OSHITOPOLWA SHOKUKONAKONWA 19
EIMBILO 22 Uukwaniilwa owa dhikwa po — Nawu ye kutse
Oshike tu shi kombinga yankene Jehova ta ka pangula aantu monakuyiwa?
“Omuwa . . . ina hala, ku kale nando ogumwe ta geelwa.” — 2 PET. 3:9.
SHOKA TATU KA ILONGA
Otatu vulu okukala nuushili kutya sho Jehova ta ka pangula aantu monakuyiwa yi li popi, ote ke shi ninga pauyuuki.
1. Omolwashike tatu vulu okutya otu li pethimbo lituntula?
OTU li pethimbo lituntula. Esiku kehe otu wete nkene omahunganeko gOmbiimbeli taga gwanithwa momeho getu. Pashiholelwa, ohatu mono nkene ‘omukwaniilwa gwokuumbugantu nomukwaniilwa gwokuumbangalantu’ taya kondjithathana, molwaashoka kehe gumwe okwa hala okukala oye a kwata ko uuyuni. (Dan. 11:40, yelekanitha NW.) Otu wete nkene etumwalaka lyUukwaniilwa waKalunga tali uvithwa inaashi monika nale, naantu omamiliyona otaya inyenge nawa. (Jes. 60:22; Mat. 24:14) Ohatu mono iikulya oyindji yopambepo “pethimbo lyo opala.” — Mat. 24:45-47.
2. Otatu vulu okukala tu na uushili mushike, noshike tu na okutseya?
2 Jehova ota tsikile noku tu kwathela tu kale tu na euvoko lya yela, li na ko nasha niiningwanima ya simanenena, mbyoka tayi ka ningwa masiku. (Omayel. 4:18; Dan. 2:28) Otatu vulu okukala nuushili kutya sho uudhigu uunene tawu tameke, otatu kala tu shi ashihe shoka twa pumbwa okukala tu shi, opo tu vule okwiidhidhimika nuudhiginini, notu kale twa hangana pethimbo ndyoka edhigu. Ihe nando ongawo, otu na okutseya kutya opu na iinima yimwe mbyoka kaatu shi kombinga yonakuyiwa ndjoka yi li popepi. Moshitopolwa shika, tango otatu ka kundathana kutya omolwashike tu na okuninga omalunduluko ge na ko nasha naashoka twa popya kombinga yayimwe yomiiningwanima mbyoka. Opo nduno otatu ka tala kiinima yimwe mbyoka tu shi kombinga yonakuyiwa nosho wo omukalo moka Tate yetu gwomegulu ta ka katuka.
SHOKA KAATU SHI
3. Otwa li hatu ti shike kombinga yethimbo ndyoka aantu itaaya ka kala we ye na ompito yokwiitaala muJehova, nomolwashike twa thiki pehulithodhiladhilo ndyoka?
3 Monakuziwa otwa popile kutya mboka kaaye shi ooyitaali ngele uudhigu uunene wa tameke, itaya ka kala we ye na ompito yokwiitaala muJehova, opo ya vule okuhupa puArmagedon. Otwa li twa thiki pehulithodhiladhilo ndyono, oshoka otwa li tatu dhiladhila kutya ehokololo li na ko nasha nEyelu olya li lyopahunganeko. Pashiholelwa, otwa li tatu tompathana kutya ngaashi owala Jehova a li a “pata omweelo” manga Eyelu inaali tameka, petameko lyuudhigu uunene ota ka pata omweelo guuyuni waSatana, mboka tawu imbi aantu ya hupithwe. — Mat. 24:37-39.
4. Omolwashike ihaatu ti we kehe shimwe shoka sha li sha ningwa pethimbo lyaNoa, osha li shi lile po sha shoka tashi ka ningwa monakuyiwa? Shi yelitha.
4 Mbela oshi li ngaa mondjila okupopya kutya oshinima kehe shoka sha ningwa pEyelu lyaNoa osha li shi lile po sha shoka tashi ka ningwa monakuyiwa? Aawe. Omolwashike mbela? Omolwaashoka kapu na enyolo tali yambidhidhidha oshinima shoka. a Odhoshili kutya Jesus okwa li a yelekanitha ‘ethimbo lyaNoa’ nethimbo lyongashingeyi, ihe ina tya kutya Eyelu otali thaneke sha tashi ka ningwa monakuyiwa. Ina tya wo kutya omuntu kehe nenge oshiningwanima kehe shi na ko nasha neyelu otashi thaneke sha, ngaashi sho Jehova a pata omweelo gwonguluwato. Ihe shika inashi hala okutya itatu vulu okwiilonga sha mehokololo lyaNoa nosho wo lyEyelu.
