BINELÍWAMI 19
CANCIÓN sjj 22 Mi ti ané japi jenaʼí si nulama
¿Piri ta a machí japi chúriká Jeobá oyérima pe aminana?
“Jeobá ko […] ke nakí japi ke wesi suwábitami nima” (2 PED. 3:9, TNM).
JAPI TA JITRA BINEPO
Chúsiá ti omeri bichiwia japi Jeobá pe aminana wachíniga niraa oyérima.
1. ¿Piri namuti we natéami ikísimi jipi jubá rawé?
JIPI jubá rawé ikísimi wiká namuti we natéami japi riká anili echi profecías. Japi riká, “echi silíami norte nuláami” alí “echi silíami sur nuláami”, iʼwérili noká nulánalia jenaʼí Wichimóbachi (Dan. 11:40, nota). Ayénachó ata nawesa Onorúami Gobiérnowala jitra omáana Wichimóbachi, alí wiká pagótami a nijéwinali Jeobá (Is. 60:22; Mat. 24:14). Alí ti olá wiká namuti japi ta jitra binepo japalí ti newalé (Mat. 24:45-47).
2. ¿Piri ta we bichíwisaré, alí piri ta newalásaré?
2 Jeobá ko tamó iʼwiri aminabi aʼlá inamia echi namuti we natéami japi ikimea ma mulipi (Prov. 4:18; Dan. 2:28). Jiti la ti bichiwi japalí ma chotásisa echi gran tribulación, tamujé ko ma we aʼlá machiboa piri ta nokiboa jiti nijéwami nipo Jeobá alí jiti sinibí napawika nipo echi hermanos yúa, echalí we jilí kaachi. We be nalí, ati newalásaré japi a nirú jaré namuti japi ta ke machí japi chúriká ikimea pe aminana. Jena binelíwami, bachá ko binepo chúsiá ti jaré namuti bilecho riká ku bineri. Alí miná ko binepo echi namuti japi ta a machí japi ikimea pe aminana alí japi chúriká isima Jeobá.
JAPI TA KE MACHÍ
3. ¿Piri ta mayeli japi ikimea echi pagótami kecho chotásiachi echi gran tribulación, alí chúsiá ti echi riká mayeli?
3 Chabé, ati mayeli japi ke bilé pagótami omérima bichiwia Jeobá ma chotásisa echi gran tribulación alí niyubia Armagedón kaachi. Echi riká ti anili jiti ta mayeli japalí niruili echi waʼlú ukí nili bilé profecía japi ikimea pe aminana. Japi riká Jeobá érili echi iyewi kecho chotásiachi echi waʼlú ukí, ati mayeli japi echi riká cho ikimea pe aminana kecho chotásiachi echi gran tribulación, japi Jeobá ko isima japi riká ko eria echi iyewi alí ke wesi pagótami omérima niyubia (Mat. 24:37-39).
4. ¿Chúsiá ti ma ke aní japi suwaba echi namuti japi ikili japalí Noé biteili ju bilé profecía japi ikimea jipi rawé?
4 ¿Chúsiá ti ke natásaré japi riká ikili japalí niruili waʼlú ukí, nili bilé profecía japi echi riká cho ikimea pe aminana? Jiti echi Biblia ke echi riká aní. a A bichíwali ju japi Jesús anili japalí echi ko chotásisa nulayá ripá rewegachi, nima japi riká ko japalí Noé biteili. Nalí jepuná ko ke aniwáami ju japi suwaba echi namuti japi ikili japalí niruili echi waʼlú ukí, echi riká cho ikimea pe aminana. Nalí be, ata omero binea wiká namuti we natéami echi jitra japi ikili echalí.
5. a) ¿Piri isili Noé kecho nawáachi echi waʼlú ukí? (Hebreos 11:7; 1 Pedro 3:20). b) ¿Piri namuti chopi iyiri ju japalí Noé nawésili alí japi riká ti noká nawesia jipi?
