СТАТИЈА ПРОУЧИБАСКЕ 19
ГИЛИ 22 Тло Царство те авел
Со џанаја башо адава сар о Јехова ка судинел ки иднина?
О Јехова на мангела никој те овел уништимо (2. ПЕТ. 3:9)
СО КА СИКЉОВА
Ка уверина амен кај кеда о Јехова ка судинел ки иднина, адава ка керел ле ко исправно хем праведно начин.
1. Соске шај те вакера кај живинаја ко јекх интересно време?
ЖИВИНАЈА ко јекх бут интересно време! Секова диве дикхаја сар исполнинена пе о библиска пророштвија. На пример, дикхаја сар „о северно цари“ хем „о јужно цари“ боринена пе машкар песте те шај те владинен е светоја (Дан. 11:40). Дикхаја сар о шукар хабери башо е Девлескоро Царство проповединела пе ки цели пхув хем милиоња мануша биринена те служинен е Јеховаске (Иса. 60:22; Мат. 24:14). Освен адава, иси амен бут духовно „храна ко право време“ (Мат. 24:45-47).
2. Ко со шај те ова увериме, ама хем со ваљани те хаљова?
2 О Јехова понадари да поможинела аменге пошукар те хаљова о важна настанија со ка случинен пе панда хари (Изр. 4:18; Дан. 2:28). Шај те ова увериме кај џикоте на почминела и бари неволја, ка џана са со ваљани те џана те шај те ачхова верна хем ко јекхипе ко адава пхаро периоди. Ама, мора те хаљова кај иси несаве буќа баши иднина кола со на џанаја лен. Ки акаја статија ка дикха соске керѓем промене ко адава со вакераја сине башо несаве таро акала буќа. Пало адава, ка дикха несаве буќа кола со џанаја лен баши иднина хем ка дикха ко саво начин ка постапинел амаро небесно Дад.
СО НА ЏАНАЈА
3. Со вакераја сине башо адава џи кеда о Јехова ка дел шанса е манушенге те сикавен вера ки лесте, хем соске мислинаја сине аѓаар?
3 Англедер вакераја сине кај, откеда ка почминел и бари неволја, е манушен нане те овел лен више шанса те сикавен вера ко Јехова хем те преживинен о Армагедон. Аѓаар вакераја сине соске мислинаја сине кај секоја личност хем секова настан ко време кеда сине о Потоп, претставинела нешто со ка случинел пе ко амаро време. На пример, мислинаја сине кај исто сар со о Јехова пханља о удар тари арка англедер те почминел о Потоп, аѓаар хем кеда ка почминел и бари неволја ов „ка пхандел о удар“ е манушенге таро е Сатанаскоро свето те шај никој јавер више те на овел спасимо (Мат. 24:37-39).
4. Соске више на вакераја кај са адава со случинѓа пе ко е Ноескоро време иси ле побаро исполнување авдиве?
4 Дали шај те вакера кај секоја бути со случинѓа пе ко време кеда сине о Потоп претставинела нешто со ка случинел пе ки иднина? На, нашти те вакера аѓаар. Соске? Адалеске со нигде ки Библија на пишинела адава. a Точно тано кај о Исус спорединѓа е Ноескере диве е времеа кеда ов ка овел присутно. Ама, ов на вакерѓа кај секова настан таро време е Ноескоро ка овел ле побаро исполнување ки иднина, а ни на вакерѓа кај адава со пханља пе о удар е аркакоро, иси ле несаво пророчко значење. Сепак, акава на значинела кај нашти те сикљова нешто таро извештај башо Ное хем башо Потоп.
5. а) Сар о Ное сикавѓа вера англедер о Потоп? (Евреија 11:7; 1. Петарескоро 3:20). б) Сави сличност иси машкар е Ноескоро проповедибе хем амаро проповедибе авдиве?
