1. Pabia ku no pudi fala di kuma no sta na vivi na tempu interesanti dimas?

 NO STA na vivi na tempu interesanti dimas! Kada dia ku sol na mansi, no ta oja kuma ku profesias ku Biblia falaba del sta na kumpri. Pur isemplu, no oja “rei di norti” ku “rei di sul” ku sta na kompeti ku n̈utru, pabia kada kin misti manda na mundu. (Dan 11:40) No oja bon noba di Renu di Deus ku sta na pregadu na tudu mundu, i milyons di jintis disidi sirbi Jeova. (Isa 60:22; Mat 24:14) Tambi no sta na risibi manga di kumida spiritual “na ora sertu.” — Mat 24:​45-47.

2. Ke ku no pudi tene sertesa del, ma ke ku no dibi di rikuñisi?

² Jeova kontinua judanu ntindi diritu kusas importanti ku na kontisi nin i ka na tarda. (Dit 4:18; Dan 2:28) No pudi tene sertesa di kuma ora ku garandi tribulason kumsa, no na sibi tudu ke ku no pirsisa di sibi pa kontinua fiel, i kontinua sedu unidu na ki tempu difisil. Ma no dibi di rikuñisi di kuma, i ten kusas ku no ka sibi aserka di futuru. Nes studu, purmeru, no na bin fala di pabia ku no muda alguns kusas ku no falaba del ku na bin kontisi na futuru. Dipus no na jubi alguns kusas ku no sibi aserka di futuru i kuma ku no Pape ku sta na seu na bin aẑi.

 KE KU NO KA SIBI

3. Ke ku no ta falaba aserka di tempu ku jintis ka na tene oportunidadi di mostra fe na Jeova, i pabia ku no ta falaba kila?

³ Na pasadu, no ta falaba di kuma ora ku garandi tribulason kumsa, jintis ka na tene oportunidadi di mostra fe na Jeova i salba na Armajedon. No ta falaba kila, pabia no ta pensaba di kuma kada algin ku kada situason na tempu di diluviu, representa un kusa ku na bin kontisi na futuru. Pur isemplu, no ta pensaba di kuma suma ku Jeova fica porta di barku antis di diluviu kumsa, di mesmu manera, na kumsada di garandi tribulason i na “fica porta” des mundu di Satanas. Asin utrus ka na tene oportunidadi di salba. — Mat 24:​37-39.

4. Pabia ku no ka ta fala gosi di kuma tudu ke ku kontisi na tempu di Noe, na bin kumpri na no tempu? Bu pudi splika.

⁴ Sera ki no dibi di fala di kuma kada kusa ku kontisi na tempu di diluviu, representa un kusa ku na bin kontisi na futuru? Resposta i nau. Pabia? Pabia Biblia ka fala del. a Jesus kompara “tempu di Noe” ku tempu di si presensa. Ma i ka fala di kuma kada algin ku kada situason na tempu di diluviu, representa un kusa ku na bin kontisi na futuru, suma oca Jeova fica porta di  barku. Ma es ka signifika di kuma no ka pudi aprindi di storia di Noe ku diluviu.

5. (a) Ke ku Noe fasi antis di diluviu? (Ebreus 11:7; 1 Pedru 3:20) (b) Kuma ku no tarbaju di pregason aos, parsi ku tarbaju di pregason di Noe?

⁵ Oca ku Noe obi avisu di Jeova, i mostra di kuma i tene fe pa manera ki kumpu barku. (Lei Ebreus 11:7; 1 Pedru 3:20.) Di mesmu manera, kilis ku obi bon noba di Renu di Deus dibi di aplika ke ke aprindi. (At 3:​17-20) Pedru coma Noe di algin ku ta “konta jinti kuma e dibi di yanda diritu”. (2 Ped 2:5) Ma suma ku no falaba na studu ku pasa, no ka sibi si kontra Noe tenta prega tudu jintis ku staba na Tera antis di diluviu. Aos, no ta sforsa pa prega jintis na tudu mundu, i no ta pega tesu na fasil. Ma i ka mporta sforsu ku no fasi, no ka na konsigi prega tudu jintis antis di fin ciga. Pabia ku no ka na konsigi?

