LONGO DIA 19
LUNGIMBO 22 Ufumu Udi mu Dilu—Uze ha Mavu!
Itshi Tudi Naye Gujiya mu Luholo Yehowa Mbawusophesa Athu mu Masugu adi Muza?
“Yehowa . . . gana tshiginago egi nga muthu mumoshi afue.”—2 PHET. 3:9.
NDAGA JIDI MU LONGO EDI
Mu longo edi, tuza mumona ndaga jiajiya gututshiginyisa egi mu masugu adi muza Yehowa mbawusophesa athu mu luholo luabonga nu luatagana.
1. Mukunda natshi tuajiya guzuela egi tudi diago mu jinga mu masugu a gisugishilo?
TUDI diago mujinga mu masugu a gisugishilo! Handaga lusugu nu lusugu, tuana mona gutagenesewa gua profesi jia Biblia. Ha gufezegesa, tuana mona luholo “fumu wa gu nord” nu “fumu wa gu sud” ana gudiluisa ha guhinyina mavu. (Dan. 11:40) Tuana mona luholo lukuma luabonga luana longesewa ha mavu agasue, nu luholo athu avula ana zula desizio dia gukombelela Yehowa. (Yesh. 60:22; Mat. 24:14) Tuana heta nji ima ya gudia ya mu nyuma yavula “mu tangua diatagana.”—Mat. 24:45-47.
2. Ndaga itshi tuajiya gusha mutshima? Itshi tudi naye gujiya?
2 Yehowa wana landula gutukuatesa ha gukotelesa ndaga jia ndando mbajibua mu musugu adi muza. (Ish. 4:18; Dan. 2:28) Tuajiya gusha mutshima egi gutuama egi lamba diakola disendese, mbatujiya ndaga jiagasue tudi najio funu ha gusala yagujinginyina gudi Yehowa nu gukhala mu gudivua nu aphangi mu matangua ene a lamba. Uvi tudi naye gujiya egi, gudi nu ndaga jiko tushigo mujiya mukunda nu masugu ene. Mu longo edi, tuza mumona mukunda natshi tuasombegesa ndaga tuazuelele thomo mukunda nu ndaga jiko jiatadila masugu a gisugishilo. Gungima tuza muzuelela ndaga jiko tuana jiya gale mukunda nu masugu ene nu luholo Tata wetu wa mu dilu mbawukalagala ndaga.
NDAGA TUANAGO GUJIYA
3. Ndaga jitshi tuazuelele mukunda nu tangua athu mbaashigo luko muheta luendu lua gusha gutshigina gudi Yehowa? Itshi yatutumile ha guzuela ngenyi?
3 Thomo tuazuelele egi, tangua lamba diakola mbadisendesa, athu anyi ashigo Matemue a Yehowa mbaashigo muheta luko luendu lua gubua akombeledi enji nu mbaashigo muhuluga gu Ita ya Alemagedona. Tuazuelele ngenyi handaga tuakhalele mutangiza egi lumene lua Mvula Yakola luakhalele mumonesa ndaga mbajibua mu masugu adi muza. Ha gufezegesa, tuakhalele mutangiza egi luholo nga muthu mumoshi gakhalelego naye gungina mu masuwa tangua Yehowa wakangele gijidigo, gushigo nji nga muthu mumoshi mbawusha gutshigina gudi Yehowa nu mbawuhuluishiwa gula lamba diakola diasendesa.—Mat. 24:37-39.
4. Mukunda natshi tushigo naye gutangiza egi ndaga jiagasue jiabuile mu tangua dia Nowa jidi mumonesa ndaga mbajibua mu masugu adi muza? Kotelesa.
4 Tudi naye guzuela egi ndaga jiagasue jiabuile mu tangua dia Mvula Yakola jidi mumonesa ndaga mbajibua mu masugu adi muza ba? Ndo. Mukunda natshi? Handaga gushigo nga verse imoshi ya Biblia yana monesa ndaga yene. a Idi yadiago egi Yesu wafuanesele “masugu a Nowa” nu guza guenji. Uvi gazuelelego egi ndaga jiagasue jiakalegewe mu masugu ene, gifua tangua Yehowa wakangele gijidigo gia masuwa, jiakhalele profesi mbayitagenesewa mu masugu adi muza. Uvi ndaga yene ishigo mukotelesa egi tuajiyilego guzula malongo mu lumene lua Nowa nu lua Mvula Yakola.
5. a) Ndaga itshi Nowa watshitshile gutuama egi Mvula Yakola yinoge? (Hebelu 11:7; 1 Phetelo 3:20) b) Mu luholo lutshi mudimo wetu wa gulongesa udi gifua unu wakalegele Nowa?
