1. ¿Por hanja dä za gä eñhu̱ ge bi tokagihu̱ gä mꞌu̱ihu̱ ha yä gäxä pa?

 ¡OTHO rä duda ge bi tokagihu̱ gä mꞌu̱ihu̱ ha yä gäxä pa! Hyaxtho di handihu̱ hanja di kumpli gatꞌho näꞌä bi mängä rä Mäkä Tꞌofo ge ma dä thogi. Por ejemplo, di handihu̱ hanja «rä rey de rä norte» ꞌne «rä rey de rä sur» di ntuhni ꞌne tanto nꞌa ngu mä nꞌaa ne dä ntäte (Dan. 11:​40, ꞌne rä nota). Di handihu̱ hanja po gatꞌho rä Xiꞌmhai di tꞌungä ntꞌo̱de de rä Tsꞌu̱tꞌhui Äjuä, ꞌne yä miyontho nuꞌu̱ yä jäꞌi yꞌo ri joni ha rä hnini rä Zi Dada Jeoba (Is. 60:22; Mat. 24:14). ꞌNehe, ja ngu nunka änte xki nheki, di hänihu̱ xi ndunthi rä mfädi de rä Noya Äjuä po mäde de näꞌä rä hogä ꞌme̱go xä hñutsꞌi nuua ha rä Xiꞌmhai (Mat. 24:​45-47, TNM).

2. ¿Te di pädihu̱ xä ñho ꞌne te mähyoni gä benihu̱ ꞌnehe?

² Rä Zi Dada Jeoba yꞌo ri maxkägihu̱ pa gä ntiendehu̱ mänꞌa xä ñho gatꞌho näꞌä ma dä thogi mänꞌitꞌho (Prov. 4:18; Dan. 2:28). Mänꞌitꞌho ma dä mu̱di näꞌä rä däta mbidi fädi ꞌnehe ngu rä däta tribulación, ꞌne di pädihu̱ xä ñho ge rä Zi Dada Jeoba ma dä rꞌakägihu̱ gatꞌho näꞌä di jakägihu̱ mꞌe̱di pa hingä ꞌuengihu̱ de rä ꞌñuu, pa gä mꞌu̱ihu̱ unido ꞌne pa gä ze̱tihu̱ gatꞌho nuꞌu̱ yä xuñha ma dä thogi durante näꞌä rä däta mbidiꞌä. Pe mähyoni gä benihu̱ ge hindi pädihu̱ gatꞌho näꞌä ma dä thogi. Ha nunä ntꞌudi di nxadihu̱, mꞌe̱tꞌo ma gä handihu̱ por hanja xtä paatihu̱ näꞌä ndi ntiendehu̱ mä mꞌe̱tꞌo. ꞌNepu̱, ma gä handihu̱ rꞌa yä tꞌo̱tꞌe näꞌä  hää di pädihu̱ ge ma dä thogi ꞌne te ma dä me̱fi rä Zi Dada Jeoba.

TE HINDI PÄDIHU̱

3. Mä mꞌe̱tꞌo, ¿te ndi mbenihu̱ ge ma xä thogi xti mu̱di näꞌä rä däta mbidi mää rä Mäkä Tꞌofo, ꞌne por hanja ndi mbenihu̱ njabu̱?

³ Mä mꞌe̱tꞌo ndi kamfrihu̱ ge xti mu̱di rä däta tribulación, toꞌo ja penä dä ne dä hyoni rä Zi Dada Jeoba ya hingä ma xä za ꞌne ma xä mꞌe̱di rä bida ha rä Armagedón. Ndi kamfrihu̱ njabu̱, ngeꞌä di pädihu̱ ge ha rä pa rä Noé geꞌä gi thogi nuꞌmu̱ bi zo̱ho̱ rä Diluvio: bi njotꞌi rä goxthi ꞌne ya ninꞌa rä jäꞌi himbi za bi yu̱tꞌi ha rä arca, ho̱nse̱ Noé ꞌne rä familia (Mat. 24:​37-39).

4. ¿Por hanja hindi debe gä mbenihu̱ ge näꞌä bi thogi ha yä pa Noé, di representa näꞌä ma dä thogi mꞌe̱fa?

