EKICWEKA EKY’OKWEGA 19
EKYESHONGORO 22 Obukama Bwatairweho—Shaba ngu Bwije!
Nitumanya ki aha ku Yehova Araacwe Emanja omu Biro by’Omumaisho?
‘[Yehova] tarikwenda muntu weena kuhwerekyerera.’ —2 PET. 3:9.
ENTIMA
Nitubaasa kugira obwesigye ngu emanja ezi Yehova araacwe omu biro by’omumaisho, naija kuzicwa omu kuhikiirira n’oburingaaniza.
1. Ahabw’enki nitubaasa kugira ngu turi omu bwire bw’omutaano?
TURI omu bwire bw’omutaano. Buri izooba, nitureeba obunabi bwa Baibuli burikuhikiirira. Nk’eky’okureeberaho, nitureeba ‘omugabe wa bukiizi-bwa-bumosho’ ‘n’omugabe wa bukiizi-bwa-buryo’ nibarwanagana buri omwe arikwenda kworeka ngu niwe arikukizayo amaani omu nsi yoona. (Dan. 11:40) Nitureeba okubuurira amakuru marungi g’Obukama bwa Ruhanga kubugire ensi yoona, kandi abantu baingi nibacwamu kuheereza Yehova. (Isa. 60:22; Mat. 24:14) Kandi nitutunga eby’okurya by’omwoyo bingi “omu bunaku obuhikire.”—Mat. 24:45-47.
2. Niki eki twineho obuhame, kwonka twine kwetegyereza ki?
2 Yehova naagumizamu kutuhwera kwetegyereza ebintu bikuru ebiri haihi kubaho. (Enf. 4:18; Dan. 2:28) Nitubaasa kuhamya ngu okubonabona kwingi kwaza kutandika, nitwija kuba nitwetegyereza byona ebi twine kumanya kubaasa kugumisiriza omu bwesigwa, kandi tukaguma twine obumwe omu bwire obwo obugumire. Kwonka twine kwetegyereza ngu hariho ebi tutarikumanya aha biri hakye kubaho. Omu kicweka eki, nituza kubanza kushwijuma ahabw’enki tuhindwire omu bi twabaire tugambire aha biraabeho omu biro by’omumaisho. Bwanyima nituza kweijutsya ebi turikumanya aha biro by’omumaisho, n’oku Tataitwe ow’omu iguru araatwaze.
EBI TUTARIKUMANYA
3. Tukagamba ki aha ku abantu baraabe batakiine omugisha gw’okutwegaitaho, kandi ahabw’enki twagizire tutyo?
3 Enyima, tukaba nitugira ngu okubonabona kwingi ku kuraatandikye, abatarikuheereza Yehova nibaija kuba batakiine mugisha gw’okumwikiririzamu, kubaasa kuhonokaho ahari Haramagedoni. Tukagira tutyo ahabw’okuba tukaba nitumanya ngu ebirikukwata aha Mwegyemure bikaba nibijwekyera ebiraabeho omu biro by’omumaisho. Nk’eky’okureeberaho, tukaba nituteekateeka ngu nk’oku Yehova yaakingire orwigi rw’emeeri Omwegyemure gutakatandikire, naija “kukiinga orwigi” omu muringo gw’akamanyiso aha kutandika kw’okubonabona kwingi, kugira ngu naija kuba atakiikiriza abandi bantu kutunga omugisha gw’okujunwa.—Mat. 24:37-39.
4. Mbwenu shi nitureeba ngu byona ebirikukwata aha Mwegyemure biine eki birikujwekyera aha birikwija kubaho? Shoboorora.
4 Mbwenu shi twine kureeba byona ebirikukwata aha Mwegyemure nk’ebirikujwekyera ebiraabeho omu biro by’omumaisho? Ngaaha. Ahabw’enki? Ahakuba Ebyahandiikirwe ekyo tibirikukigambaho. a Yesu akagyeragyeranisa ‘ebiro bya Noa’ n’obwire bw’okwija kwe, kwonka taragizire ngu ebirikukwata aha Mwegyemure nk’abantu n’ebindi ebyabaireho haine eki byabaire nibijwekyera, n’obu kwakuba okukinga orwigi. Kwonka, ekyo tikirikumanyisa ngu titurikubaasa kwegyera ahari Noa n’Omwegyemure.
5. (a) Noa akakora ki Omwegyemure gutakabaireho? (Abaheburaayo 11:7; 1 Petero 3:20) (b) Omurimo gwaitu gw’okubuurira nigushushana guta n’ogw’omu bwire bwa Noa?
