1. ¿Toni mochiujtok axkan tein Biblia kijtojka ke mochiuaskia?

 ITECH nejin tonalmej tikitanij keniuj mochiujtok tein Biblia achtook kijtojka ke mochiuaskia. Tikitaj keniuj moixnamikij “tekiuaj akin taixyekana norte” uan “tekiuaj akin taixyekana sur” porin kinekij kiixyekanaskej nochi taltikpak (Dan. 11:​40, nota). Uan no, itech nochi taltikpak moteixmatiltijtok kuali tanauatilmej uan miakej kiixtalijtokej kitekitiliskej Jehová (Is. 60:22; Mat. 24:14). No tikselijtokej miak tamachtilis keman okachi moneki (Mat. 24:​45-47).

2. ¿Toni tikneltokaj, uan toni moneki tikelnamikiskej?

² Jehová techpaleuia maj okachi kuali tikajsikamatikan tein panos amo uejkaua (Prov. 4:18; Dan. 2:28). Uelis tikneltokaskej ke keman peuas tetsaujkatajyouilis tikmatiskej tein techpaleuis maj amo tikauakan Jehová uan maj amo timoxexelokan keman okachi ouij yeski. Sayoj ke moneki tikelnamikiskej ke seki taman tein panos satepan amo tikmatij. Itech nejin tamachtilis, yekinika tikitaskej keyej tikpatanij kemej tikajsikamatiaj ke panoskia seki taman. Satepan tikitaskej seki taman tein kemaj tikmatij ke panos, uan toni kichiuas toTajtsin.

 TEIN AMO TIKMATIJ

3. ¿Toni tiknemiliayaj ke kinpanos sekin keman peuas tetsaujkatajyouilis, uan keyej ijkon tiknemiliayaj?

³ Achto tiknemiliayaj ke keman peuaskia tetsaujkatajyouilis, amo akinok ueliskia takuaujtamatis iuan Jehová nion makisas itech Armagedón. Ijkon tikneltokayaj porin tiknemiliayaj ke nochi tein panok keman tetsaujkakiouik kiixnextiaya tein panos satepan. Tikijtouayaj ke ijkon kemej Jehová kitsakuak arca achto ke peuaskia tetsaujkakiouit no ijkon tatsakuas keman peuas tetsaujkatajyouilis uan amo akinok uelis momakixtis (Mat. 24:​37-39).

4. ¿Keyej amo tikijtouajok ke nochi tein panok keman Noé nemia kiixnextia tein mochiujtok axkan?

⁴ ¿Uelis tiknemiliskej ke nochi tein panok keman tetsaujkakiouik kiixnextia tein panos satepan? a Amo, porin Biblia amo ijkon kijtoua. Jesús kijtoj ke keman mokepas yeski “kemej katka keman nemia Noé”. Sayoj ke amo kijtoj ke nochi tein panok keman Noé nemia mochiuaskia satepan, kemej ijkuak Jehová kitsakuak arca. Maski ijkon, tein panoka uelis techmachtis miak taman.

5. 1) ¿Toni kichiuak Noé achto ke tetsaujkakiouiskia? (Hebreos 11:7; 1 Pedro 3:20). 2) ¿Keniuj kemej tanojnotsaya Noé no ijkon axkan titanojnotsaj?

⁵ Keman Noé kikakik tein Jehová tanejmachtij kinextij ke iuan takuaujtamatia  porin kichijchiuak arca (xikonixtajtolti Hebreos 11:7; 1 Pedro 3:20). No ijkon, akin kikakij kuali tanauatilmej moneki kinextiskej ke takuaujtamatij ika tein kichiuaj (Hech. 3:​17-20). Pedro kijtoj ke Noé katka se takat “akin kiteixmatiltiaya tein kuali” (2 Ped. 2:5). Sayoj ke kemej tikitakej itech okse tamachtilis, amo tikmatij ox Noé kiniluij nochin akin nemiaj itech taltikpak ke tetsaujkakiouiskia. No ijkon, axkan timochikauaj titanojnotsaskej itech nochi taltikpak, uan semi tiyolpakij ijkon tikchiuaskej. Sayoj ke amo uelis tikinnojnotsaskej nochin achto ke Dios kiixpolos tein amo kuali. ¿Keyej ijkon tikijtouaj?

6, 7. ¿Keyej amo uelis tikinnojnotsaskej nochin achto ke ixpoliuis nochi tein amo kuali?

