1. ¿Imakunata rikuspanchikmi anchata kusikunchik?

 ¡ANCHATAM kusikunchik bibliapi willakuykuna cumplikusqanta qawaspanchik! Sapa punchawmi rikuchkanchik “sur lawmanta kamachiq norte lawmanta kamachiqwan” kay allpa pachata munaychakuyta munaspanku chiqninakusqankuta (Dan. 11:​40, willakuynin). Enteron allpa pachapitaqmi Diospa gobiernonmantapas willakuchkanchik. Chayraykum waranqantin runamasinchikkuna Diospa llaqtanman yaykukamuchkanku (Is. 60:22; Mat. 24:14). Chaymantapas ‘tiempollanpim’ Diospa sumaq yachachikuyninkunata achkanpi chaskichkanchik (Mat. 24:​45-47).

2. ¿Imamantam Diosqa willawasunpuni? ¿Imatam riqsikunanchik?

² Diosqa hinallam yanapawachkanchik qipa punchawkunata imakuna pasakunanmanta allinta entiendenapaq (Prov. 4:18; Dan. 2:28). Llumpa-llumpay ñakariy punchawkuna qallaykunanpaqña kachkaptinqa Diosqa willawasunpunim imakunata ruwaspa payman sunqu hinalla takyanapaq chaynataq iñiqmasinchikkunawanpas huk sunqulla kanapaq. Ichaqa, riqsikunanchikmi qipa punchawkunamanta mana lliwta yachasqanchikta. Kay yachachikuypim yachasun qipa punchawkuna imayna kananmanta kunankama entiendesqanchikta wakinta imanasqa cambianamanta. Chaymantañataqmi yachasun qipa punchawkunamanta imakunata yachasqanchikmanta chaynataq Diosninchik imata ruwananmanta.

 IMAKUNATA MANA YACHASQANCHIKMANTA

3. ¿Imatam ñawpaqtaqa nirqanchik llumpa-llumpay ñakariy punchawkuna qallaykuptin runakunawan ima pasananmanta? ¿Imanasqam chaynata piensarqanchik?

³ Ñawpaqtam nirqanchik llumpa-llumpay ñakariy punchawkuna qallaykuptin runakuna Diospa llaqtanman manaña yaykuyta atinankumanta hinaspa Diospa piñakuynin punchawpi wañunankumanta. Chaynataqa piensarqanchik Noeypa tiemponpi nisyullay-nisyu para chayamuptin ima pasakusqanta yuyarispam. Kaynatam nirqanchik: “Imaynam nisyullay-nisyu para manaraq chayamuchkaptin hatun buquepa punkunta Dios wichqarurqa, chaynam llumpa-llumpay ñakariy punchawkuna qallaykunanpaqña kachkaptinpas Diosqa llaqtanpa punkunta wichqachkaq hina manaña pitapas chaskinqachu, hinaptinmi runakunaqa manaña salvakuyta atinqakuchu”, nispa (Mat. 24:​37-39).

4. ¿Imanasqataq mana piensananchikchu Noeypa tiemponpi hina qipakunata imakunapas pasakunanmanta?

⁴ ¿Noeypa tiemponpi pasakusqanman hina qipakunata imakunapas pasakunantachu piensananchik? a Bibliapiqa manam mayqin partepipas chaynata piensanapaqqa ninchu. Jesusmi rimarqa kutimunan tiempopi runakuna “Noeypa tiemponpi” hina kanankumanta. Ichaqa, manam nirqachu hatun buquepa punkunta wichqachkaq hina kay tiempopipas Jehova Dios ruwananmantaqa. Chaywanpas  chay tiempopi imakuna pasakusqanta yuyariyqa yanapawasunmi.

5. (1) ¿Imatam Noeyqa ruwarqa manaraq nisyullay-nisyu para chayamuchkaptin? (Rimarimuytaq Hebreos 11:7 hinaspa 1 Pedro 3:20 nisqanmantapas). (2) ¿Imanasqam nichwan Diosmanta willakuyninchikqa Noeypa tiemponpi hina kasqanta?

