LISAUN ESTUDU 19
KNANANUK 22 Halo Ita-nia Ukun toʼo mai rai!
Saida mak ita hatene kona-ba oinsá Jeová sei tesi-lia iha futuru?
“Jeová . . . lakohi ema ida lakon.”—2 PED 3:9.
OBJETIVU
Ita bele fiar katak bainhira Jeová tesi-lia ba ema iha futuru nia sei halo buat neʼebé loos no tuir justisa.
1. Tanbasá mak ita bele dehan katak ita moris iha tempu neʼebé úniku?
ITA moris iha tempu neʼebé úniku tebes! Loroloron, Bíblia nia profesia sai loos ba beibeik. Porezemplu, ita haree “liurai norte” no “liurai súl” kompete malu tanba hakarak domina mundu tomak. (Dan 11:40, nota) Ita haree ema haklaken liafuan diʼak kona-ba Maromak nia Ukun iha dalan neʼebé boot liu no ema millaun ba millaun mak hetan benefísiu husi ida-neʼe. (Isa 60:22; Mt 24:14) Ita mós simu ai-han espirituál barak iha “tempu loloos”.—Mt 24:45-47.
2. Ita bele fiar metin kona-ba saida, maibé ita presiza rekoñese saida?
2 Jeová kontinua ajuda ita atu bele komprende ho diʼak liután kona-ba akontesimentu importante sira neʼebé sei akontese lakleur tan. (Prov 4:18; Dan 2:28) Ita bele fiar katak kuandu terus boot hahú, ita sei hatene buat hotu neʼebé ita presiza hatene atu bele tahan ho laran-metin no nafatin iha unidade durante tempu susar. Maibé ita mós presiza rekoñese katak iha buat balu neʼebé ita la hatene kona-ba futuru. Iha lisaun neʼe, ita sei koʼalia hamutuk tanbasá ita presiza troka buat balu neʼebé uluk ita komprende kona-ba akontesimentu sira-neʼe. Tuirmai ita sei haree buat balu neʼebé ita hatene kona-ba futuru no buat neʼebé ita-nia Aman iha lalehan sei halo.
SAIDA MAK ITA LA HATENE?
3. Uluk ita hanoin saida kona-ba buat neʼebé sei akontese ba ema neʼebé la tau fiar ba Jeová kuandu terus boot hahú, no tanbasá ita hanoin hanesan neʼe?
3 Uluk, ita hanoin katak kuandu terus boot hahú ema sei la iha tan oportunidade atu tau fiar ba Jeová no moris liu funu Armagedon. Ita koʼalia nuneʼe tanba ita hanoin katak akontesimentu ida-idak neʼebé akontese iha Rai-Nabeen mak reprezenta buat neʼebé akontese iha futuru. Porezemplu, uluk bainhira Jeová taka ró nia odamatan la iha ema ida mak bele tama ba ró laran, tan neʼe ita hanoin katak kuandu terus boot hahú la iha tan oportunidade ba ema ida atu tau fiar ba Jeová no hetan salvasaun.—Mt 24:37-39.
4. Tanbasá mak ita labele dehan katak akontesimentu ida-idak iha Noé nia tempu mak reprezenta buat neʼebé sei akontese iha futuru?
4 Tuir loloos, ita labele dehan katak akontesimentu ida-idak iha Noé nia tempu mak reprezenta buat neʼebé sei akontese iha futuru. Tanbasá? Tanba la iha Eskritura ida mak apoia ideia neʼe. a Jesus kompara duni “Noé nia tempu” ho tempu neʼebé nia toʼo ona mai. Maibé nia la dehan katak buat hotu neʼebé akontese iha Noé nia tempu mak reprezenta buat neʼebé sei akontese iha futuru, hanesan tempu neʼebé Jeová taka ró nia odamatan. Maski nuneʼe, neʼe la dehan katak ita labele aprende buat ruma husi istória kona-ba Noé no Rai-Nabeen.
5. (a) Antes Rai-Nabeen, Noé halo saida? (Ebreu 11:7; 1 Pedro 3:20) (b) Kona-ba serbisu haklaken, oinsá mak ita-nia situasaun ohin loron bele kompara ho Noé nia tempu?
5 Bainhira Noé rona kona-ba Jeová nia mensajen, nia hatudu sai ninia fiar hodi halo ró boot ida. (Lee Ebreu 11:7; 1 Pedro 3:20.) Nuneʼe mós, ema neʼebé rona liafuan diʼak kona-ba Maromak nia Ukun presiza halo tuir buat neʼebé sira aprende. (Após 3:17-20) Pedro temi Noé nuʼudar “haklaken-naʼin kona-ba justisa”. (2 Ped 2:5) Maibé, hanesan temi iha lisaun antes neʼe, ita la hatene se Noé koko atu haklaken ba ema hotu neʼebé hela iha mundu antes Rai-Nabeen ka lae. Ohin loron ita koko atu haklaken ba ema hotu iha mundu tomak, no ita halo ida-neʼe ho laran-manas. Maski ita hakaʼas an tebes, maibé ita sei la konsege haklaken ba ema hotu iha mundu tomak antes mundu nia rohan toʼo mai. Tanbasá?
6-7. Tanbasá ita bele dehan katak ita sei la konsege haklaken ba ema hotu iha mundu tomak antes mundu nia rohan toʼo mai? Esplika toʼok.
