WOTO 19
KANDA 22 Di Könuköndë seti kaa—Be a ko!
Andi u sabi u di fasi fa Jehovah o kuutu sëmbë a di ten di ta ko?
„Jehovah . . . an kë u na wan kodo sëmbë lasi libi.”—2 PET. 3:9.
SONI DI WOO LUKU
U sa dë seiki taa te Jehovah o kuutu sëmbë a di ten di ta ko, nöö a o du ën a wan leti fasi.
1. Faandi mbei u sa taki taa u ta libi a wan apaiti ten?
U TA libi a wan apaiti ten! Hiniwan daka u ta si fa dee tjabukama woto u Bëibel ta pasa tuutuu. U ta si fa „di könu u bausë” ku „di könu u libasë” ta fia ku deseei, u di hiniwan u de kë taa hën musu tii di goonliba (Dan. 11:40). U ta si fa di bunu buka u di Könuköndë u Gadu ta paaja a hii së u goonliba, nöö milionmilion sëmbë ta ko dini Jehovah (Jes. 60:22; Mat. 24:14). Boiti di dë, u ta feni hii dee soni dee u abi fanöudu „a di soifi ten”, fuu sa dini Jehovah go dou.—Mat. 24:45-47.
2. Fuun soni u sa dë seiki, nöö andi u musu hoi a pakisei tu?
2 Jehovah ta heepi u fuu ko fusutan dee fanöudu soni dee o pasa a di ten di ta ko (Nöng. 4:18; Dan. 2:28). U sa dë seiki taa te di gaan fuka bigi, nöö woo sabi hii soni di dë fanöudu fuu sa hoi useei a Jehovah go dou, söseei fuu sa dini ën makandi go dou kuma wan famii, a di hogi ten dë. Ma u musu hoi a pakisei taa so soni dë di wa sabi jeti, te a nama ku di ten di ta ko. A di woto aki, woo luku faandi mbei u toona buta pakisei a dee soni dee u bi taki taa bi o pasa a di ten di ta ko. Baka di dë, nöö woo taki u so u dee soni dee u sabi taa o pasa a ten di ta ko, söseei woo luku unfa di Tata fuu di dë a liba ala o du soni.
ANDI WA SABI?
3. Unfa u bi taki taa soni bi o dë da sëmbë te di gaan fuka bigi, nöö faandi mbei u bi taki sö?
3 A di ten di pasa, u bi taki taa te di gaan fuka o bigi, nöö sëmbë an o abi di okasi möön u ko dini Jehovah sö taa de sa pasa Amagedon libilibi. U bi taki sö, u di u bi mëni taa di seei soni di bi pasa a di pisiten u di Gaan Wata nöö bi o pasa a di ten aki. U bi ta mëni taa leti kumafa na wan sëmbë bi sa go a di gaan boto dendu baka di Jehovah bi tapa di döö, sö nöö na wan sëmbë bi o sa ko dini Jehovah möön u de fika a libi te di gaan fuka bigi.—Mat. 24:37-39.
4. Faandi mbei wa ta taki möön taa hii dee soni dee pasa a di pisiten u di Gaan Wata o pasa a di ten di ta ko? Konda wan woto.
4 A dë sö taa, u musu tei hii dee soni dee bi pasa a di pisiten u di Gaan Wata maaka ku dee soni dee o pasa a di ten di ta ko u? Wë nönö. Faandi mbei u taki sö? U di di Bëibel an ta taki sö. a A dë sö tuu taa Jesosi bi tei „di ten u Noa” maaka ku di ten di a bi o toona ko baka, ma an bi taki taa hii dee soni dee bi pasa a di ten u Noa bi o pasa a di ten di ta ko. Söseei an bi taki taa di tapa di Jehovah bi tapa di döö u di gaan boto, bi ta lei unfa soni bi o pasa a di ten di ta ko. Ma di soni aki an kë taki taa wa sa lei soni a di woto u Noa ku di Gaan Wata.
5. (a) Andi Noa bi du ufö di Gaan Wata ko? (Hebelejën 11:7; 1 Petuisi 3:20) (b) Unfa di fasi fa soni bi dë da Noa dë kumafa soni dë da u a di ten aki, te a nama ku di peleikiwooko?
