1. Dikon nos por bisa ku e tempu ku nos ta biba aden ta fasinante?

 NOS ta bibando durante un tempu fasinante kaminda hopi kos ta pasando. Tur dia nos ta mira ku nos mes wowo kon profesia di Beibel ta kumpli. Por ehèmpel, nos ta mira kon “e rei di nort” i “e rei di zùit” ta lucha ku otro pa ta esun di mas poderoso na mundu. (Dán. 11:​40, nota) Tambe, e bon notisia tokante Dios su Reino ta wòrdu prediká den henter mundu i miónes di hende ta skohe pa sirbi Yehova. (Isa. 60:22; Mat. 24:14) Ademas, nos ta haña abundansia di kuminda spiritual “na e debido tempu.”—Mat. 24:​45-47.

2. Kiko nos por tin sigur di dje, pero kiko nos mester djis aseptá?

² Yehova ta sigui yuda nos haña un mihó komprondementu di susesonan importante ku lo bai pasa umbes aki. (Pro. 4:18; Dán. 2:28) Nos por tin sigur ku pa ora tribulashon grandi kuminsá, nos lo sa tur loke ku nos mester sa pa nos por keda fiel i uní durante e tempu difísil ei. Pero, nos tin ku rekonosé ku tin sierto kos tokante futuro ku gewon nos no sa. Den e artíkulo akí, nos lo analisá promé dikon nos mester a ahustá algun kos ku nos tabata bisa tokante futuro. Kaba, nos lo bai papia tokante e kosnan ku sí nos sa tokante futuro, i e manera ku nos Tata den shelu lo aktua.

LOKE NOS NO SA

3. Kiko nos a bisa ku lo pasa unabes tribulashon grandi kuminsá, i dikon nos tabata pensa asina?

³ Ántes, nos a bisa ku unabes tribulashon grandi kuminsá,  hende lo no tin chèns mas pa bira sirbidó di Yehova i sobrebibí Armagedon. Nos a bisa asina pasobra nos a pensa ku tur kos di e relato di Diluvio a representá algu ku lo pasa den nos tempu. Por ehèmpel, nos a pensa ku meskos ku niun hende no por a drenta e arka despues ku Yehova a dal e porta sera, asina tambe niun hende lo no por bira sirbidó di Yehova i ser salbá unabes tribulashon grandi kuminsá.—Mat. 24:​37-39.

4. Dikon nos no ta bisa mas ku tur kos di e relato di Noe tin un kumplimentu mas grandi den nos tempu? Splika.

⁴ Ta korekto pa bisa ku tur kos di e relato di Diluvio a representá algu ku lo pasa den nos tempu? Wèl, Beibel no ta duna nos base pa esei. a Ta bèrdat ku Hesus a kompará “e dianan di Noe” ku e tempu di su presensia. Pero, niun ora so e no a bisa ku e seramentu di e porta di e arka i otro kosnan di e relato di Diluvio lo tin un kumplimentu mas grandi den futuro. Ma, esei no ke men ku nos no por siña nada di e relato di Noe i e Diluvio.

5. (a) Kon Noe a proba ku e tabatin fe? (Hebreonan 11:7; 1 Pedro 3:20) (b) Den ki sentido nos trabou di prediká ta meskos ku esun di Noe?

⁵ Despues ku Noe a skucha Yehova su mensahe di atvertensia, el a proba ku e tabatin fe dor di traha e arka. (Lesa  Hebreonan 11:7; 1 Pedro 3:20.) Asina tambe, hende ku skucha e bon notisia tokante e Reino di Dios mester proba ku nan akshonnan ku nan tin fe. (Echo. 3:​17-20) Pedro a bisa ku Noe tabata “un predikadó di hustisia.” (2 Ped. 2:5) Aunke Noe a hasi su esfuerso pa prediká, manera nos a siña den e artíkulo anterior, Beibel no ta bisa ku el a logra prediká na tur hende ku tabata biba riba tera e tempu ei. Awe, nos tambe ta hasi esfuerso pa prediká rònt mundu. Pero, ni maske kuantu esfuerso nos hasi, nos sa ku nos lo no por prediká e bon notisia na delaster un hende promé ku e fin yega. Dikon nos ta bisa esei?

