مطالعے دا مضمون نمبر 19
گیت نمبر 23 یہوواہ دا راج شروع ہو گیا
مستقبل چ یہوواہ لوکاں دی عدالت کیویں کرے گا؟
یہوواہ نئیں چاہندا کہ کوئی وی انسان ہلاک ہوئے۔—2-پطرس 3:9۔
غور کرو:
مستقبل چ یہوواہ لوکاں دی عدالت پورے اِنصاف نال کرے گا۔
1. اَسی ایہہ کیوں کہہ سکنے آں کہ اَسی اِک بڑے اہم دَور چ رہ رہے آں؟
اَسی اِک بڑے اہم دَور چ رہ رہے آں۔ اَسی ہر روز بائبل دِیاں پیشینگوئیاں نُوں اپنیاں اَکھاں نال پورے ہوندیاں ویکھ رہے آں۔ مثال لئی، اَسی ویکھ رہے آں کہ شمال دا بادشاہ تے جنوب دا بادشاہ اِک دُوجے توں اَگے ودھن دی کوشش کر رہے نیں تاکہ اوہ پوری دُنیا تے حکومت کر سکن۔ (دانیایل 11:40) پوری زمین تے بادشاہی دی خوشخبری دی مُنادی ہو رہی اے۔ ایہدی وجہ توں لکھاں لوک یہوواہ دی عبادت کرن دا فیصلہ کر رہے نیں۔ (یسعیاہ 60:22؛ متی 24:14) ایہدے علاوہ سانوں صحی وقت تے ڈھیر سارا روحانی کھانا مِل رہیا اے۔—متی 24:45-47۔
2. اَسی کیہڑی گل دا پکا یقین رکھ سکنے آں؟
2 یہوواہ ساڈی مدد کر رہیا اے تاکہ اَسی ہور چنگی طرحاں سمجھ جائیے کہ آن والے وقت چ کیہہ کجھ ہوئے گا۔ (اَمثال 4:18؛ دانیایل 2:28) ایہہ سچ اے کہ حالے سانوں مستقبل بارے ہر گل دا نئیں پتہ۔ پر اَسی ایس گل دا پکا یقین رکھ سکنے آں کہ وڈی مصیبت دے شروع ہون تک سانوں اوہ ساریاں گلاں پتہ ہون گیاں جیہڑیاں یہوواہ دے وفادار رہن تے اِک دُوجے نال اِک مُٹھ رہن لئی ضروری ہون گیاں۔ ایس مضمون چ اَسی سب توں پہلاں ویکھاں گے کہ مستقبل چ ہون والے کجھ واقعیاں بارے سانوں اپنی وضاحت کیوں بدلنی پئی۔ فیر اَسی ایس گل تے غور کراں گے کہ مستقبل بارے اَسی کیہڑیاں گلاں جاننے آں تے ساڈا اسمانی باپ یہوواہ لوکاں دی عدالت کیویں کرے گا۔
مستقبل بارے سانوں کیہہ نئیں پتہ
3. پہلے اَسی کیہہ مننے ساں تے کیوں؟
3 پہلے اَسی کہنے ساں کہ جیویں ای وڈی مصیبت شروع ہوئے گی، لوکاں کول یہوواہ تے ایمان لیان دا تے ہر مجدون توں بچن دا موقع ختم ہو جائے گا۔ اَسی اِنج کیوں کہنے ساں؟ نوح دے زمانے چ طوفان لیان توں پہلاں یہوواہ نے کشتی دا دروازہ بند کر دِتا سی تے فیر لوکاں کول بچن دا موقع نئیں رہیا سی۔ سانوں لگدا سی کہ ایہہ گل وڈی مصیبت تے وی لاگو ہوندی اے۔ ایس لئی اَسی سوچنے ساں کہ جدوں وڈی مصیبت شروع ہوئے گی تے لوکاں لئی نجات حاصل کرن دا دروازہ بند ہو جائے گا۔—متی 24:37-39۔
4. ہُن اَسی ایہہ کیوں نئیں کہندے کہ نوح دے زمانے چ جو کجھ ہویا، اوہ مستقبل چ وی ہوئے گا؟ وضاحت کرو۔
