TLAMACHTILI 19
UIKATL 22 Xitlanauatiki nikaj
¿Tlake panos kema Jehová tetlajtolsenkauas?
Jehová “axkineki niyon se ma poliui para nochipa” (2 PED. 3:9).
TLEN MOIXTOMAS
Uelis timotemachisej, kema asis tonali, Jehová xitlauak kintlajtolsenkauas maseualmej.
1. ¿Kenke tikijtouaj tiitstokej ipan se tonali tlen tlauel ipati?
¡TIITSTOKEJ ipan se tonali tlen tlauel ipati! Mojmostla tikitaj kenijkatsa moaxitia tlen Biblia kiijtojtoya panoskia. Se neskayotl, tikitaj kenijkatsa moteuiaj “tlanauatijketl tlen norte” uan “tlanauatijketl ika sur” pampa san kinekij inijuantij tlanauatisej (Dan. 11:40). Nojkia, momoyaua nopa kuali tlamachtili tlen toTeotsij iTlanauatijkayo ipan nochi Tlaltipaktli uan miakej maseualmej kinextijtokej kinekij kitekipanosej Jehová (Is. 60:22; Mat. 24:14). Uan tijseliaj miak tlamachtili “kema kinamiki” (Mat. 24:45-47).
2. ¿Ipan tlake timotemachiaj uan tlake moneki tikilnamikisej?
2 Jehová techpaleuia nojua kuali ma tijkuamachilikaj tlen nechka mochiuas (Prov. 4:18; Dan. 2:28). Timotemachiaj kema peuas ueyi tlaijiyouilistli, ya tijmajtosej tlake tijchiuasej para amo tijtlauelkauasej Jehová uan tiitstosej sansejko. Pero moneki tikilnamikisej onka se keski tlamantli tlen amo tijmatij kenijkatsa panotias. Ipan ni tlamachtili, achtoui tikitasej kenke tijpatlakej kej tijkuamachiliyayaj se keski tlamantli tlen panos. Teipa tikitasej se keski tlamantli tlen kena tijmatij uan tlake kichiuas Jehová.
TLEN AMO TIJMATIJ
3. Achtouia, ¿tlake tikijtouayayaj kinpanoskia maseualmej kema peuaskia ueyi tlaijiyouilistli, uan kenke kiampa tikijtouayayaj?
3 Achtouia tikijtouayayaj kema peuaskia ueyi tlaijiyouilistli maseualmej ayokmo ueliskiaj kiixmatisej Jehová uan kintsontlamiltiskiaj ipan Armagedón. Kiampa tikijtouayayaj pampa timoiljuiyayaj nochi tlen panok kema tlauel uetski atl kiixnextiyaya tlen panoskia teipa. Tikijtouayayaj sanse kej Jehová kitsajki puerta tlen arca kema ayamo uetsiyaya atl, nojkia kejuak kitsakuaskia nopa puerta kem peuaskia ueyi tlaijiyouilistli uan yeka ayokmo aka ueliskia momanauis (Mat. 24:37-39).
4. ¿Kenke ayokmo tikijtouaj nochi tlen panok kema tlauel uetski atl kiixnextia tlen panos teipa?
4 ¿Kinamiki timoiljuisej tlen panok kema tlauel uetski atl kiixnextia tlen panoskia teipa? a Amo, pampa Biblia amo kiampa kiijtoua. Jesús kiijtok “sanse kej kema Noé itstoya” nojkia kiampa eliskia kema tlakuepilis. Pero amo kiijtok kema Jehová kitsajki puerta tlen nopa arca kiixnextiyaya tlen panoskia teipa. Maske kiampa, uelis tijyekosej miak tlamantli tlen ni tlapoualistli.
5. 1) ¿Tlake kichijki Noé kema ayamo tlauel uetsiyaya atl? (Hebreos 11:7; 1 Pedro 3:20). 2) Sanse kej Noé, ¿tlake amo uelis tijchiuasej?
