SIHLOKO LESIFUNDVWAKO 19
INGOMA 22 UMbuso Uyabusa—Awute!
Yini Lesiyatiko Ngekwehlulela KwaJehova Esikhatsini Lesitako?
“Jehova . . . akafisi kutsi kubhubhe ngisho namunye.”—2 PHET. 3:9.
LOKUTAWUCOCWA NGAKO
Singaciniseka kutsi Jehova utawehlulela ngendlela lelungile nalekahle esikhatsini lesitako.
1. Yini leyenta sitsi siphila esikhatsini lapho khona kwenteka tintfo letinyenti letijabulisako?
SIPHILA esikhatsini lapho khona kwenteka tintfo letinyenti letijabulisako! Onkhe malanga sibona kugcwaliseka kwetiphrofetho teliBhayibheli. Sibonelo nje, sibona “inkhosi yaseningizimu” ifucana ‘nenkhosi yasenyakatfo’ alwela kubusa umhlaba. (Dan. 11:40, umbhalo longentasi) Sibona nekushunyayelwa kwetindzaba letimnandzi teMbuso kwentiwa ngelizinga lelisetulu kakhulu futsi tigidzi tebantfu tikhetsa kukhonta Jehova. (Isa. 60:22; Mat. 24:14) Siphindze sitfole imfundvo lenyenti “ngesikhatsi lesifanele” lesisita kutsi sisondzelane naNkulunkulu.—Mat. 24:45-47.
2. Yini lesingaciniseka ngayo, kodvwa yini lokufanele siyivume?
2 Jehova uchubeka asisita kutsi siticondze kancono tintfo letibalulekile letitawenteka ngekushesha. (Taga 4:18; Dan. 2:28) Singaciniseka kutsi nakucala kuhlupheka lokukhulu, sitawukwati konkhe loko lokufanele sikwati kuze sitawuhlala setsembekile futsi sihlale sinebunye ngaleso sikhatsi lesitawube simatima. Nobe kunjalo, kufanele sivume kutsi kunetintfo lesingatati mayelana nelikusasa. Kulesihloko, sitawucale sicoce ngesizatfu lesente sashintja loko besikushito mayelana naletinye taletintfo letitawenteka. Sitawubese sicoca ngaletinye tintfo lesitatiko mayelana nelikusasa nendlela Babe wetfu wasezulwini latawenta ngayo tintfo.
LOKO LESINGAKWATI
3. Ngaphambili, besitsi Jehova utalivala nini litfuba lekutsi bantfu bacale kumkhonta, futsi loko besikusho ngasiphi sizatfu?
3 Esikhatsini lesendlulile, besitsi kwaze kwacala nje kuhlupheka lokukhulu, kute umuntfu losetawuba nelitfuba lekucala akhonte Jehova futsi asindze ku-Amagedoni. Loko sakusho ngobe besitsi tintfo letenteka ngaZamcolo timelela tintfo letitawenteka esikhatsini lesitako. Sibonelo nje, besitsi njengobe Jehova avala umnyango wemkhumbi ngaphambi kwekutsi kucale Zamcolo, ngendlela lefanako, nakucala kuhlupheka lokukhulu kutawuba ngatsi uvala umnyango walelive laSathane, ngekwenta njalo kube bete labanye bantfu labasindziswako.—Mat. 24:37-39.
4. Yini leyenta singasasho kutsi intfo ngayinye leyenteka ngesikhatsi saZamcolo imelela lokutsite lokutawenteka esikhatsini lesitako? Chaza.
4 Kukahle yini kutsi sitsi intfo ngayinye leyenteka ngaZamcolo imelela tintfo letitawenteka esikhatisni lesitako? Cha. Ngasiphi sizatfu? Ngobe kute imiBhalo lekusekelako loko. a Kuliciniso kutsi Jesu wafananisa “sikhatsi saNowa” nekuba khona kwakhe, kodvwa bekangasho kutsi lokwenteka ngesikhatsi saZamcolo bekutawenteka esikhatsini lesitako, njengalesikhatsi Jehova avala umnyango walomkhumbi. Kodvwa loko akusho kutsi kute lesingakufundza kulendzaba yaNowa naZamcolo.
5. (a) Yini Nowa layenta ngaphambi kwekutsi kufike Zamcolo? (KumaHebheru 11:7; 1 Phetro 3:20) (b) Simo setfu lamuhla sifana njani nesaNowa nakutiwa endzabeni yekushumayela?