5. (a) Noa okwa li a ningi shike manga Eyelu inaali ya? (Aahebeli 11:7; 1 Petrus 3:20) (b) Shi na ko nasha niilonga yokuuvitha, ongiini onkalo yetu ya faathana naandjoka yopethimbo lyaNoa?
5 Sho Noa a vulika ketumwalaka lyaJehova lyelondodho, oku ulike kutya oku na eitaalo, sho a tungu onguluwato. (Lesha Aahebeli 11:7; 1 Petrus 3:20.) Sha faathana, aantu mboka ya uvu onkundana ombwanawa kombinga yUukwaniilwa waKalunga, oye na okukala metsokumwe naashoka ya uva. (Iil. 3:17-20) Petrus okwa li a ithana Noa e li “omuuvithi guuyuuki.” (2 Pet. 2:5) Ihe nando ongawo, ngaashi sha kundathanwa moshitopolwa shatetekele, katu shi ngele Noa okwa li a uvithile kehe gumwe kombanda yevi, manga Eyelu inaali ya. Kunena, otatu kambadhala okuuvithila aantu muuyuni awuhe, nohatu shi ningi nuulaadhi. Ihe kashi na nduno mbudhi kutya otatu kambadhala shi thike peni, itatu ka vula okuuvithila kehe gumwe. Omolwashike mbela?
6-7. Omolwashike tatu vulu okutya itatu vulu okuuvithila kehe gumwe onkundana ombwanawa manga ehulilo inaali ya? Shi yelitha.
6 Natu taleni kwaashoka Jesus a popi shi na ko nasha niilonga yetu yokuuvitha. Okwa ti kutya onkundana ombwanawa otayi ka uvithwa, “opo aantu yomiigwana ayihe ye yi uve.” (Mat. 24:14) Ehunganeko ndyoka kunena otali gwanithwa, inaashi monika nando onale. Etumwalaka lyUukwaniilwa olya nyanyangidhwa momalaka ge vulithe 1 000, naantu oyendji kombanda yevi kunena otaya vulu okwiilonga kombinga yalyo kepandja lyetu, jw.org.
7 Jesus okwa li wo a lombwele aalongwa ye kutya itaya ka “mana okuuvithila iilando ayihe,” nenge okuuvithila kehe gumwe manga inee ya. (Mat. 10:23; 25:31-33) Oohapu dhaJesus odha li dhe shi ulike kutya shoka osho wo shi li nopethimbo lyetu. Aantu oyendji kunena oye li miitopolwa mono iilonga yokuuvitha ya indikwa. Shimwe ishewe, miilongo mono ohamu valwa aanona oyendji omunute kehe. Ohatu ningi ngaashi tatu vulu tu uvithile aantu ‘yomaludhi agehe, yomalaka agehe niigwana ayihe’ onkundana ombwanawa. (Eh. 14:6) Ihe uushili owo kutya itatu ka vula okuuvithila kehe gumwe onkundana ombwanawa, manga ehulilo inaali ya.
8. Omapulo geni tashi vulika tu pule kombinga yokupangula aantu kwaJehova kwomonakuyiwa? (Tala wo omathano.)
8 Shino otashi vulu okupendutha omapulo ngaashi: Ongiini kombinga yaamboka tashi vulika taya adhika inaaya mona ompito yokuuva onkundana ombwanawa manga uudhigu uunene inaawu ya? Mbela Jehova nOmwana, ngoka a inekelela okupangula aantu, otaya ka ungaunga naantu ngiini? (Joh. 5:19, 22, 27; Iil. 17:31) Enyolo lyenenedhiladhilo lyoshitopolwa shino, olya ti kutya Jehova “ina hala, ku kale nando ogumwe ta geelwa.” Pehala lyaashono okwa hala “aantu ayehe ye ethe uulunde wawo.” (2 Pet. 3:9; 1 Tim. 2:4) Shoka otashi ti kutya Jehova ine tu hololela natango shoka ta ka ninga po kombinga yepulo ndyoka. Odhoshili kutya ina pumbwa oku tu lombwela kombinga yaashoka a ninga nale naashoka ta ka ninga.
Jehova ota ka ungaunga ngiini naamboka tashi vulika inaaya mona ompito yokuuva onkundana ombwanawa manga uudhigu uunene inaawu ya? (Tala okatendo 8) c
9. Jehova okwe tu hololela shike mOmbiimbeli?
9 Jehova okwe tu hololela iinima yimwe mbyoka ta ka ninga, okupitila mOohapu dhe. Pashiholelwa, Ombiimbeli oye tu lombwela kutya Jehova ota ka yumudha “aawinayi” mboka inaaya mona ompito yokuuva kombinga yonkundana ombwanawa e taya lundulula omikalo dhawo. (Iil. 24:15; Luk. 23:42, 43) Shika otashi pendutha omapulo galwe ga simana.
