ADESŨA 19
DWEIN 22 Ahenni no Redi Tumi —Ma Ɛmmra!
Kyɛbɔ Yehowa Kobua Mmenia Ndɛen Kyẽabie Ne, Nzu Yeɛ Yɛse Yɛfa Yenwo Ɔ?
‘AWURADE mbena kyɛ sona biala mini.’—2 PET. 3:9.
BƆ ADESŨA NE KƆHÃ YENWO DWIRƐ Ɔ
Yɛle gyidie kyɛ kyẽabie, Yehowa kobua mmenia ndɛen bɔ ɔte turoloo.
1. Nningyein benimɔ yeɛ ɔyɛ yɛ fɛ kyɛ ɔba nu ɛnnɛ ɔ?
ƆYƐ yɛ fɛ paa kyɛ, kyẽa biala, yɛfa yɛnye yenwu kyɛ Bible ngɔmhyɛ ahoroɛ ba nu ɔ! Ebie yeɛ ole kyɛ, yenwu ye kyɛ “sorɔ dɔ hene,” ɔne “ngwaen dɔ hene ne,” benu biala pere kyɛ okoli ewiase mukoraati so. (Dan. 11:40) Afei koso, yenwu ye kyɛ, bɛkã Nyameɛ Ahennie nanwo nzɛmba ne wɔ ewiase mukoraati, na ɔnate ɛhene aso amaa mmeni pee asi gyinayɛɛ kyɛ, bɛkɔso Yehowa. (Yes. 60:22; Mat. 24:14) Asa koso, bekyirekyire yɛ maa yɛte Bible nabo yé wɔ “mmerɛ bɔ ɔsɛ nu.”—Mat. 24:45-47.
2. Nzu yeɛ yedé yedi ɔ, nakoso nzu yeɛ odikyɛ yenwu ye ɔ?
2 Nningyein mbirimbiri bɔ ɔngɔhyɛ okosisi ne, Yehowa kɔso boka yɛ maa yɛte yebo yé. (Any. 4:18; Dan. 2:28) Yedé yedi kyɛ, koraka amaneɛnwunɛ piri ne kɔhyɛ yebo ne, yɛkɔte nningyein biemɔ bo yé. Ɛhene kɔboka yɛ maa yɛkɔhora yekoli nahorɛ yɛkɔma Yehowa, na yɛne aliemaamɔ mukoraati koso ahora ayɛ ko. Nakoso odikyɛ yenwu ye kyɛ, nna nningyein bɔ okosisi kyẽabie ne mukoraati yeɛ yɛse ɔ. Adesua he anu ne, yekolimoa yekosusu bɔ yeti yeɛ yayɛ nzakrayɛɛ wɔ edwirɛ biemɔ bɔ yɛha yɛfale bɔ okosisi sɔ mmerɛ nanu nanwo ɔ. Afei, kyɛbɔ yɛ Baba bɔ ɔwɔ anwuro ne kɔyɛ ye nikyee sɔ mmerɛ ne, yɛkɔnea bɔ yɛse yɛfa yenwo ɔ.
BƆ YƐNZE Ɔ
3. Mmerɛ bie bɔ wapɛ nu ne, yɛhane kyɛ kyẽabie mmenia ngonya yenwo atee ko bɔ bɛkɔfa bɛkɔso Yehowa ɔ. Nzu yeɛ ɔmaa yɛhane sɔ ɔ?
3 Mmerɛ bie bɔ wapɛ nu ne, yɛhane kyɛ sɛ amaneɛnwunɛ piri ne hyɛ yebo a, bɛbɔ bangyire Yehowa nu gyidie ne, bengonya yenwo atee bɔ ɔte sɔ ne ko. Ɛhene ati, bɛngonya ngoa wɔ Amagedon koɛ nanu. Bɔ ɔmaa yɛhane sɔ yeɛ ole kyɛ, né yɛte yebo kyɛ, Nzueyilɛ nanwo dwirɛ bɔ ɔwɔ Bible nanu ne, ogyi berɛ ma nningyein biemɔ bɔ okosisi kyẽabie ɔ. Yɛhane kyɛ, kyɛbɔ Yehowa tole alaka nanu kora yeɛ Nzueyilɛ ne ba ne, sɔ ala yeɛ sɛ amaneɛnwunɛ piri ne hyɛ yebo a, atee bie aso ne, Yehowa ‘kɔto anoa nanu’ ɔ. Ɛhene kyire kyɛ, mmenia bɔ bɛwɔ Satan wiase nanu ne, bengonya yenwo atee ko bɔ bɛkɔfa bɔkɔso ye ɔ.—Mat. 24:37-39.
