MWAHA WOOHUSERYA 19
NCIPO 22 Omwene Onnalamulela Wirimu—Orwe!
Tiheeni Nnasuwelaahu Vooloca sa Othoriha wa Yehova Omwaahiyu?
“Yehova . . . hanachuna wi muchu mmoharu mano atoloxiwe.”—2 PET. 3:9.
IPONTU SA VASULU
Nnaphwanela ororomela wi vaavaa Yehova onahaaleiye waathoriha achu, owo onahaala weerano yeeyo eri yaphaama ni yawookololowa.
1. Ntakhara heeni nnanwerya oloca wi nnakhala mu elukuluku yoohakalaliha?
NNAKHALA mu elukuluku yoohakalaliha! Nihiku nnihiku ninnoona sooloherya sa Mpiipiliyani sikhalaka seeparipari. Ntoko yootakiherya, ninnamoona “mwene oomokoni” ni “mwene oohico” ewanaka mukina ni mukhwaawe nthowa nawi mmoha ti mmoha onachuna olamulela elapo. (Tan. 11:40, PMM, moone enoota mu ekunya.) Ninnoona michaka saphaama sa Omwene wa Muluku ilaleeryiwaka veelaponi yoothene ya vathi nave macikhwi aachu ennathanla omurumeela Yehova. (Yes. 60:22; Mat. 24:14) Nave ninnaakhela yoolya yincipale yoomunepani “mu elukuluku yoophwanelela.”—Mat. 24:45-47.
2. Wa echu taani nnaphwanelaahu ororomela, nyenya tiheeni nnaphwanelaahu wiiwexexa?
2 Yehova onnatitelela onikhaviherya wi nikhaleno wiiwexexa ntakhara ichu sinahaala weereya omwaahiyu. (Mas. 4:18; Tan. 2:28) Nnaphwanela ororomela wi, vaavaa yoohooxa etokotoko enapaceryaaya, nnahaala osuwela soothesene seiyo nnaphwanelaahu osuwela wi nivilele moororomeleya ni owehererya elukuluku yeeyo yoovila. Mwawiihiiha, nnaphwanela osuwela wi sookhalavo ichu ikina seiho nihisuwenlaahu vooloca sa omwaahiyu. Mmwaha yoola, nnahaala othokororya voopacerya ntakhara heeni etorokiwaaya yeeyo naalocaahu vooloca sa saweereya ikina sa seiya. Voocharela, nnahaala wuuluulela ichu ikina seiho nsuwenlaahu vooloca sa omwaahiyu ni mukhalelo Atiithiihu a wirimu eneeraaya yeereno.
TIHEENI NIHISUWENLAAHU?
3. Tiheeni naalocaahu vooloca sa achu wi hiyahaala okhalano tho ekari ya okhalano nroromelo wa Yehova, nave ntakhara heeni nuupuwelaahu hiiha?
3 Khalai, naaloca wi yoohooxa etokotoko yapacerya haavo oohiroromela yoowo aahaala okhala makupa a Yehova ni ovuluwa va Armaketo. Naahiloca nuupuwelaka wi muchu ti muchu ni yaweereya ti yaweereya ya mu elukuluku yeele yeemelela yeeyo yaahaala weereya omwaahiyu. Ntoko yootakiherya, nuupuwela wi hiiha ntoko aahihaaleiye ovolowa muchu mmwaaceyani Yehova amanle owala nsele, haavo muchu aahaala owerya okhalano nroromelo wa Yehova ni ovuluxiwa vaavaa yoohooxa etokotoko yaahaalaaya opacerya.—Mat. 24:37-39.
4. Ntakhara heeni hiyaano hannaloca tho wi ichu seiho seeren’ye mu elukuluku ya Maahi Mancipale saahaala okhalano waakhwanela waya muhoolo? Mutharihe.
