STATIJA PROUČIBASKE 19
GILI 22 Tlo Carstvo te avel
So džanaja bašo adava sar o Jehova ka sudinel ki idnina?
O Jehova na mangela nikoj te ovel uništimo (2. PET. 3:9)
SO KA SIKLJOVA
Ka uverina amen kaj keda o Jehova ka sudinel ki idnina, adava ka kerel le ko ispravno hem pravedno način.
1. Soske šaj te vakera kaj živinaja ko jekh interesno vreme?
ŽIVINAJA ko jekh but interesno vreme! Sekova dive dikhaja sar ispolninena pe o bibliska proroštvija. Na primer, dikhaja sar „o severno cari“ hem „o južno cari“ borinena pe maškar peste te šaj te vladinen e svetoja (Dan. 11:40). Dikhaja sar o šukar haberi bašo e Devleskoro Carstvo propovedinela pe ki celi phuv hem milionja manuša birinena te služinen e Jehovaske (Isa. 60:22; Mat. 24:14). Osven adava, isi amen but duhovno „hrana ko pravo vreme“ (Mat. 24:45-47).
2. Ko so šaj te ova uverime, ama hem so valjani te haljova?
2 O Jehova ponadari da pomožinela amenge pošukar te haljova o važna nastanija so ka slučinen pe panda hari (Izr. 4:18; Dan. 2:28). Šaj te ova uverime kaj džikote na počminela i bari nevolja, ka džana sa so valjani te džana te šaj te ačhova verna hem ko jekhipe ko adava pharo periodi. Ama, mora te haljova kaj isi nesave bukja baši idnina kola so na džanaja len. Ki akaja statija ka dikha soske kergjem promene ko adava so vakeraja sine bašo nesave taro akala bukja. Palo adava, ka dikha nesave bukja kola so džanaja len baši idnina hem ka dikha ko savo način ka postapinel amaro nebesno Dad.
SO NA DŽANAJA
3. So vakeraja sine bašo adava dži keda o Jehova ka del šansa e manušenge te sikaven vera ki leste, hem soske mislinaja sine agjaar?
3 Angleder vakeraja sine kaj, otkeda ka počminel i bari nevolja, e manušen nane te ovel len više šansa te sikaven vera ko Jehova hem te preživinen o Armagedon. Agjaar vakeraja sine soske mislinaja sine kaj sekoja ličnost hem sekova nastan ko vreme keda sine o Potop, pretstavinela nešto so ka slučinel pe ko amaro vreme. Na primer, mislinaja sine kaj isto sar so o Jehova phanlja o udar tari arka angleder te počminel o Potop, agjaar hem keda ka počminel i bari nevolja ov „ka phandel o udar“ e manušenge taro e Satanaskoro sveto te šaj nikoj javer više te na ovel spasimo (Mat. 24:37-39).
4. Soske više na vakeraja kaj sa adava so slučingja pe ko e Noeskoro vreme isi le pobaro ispolnuvanje avdive?
4 Dali šaj te vakera kaj sekoja buti so slučingja pe ko vreme keda sine o Potop pretstavinela nešto so ka slučinel pe ki idnina? Na, našti te vakera agjaar. Soske? Adaleske so nigde ki Biblija na pišinela adava. a Točno tano kaj o Isus sporedingja e Noeskere dive e vremea keda ov ka ovel prisutno. Ama, ov na vakergja kaj sekova nastan taro vreme e Noeskoro ka ovel le pobaro ispolnuvanje ki idnina, a ni na vakergja kaj adava so phanlja pe o udar e arkakoro, isi le nesavo proročko značenje. Sepak, akava na značinela kaj našti te sikljova nešto taro izveštaj bašo Noe hem bašo Potop.
5. a) Sar o Noe sikavgja vera angleder o Potop? (Evreija 11:7; 1. Petareskoro 3:20). b) Savi sličnost isi maškar e Noeskoro propovedibe hem amaro propovedibe avdive?