5 Noa ku yaahuriire obutumwa bwa Yehova obw’okurabura, akooreka ngu aine okwikiriza arikwombeka emeeri. (Shoma Abaheburaayo 11:7; 1 Petero 3:20.) Nikyo kimwe, abantu abarikuhurira amakuru marungi g’Obukama bwa Ruhanga baine kugira eki baakora. (Byak. 3:17-20) Petero akeeta Noa omubuurizi “w’okuhikiirira.” (2 Pet. 2:5) Kwonka, nk’oku tureebire omu kicweka ekihwaire, titurikumanya yaaba Noa yaatebeekaniise kampeyini y’okubuurira buri omwe owaabaire ariho omu nsi Omwegyemure gutakabaireho. Hati, nitwejumba omu murimo gw’okubuurira ogurikukorwa omu nsi yoona, kandi nituteeraho kugukora n’obweziriki. Kwonka n’obu turaabe nituteeraho munonga tituraabaase kubuurira buri omwe ori omu nsi amakuru marungi emperu etakahikire. Ahabw’enki?
6-7. Ahabw’enki turikubaasa kugira ngu titurabuurire buri omwe omu nsi amakuru marungi emperu etakahikire? Shoboorora.
6 Teekateeka aha ki Yesu yaagambire aha buhango bw’omurimo gw’okubuurira. Akagira ngu amakuru marungi gakaba nigaija kubuurirwa ‘omu nsi yoona okuba eky’okuhamya aha mahanga goona.’ (Mat. 24:14) Obunabi obwo buriyo nibuhikiirira hati kukira ira. Obutumwa bw’Obukama nibushohozibwa omu ndimi ezirikurenga 1,000, n’aha mukura gwaitu jw.org, abantu baingi omu nsi yoona nibeegyeraho amakuru marungi.
7 Kwonka Yesu akagambira abeegi be ngu bakaba batarikwija ‘kubuga tauni za Israeli zoona’ nari kubuurira buri omwe, atakagarukire. (Mat. 10:23; 25:31-33) Ebigambo bye nibiija n’okuhikiirira n’omu bunaku bwaitu. Abantu nyamwingi nibatuura omu bicweka ahu omurimo gwaitu gw’okubuurira gurikuzibirwa. Kandi, buri dakiika abaana baingi nibazaarwa. Nitukora kyona eki turikubaasa kubuurira amakuru marungi abantu ‘b’amahanga goona n’enganda zoona n’endimi.’ (Kush. 14:6) Kwonka amazima gari ngu, tituraabaase kubuurira amakuru marungi buri muntu emperu etakahikire.
8. Nitubaasa kwebuuza ki aha bikwatiraine n’emanja ezi Yehova araacwe omu biro by’omumaisho? (Reeba n’ebishushani.)
8 Eki nikireetaho ekibuuzo eki, kandi shi abo abataraatungye omugisha gw’okuhurira amakuru marungi emperu etakahikire? Yehova n’Omwana we ou yaahaire obujunaanizibwa bw’okucwa orubanja, nibiija kubatwariza bata? (Yoh. 5:19, 22, 27; Byak. 17:31) Ekyahandiikirwe kikuru ky’ekicweka eki nikigira ngu Yehova ‘tarikwenda muntu weena kuhwerekyerera, kureka naayenda ngu boona bahikye aha kweteisa.’ (2 Pet. 3:9; 1 Tim. 2:4) N’ahabw’ekyo, twine kwetegyereza ngu Yehova takatumanyiise eki araakorere abantu abo. Kandi, tikirikumwetengyesa kutugambira ekintu kyona aha bi akozire n’ebi araakore.
Yehova naija kutwariza ata abaraabe batatungire omugisha gw’okuhurira amakuru marungi okubonabona kwingi kutakatandikire? (Reeba akacweka 8) c
9. Yehova atumanyiise ki kurabira omu Baibuli?
9 Kwonka, Yehova kurabira omu Kigambo kye atumanyiise ebi araakore. Nk’eky’okureeberaho, Baibuli neetugambira ngu Yehova naija kuzoora “abatahikiriire” abaafiire batatungire mugisha gw’okuhurira amakuru marungi, kubaasa kuhindura emitwarize yaabo. (Byak. 24:15; Luk. 23:42, 43) Ekyo nikireetaho ebindi bibuuzo bikuru.
