1. ¿Imaraykun nisunman “kay tiempopiqa admirakunapaq jina tiempopin kausashanchis” nispa?

 KAY tiempopiqa imaymanakunan pasashan, admirakunapaq jinan kashan. Ñawinchispipunin Bibliaq willasqan profeciakuna junt’akushan. Kay mundota dominayta munaspan “wichay lado reywan” “uray lado reywan” jap’inakushanku (Dan. 11:​40, willakuy). Chaymantapas Diospa gobiernonmanta allin willakuykunaqa mana jayk’aq jinaraqmi predicakushan, pachantinmanmi chayashan. Chaymantapas millonninpi runakunan Jehová Diosman kutirikushanku (Isa. 60:22; Mat. 24:14). Espiritual mijunapas tiempollanpin chayamuwashanchis, mana mijuy atiyraqmi kashan (Mat. 24:​45-47).

2. ¿Iman chayamuwasunpuni manchay ñak’ariy tiempopaq, ichaqa llapantapunichu imatapas yachakun?

² Jehová Diospa yanapayninwanmi astawanraq entiendekushan imakunachus pisi tiempollamanta pasanqa chayta (Prov. 4:18; Dan. 2:28). Manchay ñak’ariy qallarinanpaqqa llapa imachus yachananchistan allinta yachasunchis. Chaykunan yanapawasunchis chay sasa tiempopi Diosmanta amapuni t’aqakunanchispaq, juj nisqalla kananchispaqpas. Chaywanpas jamuq tiempomantaqa manan llapantapunichu imapas yachakun. Ichaqa cambiananchismi kashan jamuq tiempopi imachus pasananmanta wakin willasqanchistaqa, chaytan ñaupaqta yachasunchis. Chaymantataq yachasunchis imatachus jamuq tiempomanta allintaña yachakun chayta. Yachallasuntaqmi imaynatas janaq pacha Taytanchis imatapas ruwanqa chaytapas.

¿IMAKUNATAN MANA YACHAKUNRAQCHU?

3. a) Manchay ñak’ariy qallariqtin, ¿iman runakunawan pasanqa nispan ñaupaqta nikurqan? b) ¿Imaraykun chhayna kananpaq piensakurqan?

³ Ñaupaqpin nirqanchis: “Manchay ñak’ariy tiempo qallariqtinqa manañan pipas Jehová Diosman asuykuyta atinqañachu,  llapallankun Armagedón guerrapi wañupunqaku”, nispa. ¿Imaraykun chhaynata nikunman karqan? Chay tiempopiqa piensakurqan Noepa tiemponpi jina imapas kananpaqmi. Chaymi nikurqan: “Imaynan para qallariqtin jina Jehová Diosqa arca punkuta wisq’apurqan, chhaynatan manchay ñak’ariy qallariqtinpas punkutapas wisq’akushanman jina manaña pitapas Diospa llaqtanpiqa chaskikunqachu, nitaq salvasqachu kanqa”, nispa (Mat. 24:​37-39).

4. ¿Imaraykun mana nisunmanchu “Noepa tiemponpi llapa imapas pasasqanqa pasallanqataqmi kay tiempopi” nispa?

⁴ ¿Nisunmanchu “Noepa tiemponpi llapa imapas pasasqanqa kay tiempopi imachus pasananwanmi tupan” nispa? Manan. a Bibliaqa manan imaninpaschu chaymantaqa. Arí Jesusqa Noepa tiemponwanmi tupanachirqan kutimunan tiempota. Ichaqa manan nirqanchu: “Noepa tiemponpi llapa imapas pasasqanqa pasallanqataqmi kutimuqtiyqa”, nispaqa. Arcaq punkunta Diospa wisq’asqanmantapas manan imanirqanpaschu. Chaywanpas imaymanatan yachasunman Noepa tiemponpi imachus pasasqanmantaqa.

5. a) ¿Imatan Noé ruwarqan manaraq manchay para chayamushaqtin? (Hebreos 11:7; 1 Pedro 3:20). b) ¿Imaraykun nisunman “kay tiempo predicasqanchispas Noepa tiemponpi jinan kashan” nispa?

