19ǁÎ ǁKHĀǁKHĀǃÂS
22ǁÎ ǁNAETSANAS Gaosib ge go ǂgaeǂgui tsoatsoa—Ab hā reǃ
Jehovab khoena hānîǁaeb ǃnâ nî ǀgoraǃgâ ǀgaub xa da tae-e a ǂan?
“ǃKhūb ge . . . khoe-i nî kāǁō ǃkhaisa ǂgao tama” hâ. —2PET. 3:9.
ǁKHĀǁKHĀSEN DA NÎ XŪN
ǂGomǃgâ ǁkhā da ge a Jehovab ga khoena hānîǁaeb ǃnâ ǀgoraǃgâ, ob hoaǁae ǂhanu xū-e nî dīsa.
1. Tae-i ǃaroma da a mî ǁkhā ǀō-aisa ǁaegu ǃnâ da ûi hâ ti?
KAISE da ge ǀō-aisa ǁaeb ǃnâ ûi hâ. Mâtsēs hoasa da ge ra mû, mati-i Elobmîs kēbode ra dīǀoaǀoahe ǀgausa. Aiǁgause da ge ra mû, “ǃkhawagas di gao-aob” tsî “gao-aob ǀapas dib” tsîn mati ra ǃkham ǀgausa, mâp hoab ǃhūbaiba ra ǂgaeǂgui ǂgao amaga. (Dan. 11:40) Mû da ge ra matis ǃgâiǂhôas Elob Gaosib disa ǃhūbaib ǂhawase ra aoǁnâhe ǀgausa tsîn miliundi khoena ra ǁhûisa în Jehovaba ǃoaba. (Jes. 60:22; Mat. 24:14) ǂÂuna gagasi ǂûna da ge “ǂhanu ǁaeb ai” ra hō.—Mat. 24:45-47.
2. Tae-e da a ǂgomǃgâ ǁkhā xawe tae-e da nî mûǂan?
2 Jehovab ge aiǃgû tsî ra huida î da ǁnâuǃā ǂhâǂhâsa xūn ǀgūǁae nî īna. (ǂKhm. 4:18; Dan. 2:28) ǂGomǃgâ ǁkhā da ge a kai ǁgâiǀāb ga tsoatsoa, o da ǂhâ da hâ xūna nî ǂansa î da ǂgomǂgomsase mâǀgai tsî ǀguiǃnâxase nē ǃgom ǁaeb ǃnâ mâǃkharu ǁkhā. Xawe da ge nî mûǂan ǀnî xūn hâsa sida a ǀūna hānîǁaeb ǃnâ nî īna. Nē ǁkhāǁkhāǃâs ǃnâ da ge ǂgurose nî ǃhoaǃgao, tae-i ǃaroma da go ǀkharaǀkharana dīsa mî da go xūn xa. Tsî da ge nî ǃhoaǃgao ǂan da a xūna hānîǁaeb xa tsî sida di ǀhomsi ǁGûb tae-e nî dīsa.
ǀŪ DA A XŪN
3. Jehovab ǃnâ ǂgoms ǃēsa hō tide ti da ge ǂâi hâ i khoen xa tae da ge mî tsî tae-i ǃaroma da ge ti ǂâi hâ i?
3 ǃKharuge ǁaeb ǃnâ da ge ge mî kai ǁgâiǀāb ga tsoatsoa, o i Jehovab ǃnâ ǂgom tama khoena ǃēsa hō tidesa în ǁîba ǃoaba tsî Armagedonsa ûiǃkharu. Ti da ge ge mî ǂâi da ge amaga mâ khoe-i hoa-i, tamas ka io ī ge xū-i hoa-i kai ǁgammi dâus tawa xū-e ra ǂnûǁkhaesa hānîǁaeb ǃnâ nî ī-e. Aiǁgause da ge ge ǂâi hâ i Jehovab ge arki dao-amsa a ǂgan-am tsî i ge khoe-i xare-e ǂgâ ǁoa i, khamib ge kai ǁgâiǀāb ga tsoatsoa, o ǁnā ‘dao-amsa nî ǂgan-am’ î-i khoe-i xare-e tā ǂgâ.—Mat. 24:37-39.