5 Ngesikhatsi Nowa eva umlayeto waJehova losecwayiso, wakhombisa kutsi unekukholwa ngekutsi akhe umkhumbi. (Fundza KumaHebheru 11:7; 1 Phetro 3:20.) Ngendlela lefanako, bantfu labeva tindzaba letimnandzi teMbuso waNkulunkulu kufanele bente lokutsite ngaloko labakuvako. (Imis. 3:17-20) Phetro wabita Nowa ngekutsi ‘ngumshumayeli wekulunga.’ (2 Phet. 2:5) Nobe kunjalo, njengobe sibonile esihlokweni lesendlulile, asati kutsi Nowa bekanendlela lehlelekile yini yekushumayela kuze acoce nabo bonkhe bantfu emhlabeni ngaphambi kwekutsi kufike Zamcolo. Lamuhla sishumayela emhlabeni wonkhe futsi siyatimisela kuze siwente lomsebenti. Kodvwa ngisho singetama kanganani, ngeke sikhone kubashumayela bonkhe bantfu emhlabeni kusengakefiki kuphela. Kwentiwa yini loko?
6-7. Yini leyenta sitsi ngeke sikhone kushumayela bonkhe bantfu labasemhlabeni ngaphambi kwekutsi kuphela kufike? Chaza.
6 Cabanga ngaloko Jesu lakusho ngemsebenti wetfu wekushumayela. Waphrofetha kutsi tindzaba letimnandzi betitawushunyayelwa “emhlabeni wonkhe, kuze tiviwe ngito tonkhe tive.” (Mat. 24:14) Lesiphrofetho sigcwaliseka ngelizinga lelisetulu lamuhla. Umlayeto weMbuso ushunyayelwa ngetilwimi letingetulu kwa-1 000, futsi i-website letsi jw.org yenta kutsi bantfu labanyenti kakhulu emhlabeni bawuve lomlayeto.
7 Nobe kunjalo, Jesu waphindze watjela bafundzi bakhe kutsi bebangeke ‘bawacedze onkhe emadolobha,’ nobe bashumayela bonkhe bantfu ngaphambi kwekutsi abuye. (Mat. 10:23; 25:31-33) Emavi aJesu atawuba liciniso nasesikhatsini setfu. Tigidzi tebantfu lamuhla tihlala etindzaweni lapho umsebenti wekushumayela uvintjelwe khona kamatima. Ngetulu kwaloko, kutalwa bantfwana labanyenti njalo ngemzuzu. Senta konkhe lokusemandleni etfu kuze sishumayele tindzaba letimnandzi ‘kuto tonkhe tive, tinhlanga, netilwimi.’ (Semb. 14:6) Kodvwa liciniso likutsi ngeke sikhone kushumayela umuntfu ngamunye losemhlabeni ngaphambi kwekutsi kuphela kufike.
8. Ngumuphi umbuto lokungenteka sitibute wona mayelana nendlela Jehova latawehlulela ngayo bantfu esikhatsini lesitako? (Buka nesitfombe.)
8 Sicabanga ngaloko lesisandza kucoca ngako, singatibuta: Yini letawenteka kulabo lokungenteka abakalitfoli litfuba lekuva tindzaba letimnandzi ngaphambi kwekutsi kucale kuhlupheka lokukhulu? Jehova neNdvodzana yakhe lawunikete yona lomsebenti wekwehlulela batawubehlulela njani? (Joh. 5:19, 22, 27; Imis. 17:31) Umbhalo lokusekelwe kuwo lesihloko utsi Jehova “akafisi kutsi kubhubhe ngisho namunye.” Kodvwa ufuna kutsi “bonkhe bantfu baphendvuke.” (2 Phet. 3:9; 1 Thim. 2:4) Nanobe sesikwati loku, Jehova usengakasitjeli indlela latabehlulela ngayo bantfu labangazange sebeve tindzaba letimnandzi. Kuliciniso kutsi akaphoceleleki kusitjela loko lasakwentile nobe loko latawukwenta.
Jehova utabehlulela njani labo lokungenteka abazange sebalitfole litfuba lekuva tindzaba letimnandzi ngaphambi kwekutsi kucale kuhlupheka lokukhulu? (Buka sigaba 8) c
9. Yini Jehova lasitjele yona eBhayibhelini?
9 EVini lakhe, Jehova usitjele letinye tetintfo latawutenta. Sibonelo nje, liBhayibheli lisitjela kutsi Jehova utawuvusa bantfu ‘labangakalungi’ labangazange sebalitfole litfuba lekuva tindzaba letimnandzi nelekushintja indlela labaphila ngayo. (Imis. 24:15; Luk. 23:42, 43) Loko kuphakamisa leminye imibuto lebalulekile.
