KUYUUJI 19
WAAÑI 22 ¡Que venga el Reino que Dios ha establecido!
¿Juutypɨk kɨʼpin̈oʼyba Jehová jeʼm tannɨgɨyoʼoyijom?
Jehová «d́a ixunpa iga togoypa ni tu̱m» (2 PED. 3:9).
AN̈KEJAYOʼOYI
Tyiʼiga tan̈kupɨktaʼmpa iga Jehová iwɨwatpa jesɨk kɨʼpin̈oʼyba jeʼm tannɨgɨyoʼoyijom.
1. ¿Tyiʼiga tsaam tamaymaytyam iga taitytyaʼm yɨʼp in̈an̈pɨgam jaama?
TSAAM tamaymaytyam iga taitytyaʼm yɨʼp in̈an̈pɨgam jaama y sɨʼ tanaʼmtaʼm juutypɨk kupakpa ixɨʼyaj jeʼm jɨychagoʼoyiyaj ityyajwɨʼɨp Bibliajom. Tanaʼmtaʼmpa juutypɨk jeʼm «nortejpɨk an̈jagoʼoyi» y «jeʼm surpɨk an̈jagoʼoyi» sɨʼ inin̈teeñkamokyajta (Dan. 11:40, nota). Sɨʼ in̈matta jeʼm wɨtampɨk an̈matyiyaj de jeʼm Dios iAn̈jagoʼoyi, y jaʼyan̈yaj ipɨkneyajum ijɨɨxi iga ikuyooxayajpa Jehová (Is. 60:22; Mat. 24:14). Y sɨʼtyim tampɨktson̈taʼm jaʼyan̈ wiʼkkuy espiritual (Mat. 24:45-47).
2. ¿Tyi tan̈wɨkupɨknetaʼmiñ, y tyi dyaʼ tanjoodon̈tam?
2 Jehová seguido tayooxpaʼtnetaʼm iga tan̈wɨkutɨʼɨyɨytyaʼmiñ jempɨk dyaʼ jaʼyñeʼ naspa (Prov. 4:18; Dan. 2:28). Tan̈kupɨktaʼmpa iga jesɨk mojpa jeʼm mɨjpɨk yaʼachaaji tanɨʼmaytyamtaap tyityam tan̈wattaʼmiñ iga takupɨgoytyaʼmiñ y taitytyaʼmiñ an̈tuumjom. Pero dyatyim wɨap tanjoodon̈ataʼm ityumpɨy jempɨk naspa tannɨgɨyoʼoyijom. Yɨʼp kuyujijom, wiñtyi tan̈kɨʼpin̈taʼmpa tyiʼiga kukakneʼ jempɨk tan̈kutɨʼɨyɨyñetaʼm idyɨk iga juutypɨk kupakpa ixɨʼyaj weeñi jɨychagoʼoyiyaj. Y okmɨ tan̈kɨʼpin̈taʼmpa jempɨk tanjoodon̈tam iga naspa tannɨgɨyoʼoyijom y tyityam iwatpa Jehová.
JEMPƗK DYAʼ TANJOODON̈TAM
3. ¿Tyi tanjɨɨstaʼmpa idyɨk iga naspa jesɨk tsukumum jeʼm mɨjpɨk yaʼachaaji, y tyiʼiga?
3 Pekaʼ, jaʼy tanjɨɨstaʼm iga ityumpɨy jempɨk nas en jeʼm Diluvio, ikwiñkejpa idyɨk jempɨk naspa tannɨgɨyoʼoyijom. Jeʼyukmɨ tan̈kutɨʼɨyɨyñetaʼm idyɨk iga jesɨk tsukumum jeʼm mɨjpɨk yaʼachaaji, dyam i wɨap ikupɨk Jehová y dyatyim wɨap inikɨakputyajta jesɨk itypa Armagedón. Tanjɨɨstaʼmpa idyɨk iga juutypɨktyim Jehová in̈nuʼk jeʼm arca ipuerta wiñtyi iga nuʼguiñ jeʼm Diluvio, jeempɨktyim iwatpa wiñtyi iga tsukumiñ jeʼm mɨjpɨk yaʼachaaji, keʼnam jesɨk in̈nuʼkpa jeʼm puerta y dyam i wɨap inikɨakputta (Mat. 24:37-39).