4. Tae-i ǃaroma da Noaxi tsēdi ǃnâ ge ī xūn sida ǁaeb ǃnâ nî dīǀoaǀoahe ti mî tama? ǁGuiǃā re.
4 ǂHanu-e mî da ga o kai ǁgammi dâus dawa ge ī xū-i hoa-i hānîǁaeb ǃnâ nî ī xū-e ra ǂnûǁkhaebasa? Hî-î. Tae-i ǃaroma? Elobmîs nēti-i xū-i xa xū-e mî tama hâ amaga. a Ama-as ge Jesub ge ‘Noaxi di tsēde’ ǁîb hās ǀkha a ǀopeǀnōsa. Xaweb ge ge mî tama hâ i Noaxi tsēdi ǃnâ ge ī xūn kai ǂâibasensa nētsē ūhâsa. Jehovab ge arki dao-amsa aiǁgause a ǂganam khami. Nēs ge ǂâibasen tama hâ sida Noaxi tsî kai ǁgammi dâus ǃnaeǃkhaisa xu xū-e ǁkhāǁkhāsen tama hâ ti.
5. (a) Noaxa mati ǂgomsa ge ǁgau kai ǁgammi dâus aiǃâ? (Hebreǁîn 11:7; 1 Petrub 3:20) (b) Aoǁnâ sîsenni ǃnâ i mati sida mâsib tsî Noaxi tsēdi tsîna a ǀgui?
5 Noaxi ge Jehovab ǃkhâikhoms haisi-amsab ge ǁnâu, o ge ǁgau ǂgomsab ūhâsa arka oms ǃnâ-ū. (Khomai re Hebreǁîn 11:7; 1 Petrub 3:20 sa.) ǁKhā ǀgaub ain ge ǃgâiǂhôas Elob Gaosib disa ra ǁnâu khoena ǂgomsa nî ǁgau dīn ra xūn ǃnâ-ū. (ǃNǃkh. 3:17-20) Petrub ge Noaxa ‘ǂhanu-aisib di aoǁnâ-aob’ ti ge ǂgai. (2Pet. 2:5) ǃKharugo ǁkhāǁkhāǃâs ǃnâ da go ǃhoaǃgao khami da ge a ǀū, Noaxi ge kai ǁgammi dâus aiǃâ hoa khoen ǁnā ǁaeb ai ge ǃhūbaib ai ûi hâ-ina a aoǁnâbasa. Nētsē da ge ǃhūbaib ǂhawase ra dīhe aoǁnâ sîsenni ǃnâ ra ǁhao. ǁKhoaǂgaosib ǀkha da ge ǁnāsa ra dī. Matikōse da ga ǃgarise dītsâ xawe da ge ǃhūbaib ai hâ khoen hoana aoǁnâba hō tide ǀams nî hās aiǃâ. Tae-i ǃaroma?
6-7. Tae-i ǃaroma da a mî ǁkhā ǃgâiǂhôasa da hoa khoen ǀkha ǀgoragu hō ǁkhā tidesa ǀams nî hās aiǃâ?
6 Jesub ge aoǁnâ sîsenni xa mî xū-i xa ǂâi re. ǁÎb ge ge mî ǃgâiǂhôas “hoaraga ǃhūbaib ai nî aoǁnâhe, hoa ǁaedi” ǃaroma. (Mat. 24:14) ǁNā kēbos ge nētsē ra dīǀoaǀoahe. Gaosib haisi-ams ge 1 000 xa ǃnāsa gowagu ǃnâ jw.orgs internets ǂhaweb ai hōhe ǁkhā. ǁNās xa ǃaromahe hâse î ge ǃnāsa khoen ǃhūbaib ai hâna ǃgâiǂhôas Elob Gaosib disa a ǁkhāǁkhāsen ǁkhā.
7 Jesub tsîn ge ǁîb saosabega ge mîba: “Hoa . . . ǃādi ǃnâ go sîsengu ǀkha toa,” tidesa tamas ka io mâ khoe-e hoa-en aoǁnâba hō tidesa ǁÎb nî hās aiǃâ. (Mat. 10:23; 25:31-33) Jesub di mîdi ge sida di tsēs ǃaroma a ama. ǂGui khoen ge nētsē ǃādi ǃnâ ra hâ sida hārase a aoǁnâ ǁoana. ǁNās ǂam-ai i ge ǂgui ǀgôarona mâ kamab hoaba ra ǃnaehe. ǁKhā da a-i hoa-e da ge ra dītsâ î da mâ “ǁaes, ǃhaos, gowab tsî khoen” hoana ǃgâiǂhôasa aoǁnâba. (J.ǂHa. 14:6) Ama-as ge ǃgâiǂhôas Gaosib disa da hoa khoen ǀkha ǀgoragu hō ǁkhā tidesa ǀams nî hās aiǃâ.