10. Ngumiphi leminye imibuto lesingatibuta yona?
10 Bonkhe bantfu labatawufa ngekuhlupheka lokukhulu batawubhujiswa phakadze yini futsi babe bete litsemba lekuphindze bavuke? ImiBhalo ikwenta kucace kutsi labo labamelene naJehova futsi labatawubhujiswa nguye nelibutfo lakhe nge-Amagedoni ngeke bavuswe. (2 Thes. 1:6-10) Kodvwa kutsiwani ngalabanye bantfu? Sibonelo nje, labanye kungenteka bafe ngekuhlupheka lokukhulu ngenca yekugula nobe kukhula ngeminyaka, nobe tingoti nobe babulawe ngulabanye bantfu. (Shu. 9:11; Zak. 14:13) Kungenteka yini kutsi labanye balabantfu batawuba semkhatsini ‘walabangakalungi’ labatawuvuswa emhlabeni lomusha? Asati.
LOKO LESIKWATIKO
11. Yini letawuncuma kutsi bantfu batawehlulelwa njani nge-Amagedoni?
11 Kukhona lesikwatiko mayelana netintfo letitawenteka esikhatsini lesitako. Sibonelo nje, siyati kutsi nge-Amagedoni, bantfu batawehlulelwa kuye ngendlela lababaphetse ngayo banakaboKhristu. (Mat. 25:40) Labo lokutawutsiwa batimvu batawube bakhombisile kutsi bayamsekela Khristu nalabagcotjiwe. Siyati nekutsi labanye banakaboKhristu batawube baselamhlabeni ngemuva kwekucala kwekuhlupheka lokukhulu futsi batawube basekhona ngaphambi nje kwekutsi kucale i-Amagedoni. Yingci nje nabaselamhlabeni banakaboKhristu, labo labanetinhlitiyo leticotfo batawuba nelitfuba lekubasekela, futsi basekele nemsebenti labawentako. (Mat. 25:31, 32; Semb. 12:17) Abaluleke ngani lamaciniso?
12-13. Yini lokungenteka labanye bantfu bayente nababona “iBhabhulona Lenkhulu” ibhujiswa? (Buka nesitfombe.)
12 Ngisho nangemuva kwekucala kwekuhlupheka lokukhulu, kungenteka labanye batawutsi nababona “iBhabhulona Lenkhulu” ibhujiswa, bakhumbule kutsi sekuphele iminyaka leminyenti BoFakazi BaJehova batsi loku kutawenteka. Kungenteka yini kutsi labanye labatakubona loko babe nekukholwa kuJehova?—Semb. 17:5; Hez. 33:33.
13 Loko kutawufana nalokwenteka eGibhithe ngesikhatsi saMosi. Khumbula kutsi ‘licembu lelikhulu lebantfu’ lahamba nema-Israyeli ngesikhatsi aphuma eGibhithe. Kungenteka labanye babo bacala kuba nekukholwa ngesikhatsi babona tecwayiso taMosi letimayelana neTishayo Letilishumi tifezeka. (Eks. 12:38) Nangabe kwenteka intfo lefanako ngemuva kwekubhujiswa kweBhabhulona Lenkhulu, kutasidvumata yini kutsi labanye bacale kukhonta Nkulunkulu kanye natsi ngaphambi nje kwekutsi lelive libhujiswe? Cha! Sifuna kulingisa Babe wetfu wasezulwini, ‘longuNkulunkulu lonesihawu neluvelo, lowephuta kutfukutsela futsi lochichima lutsandvo lolucotfo neliciniso.’ b—Eks. 34:6.
Labanye labatawubona nakubhujiswa “iBhabhulola Lenkhulu” batawukhumbula kutsi sekuphele iminyaka leminyenti BoFakazi BaJehova batsi loku kutawenteka (Buka tigaba 12-13) d
14-15. Kutsi umuntfu utakutfola yini kuphila lokuphakadze kuya ngekutsi ufa nini nekutsi uhlala kuphi yini? Chaza. (Tihlabelelo 33:4, 5)
14 Singahle sive umzalwane nobe dzadze atsi: “Kungaba ncono kutsi sihlobo sami sife ngaphambi kwekutsi kucale kuhlupheka lokukhulu ngobe lingaba khona litsemba lekutsi sivuswe.” Umuntfu usuke angakacondzi lokubi nakasho njalo. Kodvwa kutsi umuntfu utawuvuswa yini akuyi ngekutsi ufe nini. Jehova unguMehluleli lophelele, uhlale enta tincumo letikahle naletilungile. (Fundza Tihlabelelo 33:4, 5.) Singaciniseka kutsi ‘uMehluleli wemhlaba wonkhe’ utawenta lokulungile.—Gen. 18:25.