5 Kema Jehová kiiljuik Noé tlen panoskia, ya kinextik kuali tlaneltokayaya, yeka nima pejki kichijchiua nopa arca (xijpoua Hebreos 11:7; 1 Pedro 3:20). Uajka, maseualmej katli kiseliaj nopa kuali tlamachtili, moneki kinextisej tlaneltokaj ika tlen kichiuaj (Hech. 3:17-20). Nojkia Pedro kiijtok, Noé “kinyolmelauayaya sekinok kejatsa ueliskiaj itstoskiaj xitlauak” (2 Ped. 2:5). Pero kej tikitakej ipan tlamachtili 18, amo tijmatij tlaj Noé kinmatiltik nochi maseualmej para tlauel uetsiskia atl. Ipan ni tonali, tojuantij tijchiuaj kampeka titlajtolmoyauasej ipan nochi Tlaltipaktli. Maske kiampa tijchiuaj, amo uelis tikinkamanaljuisej tlen Jehová nochi maseualmej. ¿Kenke kiampa tikijtouaj?
6, 7. ¿Kenke amo tikaxilisej tikinmachtisej nochi maseualmej? Xikixtoma.
6 Ma tikitakaj tlen Jesús kiijtok tlen tlajtolmoyaualistli. Ya kiijtok nopa kuali tlamachtili “momoyauas ipan nochi Tlaltipaktli para nochi altepemej uelis kikakisej” (Mat. 24:14). Uan ipan ni tonali tikitaj kenijkatsa moaxitia. Titlajtolmoyauaj ipan kipano mil tlajtoli, uan pampa eltok sitio jw.org miakej maseualmej ipan nochi Tlaltipaktli uelij kikakij nopa kuali tlamachtili.
7 Jesús nojkia kiniljuik itokilijkauaj amo tlamitlajtolmoyauaskiaj “ipan nochi altepemej”, pampa ya nima ualaskia tetlajtolsenkauaki uan ayokmo kiaxiliskiaj kinkamanaljuisej tlen Jehová nochi maseualmej (Mat. 10:23; 25:31-33). Tlen kiijtok nojkia panoskia ipan ni tonali. Tlauel miakej maseualmej itstokej kampa amo techkauaj ma titlajtolmoyauakaj. Nojkia, sejse minuto tlakatij miakej pilkonetsitsij. Yeka maske tijchiuaj kampeka tikinmachtisej maseualmej katli kampa ueli itstokej, katli kamanaltij seyok tlajtoli uan katli momajtokej kichiuaj sekinok tlamantli, amo uelis tikinmachtisej nochi (Apoc. 14:6).
8. ¿Tlake uelis timotlatsintokiaj? (Nojkia xikita tlaixkopinkayomej).
8 Uajka, uelis timotlatsintokiaj: “¿Tlake kinpanos katli amo tikaxilisej tikinpouilisej nopa kuali tlamachtili kema ayamo pejtos nopa ueyi tlaijiyouilistli? ¿Kenijkatsa Jehová uan iKone Jesucristo, katli kitekimakatok, kintlajtolsenkauasej nopa maseualmej?” (Juan 5:19, 22, 27; Hech. 17:31). Texto tlen kiyakana ni tlamachtili techilnamikilia Jehová “axkineki niyon se ma poliui para nochipa”. Ya kineki nochi ma moyolkuepakaj (2 Ped. 3:9; 1 Tim. 2:4). Pero namantsi Jehová ayamo techiljuia tlake kinpanos nopa maseualmej. Uan amo moneki timoiljuisej kinamiki techiljuis.
¿Tlake kichiuas Jehová ika maseualmej katli nama amo ueli kimatij tlen Biblia tlamachtia? (Xikita párrafo 8). c
9. ¿Tlake techiljuijtok Jehová ipan Biblia?
9 Ipan Biblia, Jehová techiljuijtok se keski tlamantli tlen kena kichiuas. Nopaya techiljuia kinyolkuis “katli kichijkej tlen amo kuali”, pampa amo uelkej kitlakakilijkej nopa kuali tlamachtili yon moyolkuepkej (Hech. 24:15; Luc. 23:42, 43). Nopa uelis kichiuas ma timochiuilikaj sekinok tlajtlanili.
10. ¿Tlake sekinok tlamantli uelis timotlatsintokiaj?
10 ¿Uan tlake kinpanos katli mikisej ipan ueyi tlaijiyouilistli? Biblia xitlauak kiijtoua ayokmo moyolkuisej katli Jehová uan iángeles kintsontlamiltisej ipan Armagedón pampa kiijixnamijkej (2 Tes. 1:6-8; 1:9, TNM; 1:10). ¿Uan tlake kinpanos katli mikisej ipan ueyi tlaijiyouilistli pampa mokokouaj o ya uejueyij, katli kinpanos se tlamantli tlen amo kuali o kinmiktisej? (Ecl. 9:11; Zac. 14:13). ¿Nojkia motlananasej se keskij tlen inijuantij ipan Xochimili kema moyolkuisej katli kichijkej tlen amo kuali? Amo tijmatij.