⁴ ¿Por hanja hindi debe gä mbenihu̱ ge näꞌä bi thogi ha yä pa Noé, di representa näꞌä ma dä thogi mꞌe̱fa? a Ngeꞌä rä Mäkä Tꞌofo hingi udi njabu̱. Mäjuäni ge rä Hesu bi kompara nuꞌu̱ yä pa rä Noé ko näꞌä rä tiempo xti mu̱di dä mända ngu nꞌa rä Rey. Pe rä Hesu himbi ne bi mää ge kada nꞌa de nuꞌu̱ yä tꞌo̱tꞌe bi thogi ha yä pa Noé geꞌä ma dä thogi mꞌe̱fa. Hindi signifika ge rä Zi Dada Jeoba ꞌne rä Hesu ma dä gotꞌi ꞌnehe rä goxthi xti mu̱di näꞌä rä däta mbidi. Pe mäske hingä ma dä thogi gatꞌho nuꞌu̱ yä tꞌo̱tꞌe bi thogi mäyaꞌmu̱ ha rä Diluvio, hää dä za gä pädihu̱ ndunthi de geꞌä.

5. a) ¿Te bi me̱fi Noé ora bi bädi ge rä Zi Dada Jeoba ma xä hä nꞌa rä Diluvio? (Hebreos 11:7; 1 Pedro 3:20). b) Mäske bi yꞌo̱tꞌe ntsꞌe̱di Noé pa bi predikabi yä jäꞌi, ¿te himbi za bi me̱fi ꞌne te hingi tsa gä pe̱fihu̱ ꞌnehe mäpaya?

⁵ Rä Zi Dada Jeoba bi xipäbi Noé ge ma xä  hä nꞌa rä Diluvio pa xä huati yä tsꞌomꞌu̱i jäꞌi. Noé bi gamfri gatꞌho näꞌä bi mängä rä Zi Dada Jeoba, hänge bi me̱fi näꞌä bi mändabi ꞌne bi hyokä nꞌa rä arca (hñeti Hebreos 11:7; 1 Pedro 3:20). Njabu̱ ꞌnehe mäpaya, ora yä jäꞌi o̱de nuꞌu̱ yä hogä notisia de rä Tsꞌu̱tꞌhui Äjuä, rꞌaa udi ge pe̱ꞌspäbi ndunthi rä komfiansa rä Zi Dada Jeoba ora fu̱di paati yä mꞌu̱i ꞌne pe̱fi ja ngu di mända rä Mäkä Tꞌofo (Hech. 3:​17-20). Rä Mäkä Tꞌofo mää ge Noé bi predika (2 Ped. 2:5). Pe ja ngu ya dä handihu̱ ha Rä ntꞌudi pa gä nxadihu̱ 18, hindi pädihu̱ mu̱ Noé bi xipäbi o hinä kada nꞌa rä jäꞌi näꞌä ma xä me̱fi rä Zi Dada Jeoba. Mäpaya, mäske ꞌnehe di o̱thu̱ ntsꞌe̱di po gä predikabihu̱ gatꞌho yä jäꞌi po gatꞌho rä Xiꞌmhai, pe nunka ma gä huadihu̱ gä zofohu̱ gatꞌho yä jäꞌi änte de dä zo̱ho̱ rä fin. ¿Por hanja hinä?

6, 7. ¿Por hanja nunka ma gä lograhu̱ gä tinihu̱ gatꞌho yä jäꞌi pa gä predikabihu̱ änte de dä zo̱ho̱ rä fin?

⁶ Ma gä handihu̱ asta habu̱ bi mää rä Hesu ge ma xä tso̱ni rä Noya Äjuä. Näꞌä bi ꞌñenä ge nuꞌu̱ yä hogä notisia de rä Tsꞌu̱tꞌhui Äjuä «ma dä tꞌungä ntꞌo̱de ha gatꞌho rä xiꞌmhai, pa njabu̱ dä yꞌo̱de yä jäꞌi de gatꞌho yä dähni» (Mat. 24:​14, TNM). Näꞌä bi mää rä Hesu di kumpli mäpaya ja ngu nunka xki nheki. Yä testigo rä Jeoba di predika po mäxo̱ge rä Xiꞌmhai. Pa geꞌä di usa rä página jw.org pa udi rä Noya Äjuä ha thogi de 1.000 yä idioma.