5 Tangua Nowa wavuile ndaga jiamuwambelele Yehowa, watungile masuwa ha gumonesa egi wakhalele nu gutshigina. (Tanga Hebelu 11:7; 1 Phetelo 3:20.) Luholo lumoshi nji, athu ana tegelela lukuma luabonga lua Ufumu wa Nzambi adi naye gutshita ndaga jidi mumonesa egi adi nu gutshigina. (Makal. 3:17-20) Phetelo watamegele Nowa egi, “mulongeshi wa ndaga jiabonga.” (2 Phet. 2:5) Uvi gifua luholo tuayimonele mu longo diabalega, tushigo mujiya gula Nowa walongesele athu agasue akhalele ha mavu gutuama egi Mvula Yakola yinoge. Mangino tuana gudihana ha gutshita mudimo wa gulongesa lukuma luabonga ha mavu agasue, tuana guwutshita nu gikhesa giagasue. Uvi ikhale tuatshita ngenyi, mbatushigo mulongesa athu agasue gutuama egi gisugishilo gize. Mukunda natshi tuazuela ngenyi?
6-7. Mukunda natshi tuajiya guzuela egi mbatushigo mulongesa lukuma luabonga gudi athu agasue a ha mavu gutuama egi gisugishilo gize?
6 Tutadilenu ndaga jiazuelele Yesu mukunda nu mudimo wetu wa gulongesa. Wadiangele guzuela egi lukuma luabonga mbalulongesewa “ha mavu agasue gifua gijiyishilo gudi ifutshi yagasue.” (Mat. 24:14) Mangino profesi yene idi mutagenesewa muavula gubalega thomo. Lukuma luabonga lua Ufumu luana longesewa mu mazuelelo gubalega 1 000. Site Internet yetu jw.org, yana kuatesa nji athu avula ha gujiya ndaga jiatadila lukuma luabonga lua Ufumu wa Nzambi.
7 Uvi Yesu wawambelele luko alandudi enji egi gutuama egi muene aze ha mavu, mbaakhala khenji amanesela ndo “guwenda membo agasue,” nga gulongesa muthu wagasue. (Mat. 10:23; 25:31-33) Mbimbi jia Yesu jiana tagenesewa nji mu masugu etu. Mangino athu avula ana jinga mu mafundo anyi mudimo wetu wana tunyishiwa. Uvi lusugu nu lusugu, ana avula adi muvualewa. Uvi ndaga ya giamatshidia idi egi, ikhale tuatshita ngolo ha gulongesa lukuma luabonga gudi athu a mu “ifutshi yagasue, a iphuta yagasue, a mazuelelo agasue,” mbatushigo mulongesa athu agasue a ha mavu gutuama egi gisugishilo gize. (Gumo. 14:6)
8. Muhu utshi tuajiya gudihula mu luholo Yehowa mbawusophesa athu mu masugu adi muza? (Tala nji ifuanesa.)
8 Uvi tuajiya gudihula egi: Ndaga itshi mbayibuila athu anyi ahetelego luendu lua guvua lukuma luabonga gutuama egi lamba diakola disendese? Luholo lutshi Yehowa nu Mun’enji watombele muene mbaakalagala ndaga? (Yone 5:19, 22, 27; Makal. 17:31) Verse yakuata longo edi idi muzuela egi Yehowa “gana tshiginago egi nga muthu mumoshi afue.” Uvi wana tshigina egi “athu agasue abalumune mutshima.” (2 Phet. 3:9; 1 Tim. 2:4) Ikhale tudi mujiya ndaga eji mukunda nu Yehowa, uvi khenji gatuwambelelego luholo mbalusophesa muene athu anyi ahetelego luendu lua guvua lukuma luabonga. Idi yadiago egi Yehowa gajiyilego gutuwambela ndaga jiagasue jiakalegele gale muene nga jinyi mbajitshita muene mu masugu adi muza.
Itshi Yehowa mbawutshita athu anyi ahetelego luendu lua gulongesewa lukuma luabonga gutuama egi lamba diakola disendese? (Tala paragrafe 8) c
9. Ndaga jitshi Yehowa wana gutuwambela mu njila ya Mbimbi yenji?
9 Yehowa wana kalegela Mbimbi yenji ha gutuwambela ndaga mbajikalagala muene mu masugu adi muza. Ha gufezegesa, Biblia yana zuela egi Yehowa mbawufuzumuna “athu abola” anyi ahetelego luendu lua guvua lukuma luabonga nu gusombegesa makalegelo awo. (Makal. 24:15; Luka 23:42, 43) Ndaga yene idi gututuma ha gudihula mihu iko ya ndando.