TLEN KENA TIJMATIJ
11. ¿Kenijkatsa kintlajtolsenkauasej maseualmej ipan Armagedón?
11 Pero kena tijmatij se keski tlamantli tlen panos teipa. Tijmatij ipan Armagedón kema kintlajtolsenkauasej maseualmej, kiitasej tlaj kinpaleuijkej Cristo iikniuaj o amo (Mat. 25:40). Katli kinextijkej kinpaleuiyayaj Cristo uan iikniuaj katli kintlapejpenijtokej yasej iluikak, kinitasej kej pilborregojtsitsij. Nojkia tijmatij se keskij Cristo iikniuaj, nojua itstosej ipan Tlaltipaktli kema ya mochijtos nopa ueyi tlaijiyouilistli, uan yasej iluikak kema nechka peuas Armagedón. Uajka, kema nojua itstosej ipan Tlaltipaktli katli kintlapejpenijtokej yasej iluikak, uelis se keskij maseualmej katli kuali ininyolo kinekisej kinpaleuisej inijuantij uan ika nopa tekitl tlen kichiuaj (Mat. 25:31, 32; Apoc. 12:17). ¿Kenke tlauel ipati ni tlamantli?
12, 13. ¿Tlake uelis kichiuasej se keskij maseualmej kema kiitasej ya kitsontlamiltijkej Ueyi Babilonia? (Nojkia xikita tlaixkopinkayomej).
12 Kema ya mochijtos ueyi tlaijiyouilistli, uelis se keskij katli kiitasej ya kitsontlamiltijkej “Ueyi Babilonia”, kiilnamikisej Jehová itlajtoltemakauaj miak xiuitl kiijtojkej kiampa panoskia. ¿Uelis se keskij kinekisej kiueyichiuasej Jehová? (Apoc. 17:5; Ezeq. 33:33).
13 Ma tikitakaj tlen panok kema itstoya Moisés. Kema israeleuanij kistejkej Egipto, nojkia yajkej ininuaya miakej “tlakamej tlen axisraelitajmej”. Uelis se keskij tlen inijuantij pejkej tlaneltokaj ipan Jehová kema kiitakej mochijki nopa matlaktli amo kuali tlamantli tlen Moisés kiijtojtoya mochiuaskia (Éx. 12:38). Tlaj kema ya kitsontlamiltijtosej Ueyi Babilonia se keskij maseualmej nojkia kinekisej kiueyichiuasej Jehová touaya, ¿timoiljuiskiaj amo kinamiki kiampa ma kichiuakaj? ¡Amo, amo kiampa timoiljuiskiaj! Tijnekij tijchiuasej kej Jehová katli tlauel tetlasojtla, kipia iyolo uan tlauel teiknelia (Éx. 34:6). b
Se keskij maseualmej kiitasej kema kitsontlamiltisej Ueyi Babilonia uan uelis kiilnamikisej Jehová itlajtoltemakauaj miak xiuitl tematiltijtinenkej kiampa panoskia. (Xikita párrafos 12, 13). d
14, 15. ¿Kenke tikijtouaj amo ipati tlaj se akajya mikis kema ayamo asi ueyi tlaijiyouilistli yon kanke mochantijtok? (Salmo 33:4, 5).
14 Uelis tijkaktokej se toikni katli se tlen ichampoyouaj amo kitekipanoua Jehová, kiijtoua: “Nijnekiskia ma miki kema ayamo peua ueyi tlaijiyouilistli, kiampa uelis moyolkuis ipan Xochimili”. Uelis kiampa moiljuia pampa kiiknelia. Tlaj se akajya mikis nama o teipa, amo kiijtosneki temachtli moyolkuis uan itstos nochipa. Jehová nochipa xitlauak tetlajtolsenkaua uan amo kema mokuapoloua ika tlen kitlapejpenia (xijpoua Salmo 33:4, 5). Timotemachiaj kichiuas tlen xitlauak pampa eli Juez tlen más ueyi ipan nochi Tlaltipaktli (Gén. 18:25).
