NKHANI YAKUPFUNZA 19
NYIMBO 22 Umambo Bunkutonga Kudzulu — Bubwere!
Bzomwe Timbadziwa bza Momwe Yahova An’dzatongera Wanthu Kutsogoloku
“Yahova . . . an’funa lini kuti munthu ali-wentse adzapfudzidwe.” — 2 PEDRU 3:9.
CAKULINGA CA NKHANIYI
Tingakhale na citsimikizo centse cakuti Yahova akadzatonga wanthu kutsogolo kuno, iye an’dzacita bzimwebzo mu njira yabwino na yakulungama.
1. Thangwe ranyi tingalewe kuti tikukhala mu nthawe yakudekeza kwene-kwene?
TIKUKHALA mu nthawe yakudekeza kwene-kwene! Ntsiku iri-yentse, tikuwona kukwanisika kwa polofesiya ya m’Bibliya. Mwa ciratizo, tikuwona kuti “mambo wa ku norte” na “mambo wa ku suli” akunesana okha-okha thangwe rakuti wentse akufuna kutonga dziko la pantsi. (Daniyeli 11:40) Tikukwanisa kuwona kuti mafala yabwino yakupaliziridwa pa dziko lentse la pantsi, ndipo wanthu azinji akusankhula kutumikira Yahova. (Zaiya 60:22; Mateu 24:14) Ndipo tikutambira cakudya cizinji cauzimu “pa nthawe yakuthemera.” — Mateu 24:45-47.
2. Kodi n’ciyani comwe tin’funika kutsimikizira, ndipo n’ciyani comwe tin’funika kuzindikira?
2 Yahova akutithandiza kubvesesa bwino bzinthu bzakufunika bzomwe bzin’dzacitika kutsogolo kuno. (Mimwani 4:18; Daniyeli 2:28) Tingakhale na citsimikizo centse cakuti citsautso cikulu cikadzayamba, tin’dzadziwa bzomwe tin’funika kucita kuti tipitirize kukhala wakukhulupirika na kupitirizambo kukhala wakuphatana pa nthawe yakunesayi. Tsono, tin’funika kuzindikira kuti pana bzinthu bzinango bzomwe tin’dziwa lini pakulewa bzakutsogolo. Mu nkhani ino, cakuyamba tiniwona kuti thangwe ranyi tidacinja kabvesesedwe pakulewa bza bzakucitika bzimwebzi. Patsogolo pace, tin’dzawona bzinthu bzinango bzomwe timbadziwa pakulewa bzakutsogolo na momwe Baba wathu wa kudzulu an’dzacitira bzinthu.
BZOMWE TIMBADZIWA LINI
3. N’ciyani comwe ifepano tikhalewa kale-kale pakulewa bza wanthu omwe angadakhala alibe mwayi wakukhulupira Yahova, ndipo thangwe ranyi tikhakumbuka tenepo?
3 M’mbuyomu, tikhadalewa kuti citsautso cikulu cikadzayamba wanthu angadadzakhala lini pomwe na mwayi wakukhulupira Yahova acipulumuka pa Armagedo. Tikhalewa tenepo thangwe tikhakumbuka kuti munthu ali-wentse na cinthu ciri-centse comwe cikhacitika pa nthawe ya Cigumula ca Madzi cikhaimira bzinthu bzomwe bzingadadzacitika kutsogolo. Mwa ciratizo, tikhakumbuka kuti pakuti palibe munthu omwe angadakwanisa kupita mu cingalawa pambuyo pa Yahova kufunga msuwo, palibembo munthu omwe angadakwanisa kukhulupira Yahova acidzapulumuka citsautso cikulu cikadzayamba. — Mateu 24:37-39.
