NKHANI YOPHUNZILA 19
NYIMBO 22 Ufumu Wamene Ulamulila Kululu—Uwele!
Kansi Tuziŵa Cinji Ponena za Viweluzo va Yehova va Msogolo?
“Yehova . . . ofuna lini kuti munthu aliyense akaonongewe.”—2 PET. 3:9.
ZATI TIPHUNZILE
Nkhani ino itisimikizhyile kuti viweluzo va Yehova va msogolo vikankhale va cilungamo.
1. Ndaŵa yanji tingalaŵile kuti tunkhala m’nthawi yosangalasa?
TUNKHALA m’nthawi yosangalasa ngako. Siku iliyonse, tuona zinthu zeyelosela Baibo zukwanilishiwa. Mwacisanzo, tuona “mfumu ya kumpoto” na “mfumu ya kum’mwela” zukangana cifukwa ca ulamulilo wa calo. (Dan. 11:40) Tuona soti kuti uthenga uweme wa Ufumu ulalikiliwa pacalo conse ndipo ŵanthu mamiliyoni osankha kutumikila Yehova. (Yes. 60:22; Mat. 24:14) Kuyangizhyila apo, tulandila cakulya cauzimu cokwanila “pa nthawi yoyenela.”—Mat. 24:45-47.
2. Kansi tingankhale osimikizhya za cinji, koma tufunika kuzindikila cinji?
2 Yehova opitilizhya kutiyavya kumvwishisha zinthu zofunika ngako zati zicitike msogolo. (Miy. 4:18; Dan. 2:28) Tingankhale osimikizhya kuti pofwika pa nthawi pati cisauso cikulu cikayambe, tikaziŵe zonse zatufunika kuziŵa kuti tikakwanishe kupilila mokhulupilika nopitilizhya kunkhala okatizhyana pa nthawi yovuta. Olo n’tetyo, tuzindikila kuti pali zinthu ziyakine zatisaziŵa zokhuza sogolo. M’nkhani ino, coyamba tilaŵizhyane cifukwa cake tecinja kamvwidwe kasu ponena za zinthu ziyakine zati zikacitike msogolo. Pavuli pake, tilaŵizhyane ziyakine mwa zinthu zatuziŵa zokhuza sogolo na mwamene Ausuwasu akululu akacitile zinthu.
ZINTHU ZATISAZIŴA
3. Kansi telaŵila kuti ni pa nthawi yotyani pamene ŵanthu enze kuzonkhala aliye mwai wonkhala ku mbali ya Yehova, ndipo ndaŵa yanji telaŵila tetyo?
3 M’nthawi zakuvuli, telaŵila kuti ngati cisauso cikulu cayamba, paliye munthu aliyense wosakhulupilila wati akankhale na mwai wonkhala ku mbali ya Yehova nopulumuka nkhondo ya Aramagedo. Telaŵila izi cifukwa tenzomvwisha kuti nkhani yokhuza Cigumula, wenze ulosi. Mwacisanzo, tenzoganiza kuti monga ni mwamene Yehova evalila ciseko ca cingalawa Cigumula cikaliyoyamba, akacite cimozimozi na dongosolo ino iipa ya Satana cisauso cikulu cikaliyoyamba na colinga cakuti ŵanthu osakhulupilila, asakankhale na mwai wopulumuka.—Mat. 24:37-39.
4. Ndaŵa yanji lomba tuona lini nkhani yokhuza Cigumula monga ulosi? Fotokozani.
4 Kansi tufunika kuona nkhani ya Cigumula monga ulosi? Yai. Ndaŵa yanji? N’cifukwa cakuti Baibo yulaŵila lini tetyo. a N’cendi kuti Yesu elinganizhya “masiku a Nowa” na nthawi ya kunkhalapo kwake. Koma aliyokambe kuti zonse zecitika m’nthawi ya Nowa zikakwanilishiwe pa mlingo ukulu msogolo monga ni pamene Yehova evala ciseko ca cingalawa. Olo n’tetyo, izi zutanthauza lini kuti paliye zatingaphunzilepo pa nkhani ya Nowa na Cigumula.
5. (a) Kansi Nowa eonesha tyani kuti enze na cikhulupililo Cigumula cikaliyoyamba? (Aheberi 11:7; 1 Petulo 3:20) (b) Pa nkhani yolalikila, zecitika m’masiku a Nowa zulingana tyani na zucitika masiku ŵano?
