19. ČLANKO PROUČIBASE
ĐILI 22 Te avel to Kraljevstvo
So đanaja ando odova sar o Jehova ka sudini ki budućnost?
O Jehova na mangela nijekh te merel (2. PETR. 3:9)
SO KA SIKLJOVA?
Šaj te ova uverime ko odova so o Jehova ki budućnost pravedno ka sudini.
1. Sose šaj te phena so živinaja ko jekh zanimljivo vreme?
AMEN živinaja ko jekh but zanimljivo vreme. Svako dive anglo amare jaćha ispuninena pe e biblijake proročanstvija. Na primer, dikhaja sar „o kralj ando sever“ hem „o kralj ando jug“ borinena pe jekh jekheja sose mangena te mothoven koj tano pozoralo (Dan. 11:40; fusn.). Amen dikhaja sar i šukar vest ando Devleso Kraljevstvo propovedini pe ko celo sveto hem milionija manuša prihvatinena o ćaćipe (Is. 60:22; Mat. 24:14). Isto ađahar, „ko pravo vreme“ dobinaja duhovno hrana (Mat. 24:45-47).
2. Ko so šaj te ova sigurna hem so valjani te priznajina?
2 O Jehova nastavini te pomožini amen te haljova o važna događaja kola pana hari ka oven (Posl. 4:18; Dan. 2:28). Šaj te ova sigurna so ked ka počmini i bari nevolja, amen ka đana sa so valjani te đana šaj te aćhova verna hem ko jekhipe ko odova pharo vreme. Ama, mora te priznajina so isi disave buća andi budućnost kola na đanaja. Ko akava članko, najangleder ka razmotrina sose meninđam odova so angleder phenđam ando disave događaja. Palo odova, ka ponovina so đanaja ando buća kola ka oven ki budućnost hem sar amaro nebesko Dad ka postupini.
SO NA ĐANAJA
3. So phenđam angleder, đi ked o manuša ka ovel len prilika te birinen te oven ki Jehovasi strana hem sose ađahar mislinđam?
3 Angleder phenđam so ked ka počmini i bari nevolja više niko na ka ovel le prilika te ovel ki Jehovasi strana hem te preživini o Armagedon. Odova phenđam odolese so mislinđam so o izveštaj ando Potop isi le proročansko značenje. Na primer, đanaja so niko našti hine te khuvel ki arka palo odova so o Jehova phanlja o udara. Odolese mislinđam so niko više na ka ovel le prilika te počmini te služini e Jehovase ked i bari nevolja ka počmini (Mat. 24:37-39).
4. Sose akana phenaja so o izveštaj ando Potop nane le proročansko značenje?
4 Da li o izveštaj ando Potop isi le proročansko značenje? O odgovor tano na. Sose? Odolese so i Biblija na vaćeri odova. a Amen đanaja so o Isus uporedinđa „e Nojese dive“ e vremeja andi pi prisutnost. Ama, na phenđa so sa o buća kola desinđe pe ko Nojeso vreme ka ovel len disavo pobaro ispunjenje ki budućnost, sar soj tano odova ked o Jehova phanlja o udar andi arka. Ama, odova na značini so amen našti te sikljova ništa kotar izveštaj ando Noje hem ando Potop.
5. (a) So ćerđa o Noje angleder te avel o Potop? (Jevrejima 11:7; 1. Petrova 3:20) (b) Save sličnostija isi maškaro amaro hem e Nojeso propovedibe?
5 Ked o Noje šunđa e Jehovaso upozorenje, ov mothovđa so isi le vera ađahar so ćerđa i arka. (Čitin Jevrejima 11:7; 1. Petrova 3:20.) Isto ađahar, o manuša kola avdije šunena i šukar vest valjani te mothoven vera ađahar so ka primeninen odova so sikljona (Dela 3:17-20). O Petar ando Noje phenđa so hine „propovednik andi pravednost“ (2. Petr. 2:5). Ama, sar so vaćerđam ko prethodno članko, amen na đanaja da li o Noje propovedinđa sa e manušenđe angleder te avel o Potop. Avdije, amen hijam but revna hem mangaja sarinenđe te propovedina. Ama, kobor god te trudina amen, verovatno na ka resa te propovedina sarinenđe angleder te avel o kraj. Sose?
6-7. Sose šaj te phena so amen na ka resa te propovedina sa e manušenđe angleder te avel o kraj?
6 Razmislin ando odova so o Isus phenđa kobor ka propovedini pe i šukar vest. Ov prorekninđa so i šukar vest „ka propovedini pe ko celo sveto sar svedočanstvo sa e narodonđe“ (Mat. 24:14). Avdije, akava proročanstvo ćaće ispunini pe. I poruka ando Devleso Kraljevstvo tani dostupno ko prekalo 1 000 ćhibja hem sebepi amaro sajt but manuša ki celo phuv šaj te šunen odija vest.
