19 KAQ
22 KAQ CANCION Jehovä patsätsishqan Gobiernu shamutsun
¿Nunakunata Jehovä imanö juzganampaq kaqtataq musyantsik?
“Teyta Jehoväqa manam [...] ni pï ushakänanta muna[ntsu]” (2 PËD. 3:9).
¿IMATATAQ YACHAKUSHUN?
Këchöqa yachakushun shamoq tiempuchö nunakunata Jehovä juzgarqa, alli kaqllata ruranampaq kaqtam.
1. ¿Imanö tiempuchötan kawëkantsik?
KANAN tiempuqa Biblia willakunqankuna cumplikanqan tiempuchömi kawëkantsik. Rikëkantsikmi entëru Patsachö nacionkunata dominëta munar, “norti läduchö” gobernantiwan “sur läduchö” gobernanti chikinakuyanqanta (Dan. 11:40). Entëru Patsachömi Jehovä Diosnintsikpa Gobiernumpita yachatsikuykantsik, y mëtsika millon nunakunam Jehoväpa sirweqnin tikrëkäyan (Is. 60:22; Mat. 24:14). Y Jehovä Diosnintsikqa dirigimänapaq churanqan nunakunawanmi tiempunchö yachëkätsimantsik (Mat. 24:45-47).
2. ¿Imapitataq següru këkantsik, y imatataq cuentachö katsinantsik?
2 Jehovä yanapamashqam, kananqa maslla entiendintsik shamoq tiempuchö imakuna pasakunampaq kaqta (Prov. 4:18; Dan. 2:28). Y segürum këkantsik alläpa sufrimientu chämunan tiempupaqqa, musyëta wananqantsik kaqkunataqa llapanta musyanapaq kaqta, tsënöpam alli tsarakushun. Tsënö kaptimpis, cuentachömi katsinantsik shamoq tiempuchö pasakunampaq kaqkunataqa, wakin wakintaqa mana musyanapaq kaqta. Tsëmi këchöqa yachakurishun, shamoq tiempuchö pasakunampaq kaqkunata creinqantsikkunata juknöpana entiendinqantsikta. Tsëpitanam yachakushun shamoq tiempuchö imakuna pasanampaq kaqta musyanqantsikkunata y Jehovä Diosnintsik imakunata ruranampaq kaqkunata.
MANA MUSYANQANTSIK KAQKUNA
3. ¿Alläpa sufrimientu witsanchö nunakunawan ima pasanampaq kaqtataq creirqantsik, y imanirtan tsënöqa creirqantsik?
3 Puntataqa creirqantsik alläpa sufrimientu qallëkuptin, nunakunaqa Jehoväman markäkuyta o yärakuyta manana puëdiyänampaq kaqta y Armagedonchö wanuyänampaq kaqtam. Tsënöqa creirqantsik Diluviu witsanchö pasakunqannölla alläpa sufrimientu witsampis pasakunampaq kaqta creirmi. Creirqantsikmi arcapa punkunta Jehovä wichqarkuptin nunakuna salvakuyta mana puëdiyanqannölla, alläpa sufrimientu qallëkuptimpis Jehoväman nunakuna markäkuyta o yärakuyta manana puëdiyänampaq kaqta y mana salvakuyänampaq kaqta (Mat. 24:37-39).
4. ¿Imanirtan nintsik Diluviuchö pasakunqannölla alläpa sufrimientu witsanchö mana pasakunampaq kaqta?
4 ¿Diluviuchö llapan pasakunqannötsuraq alläpa sufrimientu witsampis pasakunqa? a Bibliaqa manam tsënö kanampaq kaqta nintsu. Jesusqa Noëpa tiempuntam Nunapa Tsurin këkämunqan tiemputawan igualatsirqan. Peru manam nirqantsu Diluviuchö llapan pasakunqankuna o Jehovä arcapa punkunta wichqanqannölla, alläpa sufrimientu witsampis pasakunampaq kaqta. Tsënö kaptimpis, Diluviuchö pasakunqankunapitaqa maskunatam yachakuyta puëdintsik.
5. (1) ¿Imatataq Noë rurarqan Diluviu manaraq shamuptin? (Hebrëus 11:7; 1 Pëdru 3:20). (2) ¿Imachötan Noë yachatsikunqan noqantsik yachatsikunqantsikwan igualan?
