XIINXALLOTE BIRXICHO 19
FAARSO 22 Iima Noo Mangistekki Daggo!
Yihowate Albillittete Yoo Daafira Anfoommori Maati?
Yihowa ‘ayino baꞌꞌara dihasiꞌranno.’—2 PHE. 3:9.
GUULCHO HEDO
Yihowa albillitte keeraanchonna taalo yoo yaannota addaxxa dandiineemmo.
1. Heeꞌnoommohu dhagge ikkitanno yannaraati yineemmohu mayiraati?
HEEꞌNOOMMOHU dhagge ikkitanno yannaraati! Barru baala, Qullaawu Maxaafi masaalo woꞌmitanna laꞌnanni heeꞌnoommo. Lawishshaho, ‘aliyye mootenna wodiidi moote’ alamenniha wolqaataamo gashshoote ikkate heewisantanna laꞌnanni heeꞌnoommo. (Dan. 11:40) Maganu Gashshootiha dancha duduwo uulla woꞌmate dudumbanni heeꞌnoonni; lowo miliyoone ikkanno manni qole tenne sokka macciishshe adhanni no. (Isa. 60:22; Mat. 24:14) Qoleno falakkinota ayyaanaamittete “sagale hasiissanno yannara” afiꞌnanni heeꞌnoommo.—Mat. 24:45-47.
2. Maa addaxxa dandiineemmo? Kayinni wodancha hasiissannonkeri maati?
2 Yihowa albillitte ikkannoha lowo geeshsha hasiisanno coye albinni roore huwanteemmo gede kaaꞌlanni noonke. (Law. 4:18; Dan. 2:28) Quuxxote qarri hanafanno woyite hattenne qarru yannara nafa ammanammenna mittimmanke baꞌukkinni heeꞌrate, hasiissannonke coye baala anfeemmota addaxxa dandiineemmo. Ikkirono muli yannara ikkannohu mitu anfoommokki coyi noota qaaga hasiissannonke. Konni birxichira balanxe kuri coyibba daafira alba huwantoommore biddi assinoonnihu mayiraatiro xiinxallineemmo. Hakkiinni albillitte ikkannohu mitu coyi daafira anfoommorenna iimi Anninke qaafo adhanno gara ronseemmo.
ANFOOMMOKKI COYI MAATI?
3. Mannu ninke ledo Yihowa magansiꞌranno faro afiꞌrannokki yanna lainohunni alba mayine ammanneemmo? Hatto yine ammannoommohu mayiraati?
3 Bashsho, quuxxote qarri hanafihu gedensaanni Yihowa wido ikkannohunna Armagedooni gate saꞌꞌanno manni diheeꞌranno yine ammanneemmo. Hatto yine hendoommohu Baote Wayi daafira kultanno xagge albillitte ikkanno coyira caaleho yine ammannoommo daafiraati. Lawishshaho Baote Wayi yannara Yihowa markaawete waalcho cufino daafira mittuno einokkinte gede, quuxxote qarri hanafihu gedensaannino Yihowa wido ikke gatanno manni diheeꞌranno yine ammanneemmo.—Mat. 24:37-39.
4. Baote Wayi daafira kultanno xagge albillitte ikkanno coyira caaleho yine heda hasiissannonke? Xawisi.
4 Baote Wayi daafira kultanno xagge albillitte ikkanno coyira caaleho yine heda hasiissannonke? Dihasiissannonke. Mayira? Korkaatuno Qullaawu Maxaafi tenne daafira kulannori dino. a Yesuusi ‘Nohi yanna’ isi galagale ledonke heeꞌranno yanna ledo heewisiisinoti egennantinote; kayinni isi Nohi yannara ikkino coyi baalunku lawishshaho Yihowa markaawe cufasi albillitte ikkanno coyira caaleho diyiino. Hatto yaa kayinni Nohinna Baote Wayi daafira kultanno xaggenni ronseemmori dino yaa diꞌꞌikkitino.
5. (a) Baote Wayi daara albaanni Nohi maa assino? (Ibiraawoota 11:7; 1 Pheexiroosi 3:20) (b) Nohi loosinohu sabbakate loosi ninke loonseemmohu sabbakate loosi ledo mayi xaadooshshe afiꞌrino?
