mukulu” wononwa? (Lolani ni vikope.)
12 Na pano uwucuzi wukulunye wutani wutalike, awantu wamwi walila walola vino viliwacitika, ponga ngati akononwa kwe “Babiloni Mukulu,” ncepamwi wangiza wizuke ukuti vyo-o avino Inte zya kwe Yehova zyalandangapo pa myaka imivule. Uzye wamwi wangiza wapilule imyezo yawo nu kusuwila Yehova nga ca kuti walola ivya musango vyatalika ukucitika?—Ukuwu. 17:5; Ezek. 33:33.
13 Vino vilicitika ku nkolelo vilikolana na vino vyacitisile mu Egypt mu mpindi zya kwe Musa. Nga mukwizuka impendwa “yawantu wanji” wano wakonsile awina Israeli pano wafumanga mu Egypt, yalinji ankulu. (Ukuf. 12:38) Wamwi pe wa-a, wafwile watalisile ukusuwila Yehova pano waweni Ivikunka 10 vino Musa walanzilepo vyaficiliswa. Nga mwemwe muliyivwa wuli ukuzana ukuti muli ponga na wantu wano wacitanga iviwipe lyo kwasyalavye katici ukuti e Armagedoni yitalike? Mutiza muyivwe uwuwi! Tukalonda ukukolanya Umukwasi witu uwa kwi yulu e ‘Leza wino wizula ninkumbu nu luse, wino asifulwa zuwa, swinya wino akalanjizya ulukundo lwakwe nu kusuwilwa kwakwe.’ b—Ukuf. 34:6.
Wamwi wano walilolako pano “Babiloni Mukulu” aliwakononwa, ncepamwi waliyizuka ukuti vyo-o avino Inte zya kwe Yehova zyalandangapo pa myaka imivule (Lolani amaparagrafu 12-13) d
14-15. Uzye impindi yino umuntu wafwilapo nanti kuno akakwikala avino vililenga ayize awe nu wumi wamuyayaya? Londolani. (Amalumbo 33:4, 5)
14 Mpindi zimwi mungivwa awanawitu na wankazi wamwi wakulanda pa lupwa lwawo wano wasilongana ukuti, “Cingazipa nga wafwile pano uwucuzi wukulu wutani wize pa kuti ayize awe nu longo lwa kuzyulupuka.” Kweni ukwelenganya kwa musango wo-o kutawipa, amuno lyo mukulonda ivizima vize viciticile e lupwa lwinu. Lelo mwakwizuka ukuti impindi yino umuntu wafwilapo asa yino yililenga awe nu wumi wamuyayaya. E Yehova we kapingula umufikepo, na vyonsinye vino akapingula vikawa icete swinya ivya mulinganya. (Wazyani Amalumbo 33:4, 5.) Tungasuwila ukuti e “Kapanzya wa nsi yonsi” alicita vino avizima.—Inta. 18:25.
15 Cinji acakuti, kuno umuntu akakwikala asa kuno kungalenga ayize awe nu wumi wamuyayaya. Swinya e Yehova atalipingula awantu awavule ukuti “ambuzi,” pa mulandu vye wakuti wakakwikala ku ncende kuno wasitela wawepo nu longo lwa kusambilila pa Wufumu. (Mat. 25:46) E Kapingula wansi yonsi wawikako sana amano kwe wa-a awantu, ukucila na pe vino sweswe tukayivwa. Tutamanya vino Yehova alitantika ivintu mu wucuzi wukulu. Ncepamwi wamwi waliwa nu longo lwa kusambilila pe weliwe, ukumusuwila nu kuwa kuluwali lwakwe, pano alilenga izina lyakwe ukumanyikwa ku nko zyonsinye.—Ezek. 38:16.
Uzye wamwi wangiza wapiluke nga walola, . . . vino vikucitika pano uwucuzi wukulu wutani wutalike?
16. Avyani vino twamanya pe Yehova? (Lolani ni cikope.)
16 Ukuyisambilizya Baibolo kwalenga tumanye vino Yehova wacindamika uwumi. Watupa uwumi wa mwana wakwe pa kuti swensinye tuwe nu longo lwakwikala umuyayaya. (Yoha. 3:16) Twalola vino watukunda. (Ayize. 49:15) Swinya watumanya amazina wenga na wenga. Ni cicindamisye acakuti, watumanya nkaninye, nga twafwa angatupanga naswinyanye wulyanye vino twalinji. (Mat. 10:29-31) Fwandi twawa ni milandu yino yalenga tusuwile ukuti Umukwasi witu uwa kwi yulu alipingula umuntu wenga na wenga mu wulungamane, amuno wawa na mano, uluse swinya wafikapo.—Jemu. 2:13.
Twasuwila ukuti Umukwasi witu uwa kwi yulu alipingula umuntu wenga na wenga mu wulungamane, amuno wawa na mano, uluse swinya wafikapo (Lolani paragrafu 16)
17. Avyani vino tulisambilila mu cipande cino cikonsilepo?
17 Ko-o ukwivwicisya ukupya kuno kuli mwe co-o icipande, kwatwavwa ukulola ukuti tuzipizile ukutwalilila ukuwombesya nkaninye mu mulimo wakuwizya. Amulandu ci wuno twalandila wo-o? Acani cino cingatwavwa ukutwalilila ukuwomba umulimo wa kuwizya? Vyo-o, avino tulisambilila mu cipande cino cikonsilepo.
ULWIMBO 76 Uzye Mukakwivwa Wuli?
a Nga mukulonda ukumanyilapo na vinji pe cino kuwezile ko-o ukupiluka, lolani icipande ca kuti “Ifi E Fyo Mwalefwaya” mu Ulupungu lwa kwa Kalinda ulwa March 15, 2015 amafwa 7-11.
b Nga cakuti e Babiloni Mukulu wiza wononwa, awantu wa kwe Leza waliyelezwa pano kuliwa ukusansa kwa kwe Gogi wa ku Magogi. Swinya na walyanye wano waliwa ku luwali lwawo, na wonye waliyelezwa.
c UKULONDOLOLA IVIKOPE : Ivikope vitatu vikulanjizya cino calenga wamwi watawa nu longo lwakwivwa ilyasi lizima: (1) Umwanaci wino akakwikala ku ncende kuno imipepele ya wina Klistu yitamanyikwa nkani, (2) Awatwalane wikala ku ncende kuno uwuteko wawinda wa Nte ukusambilizya pe Yehova, ne (3) Umonsi wikala ku ncende zya mukasi nkaninye kuno asa cipepuke awantu wanji ukuya mu kufikako.
d UKULONDOLOLA ICIKOPE: Umwanaci wino walesile ukuwombela Yehova wizuka vino wasambilizile pa kononwa kwe “Babiloni Mukulu.” Wapiluka nu kunyocela ku wakwasi wakwe wano wakalongana. Nga cakuti ivya musango wo-o viza vyacitika, twize twakwelenganya pe vyo Umukwasi witu uwa kwi yulu wawa nu luse ni nkumbu, nu kusecelela ukuti umuwembu wanyocela kwe Yehova.
