1. ¿Imamantataj cushilla sintirinchij?

 CUNAN punllacunapi achca profeciacuna pajtaricujta ricushpaca cushillami sintirinchij. Por ejemplo, “ura lado llajtata jatun mandaj”, “janaj lado llajtata jatun mandajhuan” mundo enterota mandasha nishpa ima shina paicunapura macanacucushcatami ricunchij (Daniel 11:40). Shinallataj cunan punllacunapica tucui muyundij allpapimi huillacunchij. Chaimantami huaranga huaranga gentecunaca Jehová Diosta sirvinata agllashcacuna (Isaías 60:22; Mateo 24:14). Ashtahuanpish minishtishca tiempopimi Jehová Diosmanta shamuj achca yachaicunata chasquicunchij (Mateo 24:​45-47).

2. a) ¿Imatataj tucui shunguhuan crinchij? b) ¿Shamuj punllacunapi ima tucunamantaca tucuitachu alli yachanchij?

² Jehová Diosca shamuj punllacunapi ima tucunataca asha ashami intindichicun (Proverbios 4:18; Daniel 2:28). ¿Jatun llaqui punllacuna callarijpica ñucanchij huauqui panicunahuan Jehová Diosta tandalla sirvishpa catingapaj imata ruranata yachashunchu? Ari. Chaitaca tucui shunguhuanmi crinchij. Shinapish shamuj punllacunapi ima tucunataca cunan punllacunapica manaraj tucuita yachanchijchu. Cunancamaca shamuj punllacunamanta parlaj huaquin profeciacuna ima nisha nishcata alli intindishcatami yuyaj carcanchij. Pero cai yachaipica chai profeciacuna ima shina pajtarinata ashtahuan alli intindina cashcatami yachashun. Chai qꞌuipaca shamuj punllacunapi ima tucunamanta imata yachashcata, shinallataj Jehová Dios shamuj punllacunapi imata ruranatami yachashun.

¿IMATATAJ MANA YACHANCHIJ?

3. a) ¿Imatataj yuyaj carcanchij? b) ¿Jatun llaqui punllacuna callarijpi millai gentecuna ña mana quishpiri tucunataca imamantataj yuyaj carcanchij?

³ Ñaupaca “jatun llaqui punllacuna callarijpica gentecunaca Jehová Diospi feta churashpa quishpirina oportunidadtaca ña  mana charingacunachu” nishpami yuyaj carcanchij. ¿Imamantataj chashna yuyaj carcanchij? Ñucanchijca “ima shinami Jehová Diosca Noepaj punllacunapi millai gentecunata tucuchirca, chashnallatajmi shamuj punllacunapica millai gentecunataca tucuchinga” nishpami yuyaj carcanchij. Por ejemplo, Jehová Dios arcapaj pungucunata huichcajpica gentecunaca quishpirina oportunidadtaca ña mana charircacunachu. Shamuj punllacunapi chashnallataj tucuna cashcata intindishcamantami “jatun llaqui punllacuna callarijpica gentecunaca quishpirina oportunidadtaca ña mana charingacunachu” nishpa yuyaj carcanchij (Mateo 24:​37-39).

4. ¿Noepaj punllacunapi tucui imalla tucushcacunaca shamuj punllacunapi tucui imalla tucuna cashcatachu ricuchin?

⁴ Noepaj punllacunamantaca achcatami yachai tucunchij. Jesusca: “Ñuca tigramuna punllacunaca Noepaj punllacuna shinami canga” nircami. Pero chaita nishpaca ¿Jesusca pai tigramuna punllacuna Noepaj punllacuna shina tucuipi chashnallataj canatachu nisha nirca? a Mana. Bibliaca chaitaca mana yachachinchu. Por ejemplo, Jesusca ‘Jehová Diosca arcapaj pungucunata huichcashpaca shamuj punllacunapi ima tucunatami ricuchirca’ mana nircachu.