6-7. Pabia ku no pudi fala di kuma no ka na konsigi prega tudu jintis antis di fin ciga?

⁶ Pensa na ke ku Jesus fala aserka di no tarbaju di pregason. I fala di kuma, bon noba na pregadu “na tudu mundu pa sedu tustumuñu pa tudu rasa.” (Mat 24:14) Es profesia sta na kumpri aos mas di ki antis. No ta prega bon noba na mundu ntidu na mas di 1.000 lingua! Tambi atraves di no site jw.org, es bon noba sta dispunivel pa maioria di jintis na tudu mundu.

⁷ Ma, Jesus fala tambi si disipulus di kuma, e ka na “kaba kurkuri prasas” o prega tudu jintis antis di i bin. (Mat 10:23; 25:​31-33) Palabras di Jesus na bin kumpri na no tempu. Manga di jintis aos sta na vivi na zonas nunde ku no ka tene liberdadi di prega. Tambi manga di mininus ta padidu kada minutu. No ta fasi no minjor pa prega bon noba pa jintis di “tudu nason ku rasa ku lingua”. (Apok 14:6) Ma bardadi i di kuma, no ka na konsigi prega bon noba pa kada algin na Tera antis di fin ciga.

8. Kal purgunta ku no pudi fasi aserka di kuma ku Jeova na bin julga jintis na futuru? (Jubi tambi fotos.)

⁸ Basiadu na ke ku no falaba, no pudi punta: Kuma ku Jeova ku si Fiju ki kuji pa julga, na julga kilis ku ka tene oportunidadi di obi bon noba antis di garandi tribulason kumsa? (Jon 5:​19, 22, 27; At 17:31) Testu di nunde ku tema des studu tiradu fala di kuma, Jeova “ka misti pa ningin pirdi”. Ma i misti “pa tudu pudi ripindi.” (2 Ped 3:9; 1 Tim 2:4) Mesmu ku no sibi es kusas aserka di Jeova, i ka kontanu inda kuma ki na bin julga jintis ku nunka tene oportunidadi di obi bon noba. Na bardadi, i ka obrigadu kontanu kualker kusa ki fasi o ki na bin fasi.

9. Ke ku Jeova kontanu na Biblia?

⁹ Na si Palabra, Jeova kontanu alguns kusas ki na bin fasi. Pur isemplu, Biblia kontanu di kuma Jeova na bin lantanda “maus”, ku sedu, jintis ku ka tene oportunidadi di obi bon noba i muda se manera di vivi. (At 24:15; Luk 23:​42, 43) Es ta lantanda utru purguntas importanti.

10. Kal utru purguntas ku no pudi fasi?

¹⁰ Sera ki tudu jintis ku muri na garandi tribulason na kabadu ku el pa sempri sin speransa di resureison? Biblia splika di manera klaru di kuma,  Jeova ku si tropas na kaba ku kilis ku sta kontra el na Armajedon, i e ka na bin lantandadu. (2 Tes 1:​6-10) Ma ke gora di utrus, suma pur isemplu kilis ku muri duranti garandi tribulason pabia di duensa o idadi, pabia di asidenti o utru algin mata elis? (Ekl 9:11; Zak 14:13) Sera ki alguns des jintis na fasi parti di “maus” ku na bin lantandadu na nobu mundu? No ka sibi.

KE KU NO SIBI

11. Na basi di ke ku jintis na bin julgadu?

¹¹ No sibi manga di kusas ku na bin kontisi na futuru. Pur isemplu, no sibi di kuma Jesus na bin julga jintis suma karnelis o kabras, na basi di kuma ke trata si ermons unjidu. (Mat 25:40) Kilis ku julgadu suma karnelis na mostraba ja di kuma e juda unjidus ku Kristu. No sibi tambi di kuma alguns ermons di Kristu na kontinua inda sta na Tera dipus ku garandi tribulason kumsa, i e na lebadu pa seu puku tempu antis di Armajedon kumsa. Nkuantu ermons di Kristu sta inda na Tera, i pudi sedu ki jintis di bon korson na tene oportunidadi di juda elis i juda na tarbaju ke sta na fasi. (Mat 25:​31, 32; Apok 12:17) Pabia ku es kusas i importanti?