4 کیہہ ایہہ کہنا صحی ہوئے گا کہ نوح دے زمانے چ جو کجھ وی ہویا، اوہ مستقبل چ ہون والی کسے نہ کسے گل وَل اشارہ کردا اے؟ ایہدا جواب اے ”نئیں۔“ اَسی اِنج کیوں کہہ سکنے آں؟ کیونکہ بائبل چ ایہہ گل نئیں دَسی گئی۔ a ایہہ سچ اے کہ یسوع نے کہیا کہ اوہدی موجودگی دا زمانہ نوح دے زمانے وانگوں ہوئے گا۔ پر اوہنے ایہہ نئیں کہیا سی کہ نوح دے زمانے چ ہون والی ہر گل مستقبل چ وی ہوئے گی۔ تے نہ ای اوہنے ایہہ کہیا سی کہ کشتی دے دروازے دا بند ہونا مستقبل چ ہون والے کسے وڈے واقعے وَل اشارہ کردا اے۔ پر ایہدا ایہہ مطلب وی نئیں کہ اَسی نوح تے اوہدے زمانے چ آن والے طوفان توں کجھ نئیں سکھ سکدے۔
5. (الف)طوفان آن توں پہلاں نوح نے کیہہ کیتا؟ (عبرانیوں 11:7؛ 1-پطرس 3:20) (ب)جے مُنادی دی گل کیتی جائے تے ساڈا زمانہ کیس لحاظ نال نوح دے زمانے ورگا اے؟
5 جدوں نوح نُوں پتہ چلیا کہ یہوواہ طوفان لیان والا اے تے اوہنے کشتی بنان نال یہوواہ تے ایمان ظاہر کیتا۔ (عبرانیوں 11:7؛ 1-پطرس 3:20 نُوں پڑھو۔) ایسے طرحاں جیہڑے لوک خدا دی بادشاہی دی خوشخبری سُن دے نیں، اوہناں نُوں ایہدے تے ایمان لیانا چاہی دا اے تے ایس ایمان دے مطابق عمل وی کرنا چاہی دا اے۔ (اعمال 3:17-20) پطرس نے نوح بارے کہیا کہ اوہ نیکی دی مُنادی کردا سی۔ (2-پطرس 2:5) پر جیویں کہ اَسی پچھلے مضمون چ ویکھیا سی، اَسی ایہہ نئیں جان دے کہ جدوں طوفان آن توں پہلاں نوح مُنادی کر رہیا سی تے اوہ زمین تے رہن والے ہر بندے تک پونچ سکیا سی یاں نئیں۔ اَج اَسی وی مُنادی دے کم چ حصہ لے رہے آں۔ اَسی بڑے جوش نال پوری دُنیا چ بادشاہی دا پیغام پونچان دی کوشش کر رہے آں۔ پر بھانویں اَسی اپنے وَلّوں جِنّی وی کوشش کر لئیے، اَسی خاتمہ آن توں پہلاں ہر بندے تک بادشاہی دا پیغام نئیں پونچا سکاں گے۔ ایہدی کیہہ وجہ اے؟
6، 7. اَسی ایہہ کیوں کہہ سکنے آں کہ دُنیا دے خاتمے توں پہلاں اَسی زمین تے رہن والے ہر بندے نُوں خوشخبری نئیں سُنا سکاں گے؟ وضاحت کرو۔
6 غور کرو کہ یسوع نے مُنادی دے کم بارے کیہہ کہیا۔ اوہنے پیشینگوئی کیتی سی کہ ”بادشاہی دی خوشخبری دی مُنادی ساری دُنیا چ کیتی جائے گی تاکہ ساریاں قوماں نُوں گواہی ملے۔“ (متی 24:14) ایہہ پیشینگوئی اَج کیویں پوری ہو رہی اے؟ ایہہ پیشینگوئی اَج جیس طرحاں پوری ہو رہی اے، اوس طرحاں پہلاں کدی نئیں ہوئی۔ اَج بادشاہی دا پیغام 1000 توں زیادہ زباناں چ موجود اے تے ساڈی ویبسائٹ jw.org دے ذریعے دُنیا چ رہن والے زیادہتر لوک خدا دی بادشاہی بارے جان سکدے نیں۔
