ARTIKEL WAMAHAʼÖ 19
SINUNÖ 22 Famatörö si No Tefasindro—Yatohare!
Hadia Zaboto ba Dödöda ba Lala Wanguhuku Nifalua Yehowa ba zi So Miföna?
”Lö omasi [Yehowa] na tekiko fazamösa.”—2 FE. 3:9.
NITUTUNÖ
Tola tafaduhusi tödö wa hasambalö itörö zindruhu ba satulö Yehowa na ifalua wanguhuku ba zi so miföna.
1. Hana wa tola tawaʼö no so ita ba ginötö si tohude?
NO SO ita iadaʼa ba ginötö si tohude! Ero maʼökhö, taʼila hewisa waʼalua zi no tefaʼeleʼö ba Zura Niʼamoniʼö. Duma-dumania, taʼila hewisa wahindrisa salua ba gotalua ”razo tanö yöu” hegöi ”razo tanö raya” börö me omasi ira lafatörö gulidanö. (Dan. 11:40, nisura ba gahe zura.) Taʼila göi wa arakhagö no teturiaigö duria somuso dödö ba zi sagörö ulidanö, ba ato niha zamili ba wamosumange Yehowa. (Yes. 60:22; Mat. 24:14) Baero daʼö, fahöna gö wamati nitemada ”ba ginötö si tefaudu”.—Mat. 24:45-47.
2. Hadia zi tola tafaduhusi tödö, ba hadia zinangea tafaduhuʼö?
2 Lö tebulö itolo ita Yehowa ba wangokhögö faʼaboto ba dödö si tefaudu ba ngawalö zi lö ara tö alua. (Amd. 4:18; Dan. 2:28) Faduhu dödöda na ibörögö alua wamakao sabölö-bölö, hasambalö taʼila hadia zinangea tafalua ba wondrorogö faʼalöfaröida hegöi fahasara dödö sagötö mbaŵa waʼabasaki andrö. Hizaʼi, moguna tafaduhuʼö wa so zi lö aboto ba dödöda sanandrösa ba zalua ba zi so miföna. Ba wamahaʼö daʼa, si oföna tatutunö yaʼia daʼö hadia mbörö wa so ösa waʼaboto ba dödö sinangea tabulöʼö sanandrösa ba zalua si lö ara tö. Tatutunö göi hadia manö zi no aboto ba dödöda sanandrösa ba zalua ba zi so miföna ba hewisa Namada sebua faʼomasi wamaluania ohitö dödönia.
SI LÖ ABOTO BA DÖDÖDA
3. Moloʼö faʼaboto ba dödöda ba zilalö, hawaʼara iduhö Yehowa mbawandruhö ba niha si lö mamati, ba hadia mbörö wa tawaʼö daʼö?
3 Ba zilalö, tawaʼö tödöda na tebörögö dania wamakao sabölö-bölö, fefu niha si lö faʼawö khö Yehowa lö saʼae tebeʼe khöra ginötö ba lö teʼefaʼö ira ba Hamagedo. Tawaʼö zimane daʼö börö me so ba dödöda wa fefu zalua me Anönö Danö Idanö, no amaedola salua dania ba götöda. Duma-dumania, me föna iduhö mbawandruhö nowo Yehowa fatua lö Anönö Danö Idanö. Börö daʼö, so ba wangera-ngerada na ibörögö alua dania wamakao sabölö-bölö, iduhö Yehowa mbawandruhö ba niha si lö mamati, irege lö hadöi ba gotaluara niʼorifi.—Mat. 24:37-39.
4. Hadia fefu faosatö salua fatua lö Anönö Danö Idanö no famaʼeleʼö? Tutunö.
4 Hadia fefu zalua me Anönö Danö Idanö no amaedola salua ba zi so miföna? Tenga, lö niwaʼö Zura Niʼamoniʼö daʼö. a Sindruhu sa, ifaedogö waʼatoharenia Yesu ”hulö simane ba götö Noakhi”, hizaʼi lö niwaʼönia wa faʼateduhö mbawandruhö nowo mazui ngawalö zalua ba götö daʼö, no faosatö moroi ba wamaʼeleʼö. Hewaʼae simanö, tenga daʼö geluahania wa lö hadöi famahaʼö si tola tahalö sanandrösa khö Noakhi hegöi me Anönö Danö Idanö.
5. (a) Hewisa Noakhi ba wangoromaʼö famatinia? (Heberaiʼo 11:7; 1 Fetero 3:20) (b) Hadia waʼafagölö ba wamalua fanuriaigö me götö Noakhi hegöi ba götöda iadaʼa?