4. ¿Tyiʼiga dyaʼ wɨap tannɨm iga jempɨk nas jesɨgam jaʼy ityi Noé naspanam jeʼm tannɨgɨyoʼoyijom?
4 Pero jeʼm Biblia dyaʼ nɨmpa iga ityumpɨy jempɨk nas en jeʼm Diluvio, naspa tannɨgɨyoʼoyijom a. Mex iga Jesús nɨm iga jeʼm tañityityaʼm jeextyim juʼuts jesɨk jaʼy ityi Noé. Dyaʼ takkutɨʼɨyɨʼyba iga ityumpɨy jempɨk nas en jeʼm Diluvio kupakpatyim idyɨk jeʼm tannɨgɨyoʼoyijom. Pero tanaʼmtaʼmiñ tyi wɨap tan̈kejaytyaʼm yɨʼp nasɨyoʼoyi.
5. a) ¿Tyi iwat Noé wiñtyi iga nuʼguiñ jeʼm Diluvio? (Hebreos 11:7; 1 Pedro 3:20). b) ¿Tyiʼiga jeʼm an̈matkuy jeextyim juʼuts jesɨk jaʼy ityi Noé?
5 Noé ikupɨk jempɨk iñɨʼmay Jehová, ikwiñkej fe jesɨgam iwat jeʼm arca (maayɨʼ Hebreos 11:7; 1 Pedro 3:20). Jeempɨktyim naspa sɨɨ, jempɨk ikumaton̈yajpa jeʼm Dios iAn̈jagoʼoyi ikwiñkejyajpa fe kun tyityam iwatyajpa (Hech. 3:17-20). Pedro nɨm iga Noé in̈maday tun̈gakyaj jempɨk dyaʼ jaʼyñeʼ miñba idyɨk (2 Ped. 2:5). Juʼuts tanaʼmtaʼm jeʼm tun̈gak kuyujijom, dyaʼ tanjoodon̈tam siiga Noé in̈maday ityumpɨyyaj jempɨk ityyaj idyɨk jeem, wiñtyi iga nuʼguiñ jeʼm Diluvio. Yɨʼp jaama, mex iga taɨchtyam tan̈wattaʼmpa juʼtspɨyam tawɨap iga tanan̈madayyajpa ityumpɨyyaj, dyaʼ wɨap tanan̈mat ikuwɨtyi naxyukmɨ wiñtyi iga nuʼguiñ jeʼm aktogoyoʼoyi. ¿Tyiʼiga?
6, 7. ¿Tyiʼiga dyaʼ wɨap tanan̈madayyaj ityumpɨyyaj jeʼm wɨtampɨk an̈matyiyaj wiñtyi iga nuʼguiñ jeʼm aktogoyoʼoyi?
6 Tanaʼmtaʼmiñ tyi nɨm Jesús iga naspa idyɨk kun jeʼm an̈matkuy. Nɨm iga jeʼm wɨtampɨk an̈matyiyaj «núcpa ju̱t́quej iga jo̱dóŋa̱ta̱iñ» (Mat. 24:14). Y yɨʼpyaj an̈matyiyaj kupakpa ixɨʼyaj. Tanan̈mattaʼmpa jeʼm Dios iAn̈jagoʼoyi maaj de 1,000 an̈matyiimɨyaj y ikuyukmɨ jeʼm sitio de internet, jw.org, jaʼyan̈yaj wɨaptyim ijoodon̈ayaj jeʼm wɨtampɨk an̈matyiyaj.