⁷ Rä Hesu ꞌnehe bi ꞌñembäbi nuꞌu̱ yä de̱ni: «Di aseguraꞌihu̱ ge hingä ma gi huadihu̱ gi predikahu̱ ha gatꞌho nuꞌu̱ yä hnini ja ha Israel, änte de dä zo̱ho̱ rä Tꞌu̱ rä Mexiꞌmhai» (Mat. 10:​23, TNM; 25:​31-33). Näꞌä bi mää rä Hesu signifika ge nuꞌu̱ yä de̱ni hingä ma dä logra dä predikabi kada nꞌa rä jäꞌi änte de dä zo̱ho̱ rä fin. ¿Por hanja? Mäpaya yä miyontho yä jäꞌi bi ꞌmu̱i ha nuꞌu̱ yä hnini habu̱ yä autorida xä proibi toꞌo dä predika. ꞌNehe, kada nꞌa rä minuto di mꞌu̱i yä nthebetho yä zi bätsi. Hänge mäske gatꞌho xa gä o̱thu̱ ntsꞌe̱di po gä mahu̱ gä predikabihu̱ «gatꞌho yä dähni, yä tribu, yä idioma ꞌne yä pueblo», nunka ma gä lograhu̱ gä tinihu̱ kada nꞌa de nuꞌu̱ yä jäꞌi ꞌmu̱i ha rä Xiꞌmhai (Apoc. 14:​6, TNM).

8. ¿Rꞌabu̱ te mä ntꞌani di pe̱ꞌtsihu̱? (Hyandi ꞌnehe yä foto).

⁸ Hänge zäi ge rꞌabu̱ di ñꞌanihu̱: «Xti zo̱ho̱ näꞌä rä däta mbidi, ¿te ma dä me̱fi rä Zi Dada Jeoba ko nuꞌu̱ yä jäꞌi nunka toꞌo bi predikabi?» (Juan 5:​19, 22, 27; Hech. 17:31). Rä Mäkä Tꞌofo hingi mää te ma dä me̱fi rä Zi Dada Jeoba ko nuyu̱ yä jäꞌi. Mähyoni gä benihu̱ ge näꞌä hingi pe̱ꞌtsi rä obligasio de dä xikägihu̱. Pe rä Mäkä Tꞌofo enä ge rä Zi Dada Jeoba «hingi ne dä hyandi dä du ninꞌa rä jäꞌi, sino ke Näꞌä ne dä hyandi ge gatꞌho dä zo̱ho̱ dä arrepenti» (2 Ped. 3:​9, TNM; 1 Tim. 2:4).

9. ¿Te xä xikägihu̱ rä Zi Dada Jeoba ha rä Mäkä Tꞌofo?

⁹ Ha rä Mäkä Tꞌofo, rä Zi Dada Jeoba xä xikägihu̱ ndunthi de nuꞌu̱ yä tꞌo̱tꞌe ma dä me̱fi. Por ejemplo, xikägihu̱ ge ma dä gu̱tsꞌi nuꞌu̱ yä jäꞌi xä du. ꞌNehe xikägihu̱ ge ma dä gu̱tsꞌi asta rꞌa de nuꞌu̱ yä jäꞌi «bi me̱fi näꞌä xä ntsꞌo» ꞌne ma dä umbäbi rä oportunida de dä bädi de Geꞌä ꞌne dä paati yä mꞌu̱i (Hech. 24:15; Luc. 23:​42, 43). Po geꞌä, zäi ge rꞌabu̱ di pe̱ꞌtsihu̱ märꞌa yä ntꞌani.

10. ¿Ndaꞌu̱ märꞌa yä ntꞌani di pe̱ꞌtsihu̱ rꞌabu̱?

¹⁰ Zäi ge rꞌabu̱ ꞌnehe di ñꞌanihu̱: «¿Te ma dä thogi ko nuꞌu̱ yä jäꞌi ma dä du durante rä däta tribulación? ¿Ya hingä ma drä ju̱tsꞌi de rä du?». Rä Mäkä Tꞌofo hää tsꞌogi claro ge nuꞌu̱ ma dä du ha rä Armagedón, rä Zi Dada Jeoba ya hingä ma dä gu̱tsꞌi de rä du. ¿Por hanja? Ngeꞌä nuꞌu̱ yä jäꞌiꞌu̱ bi desidi dä nkontraui directamente rä Zi Dada Jeoba ꞌne nunka bi arrepenti (2 Tes. 1:​6-10). Pe nuꞌu̱ yä jäꞌi ma dä du durante rä däta tribulación, rä Mäkä Tꞌofo hingi xikägihu̱ te ma dä thogi kongeꞌu̱. Rꞌa de  nuyu̱ yä jäꞌi zäi ge ma dä du po nꞌa rä ñheni, po nꞌa rä aksidente o rꞌaa ma dä du ha yä yꞌe̱ yä tsꞌomꞌu̱i jäꞌi ja ngu thogi mäpaya (Ecl. 9:11; Zac. 14:13). Pe hindi pädihu̱ mu̱ rꞌa de gehyu̱, nunka bi yꞌo̱de de rä Noya Äjuä ꞌne himbi me̱ꞌtsi rä oportunida de bi paati yä mꞌu̱i. Hänge ho̱nse̱ rä Zi Dada Jeoba pädi mu̱ ma dä gu̱tsꞌi de rä du o hinä rꞌa de nuꞌu̱ yä jäꞌi ma dä du durante näꞌä rä däta tribulación.