7 Ama, o Isus phenđa pe učenikonenđe so „na ka resen te đan ko sa o izraelska dizja“ ili te propovedinen sarinenđe đi ov na avela (Mat. 10:23; 25:31-33). E Isusese lafija odnosinena pe hem ko amaro vreme. But manuša živinena ko thana kaj tano amaro delo ograničimo. Isto ađahar, svako minuti ko sveto bijanđona but bebe. Amen daja sa amendar te propovedina „svakona nacijaće, svakone plemese, svakona ćhibjaće hem svakone narodose“ (Otkr. 14:6). Ama, ipak na ka resa đi ko sa o manuša ki phuv angleder te avel o kraj.
8. So šaj te puća amen? (Dikh i slika.)
8 Sebepi odova so đi akana razmotrinđam, šaj pućaja amen: „So ka ovel okolencar kola na hine len prilika te šunen i šukar vest angleder te avel i bari nevolja? Sar o Jehova hem oleso Ćhavo ka sudinen olenđe?“ (Jov. 5:19, 22, 27; Dela 17:31). O vodećo stih aso akava članko phenela so o Jehova „na mangela nijekh te merel“. Umesto odova, ov mangela „sare te pokajinen pe“ (2. Petr. 3:9; 1. Tim. 2:4). Iako đanaja akava, o Jehova pana na vaćerđa amenđe sar ka sudini e manušenđe kola niked na hine len prilika te šunen i šukar vest. Naravno, ov nane obavezno te phenel amenđe so ćerela ja so ka ćerel ki budućnost.
So ka ovel okolencar kola na hine len prilika te šunen i šukar vest angleder so ka počmini i bari nevolja? (Dikh o 8. odlomko) c
9. So o Jehova otkrijinđa amenđe ki Biblija?
9 Ko po Lafi, o Jehova otkrijinđa amenđe disave buća kola ka ćerel. Na primer, i Biblija phenela so o Jehova ka uskrsnini e „nepravedna“ manušen kola na hine len prilika te šunen i šukar vest hem te meninen pe (Dela 24:15; Luka 23:42, 43). Ama, sebepi odova pojavinena pe pana disave pućiba.
10. So disave pana šaj te pućen pe?
10 Da li sare kola ka meren đi ka trajini i bari nevolja ka oven zauvek uništime hem na ka ovel len nada aso uskrsenje? Ki Biblija jasno pisini so o protivnikija, kolen o Jehova hem olese anđelija ka uništinen ko Armagedon, na ka uskrsninen (2. Sol. 1:6-10). Ama, so ka ovel avere manušencar? Na primer, okolencar kola šaj ka meren sebepi o prirodna katastrofe, nabormipe, phuripe ja diso aver? (Prop. 9:11; Zah. 14:13). Da li disave olendar ka oven maškaro „nepravedna“ manuša kola ka uskrsninen ko nevo sveto? Amen odova na đanaja.
SO ĐANAJA
11. Sar ka sudini pe e manušenđe ko Armagedon?
11 Amen đanaja nekobor buća ando događaja kola ka oven. Na primer, đanaja so ko Armagedon e manušenđe ka sudini pe premalo odova sar ponašinđe pe premalo Hristese phralja (Mat. 25:40). Okola kola ka mothoven podrška e pomazanikonenđe hem e Hristese ka oven maškaro bakre. Isto ađahar, đanaja so disave pomazanikija pana ka oven ki phuv palo odova so i bari nevolja ka počmini hem na ka oven lende ko nebo sa đi na počmini o Armagedon. Sa đi e Hristese phralja tane pana ki phuv, moguće tano so disave manuša ka ovel len prilika te podržinen olen hem odova so on ćerena (Mat. 25:31, 32; Otkr. 12:17). Sose tane važna akala buća?
12-13. Sar disave šaj ka reagujinen palo odova so ka ovel uništimo o „Baro Vavilon“? (Dikh o slike.)
12 Čak hem palo odova so ka počmini i bari nevolja, moguće tano so disave kola ka dikhen soj tano o Baro Vavilon uništimo ka setinen pe so e Jehovase svedokija beršencar phenđe so odova ka ovel. Da li sebepi odova ka meninen po stav hem ka mothoven vera ko Jehova? (Otkr. 17:5; Jezek. 33:33).
