19 YACHAQANA
22 TAKIY Diospa Gobiernon sayachisqaña
¿Imatá yachanchej imaynatachus Jehová runasta juzgananmanta?
“Jehová Diosqa [...] mana munanchu ni pi chinkachisqa kananta” (2 PED. 3:9).
TEMA
Mana iskayrayanchejchu Jehová aswan qhepaman runasta cheqan justicianman jina juzgananmanta.
1. ¿Imaraykutaj ninchej kay tiemponchej jina mana jaykʼajpis kasqanta?
KAY tiemponchej jinaqa manaraj jaykʼajpis karqachu. Kay tiempopeqa sapa día rikushanchej imaynatachus Bibliaj profeciasnin juntʼakushasqanta. Noqanchejqa rikushanchej “norte ladomanta” reywan “sur ladomanta” reywan chʼajwapi kashasqankuta kay mundota makinkupi japʼinankupaj (Dan. 11:40, sutʼinchaynin). Chantapis Diospa Gobiernonmanta sumaj willaykunaqa ni jaykʼaj jina willakushan, may chhika runastaj Jehovata sirviyta ajllakushanku (Isa. 60:22; Mat. 24:14). Chantapis Diosmanta ashkha cheqa yachachiykunata mikhunata jina tiemponpi japʼishanchej (Mat. 24:45-47).
2. ¿Imamantataj mana iskayrayananchejchu tiyan, chanta imatataj mana qonqananchejchu tiyan?
2 Jehovaqa imaschus tumpamantawan kananta aswan sumajta entiendenapaj yanapashallawanchejpuni (Pro. 4:18; Dan. 2:28). Manchay ñakʼariy tiempo niraj qallarishajtenqa, imastachá yachayta necesitanchej chay imasta yachasun. Chaytaj yanapawasun Diosta kasukunallapajpuni, ujchasqallapunitaj kanapaj. Chaymantaqa mana iskayrayanchejchu. Jinapis kayta ama qonqanachu: Imaschus aswan qhepaman kananmantaqa wakin imasta mana yachanchejchu. Kay yachaqanapeqa ñaupajta yachakusun imaraykuchus wakin imasta manaña ñaupajta jinachu entiendesqanchejta. Chantá yachakusunchej imaschus aswan qhepaman kananmanta imastachus yachasqanchejta, imatachus Jehová Dios ruwanantapis.
¿IMATÁ MANA YACHANCHEJCHU?
3. Manchay ñakʼariy tiempo qallarisqantawan, ¿runaswan ima kanantataj nej kanchej, chanta imaraykutaj ajinata yuyaj kanchej?
3 Ñaupajtaqa nej kanchej manchay ñakʼariy tiempo qallarisqantawan, runasqa manaña Jehovapi creeyta atinankuta, nitaj Armagedonpipis salvakuyta atinankuta. Chayta nej kanchej imachus Jatun Parapi pasarqa chay kikin imasllataj aswan qhepamanpis pasananta yuyaspa. Nej kanchej, imaynatachus Jehová arcaj punkunta wisqʼaykorqa manaraj Jatun Para qallarishajtin, ajinallatataj manchay ñakʼariy tiempo qallarishajtinpis, uj punkuta jina wisqʼaykunanta manaña runas salvakuyta atinankupaj (Mat. 24:37-39).
4. ¿Imaraykutaj ninchej Noejpa tiemponpi imaschus pasasqan mana jamoj imaswanchu ninakusqanta?
4 Jinapis, ¿yuyananchejchu tiyan Jatun Para kashajtin imaschus pasarqa chay imas jamoj imaswan ninakusqanta? Mana, imaraykuchus Bibliaqa mana chaytachu nin. a Jesús nerqa: “Imaynachus Noejpa tiemponpi karqa, ajinallataj kanqa noqa kutimunay tiempopis”, nispa. Jinapis chaywanqa mana nisharqachu imaschus Jatun Para tiempopi karqa, chay imas tukuynin aswan qhepaman juntʼakunanta. Jesusqa mana nerqachu Jehová arcaj punkunta wisqʼaykusqan imawanpis ninakusqanta. Jinapis imachus Jatun Para tiempopi kasqanmanta ashkha imasta yachakusunman.
5. 1) ¿Imatá Noé ruwarqa niraj Jatun Para chayamushajtin? (Hebreos 11:7; 1 Pedro 3:20). 2) Runasman willasqanchej, ¿imapitaj Noej willasqanwan kikin?