4 Apwanne ti waphaama oloca wi echu eri yoothene yeeyo yeeren’ye mu elukuluku ya Maahi Mancipale, eneemelela echu yeeyo enahaala weereya omwaahiyu? Naakhulo ti nawi hooye. Ntakhara heeni? Nthowa nawi Piipiliya hanaloca yeeyo. a Eparipari wi Yesu oolikanyiha “mmahiku a Nowa” ni elukuluku ya orwa wawe, nyenya owo halonce wi ichu soothene seeren’ye mu elukuluku ya Nowa yaahaala okhala echu yii yaakhwanele omwaahiyu, ntoko vaavaa Yehova aawanleiye nsele na mwaaceya. Mwawiihiiha, eyo henataphulela wi hannaphwanela ohuseryavo echu mu yaweereya ya Nowa ni Maahi Mancipale.
5. (1) Ti mwawiihai Nowa oonihenryeiye nroromelo? (Ahepri 11:7; 1 Petru 3:20) (2) Mmukhalelo taani wa olaleerya nnapakaahu olelo, yoowo onalikana ni olaleerya wa mmahiku a Nowa?
5 Vaavaa Nowa iiwaleiye muchaka woolopola wa Yehova, owo aahooniherya wi aakhala ni nroromelo moorweela wa omuteka mwaaceya. (Mwaalakhanye Ahepri 11:7; 1 Petru 3:20.) Mmukhalelo mmohamoha, achu yaawo anawiriyana michaka saphaama vooloca sa Omwene wa Muluku, anaphwanela waakhulela mwawiiwanana ni yeeyo anawiriyanaaya. (Saw. 3:17-20) Petru aamwiichana Nowa ntoko “mulaleeryi a sawookololowa.” (2 Pet. 2:5) Mwawiihiiha ntoko nthokoronryaahu mmwaha ovirale, hannasuwela waakhanle wi Nowa aaheererya olaleerya wa achu oothene yaawo yaakhala mweelaponi ehaakumve ophiya Maahi Mancipale. Olelo noovoloweliwa ni muteko yoola woolaleerya wa elapo yoothene, nave ninniilipixerya opaka makupa mmuteko yoola mwa mvai. Naamwiihiiha, haniwerya waakhwaniha elapo yoothene ni michaka saphaama ehaakumve ophiya makuchuwelo. Ntakhara heeni?
6-7. Ntakhara heeni nnanwerya oloca wi hiniwerya olaleerya wa achu oothene ehaakumve ophiya makuchuwelo? Mutharihe.
6 Muupuwele yeeyo Yesu aalonceiye vooloca sa wunnuwa wa muteko ahu woolaleerya. Owo aahiloherya wi michaka saphaama sinahaala olaleiwa “veelaponi yoothene yavathi, wi sivahe onamoona wa maloko oothene.” (Mat. 24:14) Yooloherya yeela ennaakhwanela mmahiku ahu yaala opwaha khalai. Muchaka wa Omwene onnalaleiwa opwaha mu ilocelo 1000, nave moorweela wa esaiti jw.org ennaphwanyeya wa achu ancipale orukurerya elapo.
7 Mwawiihiiha, Yesu tho aahiloca wa oohuserya awe wi awo hiyaahaala ‘weeceeca ipooma soothene’ naari olaleerya wa muchu ti muchu, ahaakumve Yesu orwa wi aathorihe achu. (Mat. 10:23; 25:31-33) Masu a Yesu teeparipari tho mmahiku ahu. Achu ancipale mmahiku ahu anakhala mmapuro yaawo weiwo nihinaweryaahu olaleeryawo mootaphuwa. Ohiya yeeyoru, masana masaneene a anamwane annayariwa mu aminutu ari oothene. Ninnapaka owetha wahu woothene wi naalaleerye achu oothene, “mahimo, ilocelo ni maloko” ni michaka saphaama. (Wup. 14:6) Nyenya eparipari ti ela, haniwerya olaleerya michaka saphaama wa mmoha ti mmoha a achu veelaponi ehaakumve ophiya makuchuwelo.