15 Kunengcondvo kwephetsa ngekutsi, kutsi umuntfu utakutfola yini kuphila lokuphakadze akuyi ngekutsi uhlala kuphi. Jehova angeke ehlulele tigidzi tebantfu ngekutsi atsi “timbuti” ngenca nje yekutsi bahlala etindzaweni lapho umlayeto weMbuso ungefiki khona. (Mat. 25:46) UMehluleli wemhlaba wonkhe lolungile unendzaba kakhulu nalabantfu kwendlula tsine. Asati kutsi Jehova utawuticondzisa njani tintfo ngekuhlupheka lokukhulu. Kungenteka labanye balabantfu batawuba nalo litfuba lekufundza ngaJehova, babe nekukholwa kuye futsi babe seluhlangotsini lwakhe nakatingcwelisa embikwato tonkhe tive.—Hez. 38:16.
Ngemuva kwekucala kwekuhlupheka lokukhulu,. . . kungenteka yini kutsi labanye labatawubona nakwenteka letintfo babe nekukholwa kuJehova?
16. Yini lesesiyati ngaJehova? (Buka nesitfombe.)
16 Njengobe sidadisha liBhayibheli, sibonile kutsi kuphila kwemuntfu kuligugu kakhulu kuJehova. Wanikela ngeNdvodzana yakhe kuze sonkhe sibe nelitsemba lekuphila phakadze. (Joh. 3:16) Sonkhe sitibonele umusa waJehova. (Isa. 49:15) Wati ngamunye wetfu ngeligama. Ecinisweni usati kakhulu kangangekutsi ngisho nobe singafa, angakhona kusivusa ngobe ukhumbula ngisho netintfo letincane ngatsi nako konkhe lokusetingcondvweni tetfu! (Mat. 10:29-31) Ngako sinesizatfu lesivakalako sekuciniseka kutsi Babe wetfu wasezulwini lositsandzako utawehlulela ngamunye wetfu ngendlela lekahle, lelungile nalenemusa.—Jak. 2:13.
Singaciniseka kutsi Jehova utawehlulela umuntfu ngamunye ngendlela lekahle, lelungile nalenemusa (Buka sigaba 16)
17. Sitawucoca ngani esihlokweni lesilandzelako?
17 Lolushintjo lesesifundze ngalo lusenta sibone kutsi umsebenti wetfu wekushumayela uphutfuma kakhulu. Sisho ngani? Yini leyenta sichubeke sishumayela tindzaba letimnandzi ngekutimisela? Lemibuto sitayiphendvula esihlokweni lesilandzelako.
INGOMA 76 Utiva Kanjani?
a Kuze utfole sizatfu lesente kwaba nalolushintjo, buka sihloko lesitsi “Kwaba Kuhle Kuwe Kutsi Kube Njalo,” ku-Sicongosekulindza saMarch 15, 2015, emakh. 7-11.
b Ngemuva kwekubhujiswa kweBhabhulona Lenkhulu, tonkhe tinceku taJehova titawuvivinywa nakuhlasela Gogi wakaMagogi. Nobe ngubani lotihlanganisa nato ngemuva kwekubhujiswa kweBhabhulona Lenkhulu naye utawuvivinywa.
c KUCHAZWA KWETITFOMBE: Titfombe letintsatfu letikhombisa kutsi yini leyenta labanye bangatitfoli tindzaba letimnandzi: (1) Lomunye make uhlala eveni lapho inkholo lehamba embili yenta kutsi kungaphephi kushumayela, (2) labashadene bahlala eveni lapho khona licembu lepolitiki lelibusako litsi akukho emtsetfweni kushumayela tindzaba letimnandzi futsi lenta kube yingoti (3) lijaha lihlala eveni lelikhashane kakhulu futsi lokungefikeki kulo.
d KUCHAZWA KWESITFOMBE: Sisi lowayekela kukhonta Jehova ukhumbula loko lakufundza ngekubhujiswa ‘kweBhabhulona Lenkhulu.’ Uncuma kubuyela kuJehova nakubatali bakhe lababoFakazi. Nangabe loko kutawenteka, sifuna kulingisa Babe wetfu wasezulwini lonemusa neluvelo, lojabulako nangabe soni sibuyela kuye.