⁵ Noeymanmi Dios willarqa nisyullay-nisyu parata chayachimunanmanta. Chaymanta mana iskayrayasqanraykum Noeyqa hatun buqueta ruwarqa (leey Hebreos 11:7; 1 Pedro 3:20). Yaqa chaynam Diosña gobiernawananchikmanta willakusqanchikta uyariq runakunapas Diosta kasukunanku salvakuyta munaspankuqa (Hech. 3:​17-20). Pedrom nirqa ‘Noeyqa Diosmanta willakusqanmanta’ (2 Ped. 2:5). Ichaqa pasaq yachachikuypi yachamusqanchikman hinam mana yachanchikchu llapallan runakunaman Diosmanta Noey willasqantaqa. Ñuqanchikpas yaqa lliw nacionkunapi yachaq runakunamanmi willakuchkanchik. Ichaqa maynataña kallpanchakuspapas manam atisunchu Diospa piñakuynin manaraq chayamuchkaptin kay pachapi lliw runaman Diosmanta willaytaqa. ¿Imanasqam chaynata ninchik?

6, 7. Diospa piñakuynin manaraq chayamuchkaptinqa, ¿imanasqataq mana atisunchu lliw runakunaman Diosmanta willayta?

⁶ Jesusmi nirqa Diosmanta ‘sumaq willakuyqa enteron pachapi willakusqa kananmanta, chaynapi llapallan nacionpi runakuna yachanankupaq’ (Mat. 24:14). Jesuspa chayna nisqanqa kunanmá cumplikuchkan. 1.000 masnin rimaykunapim Diosmanta willakuchkanchik, internetpi jw.org nisqamanpas enteron pachapi runakunam Diosmanta yachanankupaq yaykunmanku.

⁷ Jesusqa qatiqninkunataqa nirqataqmi: “Israel nacionpa llaqtankunapi hinaspa llaqtachankunapipas willakuyta manaraq tukuchkaptikichikmi runapa churinqa chayamunqa”, nispa. Chaywanmi nichkarqa manaraq Jesus kutimuchkaptin lliw runakunaman Diosmanta willayta mana atinamanta (Mat. 10:23; 25:​31-33). Kunanqa millonnintin runamasinchikkunam kachkanku Diosmanta willakunanchikta mana munasqanku nacionkunapi. Chaymantapas, sapa minutom pachaknintin wawakuna nacechkanku. Chayraykum ‘Diospa piñakuynin manaraq chayamuchkaptinqa mana atisunchu lliw runakunaman Diosmanta willakuytaqa. ¡Manamá atisunchu llapallan nacionkunapi, tukuy richkaq rimaykunapi hinaspa llaqtakunapi’ Diosmanta willakunapaq tukuyta ruwaspapas! (Apoc. 14:6).

8. ¿Imatam nikuchwan? (Qawaytaq fotokunatapas).

⁸ Chaynaqa ichapas nikuchwan: “Llumpa-llumpay ñakariy punchawkuna qallaykuptinqa, ¿imataq pasanqa Diosmanta willakusqanchikta manaraq uyariq runakunataqa? ¿Imatam Jehova Diosqa hinaspa juzgananpaq churasqan Jesusqa chay runakunawan ruwanqaku?”, nispa (Juan 5:​19, 22, 27; Hech. 17:31). Kay yachachikuypaq textom yuyarichiwanchik Diosqa ‘mana pi runapas chinkarunanta munasqanta’, payqa munachkan huchankumanta wanakunankutam (2 Ped. 3:9; 1 Tim. 2:4). Chaywanpas, Diosqa manaraqmá willawanchikchu mana riqsiqnin runakunawan imata ruwananmantaqa, manataqmá chaymanta willawananchikpaqqa pipas hikutanmanchu.