6-7. Dikon nos por bisa ku nos lo no logra prediká na delaster un hende promé ku e fin bini?

⁶ Wak kiko Hesus a bisa tokante nos trabou di prediká. El a profetisá ku lo prediká e bon notisia “den henter e tera habitá, komo testimonio pa tur nashon.” (Mat. 24:14) Awor mas ku nunka, nos ta mira kon e profesia ei ta kumpli. Por ehèmpel, danki na nos website jw.org, mayoria di hende rònt mundu por haña sa tokante e bon notisia di Dios su Reino na mas ku 1.000 idioma.

⁷ Pero, Hesus a bisa su disipelnan tambe ku nan “lo no kaba di prediká na tur e statnan,” òf prediká na delaster un hende, promé ku e bini. (Mat. 10:23; 25:​31-33) Loke Hesus a bisa ei ketu bai ta konta den nos tempu. Awe, miónes di hende ta biba na paisnan kaminda nos no tin libertat di prediká. Ademas, kada minüt sientos di yu ta nase. Pues, aunke nos ta hasi nos bèst pa prediká e bon notisia na hende di “tur nashon, tribu, idioma i pueblo,” nos lo no logra prediká na delaster un hende promé ku e fin bini.—Rev. 14:6.

8. Ki pregunta nos por tin tokante kon Yehova lo husga hende den futuro? (Wak e plachi.)

⁸ Basá riba loke nos a kaba di trata, kisas nos ta puntra nos mes: ‘Kiko Yehova i su Yu, kende el a duna e tarea pa husga, lo hasi ku e hendenan ku no a haña chèns di skucha e bon notisia promé ku tribulashon grandi kuminsá?’ (Huan 5:​19, 22, 27; Echo. 17:31) E teksto sentral di e artíkulo akí a bisa ku Yehova “no ta deseá pa ningun hende ser destruí.” Mas bien, e ke pa “tur haña chèns di arepentí.” (2 Ped. 3:9; 1 Tim. 2:4) Apesar ku nos sa e kosnan ei di Yehova, nos mester aseptá ku te ku awor e no a bisa nos kon lo e husga den e situashon ei. Anto nos lo no ke lubidá ku e no ta obligá di bisa nos tampoko.

9. Kiko Yehova a bisa nos den Beibel?

⁹ Den Beibel, Yehova a bisa nos algun di e kosnan ku lo e hasi. Por ehèmpel, el a bisa nos ku lo e resusitá “hende inhustu,” kende no a haña chèns di skucha e bon notisia i arepentí. (Echo. 24:15; Luk. 23:​42, 43) Pero esei ta lanta otro preguntanan importante.

10. Ki otro pregunta ta lanta?

¹⁰ Ta tur hende ku muri durante tribulashon grandi lo no haña resurekshon? Beibel ta bisa bon kla ku hende ku oponé Yehova i ku wòrdu destruí na man di Yehova i su ehérsito durante Armagedon lo no haña resurekshon. (2 Tes. 1:​6-10) Pero kiko awor di hende ku muri debí na kousa natural, aksidente òf na man di otro hende? (Ekl. 9:11; Zak. 14:13) Tin chèns ku algun di nan lo ta entre e hendenan “inhustu” ku lo resusitá den  mundu nobo? Nos no por bisa, pasó nos no sa.

LOKE SÍ NOS SA

11. A base di kiko Hesus lo husga hende?

¹¹ Tin vários kos ku nos sa tokante futuro. Por ehèmpel, nos sa ku Hesus lo husga hende komo karné òf kabritu a base di e manera ku nan a trata su rumannan. (Mat. 25:40) Hende ku apoyá Kristu i su ungínan, lo ser husgá komo karné. Tambe nos sa ku algun di Hesus su rumannan lo ta ainda riba tera ora ku tribulashon grandi kuminsá i ku nan ta bai shelu nèt un tiki promé ku Armagedon kuminsá. Tanten ku Kristu su rumannan ta riba tera, tin e oportunidat ku hende di bon kurason por apoyá nan i e trabou ku nan ta hasi. (Mat. 25:​31, 32; Rev. 12:17) Dikon ta asina importante pa nos sa e kosnan ei?

12-13. Kiko kisas algun hende lo hasi ora nan mira “Babilonia e Grandi” ser destruí? (Wak e plachi.)