5 Japalí Jeobá aneli Noé japi ikimea, Noé ko néwariwélitili japi bichíwili japalí niwali bilé arca (leeri Hebreos 11:7; 1 Pedro 3:20). Echi riká cho, echi pagótami japi kipú echi Onorúami Gobiérnowala jitra, néwariwélitisaré japi bichíyami ju (Hech. 3:17-20). Pedro ko anili japi Noé ko nawésili echi pagótami (2 Ped. 2:5). We be nalí, japi riká ti ma bineli echoná binelíwami 18, ke ti machí achi Noé niwali bilé campaña nawésimia sinéami echi pagótami kecho chotásiachi echi waʼlú ukí. Jipi, tamujé ko iʼwérili noká nawesia sinéami echi pagótami. Nalí tákoré ti iʼwérili nokayé, ke ti oméripo seaya ibili pagótami omáana wichimóbachi piréami, kecho chotásiachi echi Jeobá rawéwala. ¿Chúsiá ti echi riká aní?
6, 7. ¿Chúsiá ke ti oméripo nawesia sinéami echi pagótami kecho nawáachi echi Jeobá rawéwala?
6 Jesús anili japi echi raʼíchali aʼláala “nawisárami níima ne suníami jenaʼí wichimóbachi” (Mat. 24:14). Alí jipi rawé ma echi riká ikísimi. Ati nawesa echi raʼíchali aʼláala aminá simírikami 1,000 raʼicháliami, alí ayénachó nirú echi página internet jw.org, japoná wiká pagótami omáana Wichimóbachi piréami, omeri binea Jeobá jitra.
7 Nalí be, Jesús ayénachó aneli echi discípulos japi ke sunima nawesia sinéami echi pagótami japalí echi nawasa (Mat. 10:23; 25:31-33). Japi anili Jesús, jipi echi riká cho ikí. Wiká pagótami piré japoná ke risensia ju japi ta nawisabo. Ayénachó sinibí rawé ochérisimi wiká kuuchi. Jiti la, tákoré ti we iʼwérili nokayé, ke ti oméripo nawesia ne sinéami “isena raʼíchali raʼíchami” alí “isena pagótami” (Apoc. 14:6).
8. ¿Piri ta nárika nokibóaré? (Ayénachó iné echi fotos).
8 Echi jitra japi ta ma bineli, a keʼré japi ta nárika nokiboa jepuná: “¿Piri ikimea echi pagótami yúa japi ke kipuli echi aʼláala raʼíchali kecho bijí séachi echi gran tribulación? ¿Piri nokimea echi pagótami yúa Jeobá alí echi Nolá, japi echi wilali jiti oyérima?” (Juan 5:19, 22, 27; Hech. 17:31). Echi texto japoná machibúrami ju na binelíwami, tamó newalari japi Jeobá ko “ke nakí japi ke wesi suwábitami nima, nalí nakí japi sinéami riwema cha nokayá” (2 Ped. 3:9, TNM; 1 Tim. 2:4). Jeobá ko kecho bijí tamó ané chu isima echi pagótami yúa, nalí ke iʼwérili ju japi tamó ruyema.
¿Piri isima Jeobá echi pagótami yúa japi ke omérili binea echi jitra kecho séachi echi gran tribulación? (Iné echi párrafo 8). c
9. ¿Piri namuti tamó ruyé Jeobá néeka echi binoy Raʼicháala?
9 Néeka echi binoy Raʼicháala, Jeobá ko tamó ané jaré namuti japi a isima. Japi riká, echi ko aní japi ku jawásima “echi auché jaré chati oláami” japi ke siné kipuli echi aʼláala raʼíchali alí ke riweli nokayá japi chati ju (Hech. 24:15; Luc. 23:42, 43, TNM). Echi jitra a keʼré japi ta nárika nokiboa jarecho namuti.
10. ¿Piri jarecho namuti a keʼré japi ta nárika nokiboa?
