19 CAJ YACHACHICUY
22 CAJ CANCIÓN ¡Diospa Gobiernun shamuchun!
Jatun nacay wichancho, ¿imanotaj Jehová runacunata juzganga?
‘[Jehová] manami munantsu pipis wanunanta’ (2 PED. 3:9).
¿IMATAJ YACHACUSHUN?
Jatun nacay wichancho ricacämunga Jehová alita ruraj Dios cashganta runacunata juzgaptin.
1. ¿Imanirtaj ninchi mana gonganapaj wichancho cawaycanchi?
¡MANA gonganapaj wichancho cawaycanchi! Lapanchimi ricaycanchi Bibliacho caycaj profeciacuna imano cumplicuycashganta. ‘Norte caj rey’ y ‘sur caj reypis’ imaycacunata rurar luchaycan pï cay munduta controlananpaj (Dan. 11:40). Jina unaypitapis masraj canan wichan Diospa Gobiernunpita may chaychopis yachachicuycanchi y achca runacuna Diospa sirvejnincunaman ticrapäcuycan (Is. 60:22; Mat. 24:14). Y tiempulancho imayca yachachicuycunata chasquiycanchi Jehovata aduranapaj (Mat. 24:45-47).
2. ¿Imapitataj seguro caycanchi, y imatataj mana musyanchichu?
2 Jehovaga jinala yanapaycämanchi shumaj tantianapaj ichiclacho imacunata pasananpaj (Prov. 4:18; Dan. 2:28). Chaymi seguro caycanchi jatun nacay galaycuptin, musyashunmi imacunata ruranapaj hermanunchicunawan juc yarpayla Jehovata sirvir caycänapaj. Ichanga lapantaga manami musyanchichu chay wichancho imacunata pasananpaj. Cay yachachicuycho ricashun imacunata jucnopana tantianchi shamoj watacunacho pasananpaj cajcunata. Nircur ricashun imacunata musyanchi pasananpaj y runacunapis imano juzgashga cananpaj.
IMACUNATA MANA MUSYANCHICHU
3. ¿Imatataj unaycho yarpashganchi runacunata pasananpaj jatun nacay galaycuptin? ¿Imanirtaj chayno yarpashganchi?
3 Unaycho nishcanchi jatun nacay galaycuptin pipis Jehovapita yachacuyta y salvacuytapis manana puedinanpaj cajta. ¿Imanirtaj chayno yarpashganchi? Unaycho tantiashcanchi Diluviucho pasashganno jatun nacay wichanchopis pasananpaj. Jehová arcapa puncunta wichgaptin pipis salvacurgannachu y jatun nacay galaycuptinpis chaynola pasananpaj yarpashganchi (Mat. 24:37-39).
4. ¿Nishwanchuraj Diluviucho pasashganno jatun nacay wichanchopis pasananpaj?
4 Chauraga, ¿nishwanchuraj Diluviucho pasashganno jatun nacay wichanchopis pasananpaj? a Manami, Bibliaga chayta mana wilacunchu. Jesusga parlargan cutimunan tiempo imano cananpaj, y chayta tincuchergan Noé cawashgan wichanwan. Pero chaywanga manami niycarganchu Diluviucho pasashganno shamoj watacunachopis chaynola pasananpaj. Ricashun imata yachacunchi Diluvio cashganpita.
5. 1) ¿Imatataj Noé rurargan Diluvio manaraj captin? (Hebreos 11:7; 1 Pedro 3:20). 2) Noé predicashganga, ¿imanotaj tincun canan wichan predicashganchiwan?