⁵ Jehová Dios juicionmanta Noeman willaqtinqa, arcata ruwaspan Noeqa rikuchirqan paypi iñisqanta (leey Hebreos 11:7; 1 Pedro 3:20). Chhaynatan kay tiempopi runakunapas Diosmanta willakuyta uyarispaqa chayman jina imatapas ruwananku, chhaynapin  Diospi iñisqankuta rikuchinqaku (Hech. 3:​17-20). Apóstol Pedron Noemanta rimashaspa nirqan: “Chanin kaqmanta willaq”, nispa (2 Ped. 2:5). Ichaqa ñaupaq yachachikuypi yachamusqanchis jina, manan yachakunchu llapa runamanchus sapankamanchus Noé willarqan icha manachus chaytaqa. Noqanchisqa tukuy atisqanchistan kallpachakushanchis kay pachapi llapa runakunaman Diospa willakuyninta chayachinanchispaq. Chaywanpas maytaña kallpachakusunman chaypas tukukuy p’unchay chayamunanpaqqa manapaschá llapankumanpunichu chayasunchis. ¿Imaraykun chayta nishanchis? Qatiq parrafokunapi chayta yachasun.

6, 7. ¿Imaraykun nisunman “tukukuy p’unchay chayamunanpaqqa manan atisunmanchu llapa runakunaman Diospa siminta willaytaqa” nispa?

⁶ Maykamachus chayananchismanta rimaspan Jesusqa nirqan: “Diospa gobiernonmanta allin willakuykunan pachantinpi willasqa kanqa”, nispa (Mat. 24:14). Chaypi willasqanqa kay tiempopin astawanqa junt’akushan. Mana jayk’aq jinaraqmi Diosmanta willakuyqa lliu pachantinman chayashan. Chaymantapas chay willakuytaqa waranqa simi rimay maspin willakushan. Internetpi jw.org nisqawanmi chay willakuyqa astawanraq lliuman ch’eqerishan. Chhaynaqa llapa runapas atillanmanmi Diospa gobiernonmanta yachaytaqa.

⁷ Ichaqa Jesusqa discipulonkunataqa nillarqantaqmi: “Ayllukunata llaqtakunatapas manaraq puriyta tukushaqtiykichismi runaq Churinqa chayamunqa”, nispa. ¿Imatan chaywan nisharqan? Runakunata juzgaq jamunanpaqqa manan llapa runakunamanchu ni sapankamanchu Diospa willakuynintaqa chayachinanku karqan (Mat. 10:23; 25:​31-33). Jesuspa imachus nisqanman jinapunin kay tiempopas kashan. Wakin runakunaqa predicananchista prohibikusqan llaqtakunapin tiyanku. Chaymantapas pachantinpiqa sapa ratullanmi askha wawakuna naceshan. Chhaynataq kashan chayqa, tukukuy p’unchay chayamunanpaqqa manan atisunmanchu llapa runakunaman Diosmanta willaytaqa. Maytaña kallpachakusun kay pachapi “llapa tiyaqkunaman, llapa nacionkunaman, ayllukunaman, rimaykunaman, llaqtakunamanwan” Diospa siminta chayachinapaq chaypas, manan atisunchu (Apo. 14:6).

8. ¿Imanispan mayninpi tapukusunman? (Qhaway kay parrafopaq fotokunata)

⁸ Chhaynaqa yaqapaschá tapukusunman: “¿Iman kanqa manaraq manchay ñak’ariy chayamushaqtin Diospa siminta mana yachaq runakunamanta? ¿Imatan ruwanqaku chay runakunawan Jehová Diospas juzgananpaq churasqan wawan Jesuspas?”, nispa (Juan 5:​19, 22, 27; Hech. 17:31). Kay yachachikuypaq textopi nisqan jina, Jehová Diosqa “manan munanchu pipas wañunantaqa, aswanmi munan lliupas juchankumanta pesapakuspa payman kutirikunankuta” (2 Ped. 3:9; 1 Tim. 2:4). Chaywanpas manan yachakunraqchu imatas Jehová Dios ruwanqa chay runakunawan chaytaqa, manan chaytaqa pimanpas willanraqchu. Chaymantapas, ¿pitaq noqanchisri kanchis chaykunata willawashananchispaq?