TE HÄÄ DI PÄDIHU̱

11. Xti zo̱ho̱ rä Armagedón, ¿hanja ma drä juzga yä jäꞌi?

¹¹ Rä Mäkä Tꞌofo hää xikägihu̱ ndunthi de näꞌä ma dä me̱fi rä Zi Dada Jeoba. Por ejemplo, xikägihu̱ ge xti zo̱ho̱ rä gerra de Armagedón, ma drä juzga yä jäꞌi depende de hanja bi trata nuꞌu̱ yä kristianu ma dä ma ha mähetsꞌi pa dä mända ko rä Kristo (Mat. 25:40). Hää, ma dä thandi ngu yä zi mäxo de̱ti nuꞌu̱ yä jäꞌi bi apoya rä Kristo ꞌne nuꞌu̱ yä de̱ni ma dä ma ha mähetsꞌi. Xti zo̱ho̱ rä däta tribulación rꞌa de nuꞌu̱ yä kristianu to̱ꞌmi dä ma ha mähetsꞌi tobe dri mꞌu̱kua ha rä Xiꞌmhai. Pe nuyu̱ ma dä tsꞌitsꞌi ha mähetsꞌi änte de dä xotꞌi rä gerra de Armagedón. Hänge gatꞌho yä jäꞌi tobe pe̱ꞌtsi rä oportunida de dä umbäbi rä mfatsꞌi nuyu̱ yä kristianu (Mat. 25:​31, 32; Apoc. 12:17).

12, 13. Xti nja rä däta tribulación habu̱ ma drä destrui gatꞌho yä hyate relijion, ¿tal vez te ma dä me̱fi rꞌa yä jäꞌi? (Hyandi ꞌnehe yä foto).

¹² Ha rä däta tribulación, ora yä jäꞌi xti hyandi hanja ma dä uadi gatꞌho nuꞌu̱ yä relijion hinxä ꞌñudi näꞌä mäjuäni de Äjuä, tal vez nuꞌu̱ yä jäꞌiꞌu̱ ma dä beni hanja po ndunthi rä tiempo yä testigo rä Jeoba mi predika ꞌne mi mää ge ma xä thogi njabu̱. Näꞌä oraꞌä, hindi pädihu̱ mu̱ rꞌa de nuyu̱ yä jäꞌi nubye̱ hää ma dä gamfri ꞌne ma dä mꞌu̱i de rä lado rä Zi Dada Jeoba (Apoc. 17:5; Ezeq. 33:33).

¹³ Ma gä benihu̱ te bi thogi nuꞌmu̱ Moisés bi gu̱ki yä israelita de Egipto. Rä Mäkä Tꞌofo enä ge «ꞌnehe bi bo̱ni de Egipto xi ndunthi yä jäꞌi nuꞌu̱ hingä myä israelita» (Éx. 12:38). Tal vez nuyu̱ yä jäꞌi bi mu̱di bi gamfri rä Zi Dada Jeoba ora bi hyandi ge bi nja nuꞌu̱ 10 yä plaga xki mää Moisés ge ma xpä pe̱hni rä Zi Dada Jeoba. Xi nuju̱, ¿te ma gä mbenihu̱ mu̱ durante rä däta tribulación rꞌa yä jäꞌi ja penä dä jamfri rä  Zi Dada Jeoba ꞌne dä ꞌñehe kongekhu̱ änte de dä zo̱ho̱ rä Armagedón? ¿Ma gä nkue̱hu̱ po geꞌä? Hinä, nuju̱ di ne gä de̱mbäbihu̱ rä mꞌu̱i rä Zi Dada Jeoba ꞌne gä udihu̱ rä nhuekäte, rä pasensia ꞌne rä mhäte (Éx. 34:6). b

14, 15. Xti zo̱ho̱ rä Armagedón, ¿ma dä huati rä Zi Dada Jeoba nuꞌu̱ yä jäꞌi hinxä me̱päbi? (Salmo 33:​4, 5).