7 Pero, Jesús iñɨʼmaytyim jeʼm ikuyujkɨʼɨwiñyaj iga «d́a yajpa iññasca jém tɨgaŋjoj de Israel». Yɨʼp nɨmtoʼoba iga dyaʼ yajpa idyɨk in̈madayyaj ityumpɨyyaj wiñtyi iga miʼñiñ (Mat. 10:23; 25:31-33). Yɨʼp jaama jeʼtyim naspa, jaʼyan̈yaj ityyaj jeʼm an̈eymɨ juuty dyaʼ taaʼmchityamtaap iga tanan̈mattaʼmiñ. Y tumtum minuto nayba ixɨʼyaj xutyu tsɨxtyam. Jeʼyukmɨ mex iga tan̈wattaʼmpa juʼtspɨyam tawɨap iga tanan̈madayyajpa jeʼm wɨtampɨk an̈matyiyaj «it́u̱mpɨy clase de pɨxiñt́am, [...] jém jɨyyajpáppɨc tuŋgac aŋmat́i̱mɨ y it́u̱mpɨy jém it́yajwɨɨp jém tuŋgacpɨc naxyucmɨ» dyaʼ yajpa tanan̈madayyaj wiñtyi iga nuʼguiñ jeʼm aktogoyoʼoyi (Apoc. 14:6).
8. ¿Tyisɨ tanakwaʼktamtaap? (Aʼmɨtyim jeʼm imagenyaj).
8 Wɨapsɨ iga tanakwaʼktamtaap: «¿Tyi naspa kun jempɨk dyanam tanan̈madayñeyaj jeʼm wɨtampɨk an̈matyiyaj wiñtyi iga nuʼkpa jeʼm mɨjpɨk yaʼachaaji? ¿Juutypɨk ikɨʼpin̈yajpa Jehová y jeʼm iMaanɨk?» (Juan 5:19, 22, 27; Hech. 17:31). Jeʼm texto juuty topneta yɨʼp kuyuuji takjɨɨspa iga Jehová «d́a ixunpa iga togoypa ni tu̱m». Jeʼ ixunba iga ityumpɨyyaj «icucacyajiñ ijɨ̱xi» (2 Ped. 3:9; 1 Tim. 2:4). Jehová dyanam tan̈madayñetaʼm jempɨk iwatpa kun jeʼeyaj y dyaʼ nasuntaap iga iwadyiñ.
¿Tyi iwatpa Jehová kun jempɨk dyaʼ wɨa mu ikumaton̈yaj jeʼm wɨtampɨk an̈matyiyaj wiñtyi iga nuʼguiñ jeʼm mɨjpɨk yaʼachaaji? (Aʼmɨ jeʼm párrafo 8). d
9. ¿Tyi jempɨk tan̈madayñeum Jehová jeʼm In̈matyijom?
9 Jeʼm In̈matyijom, Jehová tan̈madayñeum weeñi tyidyin̈kej iga iwatpa. Tan̈madayñeʼ iga iktsukumpa weeñiyaj jempɨk imalwatyaj, jempɨk dyaʼ wɨa mu iixpɨkyaj Jehová y ikakyaj ijɨɨxi (Hech. 24:15; Luc. 23:42, 43). Jeʼyukmɨ wɨapsɨ iga tanawadaytyaap tun̈gak akwagoʼoyiyaj.
10. ¿Tyiñam wɨap iga tanakwaʼktamtaap?
10 ¿Dyam aktsukumyajtaap jempɨk kaʼayajpa jesɨk itypa jeʼm mɨjpɨk yaʼachaaji? Jeʼm Biblia in̈matpa iga jempɨk Jehová y jeʼm iejércitos iktogoyyajpa en Armagedón iga in̈teeñkamokyaj, dyam aktsukumyajtaap (2 Tes. 1:6-10). Pero ¿tyi naspa kun jempɨk kaʼayajpa jesɨk itypa jeʼm mɨjpɨk yaʼachaaji, ikuyukmɨ jeʼm desastres, tuum accidente o iga akkaʼayajtaap? (Ecl. 9:11; Zac. 14:13). ¿Aktsukumyajtaap weeñiyaj mex iga imalwatneyaj? Dyaʼ tanjoodon̈tam.
