NSOLO WA PFUNDZIRO 19
NYIMBO 22 Umambo Ukutonga—Mbudze!
Tisadziwanji Thangwi Yakutonga Kunafuna Kudzacita Yahova?
“Yahova . . . nkhabe funa kuti munthu afudzwe.”—2 PED. 3:9.
PINAFUNA IFE KUPFUNDZA
Tinathimizira cinyindiro cathu cakuti Yahova angadzatonga anthu ntsogolo, iye anadzacita pyenepi munjira yadidi na mwakulungama.
1. Thangwi yanji tinakwanisa kulonga kuti tiri kukhala mu ndzidzi wakutsandzayisa kakamwe?
IFE tiri kukhala mu ndzidzi wakutsandzayisa kakamwe! Tiri kuona kukwanirisika kwa maprofesiya a Bhibhlya ntsiku zino. Mwacitsandzo, ife tisaona “mambo wakunkwiriro” na “mambo wakunterero” mbakamenyana toera kutonga dziko yonsene yapantsi. (Dhan. 11:40) Kusiyapo pyenepi, tisaonambo kumwazwa kwa mphangwa zadidi za Umambo wa Mulungu munjira yakudzumatirisa yakuti nee yacitika kale, pontho anthu azinji kakamwe asasankhula kutumikira Yahova. (Iza. 60:22; Mat. 24:14) Ife tisatambirambo cakudya cauzimu cizinji “pa ndzidzi wakuthema.”—Mat. 24:45-47.
2. Ndi cinyindiro cipi cakuti tinakwanisa kukhala naco, pontho tisafunika kudzindikiranji?
2 Yahova asapitiriza kutiphedza toera kubvesesa pinthu pyakufunika pyakuti pinadzacitika mwakukhonda dembuka. (Mis. 4:18; Dhan. 2:28) Ife tinakwanisa kukhala na cinyindiro cakuti nyatwa ikulu ingatoma, tinadziwa kale pinafunika ife kucita toera tikhale akuphatana na kupitiriza kukhala akukhulupirika kuna Yahova. Mbwenye ndi pyakufunika kudzindikira kuti pinthu pinango pinafuna kudzacitika ntsogolo, ife nee tisapidziwa. Mu nsolo uno tinaona macinjo mangasi adacitwa akubvesesa kwathu Bhibhlya. Buluka penepo, tinaona pinthu pingasi pinadziwa ife thangwi ya ntsogolo na pinthu pinafuna kudzacita Babathu wakudzulu.
PINTHU PYAKUTI NEE TISAPIDZIWA
3. Kale tikhalonganji thangwi ya kupulumuswa kwa anthu, pontho thangwi yanji?
3 Kale tikhalonga kuti nyatwa ikulu ingatoma, nkhabebve munthu anafuna kukhala na mwai wakusankhula kutumikira Yahova mbapulumuswa pa Armajedhoni. Ife tikhalonga tenepo thangwi tikhabvesesa kuti pinthu pidacitika pa Madzi Makulu pisaimirira pinthu pyonsene pinafuna kudzacitika ntsogolo. Mwacitsandzo, ife tikhakhulupira kuti munjira ibodzi ene idafunga Yahova nsuwo wa arka anthu mbakhonda kupita, nkhabe munthu anafuna pontho kutumikira Yahova mbapulumuswa nyatwa ikulu ingatoma.—Mat. 24:37-39.
4. Thangwi yanji nee tisalongabve kuti pinthu pidacitika mu ntsiku za Nowa pinadzacitika pontho ntsogolo?
4 Pinakhala pyadidi kulonga kuti pinthu pyonsene pidacitika pa Madzi Makulu pisaimirira pinthu pinafuna kudzacitika ntsogolo? Nkhabe. Thangwi yanji? Thangwi Bhibhlya nee isalonga pyenepi. a Ndimomwene kuti Yezu alandanisa “ntsiku za Nowa” na ntsiku zakuonekera kwace. Mbwenye iye nee alonga kuti pinthu pidacitika mu ntsiku za Nowa, ninga kufunga nsuwo wa arka mbapidacitka pontho ntsogolo. Ngakhale tenepo, ife tinakwanisa kupfundza pizinji na mphangwa zinalonga pya Nowa na pidacitika pa Madzi Makulu.
5. (a) Nowa apangiza tani kuti akhali na cikhulupiro? (Ahebheri 11:7; 1 Pedhru 3:20) (b) Ndi munjira ipi kumwaza mphangwa kunacita ife lero kwalandana na kumwaza mphangwa kudacita Nowa?