5 Nowa peecimvwa cenjezo ya Yehova, eonesha kuti enze na cikhulupililo mwa kumanga cingalawa. (Ŵelengani Aheberi 11:7; 1 Petulo 3:20.) Molingana na izi, ŵanthu amene akumvwa uthenga uweme wa Ufumu wa Mulungu ofunika kucitapo kanthu pa zaakumvwa. (Mac. 3:17-20) Petulo eita Nowa kuti ‘mlaliki wacilungamo.’ (2 Pet. 2:5) Olo n’tetyo, monga ni mwetelaŵilila m’nkhani yapita, tuziŵa lini ngati Nowa ekwanisha kulalikila munthu aliyense pacalo, Cigumula cikaliyoyamba. Masiku ŵano, tuyesayesa kulalikila ŵanthu pacalo conse ndipo tucita khama pa nchito iyi. Olo n’tetyo, tikwanishe lini kulalikila munthu aliyense pacalo masilizhyilo akaliyofwika. Ndaŵa yanji?
6-7. Ndaŵa yanji tulaŵila kuti tikwanishe lini kulalikila uthenga uweme kuli munthu aliyense pacalo masilizhyilo akaliyofwika? Fotokozani.
6 Ganizilani zecilaŵila Yesu ponena za nchito yolalikila. Yove elosela kuti uthenga uweme ukalalikiliwe “pacalo conse kuli ŵanthu kuti unkhale umboni kwa ŵanthu a mitundu yonse.” (Mat. 24:14) Ulosi uyu ukwanilishiwa pa mlingo ukulu masiku ŵano, kupambana kale. Uthenga wa Ufumu ulalikiliwa m’vilaŵilo vopitilila 1,000 ndipo cifukwa ca webusaiti ya jw.org, ŵanthu anyinji pacalo okwanisha kumvwa za uthenga uweme wa Ufumu wa Mulungu.
7 Yesu euzhya soti ophunzila ŵake kuti akakwanishe lini “kusilizhya magao a mizinda,” olo kulalikila munthu aliyense, yove akaliyowela. (Mat. 10:23; 25:31-33) Mau a Yesu okwanilishiwa masiku ŵano. Ŵanthu anyinji masiku ŵano, onkhala ku malo kwamene nchito yasu yolalikila ni yoleshewa. Kuyangizhyila apo, ŵanthu anyinji ovyalika mineti iliyonse. Tucita zonse zatingakwanishe kuti tilalikile ŵanthu “m’calo ciliconse, fuko iliyonse na cilaŵilo ciliconse” za uthenga uweme. (Chiv. 14:6) Koma zacendi n’zakuti tikwanishe lini kulalikila munthu aliyense masilizhyilo akaliyofwika.
8. Kansi tingazikonshe konsho yotyani ponena za viweluzo va Yehova va msogolo? (Onani soti vithunzithunzi.)
8 Kulingana na zatalaŵizhyana, tingazikonshe kuti: Nanga tyani za ŵala amene ankhale aliye mwai wakumvwa uthenga uweme cisauso cikulu cikaliyoyamba? Kansi Yehova na Mwana wake wamene epasiwa udindo woweluza akaŵaweluze tyani? (Yoh. 5:19, 22, 27; Mac. 17:31) Lemba pazikiwa nkhani ino yulaŵila kuti Yehova “ofuna lini kuti munthu aliyense akaonongewe.” M’malo mwake, ofuna kuti “onse alape.” (2 Pet. 3:9; 1 Tim. 2:4) Olo kuti tuziŵa izi ponena za Yehova, yove akaliyotiululila mwati akaweluzile ŵanthu amene ankhale aliye mwai wakumvwa uthenga uweme. Ndipo zacendi n’zakuti, Yehova ofunika lini kucitotiuzhya zinthu zonse zawacita olo zati akacite.
Kansi Yehova akacite tyani zinthu na ŵanthu ati ankhale aliye mwai wakumvwa uthenga uweme cisauso cikulu cikaliyoyamba? (Onani ndime 8) c
9. Kansi Yehova watiululila zinthu zotyani kupitila m’Baibo?
9 Kupitila m’Mau ŵake, Yehova watiululila zinthu ziyakine zati akacite. Mwacisanzo, otiuzhya kuti akaukishe ŵanthu “osalungama” amene enzeve mwai wakumvwa uthenga uweme nocinja minkhalidwe yao. (Mac. 24:15; Luka 23:42, 43) Izi zuleta makonsho ayakine ofunika ngako.
