LAHATSORATSY FIANARA 19
HIRA 22 Efa Mitondra Ilay Fanjakana
Ino ty raha Haintsika Mikasiky ty Fitsaràn’i Jehovah amy Hoavy?
‘Tsy tean’i Jehovah hisy ho ripaky ty olo.’—2 PET. 3:9.
INO TY HIANARA ATO?
Afaky matoky tsika fa hanao ty marina noho ty rariny avao Jehovah lafa hitsara ty olo amy hoavy.
1. Manino tsika ro afaky mivola fa tena miavaky fotoa iainantsika zao?
TENA miavaky fotoa iainantsika zao! Mahita faminanian’ny Baiboly tanteraky avao tsika sanandro. Hitantsika, ohatsy, amy zao fa mifanosiky “ty mpanjakan’ny avaratsy” noho “ty mpanjakan’ny antimo” satria samby ta hifehy ani-zao tontolo zao. (Dan. 11:40, f.a.p.) Hitantsika koa hoe fa torỳ maneran-tany ty vaovao soa mikasiky Fanjakà-Ndranahary, le fa an-tapitrisany ty olo mifily hanompo an’i Jehovah. (Isaia 60:22; Mat. 24:14) Tsy zay avao fa mahazo hany ara-panahy maro “amy fotoa mety” tsika.—Mat. 24:45-47.
2. Ino ty raha azontsika atokisa, fe ino ty raha tsy maintsy ekentsika?
2 Ampean’i Jehovah avao tsika amy zay ho haintsika soa ty raha bevata hiseho tsy ho ela. (Ohab. 4:18; Dan. 2:28) Afaky matoky tsika fa lafa manomboky ty fijalea bevata, le ho haintsika iaby ze raha tokony ho haintsika mba hahavy antsika tsy hivaliky noho hiharo raiky avao, anatin’ny fotoa tena sarotsy io. Fe ndre zay, le tsy maintsy mieky tsika fa misy raha sisany mikasiky ty hoavy tsy ho haintsika. Hodinihintsika amy lahatsoratsy toy ato hoe manino ro narenintsika ty raha sisany fa niresahintsika mikasiky an’ny raha hiseho reo. Bakeo hodinihintsika hoe ino ty raha sisany haintsika mikasiky ty hoavy, le ino ty hataon’ny Babantsika an-danitsy any iny.
INO TY RAHA TSY HAINTSIKA?
3. Hanao akory hoasantsika taloha ty olo tsy manompo an’i Jehovah laha vo manomboky ty fijalea bevata, le nanino tsika ro nivola ani-zay?
3 Nivola tsika taloha fa laha vo manomboky ty fijalea bevata, le fa tsy misy ino ino azon’olo atao sasy, zany hoe fa tsy afaky hifily hanompo an’i Jehovah rozy fa mandiny Aramagedona avao. Fa manino tsika ro nivola ani-zay? Satria nieritseritsy tsika hoe mifanandrify amy ty raha hiseho amy hoavy ty raha niseho tamy Ranobe tamy andron’i Noa iny. Lafa ho nanomboky, ohatsy, Ranobe iny le nahilin’i Jehovah sambofiara iny ka tsy nisy olo afaky nilitsy tao sasy. Nieritseritsy amy zay tsika hoe hanao manahaky ani-zay koa Jehovah lafa manomboky ty fijalea bevata, ka tsy hisy olo afaky hifily hanompo azy noho ho avotsy sasy.—Mat. 24:37-39.
4. Tokony hieritseritsy va tsika hoe mifanandrify amy ty raha hiseho amy hoavy ty raha iaby niseho tamy Ranobe iny? Hazavao.
4 Tokony hieritseritsy va tsika hoe mifanandrify amy ty raha hiseho amy hoavy ty raha iaby niseho tamy Ranobe iny? Aha. Fa manino? Satria tsy miresaky ani-zay ty Baiboly. a Marina fa nampitovizin’i Jesosy “tamy andron’i Noa” ty fanatrehany, fe tsy nivola mihintsy ie hoe mifanandrify amy ty raha hiseho amy hoavy ty raha iaby niseho tamy Ranobe iny, anisani-zay ohatsy ty nanilian’i Jehovah an’ny sambofiara iny. Midika va zany zay fa tsy afaky mandramby fianara baka amy tantaran’i Noa noho Ranobe iny tsika? Aha, tsy zay mihintsy.
5. a) Ino ty nataon’i Noa talohan’ny niavian’ny Ranobe iny? (Hebreo 11:7; 1 Petera 3:20) b) Ino ty itovizan’ny fitoria nataon’i Noa noho ty fitoria ataontsika henanizao?