5 Keda o Noe šungja o predupreduvanje taro Jehova, ov sikavgja kaj isi le vera adalea so gradingja arka. (Čitin Evreija 11:7; 1. Petareskoro 3:20.) Slično, o manuša so šunena o šukar haberi bašo e Devleskoro Carstvo, mora ple postapkencar te sikaven kaj isi len vera (Apo. 3:17-20). O Petar vakergja kaj o Noe „propovedinela sine i pravednost“ (2. Pet. 2:5). Sepak, sar so dikhlem ki angluni statija, amen na džanaja dali angleder te avel o Potop, o Noe hem leskiri familija probingja te propovedinel sekole jekhe manušeske so živinela sine ki phuv. Amen avdive trudinaja amen te propovedina e manušenge ki celi phuv hem adava keraja le revno. Sepak, kobor hem te trudina amen, amen ka našti te propovedina sekole jekhe manušeske ki phuv angleder te avel o krajo. Soske?
6-7. Soske šaj te vakera kaj amen nane te uspejna te vakera o šukar haberi sekole jekheske angleder te avel o krajo?
6 Razmislin bašo adava so vakergja o Isus kobor ka propovedinel pe. Ov prorokujngja kaj o šukar haberi „ka propovedinel pe ko celo sveto, te šaj o manuša taro sa o narodija te šunen le“ (Mat. 24:14). Avdive akava proroštvo ispolninela pe sar nikogaš angleder. O haberi bašo Carstvo tano dostapno ko poviše taro 1.000 čhibja. A preku i internet-stranica jw.org, avdive poviše manuša ko sveto šaj te doznajnen o haberi bašo Carstvo.
7 Sepak, o Isus isto agjaar vakergja ple učenikonge kaj ola nane te završinen e propovedibaja ko sa o dizja, ili javere lafencar te propovedinen sarinenge, angleder ov te avel (Mat. 10:23; 25:31-33). E Isuseskere lafija ka ispolninen pe ko amaro da vreme. Milionja manuša avdive živinena ko thana kote so našti slobodno te propovedina. Isto agjaar, sekoja minuta bijangjovena but čhave. Amen daja amendar sa te šaj te ingara o šukar haberi „sekole nacijake, plemeske, čhibjake hem narodoske“ (Otk. 14:6). Ama jasno tano kaj nane te uspejna te vakera o šukar haberi sekole jekhe manušeske angleder te avel o krajo.
8. Kova pučibe šaj ka puča amen bašo adava sar o Jehova ka sudinel e manušenge ki idnina? (Dikh hem o slike.)
8 Taro adava so dikhlem dži akana, šaj ka puča amen: So ka ovel okolencar so nane te ovel len prilika te šunen o šukar haberi angleder te počminel i bari nevolja? Sar o Jehova hem leskoro Čhavo, kole so dengja le i zadača te sudinel, ka postapinen lencar? (Jovan 5:19, 22, 27; Apo. 17:31). Ko glavno stiho tari akaja statija pišinela kaj o Jehova „na mangela nikoj te ovel uništimo“, namesto adava ov mangela „sarinen te ovel len prilika te kainen pe“ (2. Pet. 3:9; 1. Tim. 2:4). Iako džanaja akala bukja bašo Jehova, ov panda na otkringja amenge o odgovor taro akava pučibe. Džangjola pe, o Jehova nane dužno te vakerel amenge so kergja ili so ka kerel.
Sar ka postapinel o Jehova okolencar so šaj nane te ovel len prilika te šunen o šukar haberi angleder te počminel i bari nevolja? (Dikh ko pasus 8) c
9. So otkringja amenge o Jehova ki Biblija?
9 O Jehova ko plo Lafi otkringja amenge nesave taro bukja so ka kerel len. Na primer, i Biblija vakerela amenge kaj o Jehova ka iranel ko životo e nepravedna manušen kolen so na sine len prilika te šunen bašo šukar haberi hem te meninen pumare postapke (Apo. 24:15; Luka 23:42, 43). Akava ingarela dži ko javera važna pučiba.