7 پر یسوع مسیح نے ایہہ وی دَسیا کہ اوہدے شاگرداں نے ”سارے شہراں چ حالے مُنادی دا کم پورا وی نئیں کیتا ہوئے گا“ کہ اوہ آ جائے گا۔ (متی 10:23؛ 25:31-33) یسوع مسیح دی ایہہ گل ساڈے زمانے چ وی پوری ہو رہی اے۔ اَج لکھاں لوک اِنج دے علاقیاں چ رہ رہے نیں جتھے مُنادی کرنا بالکل منع اے۔ ایہدے علاوہ پوری دُنیا چ ہر منٹ کئی سو بچے پیدا ہوندے نیں۔ اَسی اپنے وَلّوں پوری کوشش کرنے آں کہ اَسی ہر قوم تے قبیلے تے زبان دے لوکاں نُوں خوشخبری سُنائیے۔ (مُکاشفہ 14:6) پر سچ تے ایہہ وے کہ دُنیا دا خاتمہ آن توں پہلاں اَسی ہر بندے تک بادشاہی دا پیغام نئیں پونچا سکاں گے۔
8. مستقبل چ یہوواہ جیویں لوکاں دی عدالت کرے گا، اوہدے بارے کیہڑے سوال کھڑے ہوندے نیں؟ (تصویراں نُوں وی ویکھو۔)
8 ہُن ایہہ سوال پیدا ہوندا اے کہ جے کسے انسان نُوں وڈی مصیبت شروع ہون توں پہلاں خوشخبری سُنن دا موقع ای نہ مِلیا تے فیر کیہہ ہوئے گا؟ یہوواہ تے اوہدا پُتر جنہوں اوہنے عدالت کرن دی ذمےداری دِتی اے، اوہدے بارے کیہہ فیصلہ کرے گا؟ (یوحنا 5:19، 22، 27؛ اعمال 17:31) ایس مضمون دی مرکزی ایت چ دَسیا گیا اے کہ یہوواہ ایہہ بالکل نئیں چاہندا کہ کوئی وی انسان مرے۔ سگوں اوہ چاہندا اے کہ ہر طرحاں دے لوک نجات حاصل کرن۔ (2-پطرس 3:9؛ 1-تیمُتھیُس 2:4) بھانویں کہ اَسی یہوواہ بارے ایہہ سچائی جاننے آں کہ اوہ کسے انسان دی ہلاکت نئیں چاہندا پر فیر وی اوہنے حالے تک سانوں ایس سوال دا جواب نئیں دِتا کہ جے کسے بندے نُوں وڈی مصیبت شروع ہون توں پہلاں خوشخبری سُنن دا موقع نئیں مِلیا تے اوہ اوہدی عدالت کیویں کرے گا۔ یہوواہ سانوں ایس بارے ہر گل دَسن دا پابند نئیں اے کہ اوہنے کیہہ کجھ کر لیا اے تے اوہ اَگے کیہہ کجھ کرن دا ارادہ رکھدا اے۔
9. یہوواہ نے سانوں اپنے کلام چ کیہہ دَسیا اے؟
9 یہوواہ خدا نے سانوں اپنے کلام چ کجھ ایہو جہیاں گلاں دَسیاں نیں جیہڑیاں اوہ مستقبل چ کرے گا۔ مثال لئی، یہوواہ نے سانوں دَسیا اے کہ اوہ اوہناں بھیڑے لوکاں نُوں زندہ کرے گا جنہاں نُوں مرن توں پہلاں خوشخبری سُنن تے اپنے آپ نُوں بدلن دا موقع نئیں مِلیا۔ (اعمال 24:15؛ لُوقا 23:42، 43) ایس گل تے غور کرن نال ساڈے ذہن چ کجھ ہور اہم سوال پیدا ہو سکدے نیں۔
10. ہور کیہڑے سوال کھڑے ہوندے نیں؟