8. Makoho taani eni ewerye okhumelela vooloca sa mukhalelo Yehova onahaaleiye waathoriha achu omwaahiyu? (Moone tho eruku.)
8 Mwawiihiiha, ninnakhumelela nikoho: Hanka wa yaale ahinahaala okhalano ekari ya wiiwa michaka saphaama ehaakumve weereya yoohooxa etokotoko? Ti mwawiihai Yehova ni Mwanawe yoowo omuthanlileiye wi apake othoriha, eni yeere hai wa yaawo? (Yoh. 5:19, 22, 27; Saw. 17:31) Yoorepa ya mwaha yoola ennooniherya wi Yehova “hanachuna wi muchu mmoharu mano atoloxiwe.” Ohiya yeeyo, owo onachuna wi “oothene erukunuxe murima.” (2 Pet. 3:9; 1 Tim. 2:4) Naamwi nsuwenle ichu seiha vooloca sa Yehova, owo nlelo hanleenle mukhalelo onahaaleiye waathoriha achu yaawo yahintonko okhalano ekari ya wiiwa michaka saphaama. Eparipari wi owo hanaphwanela onileela vooloca sa yeeyo opankeiye naari onahaaleiye opaka.
Tiheeni Yehova onahaaleiye weera ni achu yaale ahinahaala okhalano ekari ya owiriyana michaka saphaama ehaakumve yoohooxa etokotoko opacerya? (Moone eparakrafu 8) c
9. Echu taani Yehova onileenleiye orweela Mpiipiliyani?
9 Mmasu awe, Yehova oonooniherya wa ichu ikina seiyo onahaaleiye opaka. Ntoko yootakiherya, Piipiliya onnanleela wi Yehova onamwaaviha mookhwani “oohookololowa” yaawo yaahaarino ekari yawaakhulela michaka saphaama ni opaka matorokelo mu meecelo aya. (Saw. 24:15; Luka 23:42, 43) Mwawiihiiha ennakumelela makoho makina tho oochuneya.
10. Makoho taani makina enahaala okhumelela?
10 Apwanne oothene yaawo anahaala okhwa variyari va yoohooxa etokotoko anahaala otoloxiwa moomalela ni ohikhalano ewehereryo ya ovinya mookhwani? Soorepa sinnahiya mookwakwaleya wi yaale anammwareela Yehova ni yaawo anahaala wiiphiwa moorweela wa ikuru sawe heviihiwa mookhwani. (2 Ate. 1:6-10) Hanka vooloca sa achu akina, ntoko yootakiherya, yaawo anahaala okhwa moorweela wa ipahu sa maphacuwelo, asitenti naari wiiphiwa ni achu akina? (Ekl. 9:11; Sak. 14:13) Apwanne achu yaala anahaala okhala variyari va “oohookololowa” yaawo anahaala oviihiwa mu elapo evyaani? Mweeparipari hanisuwenle.
TIHEENI NSUWENLAAHU?
11. Ni mathipelo taani achu anahaalaaya othorihiwa mu Armaketo?
11 Noosuwela ichu soohiyanahiyana vooloca sa saweereya sa muhoolo. Ntoko yootakiherya, noosuwela wi mu Armaketo, achu anahaala okhalihiwa mwawiiwanana ni mukhalelo anaakhalihaaya asinna a Kristu. (Mat. 25:40) Wa yaale oothoriheryiwa ntoko ipucepuche enarwa yooniherya nikhaviheryo wa oothanliwa a Kristu. Noosuwela tho wi asinna akina a Kristu nlelo enahaala okhala veelaponi ya vathi epacenrye mapacereryo a yoohooxa etokotoko nave wi pahiru enahaala okuxiwa wi eye wirimu ehaakumve otepa ekhoco ya Armaketo. Vaavaa asinna a Kristu nlelo anahaalaaya okhala veelaponi ya vathi, ti wooweryeya wi achu aphaama ekhaleno ekari ya waakhaviherya yaawo ni muteko yoowo enapharaaya. (Mat. 25:31, 32; Wup. 12:17) Ntakhara heeni iparipari seiha ti soochuneya?