4. Odikyɛ yenya adwene kyɛ Nzueyilɛ nanwo dwirɛ ne, ogyi berɛ ma nikyeebie bɔ okosi kyẽabie anaa? Kyirekyire nu.
4 Odikyɛ yenya adwene kyɛ, Nzueyilɛ nanwo dwirɛ ne, ogyi berɛ ma nikyeebie bɔ okosi kyẽabie anaa? Daabi. Nzuati ɔ? Ofikyɛ Bible ne nga ye sɔ. a Yesu fale nningyein bɔ ɔhɔle so wɔ “Nowa aberɛ so” ne totole ye walɛ nanwo. Nakoso, wanga kyɛ Nzueyilɛ ne, anaa nningyein bɔ ɔhɔle so sɔ mmerɛ ne, bɔ ebie yeɛ ole alaka ne bɔ Yehowa tole nu ne, ogyi berɛ ma nikyee bie bɔ okosi kyẽabie ɔ. Nakoso, ɛhene ngyire kyɛ, Nowa ne Nzueyilɛ nanwo dwirɛ ne, yɛngɔhora yengosua hwee yengofi nu.
5. (a) Koraka Nzueyilɛ ne ba ne, nzu yeɛ Nowa yɛle ɔ? (Hebrifoɛ 11:7; 1 Petro 3:20) (b) Asɛnga adwuma bɔ yɛyɛ ne, sɛɛ yeɛ ɔte kyɛ Nowa deɛ ne ɔ?
5 Mmerɛ bɔ Nowa tele kɔkɔbɔ bɔ Yehowa famane ye ne, ɔbobɔle alaka ne, na ɛhene kyire kyɛ, né ole gyidie. (Kenga Hebrifoɛ 11:7; 1 Petro 3:20.) Sɔ ala yeɛ mmenia bɔ yɛkã Nyameɛ Ahennie nanwo nzɛmba ne yɛkyire bɛ ne koso, odikyɛ bɛfa bɔ bate ne bɛbɔ bɛ bra ɔ. (Aso. 3:17-20) Petro hane kyɛ, Nowa te “tenenee nzɛmbahanɛniɛ.” (2 Pet. 2:5) Nakoso, yɛngɔhora yengohyire kyɛ ebia, Nowa hora hane edwirɛ ne bie hyirele ebiala bɔ né ɔte aseɛ so sɔ mmerɛ ne, kora yeɛ Nzueyilɛ ne ba ɔ. Ɛnnɛ koso, yɛyere yɛnwo kyɛ, yɛkɔhã nzɛmba ne yekohyire mmenia bɔ bɛwɔ ewiase mukoraati ne. Nakoso, yɛyɛ sɛɛ alaa a, yɛngɔhora yɛngɔhã nzɛmba ne bie yengohyire ebiala bɔ ɔwɔ aseɛ he aso, kora ne ayieleɛ ne awa. Nzuati ɔ?
6-7. Nzuati yeɛ yɛngɔhora yɛkɔhã nzɛmba ne bie yengohyire ebiala bɔ ɔte aseɛ he aso kora né ayieleɛ ne awa ɔ? Kyirekyire nu.
6 Ɛmɔma yesusu edwirɛ bie bɔ Yesu hãfale asɛnga adwuma bɔ yɛyɛ nanwo kaa. Ɔhane kyɛ, bɛkɔhã nzɛmba ne wɔ “ewiase amukoraa maa ɔkɔyɛ adanzeɛ kɔma maen maen amukoraa.” (Mat. 24:14) Yenwu ye paa kyɛ ɛnnɛ, sɔ dwirɛ ne awa nu atra mmerɛ biala. Yɛkã nzɛmba ne wɔ dwudwolɛ kɔbo 1,000 nu. Afei koso, ɔnate jw.org wɛbsait naso ne, mmeni pee yeɛ bɛ́te ahennie nanwo nzɛmba ne bie ɔ.