10 کیہہ اوہناں لوکاں کول دُبارہ زندہ ہون دی امید ہوئے گی جیہڑے وڈی مصیبت چ مر جان گے؟ بائبل چ صاف صاف دَسیا گیا اے کہ یہوواہ اپنے جیہڑے مخالفاں نُوں اپنیاں اسمانی فوجاں نال مِل کے ہرمجدون دی جنگ چ ختم کرے گا، اوہ زندہ نئیں ہون گے۔ (2-تھسلُنیکیوں 1:6-10) پر اَسی اوہناں لوکاں بارے کیہہ کہہ سکنے آں جیہڑے وڈی مصیبت دے دوران کسے ہور وجہ توں فوت ہون گے جیویں کہ بیماری، بڑھاپا یاں کسے حادثے دی وجہ توں؟ (واعظ 9: 11؛ زِکریاہ 14:13) کیہہ ایہناں وچوں کجھ لوکاں دا شمار اوہناں بھیڑے لوکاں چ ہو سکدا اے جنہاں نُوں نوِیں دُنیا چ زندہ کیتا جائے گا؟ اَسی ایہدے بارے کجھ نئیں جان دے۔
مستقبل بارے سانوں کیہہ پتہ اے
11. ہرمجدون دی جنگ چ لوکاں دی عدالت کیس بنیاد تے کیتی جائے گی؟
11 ہرمجدون دی جنگ چ لوکاں دی عدالت کیس بنیاد تے کیتی جائے گی؟ اَسی کئی ایہو جہے واقعیاں بارے جاننے آں جیہڑے مستقبل چ ہون گے۔ مثال لئی، سانوں پتہ اے کہ ہرمجدون چ لوکاں دی عدالت ایس بنیاد تے ہوئے گی کہ اوہ مسیح دے بھراواں نال کیویں پیش آئے سن۔ (متی 25:40) جیہڑے لوکاں نے یسوع تے اوہدے مسحشُدہ بھراواں دا ساتھ دِتا ہوئے گا، اوہناں نُوں بھیڈاں ٹھہرایا جائے گا۔ سانوں ایہہ وی پتہ اے کہ جدوں وڈی مصیبت شروع ہوئے گی تے اوہدوں مسیح دے کجھ بھرا زمین تے ای ہون گے تے اوہناں نُوں ہرمجدون دی جنگ شروع ہون توں کجھ چِر پہلاں اسمان تے چُک لیا جائے گا۔ جِنّی دیر تک مسیح دے بھرا زمین تے ہون گے، شاید اوہدوں تک نیک دل لوکاں کول ایہہ موقع ہوئے کہ اوہ اوہناں دی تے اوہناں دے کم دی حمایت کرن۔ (متی 25:31، 32؛ مُکاشفہ 12:17) ایہہ ساریاں گلاں اینیاں اہم کیوں نیں؟
12، 13. وڈے بابل دی تباہی نُوں ویکھ کے شاید کجھ لوک کیہہ کرن؟ (تصویراں نُوں وی ویکھو۔)
12 وڈی مصیبت دے شروع ہون توں بعد شایدلوکاں نُوں کیہہ یاد آئے گا؟ وڈی مصیبت دے شروع ہون توں بعد جدوں وڈے بابل نُوں تباہ کیتا جائے گا تے ایہہ ویکھ کے شاید کجھ لوکاں نُوں یاد آئے کہ یہوواہ دے گواہ بڑے لمے چِر توں ایس بارے دَس رہے سن۔ کیہہ ایہہ سب کجھ ویکھ کے کجھ لوک یہوواہ تے ایمان لے آن گے؟—مُکاشفہ 17:5؛ حِزقیایل 33:33۔
13 جے اِنج ہویا تے ایہہ بالکل اُنج ای ہوئے گا جیویں موسیٰ دے زمانے چ مصر چ ہویا سی۔ یاد کرو کہ جدوں بنیاِسرائیل مصر چوں نکلے سن تے اوہناں نال اِک مِلی جلی بِھیڑ وی سی۔ ایس بِھیڑ وچوں شاید کجھ لوک اوس ویلے ایمان لیائے سن جدوں اوہناں نے ویکھیا سی کہ دس آفتاں بارے موسیٰ دی کہی ہر گل پوری ہوئی اے۔ (خروج 12:38) جے وڈے بابل دی تباہی توں بعد وی اِنج ای ہوندا اے تے کیہہ سانوں ایہہ سوچنا چاہی دا اے کہ ایہہ تے بڑی نااِنصافی اے کیونکہ ایہہ لوک تے خاتمے توں بس کجھ چِر پہلاں ای ساڈے چ شامل ہوئے نیں تے ایہناں نُوں بچا لیا گیا اے؟ نئیں، سانوں اِنج نئیں سوچنا چاہی دا۔ اَسی اپنے اسمانی باپ ورگے بننا چاہنے آں جیہڑا رحمدل تے مہربان اے، چھیتی غصہ نئیں کردا تے اَٹل پیار تے سچائی نال بھریا ہویا اے۔ b—خروج 34:6۔