8. Mâ dîsa da a dî ǁkhā Jehovab hānîǁaeb ǃnâ khoena nî ǀgoraǃgâs xa? (Ai-īsiba mû re.)
8 Nē da go ǃhoaǃgao xūn ǃaroma i ge dîsa hâ, o khoen hîna ge ǃēsa ūhâ tama hâ in ǃgâiǂhôasa ǁnâusa kai ǁgâiǀāb nî tsoatsoas aiǃâ? Jehovab tsî ǁîb ǁGôab ǀgoraǃgâs ǁgaumâisa ūhâb tsîna mati ǁîna nî ǀgoraǃgâ? (Jhn. 5:19, 22, 27; ǃNǃkh. 17:31) Danaxoas nē ǁkhāǁkhāǃâs dis ge ra mî, “ǃKhūb ge . . . khoe-i nî kāǁō ǃkhaisa ǂgao tama” hâ. Xaweb ge “mâ khoe-i hoa-i nî ǃgâiǃō” ǃkhaisa ra ǂhâba. (2Pet. 3:9; 1Tim. 2:4) Nē xūna da Jehovab xa ǂan xawe da ge ra mûǂan ǁîb ge noxoba mîba da tama hâ matib khoena nî ǀgoraǃgâsa, ǃē-e ge ūhâ tama hâ ina ǃgâiǂhôasa ǁnâusa. Tsî ama as ge ǂhâbasa tama i hâsa ǁîb sida nî mîbasa.
Jehovaba ǁnān kai ǁgâiǀāb nî tsoatsoas aiǃâ ge ǃgâiǂhôasa ǁnâus ǃē-e ūhâ tama hâ ina mati nî ǀgoraǃgâ? (8ǁÎ xoaǀgorasa mû re) c
9. Jehovaba tae-e Elobmîs ǃnâ ra mîba da?
9 ǁÎb mîs ǃnâb ge Jehovaba ǀnî xūna mîba da hâ dīb nîna. Aiǁgause Elobmîs ge ra mîba da Jehovab ge “ǂhanuoǃnâ” khoena khâisa nî mâ ti, ǁnān hîna ge ǃē-e ūhâ tama hâ ina ǃgâiǂhôasa ǁnâusa tsî ǁîn di ǀgauga ǁnās ǃoagu dawasa. (ǃNǃkh. 24:15; Luk. 23:42, 43) Nēs ge ǂhâǂhâsa dîde ra hā-ū.
10. Mâ dîde da ūhâ?
10 Hoa khoen kai ǁgâiǀāb tawa ra ǁōna nî hîkākāhe ǀamosib kōse khâis di ǃâubasens ose? Xoadi ge ra ǃgāsa kai mâǃoa-aon Jehovab tsî ǁîb toroǂnubin xa ra hîkākāhen Armagedons tawa tātsē khâisa mâhe tidesa. (2Tes. 1:6-10) O nau khoen xa matis, aiǁgausen ge ǀnîna kai ǁgâiǀāb ǁaeb ǃnâ nî ǁō ǀaeb xa ǃaromahe hâse, tamas ka io kairasib xa, ǀnîn ge a ǃgamhe ǁkhā tsūgeǃgâgu ǃnâ tamas ka io ǀnî khoen xa a ǃgamhe ǁkhā? (Aoǁn. 9:11; Sax. 14:13) Nē khoena ǀnîsi ǁnān hîna a “ǂhanu-on” hîna khâisa nî hōn ǀāsa ǃhūbaib ǃnân di ǃâ? ǀGuiǃgupuse, ǀū da ge a.
ǂAN DA AN
11. Khoena tae-i ai ǃgaoǃgaosase Armagedons tawa nî ǀgoraǃgâhe?
11 ǀNî xūrona da ge a ǂan hanîǁaeb di ǃnaeǃkhaidi xa. Aiǁgause da ge a ǂan Armagedons ain ge khoena nî ǀgoraǃgâhe, Xristub di ǃgâsaga gu gere hâ-ū ǀgaub ai ǃgaoǃgaosase. (Mat. 25:40) Gūn ase ra ǀgoraǃgâhen ge ǂhauhesa ǃgâsan tsî Xristub tsîna gere ǂkhâǃnâ. Tsî da ge a ǂan Xristub di ǃgâsagu ǀnîgu noxoba ǃhūbaib ai hâ, hîna i kai ǁgâiǀāba nî tsoatsoasa tsî gu Armagedons nî tsoatsoas aiǃâi ǀhomma ǃoa nî īsa. ǀNî ǃgâsagu Xristub digu ǃhūbaib ai hâ hîna i ge a īǁkhā în khoena ǁîgu ra dī sîsen-e ǂkhâǃnâ tsî ǁîgu tsîna ǂkhâǃnâ. (Mat. 25:31, 32; J.ǂHa. 12:17) Nēsa tae-i ǃaroma a ǂhâǂhâsa?