10. Omapulo galwe geni tu na?
10 Mbela mboka taya ka sa pethimbo lyiiningwanima yopuudhigu uunene otaya ka hanagulwa po sigo aluhe, e taya kala kaaye na etegameno lyoku ka yumuka? Omanyolo oge shi yelitha kutya aapataneki mboka taya ka hanagulwa po kuJehova nomatangakwiita ge puArmagedon, itaya ka yumudhwa. (2 Tes. 1:6-10) Ihe ongiini kombinga yaamboka ya sa komikithi nokuukulupe, kiiponga, nenge ya dhipagwa kuyalwe? (Omuuv. 9:11; Sak. 14:13) Mbela otashi vulika yamwe yomaantu mbaka ye li yamwe yomwaamboka “aawinayi,” mboka taya ka yumudhwa muuyuni uupe? Katu shi wo.
SHOKA TU SHI
11. Aantu otaya ka pangulwa sha ikolelela kushike puArmagedon?
11 Otu shi iinima oyindji yi na ko nasha niiningwanima yomonakuyiwa. Pashiholelwa, otu shi kutya puArmagedon, aantu otaya ka ungaungiwa nayo sha ikolelela kunkene ya li ya ungaunga naamwahe yaKristus. (Mat. 25:40) Mboka taya ka pangulwa ye li oonzi, otaya ka ulika kutya oya ambidhidha aagwayekwa nosho wo Kristus. Otu shi wo kutya yamwe yomaamwahe yaKristus, otaya ka kala natango kombanda yevi konima ngele uudhigu uunene wa tameke, notaya ka falwa megulu ngele iita yArmagedon yi li pokutameka. Shampa owala aamwahe yaKristus oko ye li natango kombanda yevi, aanamitima omiwanawa otaya ka mona ompito yoku ya ambidhidha nosho wo iilonga mbyoka taya longo. (Mat. 25:31, 32; Eh. 12:17) Omolwashike iinima mbika ya simanenena?
12-13. Yamwe otashi vulika ya ka inyenge ngiini, sho ye wete “Babiloni oshinene” tashi hanagulwa po? (Tala wo omathano.)
12 Konima ngele uudhigu uunene wa tameke, otashi vulika yamwe mboka taya ka mona ehanagulo ‘lyaBabiloni oshinene’ ya ka dhimbulukwe kutya Oonzapo dhaJehova oshiningwanima shoka, odha kala noku shi popya uule wethimbo. Mbela yamwe mboka taya ka mona iiningwanima mbyoka otaya ka lundulula ngaa omitima dhawo? — Eh. 17:5; Hes. 33:33.
13 Ngele shoka osha ningwa, otashi ka kala sha faathana naashoka sha li sha ningwa muEgipiti pethimbo lyaMoses. ‘Aantu yalwe aayeni’ oya li ya imbwanga mumwe nAaisraeli sho taya tembuka muEgipiti. Yamwe yomwaamboka oya li ya tameke okwiitaala muJehova, sho ya mono kutya omalondodho ngoka Moses a gandja ge na ko nasha nOmageelo Omulongo oga gwanithwa. (Eks. 12:38) Ngele oshinima sha fa mpoka osha ningwa konima ngele “Babiloni oshinene” sha hanagulwa po, mbela otatu ka kala tu uvite nayi sho aantu taye ke tu wayimina, sho ehulilo li li pokuya? Hasho nando! Otwa hala okuholela uukwatya waTate yetu gwomegulu, “Kalunga omunamutimahenda, omunalukeno nomutalanteni.” b — Eks. 34:6.
Mboka taya ka mona ehanagulo ‘lyaBabiloni oshinene’ otaya ka dhimbulukwa kutya Oonzapo dhaJehova oshinima shoka odhe shi popya nale (Tala okatendo 12-13) d
14-15. Mbela epangulo lyomuntu lyaaluhe olya ikolelela kutya uunake a sa nenge openi a kala? Shi yelitha. (Episalomi 33:4, 5)
14 Omathimbo gamwe otashi vulika gumwe a tye, “Otashi ka kala shi li nawa ngele omupambele gwandje okwa si manga uudhigu uunene inaawu tameka, opo a kale e na etegameno lyeyumuko.” Osha yela kutya opu na shimwe she mu inyengitha a popye ngawo. Ihe onakuyiwa yomuntu yaaluhe inayi ikolelela kutya okwa sa uunake. Jehova, e li omupanguli a gwanenena, oha ningi aluhe omatokolo gomondjila noge li pauyuki. (Lesha Episalomi 33:4, 5.) Otatu vulu okukala neinekelo kutya “Omupanguli guuyuni auhe” ota ka ninga shoka shi li mondjila. — Gen. 18:25.