9. ¿Imatam Jehova Diosqa bibliapi willawanchik?

⁹ Jehova Diosqa hamuq tiempopi imakunata ruwananmanta wakintam bibliapi willawanchik. Willawanchikmi payta mana riqsisqankurayku ‘mana allin ruwaq runakunata’ kawsarichinanmanta (Hech. 24:15; Luc. 23:​42, 43). Chaymanta yachaptinchikqa huk tapukuyninchikkunachá rikurin. Chaymantayá yachaykusun.

10. ¿Imataraqmi tapukuchwan?

¹⁰ ¿Imataq pasanqa llumpa-llumpay ñakariy  punchawkunapi wañuq runakunawanqa? ¿Manañachu kawsarichisqa kanqaku? Bibliapim niwanchik Armagedon punchawpi paypa hinaspa angelninkunapa wañuchisqan runakunalla manaña kawsarimunankumanta. Chaynaqa kanqaku Jehova Diospa contranpi churakusqankuraykum (2 Tes. 1:​6-10). Ichaqa, ¿imataq pasanqa llumpa-llumpay ñakariy punchawkunapi yuyaqyaspa wañukuqkunawanqa, ima accidentepipas wañuqkunawanqa utaq runapa wañuchisqan kaqkunawanqa? (Ecl. 9:11; Zac. 14:13). ¿Yaqachu paykunamanta wakin kawsarichisqa kanqaku ‘mana allin ruwaq runakuna’ kawsarichisqa kaptinku? Manam yachanchikchu.

IMAKUNATA YACHASQANCHIKMANTA

11. ¿Pikunallam Diospa piñakuynin punchawpiqa salvasqa kanqaku? ¿Imanasqa?

¹¹ Qipa punchawkunata imakuna pasakunanmanta wakintaqa yachanchikmi. Bibliapim nin Diospa piñakuynin punchawpiqa hanaq pachapaq akllasqakunata utaq Jesuspa ‘wawqinkunata’ yanapaqkunalla salvasqa kanankumanta (Mat. 25:40). Jesucristotawan wawqinkunata yanapaqkunaqa kasukuq oveja hinam kanqaku Diospaqqa. Yachanchikmi llumpa-llumpay ñakariy punchawkunapiqa hanaq pachapaq kaqkunamanta wakinqa kay pachapiraq kanankumanta, ichaqa Diospa piñakuynin manaraq qallaykuchkaptinmi hanaq pachaman apasqa kanqaku. Paykuna kay pachapiraq kachkaptinkuqa allin sunquyuq runakunaqa yaqachusmi atinqakuraq ima ruwasqankupi yanapayta (Mat. 25:​31, 32; Apoc. 12:17). ¿Imanasqataq chaymanta yachayqa ancha allin?

12, 13. ¿Imatam wakin runakuna ruwanqaku pantay religionkuna chinkachisqa kasqanta qawaspanku? (Qawaytaq fotokunatapas).

¹² Llumpa-llumpay ñakariy punchawkunapim “hatun Babilonia” utaq pantay religionkuna chinkachisqa kanqa, chayta qawaspankuchá wakin runakunaqa yuyarinqaku chay pasakunanmanta unay wataña testigokuna willakusqanchikta. ¿Yaqachu chayta qawaspanku wakin runamasinchikkuna ñuqanchikwan kuskaña Jehova Diosta serviyta munanqaku? (Apoc. 17:5; Ezeq. 33:33).