5 Pidabva Nowa cenjezo ya Yahova, iye apangiza kuti akhali na cikhulupiro mbatoma kumanga arka. (Lerini Ahebheri 11:7; 1 Pedhru 3:20.) Munjira ibodzi ene, anthu angabva mphangwa zadidi za Umambo, iwo asakwanisa kuphatisira pinapfundza iwo. (Mabasa 3:17-20) Pedhru acemera Nowa ‘m’mwazi mphangwa za ulungami.’ (2 Ped. 2:5) Mbwenye ninga pidaona ife mu nsolo udamala, nee tisadziwa khala mwandimomwene Nowa amwazira mphangwa anthu onsene a mu ndzidzi wace. Lero, ife tisawangisira toera kumwazira mphangwa anthu azinji kakamwe pa dziko yapantsi, pontho tisacita pyenepi munjira yadidi kakamwe. Mbwenye mwakukhonda tsalakana kuwangisira kwathu, nee tinakwanisa kumwazira mphangwa anthu onsene kumala mbakudzati kufika. Thangwi yanji?
6-7. Thangwi yanji tisalonga kuti nee tinakwanisa kumwazira mphangwa anthu onsene kumala mbakudzati kufika?
6 Nyerezerani pidalonga Yezu thangwi ya basa yakumwaza mphangwa. Iye alonga kuti mphangwa zadidi ‘mbazidamwazwa kuna anthu onsene pa dziko yapantsi toera zikhale umboni kuna anthu a madzindza onsene.’ (Mat. 24:14) Lero profesiya ineyi iri kukwanirisika kakamwe kupiringana kale. Mphangwa za Umambo zisagumanika mu pilongero pyakupiringana 1.000 mu saiti jw.org, pontho anthu azinji pa dziko yapantsi anakwanisa kupfundza thangwi ya Umambo wa Mulungu.
7 Mbwenye Yezu apanga anyakupfundzace kuti ‘iwo nee mbadapakasa mizinda yonsene,’ peno nee mbadakwanisa kumwaza mphangwa kuna anthu onsene ndzidzi wakutongwa mbudzati kufika. (Mat. 10:23; 25:31-33) Mafala a Yezu asaphatambo basa kuna ife lero. Anthu azinji kakamwe asakhala m’mbuto zakuti ife nee tinakwanisa kuamwazira mphangwa mwaufulu. Kusiyapo pyenepi, ana azinji kakamwe asabalwa ndzidzi onsene. Ife tisacita pinakwanisa ife toera kugumana “anthu a madziko onsene, a madzindza onsene, a pilongero pyonsene na mbumba zonsene” mbatiamwazira mphangwa zadidi. (Apok. 14:6) Mbwenye undimomwene ndi wakuti nee tinakwanisa kumwazira mphangwa anthu onsene pa dziko yapantsi kumala mbakudzati kufika.
8. Ndi mibvundzo ipi yakuti panango tinaicita thangwi ya njira inafuna kutonga Yahova anthu ntsogolo? (Onanimbo foto.)
8 Mwakubverana na pidaona ife, panango tinabvundzika: Ndiye tanimbo anthu akuti nee anakhala na mwai wakubva mphangwa zadidi nyatwa ikulu mbidzati kutoma? Yahova na Mwanace anadzacitanji kuna iwo? (Juw. 5:19, 22, 27; Mabasa 17:31) Lemba idabuluswa nsolo uno isalonga kuti Yahova “nkhabe funa kuti munthu afudzwe.” Mbwenye “asafuna kuti anthu onsene atcunyuke.” (2 Ped. 3:9; 1 Tim. 2:4) Tisafunika kudzindikira kuti Yahova adzati kufokotoza kuti anatonga tani anthu akuti cipo akhala na mwai wakubva mphangwa zadidi. Pontho iye nee asafunika kutifokotozera pinthu pidacita iye na pinthu pinafuna iye kucita.
Kodi Yahova anadzacitanji na anthu akuti panango nee akhala na mwai wakubvesera mphangwa zadidi nyatwa ikulu mbidzati kutoma? (Onani ndima 8) c
9. Yahova anadzacitanji ntsogolo?
9 Yahova asaphatisira Bhibhlya toera kutipanga pinthu pinafuna iye kucita. Mwacitsandzo, Bhibhlya isalonga kuti Yahova anadzalamusa muli akufa ‘anthu akukhonda kulungama,’ peno ale adakhonda khala na mwai wakubva mphangwa zadidi mbacinja umaso wawo. (Mabasa 24:15; Luka 23:42, 43) Pyenepi pisaticitisa kucita mibvundzo inango yakufunika.