JEMPƗK TANJOODON̈TAM
11. ¿Juutypɨk kɨʼpin̈yajtaap jesɨk itypa Armagedón?
11 Tanjoodon̈tam iga jesɨk nuʼkpa Armagedón Jehová ikɨʼpin̈ba ityumpɨy juutypɨgam iyooxpadayñeyaj jeʼm Cristo ityɨɨwɨtam (Mat. 25:40). Jempɨk iyooxpaʼtneyaj jeʼm kupin̈neyajtawɨʼɨp y Cristo, aʼmyajtaap juʼuts ovejajyaj. Tanjoodon̈tyim iga weeñi Cristo ityɨɨwɨtam ityajpanam yɨʼp Naxyukmɨ jesɨk itypa jeʼm mɨjpɨk yaʼachaaji y nanɨkyajtaap sɨn̈yukmɨ wiñtyi iga tsukumiñ Armagedón. Iganam ityyajpa, wɨapsɨ iga jempɨk wɨanmajyaj yooxpadoyyajpa kun jeʼm yooxakuy iwatyajpaʼap (Mat. 25:31, 32; Apoc. 12:17). ¿Tyiʼiga tanjoodon̈ataʼmiñ?
12, 13. ¿Tyisɨ iwatyajpa weeñiyaj jesɨk iaʼmyajpa iga aktogoyñetawum jeʼm Mɨjpɨk Babilonia? (Aʼmɨtyim jeʼm imagenyaj).
12 Okmɨ iga tsukumpa jeʼm mɨjpɨk yaʼachaaji wɨapsɨ iga weeñiyaj iaʼmyajpa juutypɨk aktogoytyaap jeʼm «Mɨjpɨk Babilonia» y ikujɨɨsyajpa iga jeʼm Jehová itestigojyaj pekam sɨʼ idyɨk in̈matyaj iga jeʼam idyɨk naspa. Wɨap iga jesɨknam ipɨkyajpa ijɨɨxi iga ikupɨkyajpa Jehová (Apoc. 17:5; Ezeq. 33:33).
13 Tan̈kujɨɨstaʼmiñ jempɨk nas jesɨk jaʼy ityi Moisés. Jesɨgam jeʼm israelitajyaj putyaj de Egipto, putyajtyim jaʼyan̈yaj jempɨk dyaʼ jeʼ israelitajyaj (Éx. 12:38). Wɨapsɨ iga ikupɨkyaj Jehová jesɨgam moj iaʼmyaj juutypɨk kupak jeʼm 10 plagas jempɨk Moisés nɨmneʼ idyɨk. Wɨap iga jeempɨktyim naspa jeʼm tanɨgɨyoʼoyijom, siiga weeñiyaj ipɨkyajpa ijɨɨxi iga ikupɨkyajpa Jehová okmɨ iga aktogoyñetawum jeʼm Mɨjpɨk Babilonia, ¿tanjɨɨspasɨ iga dyaʼ sɨʼ iwɨwatyaj? ¡Dyaʼ! Tan̈watkiʼpstamtoʼoba tanJaatun̈ sɨn̈yukmɨpɨk iga jeʼ «tuum Dios yaʼachan̈jaamoypaʼap y wɨanmaj, dyaʼ jobity joʼyba, ikwiñkejpa toyoʼoyi kukaʼpsnewɨʼɨp y dyaʼ mɨgoʼyba» (Éx. 34:6). b
Weeñiyaj jesɨk iaʼmyajpa juutypɨk aktogoytyaap jeʼm «Mɨjpɨk Babilonia», ijɨɨsyajpa iga jeʼm Jehová itestigojyaj jaʼyan̈ amtyɨyam sɨʼ idyɨk in̈matyaj iga jeʼam naspa. (Aʼmɨ jeʼm párrafojyaj 12 y 13). e
14, 15. ¿Juutypɨk tanjoodon̈tam iga algun i wɨap ipɨktson̈ jeʼm ityi dyapɨk kuyajpa dyaʼ tyi ijoo juuty kaʼaba ni juuty idyiñ? (Salmo 33:4, 5).