14، 15. کیہہ لوکاں نُوں ہمیشاں دی زندگی ایس بنیاد تے ملے گی کہ اوہ کدوں مرے سن تے کتھے رہندے سن؟ وضاحت کرو۔ (زبور 33:4، 5)
14 شاید تُسی کجھ بھین بھراواں نُوں ایہہ کہندے سُنیا ہوئے: ”چنگا ہوئے گا کہ میرا فلانا رشتےدار وڈی مصیبت دے شروع ہون توں پہلاں ای فوت ہو جائے۔ اِنج اوہدے کول دُبارہ زندہ ہون دی امید تے ہوئے گی۔“ سچ اے کہ ایہناں بھین بھراواں نُوں دِلوں اپنے غیرایمان رشتےداراں دی فکر اے۔ پر اِک بندے نُوں ہمیشاں دی زندگی ایس بنیاد تے نئیں ملے گی کہ اوہ کدوں مریا سی۔ یہوواہ ہمیشاں صحی فیصلے کردا اے تے اوہ کدی وی نااِنصافی نئیں کر سکدا۔ (زبور 33:4، 5 نُوں پڑھو۔) اَسی ایس گل دا پکا یقین رکھ سکنے آں کہ ساری دُنیا دا اِنصاف کرن والا خدا جو وی کرے گا، صحی کرے گا۔—پیدائش 18:25۔
15 ایہہ سوچنا وی صحی ہوئے گا کہ اِک بندے نُوں ایس بنیاد تے ہمیشاں دی زندگی نئیں ملے گی کہ اوہ کتھے رہندا اے۔ ایہہ ہو ای نئیں سکدا کہ یہوواہ اوہناں لکھاں لوکاں نُوں بکریاں چ شمار کر لوے جیہڑے ایہو جہے مُلکاں چ رہ رہے نیں جتھے اوہناں نُوں کدی بادشاہی دی خوشخبری سُنن دا موقع ای نئیں مِلیا۔ (متی 25:46) جِنّی سانوں ایہناں لوکاں دی فکر اے، اوس توں کِتے زیادہ ساری دُنیا دے اِنصاف کرن والے خدا یہوواہ نُوں ایہناں دی فکر اے۔ سانوں نئیں پتہ کہ وڈی مصیبت دے دوران یہوواہ حالاتاں دا رُخ کیویں موڑے گا۔ جدوں یہوواہ وڈی مصیبت دے دوران ساریاں قوماں دے سامنے اپنے ناں دی وڈیائی کرے گا تے ہو سکدا اے کہ ایہناں لوکاں نُوں یہوواہ بارے سکھن، اوہدے تے ایمان ظاہر کرن تے اوہدی حمایت کرن دا موقع ملے۔—حِزقیایل 38:16۔
وڈی مصیبت دے شروع ہون توں بعد کیہہ کجھ لوک یہوواہ تے ایمان لے آن گے؟
16. اَسی یہوواہ بارے کیہہ جان گئے آں؟ (تصویر نُوں وی ویکھو۔)