5 Me irongo wamangelama moroi khö Yehowa, iforomaʼö wamatinia Noakhi yaʼia me ifazökhi nowo. (Baso Heberaiʼo 11:7; 1 Fetero 3:20.) Simane daʼö göi niha si no mamondrongo turia somuso dödö sanandrösa ba Wamatörö Lowalangi, moguna laforomaʼö wamatira. (Hal. 3:17-20) Iwaʼö Fetero wa Noakhi andrö ”sanuriaigö sindruhu”. (2 Fe. 2:5) Hizaʼi, simane nitutunö ba wamahaʼö silalö, lö taʼila hadia no iʼalui lala Noakhi enaʼö terongo ba niha fefu duria nifaʼemania fatua lö Anönö Danö Idanö. Iadaʼa, no fao ita ba halöwö fanuriaigö si no muʼorganisasi, ba tafalua ia si fao faʼaterou dödö. Hizaʼi, gofu hawaʼebua wamorege nifaluada, tebai tafaʼema duria somuso dödö ba niha fefu irugi wondrege danö fatua lö tohare gamozua götö danö andre. Hadia mbörö?
6-7. Hadia tola tadozigö wanuriaigö ba niha fefu irugi wondrege danö fatua lö tohare gamozua götö danö? Tutunö.
6 Nehegö hadia niwaʼö Yesu sanandrösa ba waʼebolo danö niʼanöröida ba wamalua halöwö fanuriaigö. Ifaʼeleʼö wa teturiaigö dania duria somuso dödö ”ba zi sagörö ulidanö misa, tobali famaduhuʼö ba ngawalö soi”. (Mat. 24:14) Alua nifaʼeleʼö andrö ba götöda iadaʼa. No tehenaigö duria sanandrösa ba Wamatörö Lowalangi ba zi töra 1.000 ngawalö li. Ba itugu ato niha sanemaʼö turia andrö börö me so situs web jw.org.
7 Hizaʼi, ifatunö göi khö ndra nifahaʼönia Yesu wa ’lö fakhamö ladozigö mbanua Gizaraʼeli irege tohare Nono niha andrö’. (Mat. 10:23; 25:31-33) Eluahania, tebai lafalua halöwö fanuriaigö ira nifahaʼö Yesu ba niha fefu fatua lö tohare Yesu ba wanguhuku niha gulidanö. Iadaʼa, zuta niha si toröi ba soi si lö manehegö halöwö fanuriaigö. Baero daʼö, ero menit so ngaotu ndraono sawena tumbu. Sindruhu wa no taforege ba wamaʼema turia somuso dödö ”ba ngawalö soi, ba ngawalö mado, banua, hegöi li”. (Fam. 14:6) Hewaʼae simanö, tebai tadozigö fefu niha ba gulidanö ba wangombakha khöra turia somuso dödö fatua lö tohare gamozua götö danö andre.
8. Hadia wanofu-nofu si tola tumbu ba dödöda sanandrösa ba wanguhuku nifalua Yehowa ba zi so miföna? (Faigi göi gambara.)
8 Fanofunia iadaʼa: Hadia zalua ba niha si lö fakhamö mamondrongo turia somuso dödö fatua lö alua wamakao sabölö-bölö? Hadia nifalua Yehowa hegöi Ononia si no ifaduhusi tödö ba wamalua fanguhuku? (Yoh. 5:19, 22, 27; Hal. 17:31) Simane ayati ba duho wamahaʼö daʼa, ”lö omasi [Yehowa] na tekiko fazamösa”. Hizaʼi, omasi ia enaʼö ”dozi lafalalini gera-erara”. (2 Fe. 3:9; 1 Ti. 2:4) Hewaʼae simanö, böi olifu ita wa lö nifatunö Yehowa khöda hadia nifaluania ba luo daʼö. Sindruhu sa, lö moguna ifatunö khöda hadia manö zi no ifalua mazui nifaluania dania.
Hewisa Yehowa ba wanguhuku niha si lö fakhamö mamondrongo turia somuso dödö fatua lö alua wamakao sabölö-bölö? (Faigi ngenoli si 8) c
9. Hadia nifatunö Yehowa khöda ba Daromalinia?
9 Ba Daromalinia, ifatunö khöda Yehowa hadia zedöna ifalua. Duma-dumania, iwaʼö Sura Niʼamoniʼö wa isusugi Yehowa dania niha ”si lö atulö” si lö fakhamö manema turia somuso dödö ba lafalalini gera-erara. (Hal. 24:15; Luk. 23:42, 43) Hizaʼi, so wanofu tanö böʼö sinangea taʼila fanema li.
