MUISAMBO WA KULONGA 19
LOONO 22 Bufumu bukwete kumunana—Bufikye!
Nkinyi ki’atuwuku pabitale biimu bia Yehowa bia mu mafuku aafiki?
“Yehowa . . . t’akumiina’shi muntu su ngumune abutudibue.”—2 MP. 3:9.
KI’ATUISAMBILA
Tui balombene kushinkamisha’shi biimu bia Yehowa bia mu mafuku aafiki abikala bi buwa na bia kululama.
1. Buakinyi tui balombene kuamba’shi tui mu kipungo ki bukopo?
TUI mu kipungo ki bukopo! Efuku dioso tukuete kumona kulombana kua matemuki a mu Bible. Bu kileshesho, atumono “nfumu a kunundu” na “nfumu a kuushi” bi’abalu bua kuikala bu ba nfumu ba nsenga ishima. (Nda. 11:40) Tukuete kumona mukandu wi buwa wa Bufumu w’Efile Mukulu bia ukuete kulungulua mu nsenga ishima mu mushindo wa kukaanya, na bantu midiyo bakuete kusangula kufubila Yehowa. (Yesh. 60:22; Mat. 24:14) Na tukuete kupeta bia kudia bia mu kikudi “pa nsaa ilombane.”—Mat. 24:45-47.
2. Abitungu tushinkamishe kinyi, na abitungu tuwukie nkinyi?
2 Yehowa atungunuka na kuitukuasha buatudia kuikala na mpushiisho mutookane a mianda ikata ayikakitshika mu mafuku e kumpala. (Nki. 4:18; Nda. 2:28) Tushinkamisheyi’shi apakabanga mpombo ikata, atukauku mianda ayitungu’shi tuwukie bua kunyingiila na lulamato loso, mpaa na kushaala mu buumune mu kiakia kipungo ki bukopo. Biabia, abitungu tuwukie’shi kui ingi mianda yatush’atuwuku pabitale mafuku e kumpala. Mu uno muisambo, atukataluula kia kumpala buakinyi tui bashintuule mupushiisho eetu pabitale ingi ya ku ino mianda ikata. Atukataluula dingi ingi mianda y’atuwuku pabitale mafuku e kumpala, na mushindo wabakeyilombasha kui Nshetu e muiyilu.
KIATUSH’ATUWUKU
3. Tui bambe nkinyi pabitale nsaa ishayikala dingi bantu na mushindo wa kutuula lukumiino mui Yehowa, na buakinyi tui bambe biabia?
3 Kala tubaadi atuamba’shi, apakabanga mpombo ikata, bantu bash’abalanguilaa abakapete mushindo wa kuikala na lukumiino mui Yehowa na kupanda ku ngoshi ya Armagedone. Atuamba bino muanda tui banangushene’shi muntu oso na muanda oso wa mu kipungo kia Mpeshi a Kabutu, bibaadi abileesha muanda aukakitshika mu ano mafuku eetu. Bu kileshesho, tui banangushene’shi anka bu bibaadi Yehowa mubee kiibi kia ku buato kumpala kua’shi Mpeshi a Kabutu abangie, apakabanga mpombo ikata, Yehowa ‘akakanga kiibi,’ bua’shi muntu su ngumune t’atulanga lukumiino muadi na kupashibua.—Mat. 24:37-39.
4. Buakinyi atuamba’shi muanda oso ubaadi ukitshikie mu mafuku a Nowa t’aulombasha muanda ukata lelo uno?
4 Bi buwa kuamba’shi muanda oso ubaadi ukitshikie mu kipungo kia Mpeshi a kabutu ubaadi auleesha muanda kampanda aukakitshika mu mafuku aafiki su? Lualuulo lui’shi nya. Buakinyi atuamba biabia? Muanda Bible ta muibiakule. a Mbinyibinyi Yesu baadi mupuandikishe “mafuku a Nowa” na kipungo kia kufika kuaye. Anka ta baadi muambe’shi kintu kioso kibakitshikile mu mafuku a Nowa kibaadi akileesha muanda ukata aukakitshika mu mafuku aafiki, bu nsaa ibaadi Yehowa mufungie kiibi kia buato nya. Bino t’abipushisha’shi, ta tui balombene kulongiela ku muanda wa Nowa na Mpeshi a kabutu.
5. (a) Nowa balesheeshe lukumiino mu bikitshino naminyi kumpala kua Mpeshi a kabutu? (Bena Ebelu 11:7; 1 Mpiele 3:20) (b) Nkuipusheena kinyi kui pankatshi pa bulungudi bubakitshine Nowa na buetu lelo uno?