5 Lafa naharè hafatsy fampitandrema baka amy Jehovah Noa, le nasehony hoe nino azy ie ka namboatsy sambofiara. (Vakio Hebreo 11:7; 1 Petera 3:20.) Tsy maintsy manao manahaky ani-zay koa ze olo maharè ty vaovao soa mikasiky Fanjakà-Ndranahary. Tsy maintsy manoriky ze raha ianarany rozy. (Asa. 3:17-20) Nikaihin’i Petera hoe “mpitory ty fahamarina” Noa. (2 Pet. 2:5) Fe nihitantsika tamy lahatsoratsy taloha teo iny fa ndre niezaky nitory aza Noa, le tsy mivola ty Baiboly hoe nivitany ty nitory tamin’olo kiraidraiky tan-tany etoy. Miezaky mitory amin’olo iaby koa tsika henanizao, le mazoto manao an’ny asa io tsika. Fe ndre miezaky manao akory tsika, le tsy ho vitantsika mihintsy ty hitory ty vaovao soa amin’olo kiraidraiky an-tany etoy, alohan’ny hiavian’ny farany. Fa manino?
6-7. Manino tsika ro afaky mivola fa tsy ho vitantsika ty hitory ty vaovao soa amin’olo kiraidraiky an-tany etoy alohan’ny hiavian’ny farany?
6 Diniho ty raha niresahin’i Jesosy mikasiky ty asa fitoria ataontsika. Nivola ie fa “hotorỳ amy tany toy iaby ty vaovao soan’ny Fanjakà iny, ho vavolombelo amy firenena iaby.” (Mat. 24:14) Vomaiky tanteraky faminania io henanizao mandilatsy ty bakany zay. Fa 1 000 mahery zao ty fivolana itoria ty hafatsy mikasiky Fanjakà iny. Maro biby koa ty olo afaky maharè ty vaovao soa vokatsy ty fisian’ny tranonkalantsika jw.org.
7 Fe nivola tamy mpianatsiny rey koa Jesosy fa ‘tsy ho vitan-drozy toro iaby tanà iny’, zany hoe tsy ho vitan-drozy ty hitory amin’olo iaby, alohan’ny hiaviany. (Mat. 10:23; 25:31-33) Hita hoe marina koa safàn’i Jesosy reo amy androntsika zao. Maro, ohatsy, ty olo mipetraky amy tany andrarà ty asantsika rey any. Ankoatsini-zay, an-jatony koa ty ajà ateraky sa-minity. Tsy ho vitantsika zany ty hitory amin’olo kiraidraiky an-tany etoa alohan’ny hiavian’ny farany, ndre manao ze fara herintsika tsika mba hitoria amin’olo amy ‘firenena iaby noho foko noho olo samby hafa fivolana.’—Apok. 14:6.
8. Ino ty fanontanea mety hapetrakintsika mikasiky ty fomba hitsaràn’i Jehovah ty olo amy hoavy? (Henteo koa sary reo.)
8 Mety hipetraky amy zay ty fanontanea hoe: Manao akory zany laha misy olo tsy afaky naharè ty vaovao soa kanefa fa manomboky ty fijalea bevata? Hataon’i Jehovah noho azy Anakilahiny nitendreny hitsara iny akory rozy? (Jaona 5:19, 22, 27; Asa. 17:31) Mivola andinin-teny fototsin’ny lahatsoratsy ianarantsika toy fa ‘tsy tean’i Jehovah hisy ho ripaky ty olo fa teany hibebaky iaby.’ (2 Pet. 3:9; 1 Tim. 2:4) Zay aloha ty raha haintsika mikasiky an’i Jehovah, fe mbo tsy nivolaniny amintsika hoe ino ty hataony amin’olo rey. Sady tsy voatery hambarany antsika iaby ze raha fa nataony na mbo hataony.
Laha misy olo mety tsy afaky maharè ty vaovao soa alohan’ny hanombohan’ny fijalea bevata, hataon’i Jehovah akory rozy? (Fehintsoratsy 8) c
9. Ino ty nambaran’i Jehovah antsika amy Baiboly ao?
9 Nambaran’i Jehovah antsika amy Safàny ao ty raha sisany hataony. Mivola, ohatsy, ty Baiboly fa hovelomin’i Jehovah ndraiky ty olo “tsy marina”, zany hoe ze tsy afaky naharè ty vaovao soa noho tsy afaky nanova ty fiainany. (Asa. 24:15; Lioka 23:42, 43) Fe miteraky fanontanea bevata hafa koa raha zay.
