OMWATSI W’ERIGHA 19
OLWIMBO 22 Obwami buneho—bwase!
Ni myatsi yahi eyo twasi okw’itswera lya Yehova ly’omo biro ebikasa?
“Yehova . . . syanzire n’omundu n’omughuma akatsandibwa.”—2 PET. 3:9.
ENZUMWA NGULU:
Twanganikirirya ngoko omughulu Yehova akenditswera abandu hano ho sesene, akendikola ekyo omo ritunganene.
1. Busanaki twanganabugha tuti omughulu ogho tulimo akatsemesaya?
TULI omo mughulu owakatsemesaya! Obuli kiro tunemuyilangirira amaminyereri w’eBiblia akabererera. Ng’eky’erileberyako, tunemuyilangirira “omwami wʼelutambi lwʼendata” n’omwami “wʼelutambi lwʼeyikwa” bakalwa omo kati-kati kabo bakasonda eritabala ekihugho. (Dan. 11:40) Tunemulangira engulu mbuya y’Obwami b’oMungu ikatulaghanibwa omo kihugho kyosi, na mamilioni w’abandu banemusombola erikolera Yehova. (Isa. 60:22; Mat. 24:14) Kandi tunemubana akalyo kangyi k’obunya-kirimu “oko mughulu atolere.”—Mat. 24:45-47.
2. Twanganikiriryaki, aliwe kandi litolere itwalighaki?
2 Yehova anemulola embere erituwatikya eryowa ndeke emyatsi eyikendisyabya hano ho sesene. (Misyo 4:18; Dan. 2:28) Twanganikirirya ngoko embere eryaghalwa rinene ritsuke tukendisyaminya ebyosi ebyo tutolere eriminya tutoke eriyiyinia n’erisighala bataleghula omo mighulu eyikalire. Aliwe, litolere itwaligha ngoko hane emyatsi milebe eyo tutasi oko biro ebinemwasira embere. Omo mwatsi ono, tukendilangira ebikaleka itwasuba omo ebyo twabugha embere oko myatsi eyikendisyahika omo ebiro ebikasa. N’enyuma w’aho, tukendikania oko myatsi milebe eyo twasi kandi Yehova Tata wetu w’elubula ng’akendisyatukoleraki.
EMYATSI EYO TUTASI
3. Kera itukabugha tutiki oko bandu eribana akanya ak’erikirirya Yehova eryaghalwa rinene ryabitsuka, kandi twabya tukabugha tutya busanaki?
3 Kera itukabugha tuti, eryaghalwa rinene likendisyabya lyatsuka, abatikirirye sibendisyabana akanya k’eribya oko luhande lwa Yehova n’erisabuka e Armagedoni. Itukabugha tutya kundi itukalengekanaya tuti obuli mundu n’obuli omwatsi owabya oko mughulu w’eribwagha ly’amaghetse, abya akasosekania omwatsi mulebe w’omo biro ebikasa. Ng’eky’erileberyako, itukalengekanaya tuti ngoko Yehova anakinga omulango w’obwato embere eribwagha ly’amaghetse ritsuke, kutya sihali n’omundu n’omughuma oyukendisyabana akanya k’erikirirya Yehova n’erisabuka embere eryaghalwa rinene ritsuke.—Mat. 24:37-39.
4. Busanaki sitwangasyabugha tuti obuli mwatsi owabya omughulu w’eribwagha ly’amaghetse abya akasosekania omwatsi mulebe owangahulukire omo biro ebikasa? Kanaya.
4 Nina ky’amenge eribugha tuti emyatsi yosi ey’abya omughulu w’eribwagha ly’amaghetse yanabya yikasosekania omwatsi mulebe owangahulukire omo biro ebikasa? Ko bite bitya. Busanaki? Kundi sihali n’Erisako n’erighuma erikabugha ritya. a Kwenene Yesu mwasosekania “omughulu wa Noa” n’eribyaho liwe. Aliwe, mwatabugha ati obuli mwatsi ow’ahika oko mughulu wa Noa, ng’erikinga omulango w’obwato, angabere n’oko mughulu ow’akasa. Aliwe, ekyo sibugha ambu sitwangabana esyosomo oko mwatsi wa Noa n’ow’eribwagha ly’amaghetse.
5. (a) Noa mwakangania ati obwikirirya embere eribwagha ly’amaghetse litsuke? (Abaebrania 11:7; 1 Petro 3:20) (b) Omubiiri w’eritulira w’oko mughulu wa Noa asosire ati omubiiri w’eritulira wo munabwire?