10 ¿Piri ikimea echi pagótami yúa japi suwimea gran tribulación kaachi? ¿Achi ma ke siné ku jawásitami nima? Echi Biblia we aʼlá ruyé japi echi pagótami japi Jeobá suwábima echoná Armagedón jiti aboi nakili ke nijéwinala, echi ko ke siné ku jawásitami nima (2 Tes. 1:6-10). Nalí, ¿piri ikimea echi pagótami yúa japi suwimea gran tribulación kaachi echi nawilí jitra, jiti kowirúami nima o jarecho si namuti? (Ecl. 9:11; Zac. 14:13). ¿Achi keʼré japi echi pagótami ayénachó nima “echi auché jaré chati oláami” japi ku jawásitami nima echoná Wichimóbachi we baʼóachi? Ke ti machí.
JAPI TA A MACHÍ
11. ¿Piri inema Jeobá japalí oyérima echi pagótami Armagedón kaachi?
11 A nirú jaré namuti japi ta a machí japi ikimea pe aminana. Japi riká, Jeobá ko oyérima echi pagótami echoná Armagedón ineka echi namuti japi nokali echi Jesús “ritémawala yuwa” (Mat. 25:40). Japi iʼwírili echi ungidos alí Cristo, inérami nima japi riká boʼwá. Ayénachó ti machí japi jaré ungidos a bijí pirélima jenaʼí Wichimóbachi gran tribulación kaachi alí ripá torúami nima kecho chotásiachi echi Armagedón. Jiti la a bijí nirúachi echi ungidos jenaʼí Wichimóbachi, jaré pagótami japi aʼláala ju a omérima iʼwiria echi alí echi nóchali japi noká (Mat. 25:31, 32; Apoc. 12:17). ¿Chúsiá we natéami ju jepuná?
12, 13. ¿Piri nokiméeré jaré pagótami japalí ma suwábitami nisa echi Walúala Babilonia? (Ayénachó iné echi fotos).
12 Ayénachó japalí suwábitami nisa echi Walúala Babilonia echoná gran tribulación, a keʼré japi jaré ko newalama japi echi testigo Jeobá ma chabé jonsa nawésili japi echi riká ikimea riweili, alí a keʼré japi echalí jaré ko nijéwinalima Jeobá (Apoc. 17:5; Ezeq. 33:33).
13 Japalí echi israelitas buyali Egipto jonsa, wiká jarecho pagótami simíali echi yúa (Éx. 12:38). A keʼré japi echi pagótami chotásili bichiwia Jeobá japalí ineli japi a ikísili echi makoy plagas japi anili Moisés. Echi riká cho ikisaa japalí ma suwábitami nisa echi Walúala Babilonia, ¿achi ta natabo japi ke aʼlá ju japi jarecho pagótami ayénachó tamujé yúa napawima kecho nawasa echi Jeobá rawéwala? ¡Ke tasi! Tamujé ko nínali japi riká Jeobá, “bilé Onorúami we aʼláala, simá isíami, ke sapú iyóami, bichíwika raʼíchami alí we galéami” (Éx. 34:6). b
Japalí suwábitami nisa echi Walúala Babilonia, a keʼré japi jaré ko newalama japi echi testigo Jeobá ma chabé jonsa nawésili japi echi riká ikimea riweili. (Iné echi párrafos 12 alí 13). d
14, 15. ¿Chúsiá ke natéami ju kumi bité o chu kabú mukú bilé pagótami jiti sinibí bitélima? (Salmo 33:4, 5).
14 A keʼré japi ta kipuli bilé pagótami jéaníami echi téemala jitra japi ke Testigo ju: “Aʼlá nima japi mukumea kecho bijí séachi echi gran tribulación jiti echi riká a ku wilásitami nima”. Echi ko ke cha riká nátika echi riká aniyéeré. Nalí ke natéami ju chu kabú mukú bilé pagótami jiti omérima sinibí bitelia. Jeobá we aʼlá oyériami ju alí sinibí isimí japi aʼlá ju (leeri Salmo 33:4, 5). Ati we aʼlá machí japi “echi japi Oyériami ju omáana wichimóbachi” wachíniga isima (Gén. 18:25).