5. a) ¿Yacu juillu manaraj shamujpica Noeca imatataj rurarca? (Hebreos 11:7; 1 Pedro 3:20). b) ¿Noé shina ñucanchijpish imatataj mana rurai tucushun?

⁵ Jehová Dios ima tucugrishcata huillajpica Noeca arcata rurashpami sinchi feta charishcata ricuchirca (Hebreos 11:7; 1 Pedro 3:​20-ta liyipai). Chashna layallatajmi Diospaj  Gobiernomanta alli huillaicunata uyashpaca gentecunaca paicunapaj ruraicunahuan feta charishcata ricuchina can (Hechos 3:​17-20). Pedroca: “Noeca cashcata ruranamanta huillajmi carca” nircami (2 Pedro 2:5). Shinapish yachai 18-pi yachashca shinaca Noeca yacu juillu shamunata tucui gentecunaman huillai tucushcataca mana yachanchijchu. Cunan punllacunapica ñucanchijpish muyundij allpapi tucui gentecunaman huillangapajmi esforzarinchij. Pero mashnata esforzarishpapish Armagedón shamungacama tucui gentecunamanca mana huillai tucushunchu. ¿Imamanta chaita ninchij?

6, 7. ¿Diospaj punlla shamungacamaca imamantataj mana tucui gentecunaman huillai tucushun?

⁶ Jesús nishca shinaca Diospaj Gobiernomanta alli huillaicunataca ¿maicamataj huillana canchij? Paica: “Tucui llajtacunapi causajcuna yachaj chayachunmi muyundij allpapi huillangacuna” nircami (Mateo 24:14). Jesús huillashca shimicunaca ¿ima shinataj pajtaricun? Testigo de Jehovacunaca 1.000 yalli shimicunapimi huillacunchij. Shinallataj jw.org página tiyashcamantami la mayoría gentecunaca Diospaj Gobiernomanta alli huillaicunata yachana oportunidadta charincuna.

⁷ Jesusca paita catijcunamanca: “Ñuca shamungacamaca tucui pueblocunapica mana huillai tucunguichijchu” nircami (Mateo 10:23; 25:​31-33). Chaita nishpaca Jesusca paita catijcuna muyundij allpapi causaj cada personaman mana huillai tucunatami nicurca. Ñucanchijpish chaitaca mana rurai tucushunchu. Yuyashun. Achca gentecunaca Diosmanta ama huillachun jarcaj llajtacunapimi causancuna. Shinallataj cada punllami huaranga huaranga huahuacunaca huacharincuna. Chaimantami tucui gentecunaman huillangapaj mashnata esforzarishpapish Diospaj punlla shamungacamaca “tucui llajtacunaman, tucui familiacunaman, tucui rimaicunaman, tucui pueblocunamanca” mana huillai tucushun (Apocalipsis 14:6).

8. ¿Maijancunaca ima tapuicunatataj rurarishcanchij? (Fotomantapish parlapai).

⁸ Cunancama imata yachashcata ricushpaca: “¿Jatun llaqui punllacuna shamungacama Diosmanta yachangapaj oportunidadta mana charij gentecunahuanca imataj tucunga? ¿Jehová Diospish, Jesuspish paicunahuanca imatataj rurangacuna?” nishpachari yuyashun (Juan 5:​19, 22, 27; Hechos 17:31). Cai yachaipaj textopi nishca shinaca Jehová Diosca “shujllapish chingarichunca mana munanchu”. Ashtahuanpish “tucuicuna arrepintirichunmi” munan (2 Pedro 3:9; 1 Timoteo 2:4). Jehová Diosca chai tucui gentecunahuan ima tucunataca manaraj huillashcachu. Ashtahuanpish paica chai gentecunahuan imata ruranataca ñucanchijman huillanata o mana huillanatami decidi tucun.

9. ¿Jehová Diosca shamuj punllacunapi ima tucunamanta parlashpaca imallatataj huillashca?