5 Nsaa ibaadi Nowa mupushe mukandu wa Yehowa wa kuibaka buato, baadi muleeshe lukumiino p’aye kuibaka buato. (Badika Bena Ebelu 11:7; 1 Mpiele 3:20.) Mu mushindo umune, bantu abateemesha mukandu wi buwa wa Bufumu, abitungu baleeshe lukumiino luabo mu bikitshino. (Bik. 3:17-20) Mpiele baadi muitanyine Nowa bu “mulungudi a kululama.” (2 Mp. 2:5) Anka bu bi’atuibimuene mu muisambo ushaale, t’atuwuku su Nowa baadi mukunkushe mudimo wa kulungula mukandu wi buwa kui bantu boso babaadi bashaale pa nsenga kumpala kua Mpeshi a kabutu. Lelo uno, tukuete kuikitshisha bua kulungula mukandu wi buwa kui bantu boso be mu nsenga ishima, tukuete kuibikita na kisumi. Biabia sunga tuekitshisha mushindo kinyi, ta tui na ngobesha ya kulungula muntu oso yawa mukandu wi buwa kumpala kua’shi nfudiilo ifikie. Buakinyi?
6-7. Buakinyi atuamba’shi ta tui bia kulungula muntu oso yawa mukandu wi buwa kumpala kua’shi nfudiilo ifikie? Patuula.
6 Nangushena ku bibakuile Yesu pabitale bukata bua mudimo wa bulungudi. Baadi mutemukie’shi mukandu wi buwa akulungulua “pa nsenga yoso ishadibue bua’shi wikale bukamonyi kui miilo yoso.” (Mat. 24:14) Buno butemuki bukuete kulombana lelo uno kukila bibaabudi kumpala. Mukandu wa Bufumu ukuete kulungulua mu ndimi ikile pa 1000, na ku bukuashi bua site eetu a jw.org, bantu be bungi mu nsenga ishima lelo uno mbalombene kulonga pabitale mukandu wi buwa wa Bufumu bu’Efile Mukulu.
7 Biabia, Yesu baadi mulungule balongi baaye’shi “t’anukapudisha bibundi bioso,” sunga kulungula muntu oso yawa mukandu wi buwa kumpala kua’shi atshibile bantu kiimu. (Mat. 10:23; 25:31-33) Mayi a Yesu akuete kulombana kalolo mu ano mafuku eetu. Bantu midiyo lelo uno, mbashaale mu ma mbalo muabadi bakandikie mudimo wa bulungudi. Kukatusha biabia, nsaa yoso ayikidi yaya bakuete kutanda bana nkama. Anka tukuete kuikitshisha bua kulungula mukandu wi buwa kui bantu “b’eumbo dioso, kisamba kioso, ludimi loso.” (Kbf. 14:6) Anka kiatudia kuuka nkia’shi, ta tui bia kulungula muntu oso yawa mukandu wi buwa kumpala kua’shi nfudiilo ifikie.
8. Ndukonko kinyi luatuiyipusha pabitale mushindo wabakatshibila bantu kiimu kui Yehowa mu mafuku aafiki? (Tala dingi kifuatulo.)
8 Muyile bino bibatuisambila, tui kuiyipusha’shi: Abikekala naminyi bua baaba boso bashi bapete mushindo wa kupusha mukandu wi buwa kumpala kua’shi mpombo ikata ibangie? Yehowa na Muana aaye adi mupe matalua abakatshibila bantu kiimu mushindo kinyi? (Yo. 5:19, 22, 27; Bik. 17:31) Anka bu abiakula kifundue kia mutue wa muanda wa uno muisambo, Yehowa “t’akumiina’shi muntu su ngumune abutudibue.” Anka akumiina’shi, “boso belangie ku mashimba.” (2 Mp. 3:9; 1 Ti. 2:4) Nkuamba’shi abitungu tuwukie’shi Yehowa ta muitulee ngaluulo y’akatuusha ku ino nkonko. Na te mu kitungo kia kuitulungula kiadi mukite na ki’akakitshi mu mafuku aafiki.
Yehowa akakitshi kinyi na bano boso bashi bapete mushindo wa kupusha mukandu wi buwa kumpala kua’shi mpombo ikata ibangie? (Tala kikoso 8) c
9. Yehowa mmuituleeshe kinyi mu Bible?
9 Mu Eyi diaye, Yehowa mmuituleshe ingi mianda y’akakitshi. Bu kileshesho, mu Bible Yehowa etulungula’shi akasangula bantu “bashi balulame” bashibaadi bapete mushindo wa kupusha mukandu wi buwa na kushintuula muikeelo wabo. (Bik. 24:15; Luk. 23:42, 43) Bino abibuesha ingi nkonko i na muulo.