5 Nunakunata ushakätsinampaq kaqta Jehovä willariptinqa, Noëqa Jehoväman markäkunqanta rikätsikurqan arcata rurarninmi (leyi Hebrëus 11:7; 1 Pëdru 3:20). Tsënöllam kanan witsampis, Diospa Gobiernumpita yachakoqkunaqa rurayanqankunawan markäkuyanqanta rikätsikuyänan (Hëch. 3:17-20). Apostol Pëdrum Noëpaq nirqan, “allita rurayänampaq willakoq” nuna kanqanta (2 Pëd. 2:5). Peru punta kaq yachatsikuychö yachakunqantsiknömi, musyantsiktsu Diluviu manaraq shamuptin llapan nunakunata o cada nunata Diosnintsikpita Noë parlapashqa kanqanta o mana parlapashqa kanqanta. Noqantsikpis llapan nunakunatam Diosnintsikpita parlapëta procurantsik, peru kallpachakurpis ushakë shamunan tiempupaqqa manam llapan nunakunata parlapëta puëdishuntsu. ¿Imanirtan tsënö nintsik?
6, 7. ¿Imanirtan ushakë shamunan tiempupaqqa llapan nunakunata Diospita yachatsita puëdishuntsu?
6 Jesusmi nirqan “Teyta Diospa Gobiernumpita alli noticiakunata entëru patsachö” willakunantsikpaq kaqta (Mat. 24:14). Y tsënö ninqanqa cumplikëkanmi. Mil idiömapitapis maschömi Diospa Gobiernumpita yachatsikuykantsik, y jw.org päginantsikman yëkurmi mëtsë nacionpita nunakuna alli noticiakunata musyëta puëdiyan.
7 Jesusmi qateqninkunata kënö nirqan: “Israelpa llapan markankunachö manaraq willakur ushayaptikim, Nunapa Tsurinqa chämunqa”. Tsënö nirqa, ushakë tiempu chämunampaqqa, llapan nunakunata yachatsita mana ushayänampaq kaqtam nikarqan (Mat. 10:23; 25:31-33). Kanan witsanqa, mëtsika millon nunakunam kawayan Diospita yachatsikunata autoridäkuna michäkuyanqan markakunachö. Tsënöllam, mëtsika wamrakuna cada minütu yuriyan. Tsëmi ushakë shamunan tiempupaqqa llapan nacionchö nunakunata, tukuy kasta nunakunata y tukuy idiömata parlaq nunakunata Diospita yachatsita puëdishuntsu (Apo. 14:6).
8. ¿Imataraq capaz pensashwan? (Rikäri fötukunata).
8 Tsëqa, Jehoväpita yachakuyta mana puëdishqa nunakunataqa, ¿imaraq alläpa sufrimientu witsanchö pasanqa? ¿Imanöraq Jehoväwan Jesus juzgayanqa? Yarpäshun, Jehoväqa Jesustam nunakunata juzganampaq churashqa (Juan 5:19, 22, 27; Hëch. 17:31). Jehoväqa manam munantsu ni pï nunapis wanunanta, tsëpa rantinqa, llapan nunakuna arrepentikuyänantam munan (2 Pëd. 3:9; 1 Tim. 2:4). Tsënö kaptimpis, Jehoväqa manam willamarquntsiktsu tsë nunakunata imanö juzganampaq kaqta. Y rasumpa kaqchöqa, pëmi imanö juzganampaq kaqtapis musyakun y manam willamänantsikraqtsu.
¿Imataraq Jehoväqa ruranqa alläpa sufrimientu manaraq qallaptin alli noticiakunata mana wiyakushqa nunakunawan? (Leyiri 8 kaq pärrafuta). c
9. ¿Imatataq Palabranchö Jehovä willamarquntsik?
9 Teyta Jehoväqa Palabran Bibliachömi imakunata ruramunampaq kaqta wakin wakinta willamarquntsik. Këllaman pensarishun: mana allita ruraq nunakunata kawaritsimunampaq kaqtam nimarquntsik. Mana alli ruraq nunakunaqa kayan Jehoväpita mana yachakushqa karnin cambiukunata rurëta mana puëdishqa kaqkunam (Hëch. 24:15; Lüc. 23:42, 43). Tsënö kaptinqa, capazchi maskunaman yarpachakushwan.
10. ¿Imakunamanraq capaz pensashwan?