10. Ndi mibvundzo ipi inango yakuti panango tinaicita?
10 Kodi anthu onsene anafuna kufa pa nyatwa ikulu anadzafudzwa mbakhonda khala na mwai wakulamuswa muli akufa? Bhibhlya isapangiza kuti anthu anakhonda phedzera Yahova anadzafudzwa pa nkhondo ya Armajedhoni, pontho nee anakhala na mwai wakulamuswa muli akufa. (2 Ates. 1:6-10) Mbwenye anthu anango, mu ndzidzi wa nyatwa ikulu panango anafa na mathangwi anango. Mwacitsandzo, panango anafa thangwi ya utenda, kukalamba, cidengwa peno kuphiwa na anthu anango. Mphapo ninji pinafuna kuacitikira? (Ekle. 9:11; Zak. 14:13) Kodi anthu anewa anakhala mu nsoka wa anthu anafuna kulamuswa muli akufa mu dziko ipswa? Ife nee tisapidziwa.
PINTHU PINADZIWA IFE
11. Pa Armajedhoni anthu anatongwa mwakubverana nanji?
11 Ife tisadziwa pinthu pingasi pinafuna kudzacitika ntsogolo. Mwacitsandzo, tisadziwa kuti pa Armajedhoni anthu anatongwa mwakubverana na njira inatsalakana iwo abale a Kristu. (Mat. 25:40) Ale anaphedzera Akristu akudzodzwa pabodzi na Yezu Kristu, anadzatongwa ninga mabira. Ife tisadziwambo kuti Akristu anango akudzodzwa anagumanika pa dziko yapantsi nyatwa ikulu ingatoma, pontho anaenda kudzulu ungasala ndzidzi pang’ono toera nkhondo ya Armajedhoni itome. Nakuti Akristu anango akudzodzwa anagumanika pa dziko yapantsi, panango anthu anango a mitima yadidi anakhala na mwai wakuphedzera Akristu anewa na basa inacita iwo. (Mat. 25:31, 32; Apok. 12:17) Thangwi yanji mphangwa zenezi ndi zakufunika?
12-13. Anthu anango panango anacitanji angaona kufudzwa kwa “Bhabhilonya Wankulu”? (Onanimbo foto.)
12 Pakumala kutoma kwa nyatwa ikulu, panango anthu anango adaona kufudzwa kwa “Bhabhilonya Wankulu” anakumbuka kuti mu pyaka pizinji, Mboni za Yahova zikhalonga kuti pyenepi mbapidacitika. Kodi anango mwa anthu anewa anatoma kukhulupira Yahova?—Apok. 17:5; Ezek. 33:33.
13 Pyenepi pingacitika, pinakhala pyakulandana na pidacitika ku Ejitu mu ndzidzi wa Mose. Kumbukani kuti ‘mwinji ukulu wa anthu’ waenda pabodzi na Aizraeli pidabuluka iwo mu Ejitu. Anango mwa anthu anewa panango atoma kukhulupira Yahova pidaona iwo kukwanirisika kwa Miliri Khumi idalonga Mose. (Eks. 12:38) Pinthu pyakulandana na pyenepi pingacitika pakumala kufudzwa kwa Bhabhilonya, kodi ife tinatsukwala mbatinyerezera kuti ndi pyakusowa ulungami kuti anthu anango akhale na ife kumala mbakudzati kufika? Nkhabe. Ife tisafuna kukhala ninga Babathu wakudzulu wakuti ndi “Mulungu wantsisi na wakukoma ntima, wakupirira, waufuni kakamwe na waundimomwene.” b—Eks. 34:6.
Anango anafuna kuona kufudzwa kwa “Bhabhilonya Wankulu” anadzakumbuka kuti Mboni za Yahova zikhalonga pyenepi (Onani ndima 12-13) d
14-15. Toera munthu adzakhale na umaso wakukhonda mala peno nkhabe, pisanyindira ndzidzi udafa iye peno mbuto inakhala iye? Fokotozani. (Masalmo 33:4, 5)
14 Midzidzi inango tisabva abale na alongo mbalonga tenepa thangwi ya wacibale wawo: ‘Pinakhala pyadidi iye angafa nyatwa ikulu mbidzati kutoma, thangwi anakhala na mwai wakulamuswa muli akufa.’ Kazinji kene iwo asalonga pyenepi na mathangwi adidi. Mbwenye toera munthu akhale na umaso wakukhonda mala peno nkhabe nee pisanyindira ndzidzi unafuna iye kufa. Yahova ndi ntongi wakulungama, pontho pisankhulo pinacita iye ndzidzi onsene ndi pyadidi na pyakulungama. (Lerini Masalmo 33:4, 5.) Natenepa, tinakwanisa kukhala na cinyindiro cakuti “ntongi wa dziko yonsene” ndzidzi onsene anacita pinthu pyadidi.—Gen. 18:25.