15 Para se akajya uelis itstos nochipa, amo ipati kanke mochantijtok. Jehová amo kinitas maseualmej kejuak eliskiaj “chivojmej” san pampa itstoyaj kampa amo uelkej kitlakakilijkej nopa kuali tlamachtili (Mat. 25:46). Tlaj tojuantij techtekipachoua tlen kinpanos nopa maseualmej, timotemachiaj Jehová más kitekipachoua. Amo tijmatij tlake kichiuas Jehová ipan ueyi tlaijiyouilistli. Uelis se keskij tlen nopa maseualmej, kinekisej kiixmatisej Jehová uan peuas kineltokasej kema kiitasej moueyichiua itoka ipan nopa tonali (Ezeq. 38:16).
Kema ya pejtos ueyi tlaijiyouilistli, ¿uelis se keskij kinekisej kiueyichiuasej Jehová kema kiitasej tlen panotos?
16. ¿Tlake tijyekojtokej tlen Jehová? (Nojkia xikita tlaixkopinkayotl).
16 Ipan Biblia timomachtijtokej Jehová tlauel kipatiita tonemilis. Temaktilik iKone pampa kineki nochi ma tiitstokaj nochipa (Juan 3:16). Miakpa tikitstokej kenijkatsa Jehová tlauel techiknelia uan techtlasojtla (Is. 49:15). Ya kuali techixmati sejse tlen tojuantij. Yeka, tlaj timikisej uelis sampa techyolkuis kej tieliyayaj, pampa ya amo kema kiilkauas kenijkatsa tielij uan kej tinesij (Mat. 10:29-31). Tlen tikitstokej techpaleuia ma timotemachikaj Jehová kuali kintlajtolsenkauas nochi maseualmej pampa ya tlauel tlalnamiki, kichiua tlen xitlauak uan tlauel tetlasojtla (Sant. 2:13).
Uelis timotemachisej Jehová kuali kitlajtolsenkauas sejse maseuali pampa ya tlauel tlalnamiki, kichiua tlen xitlauak uan tlauel teiknelia. (Xikita párrafo 16).
17. ¿Tlake tikitasej ipan seyok tlamachtili?
17 Tlen nama tijyekojkej, techpaleuia ma tikitakaj tlauel ipati ma titlajtolmoyauakaj. ¿Kenke kiampa tikijtouaj? ¿Uan tlake techpaleuis nojua ma titlajtolmoyajtokaj? Ipan nopa seyok tlamachtili monankilis ni tlajtlanili.
UIKATL 76 Xinechiljui tlen tijyolmati
a Ipan tlamachtili “Jehová kipaktia techmachtis ika tlen amo ouij” tlen kiski ipan Tlen Tematiltia, ipan marzo 1, 2015, iamayo 8-12, moixtoma kenke se keski tlapoualistli tlen Biblia amo kiixnextia se tlamantli tlen teipa panos.
b Kema ya kitsontlamiltijtosej Ueyi Babilonia, Gog tlen Magog kinteuis toTeotsij itekipanojkauaj, uan nojkia nochi katli kinekisej kiueyichiuasej Jehová ipan nopa tonali.
c TLEN NESI IPAN TLAIXKOPINKAYOMEJ: Eyi tlaixkopinkayotl tlen kinextia kenke amo uelis tikinkamanaljuisej tlen Biblia nochi maseualmej: 1) Se siuatl itstok ipan se altepetl kampa mauilili titlajtolmoyauasej pampa miakej kipiaj seyok religión; 2) se tlakatl iuaya isiua itstokej kampa tekichiuanij amo techkauaj ma titlajtolmoyauakaj, yeka eli mauilili; 3) se tlakatl itstok kampa tlauel uejka, yeka eli tlauel ouij tiasitij nopaya.
d TLEN NESI IPAN TLAIXKOPINKAYOMEJ: Se siuatl katli achtouia kitekipanouayaya Jehová, kiilnamiki kimachtijkej kitsontlamiltiskiaj Ueyi Babilonia. Kitlapejpenia sampa kitekipanos toTeotsij, yeka tlakuepilia kampa itatauaj, katli kitekipanouaj Jehová. Tlaj kiampa panos, tijnekij tijnextisej titeikneliaj uan titetlasojtlaj kej Jehová uan tiyolpakisej pampa moyolkuepa se akajya.