5 Omughulu Noa owa omulaghe w’oMungu w’erikunga, mwakangania ngoko awite obwikirirya omw’ihimba obwato. (Soma Abaebrania 11:7; 1 Petro 3:20.) Kutya, n’abandu abakowa engulu mbuya y’Obwami b’oMungu litolere ibakangania ngoko bali n’obwikirirya erilabira emikolere yabo. (Emib. 3:17-20) Petro mwahula Noa mo “muhubiri w’eritunganene.” (2 Pet. 2:5) Aliwe, ngoko twanalangira omo mwatsi owalaba, sitwasi Noa nga mwanakola akambanye ak’erihubirya abandu bosi omo kihugho embere eribwagha ly’amaghetse litsuke. Munabwire, tunemuyikasa eritulira abandu omo kihugho kyosi kandi tunemukola ekyo n’omuhwa munene. Nomo twangayikasa tuti, sitwangatoka eribwira obuli mundu w’oko kihugho oko ngulu mbuya embere enduli yihike. Busanaki?
6-7. Busanaki twanganabugha tuti sitwendisyatoka eribwira obuli mundu oko ngulu mbuya embere enduli yihike?
6 Tulebaye emyatsi eyo Yesu abugha oko mubiiri wetu w’erihubirya. Yesu mwabugha ati engulu mbuya yikendisyatulaghanibwa “omo kihugho kyosi.” (Mat. 24:14) Obuminyereri obu, bunemubererera ndeke munabwire kulenga kera. Engulu mbuya y’Obwami yinemutulaghanibwa omo mibughe eyilengire 1000. Kandi erilabira e jw.org, abandu bangyi omo kihugho banganigha emyatsi oko ngulu mbuya y’Obwami b’oMungu.
7 Aliwe, kandi Yesu mwabwira abigha biwe ati ‘sibendisyabugha emiyi yosi,’ kutse eritulira obuli mundu embere ase. (Mat. 10:23; 25:31-33) Kinemulangirika ndeke oko mughulu wetu ngoko ebinywa bwa Yesu ebyo, ni by’ekwenene. Amamilioni w’abandu bikere omo biharo eyo omubiiri wetu w’erihubirya aghanisibwe. Kandi amamia w’esyomekeke sinemubutwa oko buli dakika. Tunemuyikasa eritulira abandu b’omo “buli kitunga, obuli kihanda, obuli mubughe” oko ngulu mbuya. (Erib. 14:6) Aliwe sitwendisyatoka eritulira obuli mundu oko kihugho oko ngulu mbuya embere enduli ihike.
8. Twanganayibulyaki okw’itswera lya Yehova ly’omo biro ebikasa? (Ulebaye n’esyopitsa.)
8 Ekyo kyanganaleka itwayibulya tuti: Bikendisyabya biti oko bandu abatabana akanya k’eryowa oko ngulu mbuya embere eryaghalwa rinene ritsuke? Yehova na Mughala wiwe oyo abirisombolwa eribya mutsweri bakendisyakolerabo bati? (Yoh. 5:19, 22, 27; Emib. 17:31) Erisako erimanire omwatsi ono, likatsuka liti, “Yehova syanzire n’omundu n’omughuma akatsandibwa.” Aliwe, anzire abandu “bosi ibabindula emitima.” (2 Pet. 3:9; 1 Tim. 2:4) Ekyo twasi, Yehova syalyatubwira ng’akendisyatswera abandu bo ati. Nibya, syasabirwe eritubwira obuli mwatsi ogho abirikola kutse ogho akendisyakola.
Yehova akendisyatswera ati abandu balebe abatabana akanya k’eryowa oko ngulu mbuya embere eryaghalwa rinene ritsuke? (Ulebaye enungu 8) c
9. EBiblia ikatubwira yiti Yehova akendikolaki omo biro ebikasa?
9 Omo Kinywa kiwe, Yehova abiritubwira emyatsi milebe eyo akendisyakola. Ng’eky’erileberyako, eBiblia ikatubwira ngoko Yehova akendisyalubukya abandu “abatatunganene” abatabana akanya ak’eryowa oko ngulu mbuya n’eribindula emighendere yabo. (Emib. 24:15; Luka 23:42, 43) Ekyo kikaleka itwayibulya awandi mabulyo w’omughaso.