5 Di Noa jei andi Jehovah bi o du, hën a lei taa a ta biibi, di a mbei di Gaan boto. (Lesi Hebelejën 11:7; 1 Petuisi 3:20.) Sö nöö dee sëmbë dee ta jei di bunu buka u di Könuköndë u Gadu, musu lei taa de ta biibi (Tjab. 3:17-20). Petuisi bi taki taa „Noa hën bi ta konda da dee sëmbë u di ten dë fa u de musu libi bunu a Gadu wojo” (2 Pet. 2:5). Ma kumafa u bi taki a di woto di pasa, wa sabi ee Noa bi mbei möiti u peleiki da hii dee sëmbë dee bi dë a goonliba ufö di Gaan Wata ko. A di ten aki u ta mbei möiti u peleiki da sëmbë u hii së u goonliba, nöö u ta du ën fajafaja. Ma hii fa u ta mbei di möiti dë, tökuseei wa o sa peleiki da hii sëmbë a goonliba ufö di kaba dou. Faandi mbei u taki sö?
6-7. Faandi mbei u sa taki taa wa o sa peleiki da hii sëmbë a goonliba ufö di kaba dou?
6 Buta pakisei a di soni di Jesosi bi taki u di peleikiwooko di u ta du. A bi taki taa ’di bunu buka u di Könuköndë bi o paaja te dou hii goonliba, be hii sëmbë jei’ (Mat. 24:14). Di soni dë hën ta pasa nöunöu. Nöiti u bi peleiki sö hia wan daka. Di bunu buka u di Könuköndë ta paaja a möön leki 1000 töngö, nöö u di u ta wooko ku di jw.org website fuu, mbei gaansë u dee sëmbë u di goonliba aki sa ko sabi soni u di könuköndë u Gadu.
7 Jesosi bi piki dee bakama fëën tu taa de an bi „o sa kaba di wooko a hii dee köndë”, nasö taa de an bi o sa peleiki da hii sëmbë ufö a toona ko (Mat. 10:23; 25:31-33). Dee soni dee Jesosi bi taki o pasa a di ten fuu aki tu. Milionmilion sëmbë u di ten aki ta libi a köndë ka wa sa peleiki fiifii. Boiti di dë, de ta pai höndöhöndö mii hiniwan miniti. U ta mbei möiti u konda di buka da „hii pei nasiön sëmbë, ku hii pei lö, ku hii pei föluku dee ta fan hii dee peipei töngö u goonliba” (Ako. 14:6). Ma wa o sa peleiki di bunu buka da hii sëmbë a goonliba ufö di kaba dou.
8. Andi u sa hakisi useei u di fasi fa Jehovah o kuutu sëmbë a di ten di ta ko? (Luku dee peentje tu.)
8 Ma kandë u sa ta hakisi useei taa: Andi o pasa ku dee sëmbë dee an o feni di okasi u jei di bunu buka ufö di gaan fuka bigi? Unfa Jehovah ku di Womi Mii fëën di a da pasi u kuutu sëmbë, o du ku de? (Joh. 5:19, 22, 27; Tjab. 17:31). Di tëkisi u di woto aki ta taki taa Jehovah „an kë u na wan kodo sëmbë lasi libi”. „Ma a kë taa hii sëmbë musu feni di okasi u de sa bia de libi ko nëën” (2 Pet. 3:9; 1 Tim. 2:4). Wë, u musu hoi a pakisei taa Jehovah an mbei u ko sabi jeti andi o pasa ku dee sëmbë dee an feni di okasi u ko lei sabi ën. Jehovah an musu u piki u andi a du kaa, ku andi a o du a di ten di ta ko.
Unfa Jehovah o du ku dee sëmbë dee an o feni di okasi u jei di bunu buka ufö di gaan fuka bigi? (Luku palaklafu 8) c
9. Andi Jehovah mbei u ko sabi ku di Bëibel?
9 Jehovah wooko ku di Wöutu fëën u piki u wantu u dee soni dee a o du. Di Bëibel ta taki taa Jehovah o toona weki dee sëmbë „dee an bi libi bunu” ko a libi baka. Dee sëmbë dë an bi feni di okasi u de lei sabi Jehovah u de bi sa tooka de libi (Tjab. 24:15; Luk. 23:42, 43). Di soni dë mbei u sa toona hakisi useei woto fanöudu soni jeti.