¹² Asta despues ku tribulashon grandi kuminsá, tin posibilidat ku algun hende ku mira destrukshon di “Babilonia e Grandi” lo kòrda ku pa hopi aña Testigunan a bisa ku esei lo pasa. E hendenan ei lo tin chèns ainda pa pone fe den Yehova i djòin su sirbidónan?—Rev. 17:5; Eze. 33:33.

¹³ Si esei sosodé, lo e ta meskos ku loke a pasa na Egipto den tempu di Moises. Ora e israelitanan tabata sali for di Egipto, “un multitut grandi di tur sorto di hende” a djòin nan. (Éks. 12:38) Algun di e hendenan ei kisas a kuminsá pone fe den Yehova ora nan a mira ku e atvertensia di Moises tokante e dies plaganan tabata kumpli. Kisas un ruman por pensa: ‘Mi no ta haña ta eerlijk si despues ku Babilonia e Grandi ser destruí, hende por djòin nos ainda promé ku Armagedon kuminsá i drenta e mundu nobo.’ Pero esei ta un bon manera di pensa? Nò. Nos ke ta manera nos Tata den shelu, ku ta “miserikòrdioso i yen di kompashon, un Dios ku no ta rabia lihé i ku ta yen di  amor leal. Tur loke [e] bisa ta bèrdat.” b—Éks. 34:​6, di dos nota.

14-15. Nos por bisa ku un hende su oportunidat pa biba pa semper ta mará na ki tempu el a muri òf unda e ta biba? Splika. (Salmo 33:​4, 5)

¹⁴ Tin biaha rumannan por bisa: “Si tal i tal hende den mi famia muri promé ku tribulashon grandi kuminsá lo ta bon pasó asina ei e tin speransa di haña resurekshon.” Sin duda, nan ta bisa esei ku bon intenshon. Pero un hende su oportunidat pa biba pa semper no ta mará na ki tempu el a muri. Kòrda ku Yehova, kende ta e Hues perfekto, semper ta tuma desishon ku ta hustu i rekto. (Lesa Salmo 33:​4, 5.) Pues nos por ta konvensí ku “e Hues di henter tera lo” hasi loke ta hustu.—Gén. 18:25.

¹⁵ Ta lógiko pa konkluí tambe e ora ei ku un hende su oportunidat pa biba pa semper no ta mará na unda e ta biba. Hamas Yehova lo husga miónes di hende komo “kabritu” djis pasó nan ta biba na paisnan unda nunka nan no tabatin chèns di siña tokante e mensahe di e Reino. (Mat. 25:46) Si nos ta preokupá pa e hendenan ei, nos por tin sigur ku e Hues hustu di henter e tera ta hopi mas interes den nan. Nos no sa kon Yehova lo atendé ku e tipo di situashonnan ei durante tribulashon grandi. Kisas loke algun di e hendenan ei mira durante tribulashon grandi lo motivá nan pa pone fe  den Yehova ora e laga tur hende riba tera sa ta ken e ta.—Eze. 38:16.

16. Kiko nos a bin siña tokante Yehova? (Wak e plachi.)

¹⁶ Segun ku nos a lesa i studia Beibel, nos a bin siña ku hende ta masha balioso pa Yehova. Por ehèmpel, el a sakrifiká bida di su Yu pa asina nos por tin e oportunidat di biba pa semper. (Huan 3:16) Nos tur a yega di sinti kuantu kariño Yehova tin pa kada un di nos. (Isa. 49:15) E sa ken kada un di nos ta. E konosé bo asina bon ku asta si bo muri e por resusitá bo pasobra e ta kòrda delaster un detaye di bo i tambe tur evento i suseso ku a pasa den bo bida! (Mat. 10:​29-31) Pues, nos tin tur motibu pa konfia ku nos Tata den shelu lo husga kada ken na un manera sabí, hustu i miserikòrdioso.—Sant. 2:13.

17. Kiko nos ta bai trata den e siguiente artíkulo?

¹⁷ Awor ku nos tin e mihó komprondementu aki, nos ta realisá ku nos trabou di prediká ta mas urgente i importante ku nunka. Dikon nos ta bisa esei? Anto kiko lo motivá nos pa sigui prediká e bon notisia sin stòp? Nos lo haña e kontestanan den e siguiente artíkulo.