14 Wɨapsɨ iga oyñeʼ in̈kumaton̈ iga algun nɨʼmiñ, yɨʼɨmpɨk: «Maaj wɨɨ siiga jeʼm anfamiliar dyapɨk ikuyooxaap Jehová kaʼiñ wiñtyi iga tsukumiñ jeʼm mɨjpɨk yaʼachaaji, jesɨk wɨapnam iktsukumta». Wɨapsɨ iga nɨmpa kun tuum wɨbɨk jɨɨxi, pero iga algun i wɨaiñ ipɨktson̈ jeʼm ityi dyapɨk kuyajpa dyaʼ tyi ijoo juchix kaʼaba. Jehová jempɨk ipɨkpa yɨʼp jɨɨxi iga jeʼam jeʼm Juez y jeʼ juchixkej wɨkɨʼpin̈oʼyba (maayɨʼ Salmo 33:4, 5). c Tan̈wɨkupɨknetaʼm iga jeʼ juchixkej iwɨwatpa (Gén. 18:25).
15 Iga algun i wɨaiñ ipɨktson̈ jeʼm ityi dyapɨk kuyajpa dyaʼ tyi ijoo juuty ity. Jehová dyaʼ iaʼmpa juʼuts cabras jempɨk ityyaj jeʼm an̈eymɨ iga ni keman ikumaton̈yaj jeʼm Dios iAn̈jagoʼoyi (Mat. 25:46). Wɨap tan̈kupɨk iga jeʼ tsaam ityeguet. Dyaʼ tanjoodon̈tam tyityam iwatpa Jehová jesɨk itypa jeʼm mɨjpɨk yaʼachaaji. Wɨapsɨ iga weeñiyaj iixpɨkyajpa y ikwiñkejyajpa fe jesɨk jeʼ iwatpa iga kujiʼptaiñ (Ezeq. 38:16).
Okmɨ iga tsukumpa jeʼm mɨjpɨk yaʼachaaji, wɨapsɨ iga weeñiyaj ikupɨkyajpa Jehová jesɨk iaʼmyajpa ityumpɨy jempɨk naspa ixɨʼ
16. ¿Juʼuts Jehová? (Aʼmɨtyim jeʼm imagen)
16 Jeʼm Biblia, tan̈kejayñeʼ iga Jehová tsaam ichoowaixpa jeʼm ityi. Jeʼyukmɨ ikɨan̈kot jeʼm iMaanɨk iga ityumpɨyyaj jempɨk ikupɨkyajpa wɨaiñ iniityyaj tuum ityi dyapɨk kuyajpa (Juan 3:16). Tanaʼmnetaʼm iga Jehová takwiñkejayñeʼ yaʼachan̈jamoʼoyi y toyoʼoyi (Is. 49:15). Tawɨixpɨkpa tumtum de taɨchtyam, jeʼyukmɨ siiga takaʼaba wɨap taktsukumseet kun jeʼm jɨɨxiyaj y jaamoʼoyiyaj tanaitytyamwɨʼɨp (Mat. 10:29-31). Wɨap tanaidyay confianza jeʼm tanJaatun̈ sɨn̈yukmɨpɨk iga wɨkɨʼpin̈oʼyba, iniity joodon̈oʼoyi, iwɨwatpa y tsaam yaʼachan̈jamoʼyba (Sant. 2:13).