10. Kola javera pučiba isi amen?
10 Dali sarine so ka meren džikote trajnela i bari nevolja ka oven uništime zasekogaš bizi nadež te voskresninen? I Biblija jasno vakerela kaj okola so protivinena pe e Jehovaske hem kola so ka oven uništime lestar hem taro leskere vojske ko Armagedon, nane te oven voskresnime (2. Sol. 1:6-10). Ama, so ka ovel okole manušencar, kola so na primer ki bari nevolja mule taro nasvalipe ili phuripe, ki nesavi nesrekja ili sine mudarde? (Prop. 9:11; Zah. 14:13). Dali nekoj taro akala manuša ka oven maškar o nepravedna kola so ka voskresninen ko nevo sveto? Na džanaja.
SO DŽANAJA
11. Sprema koja važno buti ka sudinel pe e manušenge ko Armagedon?
11 Bašo adava so ka slučinel pe ki idnina džanaja nekobor bukja. Na primer, džanaja kaj ko Armagedon e manušenge ka sudinel pe sprema adava sar ponašingje pe e Hristoseskere phralencar (Mat. 25:40). Okolenge so ka ovel vakerdo kaj tane bakhre, više sikavgje kaj poddržinena e pomazanikon hem e Hristose. Isto agjaar, džanaja kaj nesave taro e Hristoseskere phralja ka oven panda ki phuv otkeda ka počminel i bari nevolja hem ka oven lende ko nebo kratko angleder te počminel o Armagedon. Sa džikote nesave taro e Hristoseskere phralja ka oven panda ki phuv, šaj nesave iskrena manušen ka ovel len prilika te poddržinen len hem i zadača so kerena la (Mat. 25:31, 32; Otk. 12:17). Soske akala bukja tane važna?
12-13. Sar šaj nesave te reagirinen otkeda ka dikhen kaj o Baro Vavilon tano uništimo? (Dikh hem o slike.)
12 Čak otkeda ka počminel i bari nevolja, nesave so ka dikhen sar tano uništimo o Baro Vavilon šaj ka setinen pe kaj e Jehovaskere svedokija više but vreme angleder vakerena sine kaj ka slučinel pe adava. Dali isi šanse nesave so ka dikhen adala nastanija te verujnen ko Jehova? (Otk. 17:5; Ezek. 33:33).
13 Ako slučinela pe asavko nešto, adava ka ovel slično adalea so slučingja pe ko Egipet ko e Mojseeskoro vreme. Setin tut kaj but manuša taro javera nacie sine e Izraelconcar keda iklile taro Egipet. Nesave taro adala manuša šaj počmingje te verujnen ko Jehova keda dikhle kaj e Mojseeskere predupreduvanja bašo deš nevolje ispolningje pe (2. Moj. 12:38). Ako slučinela pe nešto slično otkeda ka ovel uništimo o Baro Vavilon, dali ka mislina kaj nane fer adava so nesave manuša ka ovel len prilika te oven delo tari amari organizacija kratko angleder te počminel o Armagedon? Džangjola pe kaj nane te mislina agjaar! Amen mangaja te ova sar amaro nebesno Dad, o Jehova, kova „soj milostivo hem sočuvstvitelno, na holjanela sigate, pherdo tano verno mangipe hem čačipe“ (2. Moj. 34:6). b
Nesave so ka dikhen sar tano uništimo o Baro Vavilon ka setinen pe kaj e Jehovaskere svedokija but vreme kerena sine lafi bašo akava nastan (Dikh ko pasusija 12-13) d
14-15. Dali nekaskoro večno životo zavisinela taro adava keda ka merel ili kote živinela? Objasnin. (Psalm 33:4, 5).
14 Ponekogaš, baši nekaste tari pumari familija kova so na služingja e Jehovaske, nesave phralja ili phenja šaj vakerena: „Pošukar so mulo angleder i bari nevolja, soske agjaar barem isi nadež kaj ka voskresninel“. Sigurno ola vakerena adava taro najšukar namere. Ama, dali nekoj ka šaj te živinel večno na zavisinela taro adava keda ka merel. O Jehova tano sovršeno Sudija, leskere odluke tane sekogaš ispravna hem pravedna. (Čitin Psalm 33:4, 5.) Šaj te ova sigurna kaj „o Sudija e celo phuvjakoro“ ka kerel adava soj pravedno (1. Moj. 18:25).