5 Jehová Noeta wilargan Diluviuta apamunanpaj, y payga Diosman yäracur juc arcata sharcachergan (leiriy Hebreos 11:7; 1 Pedro 3:20). Canan wichanpis runacuna Diospa Gobiernunpita yachacurga, ruraynincunacho ricacämunman Jehovaman yäracushganta (Hech. 3:17-20). Pedro nergan alita rurananpaj wilacoj Noé cashganta (2 Ped. 2:5). Pero guepa yachachicuycho yachacushganchinopis, manami musyanchichu Pachacho caycaj lapan runacunata Noé wilapashganta Diluvio cananpaj. Noganchipis canan wichan calpachacunchi ganas ganaswan runacunata Diospita yachachicunapaj. Pero imaycata ruraptinchipis, manami puedinchichu lapan runacunaman chayanapaj Armagedón manaraj galaycuptin. ¿Imanirtaj chayta ninchi?
6, 7. ¿Imanirtaj Armagedón manaraj chayamuptin lapan runacunata yachachiyta puedishunchu?
6 Ricashun imata Jesús nergan canan wichan predicaciunninchipita. Payga nergan Diospa ali wilacuynincuna “maytsay nacionkunachöpis” wilacushga cananpaj (Mat. 24:14). Y chayga canan wichan cumplicuycan. Diospa ali wilacuynincuna 1.000 rimaycunapitapis maschoraj yachachicuycanchi y jw.org paginanchichopis imayca ali yachachicuycuna caycan pï may runacunapaj.
7 Jina Jesusga discipuluncunata nergan lapan pachacho runacunata yachachicur “manaraq ushaptikimi Runapa Tsurin kutimunqa”. Chaywanga niycargan ushacay tiempo chayamuptin, lapan runacunata Diospita yachachiyta mana ushanapaj (Mat. 10:23; 25:31-33). Canan wichan aypala runacuna tiyashgan marcacunacho Diospita yachachicuyta puedinchichu. Jina cada junajcuna chaychicaj wamracunapis yuriycan. Chaymi imaycata ruraptinchipis ‘maytsay nación runakunata, maytsay trïbu runakunata, ima idiömata rimaqkunata y maytsaycho taq runakunatapis’ Diospita yachachiyta manami puedishunchu Armagedón manaraj chayamuptin (Apoc. 14:6).
8. ¿Imatataj öraga tapucunchi? (Fotucunatapis ricay).
8 Capaz öraga cayno tapucunchi: “¿Imatataj pasanga Diospa ali wilacuyninta mana wiyashga cajcunata jatun nacay manaraj galaycuptin? ¿Imataj Jehová y Wamran Jesuspis paycunata ruranga?” (Juan 5:19, 22, 27; Hech. 17:31). Cay yachachicuypa acracämushga textuga nin Jehová ‘manami munantsu pipis wanunanta’. Sinoga “shuyaraykan runakuna jutsankunata kacharir payta cäsukärinanta” (2 Ped. 3:9; 1 Tim. 2:4). Jehovaga manami nimashganchirächu imano juzgananpaj chay runacunata. Payga musyanmi imata rurananpaj y manami wilamänanchirächu.
¿Imataj Jehová ruranga payta mana reguejcunawan jatun nacay manaraj chayamuptin? (8 caj parrafuta ricay). c
9. ¿Imataj Jehová Palabrancho wilamashcanchi?
9 Jehová Palabrancho wilamashcanchi imacunata rurananpaj. Bibliaga nimanchi mana alita ruraj runacuna cawarimunanpaj, paycunaga wanurgan Jehovapita mana yachacur ni cäsucurpis (Hech. 24:15; Luc. 23:42, 43). Chaymi chaypita canan mastaraj yachacushun.
10. ¿Ima mastataj öraga tapucushwan?
10 ¿Imataj pasanga jatun nacay wichancho pipis wanuptin? ¿Nishwanchuraj paycuna manana cawarimunganachu? Bibliaga claro yachachicun Armagedón guerracho Jehová ushacächishgan runacuna mana cawarimunanpaj, paycunaga quiquinpa voluntäninpita Jehovapa contrancho churacargan (2 Tes. 1:6-10). Y, ¿ima nishwantaj jatun nacay wichancho desgraciaraycur o imaraycurpis pipis wanuptin? (Ecl. 9:11; Zac. 14:13). Chay wichan wanushgacunapita, ¿pilapis cawarimungachuraj mana alita ruraj runacuna cawarimushgan wichan? Manami musyanchichu.