12-13. Kuma ku alguns talves na reaẑi ora ku “Garandi Babilonia” kabadu ku el? (Jubi tambi fotos.)

¹² Mesmu dipus ku garandi tribulason kumsa, i pusivel ki alguns ku oja “Garandi Babilonia” kabadu ku el, na lembra di kuma pa manga di anus Tustumuñas di Jeova falaba di kuma es na kontisi. Sera ki alguns ku oja es kusas ku kontisi na mostra fe na Jeova? — Apok 17:5; Eze 33:33.

¹³ Si kila kontisi, i na parsi ku ke ku kontisi na Ejitu na tempu di Moisés. Lembra di kuma “manga di jinti di utru rasa” junta ku israelitas oca e na sai di Ejitu. (Sai 12:38) Alguns des jintis talves kumsa ku mostra fe, oca ke  oja avisu di Moisés aserka di des praga kumpri. Si mesmu kusa kontisi dipus ku Garandi Babilonia kabadu ku el, sera ki no na fika mal pa manera ku jintis na junta ku nos puku tempu antis di Armajedon kumsa? Klaru ki nau! No misti parsi no Pape ku sta na seu, ku sedu, “Deus ku ta ten miserikordia, ku ta sinti pena, ku ta tarda pa paña raiba, ku ta mostra garandi amor, ku ta sedu bardadi”. b — Sai 34:6.

14-15. Sera ki oportunidadi di vivi pa sempri dipindi di kal mumentu ku un algin muri o nunde ki mora? Bu pudi splika. (Salmu 33:​4, 5)

¹⁴ Utrora no pudi obi un algin na fala: “I minjor si algin di ña familia muri antis di garandi tribulason kumsa, asin i na tene speransa di bin lantandadu.” I pa bon motivu ku algin pudi fala es kusas. Ma, oportunidadi di vivi pa sempri ka dipindi di kal mumentu ku un algin muri. Jeova i un Juis perfeitu. Si disisons sempri i justu. (Lei Salmu 33:​4, 5.) No pudi tene konfiansa di kuma, “Juis di tudu mundu” na fasi ke ki diritu. — Kum 18:25.

¹⁵ Tambi i fasi sintidu fala di kuma, oportunidadi di vivi pa sempri ka dipindi di nunde ku un algin mora. Jeova nunka ka na ciga di julga milyons di jintis suma “kabras” so pabia di kuma, e mora na teras nunde ku nunka e tene oportunidadi di seta mensaẑen di  Renu. (Mat 25:46) Juis justu di tudu mundu mas ta preokupa ku es jintis di ki anos. No ka sibi kuma ku Jeova na bin pui pa kusas kontisi na garandi tribulason. Talves alguns des jintis na tene oportunidadi di aprindi aserka di Jeova, mostra fe nel i sta na si ladu ora ki santifika si nomi dianti di tudu nasons. — Eze 38:16.

16. Ke ku no sibi aserka di Jeova? (Jubi tambi diseñu.)

¹⁶ Na no studu di Biblia, no sibi di kuma Jeova da balur garandi pa vida di pekaduris. I da vida di si Fiju pa anos tudu no tene oportunidadi di vivi pa sempri. (Jon 3:16) Anos tudu no sinti di kuma Jeova amanu ciu. (Isa 49:15) I kunsi nomi di kada un di nos. Na bardadi, i kunsi kada un di nos diritu, mesmu si no muri, i pudi kumpunu mas suma ku no seduba, i ribanta tudu lembransas ku no teneba! (Mat 10:​29-31) Sin duvida, no tene bon motivu di konfia di kuma, no Pape ku sta na seu ku amanu na julga kada algin di manera perfeitu, pabia el i jiru, i justu i ta mostra miserikordia. — Tiagu 2:13.

17. Ke ku no na bin fala del na studu ku na bin?

¹⁷ Es nobu ntindimentu na punu prega ku mas urẑensia. Pabia ku no pudi fala kila? Ke ku na motivanu kontinua prega sin bagana mon? Respostas des purguntas na bin faladu del na studu ku na bin.