5 Кеда о Ное шунѓа о предупредување таро Јехова, ов сикавѓа кај иси ле вера адалеа со градинѓа арка. (Читин Евреија 11:7; 1. Петарескоро 3:20.) Слично, о мануша со шунена о шукар хабери башо е Девлескоро Царство, мора пле постапкенцар те сикавен кај иси лен вера (Апо. 3:17-20). О Петар вакерѓа кај о Ное „проповединела сине и праведност“ (2. Пет. 2:5). Сепак, сар со дикхлем ки англуни статија, амен на џанаја дали англедер те авел о Потоп, о Ное хем лескири фамилија пробинѓа те проповединел секоле јекхе манушеске со живинела сине ки пхув. Амен авдиве трудинаја амен те проповедина е манушенге ки цели пхув хем адава кераја ле ревно. Сепак, кобор хем те трудина амен, амен ка нашти те проповедина секоле јекхе манушеске ки пхув англедер те авел о крајо. Соске?
6-7. Соске шај те вакера кај амен нане те успејна те вакера о шукар хабери секоле јекхеске англедер те авел о крајо?
6 Размислин башо адава со вакерѓа о Исус кобор ка проповединел пе. Ов пророкујнѓа кај о шукар хабери „ка проповединел пе ко цело свето, те шај о мануша таро са о народија те шунен ле“ (Мат. 24:14). Авдиве акава пророштво исполнинела пе сар никогаш англедер. О хабери башо Царство тано достапно ко повише таро 1.000 чхибја. А преку и интернет-страница jw.org, авдиве повише мануша ко свето шај те дознајнен о хабери башо Царство.
7 Сепак, о Исус исто аѓаар вакерѓа пле учениконге кај ола нане те завршинен е проповедибаја ко са о дизја, или јавере лафенцар те проповединен сариненге, англедер ов те авел (Мат. 10:23; 25:31-33). Е Исусескере лафија ка исполнинен пе ко амаро да време. Милиоња мануша авдиве живинена ко тхана коте со нашти слободно те проповедина. Исто аѓаар, секоја минута бијанѓовена бут чхаве. Амен даја амендар са те шај те ингара о шукар хабери „секоле нацијаке, племеске, чхибјаке хем народоске“ (Отк. 14:6). Ама јасно тано кај нане те успејна те вакера о шукар хабери секоле јекхе манушеске англедер те авел о крајо.
8. Кова пучибе шај ка пуча амен башо адава сар о Јехова ка судинел е манушенге ки иднина? (Дикх хем о слике.)
8 Таро адава со дикхлем џи акана, шај ка пуча амен: Со ка овел околенцар со нане те овел лен прилика те шунен о шукар хабери англедер те почминел и бари неволја? Сар о Јехова хем лескоро Чхаво, коле со денѓа ле и задача те судинел, ка постапинен ленцар? (Јован 5:19, 22, 27; Апо. 17:31). Ко главно стихо тари акаја статија пишинела кај о Јехова „на мангела никој те овел уништимо“, наместо адава ов мангела „саринен те овел лен прилика те каинен пе“ (2. Пет. 3:9; 1. Тим. 2:4). Иако џанаја акала буќа башо Јехова, ов панда на откринѓа аменге о одговор таро акава пучибе. Џанѓола пе, о Јехова нане дужно те вакерел аменге со керѓа или со ка керел.
Сар ка постапинел о Јехова околенцар со шај нане те овел лен прилика те шунен о шукар хабери англедер те почминел и бари неволја? (Дикх ко пасус 8) c
9. Со откринѓа аменге о Јехова ки Библија?
9 О Јехова ко пло Лафи откринѓа аменге несаве таро буќа со ка керел лен. На пример, и Библија вакерела аменге кај о Јехова ка иранел ко живото е неправедна манушен колен со на сине лен прилика те шунен башо шукар хабери хем те менинен пумаре постапке (Апо. 24:15; Лука 23:42, 43). Акава ингарела џи ко јавера важна пучиба.
10. Кола јавера пучиба иси амен?