5 Noeqa Jehová Jatun Parata apamunanta yachaytawan paypi creesqanta rikucherqa uj arcata ruwaspa (Hebreos 11:7; 1 Pedro 3:20 leey). Diospa Gobiernonmanta sumaj willaykunata uyarejkunapis, Noé jinallataj ruwasqasninkuwan rikuchinanku tiyan chaypi creesqankuta (Hech. 3:17-20). Pedroqa nerqa Noeqa “cheqan kajta willaj” kasqanta (2 Ped. 2:5). Jinapis ñaupaj yachaqanapi yachakorqanchej jina, mana yachanchejchu Noé arcata ruwashajtin kay jallpʼapi tiyakoj tukuy runasmanpuni willasqanta. Noqanchejpis jallpʼa enteropi willashanchej, maytataj kallpachakunchej chayta ruwanapaj. Ajinata kallpachakojtinchejpis, manapuni atisunmanchu tukuy runasman willayta manaraj tukukuy chayamushajtin. ¿Imajtín chayta ninchej?
6, 7. ¿Imaraykutaj mana tukuy runasman sumaj willaykunata willayta atisunchu manaraj tukukuy chayamushajtin?
6 ¿Imatataj Jesús nerqa runasman willananchejmanta? Jesús nerqa: “Diospa Gobiernonmanta sumaj willaykunapis jallpʼantinpi willakonqa tukuy naciones yachanankupaj”, nispa (Mat. 24:14). Chay nisqantaj kay tiempopi ni jaykʼaj jina juntʼakushan. Diospa Gobiernonmantaqa 1.000 kuraj parlaykunapiña willashanchej. Internetpi jw.org nisqa paginanchejpitaj mundo enteromanta ashkha runas sumaj willaykunata tariyta atinku.
7 Jesusqa discipulosninman nerqa, ‘manaraj tukuy llajtaspi willayta tukushajtinku’ chayamunanta, chaywanqa nisharqa pay chayamunankama mana tukuy runasmanpunichu willayta atinankuta (Mat. 10:23; 25:31-33). Kay tiempopipis chayqa ajinallataj. May chhika runas tiyakunku maypichus mana willajta saqewanchejchu chay lugarespi. Chantapis sapa minuto ashkha wawas nacekunku. Chayrayku mana tukuy runasmanpunichu willayta atisun manaraj tukukuy chayamushajtin. Chayta ruwanapaj mayta kallpachakojtinchejpis, manapuni atisunchu “tukuy nacionesman, tukuy ayllusman, tukuy laya parlayniyojkunaman, tukuy laya runasmanpis” sumaj willaykunata willayta (Apo. 14:6).
8. ¿Imastataj ichá tapukusunman? (Fotostawan qhawariy).
8 Chayrayku ichá tapukusunman: “¿Imataj kanqa manaraj manchay ñakʼariy tiempo chayamushajtin mana sumaj willaykunata uyariyta atejkunawan? Jehovaqa Wawanta juzgananpaj churarqa. Chayrayku, ¿imaynatá paykuna chay runasta juzganqanku?”, nispa (Juan 5:19, 22, 27; Hech. 17:31). Kay yachaqanapaj ajllasqa texto nisqanman jina, Jehovaqa “mana munanchu ni pi chinkachisqa kananta. Astawanqa munan tukuy arrepientekunankuta” (2 Ped. 3:9; 1 Tim. 2:4). Chay imasta yachajtinchejpis, Jehovaqa manaraj willawanchejchu imaynatachus juzgananta sumaj willaykunata mana uyariyta atejkunata. Paytaj mana chayta willanawanchejpunichu tiyan.
Manaraj manchay ñakʼariy tiempo chayamushajtin sumaj willaykunata mana uyariyta atejkunawan, ¿imatataj Jehová ruwanqa? (8 parrafota qhawariy). c
9. ¿Imastataj Jehová Palabranpi willawanchej?
9 Jehovaqa Palabranpi willawanchej wakin imasta ruwananta. Por ejemplo, payqa willawanchej “mana cheqan runastapis” kausarichimunanta, pikunachus mana sumaj willaykunamanta yachakuyta aterqankuchu, nitaj kausayninkuta cambiaytapis aterqankuchu chaykunata (Hech. 24:15; Luc. 23:42, 43). Chayrayku ichá waj imastawan tapukusunman.
10. ¿Imastawantaj ichá tapukusunman?