9. ¿Imatan sut’ita Bibliapi willashan?

⁹ Ichaqa imatachus Jehová Dios ruwanqa chayqa sut’in kashan wakinqa, sut’itan Bibliapi willashan. Ñaupaq yachachikuypi yachamusqanchis jina, payqa kausarichinqan paymanta mana yachaq mana chanin runakunatapas (Hech. 24:15; Luc. 23:​42, 43). Chhaynataq kanqa chayqa yaqapaschá imaymanakunatawanraq tapukusunman.

10. ¿Imakunatawanmi yaqapas tapukusunman?

¹⁰ Yaqapaschá tapukusunman: “¿Jujpaqkamachu chinkachisqa kanqaku manchay ñak’ariypi wañupuq runakuna? ¿Manañachu paykuna jayk’aqpas kausarimpunqaku?”, nispa. Chay tiempomanta rimaspaqa Bibliapiqa sut’itan willashan  imaynas Armagedón guerrapi Diospa wañuchisqan runakunaqa, mana kausarimpunqakuchu chayta. Paykunaqa Dios contra jatarisqankumantan mana kausarimpunqakuchu (2 Tes. 1:​6-10). Ichaqa, ¿iman kanqa accidentepi ima wañupuqkunamanta, machuyapusqankurayku payayapusqankurayku wañupuqkunamanta, jujkunaq makinpi wañupuqkunamantapas? (Ecl. 9:11; Zac. 14:13). Jesuspa gobiernonpi kausarimpuq, ¿mana chanin runakuna ukhupichu paykuna kashankuman? Manan “chhaynan kanqa” nisunmanchu, manan chaykunataqa yachakunchu.

¿IMAKUNATAN ALLINTAÑA YACHAKUN?

11. ¿Ima ruwasqankuman jinan runakuna juzgasqa kanqaku Armagedón guerra chayamuqtin?

¹¹ Jamuq tiempopi imakunachus pasanqa chayqa sut’in kashan wakinqa. Yachasqanchis jinapas Armagedón guerrapiqa Jesuspa wayqenkunata apoyarqankuchus icha manachus chayman jinan runakunaqa juzgasqa kanqaku (Mat. 25:40). Jesuspa wayqenkunata apoyaqkunaqa ovejakuna ukhupin t’aqasqa kanqaku. Chaymantapas yachasqanchis jina, Jesuspa wakin wayqenkunaqa manchay ñak’ariy tiempopipas kay pachapiraqmi kashanqaku. Armagedón guerra qallarinanña kashaqtinmi janaq pachaman apasqa kanqaku. Chhaynataq kanqa chayqa allin sonqo runakunaqa atinqakuraqmi paykuna apoyayta, imakunachus ruwasqankupi yanapakuytapas (Mat. 25:​31, 32; Apo. 12:17). ¿Imaraykun chayta yachay allinpuni?

12, 13. ¿Imatan yaqapas ruwanqaku wakin runakuna Jatun Babilonia thunisqa kaqtin? (Qhaway kay parrafokunapaq fotokunata).

¹² Manchay ñak’ariy qallariqtin “Jatun Babilonia” otaq llapa pantasqa religionkuna thunisqa kaqtinqa, yaqapaschá wakinqa yuyarinqaku chaykuna pasananmanta unayña willasqanchista. Chhayna kanqa chayqa, ¿munankumanchu wakin runakuna Diosman asuykapuyta? Yaqapaschá (Apo. 17:5; Ezeq. 33:33).