10. Ni wandi mabulyo wahi agho twanganayibulya?
10 Abosi abakendisyahola omo mughulu w’eryaghalwa rinene bakendisyabya ibamatsandibwa kera na kera butsira amaha w’erisyalubuka? Amasako akatubwira burora-rora ngoko esyonzighu sya Yehova, esyo iye n’emilondo yiwe y’abasuda bakendisyatoghotya oko Armagedoni sibendisyalubuka. (2 Tes. 1:6-10) Aliwe, bikasyabya biti oko bandu abakendisyahola omo bitsinduli, ebisida, kutse abakendisyitwa n’abandi bandu? (Omug. 9:11; Zek. 14:13) Abalebe b’oko bandu abo, banemwendisyabya oko “abatatunganene” abakendisyalubukibwa omo kihugho kihya-kihya? Omo kikuhi, sitwasi.
EMYATSI EYO TWASI
11. Oko Armagedoni abandu bakendisyatswerwa erikwamana naki?
11 Tunasi emyatsi milebe okw’ebikendisyabya oko mughulu owakasa. Ng’eky’erileberyako, tunasi ngoko oko Armagedoni, abandu bakendisyatswerwa erikwamana n’ebyo bakolera abaghala babo Kristo. (Mat. 25:40) Abawatikaya Abakristo abahirirweko amaghuta n’eriwatikya Kristo bo bakendisyatswerwamo mbuli. Kandi tunasi ngoko omughulu eryaghalwa rinene rikendisyatsuka, abaghala babo Kristo bakendisyabya ibane oko kihugho kandi bakendisyatwalua elubula mughulu muke embere e Armagedoni yitsuke. Abaghala balebe babo Kristo ibakine oko kihugho, kitokekene abandu b’emitima myolo bakendisyabana akanya ak’eriwatikyabo n’eriwatikya oko mubiiri ogho banemukola. (Mat. 25:31, 32; Erib. 12:17) Busanaki emyatsi eyi ni y’omughaso?
12-13. Abandu balebe banganasyayiwata bati bakalangira “Babiloni Mukulu” akatsandibwa? (Ulebaye n’esyopitsa.)
12 Nibya n’enyuma eryaghalwa rinene ritsuke, kitokekene abandu balebe abakendisyalangira “Babiloni Mukulu” akatsandibwa banganasyibuka ebyo Abimiri ba Yehova babya bakabugha oko mwatsi oyo. Neryo abalebe ba kubo banemwendisyabindula emitima yabo babilangira eryaghalwa rinene rikatsuka?—Erib. 17:5; Ezek. 33:33.
13 Byamabya bitya, omwatsi oyo iniakendisyabya ng’owabya oko mughulu wa Musa. Wibuke ngoko “endeko nene mobatulungana” n’eriyighunga oko Baisraeli bakalua e Misri. Alinga abaghuma b’oko bandu abo mubatsuka eribya n’obwikirirya omughulu balangira ebyo Musa abugha oko bihunzo 10 bikabererera. (Eril. 12:38) Omwatsi owali ng’oyo, amasyabya Babiloni Mukulu akatoghotibwa, ekyo kyanganasyatubuna mutima kundi abandu bamayighunga netu mughulu muke embere omwiso ahike? Iyehe n’ahake! Twanzire eribya nga Tata wetu w’elubula, ‘[oMungu] oyo woswire nʼeriganyira nʼowʼolukogo, sianguhire, okwʼihitana, oyo woswire nʼobwenge bwʼolwanzo nʼomwatsi wʼekwenene.’ b—Eril. 34:6.
Abandu balebe abakendisyalangira “Babiloni Mukulu” akatsandibwa bakendisyibuka ebyo Abimiri ba Yehova babya bakabugha oko mwatsi oyo (Ulebaye enungu 12-13) d
14-15. Aho omundu ikere kutse endambi eyo asyaholerako byanganasyaleka inyabana engebe y’erikota? Kanaya. (Esyonyimbo 33:4, 5)
14 Abaghala n’abali betu balebe banganabugha bati: “Kyanganuwana omutunga waghe ahole embere eryaghalwa rinene ritsuke neryo inyasyabya n’amaha w’erisyalubuka.” Kwenene, hanganabya ekikakuna abaghala n’abali betu erilengekania batya. Aliwe, endambi eyo omundu asyaholerako yo yitendisyaleka omundu iniabana engebe y’erikota. Yehova ni Mutsweri oyutunganene, ni bugha ambu akatswera ndeke kandi omo ritunganene. (Soma Esyonyimbo 33:4, 5.) Twanganikirirya ngoko “Omutsweri wʼekihugo kyosi” akendisyakola ebitunganene.—Enz. 18:25.