10. Un woto soni u sa ta hakisi useei?
10 A dë sö taa dee sëmbë dee o dëdë a di pisiten u di gaan fuka an o weki ko a libi nöiti möön u? Di Bëibel ta taki gbelingbelin taa dee sëmbë dee Jehovah ku dee ëngëli fëën o kii a di feti u Amagedon, u di de hopo fia ku ën, an o weki ko a libi möön (2 Tes. 1:6-10). Ma andi o pasa ku dee woto sëmbë dee o lasi libi a di ten dë, u di wan woto soni kii de? Kandë de dëdë u di de bi dë ku suwaki, u di de bi ko gaandi kaa, u di sëmbë kii de, nasö u di wan hogi soni miti de (Peleik. 9:11; Sak. 14:13). U sabi taa dee sëmbë „dee an bi libi bunu” a Gadu wojo o weki ko a libi baka a di njunjun goonliba. Ma a dë sö taa dee sëmbë dee o lasi libi a dee lö fasi dë, o dë a di kulupu dë dendu ö? Wë, wa sabi seei.
ANDI U SABI?
11. Andi de o luku te de o kuutu sëmbë na Amagedon?
11 U sabi sömëni u dee soni dee o pasa a di ten di ta ko. U sabi taa di fasi fa de o kuutu sëmbë na Amagedon o nama ku di fasi fa de bi libi ku dee dee baaa u Keesitu (Mat. 25:40). Dee sëmbë dee de o kuutu kuma sikapu, da dee sëmbë dee bi lei taa de dë a Jesosi ku dee salufuwan së. U sabi tu taa so u dee baaa u Keesitu o dë a goonliba aki jeti, baka te di gaan fuka bigi, nöö kölö sö ufö Amagedon bigi de o tei de tja go a liba ala. So langa dee baaa u Keesitu dë a goonliba aki, sëmbë o abi di okasi jeti u tei di së u de, nasö u wooko makandi ku de (Mat. 25:31, 32; Ako. 12:17). Faandi mbei dee soni dee u taki aki dë fanöudu?
12-13. Andi so sëmbë sa du tee de si taa „di Gaan Babilon” booko kaba a sösö? (Luku dee peentje tu.)
12 Te di gaan fuka bigi, nöö a kan taa so u dee sëmbë dee o si taa „di Gaan Babilon” booko kaba a sösö, o toona mëni taa sömëni jaa longi dee Jehovah Kotoigi bi ta taki taa di soni dë bi o pasa. A sa kan taa so u dee sëmbë dee o si dee soni dë o bia ko ta biibi Jehovah u?—Ako. 17:5; Eze. 33:33.
13 Ee de bia ko ta biibi Jehovah, nöö soni o pasa a di seei fasi kumafa a bi pasa a di köndë Egepiti a di ten u Mosesi. Na fëëkëtë taa ’gaan hia woto köndë sëmbë’ bi go ku dee Isaëli sëmbë di de kumutu a Egepiti. A kan taa so u dee sëmbë dë bi ko ta biibi Jehovah, di de si taa dee teni soni dee Mosesi bi taki taa Gadu bi o du u sitaafu dee Egepiti sëmbë, bi pasa tuutuu (Ëki. 12:38). Ee di seei soni pasa te „di Gaan Babilon” booko kaba a sösö, nöö a dë sö taa a musu toobi u taa dee sëmbë dë tei di së u Jehovah kölö sö ufö di kaba dou ö? Wë, nönö! U kë djeesi di Tata fuu a liba ala „di abi tjalihati u sëmbë, nöö a lobi sëmbë tu. Hati fëën an ta boonu hesi, a abi bunuhati pasa maaka, nöö hii juu a ta du dee soni dee a ta taki”. b—Ëki. 34:6.
So u dee sëmbë dee o si taa „di Gaan Babilon” booko kaba a sösö, sa toona mëni taa sömëni jaa longi dee Jehovah Kotoigi bi ta taki taa di soni dë bi o pasa (Luku palaklafu 12-13) d
14-15. A dë so taa te ka wan sëmbë ta libi, nasö di pisiten di wan sëmbë dëdë, hën o taki ee a o feni di okasi u libi u teego u? Booko ën a piki möni (Psalöm 33:4, 5).
14 So juu baaa ku sisa ta taki taa: „A bi o möön bunu ee dee famii u mi di na ta dini Jehovah dëdë ufö di gaan fuka bigi. A sö wan fasi Jehovah o sa weki de ko a libi baka.” De ta taki sö, u di de ta fii da de. Ma di pisiten di wan sëmbë dëdë, nëën o taki ee di sëmbë o feni di okasi u libi u teego. Jehovah da di möön bunu kuutuma, nöö a ta du soni a wan leti fasi. (Lesi Psalöm 33:4, 5.) U sa dë seiki taa ’di Kuutuma u hii di mundu’ o kuutu soni a wan leti fasi.—Ken. 18:25.