10. Ingi nkonko kinyi ayiboo?
10 Bano boso abakafu mu kipungo kia mpombo ikata, abakabutudibua bua loso kushi lukulupilo lua lusangukilo su? Bible apatuula bino kalolo’shi, baaba boso bashikue Yehowa, na bakabutula na kiluilo kiaye ku ngoshi ya Armagendone t’abakasanguka nya. (2 Te. 1:6-10) Kadi abikala naminyi bua bangi, bu kileshesho, bantu befuile abo banabene, bafue ku masaku, sunga babadi bayipee kui bangi bantu? (Mul. 9:11; Sek. 14:13) Bangi ba ku bano bantu be kuikala munkatshi mua bantu “bashi balulame” abakasanguka mu nsenga ipia su? Mu binyibinyi, t’atuwuku nya.
KI’ATUWUKU
11. Nkukiila ku mianda kinyi kuabakatshibila bantu kiimu ku Armagedone?
11 Atuwuku bi bungi pabitale mianda ikata ya mu mafuku aafiki. Bu kileshesho, atuwuku’shi ku Armagedone, abakatshibila bantu kiimu muyile biabadi bakitshine bakuabo na Nkidishitu mianda. (Mat. 25:40) Boso babakatshibila kiimu bu mikooko, abakakuatshishena Nkidishitu na bedibue muimu. Atuwuku dingi’shi bangi ba ku bakuabo na Nkidishitu abakekala baki pa nsenga apakabanga mpombo ikata, na t’abakebaata bua kuenda muiyilu kapidi kapeela kumpala kua Armagedone kubanga nya. Bu biki’abikekala bangi ba ku bakuabo na Nkidishitu pa nsenga, bantu basha mashimba alulame abakeekala na mushindo wa kuibakuatshishena na kufuba nabo pamune. (Mat. 25:31, 32; Kbf. 12:17) Buakinyi ino mianda yoso i na muulo?
12-13. Bangi mbalombene kukita kinyi kunyima kuabo kumona kabutu ka “Babilone Mukata”? (Tala dingi kifuatulo.)
12 Kunyima kua mpombo ikata kubanga, abimueneka’shi bangi p’abamono kuluishibua kua “Babilone Mukata” abakatentekiesha’shi Tumonyi tua Yehowa tubakuile pabitale ino mianda kubanga kala. Bangi p’abakamono ino mianda mbalombene kushintuula mashimba aabo su?—Kbf. 17:5; Es. 33:33.
13 Su bino bibakitshika, abikala nka mumune na bibakitshikile mu Ejipitu mu mafuku a Moyise. Tentenkiesha’shi “kisaka kikata kia bantu” kibaadi kiisangie kui bena Isalele pababakatukile mu Ejipitu. Bangi ba ku bano bantu ababangile kulesha lukumiino, pababamuene’shi bipupa ekumi bibakuile Moyise bibaadi bilombane. (Efi. 12:38) Su muanda wi bino wakitshika kunyima kua kabutu ka Babilone Mukata, abiketukalakasha pa kumona’shi bantu babesanga kuatudi mafuku apeela kumpala kua’shi nfudiilo ifikie? Nya! Muanda abitungu tuambule ngikashi ya Nshetu e muiyilu aye muikale “Efile Mukulu sha lusa n’eshimba dia kalolo, sh’akuata nsungu bukidi, na muule ndaa na kifulo ki na lulamato na binyibinyi.” b—Efi. 34:6.
Kunyima kua mpombo ikata kubanga, bangi p’abakamono kuluishibua kua “Babilone Mukata” abakatentekiesha’shi Tumonyi tua Yehowa tubakuile ino mianda kubanga kala (Tala kikoso 12-13) d
14-15. Bua’shi muntu akapete muwa wa loso mu mafuku aafiki, mbitale nsaa y’afu sunga mbalo yadi mushaale su? Patuula. (Misambo 33:4, 5)
14 Ingi nsaa atupushaa bangi bakuetu abamba’shi: “Bi buwa su mukuetu shi kamonyi ka Yehowa afua kumpala kua’shi mpombo ikata ibangie, muanda kui lukulupilo lua’shi asangukie.” Mbinangu bi buwa abitakula bano bakuetu bua kunangushena bino. Anka bua’shi muntu akapete muwa wa loso mu mafuku aafiki, ta mbitale nsaa y’afu nya. Yehowa Nsushi mupuidikie, bitshibilo biaye bioso abikalaa bi buwa na bilulame. (Badika Misambo 33:4, 5.) Tushinkamishe’shi: “Nsushi a nsenga ishima” akakitshi kiakia kilulame.—Kib. 18:25.