5 Nohi Yihowa kulinosi qorowishsha macciishshiti markaawe loose ammana noosita leellishino. (Ibiraawoota 11:7; 1 Pheexiroosi 3:20 nabbawi.) Hatteente gede Maganu Gashshooti daafira kulannoha dancha duduwo macciishshino manni, macciishshinore loosu aana hosiisa hasiissannonsa. (Soq. 3:17-20) Pheexiroosi, ‘Nohi keeraanchimmannire kulannoho’ yiino. (2 Phe. 2:5) Ikkirono sai birxichira ronsummonte gede, Nohi Baote Wayi daara albaanni uullate aana heeꞌrannohu mittu mittunku manchira sabbakate woꞌnaalinoronna teꞌee dianfoommo. Xaa yannara ninke alamete doyichoha sabbakate looso diinaggaambe loosate sharrammanni heeꞌnoommo. Aye geeshshano sharrammummoro, goofimarchu daara albaanni uullate aana noo manni baalunkura dancha duduwo iillisha didandiineemmo. Mayira?
6-7. Goofimarchu daara albaanni dancha duduwo uullate aana noo mannira baalaho iillisha didandiineemmo yineemmohu mayiraati? Xawisi.
6 Hanni Yesuusi sabbakate loosinke daafira mayinoro laꞌno. Isi “daga baalate naqaashshe ikkanno gede, dancha duduwo uulla woꞌmate” dudumbannita masaalino. (Mat. 24:14) Tini masaalo albinni roore yannankera woꞌmitanni no. Maganu Gashshooti sokka 1,000 saꞌꞌanno afiinni sabbankanni heeꞌnoonni; hattono jw.org webisayite widoonni alamete aana noohu rooru manni tenne sokka macciishsha dandaanno.
7 Ikkirono Yesuusi rosaanosira isi daara albaanni, ‘Israeelete katammanna qachuwa hadhe guddannokkita’ woy baalunku mannira sabbaka dandiitannokkita kulino. (Mat. 10:23; 25:31-33) Yesuusi coyiꞌrinori xaa yannarano halaale ikkinoti leeltanni no. Yannankera lowo miliyoone ikkanno manni sabbakate loosonke faajjetenni loonseemmota hoolloonni qooxeessira heeꞌranno. Qoleno mittu mittunku daqiiqi giddo xibbunni kiirranni qaaqquulli ilamanno. Addi addi “gosara, gaꞌretenna addi addi afiinni coyiꞌranno” mannira baalaho dancha duduwo duduwate dandiinummore baala assineemmo. (Aju. 14:6) Ikkollana goofimarchu daara albaanni baattote aana noohura mittu mittunku manchira dancha duduwo tuqisa didandiineemmo.
8. Yihowate albillittete yoo daafira mayine xaꞌminammora dandiineemmo? (Misileno lai.)
8 Kayinni aante noo xaꞌmo xaꞌminammora dandiineemmo? Quuxxote qarri hanafara albaanni dancha duduwo macciishshate faro afidhinokkiri hiikkitannoyya? Yihowanna isi yoo yaara shoominohu Beettisi insara hiittoo yoo yitanno? (Yoh. 5:19, 22, 27; Soq. 17:31) Konni birxichihu cuꞌmote qummeeshshira kulloonninte gede Yihowa ‘ayeno baꞌꞌara dihasiꞌranno.’ Hatteentenni isi ‘baalunku aagintaawe higara’ hasiꞌranno. (2 Phe. 3:9; 1 Xim. 2:4) Ikkollana Yihowa togoo mannira hiittoo yoo yaannoro kulinonkekkita qaaga hasiissannonke. Hige isira maa assinoronna maa assannoro ninkera kulate giddeeti dinosi.
Quuxxote qarra hanafara albaanni dancha duduwo macciishshate faro afiꞌrinokki manna Yihowa hiissanno ikka? (Gufo 8 lai) c
9. Yihowa Qullaawu Maxaafi giddo maa kulinonke?
9 Yihowa Qaalisi giddo albillitte assannoha mito coye kulinonke. Lawishshaho Qullaawu Maxaafi dancha duduwo macciishshatenna heeshshonsa biddi assiꞌrate faro afiꞌrinokkiha ‘cubbaataamma’ manna Yihowa reyotenni kayisannota kulannonke. (Soq. 24:15; Luq. 23:42, 43) Tini qolte wole hasiissanno xaꞌmuwa xaꞌmineemmo gede assitanno.