Wɨap tan̈kupɨktaʼm iga jesɨk Jehová ikɨʼpin̈ba algun i, jeʼ ikwiñkejpa joodon̈oʼoyi, iwɨwatpa y yaʼachan̈jamoʼoyi. (Aʼmɨ jeʼm párrafo 16).
17. ¿Tyi tan̈kɨʼpin̈taʼmpa yɨʼp kuyujijom?
17 Iga tan̈kutɨʼɨyɨyñetaʼm yɨʼp jɨɨxi, tanaʼmpa iga tanteguedataʼmiñ tanan̈mat jeʼm Dios In̈maatyi. ¿Tyiʼiga? Y ¿tyi taanmajan̈chiʼiba iga seguido tan̈wadyiñ? Jeʼm tun̈gak kuyujijom tan̈kutson̈taʼmpa yɨʼpyaj akwagoʼoyiyaj.
WAAÑI 76 Cuéntame lo que sientes
a Jeʼm kuyuuji «A Jehová le gusta enseñar de forma sencilla», iga impaʼtpa en jeʼm Totjaayi Takjoodon̈apaʼap del 15 de marzo de 2015 en español, páginas 7 a 11, in̈matpa tyiʼiga dyam tan̈kupɨktaʼmpa iga jempɨk nasyaj pekaʼ ikwiñkejyajpa jempɨk naspa tannɨgɨyoʼoyijom.
b Okmɨ iga aktogoytyaap jeʼm Mɨjpɨk Babilonia, Gog de Magog ikteeñkamokpa jeʼm Dios iyooxakɨʼɨwiñyaj. Jempɨk ikupɨkyajpa Jehová okmɨ iga aktogoytyaap jeʼm Mɨjpɨk Babilonia kutɨʼtsyajtaptyim.
c Salmo 33:4, 5: 4 Iga jeʼm Jehová in̈maatyi dyaʼ mɨgoʼyba y ityumpɨy jempɨk jeʼ iwatpa tawɨwadaʼyba. 5 Jeʼ ityoyba jeʼm wɨwadoʼoyi y jeʼm justicia. Ikuwɨtyi yɨʼp naxyukmɨ kejpa jeʼm Jehová iñunta toyoʼoyi.
d JEMPƗK NASPA IXƗʼ EN JEʼM IMAGENYAJ: Tukuteen akwiñkejoʼoyiyaj in̈kejpaʼap iga dyaʼ wɨap tanan̈madayyaj ityumpɨyyaj jeʼm wɨtampɨk an̈matyiyaj 1) tuum yoomoʼ ity tuum an̈eymɨ juuty jaʼyan̈ jeʼm religiónyaj dyaʼ jeʼ cristiana y dyaʼ wɨap tanan̈mat; 2) tuum an̈komɨʼɨyi ity tuum an̈eymɨ juuty jeʼm an̈jagoʼoyiyaj dya aʼmchioyyajpa iga tanan̈madyiñ jeʼm Dios In̈maatyi; 3) tuum pɨɨxiñ ity tuum an̈eymɨ juuty dyaʼ i wɨap ityɨgɨy.
e JEMPƗK NASPA IXƗʼ EN JEʼM IMAGENYAJ: Tuum yoomoʼ iga ichagan̈put Jehová sɨʼ ikujɨɨs jempɨk ikuyujkaneʼ iga juutypɨk idyɨk aktogoytyaap jeʼm «Mɨjpɨk Babilonia» ipɨk ijɨɨxi iga ikupɨkpa Jehová y seet juuty ityyaj idyɨk jeʼm ijaatun̈yaj Testigojyaj. Siiga jeempɨgam naspa, tanakwiñkejtoʼobatyim yaʼachan̈jamoʼoyi y toyoʼoyi juʼuts iwatpa jeʼm tanJaatun̈ sɨn̈yukmɨpɨk y tamaymayaap jesɨk algun i ikuseetpa Jehová.