10. Kansi tingazikonshe soti makonsho ayakine otyani?
10 Kansi ŵanthu onse ati akafwe pa cisauso cikulu akaonongewe mpaka kale-kale ndipo akaŵeve ciyembekezo ca ciukililo? Malemba ofotokoza momvwika bwino kuti ŵanthu osusha amene Yehova na masoja ŵake akaononge pa Aramagedo, akaukishiwe lini. (2 Ates. 1:6-10) Koma nanga tyani za ŵanthu ayakine monga ŵala ati akaonongewe na masoka acilengedwe, ngozi olo ŵala ati akapaiwe na ŵanthu ayakine? (Mla. 9:11; Zek. 14:13) Kansi zingacitike kuti ayakine mwa ŵanthu aŵa akankhale pakati pa ŵanthu “osalungama” ati akaukishiwe m’calo calomba? Seo tuziŵa lini.
ZINTHU ZATUZIŴA
11. Kansi ŵanthu akaweluziwe molingana na cinji pa Aramagedo?
11 Pali zinthu ziyakine zatuziŵa ponena za zinthu zati zikacitike msogolo. Mwacisanzo, tuziŵa kuti pa Aramagedo, ŵanthu akaweluziwe kulingana na mwakucitila zinthu na akwake a Khristu. (Mat. 25:40) Ŵala ati akaweluziwe monga mbelele ni ŵala amene ocilikiza ozozewa na Khristu. Tuziŵa soti kuti akwake a Khristu ayakine akankhale mphela pacalo pavuli pakuti cisauso cikulu cayamba ndipo akatolewe kuluta kululu, nthawi itontho nkhondo ya Aramagedo ikaliyoyamba. Malinga ngati akwake a Khristu ali pacalo, n’zokwanishika kuti ŵanthu a maganizo abwino ankhale na mwai woŵacilikiza pamozi na nchito yakucita. (Mat. 25:31, 32; Chiv. 12:17) Ndaŵa yanji cendi ici n’cofunika?
12-13. Payakine ŵanthu ayakine akacite cinji pavuli poona kuonongewa kwa “Babulo Mkulu”? (Onani soti vithunzithunzi.)
12 Olo pavuli pakuti cisauso cikulu cayamba, n’zokwanishika kuti ŵanthu ayakine ati akaone kuonongewa kwa “Babulo Mkulu” akakumbukile kuti kwa vyaka vinyinji, a Mboni za Yehova elaŵilapo za cocitika ici. Kansi ayakine mwa ŵanthu ati akaone kuonongewa kwa Babulo Mkulu pa cisauso cikulu, akayambe kukhulupilila Yehova?—Chiv. 17:5; Ezek. 33:33.
13 Ngati izi niye zati zikacitike, niye kuti zikalingane na zecitika m’nthawi ya Mose ku Iguputo. Kumbukilani kuti “gulu ya ŵanthu a mitundu yosiyanasiyana” yekatizhyana na Aisiraeli pecifuma mu Iguputo. Ayakine mwa ŵanthu aŵa eyamba kukhulupilila Yehova pavuli poona kuti macenjezo a Mose okhuza Milili 10 akwanilishiwa. (Eks. 12:38) Ngati zinthu zolinganako na izi niye zati zikacitike pavuli pakuti Babulo Mkulu waonongewa, kansi tikakhumudwe kuona kuti zakwanishika ŵanthu kukatizhyana nase nthawi itontho masilizhyilo akaliyofwika? Yai. Tufuna kutolela Ausuwasu akululu amene ni “Mulungu wacifundo koma soti muweme mtima, wosakalipa kamangu, koma soti wacikondi cokhulupilika cikulu na cendi.” b—Eks. 34:6.
Ŵanthu ayakine ati akaone kuonongewa kwa “Babulo Mkulu” akakumbukile kuti a Mboni za Yehova enze ekambapo za cocitika ici (Onani ndime 12-13) d
14-15. Kansi sogolo ya munthu yudalila pa nthawi yangafwe olo ku malo kwakunkhala? Fotokozani. (Salimo 33:4, 5)
14 Nthawi ziyakine, ŵanthu ayakine angalaŵile kuti, “Zingankhale bwino ngako ngati wabanja wangu angafwe cisauso cikulu cikaliyoyamba na colinga cakuti pankhale ciyembekezo cakuti akaukishiwe.” Ove angalaŵile teti ali na colinga cabwino. Koma sogolo ya munthu yudalila lini pa nthawi yangafwe. Yehova ni woweluza wangwilo. Yove opanga zosankha zacilungamo nthawi zonse. (Ŵelengani Salimo 33:4, 5.) Tetyo, tingankhale osimikizhya kuti “Woweluza wa calo conse” akacite zinthu zoyenela.—Gen. 18:25.