10. Wole hiittee xaꞌmuwa xaꞌminammora dandiineemmo?
10 Quuxxote qarri yannara reyitinori baalu hegerera baꞌanno? Qullaawu Maxaafi Yihowa gibbannorinna Yihowa Armagedooni oli yannara hunannori reyotenni kaꞌannokkita kulanno. (2 Tes. 1:6-10) Kayinni lawishshaho geedhimmatenni, dhibbunni, danotenni reyitinori woy mannu shiinori hiikkitannoyya? (Ros. 9:11; Zak. 14:13) Insa giddo mitu haaro alamera reyotenni kaꞌanno ‘cubbaataammi’ wido ikkita ikka? Tenne daafira anfoommori dino.
ANFOOMMO COYI MAATI?
11. Armagedooni yannara mannaho yoo yinannihu maa laꞌneeti?
11 Albillitte ikkanno coyi daafira haammatare anfoommo. Lawishshaho Armagedooni yannara mannaho yoo yinannihu Kiristoosi roduuwira assinore laꞌne ikkinota anfoommo. (Mat. 25:40) Geꞌreewoho yine yoo yinanninsari buurantinorenna Kiristoosi kaaꞌlitinoreeti. Qoleno Kiristoosi roduuwi giddo gamu quuxxote qarri hanafihu gedensaanninna Armagedooni oli hanafara shiima yanna gatte noo woyiteno uullate aana heedhannota anfoommo. Hatte yannara Kiristoosi roduuwi uullate aana heedhanno daafira, suwashshu wodani noonsa manni insanna insa loossanno looso kaaꞌlate faro afiꞌranno. (Mat. 25:31, 32; Aju. 12:17) Tenne afanke hasiissannota ikkitinohu mayiraati?
12-13. Mitu manni Bayira Baabiloone baꞌanna laihu gedensaanni maa assannoha ikkara dandaanno? (Misillano lai.)
12 Quuxxote qarri hanafihu gedensaanni nafa, “Batiꞌra Baabiloone” baꞌanna laꞌꞌannohu mitu manni Yihowa Farciꞌraasine tenne bao daafira lowo diro kultanni keeshshitinoha qaagannoha ikkara dandaanno. Tenne ikkito lainohu mitu manni hedonsa biddi assiꞌra ikka?—Aju. 17:5; Hiz. 33:33.
13 Coyi hatto ikkiro Muse yannara Gibitsete ikkinori ledo mittu gariha ikkanno. Israeele Gibitsetenni fultu yannara “wolu lowo manni” ledonsa haꞌrinota qaango. Konni manni giddo mitu Yihowa ammaninohu Muse Tonnu Qoomami daafira kulinori woꞌmanna lae ikkara dandaanno. (Ful. 12:38) Bayira Baabiloone baꞌuhu gedensaannino togoori ikkannoha ikkiro, goofimarchu daara shiima yanna calla gatte heedheenna mannu ledonke Yihowa magansiꞌra hanafiro koffi yaa hasiissannonke? Dihasiissannonke! Ninkeno iimi Anninke gedeere ikka hasiꞌneemmo; isi ‘maarannohonna hanqoho muddamannokkiho, mararaancho Maganooti; ammanamasinna bagamannokkihu baxillisi batiꞌraho.’ b—Ful. 34:6.
“Batiꞌra Baabiloone” baꞌanna laꞌꞌannohu mitu manni Yihowa Farciꞌraasine tenne bao daafira lowo diro kultanni keeshshitinoha qaagannoha ikkara dandaanno (Gufo 12-13 lai) d
14-15. Mittu manchi reyanno yanna woy heeꞌranno bayichi hegere heeshsho afiꞌranno woy hooganno gede assannosi? Xawisi. (Faarso 33:4, 5)
14 Mito woyite mitu manni, “Kaote hexxo heedhannonsa gede fiixiꞌya quuxxote qarri hanafara albaanni reyiro danchaho” yaanna macciishshineemmo. Mannu hatto yaannohu danchare hede ikkinoti egennantinote. Ikkollana mittu manchi reyanno yanna hegere heeshsho afiꞌranno woy hooganno gede diassitanno. Yihowa guuta gashshaancho ikkino daafira yoosi taalotenna keeraanchote. (Faarso 33:4, 5 nabbawi.) “Gobba baalate gashshaanchi” gara ikkinore assannota addaxxa dandiineemmo.—Kal. 18:25.