10 Manchay ñakʼariy tiempopi wañupojkuna, ¿tukuyninkuchu wiñaypaj chinkachisqa kanqanku, niñatajchu kausarimuyta atenqanku? Bibliaqa sutʼita nin pikunachus mana kausarichisqachu kanankuta. Chaykunaqa kanku Jehovawan, kamachiyninpi kaj angelesninwan Armagedonpi wañuchenqanku chaykuna. Imaraykuchus paykunaqa Diospa contranpi sayaykorqanku (2 Tes. 1:6-10). Chanta, ¿imataj kanqa manchay ñakʼariy tiempopi machitusña kasqankurayku, uj onqoyrayku chayri uj accidenterayku wañupojkunawan? Chayri, ¿imataj kanqa pikunatachus runa masillankutaj wañuchenqanku chaykunawan? (Ecl. 9:11; Zac. 14:13). ¿Paraisopi “mana cheqan” runas kausarichisqa kanqanku chaykunamantachu wakin kankuman? Chaytaqa mana yachanchejchu.
¿IMATÁ YACHANCHEJ?
11. ¿Imata ruwasqankuman jinataj Armagedonpi runas juzgasqa kanqanku?
11 Imaschus qhepaman kananmantaqa ashkha imasta yachanchej. Yachanchej Armagedonpi runasqa Cristoj hermanosninta imaynatachus yanapasqankuman jina juzgasqas kanankuta (Mat. 25:40). Pikunachus ajllasqa cristianosta, Cristotapis yanaparqanku chaykunaqa, ovejaswan ninakoj runasmanta kanqanku. Chantapis yachallanchejtaj Cristoj hermanosninmanta wakenqa manchay ñakʼariy tiempopi kay jallpʼallapiraj kanankuta, Armagedón qallarinanpaj pisi tiempo faltashajtintaj cieloman apasqa kanankuta. Chayrayku ajllasqa cristianos kay jallpʼapi kashajtinkoqa, ichapis allin sonqoyoj runasqa ima llankʼaytachus japʼisqankupi yanapayta atenqankuraj (Mat. 25:31, 32; Apo. 12:17). ¿Imaraykutaj chayta yachananchejpuni tiyan?
12, 13. Jatun Babilonia chinkachisqa kasqanta rikuspa, ¿imatataj wakin runas ichapis ruwanqanku? (Fotostawan qhawariy).
12 Manchay ñakʼariy tiempo qallarisqanmanta qhepata, ichapis wakenqa “Jatun Babilonia” chinkachisqa kasqanta rikuspa, yuyarikonqanku Jehovaj testigosnin ashkha watasta chay pasananta willasqankuta. Chayta rikojkunamanta wakin, ¿Jehovapi creenqankuchu? (Apo. 17:5; Eze. 33:33).
13 Moisespa tiemponpi imaschus pasasqanpi tʼukurina: Israelitas Egiptomanta llojsishajtinku “paykunawan khuska rillarqankutaj waj llajtayoj ashkha runaspis”. Paykunamanta wakenqa ichapis Jehovapi creeyta qallarerqanku Moisés willasqanman jina chunka castigos kasqanta rikusparaj (Éxo. 12:38). Jatun Babilonia chinkachisqa kasqanmanta qhepata ajinallataj pasanqa chay, ¿yuyasunchu tukukuy qayllitallataña runas noqanchejman ujchakamusqanku mana allinchu kasqanta? Ni imarayku. Noqanchejqa Tatanchej Jehová jina ruwayta munanchej, payqa “khuyakoj Dios, kʼacha sonqoyoj, pacienciayoj, may jina munakuyniyoj, nisqantapis juntʼanpuni” (Éxo. 34:6). b
Wakenqa “Jatun Babilonia” chinkachisqa kasqanta rikuspa, yuyarikonqanku Jehovaj testigosnin ashkha watasta chay pasananta willasqankuta (12, 13 parrafosta qhawariy). d
14, 15. ¿Imaraykutaj ninchej uj runa wiñay kausayta japʼinanqa mana maykʼajchus wañupusqanmantachu, nitaj maypichus tiyakusqanmantachu kasqanta? (Salmo 33:4, 5).
14 Wakin hermanosqa, Jehovata mana sirvej familiankumanta niyta yachanku: “Manaraj manchay ñakʼariy tiempo chayamushajtillanpis wañupunman, ajinamanta kausarimuyta atinman”, nispa. Chaytaqa ninku familiankoj allinninta munaspa. Jinapis uj runa wiñay kausayta japʼinanqa mana maykʼajchus wañupusqanmantachu kashan. Jehovaqa cheqan Juez, tukuy ima ajllasqantaj cheqanpuni, tukuypa allinninpajtaj (Salmo 33:4, 5 leey). Noqanchejqa mana iskayrayanchejchu “jallpʼantinmanta Juez” cheqan kajtapuni ruwananmanta (Gén. 18:25).