7 Nakoso, Yesu sa hahyirele ye asuafoɛ nemɔ kyɛ, ‘bengoyie nguro amukoraa so kyini.’ Bɔ né ɛhene kyire yeɛ ole kyɛ, bɛngɔhora bɛngɔhã nzɛmba ne bengohyire ebiala kora né wawa. (Mat. 10:23; 25:31-33) Sɔ dwirɛ bɔ Yesu hane ne, yɛ koso ɔfa yɛnwo. Ɛnnɛ, mmeni pee nala wɔ maen ahoroɛ biemɔ so, bɔ awaen ne mma atee kyɛ yɛkɔhã nzɛmba ne yekohyire bɛbɔ bɛwɔ berɛ ne ɔ. Sɛ ɛhene la ahameɛ a, minit kõ biala, ngwalaa pee yeɛ bɛwo bɛ ɔ. Ɔwɔ nu, yɛyere yɛnwo kyɛ, yɛkɔhã nzɛmba ne yekohyire “maen maen ne mmusua kure ne edwudwolɛ amukoraa.” (Nye. 14:6) Nakoso, yɛngɔhora yɛngɔhã nzɛmba ne bie yengohyire ebiala bɔ ɔte aseɛ he aso kora ne ayieleɛ ne awa.
8. Kyɛbɔ Yehowa kobua ndɛen kyẽabie ne, edwirɛ beni yeɛ ebia yekobisa yɛkɔfa yenwo ɔ? (Nea foto ne koso.)
8 Ɔnate bɔ yasusu yenwo nati, ebia yekobisa yɛnwo kyɛ: “Mmenia bɔ ebia bengonya yenwo atee bɛngɔte nzɛmba ne bie kora né amaneɛnwunɛ piri ne awa ne koso ɛ? Nzu yeɛ Yehowa ne Ɔwa bɔ wafa ndɛenbualɛ adwuma ne wawura yesa ne kɔfa kɔyɛ bɛ ɔ? (Yoh. 5:19, 22, 27; Aso. 17:31) Tworɔnzɛm bɔ adesua ne gyi so ne kã kyɛ, Yehowa “mbena kyɛ sona biala mini,” na mmom, “ɔpena kyɛ ebiala ba adwenesakyera nu.” (2 Pet. 3:9; 1 Tim. 2:4) Sɔ dwirɛ ne te nahorɛ. Nakoso, edwirɛ bɔ yebisale ne de, yɛlle yenwo mmuayɛɛ, ofikyɛ Yehowa hanne bɔ ɔkɔfa kɔyɛ bɛ nanwo dwirɛ hyirelle yɛ. Nningyein bɔ Yehowa ayɛ, ɔne bɔ ɔbaayɛ ne, sɛ okuro a, yeɛ ɔkɔhã yenwo dwirɛ kohyire yɛ ɔ.
Mmenia bɔ ebia bengonya yenwo atee bɛngɔte nzɛmba ne bie kora ne amaneɛnwunɛ piri ne awa ne, nzu yeɛ Yehowa kɔfa kɔyɛ bɛ ɔ? (Nea ngyekyɛmuɛ 8) c
9. Nzu yeɛ Yehowa nate Bible naso amaa yanwu ye ɔ?
9 Yehowa nate Bible naso amaa yanwu nningyein biemɔ bɔ ɔkɔyɛ ɔ. Ebie yeɛ ole kyɛ, Yehowa kontingye bɛbɔ bɛte “bɔnefoɛ” ne kɔwa ngoa nu. Sɔ mmenia nemɔ yeɛ ole bɛbɔ bannya yenwo atee bandie nzɛmba ne, bɔ ɔkɔmaa bekogyina so bɛkɔyɛ nzakrayɛɛ ɔ. (Aso. 24:15; Luka 23:42, 43) Ɛhe maa yebisa yɛnwo edwirɛ biemɔ bɔ yenwo hia ɔ.