15 A dë u fusutan tu taa na te ka wan sëmbë ta libi, hën o taki ee a o feni di okasi u libi u teego. Nöiti Jehovah o kuutu milionmilion sëmbë kuma kaabita, u di de ta libi a wan köndë ka de an feni di okasi u lei sabi ën (Mat. 25:46). Di Kuutuma u hii di mundu ta booko hën hedi seei ku dee sëmbë dë möön leki fa u ta booko u hedi ku de. Wa sabi unfa Jehovah o seeka soni a di pisiten u di gaan fuka. Kandë te de si dee soni dee a o du a di pisiten u di gaan fuka, nöö di soni dë o mbei de biibi Jehovah te a mbei di në fëën ko limbo.—Eze. 38:16.
Te di gaan fuka bigi, nöö so u dee sëmbë dee o si dee soni dee o ta pasa, o sa tei di së u Jehovah jeti ö?
16. Andi u Jehovah u ko sabi? (Luku di peentje tu.)
16 Dee soni dee u lei a Bëibel heepi u fuu ko fusutan taa Jehovah ta kai di libi fuu gaan soni. A mbei di Womi Mii fëën ko dëdë da u, sö taa u sa feni di libi u teego (Joh. 3:16). Hii u tuu ta fii unfa Jehovah lobi u tjika (Jes. 49:15). A sabi hii u tuu në. A sabi u sö tee taa ee u dëdë seei a sa weki u ko a liba baka leti kumafa u bi dë, söseei a sa heepi u fuu sa ta mëni dee soni dee u bi sabi a fesi (Mat. 10:29-31). U sa dë seiki taa di lobihati Tata fuu di dë a liba ala o kuutu hiniwan sëmbë a wan leti fasi, a wan soifi fasi, söseei ku tjalihati.—Jak. 2:13.
U sa dë seiki taa Jehovah o kuutu hiniwan sëmbë a wan leti fasi, a wan soifi fasi, söseei ku tjalihati (Luku palaklafu 16)
17. Andi woo luku a di woto di ta ko?
17 U di u ko fusutan dee soni aki möön bunu, mbei u ko ta möön si unfa di peleikiwooko dë fanöudu tjika a di ten aki. Faandi mbei u sa taki sö? Söseei andi ta da u taanga fuu ta du di peleikiwooko fajafaja go dou? Woo taki u dee soni aki finifini a di woto di ta ko.
KANDA 76 Konda unfa i ta fii
a Ee i kë sabi faandi mbei u tooka di soni dë, nöö i sa luku di woto „Sö i feni ën bunu fii du”. A dë a Di Hei Wakitimawosu u 15 u gaanliba u 2015 bl. 7-11.
b Baka te di Gaan Babilon booko kaba a sösö, nöö tesi o miti hii dee dinima u Jehovah a di pisiten di Gögi u Magögi o go feti ku de. Söseei tesi o miti hiniwan u dee sëmbë dee o tei di së u di föluku u Gadu baka te di Gaan Babilon booko kaba a sösö.
c DEE SONI DI DEE PEENTJE KË TAKI: Dee peentje aki ta lei faandi mbei na hii sëmbë o sa jei di bunu buka: (1) Wan mujëë ta libi a wan köndë ka i musu u hoi iseei a di biibi u di köndë, nöö di soni dë ta mbei a taanga dëën, (2) wan womi ku hën mujëë ta libi a wan köndë ka dee tiima u di köndë ta mbei a taanga da de, söseei de ta mbei hogi miti de, (3) wan womi ta libi a wan longi kamian a matu dendu ka sëmbë an sa dou.
d DEE SONI DI DEE PEENTJE KË TAKI: Wan mujëë di an bi ta dini Jehovah möön ta toona mëni baka taa a bi lei taa „di Gaan Babilon” bi o booko kaba a sösö, hën a toona ko a Jehovah ku dee sëmbë fëën baka. Ee sö wan soni ko pasa, nöö u kë djeesi di Tata fuu di dë a liba ala di abi tjalihati u sëmbë, söseei di ta wai te wan sëmbë di bi du wan zöndu toona ko nëën baka.