12-13. Ti mwawiihai achu akina anahaalaaya waakhulela emanle omoona “Papulo Mutokotoko” atoloxiwe? (Moone tho eruku.)
12 Naamwi voocharela yoohooxa etokotoko epacenrye, ti wooweryeya wi akina yaawo anahaala woona otoloxiwa wa “Papulu Mutokotoko” anahaala wuupuwelela sa yeeyo Anamoona a Yehova yaalocaaya khalai sa yaweereya ene yeeyo. Apwanne yaawo anahaala woona saweereya sene seiyo ananwerya otoroka muupuwelo aya?—Wup. 17:5; Ese. 33:33.
13 Sookhumelela sene inahaala olikanaka ni yeeyo yeeren’ye o Yikuputu mu elukuluku ya Mose. Muupuwele wi ‘achu ancipale’ yaahipwexeheryana ni Aisarayeli o Yikuputu. Akina a achu yaale akhweya yaampaceryaru okhalano nroromelo vaavaa yoonnaaya olopola wa Mose vooloca sa ipahu khumi saakhwanenlaaya. (Muk. 12:38, PMM) Wakhala wi echu yoolikana yoheereya amanle Papulo Mutokotoko otoloxiwa, apwanne nnahaala wuupuwelela wi tahi yawookololowa? Chiryene hooye! Nnachuna wuupuwelela sa omuchu wa Tiithi ahu a wirirmu, “Muluku a ikharari, a mahala, oohaakuva onanariwa, oosivelasha ni oororomeleya.” b—Muk. 34:6, PMM.
Achu akina yaawo anahaala woona otoloxiwa wa “Papulo Mutokotoko” anahaala wuupuwelela wi Anamoona a Yehova yaanaloca sa yeela khalai (Moone iparakrafu 12-13) d
14-15. Apwanne ekari ya muchu ya okhalano okumi okhala wookhala enarweela vaavaa owo onakhweiye naari weiwo owo onakhaleiyewo? Mutharihe. (Salmu 33:4, 5)
14 Ikwaha ikina, ninnamwiiwa muchu alocaka: “Yaahaala okhala yaphaama mmusi aka aakhwile yoohooxa etokotoko ehaakumve opacerya, wi akhaleno ewehereryo ya ovinya mookhwani.” Aakhalavo mathowa oophwanelela eneeriha oloca masu yaawo. Nyenya omwaahiyu woohimala wa muchu hori pahiru vaavaa owo onakhweiye. Yehova muthoriha oophaameya—owo onnapaka soolakelela sawookololowa ni soophaameya. (Mwaalakhanye Salmu 33:4, 5.) Nnanwerya olekecheya wi ‘muthoriha a elapo yoothene ya vathi’ onahaala opaka yeeyo eri yawookololowa.—Map. 18:25, PMM.
15 Nave tho ni mathowa oophwanelela nnanwerya ophiyerya makuchuwelo awi omwaahiyu woohimala wa muchu hori pahiru nthowa na weiwo onakhaleiyewo. Yehova harwa aathoriha macikhwi aachu ntoko “ipuri” nthowa nawi awo anakhala mu ilapo seiho ehintonkaaya okhalano ikari sa waakhulela michaka sa Omwene. (Mat. 25:46) Muthoriha awookololowa a elapo yoothene onnuukhuwa ni achu yaawo, mmukhalelo yoowo hiyaano nihintonkaahu wuukhuwano. Hanisuwenle mukhalelo Yehova onahaaleiye weeciha ichu variyari va yoohooxa etokotoko. Akhweya achu akina a achu ene yaawo anamukhalano ekari ya ohuserya vooloca sa Yehova, emuroromele yoowo nave ekhale mmakupa awe vaavaa Yehova onahaaleiye weeliha nsina nawe variyari va maloko oothene.—Ese. 38:16.