10. Edwirɛ benimɔ yeɛ ebia yekobisa yɛnwo ɔ?
10 Mmenia bɔ bekowu wɔ amaneɛnwunɛ piri nanu ne mukoraati ne, aso bengotingye benu biala ko anaa? Bible ne maa yenwu ye kyɛ, mmenia bɔ bedwɔso betia Yehowa, bɔ ɔne ye abɔfo kɔsɛkye bɛ wɔ Amagedon ne de, bengotingye bɛ. (2 Tɛs. 1:6-10) Nakoso, ebiemɔ wɔ berɛ a, ebia ɔnate kyɛ bayɛ mbanyi, anwonyerɛ bie wɔ bɛnwo, anaa ɔnate ebie sa so yeɛ ɔkɔmaa bekowu sɔ mmerɛ ne ɔ. Bɛ koso, nzu yeɛ ɔkɔto bɛ ɔ? (Nwo. 9:11; Sak. 14:13) Sɔ mmenia ne, benu biemɔ kɔboka “bɔnefoɛ” bɔ bekotingye bɛ wɔ ewiase foforɛ nanu naso anaa? Ɛhene de yɛnze.
BƆ YƐSE Ɔ
11. Nzu yeɛ bekogyina so bekobua mmenia ndɛen wɔ Amagedon ɔ?
11 Nningyein bɔ okosisi kyẽabie ne, yɛse yenwo dwirɛ pee. Ebie yeɛ ole kyɛ, wɔ Amagedon ne, bekogyina bɔ mmenia yɛ mane Kristo aliemaa nemɔ naso yeɛ bekobua bɛ ndɛen ɔ. (Mat. 25:40) Mmenia bɔ bɛbokale Kristo ne oliema nemɔ ne, bekobua bɛ ndɛen kyɛ bɛte mmoaen. Afei, yɛse kyɛ mmerɛ bɔ amaneɛnwunɛ piri ne kɔhyɛ yebo ne, né Kristo aliemaa nemɔ bie té wɔ aseɛ he aso. Na bɛkɔfa bɛ bɛkɔhɔ anwuro mmerɛ bɔ ɔka kaa maa Amagedon hyɛ yebo ne. Ɔnate kyɛ sɔ mmerɛ ne, né Kristo aliemaa nemɔ bie té wɔ aseɛ he aso nati, ɔkɔmaa mmenia bɔ bɛnye gye yenwo kyɛ bekosua Bible ne konya yenwo atee kɔyɛ sɔ. Ɛhene kɔmaa bɛkɔhora bɛkɔboka adwuma bɔ Kristo aliemaa nemɔ yɛ ne. (Mat. 25:31, 32; Nye. 12:17) Nzuati yeɛ sɔ dwirɛ nemɔ nwo hia ɔ?
12-13. Sɛ bɛsɛkye “Babilɔn Pirikua” ne a, nzu yeɛ ebia ebiemɔ kɔyɛ ɔ? (Nea foto ne koso.)
12 Sɛ amaneɛnwunɛ piri bɔ bɛnate so bɛkɔsɛkye “Babilɔn Pirikua” ne hyɛ yebo a, ebia ebiemɔ kɔkae kyɛ, Yehowa Adanzefoɛ ahã ye dadaada kyɛ sɔ dwirɛ ne kosi. Mmenia bɔ bekonwu kyɛ sɔ dwirɛ nemɔ sisi ne, aso benu biemɔ kɔyɛ nzakrayɛɛ kɔɔso Yehowa anaa?—Nye. 17:5; Hes. 33:33.
13 Sɛ ebiemɔ yɛ sɔ a, yede ɔkɔyɛ tekyɛ bɔ osili wɔ Egypt wɔ Mose aberɛ so ne. Kae kyɛ, mmerɛ bɔ né Yisraelfoɛ nemɔ fi Egypt ne, “mmenia mvrafra pee” ne bɛ hɔle. Sɔ mmenia hemɔ, ebia benu biemɔ hyɛle yebo nyane Yehowa nu gyidie mmerɛ bɔ benwuni kyɛ Ɔhaw Buru bɔ Mose hane yenwo dwirɛ ne, ye mukoraati awa nu ne. (Ɛks. 12:38) Sɛ bɛsɛkye Babilɔn Pirikua ne, na edwirɛ bɔ ɔte sɔ ne bie si a, aso odikyɛ yɛmaa ɔyɛ yɛ yea kyɛ Yehowa ama ebiemɔ atee maa baaboka yɛ so mmerɛ bɔ waha kaa maa Amagedon ba ne? Daabi, ofikyɛ yɛpena kyɛ yesuesua yɛ Baba bɔ ɔwɔ anwuro ne. Ɔte “Nyameɛ bɔ ɔse anwumvoin ná ɔdo mmenia ɔ, bɔ ye ahone nhu ndɛ, bɔ ye ɔdɔ bɔ onni ngasi ne nahorɛlilɛ sone ɔ.” b—Ɛks. 34:6.