IMACUNATA MUSYANCHINA
11. ¿Imanotaj Jesús juzganga runacunata Armagedón wichancho?
11 Caycunata musyanchi pasananpaj shamoj watacunacho. Armagedón manaraj galaycuptin Jesús runacunata juzganga cielupaj acrashga cajcunata yanapashganman tupu (Mat. 25:40). Jesusta y cielupaj acrashgacunata yanapajcunaga uyshanomi ricashga canga. Waquin cielupaj acrashgacunaga Pachachoraj caycanga jatun nacay wichancho y Armagedón galaycunanpäna caycaptin cieluman aywacärenga. Paycuna cay Pachachoraj caycaptin capaz waquin ali shonguyoj runacuna yanapar galaycärenga y waquincunatapis yanapangachi Diosta sirvinanpaj (Mat. 25:31, 32; Apoc. 12:17). Caycunata musyarga, ¿imanotaj yanapämanchi?
12, 13. “Jatuncaray Babilonia” ushacashgana cashganta ricar, ¿imatataj waquincuna capaz ruranga?
12 Jatun nacay galaycushgana captinpis, mana ali religiuncuna ushacächishga cashganta ricar waquincuna yarpapäcungachi Jehovapa testiguncuna achca watacunapa chaypita wilacushganta. Chayta ricar, ¿pilapis Jehovapa sirvejninman ticrangachuraj? (Apoc. 17:5; Ezeq. 33:33).
13 Moisespa tiempuncho ima pasashganman yarpachacushun. Israelitacuna Egiptupita yargupäcuptin, “paykunawanmi mana Israel kaq runakunapis atskaq aywapäkurqan” (Éx. 12:38). Moisés wilacurgan 10 castigucuna Dios churashganta, y chaycuna cumplicuycashganta ricarchi Jehovaman yäracur galaycurgan. “Jatuncaray Babilonia” o luta religiuncuna ushacächishgana captin, pilapis chay tiempucho Jehovapa sirvejninman ticrayta munaptenga, ¿‘imanirtaj cananraj chayta rurayta munan’ nishwanchuraj? Manachi ¿au? Chaypa trucanga Taytanchi Jehovano cananchi, payga ‘kuyapäkuq y perdonakuq Diosmi. Imapitapis juklaqa mana rabyakuqmi. Pasaypa kuyakuqmi. Promitishqantaqa imaypis cumplinmi’ (Éx. 34:6). b
“Jatuncaray Babilonia” ushacächishga cashganta ricar waquincuna yarpapäcungachi Jehovapa testiguncuna achca watacunapa chaypita parlashganta. (12 y 13 parrafucunata ricay). d
14, 15. ¿Imanirtaj ninchi pipis imaycamapis cawananpäga manami cangachu imay wanushganpita o maycho tiyashganpita? (Salmo 33:4, 5).
14 Capaz wiyashganchi pilapis Diosta mana sirvej familianpita cayno nishganta: “Alipämi familiä wanucurgan jatun nacay manaraj galaycuptin mushoj Pachacho cawarimunanpaj”. Chayno waquincuna nipäcun familianta cuyarchi. Pero pipis cawarimunanpäga manami imay tiempucho wanushganpitachu canga. Jehovano juezga manami pipis canchu, pay lapan rurashgancuna y decidishganga imaypis ali caycan (leiriy Salmo 33:4, 5). Chaymi seguro caycanchi “kay patsacho taq lapan runakunapa jueznin” runacunata ali juzgananpaj (Gén. 18:25).