10 Дали сарине со ка мерен џикоте трајнела и бари неволја ка овен уништиме засекогаш бизи надеж те воскреснинен? И Библија јасно вакерела кај окола со противинена пе е Јеховаске хем кола со ка овен уништиме лестар хем таро лескере војске ко Армагедон, нане те овен воскресниме (2. Сол. 1:6-10). Ама, со ка овел околе манушенцар, кола со на пример ки бари неволја муле таро насвалипе или пхурипе, ки несави несреќа или сине мударде? (Проп. 9:11; Зах. 14:13). Дали некој таро акала мануша ка овен машкар о неправедна кола со ка воскреснинен ко нево свето? На џанаја.
СО ЏАНАЈА
11. Спрема која важно бути ка судинел пе е манушенге ко Армагедон?
11 Башо адава со ка случинел пе ки иднина џанаја некобор буќа. На пример, џанаја кај ко Армагедон е манушенге ка судинел пе спрема адава сар понашинѓе пе е Христосескере пхраленцар (Мат. 25:40). Околенге со ка овел вакердо кај тане бакхре, више сикавѓе кај поддржинена е помазаникон хем е Христосе. Исто аѓаар, џанаја кај несаве таро е Христосескере пхраља ка овен панда ки пхув откеда ка почминел и бари неволја хем ка овен ленде ко небо кратко англедер те почминел о Армагедон. Са џикоте несаве таро е Христосескере пхраља ка овен панда ки пхув, шај несаве искрена манушен ка овел лен прилика те поддржинен лен хем и задача со керена ла (Мат. 25:31, 32; Отк. 12:17). Соске акала буќа тане важна?
12-13. Сар шај несаве те реагиринен откеда ка дикхен кај о Баро Вавилон тано уништимо? (Дикх хем о слике.)
12 Чак откеда ка почминел и бари неволја, несаве со ка дикхен сар тано уништимо о Баро Вавилон шај ка сетинен пе кај е Јеховаскере сведокија више бут време англедер вакерена сине кај ка случинел пе адава. Дали иси шансе несаве со ка дикхен адала настанија те верујнен ко Јехова? (Отк. 17:5; Езек. 33:33).
13 Ако случинела пе асавко нешто, адава ка овел слично адалеа со случинѓа пе ко Египет ко е Мојсеескоро време. Сетин тут кај бут мануша таро јавера нацие сине е Израелцонцар кеда иклиле таро Египет. Несаве таро адала мануша шај почминѓе те верујнен ко Јехова кеда дикхле кај е Мојсеескере предупредувања башо деш неволје исполнинѓе пе (2. Мој. 12:38). Ако случинела пе нешто слично откеда ка овел уништимо о Баро Вавилон, дали ка мислина кај нане фер адава со несаве мануша ка овел лен прилика те овен дело тари амари организација кратко англедер те почминел о Армагедон? Џанѓола пе кај нане те мислина аѓаар! Амен мангаја те ова сар амаро небесно Дад, о Јехова, кова „сој милостиво хем сочувствително, на хољанела сигате, пхердо тано верно мангипе хем чачипе“ (2. Мој. 34:6). b
Несаве со ка дикхен сар тано уништимо о Баро Вавилон ка сетинен пе кај е Јеховаскере сведокија бут време керена сине лафи башо акава настан (Дикх ко пасусија 12-13) d
14-15. Дали некаскоро вечно живото зависинела таро адава кеда ка мерел или коте живинела? Објаснин. (Псалм 33:4, 5).
14 Понекогаш, баши некасте тари пумари фамилија кова со на служинѓа е Јеховаске, несаве пхраља или пхења шај вакерена: „Пошукар со муло англедер и бари неволја, соске аѓаар барем иси надеж кај ка воскреснинел“. Сигурно ола вакерена адава таро најшукар намере. Ама, дали некој ка шај те живинел вечно на зависинела таро адава кеда ка мерел. О Јехова тано совршено Судија, лескере одлуке тане секогаш исправна хем праведна. (Читин Псалм 33:4, 5.) Шај те ова сигурна кај „о Судија е цело пхувјакоро“ ка керел адава сој праведно (1. Мој. 18:25).