15 N’pomvwika kulaŵila soti kuti mwai wakuti munthu ankhale na moyo mpaka kale-kale udalila lini ku malo kwakunkhala munthu. Yehova angaweluze lini ŵanthu mamiliyoni kunkhala “mbuzi” tyala cifukwa cakuti onkhala m’vyalo mwamene aliye mwai wophunzila za uthenga uweme wa Ufumu. (Mat. 25:46) Wolamulila wa calo conse wacilungamo, osamala ngako za ŵanthu aŵa kupambana seo. Tuziŵa lini mwamene Yehova akacitile zinthu pa nthawi ya cisauso cikulu. Payakine ayakine mwa ŵanthu aŵa akapasiwe mwai wakuti aphunzile za yove nonkhala ku mbali yake pavuli pakuti waziŵikisha zina yake kuli munthu aliyense pacalo.—Ezek. 38:16.
Pavuli pakuti cisauso cikulu cayamba, . . . kansi ŵanthu ayakine akayoona zocitika izi akayambe kukhulupilila Yehova?
16. Kansi tuziŵa cinji ponena za Yehova? (Onani soti cithunzithunzi.)
16 Kupitila m’kuphunzila Baibo, taziŵa kuti Yehova oona kuti ŵanthu ni ofunika ngako. Yove epeleka Mwana wake, kuti tonse tinkhale na mwai wonkhala na moyo mpaka kale-kale. (Yoh. 3:16) Tonse taona mwakutikondela Yehova. (Yes. 49:15) Yove oziŵa aliyense wa seo na zina yake. Otiziŵa bwino ngako cakuti olo tingafwe, akatiukishe cifukwa okumbukila mbali zonse zokhuza seo. (Mat. 10:29-31) Kulaŵila cendi, tili na cifukwa ciweme conkhalila na cidalilo cakuti Ausuwasu akululu akaweluze munthu aliyense mwangwilo, mwacilungamo koma soti mwacifundo.—Yak. 2:13.
Tingankhale osimikizhya kuti Yehova akaweluze munthu aliyense mwangwilo, mwacilungamo na mwacifundo (Onani ndime 16)
17. Kansi tikalaŵizhyane cinji m’nkhani yokonkhapo?
17 Kuziŵa masinthidwe aŵa a kamvwidwe kasu, kutiyayva kuziŵa kuti nchito yolalikila ni yofunika ngako pali lomba, kupambana kale. Ndaŵa yanji tingalaŵile tetyo? Ndipo n’cinji cutisonkhezela kupitilizhya kulalikila uthenga uweme mosalekezhya? Tikalaŵizhyane mayankho a makonsho aŵa m’nkhani yokonkhapo.
NYIMBO 76 Ko Mukumvwa Tyani?
a Kuti muziŵe cifukwa cake masinthidwe aŵa epangiwa, onani nkhani yakuti “Munavomeleza Kuti Zimenezi Zicitike,” mu Nsanja ya Mulonda ya Cinyanja ya March 15, 2015, mapeji. 7-11.
b Pavuli pakuti Babulo Mkulu waonongewa, atumiki onse a Yehova akayesewe Gogi wa Magogi akayoŵaukila. Ndipo munthu aliyense wati akankhale ku mbali ya Mulungu pavuli pakuti Babulo Mkulu waonongewa, naye akayesewe.
c MAU OFOTOKOZA VITHUNZITHUNZI: Vocitika vitatu vamene vuonesha cifukwa cake payakine ŵanthu ayakine angalalikiliwe lini: (1) Munakazi wamene onkhala ku malo kwamene cipembezo cikulu cucitisha kuti zinkhale zosakwanishika kumulalikila, (2) banja yamene yunkhala ku malo kwamene zandale zucitisha kuti cinkhale covuta kuŵalalikila, na (3) munalume wamene onkhala ku malo kutali ngako cakuti kufwika lini ŵanthu.
d MAU OFOTOKOZA CITHUNZITHUNZI: Munakazi wamene eleka kutumikila Yehova okumbukila zeciphunzila zokhuza kuonongewa kwa “Babulo Mkulu.” Waganiza zowelela kwa Yehova na makolo ŵake. Ngati zinthu zoteti zikacitike, tufuna kutolela Ausuwasu akululu amene ni acifundo koma soti aweme mtima ndipo tikasangalale kuti munthu wocimwa wawelela.