12-13. ǀNî khoena tae-e nî dī mûn ga o “Babilons kais” ra hîkākāhesa? (Ai-īsiga mû re.)
12 Kai ǁgâiǀāb ga tsoatsoas khaoǃgân ge khoena nî ǂâihō Jehovab ǃoaba-aon ge ǂgui kurina a mîsa “Babilons kais” nî hîkākāhesa. ǀNîn Babilons kais ra hîkākāhe ǀgausa ga mûna, Jehovab ǃnâ ǂgomsa nî omkhâi?—J.ǂHa. 17:5; Ese. 33:33.
13 Nēti-i xū-i ga ī, o i ge Moseb ǀkha ge Egipteb ǃnâ ī xū-i ǀkha a ǀgui. ǂÂihō re “kai ǂnubis di khoen” ge Israelǁîn ǀkha Egipteba xu ge ǂoa. ǀNîn ge ǂgomsa ge omkhâi tsoatsoa, mûn ge o Moseb di ǃkhâikhomdi tsî disi ǁgaoǁgao-aidan ge ama kai o. (Eks. 12:38) ǁKhā xū-i ga ī o Babilons kais hîkākās aiǃâ, o da sida nî tsûaǂgao khoen ǀams go ǀgū ǁaeb ai ǀgui sida ǀkha ra ǁhao ǃkhaisa? Hî-i, sida ǀhomsi ǁGûb khami da ge ra ī ǂgao, ǃKhūb “ǀkhomxasib tsî ǀkhommi xa ǀoa hâ, ǃhaese ǁaixa tama tsî ǃnāǂamsa ǀnammi tsî ǂgomǂgomsasiba” ra ǁgauba. b—Eks. 34:6.
ǀNî khoen hîna “Babilons kais” ra hîkākāhe ǀgausa nî mûn ge nî mûǂan Jehovab ǃoaba-aon ge ǀnai nē ǃnaeǃkhais xa gere ǃhoasa (12-13ǁÎ xoaǀgorade mû re) d
14-15. Khoe-i di ǃâubasens ǀamo ûib disa ǁî-i mâpa ra ǁōs tamas ka io ǁî-i mâpa ra hâsa xu hâ? ǁGuiǃā re. (Psalmdi 33:4, 5)
14 ǀNî ǁaegu ain ge ǃgâsana ra mî ǁîn ǀaokhoen Jehovaba ǃoaba taman xa, “ǃgâi ga hâ ti în kai ǁgâiǀāb nî tsoatsoas aiǃâ ǁō, on khâis ǃâubasensa nî ūhâsa.” Nētin ga mî, on ge ǃgâiba ǁîn khoena ra ǁkhoreba. Xawe khoe-i di khâis ǃâubasens ge mâǁae i go ǁōsa xu hâ tama hâ. Jehovab ge ǃgâi ǀGoraǃgâ-aoba, ǁîb di mîǁguigu ge hoaǁae a ǂhanu. (Khomai re Psalmdi 33:4, 5 sa.) ǂGomǃgâ ǁkhā da ge a ‘hoaraga ǃhūbaib di ǀGoraǃgâ-aob,’ hoaǁae ǂhanu xū-e nî dīsa.—Gen. 18:25.
15 Mî ǁkhā da ge a khoe-i di ǀamo ûib ǃâubasens ge khoe-i mâpa ra hâsa xu hâ tama. Īǁoa i ge a Jehovab miliundi khoena “pīrin” ase nî ǀgoraǃgâ ǃkhaisa. ǁÎn ǀnî ǃhūgu ǃnâ ra hâ amaga tsîn ge ǁîna ǃē-e ūhâ tama hâ i ǃkhais ǃgao, în Gaosib di haisi-ams ǃoagu dawasen. (Mat. 25:46) Hoaraga ǃhūbaib di ǀGoraǃgâ-aob ge ǁnā khoen xa kaise ǁae hâ sida ǁîn xa ǁae hâs ǂam-ai. ǀŪ da ge a Jehovab taen hoana nî dīsa, kai ǁgâiǀāb ǁaeb ǃnâ. ǁÎn ga mû o taen kai ǁgâiǀāb ǁaeb ǃnâ ra īsa, on ge nē khoena ǀnîsi Jehovab ǃnâ ǂgomsa nî omkhâi ǁîb ga hoa ǃhūbaib ǃnâ ǁîb di ǀonsa ǂanǂan o.—Ese. 38:16.