10. Hadia nasa wanofu sinangea taʼangeragö?
10 Hadia lö saʼae ifuli tesusugi fefu niha si no mate ba wamakao sabölö-bölö? Ifatunö khöda Sura Niʼamoniʼö wa lö saʼae tesusugi nudu nihori Yehowa ba Hamagedo. Ba luo daʼö fao khönia ndra saradadunia. (2 Te. 1:6-10) Hizaʼi, hewisa niha tanö böʼö si no mate, duma-dumania börö waʼalawa döfi, sikho si lö mudöna-döna mazui nibunu? (Sango. 9:11; Zak. 14:13) Hadia so moroi ba gotaluara zi farahu dania ba niha ”si lö atulö” sedöna mususugi ba gulidanö si bohou? Lö taʼila.
SI NO ABOTO BA DÖDÖDA
11. Hadia zi tobali dane-dane ba wanguhuku niha?
11 So ösa zaboto ba dödöda sanandrösa ba zalua ba zi so miföna. Duma-dumania, aboto ba dödöda wa tehuku dania niha moloʼö nifaluara khö dalifusö Keriso. (Mat. 25:40) Niha si no mangoromaʼö wa latuhini Keriso hegöi niha nibayoini, tetatugöi ira tobali biri-biri. Aboto göi ba dödöda wa so ösa dalifusö Keriso sauri nasa ba gulidanö ba ginötö tebörögö wamakao sabölö-bölö, ba awena tefazawa ira ba zorugo lö ara fatua lö tebörögö Hamagedo. Börö me so ösa nasa dalifusö Keriso ba gulidanö, tola manö tebeʼe ginötö ba niha sato ba wangoromaʼö wa latuhini ira hegöi halöwö nifaluara. (Mat. 25:31, 32; Fam. 12:17) Hadia mbörö wa moguna sibai daʼa?
12-13. Hadia nifalua niha ösa me no laʼila waʼadudu ’Mbabilona Sebua’? (Faigi göi gambara.)
12 Me no tebörögö wamakao sabölö-bölö, so ösa niha sangila faʼadudu ’Mbabilona Sebua’ te itörö tödöra wa no ara lafadunö-dunö waʼalua daʼö ira Samaduhuʼö Yehowa. Hadia mamati dania niha si no mangila salua andrö ba farahu ira khöda?—Fam. 17:5; Hez. 33:33.
13 Törö tödöu wa no irai alua zimane daʼö ba Miserai me götö Moze. Me luo daʼö, so niha moroi ba ”ngawalö soi” si fao ba ndraono Gizaraʼeli me laröi danö Miserai. Te so ösa moroi ba gotaluara zamati me no laʼila waʼalua wamangelama nifaʼema Moze sanandrösa ba Wamakao si Fulu. (2 Mo. 12:38) Na no tedudugö dania Mbabilona Sebua, hadia afatö dödöda na so niha si fao khöda fatua lö alua Hamagedo? Tatu manö löʼö. Omasi ita taʼoʼö Namada si so ba zorugo, ”Lowalangi sahakhö tödö . . . ba si sökhi böwö, lö alio mofönu ba fahöna waʼomasi si lö faröi ba faʼaduhu”. b—2 Mo. 34:6.
So ösa niha sangila faʼadudu ’Mbabilona Sebua’ te itörö tödöra wa no ara lafadunö-dunö waʼalua daʼö ira Samaduhuʼö Yehowa (Faigi ngenoli si 12-13) d
14-15. Ba wanema faʼauri si lö aetu, hadia teʼodaligö daʼö hamega mate zi samösa niha mazui hezo so toröi ia? Tutunö. (Sinunö 33:4, 5)
14 So ösa ndra talifusöda sangumaʼö sanandrösa ba nösi nomora si tenga Samaduhuʼö, ”Abölö sökhi na mate ia fatua lö alua wamakao sabölö-bölö enaʼö so khönia dötönafö fanusugi.” Tatu manö sökhi geluaha wehede daʼö. Hizaʼi, hadia tebeʼe waʼauri si lö aetu khö zi samösa niha moloʼö hamega mate ia? Löʼö. Yehowa andrö Sanguhuku soʼahonoa. Hasambalö sindruhu ba atulö gangetula nihalönia. (Baso Zinunö 33:4, 5.) Faduhu dödöda wa hasambalö ifalua zatulö ”Sanguhuku ösi gulidanö”.—1 Mo. 18:25.