10. Ni bibuuzo ki ebindi ebi turikubaasa kwebuuza?
10 Mbwenu shi boona abaraafe omu kubonabona kwingi nibaija kucwekyererezibwa kimwe obutazooka? Ebyahandiikirwe nibyoreka butunu ngu abahakanisa abu Yehova n’eihe rye baraacwekyereze ahari Haramagedoni tibaraazookye. (2 Tes. 1:6-10) Kandi shi abandi, nk’abaraafe ahabwa bukuru, endwara, butandu, nari abaraitwe bagyenzi baabo? (Mub. 9:11; Zek. 14:13) Mbwenu shi bamwe aharibo nibaija kutwarirwa omu ‘batahikiriire’ abaraazoorwe omu nsi ensya? Ekyo titurikukimanya.
EKI TURIKUMANYA
11. Ahari Haramagedoni, abantu nibaija kucwerwa orubanja kurugiirira ahari ki?
11 Hariho bingi ebi turikumanya aha biraabeho omu biro by’omumaisho. Nk’eky’okureeberaho, nitumanya ngu ahari Haramagedoni, abantu nibaija kucwerwa orubanja kurugiirira aha ku baatwariize beene ishe Kristo. (Mat. 25:40) Abaashagikire abashukirweho omwoyo gurikwera na Kristo, nibaija kushoroorwa nk’entaama. Kandi nitumanya ngu okubonabona kwingi ku kuraatandikye, bamwe aha ntoore nibaija kuba bakiri omu nsi, kandi nibaija kutwarwa omu iguru orutaro rwa Haramagedoni ruri haihi kutandika. Bamwe aharibo baaba bakiri omu nsi, abantu ab’emitima mirungi nibabaasa kugira omugisha gw’okubashagika n’omurimo ogu barikukora. (Mat. 25:31, 32; Kush. 12:17) Ahabw’enki enshonga ezi ziri nkuru?
12-13. Abamwe nibabaasa kwija kutwaza bata bareeba “Babulooni Orukuru” rucwekyereziibwe? (Reeba n’ebishushani.)
12 Kandi bwanyima y’okubonabona kwingi kutandika, bamwe abaraareebe “Babulooni Orukuru” nirucwekyerera, nibabaasa kwijuka ngu Abajurizi ba Yehova bakaba baagizire ngu ekyo nikiija kubaho. Mbwenu shi bamwe abaraareebe ebyo nibibaho nibabaasa kwija kwikiririza omuri Yehova?—Kush. 17:5; Ezk. 33:33.
13 Ekyo kyabaho, nikiba kiri nk’oku kyabaireho omuri Misri omu bwire bwa Musa. Ijuka ngu “omutwe muhango gw’ebijwangye by’abantu bakagyenda” n’Abaisraeli. Abamwe nibabaasa kuba baatandikire kwikiririza omuri Yehova bwanyima y’okureeba Ebiheneso Ikumi ebi Musa yaagambire birikubaho. (Kur. 12:38) Ekintu nk’ekyo kyabaho bwanyima y’okucwekyerera kwa Babulooni Orukuru, nitwija kwehurira kubi ahabw’okugira ngu abandi baatwegaitaho emperu eri haihi kuhika? Ngaaha buzima. Nitwenda kutooreza Tataitwe ow’omu iguru, “Ruhanga ow’okusaasira n’embabazi, otarahuka kugira ekiniga, oijwire embabazi n’amazima.” b—Kur. 34:6.
Bamwe abaraareebe “Babulooni Orukuru” rurikucwekyerera, nibabaasa kwijuka ngu Abajurizi ba Yehova bakaba baagizire ngu ekyo nikiija kubaho (Reeba akacweka 12-13) d
14-15. Mbwenu shi omuntu kubaasa kutuuraho ebiro byona nari kucwekyererezibwa kimwe nikirugiirira ahu arikutuura nari obu yaafa? Shoboorora. (Zaaburi 33:4, 5)
14 Obumwe, nituhurira abamwe barikugira ngu, “nikibaasa kuba kirungi omunyabuzaare wangye kufa okubonabona kwingi kutakatandikire kugira ngu obundi atungye omugisha gw’okuzooka.” Nibaba baine ebigyendererwa birungi omu kugamba ebigambo ebi. Kwonka omuntu okutuuraho ebiro byona nari okucwekyererezibwa kimwe tikirikurugirira aha bwire obu yaafeeramu. Yehova n’omucwi w’emanja ohikiriire, naacwamu ebihikire, kandi eby’oburingaaniza. (Shoma Zaaburi 33:4, 5.) Noobaasa kugira obwesigye ngu “omucwi w’emanja ow’ensi yoona” naija kukora ebihikire.—Kut. 18:25.