13 Ako odova desini pe, onda ka ovel slično sar odova so desinđa pe ko Egipat ko Mojsijeso vreme. Setin tut so „but avera manuša“ zajedno e Izraelcencar ikljilje ando Egipat. Disave olendar počminđe te verujinen ko Jehova palo odova so nakhlje o deš nevolje (Izl. 12:38). Ako diso slično ka desini pe palo odova so o Baro Vavilon ka ovel uništimo, da li ka razočarina amen so o manuša ka počminen te služinen e Jehovase hari angleder te avel o kraj? Naravno so na! Amen mangaja te oponašina amare nebesko Dade kova tano „milosrdno hem samilosno, strpljivo, pherdo verno mangipaja hem ćaćipaja“ (Izl. 34:6). b
Disave kola ka dikhen soj tano o „Baro Vavilon“ uništimo ka setinen pe so e Jehovase svedokija beršencar angleder vaćerđe ando odova događaj (Dikh o 12. hem o 13. odlomko) d
14-15. Da li i budućnost andi jekh osoba zavisini ando odova ked ka merel ili kaj akana živini? Objasnin. (Psalam 33:4, 5)
14 Disavo puti šaj te šuna sar o phralja hem o phenja phenena: „Pošukar tano mo rođako kova na služini e Jehovase te merel angleder so ka počmini i bari nevolja, sose tegani šaj te ovel le nada so ka uskrsnini.“ Ked odova phenena sigurno isi len šukar namera. Ama, i budućnost andi jekh osoba na zavisini ando odova ked mulji. O Jehova tano savršeno Sudija, olese odluke uvek tane ispravna. (Čitin Psalam 33:4, 5.) Odolese, šaj te ova sigurna so o „Sudija andi celo phuv“ ka ćerel okova soj tano pravedno (Post. 18:25).
15 Isto ađahar, da li disavo manuš ka ovel le prilika te živini večno na zavisini odolestar kaj živini. Našti ni te zamislina so o Jehova bute manušen ka prosudini sar „jarcija“ samo odolese so živinena ko phuvja kaj nane len prilika te šunen i šukar vest (Mat. 25:46). Šaj te ova sigurna so o pravedno Sudija andi celo phuv brinini pe olendar pobuter nego amen. Amen na đanaja so o Jehova ka ćerel đi ka trajini i bari nevolja. Šaj disave olendar ka ovel len prilika tegani te sikljon ando Jehova hem te počminen te verujinen upro leste ked ov ki celo phuv ka posvetini po anav (Jezek. 38:16).
Palo odova so ka počmini i bari nevolja, da li disave ka meninen po stav hem ka mothoven vera ko Jehova?
16. So đanaja ando Jehova? (Dikh i slika.)
16 Đi proučinđam e Devleso Lafi, amen haljiljam kobor hijam lese vredna. Ov dinđa pe Ćhaveso životi sar žrtva te šaj zauvek te živina (Jov. 3:16). Sare osetinđam kobor o Jehova mangela amen (Is. 49:15). Ov đanela svakoneso anav. U stvari, ov odobor šukar đanela amen so ako jekh dive meraja, ov šaj te uskrsnini amen odolese so đanela svako detalji amendar (Mat. 10:29-31). Ćaće isi amen šukar razlog te verujina so o Jehova savršeno ka sudini svakone manušese ki phuv odolese soj tano razumno, pravedno hem milosrdno (Jak. 2:13).
Šaj te ova uverime so o Jehova savršeno ka sudini svakone manušese ki phuv odolese soj tano razumno, pravedno hem milosrdno (Dikh o 16. odlomko)
17. Sostar ka vaćera ko aver članko?
17 Akala neve objašnjenja pomožinena amen te haljova so o propovedibe tano avdije pohitno nego iked angleder. Sose šaj te phena odova? So podstaknini amen te na ćhinava te propovedina i šukar vest? Odolestar ka vaćera ko aver članko.
ĐILI 76 Kobor tano šukar te hvalina e Devle
a O objašnjenje sose tano akava menimo šaj te arakhe ko članko „Ti si hteo da tako bude“, ki Stražarsko kula kotar 15. mart 2015. berš, str. 7-11.
b Palo odova so o Baro Vavilon ka ovel uništimo, i vera ando sa e Jehovase sluge ka ovel ispitimi ked o Gog ando Magog ka napadini len. Ka ovel ispitimi hem i vera ando sa okola kola tegani ka počminen te služinen e Jehovase.
c SO DIKHAJA KO SLIKE: Trin scene kola mothovena sose disave na hine len prilika te šunen i šukar vest: (1) Jekh romni živini ki phuv kuri tano opasno te propovedini pe sebepi i glavno religija, (2) jekh par živini ki phuv kuri o vlastija na mukhena te propovedini pe hem šaj te ovel strogo kaznimo sebepi odova hem (3) jekh manuš živini ko jekh but dur than kaj niko nane le pristup.
d SO DIKHAJA KI SLIKA: Jekh terni romni koja tani neaktivno setini pe so sikljilji ando odova so o „Baro Vavilon“ ka ovel uništimo. Oj odlučini te irini pe e Jehovase hem avela ko pe roditeljija kola tane Svedokija. Ako desinena pe asavke buća, amen mangaja te ova sar amaro nebesko Dad kova tano milosrdno hem samilosno hem te radujina amen ked jekh grešniko irini pe.
