ARTICOLO STUDIOSCHE 19
GHILI 22 Te avel chio Regato!
So jianas anda i cris cai va anel-la o Iehova?
„O Iehova . . . ci camel ca vroiech te avel distrugime.” (2 PET. 3:9)
ANDA SO DAS DUMA
Daisaras te pachias ciaces că, cana o Iehova va cherela peschi cris opral le manușa, vo va cherela so si orta hai lașio.
1. Sostar daisaras te phenas că le ghiesa ande save traisaras sile importanto?
LE GHIESA ande save traisaras sile importanto. Le profeții la Bibliache pheren-pe tela amare iacha. Sar exemplo, dichas sar „o rege le nordosco” hai „o rege le sudosco” han-pe iech averesa anda con te rail opral sea le manușa. (Dan. 11:40, n.t.) Mai but, predichisaras i vestea lași anda o Regato le Devlesco pe sea i phuv hai milioanea manușa alosaren te slujin le Iehovasche. (Is. 60:22; Mat. 24:14) Mai but, si amenghe dino „haben [spiritualo] co timpo lașio”. (Mat. 24:45-47)
2. Ande soste daisaras te pachias hai so trebul te jianas anda so va avela ando viitorii?
2 O Iehova ajutil amen vi mai dur te hachiaras mai mișto le buchia importanto cai va avena. (Prov. 4:18; Dan. 2:28) Daisaras te pachias ciaces că, cana va astarela o baro necazo, amen va avela te jianas sea so trebul caște așias zurale ando pachiamos hai te avas chidine iech pașa aver. Tha, si vi buchia cai ci jianas-len anda so va avela ando viitorii. Ande cado articolo, va avela te dichas mai anglal sostar parudeam amaro hachiarimos anda chichiva buchia cai va avena ando viitorii. Pala codoia, va avela te dichas chichiva buchia cai jianas-len anda amaro viitorii hai anda so va cherela amaro Dad cerisco.
SO CI JIANAS
3. So phendeam mai anglal anda ji cana daștinas le manușa te nachen de i rig le Iehovaschi hai sostar pachiaiam cadaia?
3 Mai anglal, phendeam că, pala so va astarela o baro necazo, le manușa ci va mai daștina te nachen de i rig le Iehovaschi hai te așen jiuvinde ando Armaghedono. Atunci hachiardeam că fiesavo manuș hai fiesavi buchi cai întâmplosardea-pe co Potopo sicavelas vareso cai va avela te întâmplol-pe ando viitorii. Sar exemplo, amen phendeam că, cadea sar o Iehova phandadea o udar catar i arca angla te astarel o Potopo, sa cadea, cana va astarela o baro necazo, o Iehova „va phandavela o udar” angla i lumea nasul le Satanoschi, hai le manușa ci va mai daștina te aven salvime. (Mat. 24:37-39)
4. Sostar ci mai phenas că i relatarea anda o Potopo sicavel vroiech profeția cai va pherela-pe ando viitorii? Explichin.
4 Daisaras te pachias că fiesavi buchi catar o Potopo sicavelas vareso cai avelas te pherel-pe ando viitorii? Nici. Sostar? Anda codoia că i Biblia ci phenel cadaia. a Si ciaces, o Isus phendea că leschi prezența si sar „le ghiesa le Noesche”. Cu sea cadala, vo ci phendea că so întâmplosardea-pe andel ghiesa le Noesche avelas te pherel-pe vi ando viitorii, sar avelas o fapto că o Iehova phandadea o udar la arcaco. Cu sea cadala, ci daisaras te phenas că i relatarea anda o Noe hai anda o Potopo na-i lași anda amende hai că ci ajutil amen te țârdas miștimata.
5. a) So cărdea o Noe angla o Potopo? (Evrei 11:7; 1 Petru 3:20) b) Sar ameal i predicarea cai cărdea-la o Noe la buchiasa cai cheras-la amen aghies andi predicarea?