15 Kandi kihikire kugira ngu omuntu okutuuraho ebiro byona nari okucwekyererezibwa kimwe tikirikurugiirira ahu arikutuura. Abantu nyamwingi abarikutuura omu mahanga ahu batarikubaasa kutunga omugisha gw’okuhurira obutumwa bw’Obukama, Yehova tarikubaasa kumara agabacwera orubanja ngu ‘n’embuzi.’ (Mat. 25:46) Omucwi w’emanja ow’ensi yoona ohikiriire naafayo munonga aha bantu n’okutukira. Titurikumanya oku Yehova araakore ebintu omu kubonabona kwingi. Obundi, bamwe aha bantu abo nibaija kugira omugisha gw’okwega ahari Yehova, bamwikiririzemu, kandi baze aha rubaju rwe ku araayeze eiziina rye omumaisho g’amahanga goona.—Ezk. 38:16.
Bwanyima y’okubonabona kwingi kutandika,. . . bamwe shi abaraareebe ebyo nibibaho nibabaasa kwikiririza omuri Yehova?
16. Nitumanya ki ahari Yehova? (Reeba n’ekishushani.)
16 Ahabw’okushwijuma Baibuli, twongyeire kumanya oku Yehova arikutwara amagara nk’ag’omuhendo. Akahayo Omwana we kugira ngu twena tubaase kugira amatsiko g’okutuuraho ebiro byona. (Yoh. 3:16) Twena tureebire oku Yehova arikutufaho. (Isa. 49:15) Naamanya eiziina rya buri omwe ahariitwe. Nangwa, naamanya gye buri muntu, kugira ngu n’obu twakufa naabaasa kutuzoora nk’oku twabaire turi, kandi turikubaasa kwijuka buri kimwe. (Mat. 10:29-31) Buzima, twine enshonga nungi ezirikutureetera kugira obwesigye ngu Tataitwe ow’omu iguru owa rukundo naija kucwera buri omwe orubanja omu buringaaniza, omu kuhikiirira, n’embabazi.—Yak. 2:13.
Nitubaasa kugira obwesigye ngu Yehova naija kucwera buri omwe orubanja omu buringaaniza, omu kuhikiirira, n’embabazi (Reeba akacweka 16)
17. Nituza kugamba ahari ki omu kicweka ekirikukurataho?
17 Empinduka ezi nizooreka ngu omurimo gwaitu gw’okubuurira gwine kukorwa turikurahukiiriza kukira obundi bwona. Ahabw’enki nitugira tutyo? Kandi niki ekirikutuhiga kugumizamu nitubuurira amakuru marungi obutaruha? Ekicweka ekirikukurataho nikiza kugarukamu ebibuuzo ebyo omu bwijwire.
EKYESHONGORO 76 Nikukureetera Kwehurira Ota?
a Okumanya ahabw’enki empinduka egi ekozirwe, reeba ekicweka, Ogu Nigwo Muringo ogu “Waasiimire” omu Omunaara gw’Omurinzi ogwa Maaci 15, 2015, rup. 7-11.
b Bwanyima y’okucwekyerera kwa Babulooni Orukuru, abaheereza ba Yehova boona nibaija kugyezibwa Googi owa Magoogi ku araabataahirire. Weena oraaze aha rubaju rw’abaheereza ba Ruhanga bwanyima ya Babulooni Orukuru kucwekyerera, naija kugyezibwa.
c ENSHOBOORORA Y’EBISHUSHANI : Ebishushani bishatu ebirikworeka ahabw’enki bamwe barikubaasa kutabuurirwa: (1) Omukazi naatuura omu kicweka ahu ediini y’amaani erikugumisa embeera, (2) omushaija n’omukazi we nibatuura ahu ab’eby’obutegyeki barikuzibira okubuurira, kandi ahu kiri eky’akabi, (3) omushaija naatuura omu kicweka ekyehereire munonga.
d ENSHOBOORORA Y’EKISHUSHANI: Omwishiki owaarekiire aho kuheereza Yehova yaijuka ebi yaayegire ebirikukwata aha kucwekyerera kwa “Babulooni Orukuru.” Yaacwamu kugarukira Yehova, n’abazaire be Abakristaayo. Abamwe baakora empinduka nk’ezo, nitwenda kutooreza Tataitwe ow’omu iguru orikusaasira kandi omunyambabazi, reero tushemererwe ahabw’omusiisi owaagaruka.