16 بائبل دا مطالعیا کرن دی وجہ توں سانوں ایہہ پتہ اے کہ یہوواہ خدا انساناں دی زندگی دی بوہت قدر کردا اے۔ ایس گل دا ثبوت ایہہ وے کہ اوہنے سانوں ہمیشاں دی زندگی دین لئی اپنے پُتر نُوں قربان کر دِتا۔ (یوحنا 3:16) ایہدے توں اَسی محسوس کر سکنے آں کہ یہوواہ سانوں کِنّاں پیار کردا اے۔ (یسعیاہ 49:15) اوہ ساڈے وچوں ہر اِک نُوں ساڈے ناں توں جان دا اے۔ اوہ ساڈے بارے چھوٹیاں چھوٹیاں گلاں وی جان دا اے۔ ایہدا مطلب اے کہ جے اَسی مر وی گئے تے اوہ سانوں اوسے یادداشت تے شخصیت نال دُبارہ زندہ کر سکدا اے جیہڑی اَسی مرن توں پہلاں رکھنے ساں۔ (متی 10:29-31) اَسی بوہت ساریاں گلاں دی بنیاد تے پورے یقین نال ایہہ کہہ سکنے آں کہ ساڈا پیار کرن والا اسمانی باپ یہوواہ ہر بندے دی عدالت اِنصاف تے رحم نال کرے گا۔—یعقوب 2:13۔
17. اگلے مضمون چ اَسی کیہڑے سوالاں تے گل کراں گے؟
17 ایہناں نوِیاں وضاحتاں دی وجہ توں اَسی سمجھ گئے آں کہ ساڈے لئی مُنادی کرنا ہُن پہلے نالوں کِتے زیادہ ضروری ہو گیا اے۔ اَسی ایہہ کیوں کہہ سکنے آں؟ تے کیہڑی چیز ساڈے اندر ایہہ جذبہ پیدا کر سکدی اے کہ اَسی بغیر ہمت ہارے مُنادی کردے رہیے؟ ایہناں سوالاں دے جواب تفصیل نال اگلے مضمون چ دِتے جان گے۔
گیت نمبر 58 صلحپسند لوکاں دی تلاش
a ایہہ جانن لئی کہ ایس وضاحت نُوں کیوں بدلیا گیا اے، اُردو زبان چ 15 مارچ 2015 دے ”مینارِنگہبانی“ دے صفحہ نمبر 7-11 تے ایس مضمون نُوں ویکھو: ”ایسا ہی تجھے پسند آیا۔“
b جدوں وڈے بابل دی تباہی توں بعد ماجوج دا جوج یہوواہ دے بندیاں تے حملہ کرے گا تے اوس ویلے یہوواہ لئی اوہناں دی وفاداری دا اِمتحان ہوئے گا۔ اوس ویلے اوہناں لوکاں دی وفاداری دا وی اِمتحان ہوئے گا جنہاں نے وڈے بابل دی تباہی توں بعد یہوواہ دی عبادت کرن دا فیصلہ کیتا ہوئے گا۔
c تصویر: تِن تصویراں جنہاں چ وکھایا گیا اے کہ شاید کجھ لوکاں تک بادشاہی دا پیغام کیوں نئیں پونچ سکدا: (1)اِک عورت جیہڑے ملک چ رہندی اے، اوتھے اِک ایہو جیہا مذہب عام اے جدی وجہ توں اوتھے خوشخبری دی مُنادی کرنا خطرے توں خالی نئیں اے۔ (2)اِک میاں بیوی اِک ایہو جہے ملک چ رہ رہے نیں جتھے مُنادی دا کم کرنا غیرقانونی تے خطرناک اے تے (3)اِک بندہ اِک ایہو جہی جگہ تے رہ رہیا اے جتھے کسے ہور انسان دا پونچنا بوہت ای مشکل اے۔
d تصویر دی وضاحت: اِک کُڑی جیہڑی یہوواہ توں دُور ہو گئی سی، اوہنوں وڈے بابل دی تباہی ویکھ کے یاد آ رہیا اے کہ اوہنے ایس بارے سکھیا سی۔ ایس لئی ہُن اوہ بدل گئی اے تے اپنے ماں پیو کول واپس چلی گئی اے جیہڑے یہوواہ دے گواہ نیں۔ لوکاں چ ایہو جہی تبدیلی ویکھ کے اَسی ایہہ ظاہر کرنا چاہنے آں کہ اَسی اپنے اسمانی باپ وانگوں رحمدل تے ہمدرد آں تے ایس گل تے خوش آں کہ اِک گُناہگار یہوواہ کول واپس آ گیا اے۔