5 Pala so așundea că o Iehova avelas te anel o baro Potopo, o Noe sicadea pesco pachiamos hai vazdea i arca. (Citisar Evrei 11:7; 1 Petru 3:20.) Sa cadea, vi le manușa cai așunen o mesajo anda o Regato le Devlesco trebun te sicaven pengo pachiamos prin so cheren. (Fap. 3:17-20) O Petru phendea anda o Noe că sas „iech predicatorii le ciacimasco”. (2 Pet. 2:5) Tha, cadea sar dichleam ando articolo cai nachlea, ci jianas dacă o Noe predichisardea fiesave manușesche pa i phuv angla te avel o Potopo. Vi amen aghies las partea ca i predicarea cai cherel-pe pe sea i phuv hai iech bari iag thabol ande amare ile, cai cherel amen te das duma le manușența anda o Del. Cu sea cadala, chiar cana das sea amari zor, ci daisaras te arăsas ca fiesavo manuș pa i phuv hai te phenas lesche i vestea lași angla te avel o sfârșito. Sostar?
6, 7. Sostar daisaras te phenas că ci va avela te predichisaras i vestea lași fiesave manușesche pa i phuv angla te avel o sfârșito? Explichin.
6 Te gândisaras amen ca so phendea o Isus anda chichi de dur va arăsăla amari buchi anda i predicarea. Vo phendea de mai anglal că i vestea lași „va avela phendi pe sea i phuv sar mărturia anda sea le națiuni”. (Mat. 24:14) Aghies, cadai profeția pherel-pe mai but sar oricana. O mesajo anda o Regato silo phendo ande mai but sar 1 000 șiba hai, prin amaro site-o jw.org, le mai but manușa pa i phuv daștin te așunen i vestea lași.
7 Cu sea cadala, o Isus phendea pesche discipolenghe că „ci va arăsăna te phiren ande sea le forurea”, adică ci va predichina fiesave manușesche angla so te avel vo. (Mat. 10:23; 25:31-33) Le dumes le Isusosche pheren-pe vi ande amare ghiesa. Milioanea manușa train aghies ande thana ande save i lucrarea de predicare sili așadi. Mai but, ande fiesavo minuto, năștin-pe șăla șiavorre. Le manușa le Iehovasche den sea penghi zor caște phenen i vestea lași ande orisavi „națiunea, tribo [hai] șib”. (Rev. 14:6) Tha, o ciacimos si că ci daisaras te ajucăras amen te predichisaras i vestea lași fiesave manușesche pa i phuv angla te avel o sfârșito.
8. So pușimos daisaras te șioas amenghe anda i cris cai va cherela-la o Iehova? (Dich vi le imagini.)
8 Tha daștil-pe că pușias amen: so va avela codolența cai ci daisarde te așunen i vestea lași angla te astarel o baro necazo? So va cherela lența o Iehova hai lesco Șiavo, casche sas dini i buchi te cherel cris le manușenghe? (Ioan 5:19, 22, 27; Fap. 17:31) So jianas si că o Iehova „ci camel ca vroiech te avel distrugime, tha camel ca savore te arăsăn ca i căința”, cadea sar sicavel vi o verseto pe savo bazol-pe o articolo. (2 Pet. 3:9; 1 Tim. 2:4) Cu sea cadala, trebul te hachiaras că o Iehova ci sicadea amenghe încă o răspunso cadale pușimaste. Si ciaces, vo ci trebul te phenel amenghe chanci anda so cherel sau so va cherela.
Sar va cherela o Iehova i cris opral codola cai ci daisarde te așunen i vestea lași angla te astarel o baro necazo? (Dich o paragrafo 8) c
9. So sicadea amenghe o Iehova andi Biblia?
9 Cu sea cadala, ande pesco Lil, o Iehova sicadea amenghe chichiva buchia cai va cherela-len ando viitorii. Sar exemplo, andi Biblia phenel-pe că o Iehova va anela parpale viațate le manușen „neorta”, cai ci daisarde te așunen i vestea lași hai te paruven pengo phiraimos. (Fap. 24:15; Luca 23:42, 43) Tha, cado ciacimos cherel amen te pușias amen vi aver buchia importanto.
