ONTHELE YOKULILONGESWA 19
OTYIIMBO 22 Ouhamba Ukahi Nokutumina — Uye!
Oityi Twii Tyiyemba Komphela ya Siovaa?
“Siovaa . . . kahande nawike eye okuhanywa-ko.” — 2 PET. 3:9.
ETYI MATYIPOPIWA-MO
Onthwe twayumba-ko onthumbi okuti putyina Siovaa amaongela omphela ovanthu, makalinga umwe etyi tyaviuka.
1. Oityi tutila tuli mononthiki mbumwe mbuhuvisa?
ONONTHIKI mbuno tuli mbuhuvisa! Ononthiki mbatyo ambuho tyina kutya tutyimona umwe okuti omaulo Ombimbiliya ekahi nokufwiswapo. Tweete “ohamba yo kombanda, nohamba yo kombwelo” veli nokulituha-tuha, velinthintha kokutumina ouye. (Ndan. 11:40, okatoi) Evi oviwa ovipe Viouhamba, vikahi nokwiviswa ouye watyo auho, ya ovanthu ovanyingi-nyingi vekahi nokutavela otyili. (Isa. 60:22; Mat. 24:14) Tupu, tukahi nokupewa okulia okunyingi kutupameka moupanga wetu na Huku “mononthiki mbatyo mbanakwa.” — Mat. 24:45-47.
2. Onthwe tuna onthumbi yatyi, ya oityi twesukisa okunoñgonoka?
2 Siovaa ukahi nokutukwatesako tunoñgonoke vali nawa ovipuka ovinene mavikamoneka komutwe oku. (Omih. 4:18; Ndan. 2:28) Onthwe twayumba-ko onthumbi okuti putyina ononkhumbi ononene mbamahimbika, matukanoñgonoka umwe atyiho tuna okunoñgonoka momuvo oo, etyi matyitukwatesako okukakatela mu Siovaa putyina ovipuka viamaleme. Tupu tutyii okuti pena ovipuka vimwe mavikalingwa komutwe oku onthwe twehei. Monthele ei, tete matulilongesa omokonda yatyi twesukisila okupilulula etyi ankho tupopia tyiyemba kweetyi matyikalingwa komutwe wandyila. Pahe, atutale ovipuka onthwe twii mavikamoneka komutwe oku, neetyi Tate yetu wo keulu makalinga.
OITYI TWEHEI
3. Oityi kohale ankho tupopia, ya omokonda yatyi ankho tusokela ngootyo?
3 Kohale, ankho tupopia okuti ovanthu vana vehetavela ku Huku, mo Alumangendom kamavakahupa mokonda putyina ononkhumbi ononene mbamahimbika, kamavakamona-le vali omphitilo yokuhula ku Huku. Ankho tupopia ngootyo mokonda ankho tusoka okuti etyi tyaendele pomuvo Wombila Onene, otyo ñgoo matyikaenda komutwe oku. Ankho tusoka okuti, ngeetyi Siovaa ayeilile epito etyi Ombila Onene yahimbika, no putyina ononkhumbi ononene mbuhimbika Siovaa “makayeila epito” liouye ou wa Satanasi, opo ovanthu ovanyingi vahakale vali nomphitilo yokuhula kwe, avayovolwa. — Mat. 24:37-39.
4. Okuti ovipuka aviho vialingilwe pomuvo Wombila Onene vina etyi vilekesa matyikalingwa komutwe? Hangununa.
4 Okuti ovipuka aviho viamonekele pomuvo Wombila Onene, vilekesa ovipuka aviho mavikamoneka komutwe oku? Au. Omokonda yatyi tupopila ngootyo? Tupopia ngootyo mokonda Ombimbiliya kayetyipopile. a Sesusi wati ngeetyi tyali “kononthiki mba Nowee” otyo matyikakala tyina ngwe ameya. Sesusi waeleka etyi tyali pononthiki mba Nowee, neetyi matyikakala putyina ameya. Mahi ankho kekahi nokupopia okuti ovipuka aviho vialingilwe pomuvo wa Nowee, vina etyi vilekesa matyikalingwa komutwe wandyila. Tupu ankho kekahi nokupopia okuti etyi epito liayeilwa, tyina etyi tyilekesa matyikalingwa komutwe oku. Mahi otyo katyilekesa okuti tutupu-ale etyi tulilongesila-ko kweetyi tyaendele-ko pomuvo Wombila Onene.