15 Qoleno mittu manchi heeꞌranno bayichi hegere heeshsho afiꞌranno woy hooganno gede assannosi yine heda dihasiissannonke. Yihowa Maganu Gashshooti sokka macciishshate faro afiꞌrinokkiha lowo miliyoone ikkanno manna ‘meu’ widira gaamannonsa yee heda ikkannokki coyeeti. (Mat. 25:46) Keeraanchu gobba baalate gashshaanchi konni mannira ninke hendeemmohunni roorse hedanno. Yihowa quuxxote qarri yannara coye ma garinni qineessannoro dianfoommo. Kuri manni giddo mitu Yihowa daga baalate albaanni suꞌmisi qullaawanno gede assanno woyite, Yihowa daafira rosate, iso ammanatenna isi wido ikkate faro afiꞌrannoha ikkara dandaanno.—Hiz. 38:16.
Quuxxote qarri hanafihu gedensaanni, . . . tenne ikkito lainohu mitu manni heeshshonsa biddi assiꞌra ikka?
16. Yihowa daafira anfoommori maati? (Misileno lai.)
16 Qullaawa Maxaafa xiinxalline mannu heeshsho Yihowa albaanni muxxe ikkitinota anfoommo. Isi ninke baalunku hegere heeshsho afiꞌneemmo gede Beettosi sayise uyinonke. (Yoh. 3:16) Yihowa ninke baalanka lubbora baxannonke. (Isa. 49:15) Isi ninke mittu mittunku suꞌma afino. Isinni Yihowa ninke mitto mittonka seekke afinonke daafira, reyinummoro nafa mitto mittonka coye qaage reyotenni kayise galagalle lubbotenni heeꞌneemmo gede assannonke! (Mat. 10:29-31) Baxillaanchu iimi Anninke hayyicha, keeraanchonna maarannoha ikkino daafira mittu mittunku manchira guuta yoo yaannota addaxxa dandiineemmo.—Yai. 2:13.
Yihowa keeraanchonna maarannoha ikkino daafira mittu mittunku manchira guutanna taalo yoo yaannota addaxxa dandiineemmo (Gufo 16 lai)
17. Aananno birxichira maa xiinxallineemmo?
17 Kuni biddi assinoonni coyi sabbakate loosonke albinni roore wiinamme loosa hasiissannonketa huwanteemmo gede assinonke. Hatto yineemmohu mayiraati? Dancha duduwo agurrummokkinni dudumbeemmo gede assannonkeri maati? Aananno birxichira kuri xaꞌmuwara dawaro qollanni.
FAARSO 76 Hagiirsiissannohe?
a Tenne hedo biddi assinoonnihu mayiraatiro afate, Badheessa 15, 2015 Agarooshshu Shaera qoola 7-11 fulinoha “Tenne Assa Ate Fajjooti” yaanno birxicho lai.
b Bayira Baabiloone baꞌuhu gedensaanni, Maagoogi Googi siꞌꞌi yannara baalanti Yihowa soqqamaano jifantanno. Bayira Baabiloone baꞌuhu gedensaanni Maganu mannira halamannohu aye manchino jifamanno.
c MISILLATE XAWISHSHA: Alamete doyichohu sabbakate loosi mitu mitu mannira iillannokkihu mayiraatiro leellishshanno misilla: (1) Ammaꞌno sabbankannita hooltanno qachira heedhanno mancho, (2) poletiku ikkitonni kainohunni sabbaka qarra ikkitino bayicho heeꞌranno minaannanna minaama hattono (3) lowo geya xeertiꞌre noo bayicho heeꞌranno daafira dancha duduwo macciishsha dandiinokki mancho.
d MISILETE XAWISHSHA: Halaale agurte fultinoti mitte wedellitte Bayira Baabiloone bao daafira rossinore qaaggino. Ise hedose biddi assidhe maatesewa higgino. Togoo coyi ikkiro, maarannohunna shaqqadu Anninke gedeere ikka hasiꞌneemmo; hattono cubbo loosinohu higino daafira tashshi yaannonke.