15 Kandi twanganabugha tuti aho omundu alyaholera kyo kitekyangaleka iniabana engebe y’erikota. Yehova syendisyatswera amamilioni w’abandu abatabana akanya k’eryowa oko ngulu mbuya y’Obwami busana n’eyo bikere mo “syombene.” (Mat. 25:46) Omutsweri w’ekihugho kyosi oyutunganene atsomene abandu abo kulenga ngoko itwe twangatsomanabo. Sitwasi Yehova ng’akendisyatswera abandu abo ati omughulu w’eryaghalwa rinene. Alinga, abaghuma ba kubo bakendisyabana akanya k’erigha oko Yehova, erimwikirirya, n’erisombola eribya oko luhande lwiwe omughulu ak’endisyaminyikalya erina liwe oko bandu bosi.—Ezek. 38:16.
Enyuma eryaghalwa rinene ritsuke, . . . abandu balebe banemwendisyabindula emitima yabo?
16. Twabiriminyaki oko Yehova? (Ulebaye n’epitsa.)
16 Erilabira erigha eBiblia, twabiriminya ngoko abandu ni b’obughuli bunene oko Yehova. Mwaherera engebe ya Mughala wiwe, abandu bosi batoke eribyaho kera na kera. (Yoh. 3:16) Itwe bosi twabiriyilangirira olwanzo lwa Yehova. (Isa. 49:15) Anasi obuli mundu oko rina liwe. Atwasi ndeke kutsibu, nibya nomo twangahola, kundi akinibukire obuli katsi ok’obuli mughuma w’okw’itwe, n’ebyosi ebyabya omo bwenge bwetu! (Mat. 10:29-31) Eribugha ekwenene, twanganayiketera kundu ngoko Tata wetu w’elubula akendisyatswera abandu bo ndeke kundi iye awite amenge, atunganene, kandi akaghanyira.—Yak. 2:13.
Twanganikirirya ngoko Yehova akendisyatswera obuli mundu yo ndeke kundi iye awite amenge, atunganene, kandi akaghanyira (Ulebaye enungu 16)
17. Tukendisyakania okuki omo mwatsi ow’akwamire?
17 Eriminya lilya-lilya lino, lyamabileka itwalangira ngoko omubiiri wetu w’erihubirya ni w’erikola luba. Busanaki tukabugha tutya? Kandi ni byahi ebikatukuna erilola embere eritulira engulu mbuya n’omuhwa? Omwatsi owakwamire akendisyasubirya oko mabulyo ayo.
OLWIMBO 76 Ukayowa wuti?
a Eriminya nga ni busanaki twamabindula ebyo twabya tukabugha embere, ulebaye omwatsi, “Ndiyo Njia Iliyokubaliwa Nawe,” omo Akaleberyo k’Omuteya ak’ekiro 15 Omwisi 3, 2015 aka. 7-11.
b Babiloni Mukulu akendisyabya abitsandibwa, abaghombe bosi ba Yehova bakendisyalengwako omughulu Gogu wa Magogu asyabambirabo. Obuli mundu oyukendisyayighunga oko bandu b’oMungu, Babiloni Mukulu abitsandibwa naye akendisyalengwako.
c ERIKANIA OKO PITSA: Esyopitsa isatu esikakanganaya busanaki abandu balebe banganabula eryowa oko ngulu mbuya y’Obwami: (1) Omukali mughuma ikere eyo kikalire eritulira engulu mbuya busana n’ekisomo kikulu kyayo, (2) omulume n’omukali wiwe bikere eyo eleta siyiriha abandu b’obwiranda bw’eritulira, (3) n’omulume mughuma ikere ehali eyo kikalire erihikayo.
d ERIKANIA OKO PITSA: Omumbesa mughuma oywaleka ekwenene amibuka ebyo igha okw’itsandibwa lya “Babiloni Mukulu.” Amayisogha eribindula omutima wiwe n’erisuba omo ndeko. Omwatsi owali ng’oyo amabisyahuluka, twanzire eribya nga Tata wetu w’elubula oyukaghanyira n’erikwira abandu b’obulighe n’eritsema omukola nabi abisuba oko mutima.