4. Thangwe ranyi timbalewa lini kuti bzomwe bzidacitika pa nthawe ya Nowa bzikukwanisika ntsiku zathu zino? Fotokozani.
4 Kodi tin’funika kumbaiwona nkhani ya Cigumula ca Madzi ninga polofesiya? Mtawiro ngwakuti ne. Thangwe ranyi? Thangwe rakuti Bibliya limbalewa lini bzimwebzo. a N’cadidi kuti Jezu adandendemezera “ntsiku za Nowa” na kuwonekera kwace, tsono iye alibe kulewa kuti bzinthu bzentse bzomwe bzidacitika mu nthawe za Nowa bzingadadzacitikambo kutsogolo ninga pa nthawe yomwe Yahova adafunga msuwo wa cingalawa. Bzimwebzi bzikuthandauza lini kuti palibe bzomwe tingapfunze na nkhani ya Nowa na ya Cigumula ca Madzi.
5. (a) Kodi Nowa adalatiza tani cikhulupiro pomwe Cigumula ca Madzi cikhanati kucitika? (Ahebereu 11:7; 1 Pedru 3:20) (b) Kodi ni kundendemerana kuponi komwe kulipo pakati pa upalizi bomwe Nowa akhacita na bomwe timbacita ntsiku zino?
5 Pomwe Nowa adabva mafala ya Yahova ya mcenjezo, iye adalatiza kuti akhana cikhulupiro mwa kumanga cingalawa. (Werengani Ahebereu 11:7; 1 Pedru 3:20.) Mwa njira ibodzi-bodziyi, wanthu omwe ambabva mafala yabwino ya Umambo an’funika kulatiza cikhulupiro mwa kuphatisa basa bzomwe akupfunzabzo. (Mabasa 3:17-20) Pedru adalewa kuti Nowa akhali “mpalizi wacirungamo.” (2 Pedru 2:5) Tsono, ninga momwe idalatizira nkhani idapita ire, tikudziwa lini penu Nowa adakwanisa kupalizira wanthu pa dziko lentse la pantsi pomwe Cigumula ca Madzi cikhanati kucitika. Ntsiku zino timbacitambo bzibodzi-bodzibzi mwa kucita nyongo yakucita basa lakupalizira. Koma napo ticicita nyongo yakupalizira, tin’kwanisa lini kupalizira mafala yabwino wanthu pa dziko lentse la pantsi pomwe cimaliziro cikanati kufika. Thangwe ranyi tikulewa tenepoyo?
6-7. Thangwe ranyi tingalewe kuti tin’dzakwanisa lini kupalizira mafala yabwino wanthu pa dziko lentse la pantsi pomwe cimaliziro cikanati kufika? Fotokozani.
6 Kumbukirani bzomwe Jezu adalewa pakulewa bza basa lathu lakupalizira. Iye adalewa kuti mafala yabwino ya Umambo “yan’dzapaliziridwa pa dziko lentse la pantsi komwe kuna wanthu.” (Mateu 24:14) Polofesiya imweyi ikukwanisika ntsiku zino kuposa kale-kale. Mafala yabwino ya Umambo yakupaliziridwa m’bzirewedwe bzakupitirira 1000. Thangwe ra kuphatisa basa webisaite yathu ya jw.org, wanthu azinji pa dziko lentse la pantsi ntsiku zino akupfunza mafala yabwino ya Umambo bwa Mulungu.
7 Na tenepo, Jezu adauzambo ateweri wace kuti iwo an’dzamaliza lini“ kupalizira m’mizinda yentse pomwe iye akanati kubwera,” kudzatonga wanthu acisiyanisa wabwino na wakuipa. (Mateu 10:23; 25:31-33) Mafala yamweya njacadidimbo ntsiku zathu zino. Wanthu azinji ambakhala ku mbuto komwe timbabvumizidwa lini kupalizira padeca. Kuthumizira bzimwebzi wanthu azinji ambabadwa ntsiku iri-yentse. Na tenepo, tin’dzakwanisa lini kupalizira wanthu wentse pa dziko lentse la pantsi pomwe cimaliziro cikanati kufika napo tingacite nyongo yakupalizira wanthu wa “mtundu uli-wentse, dzinza [na] cirewedwe.” — Apokalipse 14:6.
8. Kodi ni mibvunzo iponi yomwe tingabzicite pakulewa bza momwe Yahova an’dzatongera wanthu kutsogoloku? (Onani bzithunzi-thunzi.)