¹³ Chaypaq piensasun Moisespa tiemponpi imachus pasarqan chaypi. Israel runakuna Egiptomanta lloqsipushaqtinkuqa juj llaqtayoq runakunapas paykunawan kuskan ripullarqankutaq. Imaynatachus sinchi ñak’ariymanta Moisespa willasqan junt’akurqan chayta rikuspapaschá paykunaqa Diospi iñipurqanku (Éx. 12:38). Chay tiempopi jina pasanman Jatun  Babilonia thunisqa kaqtin ¿chayrí? ¿Phiñakusunmanchu pipas tukukuy p’unchay chayamushaqtinña Diospa llaqtanman jaykumuqtin? Manachá. Noqanchisqa janaq pacha Taytanchis jinan kananchis, pay jinan “khuyapayakuq, sumaq sonqo, pacienciakuq, mana tukukuq may jatun munakuyniyoq” ima kananchis (Éx. 34:6). b

14, 15. ¿Imaraykun nisunman “pipas wiñay kausaytaqa chaskinqa manan wañupusqanraykuchu, ni maypi tiyasqanraykuchu” nispa? (Salmos 33:​4, 5).

¹⁴ Wakinmi Diosta mana serviq familiankumanta ninku: “Allinchá kanman manchay ñak’ariy tiempo manaraq chayamushaqtin wañukapunman chayqa, chhaynapi kausarimpunanpaq”, nispa. Chayta rimaqkunaqa familiankupi piensaspapaschá chayta ninku. Ichaqa manan wañusqanraykuchu pipas wiñay kausaytaqa chaskinqa, chayqa Jehová Diosmantan. Payqa chanin Juezmi. Paypa ima ruwasqanpas chaninmi allinmi (leey Salmos 33:​4, 5). Chhaynaqa “pachantinmanta juezqa” chanintan imatapas ruwanqa, manan jayk’aqpas chaymantaqa iskayananchischu (Gén. 18:25).

¹⁵ Chaymantapas manan pipas maypichus tiyasqanraykuchu wiñay kausaytaqa chaskinqa. Wakinqa prohibisqa kasqanchis llaqtakunapi otaq nacionkunapin tiyanku, chaymi chaypi tiyaq runakunaqa mana atinkuchu Diosmanta willakuyta uyariytaqa. Jehová Diosqa manapunin paykunataqa “cabrapaq” jinaqa qhawarinmanchu (Mat. 25:46). Noqanchisqa llakikunchismi paykunamanta ¿riki?, chaychu pachantinmanta juez mana paykunamanta llakikunman. Ichaqa manan yachakunchu imatapunis Jehová Dios paykunawan ruwanqa manchay  ñak’ariy tiempopi chaytaqa. Yaqapaschá wakinqa nacionkunaq ñaupanpi ch’uyanchakuqtin payta reqsiyta munanqaku, jinaspa paypi iñipunqaku (Ezeq. 38:16).

16. ¿Imayna Diosmi Jehová Diosqa? (Qhaway kay parrafopaq dibujota)

¹⁶ Bibliaq willasqanman jinaqa, Jehová Diosqa anchatapunin valoran runakunataqa. Chayraykun wawantapas kachamurqan noqanchisrayku wañunanpaq, chhaynapi wiñay kausayta chaskinanchispaq (Juan 3:16). Jayk’aqllapas repararqankichá Jehová Diospa munakuyninta, khuyapayakuynintapas (Isa. 49:15). Payqa sapankanchistan sutinchismanta reqsiwanchis. Arí payqa allintapunin reqsiwanchis. Chaymi kausarichispapas imaynachus kanchis, imayna genioyoqchus kanchis chayman jinapuni kausarichiwasunchis. Imayna piensasqanchispas imayna runa kasqanchispas kaqmi noqanchispiqa kapunqa (Mat. 10:​29-31). Janaq pacha Taytanchisqa chanintan sapanka runatapas juzganqa, chaypiqa tukuy sonqon confiananchis. Payqa tukuy imatan allinta yachan, chanin Diosmi, khuyapayakuqmi (Sant. 2:13).

17. ¿Imamantan qatimuq yachachikuypi yachasunchis?

¹⁷ Kunanqa ñataq allintaña chaykunata entiendenchis chayqa astawanraqmi Diosmanta willaytaqa aparinanchis, urgenten chay ruwayqa kashan. ¿Imaraykun chayta ninchis? ¿Iman kallpachawasunman ama pisipaspa chayta ruwashanallanchispaq? Qatimuqpin chaymanta astawan yachasunchis.