5. (a) Oityi Nowee alingile etyi Ombila Onene yeheneye? (Ova Hembeleu 11:7; 1 Petulu 3:20) (b) Oityi tutila ovilinga vietu viokwivisa vielifwa no vya Nowee?
5 Etyi Nowee alondolwa na Huku, etyi apopilwa ovipuka nkhele ankho vihenemoneke, ayumbu-ko onthumbi atungu owato. (Tanga Ova Hembeleu 11:7; 1 Petulu 3:20.) Novanthu hono, ñgeno tyina vameivi oviwa ovipe Viouhamba wa Huku, vena okulinga etyi Ombimbiliya ipopia. (Ovil. 3:17-20) Petulu wapopia okuti Nowee “wapopile movanthu etyi tyaviuka.” (2 Pet. 2:5) Mahi ngeetyi matupopi monthele ei, onthwe katutyii ine Nowee walingile umwe ovikambanya opo aivise kovanthu vatyo aveho pweetyi Ombila Onene yeheneye. Hono onthwe tukahi nokwivisa ouye auho, ya tuundapa nombili movilinga ovio. Mahi namphila tulinga ovikambanya tuundapa unene movilinga evi, no ngootyo kamatutyivili-ale okwivisa ovanthu vatyo aveho putyina nkhele onthyulilo yeheneye. Omokonda yatyi?
6-7. Oityi tutila kamatutyivili-ale okwivisa ovanthu vatyo aveho tyina nkhele onthyulilo yeheneye? Hangununa.
6 Nkhele tala vala tyimwe Sesusi apopile tyiyemba kovilinga vietu viokulongesa ovanthu valinge ovalongwa. Wapopile okuti oviwa ovipe Viouhamba mavikapopiwa “kombanda yohi aiho, ovanthu aveho vomihoko nomihoko mwene avekeliivilako.” (Mat. 24:14) Eulo olio likahi umwe nokufwiswapo vali unene mononthiki mbuno. Oviwa ovipe Viouhamba hono vili momalaka alamba po 1.000. Ya ovanthu ovanyingi vanoñgonokela umwe vala oviwa ovipe mo site jw.org.
7 Tupu Sesusi wapopilile ovalongwa vae okuti ‘omapunda-umbo kamamweemane,’ otyo okuti, kamamutyivili-ale okupopila ovanthu aveho, otyo ngwe eheneye. (Mat. 10:23; 25:31-33) Otyo tyapopile Sesusi otyili umwe, tyikahi nokumoneka. Hono ovanthu ovanyingi vakala kovilongo oku ovilinga viokwivisa viailikwa. Tupu kuna nokukutulwa ovana ovanyingi-nyingi ononthiki mbatyo ambuho. Tukahi umwe nokulikwatehila opo twivise kovanthu “vovilongo aviho, vomihoko aviho, vomalaka aeho.” (Ehol. 14:6) Mahi kamatutyivili-ale okupopila oviwa ovipe ovanthu aveho, okupopila umwe munthu na munthu otyo onthyulilo yeheneye.
8. Oityi tupondola okulipula tyiyemba komphela Siovaa makaongela ovanthu? (Tala omalutalatu.)
8 Tupondola okulipula ñgaa: Tyina ononkhumbi ononene mbuhimbika, vana vahamwene omphitilo yokupopilwa oviwa ovipe, mavakalingwa ñgeni na Siovaa Nomona wae, ou apa otyilinga tyokuveongela omphela? (Swau 5:19, 22, 27; Ovil. 17:31) Otesitu mwapolwa onthele ei, yapopia okuti Siovaa “kahande nawike eye okuhanywa-ko,” wahanda “aveho vehike kokulivela.” (2 Pet. 3:9; 1 Tim. 2:4) Mahi no ngootyo, onthwe katutyivili okukumbulula epulo eli twalinga, mokonda Siovaa nkhele kenetupopile-tyo. Ngwe tyili kesukisa-le okutupopila atyiho makalinga.
Mononkhumbi ononene oityi Siovaa makalinga vana vahamwene omphitilo yokwiiva oviwa ovipe? (Tala opalangalafu 8) c
9. Oityi Siovaa etupopila Mondaka yae?
9 Siovaa wetupopila Mondaka yae Ombimbiliya ovipuka ovinyingi makalinga. Soka Ombimbiliya ipopia okuti Siovaa makatutilisa naava “vehenondingaviwa,” vahamwene-ale omphitilo yokwiiva oviwa ovipe, vayeke-po ovipuka ovivi valinga. (Ovil. 24:15; Luka 23:42, 43) Mahi otyo tyieta vali epulo ekwavo.