15 Tola göi tahalö rahu-rahu wa tola tebeʼe waʼauri si lö aetu khö zi samösa niha lö teʼodaligö daʼö hezo toröi ia. Ba zi hauga soi, zuta niha si lö irai manema turia sanandrösa ba Wamatörö Lowalangi. Lö ihalö gangetula Yehowa ba wombaliʼö yaʼira ”nambi” ha börö me toröi ira ba soi daʼö. (Mat. 25:46) Yehowa andrö ”Sanguhuku ösi gulidanö” samalua satulö. Iʼameʼegö tödö sibai ira, töra moroi ba nifaluada. Lö aboto ba dödöda hadia manö dania nifalua Yehowa sagötö wamakao sabölö-bölö. Tola manö so ösa moroi ba gotaluara tebeʼe khöra ginötö ba wamahaʼö yaʼira sanandrösa khö Yehowa, mamati, ba faʼawö ira khönia ba ginötö iʼamoniʼö döinia föna fefu soi.—Hez. 38:16.
Me no tebörögö wamakao sabölö-bölö, . . . hadia so ösa niha sangila daʼö izumaigö mamati ira?
16. Hadia zi no tafahaʼö yaʼita sanandrösa khö Yehowa? (Faigi göi gambara.)
16 Ba ginötö tafahaʼö ita ba Zura Niʼamoniʼö, aboto ba dödöda wa ebua sibai mböli waʼauri niha föna Yehowa. Itehegö mate Nononia enaʼö fefu ita tola auri sagötö faʼara. (Yoh. 3:16) Iʼomasiʼö sibai ita Yehowa, ba no tarasoi daʼö. (Yes. 49:15) Iʼila döida ero zamösana ba sindruhu-ndruhu aboto ba dödönia ita. Töra moroi ba daʼö, ahori aboto ba dödönia sanandrösa khöda hegöi niʼiröʼöda ba gera-erada, irege hewaʼae na mate ita, ifangawuli fefu daʼö ba ginötö isusugi ita! (Mat. 10:29-31) Tobali, so khöda dane-dane saro irege faduhu dödöda wa Amada sebua faʼomasi hasambalö moʼahonoa wanguhukunia fefu niha börö me atulö ia ba sahakhö tödö.—Yak. 2:13.
Faduhu dödöda wa moʼahonoa wanguhuku nifalua Yehowa ba niha fefu börö me atulö ia ba sahakhö tödö (Faigi ngenoli si 16)
17. Hadia nitutunöda ba artikel aefa daʼa?
17 Fefu waʼaboto ba dödö si no mubohouni andre, möi fanoloda enaʼö taʼila wa moguna sibai wamalua halöwö fanuriaigö iadaʼa. Hana wa tola tawaʼö zimane daʼö? Ba hadia zamarou tödöda enaʼö lö taböhöli wanuriaigö turia somuso dödö? Tatutunö wanema linia dania ba wamahaʼö aefa daʼa.
SINUNÖ 76 Hewisa Dödömö?
a Sanandrösa ba waʼaboto ba dödö si no mubohouni andre, faigi artikel ”Inilah yang Diperkenan Olehmu” ba Menara Pengawal 15 Mbaŵa si Tölu 2015, ngaʼörö 7-11.
b Me no aefa tedudugö Mbabilona Sebua, tetandraigö fefu nono mbanua Yehowa sagötö isuwö ira Gogi moroi ba Magogi. Gofu haniha manö zi farahu ba nono mbanua Lowalangi me no aefa tedudugö Mbabilona Sebua, hasambalö göi tetandraigö ira.
c ELUAHA GAMBARA: Tölu gambara sangoromaʼö hadia mbörö wa so ösa niha si lö nasa manema turia somuso dödö nifaʼemada ba zi sagörö ulidanö: (1) Samösa ndra alawe si toröi ba zi sambua soi. Agama niha sato ba soi daʼö tobali fanaisi ba halöwö fanuriaigö, (2) sambua fongambatö si toröi ba zi sambua soi si lö manehegö halöwö fanuriaigö irege möi famaʼala ba tehuku niha samalua halöwö andrö, ba (3) samösa ndra matua si toröi ba mbanua side-ide ba si tebai mukhamö.
d ELUAHA GAMBARA: Samösa nono alawe si no mondröi Yehowa, itörö tödönia zi no ifahaʼö ia ba zilalö sanandrösa ba waʼadudu ’Mbabilona Sebua’. Ihalö gangetula wa ifuli ia khö Yehowa hegöi khö ndra satuania si no tobali Samaduhuʼö. Na alua zimane daʼö, omasi ita taʼoʼö Namada safönu faʼahakhö dödö si so ba zorugo. Simane yaʼia, tatu omuso dödöda na so niha si no mamalua horö samalalini era-era.