Vaavaa yoohooxa etokotoko enahaalaaya opacerya, . . . apwanne achu akina ananwerya otoroka mirima saya?
16. Tiheeni hiyaano nsuwenlaahu vooloca sa Yehova? (Moone tho eruku.)
16 Moorweela wa yoohuserya ya Piipiliya, hiyaano noohuserya wi muchu ti muchu toochuneyaxa wa Yehova. Owo oovaha okumi wa Mwanawe wi oothene hiyo nikhaleno ekari ya okhala ni okumi okhala wookhala. (Yohani 3:16) Oothene hiyo ninnawerya woona osivela otokweene Yehova oreiyeno ntakhara hiyaano. (Yes. 49:15) Owo oosuwela nsina na muchu ti muchu. Oonisuwela phaameene wi naamwi nikhwile owo onanwerya oniviiha hiiha ene ntoko naaryaahu khalai, mmikhalelo sahu soothene ophiyerya onikookiherya muupuwelo mmohamoha! (Mat. 10:29-31) Hiyaano hannaphwanela naari mano vakhaani okhwa minikwa wi Tiithi ahu oosivela a wirimu onammuthoriha muchu ti muchu mmukhalelo woophaameya, wawookololowa ni wa ikharari.—Tiy. 2:13.
Nnanwerya ororomela wi Yehova onammuthoriha muchu ti muchu mmukhalelo woophaameya, wa wookololowa ni wa ikharari (Moone eparakrafu 16)
17. Tiheeni nnahaalaahu othokororya mwaha onacharela?
17 Vano, vaavaa nryaahuno wiiwexexa ovyaani, hiyaano ninniiwexexa phaameene wi muteko ahu woolaleerya ti wawaakuveya opwaha khalai. Ntakhara heeni nnanwerya oloca yeela? Nave tiheeni enanceenyerya otitelela olaleerya michaka saphaama mwa mvai? Nnahaala woona maakhulo a makoho yaala mu yoohuserya enacharela.
NCIPO 76 Nnoona Hai Olaleerya?
a Wi nsuwele sincipale ntakhara heeni eyaaka opakiwa matorokelo yaala, moone mwaha oni “Tithi, Ntakhara Yosivenle Hiha” mu Mulipeleli, 1 a Marsu a 2015, ipaaxina 8-12.
b Amanle Papulo Mutokotoko otoloxiwa, alapeli oothene a Yehova enarwa yeehiwa variyari va ohiphela wa Koki a Makoki. Yaawo anahaala okhala mmakupa a achu a Muluku amanle Papulo Mutokotoko otoloxiwa, awo tho enarwa yeehiwa.
c OTHARIHIWA WA IRUKU: Sawooniherya raru seiyo inooniherya ntakhara heeni akina ananwerya ohiphwanyiwa ni michaka saphaama moorweela wa muteko ahu woolaleerya wa elapo yoothene: (1) Muthiyana mmoha onakhala mu elapo yeeyo malapelo awunlaana aneerihaaya okhala woohikhapeleleya, (2) mutheli mmoha onakhala mu elapo yeeyo mukhalelo wa epolitika oneerihaaya okhala wawoopiha ni wooheemereryeya ni (3) mulopwana mmoha yoowo onakhala mmakupa woovila ophiyawo ni woorakamawoxa.
d OTHARIHIWA WA ERUKU: Namwali yoowo ohin’ye omurumeela Yehova onnuupuwela wa yeeyo ohusenryeiye vooloca sa otoloxiwa wa “Papulo Mutokotoko.” Owo onnalakelela omukookela Yehova nave onnaavya nikhaviheryo wa asitiithi awe. Wakhala wi echu yoolikana yoheereya, hiyaano nnachuna wuupuwelela omuchu wa ikharari nniphwanya sa Tiithi ahu a wirimu ni ohakalala ni yaale analakelela okookela wa Yehova.