⁹ Shamuj punllacunapi ima tucunamanta parlashpaca Jehová Diosca Bibliapica ¿imallatataj huillashca? Por ejemplo, paica “cashcata mana rurajcuna” causarinatami huillashca. Cashcata mana rurajcunaca manaraj huañushpa Diospaj alli huillaicunata yachashpa, paicunapaj causaita cambiana oportunidadta mana charij gentecunami can (Hechos 24:15; Lucas 23:​42, 43). Shinapish caita yachashpaca shujtaj tapuicunatachari charinchij.

10. Jatun llaqui punllacunapi yuyashpaca ¿maijancunaca imatataj tapurishcanchij?

¹⁰ Achca gentecunaca Jehová Diospaj contracuna tucushcamantami Armagedonpi tucuchishca cangacuna. Bibliapi nishca shinaca chai gentecunaca cutinca ña mana causaringacunachu (2 Tesalonicenses 1:​6-10). Pero gran tribulación o jatun llaqui punllacunapica maijan gentecunaca ima ungüita charishcamanta, yuyajlla cashcamanta, o shuj accidenteta charishcamantami huañungacuna. Cutin shujtajcunataca millai gentecunami huañuchingacuna. ¿Chai tucui gentecunahuanca imataj tucunga? (Eclesiastés 9:11; Zacarías 14:13). Tal vez ¿maijancunaca  “cashcata mana rurajcuna” shina Jehová Diospaj ñaupajpi ricurishcamantachu cutin causaringacuna? Chaitaca mana yachanchijchu.

¿IMATATAJ YACHANCHIJ?

11. ¿Jehová Diospish, Jesuspish Armagedonpica gentecunataca ima shinataj juzgangacuna?

¹¹ ¿Shamuj punllacunapi ima tucunamantaca imallatataj yachanchij? Por ejemplo, ¿Jehová Diospish, Jesuspish imata ricushpataj gentecunataca juzgangacuna? Paicunaca Jesuspaj huauquicunata ima shina tratashcata ricushpami gentecunataca juzgangacuna (Mateo 25:40). Jesuspaj huauquicuna nishpaca ungidocunamantami parlacunchij. Ungidocunatapish, Jesustapish apoyajcunaca Diospaj ñaupajpica “ovejacuna” shinami ricuringacuna. Shinallataj jatun llaqui punllacunapica huaquin ungidocunaca todaviarajmi cai allpapi cangacuna. Paicunaca Armagedón ñalla callarigrijpimi jahua pachaman apashca cangacuna. Shinashpaca ungidocuna cai allpapi tiyangacamami alli shungu gentecunaca paicunata apoyana oportunidadta charingacuna (Mateo 25:​31, 32; Apocalipsis 12:17). ¿Paicunataca imamantataj apoyana canchij?

12, 13. ¿Babilonia jatun pueblo tucurijta ricushpaca maijancunaca imatataj tal vez rurangacuna?

¹² Jatun llaqui punllacunapica maijan gentecunaca “Babilonia jatun pueblo” tucurishcata ricushpaca ¿ima shinataj sintiringacuna? Maijancunaca testigo de Jehovacuna chashna tucuna cashcata achca huatacunata huillashpa puricushcatachari yuyaringacuna. Chaita yuyarishpaca ¿maijancunaca Jehová Diospaj parte tucunatachu agllangacuna? (Apocalipsis 17:5; Ezequiel 33:33).