8 Kucokera pa bzomwe tacezeranabzi tingabzibvunze kuti: Tsono tani kwa wale omwe alibe kukhala na mwayi wakubva mafala yabwino pomwe citsautso cikulu cikhanati kuyamba? N’ciyani comwe Yahova na Mwana wace omwe adamusankhula kuti atonge, an’dzacita na wanthu amwewa? (Juwau 5:19, 22, 27; Mabasa 17:31) Vesi lomwe likutsogolera nkhani yathuyi likulewa kuti Yahova “an’funa lini kuti munthu ali-wentse adzapfudzidwe.” M’mbuto mwace, iye “an’funa kuti wanthu wentse akungule.” (2 Pedru 3:9; 1 Timotio 2:4) Napo kuti timbadziwa bzinthu bzimwebzi pakulewa bza Yahova, iye alibe kutiuza momwe an’dzatongera wanthu omwe alibe kukhala na mwayi wakubva mafala yabwino. Ndipo iye ali lini wakungingimizidwa kutiuza bzimwebzo.
Kodi Yahova an’dzacita tani na wale omwe alibe kukhala na mwayi wakubva mafala yabwino pomwe citsautso cikulu cikanati kucitika? (Onani ndime 8) c
9. N’ciyani comwe Yahova adatidziwisa m’Bibliya?
9 M’Fala lace, Bibliya, Yahova ambatiuza bzinthu bzinango bzomwe iye an’dzacita kutsogolo. Mwa ciratizo, Bibliya limbatiuza kuti Yahova an’dzalamusa wanthu “wakusaya kulungama” omwe alibe kukhala na mwayi wakupfunza bza mafala yabwino acicinja makhalidwe yawo. (Mabasa 24:15; Luka 23:42, 43) Bzimwebzi bzimbaticitisa kuti tikhale pomwe na mibvunzo inango yakufunika.
10. Kodi ni mibvunzo inango iponi yomwe tingakhale nayo?
10 Kodi wentse omwe an’dzafa pa citsautso cikulu alibe cidikhiro cakudzalamusidwa pomwe? Bzinembo bzimbabvekesa bwino kuti wale omwe ambatsutsa Yahova na omwe an’dzapfudzidwa na Yahovayo pabodzi na anyankhondo wace pa Armagedo, an’dzalamusidwa lini pomwe. (2 Atesalonika 1:6-10) Tsono tani pakulewa bza wanthu winango omwe an’dzafa pa citsautso cikulu thangwe ra matenda, kukalamba, asidente na kuphedwa na munthu munango? (Mpalizi 9:11; Zakariya 14:13) Kodi wanthu amwewa ali mu gulu la wanthu “wakusaya kulungama” omwe an’dzalamusidwa mu dziko lipsa? Kulewa cadidi ifepano tin’dziwa lini.
BZOMWE TIMBADZIWA
11. Kodi munthu an’dzatongedwa pa Armagedo mwakubverana na ciyani?
11 Timbadziwa bzinthu bzakusiyana-siyana bzomwe bzin’dzacitika kutsogolo. Mwa ciratizo, timbadziwa kuti pa Armagedo wanthu an’dzacitiridwa mwakubverana na momwe iwo akhacitirambo bzinthu abale wa Kristu. (Mateu 25:40) Wanthu omwe an’dzatongedwa ninga mabira an’dzakhala alatiza kuti ambathandizira anyakudzozedwa pabodzi na Kristu. Timbadziwambo kuti abale winango wa Kristu an’dzakhala akali pa dziko la pantsi pomwe citsautso cikulu cin’dzayamba ndipo an’dzatengedwa aciyenda kudzulu nkhondo ya Armagedo ikadzasala pang’ono kucitika. Pomwe abale wa Kristu akali pa dziko la pantsi mpsakukwanisika kuti wanthu omwe ana mitima yabwino akhale na mwayi wakuwathandizira na kuwathandizambo mabasa yomwe iwo ambacita. (Mateu 25:31, 32; Apokalipse 12:17) Thangwe ranyi bzimwebzi mpsakubveseseka?