⁶ Maj tikitakan hasta kani kijtoj Jesús ke titanojnotsaskiaj. Yejua kijtoj ke kuali tanauatilmej moteixmatiltiskiaj “itech nochi taltikpak” uan ‘ijkon nochin ueliskia kikakiskej’ (Mat. 24:14). Uan axkan mochiujtok nejin tajtolmej. Tikteixmatiltiaj iTaixyekanalis Dios itech panoua mil tataman tajtolmej, uan kemej kalakij itech jw.org, okachi miakej kiixmatij kuali tanauatilmej.

⁷ Sayoj ke, Jesús no kiniluij imomachtijkauan: “Akin yolik kemej takat ejkos achto ke nantaminemiskej itech nochin uejueyi xolalmej tein pouij Israel”. Nejin kijtosnekia ke amo ueliskia kinnojnotsaskej nochin achto ke ualaskia (Mat. 10:23; 25:​31-33). Axkan miakej nemij kampa amo ueli se tanojnotsa, uan no, mojmostaj yolij miakej pilimej. Yejua ika, maski semi timochikauaskej titanojnotsaskej “itech tataman altepemej, itech tataman uejueyi kalyetonij, akin tajtouaj tataman tajtolmej uan tataman ininxolal”, ipa amo uelis tikinnojnotsaskej nochin achto ke ixpoliuis nochi tein amo kuali (Apoc. 14:6).

8. ¿Toni xa timotajtaniskej? (No xikonita taixkopimej).

⁸ Yejua ika, xa timotajtaniskej: “¿Toni kinpanos akin amo uelis kikakiskej kuali tanauatilmej achto ke peuas tetsaujkatajyouilis? ¿Toni kichiuaskej Jehová uan iKoneuj, akin kiixtalijtok maj kiita tein technamiki tikseliskej?” (Juan 5:​19, 22, 27; Hech. 17:31). Texto kampa mokixtia nejin tamachtilis techelnamiktia ke Jehová “amo kineki maj nion akin ixpoliui”, ta kineki maj “nochin moyolpatakan” (2 Ped. 3:9; 1 Tim. 2:4). Maski tikmatij nejin, Jehová ayamo techiluiani toni kiixtalis maj kinpano akin amo keman kinnojnotskej. Uan amo onkak keyej techiluis.

9. ¿Toni techmatiltiani Jehová itech Biblia?

⁹ Itech iTajtol, Jehová techiluiani seki taman tein kichiuas. Kijtoua ke kichiuas maj oksepa nemikan “akin amo yolmelaujkej” akin amo kiixmatkej kuali tanauatilmej uan nion no uelik moyolpatakej (Hech. 24:15; Luc. 23:​42, 43). Nejon xa kichiuas maj timotajtanikan okseki taman.

10. ¿Toni okseki taman xa no timotajtaniskej?

¹⁰ ¿Toni kinpanos akin mikiskej keman mochiujtos tetsaujkatajyouilis? ¿Ixpoliuiskej nochipaya uan amo uelis oksepa nemiskej? Biblia kijtoua ke akin kiixnamikiskej Jehová, yejua uan iángeles kinixpoloskej itech Armagedón uan amo oksepa nemiskej (2 Tes. 1:​6-10). Sayoj ke, ¿toni kinpanos akin mikiskej keman mochiujtos tetsaujkatajyouilis porin xiuejkejya  yeskij, kokoxkakuiskej, kinpanos teisa oso aksa kinmiktis? (Ecl. 9:11; Zac. 14:13). ¿No yeskij semej “akin amo yolmelaujkej” akin oksepa nemiskej itech xochital? Tein melauj, amo tikmatij.

TEIN KEMAJ TIKMATIJ

11. ¿Keniuj itech Armagedón moixtalis tein sejse kinamikis kiselis?

¹¹ Onkak miak taman tein kemaj tikmatij ke panos satepan. Tikmattokej ke itech Armagedón nochin kiseliskej tein kinnamiki komo achto kinextijkej ke kinpaleuijkej iikniuan Cristo oso amo (Mat. 25:40). Akin kinextiskej ke kinpaleuijkej taijitalmej uan Cristo kinitaskej kemej ichkamej. No tikmatij ke seki iikniuan Cristo kisentokaskej itech taltikpak keman mochiujtos tetsaujkatajyouilis uan kinuikaskej iluikak tepitsin achto ke peuas Armagedón. Yejua ika kemej sekin taijitalmej moajsijok nikan taltikpak, akin yolmelaujkej uelis kinpaleuiskejok uan iniuan tekitiskej (Mat. 25:​31, 32; Apoc. 12:17). ¿Keyej semi moneki maj tikmatikan nejin?