10 Armagedonchö Jehoväwan ejercitun ushakätsinqan nunakunaqa mananam kawariyämunqanatsu, tsëtaqa Bibliachö clärum nin. ¿Imanirtan kawariyämunqatsu? Jehoväpa contran churakashqa karninmi (2 Tes. 1:6-10). Peru Alläpa sufrimientu witsanchö wanoq nunakunawanqa, ¿imaraq pasanqa? Tsë witsanchö awkinyar, chakwanyar, qeshyawan o accidentiwan wanoqkuna o nuna mayinkuna wanutsiyanqan nunakunaqa, ¿kawariyämunqatsuraq? (Ecl. 9:11; Zac. 14:13). Tsë wanoq nunakunapitaqa, ¿manatsuraq jukllëllapis kawarimunqa? Manam tsëtaqa musyantsiktsu.
MUSYANQANTSIK KAQKUNA
11. Nunakunata Jesus juzgarqa, ¿imataraq cuentaman churanqa?
11 Shamoq tiempuchö pasakunampaq kaqkunataqa wakin wakintaqa clärum musyantsik. Këllaman pensarishun: nunakunata Cristu juzgarqa, ¿imataraq cuentaman churanqa? Cristupa wawqinkunata yanapashqa o mana yanapashqa kayanqantam (Mat. 25:40). Cristupa wawqinkunata yanapashqa kaqkunataqa üshatanömi rikanqa. Tsënöllam musyantsik alläpa sufrimientu tiempuqa, Cristupa wakin wawqinkuna kë Patsallachöraq kayänampaq kaqta y Armagedon qallananna këkaptin ciëluta ëwakuyänampaq kaqta. Tsëmi Cristupa wawqinkuna kë Patsallachöraq këkäyaptinqa, alli shonquyoq nunakunaqa pëkuna rurayanqanta yanapëta puëdiyanqaraq (Mat. 25:31, 32; Apo. 12:17). ¿Imanötan tsëta musyanqantsik yanapamantsik?
12, 13. Alläpa Puëdeq Babiloniata ushakätsiyaqta rikarqa, ¿imataraq wakin nunakuna decidita puëdiyanqa? (Rikäri fötukunata).
12 Alläpa sufrimientu witsanchö Alläpa Puëdeq Babiloniata ushakätsiyaqta rikarninqa, capazchi wakin nunakunaqa yarpäyanqa Jehoväpa testïgunkuna tsë pasakunampaq kaqta unëpitana willakushqa kayanqanta. Tsëta rikarqa, ¿manatsuraq wakinllapis Jehoväman creikuyanqa? (Apo. 17:5; Ezeq. 33:33).
13 Këman pensarishun: israelïtakuna Egiptupita yarqayämuptinqa, mana israelïta kaqkunapis pëkunawan juntum mëtsikaq yarqayämurqan (Ex. 12:38). Capazchi tsë nunakunaqa chunka castïgukunapaq Moises willakunqan cumplikaqta rikarnin Jehoväman creikuyarqan. Alläpa Puëdeq Babiloniata ushakätsiyaqta rikar Jehoväman creikur noqantsikman mëtsikaq nunakuna juntakäyämuptinqa, ¿mana allipatsuraq rikäshun? ¡Manam tsëta rurëta munantsiktsu! Noqantsikqa Teytantsik Jehovänömi ankupäkoq, llakipäkoq, pacienciakoq, alläpa kuyakoq y rasumpa kaqllata parlakoq këta munantsik (Ex. 34:6). b
Capazchi ‘Alläpa Puëdeq Babiloniata’ ushakätsiyaqta rikarnin wakin nunakunaqa yarpäyanqa Jehoväpa testïgunkuna tsë pasakunampaq kaqta unëpitana willakushqa kayanqanta. (Leyiri 12 y 13 kaq pärrafukunata). d
14, 15. ¿Imanirtan nintsik juk nuna imëyaqpis kawakuyta puëdinampaqqa imë wanunqampita ni mëchö kawanqampita mana kanqanta? (Salmus 33:4, 5).
14 Capazchi Jehoväta mana sirweq wanushqa familiankunapaq kënö niyaqta wiyarquntsik: “Alläpa sufrimientu witsan manaraq chämuptin wanukunqanqa allim kashqa, tsënöpam kawarimuyta puëdinqa”. Tsënö niyanqan allinö kaptimpis, imëyaqpis kawakuytaqa puëdiyanqa manam imë wanuyanqampitatsu, sinöqa kikin Jehovä juzgarnin alli nunatanö rikanqampitam. Pëqa alli kaq Juezmi, y decidinqankunaqa imëpis allillam kanqa (leyi Salmus 33:4, 5). Segürum këkantsik llapan nunakunapa Jueznin Jehoväqa imëpis alli kaqllata ruranampaq kaqta (Gen. 18:25).