12-13. N’ciyani comwe wanthu winango angadzacite akadzawona kupfudzidwa kwa “Babiloniya Mkulu”? (Onani bzithunzi-thunzi.)
12 Napo pambuyo pa citsautso cikulu kuyamba mpsakukwanisika kuti wanthu winango an’dzakwanisa kuwonambo, kupfudzidwa kwa “Babiloniya Mkulu,” acidzakumbukira kuti kwa magole mazinji Mboni za Yahova zikhadalewa kale kuti bzimwebzi bzingadadzacitika. Tsono, kodi wanthu omwe an’dzawona kupfudzidwa kwa Babiloniya Mkulu pa nthawe ya citsautso cikulu, an’dzakhulupira Yahova? — Apokalipse 17:5; Ezekiyeli 33:33.
13 Bzimwebzi bzicicitika bzingandendemerane na bzomwe bzidacitika ku Edjipito pa nthawe ya Mozeji. Kumbukirani kuti “wanthu wa mitundu minango” adayenda pabodzi na Ajirayeri pomwe iwo akhacoka mu Edjipito. Pinango winango mwa wanthu amwewa adayamba kukhulupira Yahova pomwe adawona kuti micinjezo yomwe Mozeji akhadalewa pakulewa bza matsoka 10 idacitikadi. (Ekisodo 12:38) Bzinthu ninga bzimwebzi bzikadzacitika pambuyo pa kupfudzidwa kwa Babiloniya Mkulu, kodi tin’dzakumbuka kuti n’kusaya cirungamo kuti wanthu akhale kumbali yathu pomwe cimaliziro casala pang’ono kufika? Bzikuwonekeratu kuti ne! Tikufuna kukhala ninga Baba wathu wakudzulu omwe, “ni Mulungu wantsisi ndipo ambafulumiza lini kukalipa, iye ngwakudzala na lufoyi lacadidi pabodzi na cadidi.” b — Ekisodo 34:6.
Wanthu winango akadzawona kupfudzidwa kwa “Babiloniya Mkulu” an’dzakumbukira kuti bzomwe bzikucitikabzo Mboni za Yahova zikhadalewa kale m’mbuyomu (Onani ndime 12-13) d
14-15. Kuti munthu akhale na mwayi wakukhala na moyo mpaka kale-kale bzimbathemba iye akafa ayai komwe iye ambakhala? Fotokozani. (Salimo 33:4, 5)
14 Abale na mpfumakazi pinango angalewe bza munthu m’bodzi wa banja mwawo omwe ambatumikira lini Yahova kuti: “Iye acifa pomwe citsautso cikulu cikanati kuyamba bzingakhale bwino kwa iye thangwe angadzakhale na cidikhiro cakudzalamusidwa.” Kulewa cadidi pana mathangwe yomwe yambawacitisa kulewa mafala yamweya. Tsono kukhala na moyo wakusaya kumala bzimbathemba lini nthawe yomwe munthuyo anifa. Yahova ni mtongi wakulungama ndipo bzakusankhula bzace nthawe zentse mpsakulungama. (Werengani Salimo 33:4, 5.) Tingakhale na citsimikizo centse cakuti “Muyeruzi wa dziko lentse la pantsi” an’dzacita bzakulungama. — Genesesi 18:25.
15 Mpsakubvekambo kulewa kuti mwayi wakuti munthu adzakhale na moyo wakusaya kumala umbathemba lini komwe munthuyo ambakhala. Yahova an’dzatonga lini wanthu wentse ninga “mbuzi” thangwe rakuti wanthuwo akhakhala m’madziko yomwe alibe kukhala na mwayi wakupfunza bza mafala ya Umambo. (Mateu 25:46) Mtongi wa dziko lentse la pantsi ambacita thupo kwene-kwene na wanthu amwewa kuposa momwe ifepano timbakumbukira. Tin’dziwa lini momwe iye an’dzacitira bzinthu pa citsautso cikulu. Bzomwe iwo an’dzawona bzingadzawacitise kukhulupira Yahova pomwe Yahovayo an’dzakhala akudziwikisa dzina lace pa dziko lentse la pantsi. — Ezekiyeli 38:16.