15 Ayénachó ke natéami ju kumi piréami ju echi pagótami jiti sinibí pirélima. Jiti la, Jeobá ko ke siné inema echi pagótami japi riká “chibas” jiti piréami nili japoná ke omérili kipúa echi jitra (Mat. 25:46). Tamujé natéami niraa inéaká echi pagótami, ata machí japi Jeobá wabé natéami niraa iné tamujé yúa. Tamujé ko ke machí chúriká isima Jeobá ma gran tribulación kaachi. A keʼré japi jaré echi pagótami a omérima binea Jeobá jitra alí bichíwima japalí inesa japi Jeobá ne Walubéala ju omáana Wichimóbachi (Ezeq. 38:16).
Ma chotásisa echi gran tribulación, a keʼré japi jaré ko nijéwinalima Jeobá inéachi japi ikísimi.
16. ¿Piri namuti ta machí Jeobá jitra? (Ayénachó iné echi dibujo).
16 Echi Biblia jitra, ata bineli japi Jeobá ko we natéami niraa iné echi pagótami. Jiti la echi ko nijili binoy Nolá jiti mukumea sinéami pagótami jitra alí omérima sinibí pirelia (Juan 3:16, TNM). Sinéami isini kaachi ati nílili japi Jeobá ko we simá isíami ju alí natimáami tamujé yúa (Is. 49:15). Echi ko we aʼlá tamó machí ibili niraa. Jiti la, ati suwisáaká, echi ko checho tamó ku jawásima japi riká ti nili chabé alí japi riká ti nátili (Mat. 10:29-31). Nirú wiká namuti japi jitra ti omeri bichiwia japi Jeobá ko we aʼlá oyérima ibili pagótami, jiti echi ko we machíami ju, wachíniga isíami alí natimáami (Sant. 2:13).
Ati omeri bichiwia japi Jeobá ko we aʼlá oyérima ibili pagótami, jiti echi ko we machíami ju, wachíniga isíami alí natimáami. (Iné echi párrafo 16).
17. ¿Piri ta binepo biléala binelíwami?
17 Suwaba japi ta jitra bineli, néwariwéliti japi we natéami ju japi ta nawisabo. ¿Chúsiá? Alí, ¿piri tamó iʼwírima jiti ta aminabi iʼwérili nokiboa nawesia? Echi jitra ta binepo echoná biléala binelíwami.
CANCIÓN sjj 76 Tamí ané japi mi nili
a Echi artículo riwéami “A Jeobá le gusta enseñar de forma sencilla”, japi chukú echoná oselí La Atalaya 15 inárachi marzo bamíali 2015, páginas 7 aminá 11, ami machimea chúsiá ti ma ke aní japi jaré relatos ju japi riká profecías japi ikimea pe aminana.
b Japalí ma suwábitami nisa echi Walúala Babilonia, echi Onorúami puéblowala risoa olárami nima echi Gog de Magog jitra. Alí echi pagótami japi echalí a nijéwinalima Jeobá echi puéblowala yúa, ayénachó echi riká olárami nima.
c JAPI RUYÉ JAPI MACHINA ECHONÁ FOTOS: Bikiá fotos buyaní japoná néwariwéliti japi ta ke oméripo nawesia sinéami echi pagótami: 1) bilé mukí bité japoná ne sojí suwaba pagótami ke cristiana ju alí we jilí ju japi ta nawisabo; 2) bilé niwíkami piré japoná we jilí ju jiti echi gobierno ke riwé japi ta nawisabo; 3) bilé rijoi we miká bité japoná ke wesi Testigos omeri siyá.
d JAPI RUYÉ JAPI MACHINA ECHONÁ FOTOS: Bilé mukí japi riweli nijewia Jeobá, newalá japi bineli echi Walúala Babilonia jitra, jiti la echi ko checho ku nijéwinali Jeobá alí ku simí japoná piré echi wénwala japi Testigos ju. Echi riká ikisáaká, tamujé ko ati natimáami nínali alí simá nokáami japi riká tamujé Onolá Jeobá alí ti kanílipo jiti bilé cha isíami checho ku nijewi Jeobá.