10. Mihu itshi iko tuajiya gudihula?
10 Athu agasue mbaafua mu tangua dia lamba diakola, mbaashigo luko mukhala nu felela dia gufuzumuga ba? Biblia yana monesa haphelo egi athu agasue ana lumbugila Yehowa, anyi muene hakhenji mbawushiya mu Ita ya Alemagedona, mbaashigo luko mufuzumuga. (2 Tes. 1:6-10) Uvi itshi tuajiya guzuela mukunda nu athu ajiya gufua mu tangua dia lamba diakola mukunda nu misongo, gukola nga mukunda nu aksida nga ndo ashiyiwa gudi athu ako? (Mulo. 9:11; Zak. 14:13) Athu ako mukatshi dia athu ene ajiya gukhala “athu abola” anyi mbaafuzumuga mu mavu ahe-ahe ba? Tushigo mujiya.
NDAGA TUANA JIYA
11. Mu Ita ya Alemagedona, athu mbaasophesewa ha gutadila ndaga jitshi?
11 Tuana jiya ndaga jiavula mbajibua mu masugu adi muza. Ha gufezegesa, tuana jiya egi mu ita ya Alemagedona, athu mbaasophesewa ha gutadila ndaga akalegele aphangi a Klisto. (Mat. 25:40) Athu anyi akuatesele Aklisto ambiwe maji mu nyuma ene mbaabua imeme iko. Tuana jiya nji egi Aklisto ako ambiwe maji mu nyuma, mbaakhala ha mavu gutuama egi lamba diakola disendese, mbaaya mu dilu tangua diazonda gutuama egi Alemagedona yisendese. Luholo Aklisto ako ambiwe maji mu nyuma adi ha mavu, athu adi nu musuanguluga nu giamatshidia, mbaaheta luendu lua guakuatesa mu midimo yawo. (Mat. 25:31, 32; Gumo. 12:17) Mukunda natshi gujiya ndaga eji gudi nu ndando?
12-13. Yajiya gukhala egi ndaga itshi athu ako mbaatshita tangua mbaamona gushiyiwa gua “Babilona Yakoma”? (Tala nji ifuanesa.)
12 Gutuama egi lamba diakola disendese, yajiya gukhala egi athu anyi mbaamona gushiyiwa gua “Babilona Yakoma,” mbaawunguluga egi Matemue a Yehowa akhalele mulongesa ndaga yene sendese mualeha. Athu ene mbaasha gutshigina gudi Yehowa ba?—Gumo. 17:5; Ezek. 33:33.
13 Ndaga jiene mbajikhala luholo lumoshi nu jinyi jiabuile gu Ejipitu mu masugu a Moize. Tujimbilago egi tangua enya gu Isalele akatugile gu Ejipitu, “athu ako avula” a alanduile. Yajiya gukhala egi tangua athu ene amonele gutagenesewa gua Ndola Kumi jia Moize, ako mukatshi diawo asendesele gusha gutshigina gudi Yehowa. (Guz. 12:38) Gula gungima dia gushiyiwa gua Babilona Yakoma athu ako asha gutshigina gudi Yehowa, ndaga yene mbayitusagesa ha gumona luholo athu ene mbaazula desizio diene matangua azonda gutuama egi gisugishilo gize ba? Ndo sha! Tudi naye gulandula gifezegeselo gia Tata wetu wa mu dilu handaga udi “Nzambi wa khenda nu wa gisemo, wazala pha nu guzumba gua giamatshidia, ganago guvua khabu muphushi, Nzambi wazala pha nu giamatshidia.” b—Guz. 34:6.
Athu anyi mbaamona gushiyiwa gua “Babilona Yakoma,” mbaawunguluga egi Matemue a Yehowa akhalele mulongesa ndaga yene sendese mualeha (Tala paragrafe 12-13) d
14-15. Sungi nga fundo diana jinga muthu diajiya gumonesa gula muthu muene mbawuheta monyo wa ivo nu ivo nga ndo? Kotelesa. (Ngimbo 33:4, 5)
14 Matangua ako tuana guvua athu muzuela egi: “Idi diago ndaga yabonga gula muenya fami yami wafua gutuama egi lamba diakola disendese, ngenyi mbawuheta luendu lua gufuzumuga.” Guzuela ngenyi gushigo ndaga yabola. Uvi ishigo sungi yanafua muthu yana monesa gula muthu muene mbawujinga mayilago nga ndo. Yehowa udi Nzuji watagana, yakotelesa egi tangua diagasue wana zula badesizio abonga nu atagana. (Tanga Ngimbo 33:4, 5.) Tuajiya gusha diago mutshima egi “Nzuji wa athu agasue a ha mavu” mbawutshita ndaga jiabonga.—Gis. 18:25.