10. Epulo patyi vali tupondola okulilinga?
10 Ya pahe vana mavahanywa-ko mononkhumbi ononene, okuti ovo ngootyo vakakota umwe, kavakatutila vali? Ombimbiliya yapopia umwe nawa okuti aveho veyele Huku, ava oo Siovaa novita viae mavakahanya-ko mo Alumangendom, kavakatutiliswa vali. (2 Tes. 1:6-10) Ya pahe ava vokunkhia umwe vala mokonda hamwe vavela, mokonda yekulupo, hamwe vapumwa netuku-tuku, ine ovihuna vali ovikwavo viouye ou? (Omup. 9:11; Sak. 14:13) Okuti ovo mavakavalulilwa povanthu vana “vehenondingaviwa” mavakatutiliswa mouye omupe? Onthwe katutyii.
ETYI TWII
11. Ovanthu pokukaongelwa omphela mo Alumangendom, mavakatalelwa kutyi?
11 Onthwe twii ovipuka ovinyingi mavikalingwa komutwe oku. Onthwe twii okuti, ovanthu pokukaongelwa omphela mo Alumangendom, mavakatalelwa kweetyi veli nokulingila onondenge mba Kilisitu hono. (Mat. 25:40) Mavakatiwa onongi, ovava vakwatesako ovalembulwa, na Kilisitu. Tupu tutyii okuti vamwe ponondenge mba Kilisitu ovalembulwa, kamavatwalwa vala liwa no keulu, nkhele matukakala navo pano pohi putyina ononkhumbi ononene mbamahimbika. Mavatwalwa vala no keulu tyina kukambela vala kapii opo Alumangendom ihimbike. Putyina nkhele vamwe ponondenge mba Kilisitu veli pano pohi, tyipondola hamwe ovanthu vamwe vokuna omitima omiwa, mavakala nomphitilo yokuvekwatesako. (Mat. 25:31, 32; Ehol. 12:17) Omokonda yatyi otyipuka otyo tyesukisila unene?
12-13. Vamwe vapondola okukalinga ñgeni tyina “o Mbambilonia Onene” ina nokuhanywa-ko? (Tala omalutalatu.)
12 No putyina ononkhumbi ononene mbamahimbika, tyipondola ovanthu tyina vamakamona “o Mbambilonia Onene” ili nokuhanywa-ko, mavakahinangela umwe okuti otyipuka etyi Onombangi mba Siovaa ankho vetyipopia-le. Okuti vamwe putyina vamamono ovipuka ovio, vapondola okupiluluka? — Ehol. 17:5; Isek. 33:33.
13 Ine otyo ovipuka mavikaenda ngootyo, opo matyilifu neetyi tyalingilwe ko Isitu pononthiki mba Mwisesi. Ova Isilayeli pokutunda ko Isitu vaile “novanthu ovanyingi” veheva Isilayeli. Tyipondola vamwe vahimbikile vala okuyumba onthumbi mu Huku pweetyi vamona omaelema aeho ekwii Mwisesi alingile. (Oku. 12:38) No komutwe oku putyina o Mbambilonia Onene yamahanywa-ko, ovipuka vipondola umwe okukaenda ngootyo. Pahe okuti ine ovanthu vakakala Onombangi putyina kwakamba vala katutu opo onthyulilo iye, otyo matyiketunumanesa? Au. Onthwe twahanda okuhetekela Tate yetu wo keulu, “Huku weevela una okankhenda, wokwapwa-elundo, una olwembia olunene, apeho ufwisapo ondaka yae.” b — Oku. 34:6.
Ovanthu ovanyingi tyina vamamono “o Mbambilonia Onene” ihanywa-ko, mavakahinangela umwe okuti Onombangi mba Siovaa vetyipopile-ale. (Tala opalangalafu 12-13) d
14-15. Okuti etyi omunthu makalingwa komutwe oku tyitei kokwanyima, no kotyilongo akala? Hangununa. (Oviimbo 33:4, 5)
14 Vamwe Onombangi vapondola okusoka kovavo vehelilongesa avati: “Ine vanyima tyina ononkhumbi ononene mbehenehimbike hahe vali, mokonda opo nkhele tukevela-ko okuti mavakatutiliswa.” Otyili, tyipopisa ngootyo okankhenda. Mahi etyi Siovaa makalinga ovanthu komutwe oku, katyitei komunthu okunyima. Siovaa omukoyesi uviukisa, apeho ulinga etyi tyata-mo, etyi tyaviuka. (Tanga Oviimbo 33:4, 5.) Tuyumbei-ko onthumbi, “Omukoyesi wouye auho” makalinga etyi tyaviuka. — Ehim. 18:25.