15 Tsënöllam juk nuna imëyaqpis kawakunampaqqa, manam mëchö kawanqampitatsu kanqa. Kanan witsanqa, mëtsika millon nunakunam alläpa karu markakunachö kawayan y manam Jehovä Diospita yachakuyta puëdiyantsu. Peru Jehoväqa manam karuchö kayanqampitatsu “cabranö” kayanqanta ninqa (Mat. 25:46). Jehovä Diosqa noqantsikpitapis masmi tsë nunakuna salvakuyänanta munan. Manam musyantsiktsu alläpa sufrimientu witsanchö nunakunata juzgarnin Jehovä imata cuentachö katsinampaq kaqta. Jutin limpiu kanqanta Diosnintsik rikätsikunqan tiempuchöqa, capazchi tsë nunakuna Jehoväpita yachakuyanqa y pëman markäkuyta o yärakuyta puëdiyanqa (Ezeq. 38:16).
Alläpa sufrimientu qallëkuptinqa, ¿manatsuraq pasakunqankunata rikarnin wakinllapis Jehoväman creikuyanqa?
16. ¿Jehovä imanö kanqantataq musyantsik? (Rikäri dibüjukunata).
16 Bibliata leyirninmi entiendirquntsik Jehovä Diosnintsikqa nunakunapa vïdankunata alläpa valoranqanta. Y imëyaqpis kawakunata munarmi, hasta Tsurin wanunantapis permitirqan (Juan 3:16). Y kawënintsikchöqa mëraq rikarquntsik mana allikunapa pasanqantsik hörakuna Jehovä llakipämanqantsikta y shumaq cuidamanqantsikta (Is. 49:15). Jehovä Diosnintsikqa cada ünutam jutintsikpa reqimantsik. Y manam tsëllatsu, imanö kanqantsiktaqa llapantam alli musyan, tsëmi kawatsimarnintsikqa punta kanqantsiktanölla kawaritsimäshun (Mat. 10:29-31). Jehovä Diosnintsikqa alläpa yachaq, alli kaqta ruraq y llakipäkoq Diosmi, tsëmi nunakunata juzganqan höraqa alli kaqllata ruranqa (Sant. 2:13).
Jehovä Diosnintsikqa alläpa yachaq, alli kaqta ruraq y llakipäkoq Diosmi; tsëmi nunakunata juzganqan höraqa alli kaqllata ruranqa. (Leyiri 16 kaq pärrafuta).
17. ¿Imatataq qateqnin kaqchö yachakushun?
17 Këta yachakurirqa, ¿imatataq maslla entiendirintsik? Yachatsikunantsik alläpa urgenti kanqantam. ¿Imanirtan tsënö nintsik? Y ¿imatan yanapamäshun yachatsikurnin sïguinapaq? Tsëtam qateqnin kaqchö yachakurishun.
76 KAQ CANCION ¿Kushishqaku shonqïki këkan?
a Leyiri 2015 wata 15 de marzuchö yarqamoq Täpakoq revistapa 3 a 8 kaq päginankunachö “Jehoväqa entiendïllapaqmi yachatsimantsik” neqta. Tsëchömi entienditsikun unë tiempuchö wakin pasakunqankunaqa shamoq tiempuchö pasakunampaq kaqta mana rikätsikunqanta.
b Alläpa Puëdeq Babilonia ushakäriptinqa, Magogchö këkaq Gog atacaptinmi Diospa sirweqninkunaqa pruëbapa pasayanqa. Tsënöllam Alläpa Puëdeq Babilonia ushakäriptinraq Diosman creikoqkunapis tsë pruëbapa pasayanqa.
c FÖTUKUNATA MASLLA ENTIENDINAPAQ: Llapan nacionkunachö y llapan nunakunata Diospita yachatsita mana puëdinqantsikta rikätsikoq fötukuna: 1) juk warmim kawakun Jesusman mana creeq y Diospita yachatsikunan alläpa peligrösu nacionchö; 2) juk nunam warminwan kawakuyan polïtica asuntu problëmakuna kaptin Diospita yachatsikunan alläpa peligrösu nacionchö; 3) juk nunam alläpa karu sitiuchö kawakun.
d FÖTUKUNATA MASLLA ENTIENDINAPAQ: Juk shipashlla warmim Alläpa Puëdeq Babiloniapaq Bibliachö yachakunqanta yarpëkan. Tsëpitam, Testïgu mamanman y teytanman kutikun. Tsënö kutimoqta rikarqa, noqantsikpis Teytantsik Jehovänömi llakipäkoq y kuyakoq kanantsik y kutiyämunqampitam kushikunantsik.