Kai ǁgâiǀāb ga tsoatsoa toas khaoǃgân . . . ǀnî khoen nēsa ra mûna ǀnîsi a dawa ǁkhā?
16. Taena da Jehovab xa a ǂan? (Ai-īsiba mû re.)
16 Sida Elobmîs ôaǃnâdi ǃnâ-ū da ge ra mû, khoen kaise Jehovaba ǀō-aisaba ǃkhaisa. ǁÎb ǀGôab ûibab ge ge mā, î da sida hoada ǀamo ûib di ǃâubasensa ūhâ. (Jhn. 3:16) Sida hoada ge Jehovab di kai ǀnamma ge hōǃâ. (Jes. 49:15) ǁÎb ge sida hoada ǀons ai a ǂan. ǁNātikōseb ge ǃgâise a ǂan da, ǁō da ga ob ge khâisa nî mā da, ǁîb sida xa hâ xūn hoana ǃamkuse a ǂan xui-ao. (Mat. 10:29-31) Amase da ge ǃgâi ǃaromasa ūhâ î da ǂgomǃgâsiba ūhâ, sida ǀnamxaǃnâ ǁGûb gā-ai, ǂhanu-ai tsî ǀkhomxaǃnâ ǀgaub ǃnâ mâ ǀguiǀguibe khoe-i hoa-e ni ǀgoraǃgâ ǃkhaisa.—Jak. 2:13.
ǂGomǃgâsiba da ge a ūhâ ǁkhā, Jehovab mâ ǀguiǀguibe khoe-i hoa-e ǂhanu-ai tsî ǀkhomxaǃnâ ǀgaub ǃnâ nî ǀgoraǃgâsa (16ǁÎ xoaǀgorasa mû re)
17. Tae-e da saora ǁkhāǁkhāǃâs ǃnâ nî ǃhoaǃgao?
17 Nē ǁnâuǃā ǀgaub go nēsi a ǀkharaǀkharahe, o da ge ra mû sida aoǁnâ sîsenni matikōse ǁgariǁgarisa ǃkhaisa. Tae-i ǃaroma da ti ra mî? Tsî tae-e ra ǂkhâǃnâ da, î da ǃgâiǂhôasa ǁkhoaǂgaose aoǁnâ? Nē dîdi di ǃereamde da ge saora ǁkhāǁkhāǃâs ǃnâ nî ǃhoaǃgao.
76ǁÎ ǁNAETSANAS Nēsa mati ra tsâ?
a Nē ǀkharaǀkharan go dīhe ǃaromasa mûs ǃaroma, “This Is the Way You Approved,” ti hâ ǁkhāǁkhāǃâsa Maarti 15, 2015 ǃKhē xu ǂgō-ommi ǃnâ 7-11ǁî ǂhawegu ai mû re.
b Babilons kais di hîkākāhes khaoǃgân ge Jehovab di ǃoaba-aona nî ǃâitsâhe Gogi tsî Magogi ǁnā-ǂams ǃnâ-ū. Jehovab khoen ǀkhāb ai ra mâ khoe-i hoa-i tsîn ge Babilons kais di hîkākāhes khaoǃgâ nî ǃâitsâhe.
c AI-ĪSIBA ǁGUIǃĀS: ǃNona ai-īsigu ge ra ǁgau mati-ion ǀnîna ǃgâiǂhôasa ǁnâu tamasa: (1) Kaikhoes ge kerkheb ra ǂgaeǂgui ǃnâ ǃās ǃnâ ǁan hâ, (2) ǃgamme hâ khoe-aogu ra ǂgīǂgōsi ǃnandi ra ǂgaeǂgui ǃās, ǁkhōǁkhōsasib xa ǀoahe hâs ǃnâ ǁan hâ, tsî (3) khoeb ge kaise ǃnū ǃās ǃnâ ra hâ, khoen ǃgomse ra sība.
d AI-ĪSIBA ǁGUIǃĀS: ǂKhamkhoes Jehovaba ge ǃoaba ǀûs ge ra ǂâihō tae-es ge “Babilons kais” di hîkākās xa ǁkhāǁkhāsensa. ǁÎs ge ǀkharaǀkharasen tsî ǁîs Xristeǁî ǁgûra ǃoa ra oa. Nēti-i xūn xa ga ī o da ge sida ǀkhomxaǃnâ tsî ǀnamǀnamxa ǁGûb khami ra ī ǂgao. Tsî ra ǃgâiaǂgao nē khoe-i go Jehovaba ǃoa oaǀkhīsa.