10. Ino koa ty fanontanea mety hapetrakintsika?
10 Tsy hovelomy sasy va ze olo iaby maty amy fijalea bevata, fa le liany ripaky any mandrakizay? Mivola mazava soa ty Baiboly fa ze olo manohitsy an’i Jehovah ro haripakin’i Jehovah noho ty tafikiny amy Aramagedona. Mazava ho azy fa tsy hovelomy sasy olo rey. (2 Tes. 1:6-10) Fe manao akory, ohatsy, laha misy olo maty vokatsin’ny loza arakin’ny natiora, na aksidan, na mety hoe nivonoan’olo amy fijalea bevata? (Mpito. 9:11; Zak. 14:13) Mety ho anisan’ny olo “tsy marina” hovelomy amy tontolo vaovao any rey va ty sisany amin-drozy? Tsy haintsika zay.
INO TY RAHA HAINTSIKA?
11. Mianky amin’ino ro hitsaràn’i Jesosy ty olo amy Aramagedona?
11 Misy raha sisany avao haintsika mikasiky ty raha hiseho amy hoavy. Haintsika, ohatsy, fa mianky amy ze fomba anandesan’olo ty rahalahin’i Kristy amy zao ro hitsaràny ty olo amy Aramagedona. (Mat. 25:40) Ho anisan’ny aondry ze olo nanoha ty voahosotsy noho Kristy. Haintsika koa fa mbo hisy rahalahin’i Kristy tavela an-tany etoy afaran’ny hanombohan’ny fijalea bevata, le mbo tsy hampiakary an-danitsy any rozy laha tsy fa marìny hanomboky ty Aramagedona. Laha mbo misy rahalahin’i Kristy zany ty an-tany etoy, le azo inoa fa mbo afaky hanao raha ze olo mana fo soa mba hanohana an-drozy noho ty asa ataon-drozy. (Mat. 25:31, 32; Apok. 12:17) Manino ro tena vatan-draha fanazavà reo?
12-13. Mety hanao akory ty olo sisany lafa mahita hoe rava “Babylona Bevata”? (Henteo koa sary reo.)
12 Ndre fa manomboky aza ty fijalea bevata, lafa hitan’olo sisany hoe rava “Babylona Bevata” le mety ho tiaron-drozy hoe fa ela ty Vavolombelon’i Jehovah ro niresaky mikasiky an’ny raha io. Mety hiova amy zay va rozy lafa mahita an’ny raha io ka hiaraky amy vahoakin’i Jehovah?—Apok. 17:5; Ezek. 33:33.
13 Hanahaky an’ny raha niseho ta Ejipta any tamy andron’i Mosesy iny ty raha hiseho amy zay. Tiarovo fa “nisy olo maro baka amy firenena hafa” niaraky tamy Israelita rey lafa rozy niala ta Ejipta any. Mety lasa nino an’i Jehovah ty sisany amin’olo reo lafa nihitan-drozy hoe nitanteraky Loza Folo nivolanin’i Mosesy rey. (Eks. 12:38) Laha misy raha manahaky ani-zay koa miseho lafa rava Babylona Bevata, ho diso fanantenà va tsika laha misy olo lasa manompo an’i Jehovah miaraky amintsika aloha kelin’ny hiavian’ny Aramagedona? Mazava ho azy fa tsy hanao ani-zay tsika! Teantsika ty hanahaky ty toetsin’ny Babantsika an-danitsy any iny. “Ndranahary mamindra fo noho miferinay” ie, “tsy mora meloky, tena be fitiava noho tsy mivaliky sady tena tea fahamarina.” b—Eks. 34:6.
Lafa hitan’olo sisany hoe rava “Babylona Bevata”, le mety ho tiaron-drozy hoe fa ela ty Vavolombelon’i Jehovah ro niresaky mikasiky an’ny raha io (Fehintsoratsy 12-13) d
14-15. Mianky amy ty fotoa ahafatesany na ty pilasy ipetrahany va ty hoavin’olo raiky mandrakizay? Hazavao. (Salamo 33:4, 5)
14 Kindraiky tsika maharè rahalahy na anabavy mivola ho zao mikasiky ty fianakaviany tsy manompo an’i Jehovah: “Atao raha teako laha maty alohan’ny hanombohan’ny fijalea bevata ie, amy zay mba tamany hovelomy ndraiky.” Azo antoky fa antony soa ro mahavy azy hivola ani-zay. Fe tsy mianky amy ty fotoa nahafaty olo raiky ty hoaviny mandrakizay. Mpitsara lavorary Jehovah. Azo antoky zany fa hanao ty marina noho ty rariny avao ie lafa manapa-kevitsy. (Vakio Salamo 33:4, 5.) Afaky matoky tsika fa “hanao ty rariny” azy “Mpitsara ty tany iaby” iny.—Gen. 18:25.