15 Isto agjaar, razumno tano te mislina kaj nekaskoro večno životo na zavisinela taro adava kote živinela. O Jehova nikogaš nane te vakerel bašo milionja manuša kaj tane „buznja“ samo adaleske so živinena ko phuvja kote so nikogaš na sine len prilika te šunen o haberi baši e Devleskoro Carstvo (Mat. 25:46). O pravedno Sudija e celo phuvjakoro grižinela pe but poviše sekole jekheske taro akala manuša nego amen so šaj te kera adava. Amen na džanaja sar o Jehova ka vodinel o bukja džikote trajnela i bari nevolja. Keda ka dikhen so slučinela pe ki bari nevolja, nesave taro akala manuša šaj ka oven pottiknime te verujnen ko Jehova hem te birinen te oven tari leskiri strana keda ov ka slavinel plo anav anglo sa o manuša ki phuv (Ezek. 38:16).
Otkeda ka počminel i bari nevolja,... dali isi šanse nesave so ka dikhen adala nastanija te verujnen ko Jehova?
16. So doznajngjem bašo Jehova? (Dikh hem i slika.)
16 Džikote proučingjem i Biblija doznajngjem kobor tano skapoceno e Jehovaske e manušeskoro životo. Ov žrtvujngja ple Čhaveskoro životo te šaj sarinen amen te ovel amen prilika te živina večno (Jovan 3:16). Sarine amen osetingjem sar o Jehova mangipaja grižinela pe amenge (Isa. 49:15). Ov džanela sekole jekhe ko anav. Ustvari, ov doborom šukar džanela sekole jekhe amendar so, čak ako meraja, ov ka šaj te voskresninel amen soske pamtinela sekova detali amendar hem sa adava ko so setinaja amen! (Mat. 10:29-31). Sigurno, isi amen bari pričina te ova uverime kaj amaro nebesno Dad, kova soj pherdo mangipaja, sovršeno ka sudinel sekole jekheske amendar, soske tano mudro, pravedno hem milostivo (Jak. 2:13).
Šaj te ova uverime kaj o Jehova ka sudinel sekole jekheske ko sovršeno, pravedno hem ko milostivo način (Dikh ko pasus 16)
17. So ka dikha ki sledno statija?
17 Akala pojasna objasnuvanja pomožinena amen te haljova kaj o propovedibe tano poitno taro bilo keda angleder. Soske šaj te vakera akava? Hem, so pottikninela amen revno ponadari da te propovedina o šukar haberi? O odgovorija ko akala pučiba podetalno ka dikha len ki sledno statija.
GILI 76 Kobor tano šukar keda falinea e Devle
a Poviše informacie bašo adava soske sine kerdi akaja promena šaj te arakhe ki statija „Ti sakaše da bide taka“ ki Stražarska kula taro 15 mart 2015, str. 7-11.
b Otkeda o Baro Vavilon ka ovel uništimo, sa e Jehovaskere sluge ka oven ispitime džikote trajnela o napad taro Gog taro Magog. Sekova jekh so ka birinel te ovel tari strana e Devleskere narodoskiri otkeda ka ovel uništimo o Baro Vavilon, isto agjaar ka ovel ispitimo.
c OBJASNIMI SLIKA: Trin slike so sikavena soske nesave šaj nane te šunen o šukar haberi so propovedinaja le ko celo sveto: 1) Jekh džuvli koja so živinela ki phuv kote so baši glavno religija nane bezbedno te propovedinel pe o šukar haberi, 2) jekh bračno pari kova so živinela ki phuv kote so bašo političko sistem tano zabranimo hem opasno tano te propovedinel pe o šukar haberi hem 3) jekh murš kova so živinela ko jekh but dur than kote so phare resela pe.
d OBJASNIMI SLIKA: Jekh terni džuvli koja so mukhlja o čačipa setinela pe so siklili bašo adava sar ka ovel uništimo o Baro Vavilon. Oj odlučinela palem te služinel e Jehovaske hem iranela pe ko ple roditelija kola soj Svedokija. Ako slučinela pe asavko nešto, amen mangaja te ova sar amaro milostivo hem sočuvstvitelno nebesno Dad hem te radujna amen keda nesavo grešniko ka iranel pe ki leste.