Pambuyo pa citsautso cikulu kuyamba, . . . kodi bzomwe wanthu an’dzawona bzin’dzawacitisa kuti iwo acinje momwe akhawonera bzinthu?
16. N’ciyani comwe tapfunza pakulewa bza Yahova? (Onani Pomwe Ibzi.)
16 Tikapfunza Bibliya timbakwanisa kuwona kuti wanthu mbakufunika kwene-kwene kwa Yahova. Iye adapereka moyo wa Mwana wace kuti tentse tikhale na mwayi wakudzakhala na moyo wakusaya kumala. (Juwau 3:16) Tentsenefe timbakwanisa kuwona kuti Yahova ambatifuna. (Zaiya 49:15) Iye ambadziwa madzina ya tentsenefe. Iye ambatidziwa bwino kwene-kwene mwakuti napo ticifa iye angadzatilamuse thangwe rakuti ambadziwa momwe tentsenefe tiriri na bzomwe timbakumbuka! (Mateu 10:29-31) Kulewa cadidi, ifepano tinayo mathangwe yabwino yakukhulupira kuti Baba wathu wa kudzulu an’dzatonga mwakulungama wanthu wentse thangwe rakuti iye ngwanzeru, ngwakulungama ndipo ngwantsisi. — Tiyago 2:13.
Tingakhale na citsimikizo cakuti Yahova an’dzatonga mu njira yabwino, yakulungama na yantsisi (Onani ndime 16)
17. Kodi ni mibvunzo iponi yomwe tin’dzacezerana mu nkhani ikubwerayi?
17 Pakuti tsapano tina kabvesesedwe kapsa pa nkhani imweyi, tikukwanisa kuwona kuti basa lathu lakupalizira lin’funika kucitidwa mwakamfulumize kuposa kale-kale. Thangwe ranyi tikulewa tenepoyo? Ndipo n’ciyani comwe cimbaticitisa kuti tipitirize kupalizira mafala yabwino mwakusaya kulekeza? Tin’dzatawiridwa mibvunzo imweyi mu nkhani yomwe ikubwerayi.
NYIMBO 76 Kodi Mumbabva Tani na Bzimwebzi?
a Kuti mudziwe kuti n’thangwe ranyi kucinja kumweku kudacitidwa, onani nkhani yakuti “Munavomereza Kuti Zimenezi Zichitike” mu Ntsanza ya Mulindiri ya 15 Março 2015 matsa. 7-11 (Chichewa.)
b Pambuyo pa Babiloniya Mkulu kupfudzidwa, atumiki wentse wa Yahova an’dzayezedwa pa nthawe yomwe Gogi wa ku Magogi an’dzafuna kuwazunza. Munthu ali-wentse omwe an’dzasankhula kukhala ku mbali ya wanthu wa Mulungu pambuyo pa kupfudzidwa kwa Babiloniya Mkulu an’dzayezedwambo.
c BZOMWE BZIKUCITIKA PA CINTHUNZI-THUNZI: Bzithunzi-thunzi bzitatu bzomwe bzikulatiza thangwe lomwe lin’dzacitisa kuti wanthu winango aleke kupaliziridwa: (1) Mkazi ambakhala ku mbuto komwe gereja imbawoneka kuti njakusaya kukhotcerereka, (2) banja likukhala ku mbuto komwe boma limbacitisa kuti bzinthu bzikhale bzakunesa, na (3) mwamuna omwe akukhala ku mbuto yakutali komwe bzikuwoneka kuti mpsakunesa kufika wanthu.
d BZOMWE BZIKUCITIKA PA CITHUNZI-THUNZI: Tswaka lomwe lidasiya cadidi likukumbukira bzomwe lidapfunza pakulewa bza kupfudzidwa kwa “Babiloniya Mkulu.” Iye akucinja nzeru zace ndipo akubwerera kwa abereki wace omwe mbacikristau. Bzimwebzi bzikacitika, tikufuna kukhala ninga Pai wathu wa kudzulu omwe ngwantsisi na kukomedwa thangwe ra kubwerera kwa munthu omwe akhadacita pikado.