15 Azo inoa koa fa tsy mianky amy ty pilasy ipetrahan’olo raiky ty hoaviny mandrakizay. An-tapitrisany ty olo mipetraky amy tany tsy ahafahany maharè ty hafatsy mikasiky an’ny Fanjakà iny. Sanatria an’i Jehovah zany ty avy le hitsara ka hivola hoe “aosy” olo rey. (Mat. 25:46) Tena midary an’ny olo rey kiraidraiky azy Mpitsara ty tany iaby manao ty marina iny, mbo mandilatsy ty ataontsika aza. Tsy haintsika hoe hanao akory ty fomba handaminan’i Jehovah ty raha hiseho amy fijalea bevata. Mety ho afaky hianatsy mikasiky an’i Jehovah, hino azy, noho hanoha azy vasa ty sisany amin’olo rey lafa hanamasy ty anarany amy ty firenena iaby an-tany etoa ie.—Ezek. 38:16.
Lafa manomboky ty fijalea bevata, ... mety hiova va ty olo sisany lafa mahita an’ny raha io?
16. Ino ty raha haintsika mikasiky an’i Jehovah? (Henteo koa sary io.)
16 Lafa mianatsy ty Baiboly tsika, le lasa haintsika hoe tena lafovily amy Jehovah ty aintsika olombelo. Nanome ty ain’ny Anakilahiny iny ie amy zay tsika afaky ho velo mandrakizay. (Jaona 3:16) Samby mahatsapa iaby tsika hoe tena tea antsika Jehovah. (Isaia 49:15) Mahay ty anarantsika kiraidraiky ie. Ka manao akory laha maty tsika? Tena hainy soa ty tsipiriany mikasiky antsika ka hovelominy ndraiky tsika, le hampoliny amintsika ty fitiarovantsika, zany hoe ze raha iaby tan-tsaintsika ao. (Mat. 10:29-31) Ara-dalàna zany tsika laha matoky hoe hahay hitsara ty olo kiraidraiky Babantsika be fitiava an-danitsy any iny, satria hendry ie, manao ty marina, sady mamindra fo.—Jak. 2:13.
Afaky matoky tsika fa hahay hitsara ty olo kiraidraiky Babantsika be fitiava an-danitsy any iny, satria hendry ie, manao ty marina, sady mamindra fo (Fehintsoratsy 16)
17. Ino ty hodinihintsika amy lahatsoratsy manaraky?
17 Lafa tsika nahazo an’ny fanazavà vaovao rey, le lasa tsapantsika hoe vomaiky tena malisa ty asa fitoria henanizao. Manino tsika ro mivola ani-zay? Le ino ty handrisiky antsika hazoto hitory ty vaovao soa avao? Hodinihintsika amy an-tsipiriany ty valin’ny fanontanea reo amy lahatsoratsy manaraky ao.
HIRA 76 Hoatran’ny Ahoana Moa?
a Laha teanao ho hay hoe nanino tsika ro nanao an’ny fanovà toy, le henteo ty lahatsoratsy hoe “Izany no Sitrakao”, amy Tilikambo Fiambena 15 Marsa 2015, p. 7-11.
b Lafa rava Babylona Bevata, le hiatriky raha sarotsy ty mpanompon’i Jehovah iaby lafa hanafiky an-drozy Goga baka a Magoga. Hiatriky raha sarotsy koa zany ze olo miova ka lasa manompo an’i Jehovah miaraky amy ty vahoakiny, lafa rava Babylona Bevata.
c SARY: Sary telo mampiseho hoe manino ty olo sisany ro mety tsy nitoriantsika: 1) Ampela raiky mipetraky amy tany tsy de misy fivavaha kristiana sady mampidi-doza ty mitory any, 2) mpivaly mipetraky amy tany andrarà ty asantsika, le 3) lahilahy mipetraky amy faritsy tena mitoka sady sarotsy andehana.
d SARY: Somonjara raiky niala tamy fahamarina. Tiarony fa nianarany hoe ho rava “Babylona Bevata.” Nanapa-kevitsy himpoly amy Jehovah ie ka nimpoly tamy ray aman-dreniny rey any. Lafa misy olo manao manahaky ani-zay, le teantsika ty hahay hamindra fo noho soa fanahy manahaky an’ny Babantsika an-danitsy any iny ka ho falifaly tsika hoe nisy mpanota nimpoly.