15 Bi buwa kuamba’shi bua’shi muntu akapete muwa wa loso mu mafuku aafiki, ta mbitale mbalo yadi mushaale. Yehowa ta mulombene kutshibila bantu midiyo kiimu bu “mbushi” anka penda pa muanda wa’shi mbashaale mu mbalo yabashi na mushindo wa kupusha mukandu wa Bufumu. (Mat. 25:46) Nsushi mululame a boso be pa nsenga, apasukilaa bano bantu kalolo kuitukila atue. T’atuwuku mushindo aukakitshi Yehowa mianda mu kipungo kia mpombo ikata. Bangi ba ku bano bantu abakapete mushindo wa kulonga pabitale Yehowa, kuleesha lukumiino muadi, na kukila ku lupese luaye nsaa y’etumbisha kumpala kua miilo yoso.—Es. 38:16.
Kunyima kua mpombo ikata kubanga, . . . binangu bia bangi bantu abakamono yaya mianda abikashintuluka su?
16. Nkinyi kiatudi bafikie mu kuuka pabitale Yehowa? (Tala dingi kifuatulo.)
16 Ku bukuashi bua kulonga kua Bible, tui bafikie mu kuuka bi’abataa muwa wa muntu na muulo kui Yehowa. Mmutushe muwa wa Muana aaye bua kuitupa lukulupilo lua muwa wa loso. (Yo. 3:16) Atue boso tui bapushe’shi Yehowa muitufule. (Yesh. 49:15) Yehowa auku oso akuatudi kuishina diaye. Na dingi, Yehowa etuwuku kalolo mu mushindo wa’shi sunga tuafua, aketusangula muanda etuwuku kantu pa kantu, na atentekiesha mianda yoso pabitutale! (Mat. 10:29-31) Mu binyibinyi, tui na kabingilo ke buwa ka kushinkamisha’shi Nshetu sha kifulo e muiyilu, akatshibila muntu oso kiimu mu mushindo upuidikie muanda e na binangu, kululama, na lusa.—Yak. 2:13.
Tui balombene kushinkamisha’shi Yehowa akatshibila muntu oso kiimu mu mushindo upuidikie muanda e na binangu, kululama, na lusa (Tala kikoso 16)
17. Nkonko kinyi y’atukaluula mu muisambo aulondo?
17 Uno mpushiisho mupia, banyiisha kuitukuasha buatudia kukita mudimo wa bulungudi kushi kunyengakana. Buakinyi atuamba bino? Na nkinyi akitutakula bua kulungula mukandu wi buwa na kisumi? Atukapete ngaluulo mu muisambo aulondo.
LOONO 76 Opushaa naminyi?
a Bua kuuka buakinyi tubashintuula mpushiisho eetu, tala muisambo awamba’shi: Bino “nyi byodi mwibilumbuule ku kalolo koobe,” wi mu Kitenta kia Mulami kia mu 1/3/2015, esak. 8-12.
b Kunyima kua Babilone Mukata kuluishibua, bafubi boso ba Yehowa abakatonpibua nsaa yabakebatuuku ngoshi kui Goge a ku Magoge. Muntu oso akakidi ku lupese lua muilo y’Efile Mukulu akatompibua.
c KIFUATULO KIABADI BAPATUULE: Bifuatulo bisatu abilesha buakinyi t’atupete mushindo wa kulungula bantu boso mukandu wi buwa: (1) Muana mukashi mmushaleele mu mbalo i bipuilo bi na bukitshishi bui bubi kuabadi, (2) mulume na mukashi aye mmbashaleele mu ma mbalo awuule na mianda ya politike, na miiya i bukopo, na (3) muana mulume mmushaale mbalo i bukopo nkafika.
d KIFUATULO KIABADI BAPATUULE: Nsonguakashi baadi mulekie bia binyibinyi, batentekiesha bibaadi mulongie pabitale kabutu ka “Babilone Mukata.” Bashintuula binangu biaye na balukiila kui baledi baye bena Nkidishitu. Apakakitshika mianda i bino, abitungu tuambule lusa na kalolo ka Nshetu e muiyilu, na tusankie apelanga nkitshishi a bubi na kualukiila mu bia binyibinyi.