¹³ Israel runakuna Egiptomanta lluqsiptinkum ‘paykunawan kuska huk kasta achkallaña runakunapas’ lluqsirqaku (Ex. 12:38).  Paykunamanta wakinqa Jehova Dioslla chiqap Dios kasqantachá chayraq creeyta qallaykurqaku Moisespa willakusqanman hina Egiptota Dios castigasqanta qawaspanku. Pantay religionkuna chinkachisqa kasqanta qawaspanku wakin runakuna ñuqanchikwan kuska Diosta yupaychayta munaptinkuqa nisunchu: “¡¿Imaynamá chayraqqa, manam allinchu kayqa”, nispa?! ¡Manamá chaynataqa piensananchikchu kanqa! Aswanqa Diosninchik hinam llakipayaspa chaskiykunanchik kanqa, payqariki ‘llakipayakuqmi, kuyapayakuqmi hinaspa imaña kaptinpas ancha kuyakuqmi’ (Ex. 34:6). b

14, 15. Pipas wiñaypaq kawsakunanpaqqa, ¿haykapi wañukusqanmantachu hinaspa maypi yachasqanmantachu kanqa? (Rimarimuytaq Salmos 33:​4, 5 nisqanmantapas).

¹⁴ Ichapas pi iñiqmasinchiktapas uyarirqanchik Diosta mana serviq familianmanta kayna nisqanta: “Munaymanmi llumpa-llumpay ñakariy punchawkuna manaraq chayamuchkaptin wañukunanta, chaynapi kawsarimunanpaq”, nispa. Ichaqa pimanpas wiñay kawsayta Dios qunanpaqqa manam haykapi wañukusqanmantachu kanqa. Diosqa mana pantaq juezmi, chaymi imapas tantiasqankunaqa allinpuni (leey Salmos 33:​4, 5). Manam iskayrayanchikchu ‘kay pachapa jueznin’ Diosninchik haykapipas allin kaqta ruwananmantaqa (Gen. 18:25).

¹⁵ Pipas wiñaypaq kawsakunanpaqqa manataqmi maypi yachasqanmantachu. Millonnintin  runamasinchikkunam Diospa gobiernonmanta mana haykapipas willakusqanchik llaqtakunapi yachachkanku. Manamá paykunataqa Diosninchikqa wiñaypaqqa chinkarachinmanchu (Mat. 25:46). Ñuqanchikpas chay runamasinchikkunamantaqa llakikunchikmi. Aswanraqchiki Diosqa anchata llakikun paymanta manaraq yachaqkunamantaqa. Manamá yachanchikchu llumpa-llumpay ñakariy punchawkunapi paykunapaq Diosninchik imata ruwananmantaqa. Yaqapaschá paykunamanta wakinqa Diosninchikman chayraq asuykunqaku enteron allpa pachapi sutin chuyanchasqa kasqanta qawaspanku (Ezeq. 38:16).

16. ¿Imakunatam yachanchik Jehova Diosmanta bibliata estudiaspa? (Qawaytaq dibujotapas).

¹⁶ Bibliata estudiaspam yachanchik Diospaqqa runakunapa vidanqa ancha valorniyuq kasqanta. Payqa churin Jesucristotam ñuqanchikrayku wañunanpaq kachamurqa, chaynapi wiñaypaq kawsakunapaq (Juan 3:16). Cuentatachá qukurqanchik Diosqa imapipas kuyakuywan yanapawasqanchikta (Is. 49:15). Payqa sapakamapa sutinchiktam yuyan. Wañukuptinchikpas imayna kasqanchikman hinapunim kawsarichiwasun, imayna piensasqanchikman hinam hinaspa imakuna yuyasqanchikman hinam kawsarichiwasun (Mat. 10:​29-31). Tukuy chaykunaraykum mana iskayrayanchikchu Diosninchikqa sapa runata kuyakuywan juzganamanta. Payqariki pimantapas aswan yachayniyuqmi, allin ruwaqmi chaynataq llakipayakuqmi (Sant. 2:13).

17. ¿Imamantam hawanta yachasun?

¹⁷ Tukuy chaykunamanta allinta entienderusqanchikraykum cuentata qukunchik Diosmanta willakuyninchikqa urgente kasqanta. ¿Imanasqam chaynata ninchik? ¿Imataq yanapawasun mana amispa Diosninchikmanta hinalla willakunapaq? Chaymantam hawanta yachasunchik.