Sɛ bɛsɛkye “Babilɔn Pirikua” ne a, ebiemɔ kɔkae kyɛ Yehowa Adanzefoɛ ahã ye dadaada kyɛ sɔ dwirɛ ne kosi (Nea ngyekyɛmuɛ 12-13) d
14-15. Sɛ ebie kɔtena ase daa kyẽabie a, aso ogyi mmerɛ bɔ ɔkɔfa kowu, anaa maen horɛ bɔ ɔte nu naso anaa? Kyirekyire nu. (Edwein 33:4, 5)
14 Odwu mmerɛ bie a, aliemaa biemɔ kora kã b’abusuaniɛ bie bɔ ɔnzo Yehowa bɔ wawu nanwo dwirɛ kyɛ: “Ɔte pá kyɛ wawu mmerɛ bɔ amaneɛnwunɛ piri ne walle ɔ, ofikyɛ bekotingye ye.” Sɛ ebie kã sɔ a, ɔtte bɔne. Nakoso bɔ ɔte yeɛ ole kyɛ, sɛ bekotingye ebie maa ɔkɔtena ase daa a, oggyi mmerɛ bɔ ɔfa wuli naso. Yehowa de, obua ndɛen turoloo, na odi nahorɛ wɔ ye dwirɛ amukoraa nu. (Kenga Edwein 33:4, 5.) Yeti yedé yedi paa kyɛ, “aseɛ ye aso amukoraa Ndɛenbualɛniɛ ne,” ɔkɔyɛ bɔ ɔtengyɛ ɔ.—Gye. 18:25.
15 Afei koso, odikyɛ yenwu ye kyɛ, sɛ ebie kɔtena ase daa kyẽabie a, oggyi maen horɛ bɔ ɔte nu naso. Yeti mmeni pee bɔ bɛwɔ maen ahoroɛ biemɔ so, bɔ ɔyɛ se kyɛ bɛkɔte Ahennie nanwo dwirɛ ne, Yehowa ngobua bɛ ndɛen kyɛ bɛte “mmɔngye.” (Mat. 25:46) Aseɛ he aso amukoraa ndɛenbualɛniɛ bɔ ɔyɛ bɔ ɔtengyɛ ne, ɔdwene sɔ mmenia nemɔ nwo paa tra yɛ po. Yɛnze atee bɔ Yehowa kɔfa so kɔyɛ nningyein wɔ amaneɛnwunɛ piri nanu ɔ. Edwirɛ bɔ okosisi sɔ mmerɛ ne, ebia ɔkɔmaa sɔ mmenia nemɔ bie konya Yehowa nu gyidie, mmerɛ bɔ ɔkɔye ye dumaa ne ali kohyire ebiala bɔ ɔwɔ aseɛ he aso ne.—Hes. 38:16.
Sɛ amaneɛnwunɛ piri ne hyɛ yebo a, . . . mmenia bɔ bekonwu kyɛ sɔ dwirɛ nemɔ sisi ne, aso benu biemɔ kɔyɛ nzakrayɛɛ kɔɔso Yehowa anaa?