15 Tutyii okuti etyi omunthu makalingwa momphela omo, kamatyikatalelwa apa akala. Tupu katyaviukile okusoka okuti ovanthu vakala kovilongo oku oviwa ovipe viehehikile, Siovaa mekeveti ovinkhombo. (Mat. 25:46) Siovaa omukoyesi wouye watyo auho, mekesuka umwe navo. Mekevelingila ovipuka onthwe twahasoko-ale. Onthwe katutyii oñgeni Siovaa makaendeka ovipuka mononkhumbi ononene. Tyipondola putyina Siovaa amelinkhimaneka movilongo viatyo aviho, ovanthu ovanyingi mavakakala nomphitilo yokumunoñgonoka, avekemuyumba onthumbi, avakahula kwe. — Isek. 38:16.
Tyina ononkhumbi ononene mbamahimbika, . . . okuti vamwe putyina vamamono ovipuka ovio, vapondola okupiluluka?
16. Oityi twii tyayemba ku Siovaa? (Tala olutalatu.)
16 Tyina tulilongesa Ombimbiliya, tutyimona umwe nawa okuti Siovaa uhanda tukale nomwenyo. Welipolele Omona wae opo atuho tukale nomphitilo yokukakala-ko apeho. (Swau 3:16) Onthwe atuho tutyimona umwe okuti Siovaa utuhole. (Isa. 49:15) Siovaa wii omanyina etu, utwii umwe nawa. Nga tunkhi vala, pokutututilisa utututilisa umwe atukala ngeetyi ankho tukahi, etupake umwe momutwe ovipuka aviho ankho twii. (Mat. 10:29-31) Onthwe twayumba-ko onthumbi, tutyii okuti Tate yetu wo keulu wolwembia, pokwongela ovanthu omphela, munthu na munthu memulingi umwe etyi tyata mwe. Makalinga okankhenda, mahi alingi umwe etyi tyaviuka. — Tia. 2:13.
Tuyumbei-ko onthumbi okuti, putyina Siovaa amakaongela omphela ovanthu, munthu na munthu mekemulinga umwe etyi tyata mwe. Makalinga okankhenda, mahi alingi umwe etyi tyaviuka. (Tala opalangalafu 16)
17. Oityi matulilongesa monthele ilandula kweei?
17 Ovipuka ovio ovipe twanoñgonoka, vialekesa okuti, otyilinga tyetu tyokulongesa ovanthu valinge ovalongwa, tyalumbanesa unene. Omokonda yatyi tupopila ngootyo? Oityi tyitwavela ondundo tutwaleko nokwivisa oviwa ovipe? Onthele ilandula kweei, maikumbulula omapulo oo.
OTYIIMBO 76 Oñgeni Otyo Tyikukalesa?
a Opo unoñgonoke omokonda yatyi twapilululila ovipuka vimwe, tala onthele yati: “Oyo Onkhalelo Ove Wapanda,” m’Omutala Womulavi 15 ya Tyitalale yo 2015, pefo 7-11.
b Tyina o Mbambilonia Onene yamahanywa-ko, tyati umwe naava vafenda-le Siovaa kohale, naava pahe mavakakala vala Onombangi pomuvo opo, mavakahukaiswa unene na Ngonge ya Mangonge.
c ONONDAKA MBOKUHANGUNUNA OLUTALATU: Ovipuka vitatu vilekesa oityi vamwe vahameivila oviwa ovipe: (1) Omukai ukala potyilongo tyimwe pehetavela okukaivisa, mokonda yonongeleya mbuli-po. (2) Omulume nomukai wae vakala motyilongo tyimwe omu ovatumini vahahande mwiviswe.(3) Omulume ukala vala monohika mumwe mwehetavela-le okwenda-mo.
d ONONDAKA MBOKUHANGUNUNA OLUTALATU Pefo 11: Omuhikwena wayekele-po otyili, pahe una nokuhinangela etyi elilongesile tyokuti “o Mbambilonia Onene” maihanywa-ko. Etyi asoka umwe nawa, akondoka keumbo liovohe Onombangi. Ine otyo ovipuka mavikaenda ngootyo, onthwe tuhanda okulinga ovanthu volwembia, vokankhenda, tyina twamamono ou wakondoka atuhambukwa, atuhetekela Tate yetu keulu.