10. So aver pușimata daisaras te șioas amenghe?
10 Tha, so va avela le manușența cai va merena ando baro necazo? Ci va avela nicieches i speranța te avel uștiado parpale viațate? I Biblia sicavel claro că codola cai așen contra le Iehovasche hai leschi armata co Armaghedono va avena chosle anda sea o timpo, bi te avel-len i speranța te aven andine parpale viațate. (2 Tes. 1:6-10) Tha, so daisaras te phenas anda aver manușa, sar avenas codola cai meren anda codoia că sile nasfale, sile phure, cheren iech accidento sau sile mudarde avere manușendar? (Ecl. 9:11; Zah. 14:13) Daștin chichiva anda lende te aven mașcar codola „neorta” cai va avena uștiade andal mule andi lumea nevi? Ci jianas.
SO JIANAS
11. Pala so buchi va cherela-pe i cris le manușenghe co Armaghedono?
11 Te dichas chichiva buchia cai jianas-len anda so va avela ando viitorii. Sar exemplo, jianas că co Armaghedono le manușenghe va avela lenghe cărdi cris pala sar phirade-pe le phralența le Cristososche. (Mat. 25:40) Codola dichle sar „bacrea” va sicavena că sile pașa o Cristos hai pașa lesche phrala machle. Sa cadea, jianas că chichiva phrala le Cristososche va avena încă pi phuv pala so va astarela o baro necazo hai că va avena line co cerii țâra timposa angla te astarel o Armaghedono. Chichi timpo le phrala le Cristososche va avena încă pi phuv, daștil-pe că codola le ilesa ujo va daștina te așen de i rig codolenghi machle hai te susținin i buchi cai cheren-la. (Mat. 25:31, 32; Rev. 12:17) Tha, sostar sile importanto cadal buchia?
12, 13. So daștil-pe că va cherena chichiva manușa pala so va dichena că „o Babilono o Baro” sas-lo choslo? (Dich vi le imagini.)
12 Daștil-pe că, pala so va astarela o baro necazo, chichiva manușa va dichena sar va avela distrugime „o Babilono o Baro” hai va anena penghe andi goghi că le Martori le Iehovasche phende de mai anglal că va întâmplola-pe cadai buchi. Cadea că, daștinas chichiva mașcar lende te paruven pengo phiraimos hai te șion pengo pachiamos ando Iehova? (Rev. 17:5; Ezec. 33:33)
13 Te dichas so întâmplosardea-pe andel ghiesa le Moisesche. Cana le israeliți tiliarde anda o Egipto, găle lența „iech bari mulțimea manușența de orisavo felo”. Daștil-pe că chichiva mașcar lende astarde te pachian ando Iehova cana dichle sar pherdile-pe le deș plăgi. (Ex. 12:38) Dacă le buchia va avena sa cadea pala so o Babilono o Baro va avela choslo, va avela te holiaras amen anda codoia că chichiva va sicavena pachiamos chiar angla te avel o sfârșito? Nici! Camas te las amen pala amaro Dad cerisco, cai silo „iech Del îndurătorii hai pherdo mila, cai ci holiarel-pe sigo hai silo barvalo andi iubirea loialo hai ciacimos”. b (Ex. 34:6)
Cana chichiva manușa va dichena sar va avela distrugime „o Babilono o Baro”, va anena penghe andi goghi că le Martori le Iehovasche phende de mai anglal că va întâmplola-pe cadai buchi (Dich le paragrafea 12, 13) d
14, 15. Încărel o viitorii veșnico ieche manușesco catar o ghies lesche merimasco sau le thanestar cai beșel? Explichin. (Psalmo 33:4, 5)
14 Tha, poiechdata, amare phrala hai pheia daștinas te phenen anda iech jeno anda lenghi familia cai ci slujil le Iehovasche: „Dacă avelas te merel angla o baro necazo, avelas mai mișto anda leste anda codoia că cadea siles i speranța te avel andino parpale viațate”. Si ciaces, amen camas sea so si mai mișto anda lende. Tha, o jiuvindimos ieche manușesco ci încărel catar o ghies lesche merimasco. O Iehova cherel iech cris perfecto. Lesche alosarimata sile sea o timpo lașe hai orta. (Citisar Psalmo 33:4, 5.) Daisaras te pachias că „o Judecătorii sea la phuveaco” va cherela so si orta. (Gen. 18:25)
15 Sa cadea, ci avelas mișto te pachias că o viitorii veșnico ieche manușesco încărel catar o than cai beșel. Na-i sar ca o Iehova te dichel sar „buznea” milioanea manușen anda codoia că beșen ande thana cai ci daisarde te așunen niciechdata i vestea lași. (Mat. 25:46) Dacă amen duchal amen cadale manușendar, cadichi mai but duchal le Iehovas, cai silo o Judecătorii orta sea la phuveaco. Ci jianas sar va cherela o Iehova le buchia ando baro necazo. Daștil-pe că chichiva mașcar cadal manușa va daștina te sichion anda o Iehova, te sicaven pengo pachiamos ande leste hai te așen de leschi rig cana va sfințola-pe angla sea le națiuni. (Ezec. 38:16)
Pala so va astarela o baro necazo, daștinas chichiva mașcar codola cai va dichena că „o Babilono o Baro” silo choslo . . . te paruven-pe hai te șion pengo pachiamos ando Iehova?