16. Bible ne bɔ yasua ne, nzu yeɛ wamaa yanwu ye yafa Yehowa nwo ɔ? (Nea foto ne koso.)
16 Ɔnate Bible ne bɔ yasua nati, yanwu ye kyɛ sona ngoa nwo hia Yehowa paa. Ɔfale Ɔwa ne bɔle afɔleɛ mane yɛ, kyɛbɔ ɔkɔyɛ a, yɛkɔhora yɛkɔtena ase daa kyẽabie ɔ. (Yoh. 3:16) Yehowa ayɛ nningyein pee afa ahyire kyɛ okuro yɛ dwirɛ. (Yes. 49:15) Ɔse yɛ nu biala dumaa, na ɔkae yɛnwo dwirɛ biala, ofikyɛ ɔse kyɛbɔ ye nu biala si te ɔ. Yeti sɛ yewu po a, ɔkɔhora kotingye yɛ! (Mat. 10:29-31) Yesɔ nati, yede yedi paa kyɛ yɛ Baba bɔ ɔwɔ anwuro bɔ okuro yɛ dwirɛ ne, okobua yɛ nu biala ndɛen bɔ ɔte turoloo. Ofikyɛ ɔse nworɛ, ɔyɛ bɔ ɔtengyɛ, na ɔse anwumvoin koso.—Yak. 2:13.
Yede yedi paa kyɛ, Yehowa kobua yɛ nu biala ndɛen bɔ ɔte turoloo, ofikyɛ ɔse nworɛ, ɔyɛ bɔ ɔtengyɛ, na ɔse anwumvoin koso (Nea ngyekyɛmuɛ 16)
17. Nzu yeɛ yekosusu yenwo wɔ adesua bɔ oliberɛ nanu ɔ?
17 Kesaalae bɔ yate edwirɛ hemɔ bo yé ne, odikyɛ yɛyere yɛnwo yɛkã nzɛmba ne yɛtra mmerɛ biala. Nzuati yeɛ odikyɛ yɛyɛ sɔ ɔ, na nzu yeɛ ɔmaa yɛkɔso yɛkã nzɛmba ne ɔ? Yekosusu sɔ dwirɛ hemɔ nwo yɛkɔhɔ siɛ wɔ adesua bɔ oliberɛ nanu.
DWEIN 76 Anigyesɛm Bɛn Ni!
a Sɛ ɛpena kyɛ enwu bɔ yeti yeɛ bɛyɛle sɔ nzakrayɛɛ he a, kenga edwirɛ bɔ yenwa ‘Wei Ne Ɔkwan a Ɛsɔ W’ani’ bɔ ɔwɔ March 15, 2015 Twi Ɛwɛnelɛ Waen nanu, kr. 7-11.
b Bɛkɔsɔ mmenia bɔ bɛsõ Yehowa ne bɛkɔnea mmerɛ bɔ basɛkye Babilɔn Pirikua ne bayie, na Gɔgo bɔ ɔwɔ Magɔgo ato awura yɛ so ne. Afei, ebiala bɔ ɔkɔɔboka bɛbɔ bɛsõ Yehowa naso sɔ mmerɛ ne, ye koso bɛkɔsɔ ye bɛkɔnea.
c BƆ FOTO NE KÃ YENWO DWIRƐ Ɔ : Foto ahoroɛ nza bɔ okyire bɔ yeti yeɛ ebiemɔ ngɔhora ngɔte nzɛmba bɔ yɛkã ne bie ɔ: (1) Maame bie wɔ maen bie aso, na ɔnate soen bɔ ɔwɔ berɛ nati, ɔyɛ se kyɛ bɛkɔte Ahennie nanwo nzɛmba ne, (2) biaa bie ne ɔye wɔ maen bie so, na ɔnate awaen ne mmraa bɔ wahyɛ nati, otia mmraa, na ɔyɛ suro kyɛ ebie kɔhã nzɛmba ne wɔ berɛ ɔ, (3) ɔnate nekaa bɔ biaa bie wura nati, ɔyɛ se paa kyɛ bɛkɔfa Ahennie nanwo nzɛmba ne bekodwu dɔ ɔ.
d BƆ FOTO NE KÃ YENWO DWIRƐ Ɔ: Taluwa bie bɔ ofili asafo nanu ne, wakae bɔ osua fale “Babilɔn Pirikua” ne sɛkyelɛ nwo ne. Yeti wasakyera ye adwene, na wasa wahɔ ye awofoɛ bɔ bɛte Yehowa Adanzefoɛ nemɔ berɛ. Edwirɛ bɔ ɔte sɔ ne bie si sɔ mmerɛ ne a, odikyɛ yesuesua yɛ Baba bɔ ɔwɔ anwuro bɔ ɔse anwumvoin, na ɔdwene sona nwo ne, na yɛmaa yɛnye gye kyɛ bɔnefoɛ bie ahora asakyera ye adwene ɔ.