12, 13. ¿Toni xa kichiuaskej sekin keman kiitaskej ke kiixpoloskej “Ueyi Babilonia”? (No xikonita taixkopimej).

¹² Xa satepan ke peuas tetsaujkatajyouilis sekin akin kiitaskej keniuj kiixpoloskej “Ueyi Babilonia”, kielnamikiskej ke itaixpantijkauan Jehová miak xiujmej ipa kiteixmatiltijtoyajya ke ijkon panoskia. ¿Kichiuas nejon maj sekin takuaujtamatikan iuan Jehová? (Apoc. 17:5; Ezeq. 33:33).

¹³ Maj tiknemilikan tein panok keman Moisés nemia. Keman israelitas kiskej de Egipto, “no kintojtokateujkej tel miakej”. Xa sekin peuak takuaujtamatij iuan Jehová keman kiitakej ke mochiuak tein Moisés kijtojka ke panoskia (Éx. 12:38). Komo no ijkon panoua satepan ke kiixpoloskej Ueyi Babilonia, ¿tikualaniskej komo sekin kinekij touan kiueyichiuaskej Jehová achto ke ixpoliuis nochi tein amo kuali? ¡Amo! Tejuan tiknekij  tikchiuaskej ijkon kemej Jehová, “Dios akin teiknelia uan yolkuali, amo niman kualani, nochipa tetasojta uan nochipa kijtoua tein melauj” (Éx. 34:6). b

14, 15. ¿Moita kemanian momikilia aksa uan kani nemi para kiixtaliskej ox uelis nemis nochipaya? (Salmo 33:​4, 5).

¹⁴ Xa tikakinij ke se tokniuj kijtoua nejin de se ichankauj akin amo kitekitilia Jehová: “Nikuelitaskia maj momikili achto ke peuas tetsaujkatajyouilis para uelis oksepa nemis”. Xa kijtoua nejon porin amo kineki maj teisa kipano. Sayoj ke keman kiixtaliaj ox aksa nemis nochipaya, amo kiitaj kemanian momikilia. Jehová yejua toJuez akin amo keman mopoloua uan tein kiixtalia nochipa kuali yetok (xikonixtajtolti Salmo 33:​4, 5). Tikyekmatij ke ‘Juez akin okachi ueyichiujkej’ nochipa kichiuas tein kuali yetok (Gén. 18:25).

¹⁵ Amo no moitas kani nemi aksa para kiixtaliskej ox uelis nemis nochipaya oso amo. Jehová amo keman kinitaskia kemej yeskiaj “chivos” akin nemij kampa amo ueli kinixmatiltiaj kuali tanauatilmej (Mat. 25:46). Tejuan tikinpatiuitaj, uan Juez akin okachi ueyichiujkej okachi kinpatiuita. Amo tikmatij keniuj Jehová kiixtalis tein kinnamiki kiseliskej sejsemej keman mochiujtos tetsaujkatajyouilis. Xa sekin kiixmatiskej  uan takuaujtamatiskej iuan Jehová keman kichipauas itokay ininixpan nochi altepemej (Ezeq. 38:16).

16. ¿Toni tikmatij de Jehová? (No xikonita taixkopin).

¹⁶ Timomachtianij itech Biblia ke Jehová semi techpatiuita. Yejua kitemakak iKonetsin para maj tinochin ueli tinemikan nochipaya (Juan 3:16). Kemansa xa ipa tikitanij keniuj Jehová techiknelia uan techtasojta (Is. 49:15). Yejua kimati keniuj timonotsaj tisejsemej. Uan kemej tel kuali techixmati, komo timomikiliaj uelis kichiuas maj oksepa tinemikan ijkon kemej achto tikatkaj, uan uelis kichiuas maj tikelnamikikan nochi tein tikchiujkaj (Mat. 10:​29-31). Titakuaujtamatij ke Jehová kuali kiixtalis tein tikseliskej tisejsemej porin yejuatsin tamatkej, yolmelauak uan teiknelia (Sant. 2:13).

17. ¿Toni tikitaskej itech okse tamachtilis?

¹⁷ Axkan ke okachi kuali tikajsikamatij nejin, tikitaj ke semi moneki titanojnotsaskej. ¿Keyej ijkon tikijtouaj? Uan ¿toni techpaleuis maj tiksentokakan titanojnotsakan? Itech okse tamachtilis tiknankiliskej nejin netajtanilmej.