¹⁴ Rꞌa yä ku xä ꞌñenä: «Nuꞌu̱ mä familia ya xä du pe nunka bi bädi de rä Zi Dada Jeoba, zäi ge ha rä rꞌayꞌo xiꞌmhai nuꞌu̱ hää ma dä nuhu de rä du. Pe di tumämu̱i po nuꞌu̱ mä familia di predikabi pe hinte ne. Ngeꞌä mu̱ dä zo̱ho̱ rä däta tribulación ya hinte mä humu̱i ma dä me̱ꞌtsi». Pe mähyoni gä benihu̱ ge hingo di tokagihu̱ gä mäñhu̱ te ma dä thogi kongeꞌu̱. Di debe gä benihu̱ ge rä Zi Dada Jeoba näꞌä nꞌa rä Nzaya rä perfecto ꞌne nzäntho di juzga ko rä justisia (hñeti Salmo 33:​4, 5). Hää, dä za gä pe̱ꞌspäbihu̱ rä komfiansa Jeoba, ge näꞌä nꞌa rä Nzaya näꞌä nunka di kiboka ꞌne nzäntho pe̱fi näꞌä xä ñho (Gén. 18:25).

¹⁵ ¿Tengu handi rä Zi Dada Jeoba nuꞌu̱ yä zi jäꞌi bi ꞌmu̱i ha nuꞌu̱ yä dähni o yä luga habu̱ hinto xä za xä tso̱ni pa dä predikabi? Mu̱ nuyu̱ yä zi jäꞌi hinxä me̱päbi rä Zi Dada Jeoba ngeꞌä hinto xä predikabi, hanja ma gä benihu̱ ge po geꞌä rä Zi Dada Jeoba ma dä huati nuyu̱ yä jäꞌi ha rä Armagedón (Mat. 25:46). Mu̱ nuju̱ di huekihu̱ nuꞌu̱ yä zi jäꞌi, cuanto más rä Zi Dada Jeoba di mädi ꞌne di hueki. Ha rä däta tribulación, rä Zi Dada Jeoba ma dä ꞌñudi ge go  geꞌä rä Zi Dada xa mäjuäni. Xti hyandi nuꞌu̱ yä jäꞌi nunka bi bädi de geꞌä, tal vez nuꞌu̱ ma dä desidi dä mꞌu̱i de rä lado rä Zi Dada Jeoba (Ezeq. 38:16).

16. ¿Te di pädihu̱ xä ñho de rä Zi Dada Jeoba? (Hyandi ꞌnehe rä foto).

¹⁶ Rä Mäkä Tꞌofo utkägihu̱ ge rä Zi Dada Jeoba xa di balora ꞌne di mädi yä te yä jäꞌi. Näꞌä bi uni rä Tꞌu̱ pa njabu̱ kada nꞌa de gekhu̱ gä pe̱ꞌtsihu̱ rä oportunida de gä ꞌmu̱ihu̱ pa nzäntho (Juan 3:​16, TNM). Kada nꞌa de gekhu̱ xtä sentihu̱ hanja di mäkägihu̱ rä Zi Dada Jeoba (Is. 49:15). Näꞌä o̱tꞌägihu̱ ngue̱nda kada nꞌa de gekhu̱ ꞌne pätkägihu̱ mä thuhuhu̱. Koꞌmu̱ näꞌä xa di konosegihu̱ xä ñho, mu̱ gä tuhu̱ Näꞌä dä za dä hyogägihu̱ mänꞌaki ko mismo mä mfenihu̱ ꞌne mä mꞌaihu̱ (Mat. 10:​29-31). Di pe̱ꞌtsihu̱ ndunthi yä raso pa gä kamfrihu̱ ge rä Zi Dada Jeoba ma dä me̱fi näꞌä xä ñho xti juzga kada nꞌa rä jäꞌi. Hää, ngeꞌä nzäntho xä ꞌñudi rä mfädi, rä justisia ꞌne rä nhuekäte (Sant. 2:13).

17. ¿Te ma gä handihu̱ ha näꞌä rä ntꞌudi xä ꞌñepu̱?

¹⁷ Ko gatꞌho näꞌä ya dä handihu̱, di dahu̱ ngue̱nda ge mäpaya mänꞌa di urje gä uñhu̱ ntꞌo̱de rä Noya Äjuä. ¿Por hanja? ¿Te ma dä maxkägihu̱ pa hingä tsayahu̱ de gä uñhu̱ ntꞌo̱de rä Noya Äjuä? Näꞌä Rä ntꞌudi pa gä nxadihu̱ 20 ma dä dädi nuya yä ntꞌani.