15 Исто аѓаар, разумно тано те мислина кај некаскоро вечно живото на зависинела таро адава коте живинела. О Јехова никогаш нане те вакерел башо милиоња мануша кај тане „бузња“ само адалеске со живинена ко пхувја коте со никогаш на сине лен прилика те шунен о хабери баши е Девлескоро Царство (Мат. 25:46). О праведно Судија е цело пхувјакоро грижинела пе бут повише секоле јекхеске таро акала мануша него амен со шај те кера адава. Амен на џанаја сар о Јехова ка водинел о буќа џикоте трајнела и бари неволја. Кеда ка дикхен со случинела пе ки бари неволја, несаве таро акала мануша шај ка овен поттикниме те верујнен ко Јехова хем те биринен те овен тари лескири страна кеда ов ка славинел пло анав англо са о мануша ки пхув (Езек. 38:16).
Откеда ка почминел и бари неволја,... дали иси шансе несаве со ка дикхен адала настанија те верујнен ко Јехова?
16. Со дознајнѓем башо Јехова? (Дикх хем и слика.)
16 Џикоте проучинѓем и Библија дознајнѓем кобор тано скапоцено е Јеховаске е манушескоро живото. Ов жртвујнѓа пле Чхавескоро живото те шај саринен амен те овел амен прилика те живина вечно (Јован 3:16). Сарине амен осетинѓем сар о Јехова мангипаја грижинела пе аменге (Иса. 49:15). Ов џанела секоле јекхе ко анав. Уствари, ов добором шукар џанела секоле јекхе амендар со, чак ако мераја, ов ка шај те воскреснинел амен соске памтинела секова детали амендар хем са адава ко со сетинаја амен! (Мат. 10:29-31). Сигурно, иси амен бари причина те ова увериме кај амаро небесно Дад, кова сој пхердо мангипаја, совршено ка судинел секоле јекхеске амендар, соске тано мудро, праведно хем милостиво (Јак. 2:13).
Шај те ова увериме кај о Јехова ка судинел секоле јекхеске ко совршено, праведно хем ко милостиво начин (Дикх ко пасус 16)
17. Со ка дикха ки следно статија?
17 Акала појасна објаснувања поможинена амен те хаљова кај о проповедибе тано поитно таро било кеда англедер. Соске шај те вакера акава? Хем, со поттикнинела амен ревно понадари да те проповедина о шукар хабери? О одговорија ко акала пучиба подетално ка дикха лен ки следно статија.
ГИЛИ 76 Кобор тано шукар кеда фалинеа е Девле
a Повише информацие башо адава соске сине керди акаја промена шај те аракхе ки статија „Ти сакаше да биде така“ ки Стражарска кула таро 15 март 2015, стр. 7-11.
b Откеда о Баро Вавилон ка овел уништимо, са е Јеховаскере слуге ка овен испитиме џикоте трајнела о напад таро Гог таро Магог. Секова јекх со ка биринел те овел тари страна е Девлескере народоскири откеда ка овел уништимо о Баро Вавилон, исто аѓаар ка овел испитимо.
c ОБЈАСНИМИ СЛИКА: Трин слике со сикавена соске несаве шај нане те шунен о шукар хабери со проповединаја ле ко цело свето: 1) Јекх џувли која со живинела ки пхув коте со баши главно религија нане безбедно те проповединел пе о шукар хабери, 2) јекх брачно пари кова со живинела ки пхув коте со башо политичко систем тано забранимо хем опасно тано те проповединел пе о шукар хабери хем 3) јекх мурш кова со живинела ко јекх бут дур тхан коте со пхаре ресела пе.
d ОБЈАСНИМИ СЛИКА: Јекх терни џувли која со мукхља о чачипа сетинела пе со сиклили башо адава сар ка овел уништимо о Баро Вавилон. Ој одлучинела палем те служинел е Јеховаске хем иранела пе ко пле родителија кола сој Сведокија. Ако случинела пе асавко нешто, амен мангаја те ова сар амаро милостиво хем сочувствително небесно Дад хем те радујна амен кеда несаво грешнико ка иранел пе ки лесте.