15 Mushoj Pachacho pipis imaycamapis cawananpäga manami maycho tiyashganpitachu canga. Achca runacuna pasaypa caru marcacunacho o Testigucunata chiquishgan marcacunacho tiyar Diospa ali wilacuyninta manami wiyashgachu, y chayraycu Jehová paycunata cabratano manami ushacächengachu (Mat. 25:46). Chay runacunaman noganchi yarpachacuycarga, masrächi Jehová paycunapaj yarpachacun y cuyanpis. Manami musyanchichu jatun nacay wichancho lapanta ima pasananpaj. Chay tiempucho Jehová alapa munayniyoj cashganta ricar, capaz waquincuna Jehovapita yachacuyta galaycunga y yäracungapis (Ezeq. 38:16).
Jatun nacay galaycuptinna, ¿chay wichan imayca pasaycashgancunata ricar pilapis Diosta sirviyta munangachuraj?
16. ¿Imacunataj Jehovapita musyanchi? (Fotutapis ricay).
16 Bibliacho yachacushcanchi cawayninchi alapa valuryoj cashganta Jehovapaj. Chaymi Wamranta cachamurgan noganchiraycu wanunanpaj imaycamapis cawanapaj (Juan 3:16). Y caway vidanchicho ricashcanchi Jehová cuyamashpanchi noganchicunapaj imaycacunata rurashganta (Is. 49:15). Payga jucninchi jucninchitami shumaj reguimanchi. Chaymi wanuptinchipis canan wichan cashganchino lapan yarpayninchicunawan cawarachimäshun (Mat. 10:29-31). Chaura seguro cananchi Taytalanchi Jehová runacunata ali juzgananpaj, payga alapa yachaj, alita ruraj y cuyapäcoj Diosmi (Sant. 2:13).
Segurumi caycanchi Jehová runacunata ali juzgananpaj, payga alapa yachaj, alita ruraj y cuyapäcoj Diosmi. (16 caj parrafuta ricay).
17. ¿Imatataj yachacushun gatejnin yachachicuycho?
17 Caycama lapan yachacushganchipita, cuentata gocunchi alapa ali cashganta unaypitapis masraj canan calpachacunapaj runacunata yachachicunapaj. ¿Imanirtaj chayta ninchi? ¿Imaraj yanapämäshun Diospa ali wilacuyninta ganas ganaswan yachachicur siguinapaj? Gatejnin yachachicuycho cay tapucuycunapa respuestanta tarishun.
76 CAJ CANCIÓN Parlarcaycä gampita Dios
a Bibliacho caycaj waquin unay wilacuycunaga, canan wichan chayno pasananpaj tantianchinachu, maslata musyayta munarga cay yachachicuyta ricay: “A Jehová le gusta enseñar de forma sencilla”, de La Atalaya del 15 de marzo de 2015, páginas 7 a 11.
b Jatuncaray Babilonia ushacächishgana captin, Magogpita Gog Diospa marcanta atacaptin sirvejnincunaga imayca pruebacunapa pasapäcunga. Y chay wichan Diosta sirviyta munajcunapis pruebaman churashga canga.
c FOTUCUNAPA WILACUYCUNA: Cay fotucunacho quimsalata ricanchi imanir lapan runacunata yachachicuyta puedishwanchu: 1) chay warmi tiyashgan marcacho Testigucuna canchu y alapa sasami caycan predicanapaj; 2) chay matrimonio tiyashgan marcacho Testigucuna chiquishga caycan y Diospita yachachicuyta puedicanchu; 3) chay runaga pasaypa caru marcacho tiyan.
d FOTUCUNAPA WILACUYCUNA: Chay jipash warmi Jehovata sirviyta jaguirgan, y yarpaycan “Jatuncaray Babilonia” ushacächishga cananpaj yachacushganta. Chaura valurcharcun Jehovapa marcanman cutinanpaj y Testigo taytancunaman aywan. Chayno pilawanpis pasaptenga, Taytalanchi Jehovano cuyapäcoj y ali shongu cananchi paycunata ali chasquinapaj.