16. So jianas anda o Iehova? (Dich vi i imaginea.)
16 Pala so sichileam andai Biblia, hachiardeam că le manușa sile zurales cuci andel iacha le Iehovasche. Vo dea pesche Șiaves ca amen te daisaras te traisaras anda sea o timpo. (Ioan 3:16) Savore simțosardeam sar i bari iubirea le Iehovaschi tachiardea amaro ilo. (Is. 49:15) Vo prinjianel amen fiesaves po anav. Mai but, vo prinjianel amen cadea de mișto că, chiar dacă avelas te meras, va uștiavela amen parpale viațate hai va cherela amen le manușa cai samas mai anglal, fiesave gândosa cai nachlea prin amari goghi! (Mat. 10:29-31) Cadea că, daisaras te pachias anda sea o ilo că amaro Dad cerisco, o mai goghiaver, pherdo mila hai orta va cherela i mai lași cris opral savore manușa. (Iac. 2:13)
Daisaras te pachias anda sea o ilo că amaro Dad cerisco, o mai goghiaver, pherdo mila hai orta va cherela i mai lași cris opral savore manușa (Dich o paragrafo 16)
17. So va avela te dichas ando articolo cai avel?
17 Cadal neve hachiarimata ajutin amen te das amari sama chichi de importanto si i predicarea cai cheras-la. Sostar daisaras te phenas cadaia? Hai so va zuriarela amen te predichisaras i vestea lași vi mai dur pherde bucuria hai anda sea o ilo? Va avela te das duma anda cadala ando articolo cai avel.
GHILI 76 Sam zurales mișto!
a Caște hachiares mai mișto sostar sas cărdo cado paruimos, dich o articolo „Dichlean că si mișto te cheres cadea”, anda O Turno de veghe anda 15 martia 2015, p. 7-11.
b Pala so o Babilono o Baro va avela choslo, sea le manușa le Iehovasche va nachena prin iech testo cana o Gog anda Magog va avela contra lenghe. Oricon va alosarela te așel de i rig le manușenghi le Iehovasche pala so o Babilono o Baro va avela choslo, va nachena vi von prin cado testo.
c SO DICHAS ANDEL IMAGINI: Trin motivea sostar ci daisaras te arăsas ca chichiva manușa la vesteasa lași: 1) Iech jiuvli trail ande iech than cai i predicarea ci daștil te avel cărdi mișto anda codoia că code si iech religia bari. 2) Iech familia trail ande iech than cai i predicarea sili așiadi catar o guverno. 3) Iech murș trail ande iech than zurales duriardo cai ci arăsăl-pe ușoro.
d SO DICHAS ANDEL IMAGINI: Iech tărni cai mechlea o ciacimos anel pesche andi goghi so sichilea anda i distrugerea cai avilea opral „o Babilono o Baro”. Voi paruvel-pe hai jial parpale ca laco dad hai dei cai sile Martori. Ande cadal situații, camas te sicavas i îndurarea hai i mila amare Dadeschi andal ceruri hai te bucurisaras amen cana iech păcătoso risarel-pe.