15 Oshi li wo pandunge okuthika pehulithodhiladhilo kutya onakuyiwa yomuntu inayi ikolelela pehala mpoka e li. Jehova ita ka pangula nando aantu omamiliyona ye li iikombo, molwaashoka ya kala miilongo moka inaaya mona nando ompito yokuuva etumwalaka lyUukwaniilwa. (Mat. 25:46) Omupanguli omuyuuki guuyuni awuhe oku na ko nasha naantu mboka, e tu vule. Katu shi wo nkene Jehova ta ka enditha iiningwanima pethimbo lyuudhigu uunene. Otashi vulika yamwe yomaantu mboka taya ka mona ompito yokwiilonga kombinga yaJehova, taye ke mu itaala notaya ka gama kombinga ye, sho te ki iholola komeho giigwana ayihe. — Hes. 38:16.
Konima ngele uudhigu uunene wa tameke . . . mbela aantu yamwe mboka taya ka mona iiningwanima mbyoka otashi vulika ngaa ya ka lundulule omitima dhawo?
16. Oshike tu shi kombinga yaJehova? (Tala wo ethano.)
16 Sho twa konakona Ombiimbeli, otwa tseya kutya aantu oye na ongushu momeho gaJehova. Okwa gandja omwenyo gwOmwana, opo atuhe tu vulu okukala netegameno lyokukala nomwenyo sigo aluhe. (Joh. 3:16) Atuhe ohatu mono ohenda nolukeno lwaJehova. (Jes. 49:15) Atuhe oku tu shi komadhina. Uushili owo kutya oku tu shi nawa atuhe pauhandimwe, kutya nokuli nando otu se, ota vulu oku tu yumudha, molwaashoka oha dhimbulukwa okanima kehe kombinga yetu nosho wo uukwatya mboka tawu ulike kutya otse oolye. (Mat. 10:29-31) Otu na etompelo ewanawa lyokukala neinekelo kutya Tate yetu omunahole gwomegulu, ota ka pangula kehe gumwe momukalo omwaanawa, pauyuuki nonohenda. — Jak. 2:13.
Otatu vulu okukala nuushili kutya Jehova ota ka pangula kehe gumwe momukalo omwaanawa, pauyuuki nonohenda (Tala okatendo 16)
17. Oshike tatu ka kundathana moshitopolwa tashi landula?
17 Ngashingeyi sho tu na euvoko lya pepalekwa, otu shi kutya iilonga yokuuvitha oya endelela shi vulithe nale. Omolwashike tatu tile ngawo? Oshike tashi tu inyengitha tu tsikile okuuvitha onkundana ombwanawa itaatu sholola? Moshitopolwa tashi landula otatu ka kundathana omayamukulo gomapulo ngoka.
EIMBILO 76 Owu uvite ngiini?
a Opo wu mone uuyelele wu na ko nasha nelunduluko ndyoka lya ningwa po, tala oshitopolwa “Shika osho she ku opalela,” mOshungolangelo 15 Maalitsa 2015, ep. 7-11.
b Konima ngele Babiloni oshinene sha hanagulwa po, aapiya yaJehova ayehe otaya ka makelwa peponokelo lyaGog yaMagog. Kehe ngoka a gama kombinga yaJehova pethimbo lyokuhanagulwa po kwaBabiloni oshinene, ota ka makelwa wo.
c SHOKA TASHI ULIKWA METHANO: Omathano gatatu ngoka taga ulike kutya omolwashike aantu yamwe tashi vulika inaaya uvithilwa onkundana ombwanawa: (1) Omukiintu e li moshitopolwa moka elongelokalunga lyontumba lya taambwa ko kwaayehe lye shi ninga oshidhigu kuye, a tseye oshili, (2) aayihokani ye li moshitopolwa moka sha nika oshiponga okutaamba ko oshili, omolwonkalo yopapolotika nosho wo oveta (3) omulumentu e li moshitopolwa shokokule nosha ikalela, shoka she shi ninga oshidhigu a uvithilwe oshili.
d SHOKA TASHI ULIKWA METHANO: Omumwameme omugundjuka ngoka a thiga po oshili a dhimbulukwa shoka a ilonga shi na ko nasha nehanagulo “lyaBabiloni oshinene.” A lundulula omutima gwe e ta shuna kaakuluntu ye Aakriste. Ngele oshinima sha tya ngawo osha ningwa, otwa hala okuholela ohenda nolukeno lwaTate yetu gwomegulu nokukala twa nyanyukwa, molwaashoka ngoka a li a yona okwa galuka.