15 Tinakwanisambo kulonga kuti toera munthu adzakhale na umaso wakukhonda mala peno nkhabe nee pisanyindira mbuto inakhala iye. Yahova nee anadzatonga anthu azinji na kuaona ninga “mbuzi” basi ene thangwi iwo asakhala m’mbuto zakuti mphangwa zadidi nee zamwazwa. (Mat. 25:46) Khala ife tisadzudzumika na anthu anewa, ndiye tanimbo Ntongi waulungami wa dziko yonsene yapantsi? Ife nee tisadziwa kuti Yahova anacitanji na anthu anewa mu ndzidzi wa nyatwa ikulu. Panango anango mwa anthu anewa pakumala kuona pinafuna kudzacitika pa nyatwa ikulu anatoma kukhulupira Yahova mbasankhula kukhala kukhundu yace mu ndzidzi unafuna iye kucenesa dzina yace pa dziko yonsene yapantsi.—Ezek. 38:16.
Kodi anthu anango anacinja maonero awo nyatwa ikulu ingatoma?
16. Ninji pinadziwa ife thangwi ya Yahova? (Onanimbo foto.)
16 M’Bhibhlya, tisapfundza kuti m’bodzi na m’bodzi wa ife ndi wakufunika kakamwe kuna Yahova. Iye apereka umaso wa Mwanace toera tonsene tikhale na mwai wakugumana umaso wakukhonda mala. (Juw. 3:16) Tonsene tisakwanisa kuona citsalakano cinapangiza Yahova kuna ife. (Iza. 49:15) Iye asadziwa dzina ya m’bodzi na m’bodzi wa ife. Iye asatidziwa mwadidi kakamwe, pontho anakwanisa kutilamusa muli akufa na makhaliro mabodzi ene akhali na ife mbatidzati kufa, kuphatanizambo manyerezero athu. (Mat. 10:29-31) Ife nee tisafunika kupenula kuti Babathu waufuni anadzatonga m’bodzi na m’bodzi mwaulungami, mwaudziwisi na mwantsisi.—Tiya. 2:13.
Ife tinakwanisa kukhala na cinyindiro cakuti Yahova anadzatonga m’bodzi na m’bodzi mwaulungami, mwaudziwisi na mwantsisi (Onani ndima 16)
17. Ndi mibvundzo ipi inafuna ife kutawira mu nsolo unatowera?
17 Nakuti cincino tiri na kubvesesa kweneku kupswa, tisakwanisa kuona kuti basa yathu yakumwaza mphangwa isafunika kucitwa mwakucimbiza kakamwe kupiringana kale. Thangwi yanji tisalonga tenepo? Pontho ninji pinatikulumiza toera tipitirize kumwaza mphangwa zadidi mwaphinga? Mu nsolo unatowera tinatawira mibvundzo ineyi.
NYIMBO 76 Musapibva Tani?
a Toera kudziwa mathangwi anango adaticitisa kucita macinjo anewa, onani nsolo wakuti “Ineyi Ndi Njira Idakomerwa Na Imwe,” mu Ncenjezi wa 15 wa Março wa 2015, tsa. 7-11.
b Bhabhilonya Wankulu angamala kufudzwa, atumiki onsene a Yahova anayeserwa mu ndzidzi wakupomokera kwa Goge wa Magoge. Ale anafuna kukhala kukhundu ya Mulungu pakumala kufudzwa kwa Bhabhilonya Wankulu anadzayeserwambo.
c MAFALA ANAFOKOTOZA FOTO: Mafoto matatu ali kupangiza kuti thangwi yanji anthu anango nee anakhala na mwai wakubvesera mphangwa zadidi: (1) Nkazi m’bodzi anakhala n’dziko yakuti anthu nee asatawiriswa kucinja uphemberi, (2) banja inakhala n’dziko yakuti ndi pyakugopswa, pontho nee ndi pyakutawiriswa kupfundza undimomwene (3) mamuna anakhala m’mbuto yakuti ndi yakutali kakamwe na nzinda, pontho yakunentsa toera kufikako.
d MAFALA ANAFOKOTOZA FOTO: Ntsikana m’bodzi adasiya kutumikira Yahova ali kukumbuka pidapfundza iye thangwi ya kufudzwa kwa “Bhabhilonya Wankulu.” Iye asankhula kutoma pontho kutumikira Yahova mbasaka ciphedzo ca anyakubalace. Pinthu ninga pyenepi pingacitika, ife tisafunika kukhala ninga Yahova, Babathu wantsisi na waufuni mbatikomerwa na ale adasankhula kubwerera mu gulu ya Yahova.