15 Idi nji ndaga yabonga ha gukotelesa egi ishigo fundo diana jinga muthu diana monesa gula muthu muene mbawuheta monyo wa mayilago nga ndo. Tushigo naye gutangiza nga hazonda egi Yehowa mbawutadila athu avula anyi ahetelego luendu lua guvua lukuma luabonga lua Ufumu gifua “khombo.” (Mat. 25:46) Nzuji watagana wa ha mavu agasue wana gudisagesa muavula mukunda nu athu ene gubalega luholo esue tuana gudisagesa mukunda nu ene. Tushigo mujiya luholo Yehowa mbawutshita ndaga mu tangua dia lamba diakola. Yajiya gukhala egi athu ako mukatshi dia athu ene mbaaheta luendu lua gulonguga ndaga jiatadila Yehowa nu gusha gutshigina gudi muene nu guzula desizio dia gumukombelela tangua mbadijiyisa muene jina dienji gudi athu a ha mavu agasue.—Ezek. 38:16.
Yajiya gukhala egi gutuama egi lamba diakola disendese, . . . athu anyi mbaamona gushiyiwa gua Babilona Yakoma mbaabalumuna mutshima ba?
16. Ndaga jitshi tuajiyile jiatadila Yehowa? (Tala nji gifuanesa.)
16 Ndaga tualongugile mu Biblia jiatukuatesele ha gukotelesa egi Yehowa wana zula monyo wa athu nu ndando yavula. Hene wahanele Mun’enji gifua gibawu hagula mukut’etu agasue tuajiya guheta luendu lua gujinga mayilago. (Yone 3:16) Tuana mona diago guzumba gua Yehowa. (Yesh. 49:15) Muene wana jiya jina dia muthu wagasue mukatshi dietu. Wana gutujiya muabonga diago, hene gula tuafua, wajiya gutufuzumuna handaga udi mujiya ndaga jiagasue jiatutadila nu jinyi tuakhalele mutangiza! (Mat. 10:29-31) Yadiago, tudi nu ndaga jidi gututuma ha gusha mutshima egi Tata wetu wa guzumba udi mu dilu, mbawusophesa muthu wagasue mu luholo lua tagana handaga udi watema, wana kalagala ndaga mu luholo luatagana nu wana vuila athu khenda.—Yak. 2:13.
Tudi nu ndaga jidi gututuma ha gusha mutshima egi, Yehowa mbawusophesa muthu wagasue mu luholo luatagana handaga wana kalagala ndaga mu luholo luatagana nu wana vuila athu khenda (Tala paragrafe 16)
17. Mihu itshi mbatuzuelela mu longo dialandula?
17 Luholo tuakotelesa ndaga eji muabonga, idi gututuma ha gulongesa lukuma luabonga muavula gubalega. Mukunda natshi tuazuela ngenyi? Itshi idi gututuma ha gulandula gulongesa lukuma luabonga nu gikhesa giagasue? Mbatuheta mvutu jia mihu eyi mu longo dialandula.
LUNGIMBO 76 Wana Guvua Gikuatshi?
a Ha gujiya mukunda natshi tuakalagala usombegeshi owu, tala longo “Tu as trouvé bon d’agir ainsi” mu Inzo ya Leha ya Mutaledi ya 15 Mars 2015 diyiji 7-11 ya français.
b Tangua Babilona Yakoma mbayishiyiwa, akombeledi agasue a Yehowa mbaaluishiwa gudi Goga wa gu Magoga. Muthu wagasue mbawukhala gu khanda ya akombeledi a Nzambi gungima dia gushiyiwa gua Babilona Yakoma, mbawuluishiwa nji.
c UKOTELESHI WA IFUANESA: Ifuanesa thathu idi mumonesa ndaga jiana kanga athu ako njila hagula ategelelago lukuma luabonga tuana longesa: 1) Mukhetu mumoshi wana jinga mu gifutshi gimoshi giana tunyisa lukuma luabonga mukunda nu ndaga jia gikombelelo giawo, 2) yala mumoshi nu mukaji’enji ana jinga fundo athu ana gudihana muavula mu ndaga jia politike nu ana khala mu gingonza 3) yala mumoshi wana jinga gualeha, fundo diene diana khala lamba hagula athu ajiya guheta guene.
d UKOTELESHI WA GIFUANESA: Muvuala mumoshi wa mukhetu wabembele gukombelela Yehowa, wawunguluga ndaga jialongugile muene jiatadila gushiyiwa gua “Babilona Yakoma.” Wazula desizio dia guvutugila Yehowa nu wavutuga gudi mvuaji jienji. Gula ndaga jia luholo elu jiatubuila, tudi naye gulandula khadilo dia Tata wetu wa mu dilu handaga wana khala nu gisemo nu khadilo dia guvuila athu khenda. Tudi naye nji gusuanguluga gula muthu watshitshile gubola wabalumuna mutshima.