¹³ Moisespaj punllacunapi ima tucushcata yuyarishunchij. Israelitacuna Egiptomanta llujshijpica paicunahuanca “tucui laya achca gentecunami” llujshircacuna. Maijancunaca Moisés huillashca shina Jehová Dios egipciocunata diez plagacunahuan llaquichijta ricushpami Jehová Diospi cri callarishcangacuna (Éxodo 12:38). Babilonia jatun pueblo tucurijta ricushpaca maijancunaca chai gentecuna shinachari Jehová Diospi cri callaringacuna. Diospaj jatun punlla ñalla callarigrijpi chai gentecuna Jehová Diosta sirvinata agllajta ricushpaca ¿pꞌiñarishunchu?  Mana, ashtahuanpish Jehová Dios shina “llaquij, alli shungu, pacienciata charij, achcata cꞌuyaj” cashcatami ricuchina canchij (Éxodo 34:6). b

14, 15. ¿Gentecunaca ima tiempopi huañushcallamanta o maipi causashcallamantachu huiñaita causana oportunidadta charingacuna? (Salmo 33:​4, 5).

¹⁴ Jehová Diosta mana sirvij familiacunamanta parlashpaca maijancunaca: “Jatun llaqui punllacuna manaraj shamujpi pai huañujpica allimi canman. Chashnami paica causarina oportunidadta charinga” nincunami. Paicunaca familiata cꞌuyashcamantami chashna nincuna. Pero gentecuna ima tiempopi huañushcallamanta Jehová Dios paicunata causachinata o mana causachinata agllaj cashcata mana yuyanachu canchij. Ashtahuanpish Jehová Dios alli Juez cashcamanta siempre cashcata rurashpa imatapish decidij cashcatami yuyarina canchij (Salmo 33:​4, 5-ta liyipai). Chaimanta cai pachapaj Juez cashcata ruranataca tucui shunguhuan crishunchij (Génesis 18:25).

¹⁵ ¿Gentecunaca maipi causashcallamantachu huiñaita causana oportunidadta charingacuna? Mana. Huaquin llajtacunapi causajcunaca Diosmanta yachana oportunidadtaca mana tanto charishcacunachu. Pero chai gentecunaca chai llajtacunapi causashcallamantaca Diospaj ñaupajpica mana “chivocuna” shina ricuringacunachu (Mateo 25:46). Ñucanchijca chai llajtacunapi causajcunapi yuyashpaca achcatami sustarishcanchij. Jehová Dioscarin paicunamantaca achcatami sustarin. Jatun llaqui punllacunapi  Jehová Dios chai gentecunahuan imata ruranataca mana yachanchijchu. Pero tal vez chai gentecunaca Jehová Dios jatun llaqui punllacunapi imata rurajta ricushpa, shinallataj paipaj shutita ima shina santificajta ricushpaca paipimi cri callaringacuna (Ezequiel 38:16).

16. ¿Jehová Diosca gentecunata cꞌuyashcataca ima shinataj ricuchishca? (Fotomantapish parlapai).

¹⁶ Bibliapica Jehová Dios gentecunata achcata cꞌuyaj cashcatami yachashcanchij. Chaimi paica paipaj shujlla Churita cushpa tucuicuna huiñai causaita charichun oportunidadta cushca (Juan 3:16). Tucuicunami ñucanchij causaipica Jehová Dios ñucanchijta cꞌuyaihuan ayudashcata ricushcanchij (Isaías 49:15). Jehová Diosca cada uno ima shina cashcataca allimi yachan. Chaimantami ñucanchijcunaca huañujpipish paica ima shina cashca shinallataj cada unota causachi tucun. Chaimi cutin causarishpaca manaraj huañushpa tucui imallata rurashcata yuyari tucushun (Mateo 10:​29-31). Yayitu Jehová Diosca yachaisapa, cashcata ruraj, cꞌuyaj, llaquijmi can. Chaimantami tucui gentecunata alli juzganataca tucui shunguhuan crinchij (Santiago 2:13).

17. ¿Catij yachaipica imatataj yachashun?

¹⁷ Bibliapi nishcacunataca cunanca ashtahuanmi intindinchij. Chaimantami cunan punllacunapi Diosmanta huillashpa catina minishtirishca cashcata cuentata cunchij. ¿Diosmanta huillanaca imamantataj minishtirishca can? ¿Mana shaicushpa huillashpa catingapajca imatataj rurana canchij? Catij yachaipimi chaitaca yachashun.