15 Uj runa wiñay kausayta japʼinanqa manallataj maypichus tiyakusqanmantachu kashan. Ashkha runasqa Diospa Gobiernonmanta ni jaykʼaj willakorqachu chay lugarespi tiyakunku. Jehovataj ni jaykʼajpis ninmanchu paykuna chay lugarespi tiyakusqankuraykulla ‘cabraswan’ ninakusqankuta (Mat. 25:46). Noqanchejpuni chay runasta yanapariyta munanchej chay, jallpʼantinmanta Juezqa astawanrajchá paykunata yanapayta munan. Noqanchejqa mana yachanchejchu imaynatachus Jehová manchay ñakʼariy tiempopi chay imasta ruwananta. Chay runasmanta wakenqa, Jehová tukuy nacionespa ñaupaqenpi sutinta jatunchajtin, ichapis payta rejsiyta, paypi creeytataj atenqankuraj (Eze. 38:16).
Manchay ñakʼariy tiempo qallarisqanmanta qhepata, ¿wakin runas Jehovapi creenqankuchu?
16. ¿Imastataj Jehová Diosninchejmanta yachanchej? (Dibujotawan qhawariy).
16 Bibliapi yachakunchej Jehová kausayta may jatunpaj qhawasqanta. Payqa Wawanta qorqa tukuyninchej wiñay kausayta japʼiyta atinanchejpaj (Juan 3:16). Kausayninchejpeqa tukuypis repararqanchej Jehová munakuwasqanchejta, khuyakuwasqanchejta ima (Isa. 49:15). Payqa sapa ujta sutinchejmanta rejsiwanchej. Jehovaqa may sumajta rejsiwasqanchejrayku, wañupojtinchejpis watejmanta ruwayta atiwanchej, imaynachus karqanchej chay jinata, ni imitanchej faltajta. Chantapis payqa tukuy yuyayninchejta kutichipuyta atiwanchej (Mat. 10:29-31). Sutʼita yachanchej Tatanchej Jehovaqa sapa runata maychus kajman jinapuni juzgananta. Imaraykuchus payqa yachayniyoj, cheqan, khuyakuyniyojtaj (Sant. 2:13).
Sutʼita yachanchej Tatanchej Jehovaqa sapa runata maychus kajman jinapuni juzgananta. Imaraykuchus payqa yachayniyoj, cheqan, khuyakuyniyojtaj (16 parrafota qhawariy).
17. ¿Ima tapuykunamantaj qhepan yachaqanapi kutichisun?
17 Chay imasta aswan sumajta yachasqanchejrayku, reparanchej ni jaykʼaj jina usqhayllata willamuna kasqanta. ¿Imaraykutaj chayta ninchej? Chanta, ¿imataj yanapawasun mana saykʼuspa sumaj willaykunata willanallapajpuni? Qhepan yachaqanapi chay tapuykunaman kutichisun.
76 TAKIY ¿Willamuspa kusirikunkichu?
a ¿Imaraykutaj manaña ninchejchu Bibliaj wakin nisqasnin jamoj imaswan ninakusqanta? Chayta yachanaykipaj “Entiendenapaj jinapuni Jehová yachachin” nisqa yachaqanata leeriy. Chayqa kashan kay revistapi: Torremanta Qhawaj 15 de marzo de 2015, páginas 7-11.
b Jatun Babilonia chinkachisqa kasqantawan, Magogmanta Gogqa Diospa llajtanwan maqanakuspa Diospa tukuy kamachisninta pruebaman churanqa. Jatun Babilonia chinkachisqa kasqanmantaña pichus Jehovata yupaychayta ajllajpis, pruebaman churasqallataj kanqa.
c FOTO: Kinsa fotos rikuchishan imaraykuchus mana tukuy runasmanpunichu willayta atinanchejta. 1) Uj warmeqa tiyakun maypichus cristiana religión may pisilla, willaytaj mana atikullanchu chaypi. 2) Uj qhariwarmi tiyakun maypichus autoridades mana willajta saqewanchejchu, nitaj chay lugarpi willayta atikullanchu chaypi. 3) Uj runa may karu lugarpi tiyakun, maymanchus mana chayayta atikunchu chaypi.
d FOTO: Cheqa kajmanta karunchakoj sipas yuyarikushan “Jatun Babilonia” chinkachisqa kananmanta imatachus yachakusqanta. Payqa Jehovata yupaychayta munaspa testigo tatasninpaman kutipushan. Pillapis Jehovaman kutinponqa chayqa, Tatanchej Jehová jina payta khuyakuyta munanchej, kutinpuyta ajllasqanmantataj kusikuyta munanchej.