6 Hanoin toʼok saida mak Jesus hatete kona-ba ita-nia serbisu haklaken. Nia fó-hatene nanis katak ema sei haklaken liafuan diʼak “iha mundu tomak nuʼudar sasin ba nasaun hotu”. (Mt 24:14) Profesia neʼe kumpre ohin loron iha dalan neʼebé boot liu. Liafuan diʼak kona-ba Maromak nia Ukun fó sai ona iha língua 1.000 liu, no liuhusi ita-nia website jw.org ema barak iha mundu tomak bele aprende kona-ba liafuan diʼak neʼe.
7 Maski nuneʼe, Jesus mós hatete ba ninia dixípulu katak sira sei la konsege halo ‘remata sira-nia serbisu iha sidade hotu’ antes Jesus mai. (Mt 10:23; 25:31-33) Neʼe katak ita sei la konsege haklaken ba ema hotu antes Jesus mai. Ema millaun ba millaun ohin loron hela iha fatin neʼebé ita labele haklaken ho livre. Liután neʼe, kada minutu bebé atus ba atus mak moris. Klaru katak ita halo buat neʼebé ita bele atu haklaken ba ema husi ‘nasaun, suku, no língua’ hotu. (Apok 14:6) Maski nuneʼe, ita sei la konsege haklaken ba ema hotu iha mundu tomak antes mundu nia rohan toʼo mai.
8. Kona-ba Jeová nia tesi-lia ba ema iha futuru, pergunta saida deʼit mak karik ita bele husu? (Haree mós foto.)
8 Tan neʼe, karik ita hanoin: Oinsá ho ema neʼebé seidauk hetan oportunidade atu rona liafuan diʼak antes terus boot hahú? Oinsá mak Jeová no Jesus sei tesi-lia ba sira? (João 5:19, 22, 27; Após 17:31) Eskritura tema ba lisaun neʼe hatete katak Jeová “lakohi ema ida lakon”. Maibé “nia hakarak ema hotu atu arrepende sala”. (2 Ped 3:9; 1 Tim 2:4) Maski nuneʼe, Jeová seidauk fó sai ba ita oinsá nia sei tesi-lia ba ema neʼebé seidauk hatene kona-ba liafuan diʼak. Klaru katak Jeová la presiza fó-hatene ita kona-ba saida mak nia sei halo.
Saida mak sei akontese ba ema neʼebé karik seidauk iha oportunidade atu rona ba liafuan diʼak antes terus boot hahú? (Haree parágrafu 8) c
9. Saida mak Jeová fó-hatene ba ita iha Bíblia?
9 Iha Bíblia, Jeová fó-hatene ita buat balu neʼebé nia sei halo. Porezemplu, Bíblia hatete katak Jeová sei fó moris-hiʼas ba ema neʼebé “hatudu hahalok la loos” no seidauk iha oportunidade atu aprende kona-ba liafuan diʼak no troka sira-nia hahalok. (Após 24:15; Lc 23:42, 43) Neʼe hamosu pergunta importante seluk tan.
10. Pergunta saida deʼit mak bele mosu?
10 Ema neʼebé mate durante terus boot sei mate ba nafatin no la iha esperansa atu moris hiʼas ka lae? Eskritura fó sai ho klaru katak ema neʼebé kontra Jeová, no sira neʼebé Jeová no ninia tropa halakon iha funu Armagedon sei la hetan moris-hiʼas. (2 Tes 1:6-10) Maibé oinsá ho sira seluk, porezemplu sira neʼebé mate tanba idade ka moras, asidente, ka ema mak oho? (Ecle 9:11; Zac 14:13) Ema sira-neʼe balu sei inklui iha “ema neʼebé hatudu hahalok la loos” neʼebé sei hetan moris-hiʼas iha mundu foun ka lae? Ita la hatene ho loloos.
SAIDA MAK ITA HATENE?
11. Iha funu Armagedon, ema sei hetan tesi-lia bazeia ba saida?
11 Ita hatene buat balu kona-ba akontesimentu iha futuru. Porezemplu, ita hatene katak iha funu Armagedon, ema sei hetan tesi-lia bazeia ba dalan neʼebé sira haree Kristu nia alin sira. (Mt 25:40) Ema neʼebé apoia Kristu no ninia alin sira sei hetan tesi-lia nuʼudar bibi-malae. Ita mós hatene katak bainhira terus boot hahú Kristu nia alin balu sei iha mundu no sira sei saʼe ba lalehan lakleur antes funu Armagedon. Durante Kristu nia alin sira balu iha rai sei iha oportunidade ba ema laran-loos atu apoia sira no sira-nia serbisu. (Mt 25:31, 32; Apok 12:17) Tanbasá neʼe importante?
12-13. Karik ema balu sei halo saida bainhira haree “Babilónia Boot” lakon? (Haree mós foto.)
12 Depois terus boot hahú, karik ema balu neʼebé haree “Babilónia Boot” lakon sei hanoin-hetan katak uluk Testemuña ba Jeová fó sai ona katak neʼe sei akontese. Karik ema balu neʼebé haree akontesimentu sira-neʼe komesa tau fiar ba Jeová.—Apok 17:5; Eze 33:33.
13 Se nuneʼe, neʼe hanesan buat neʼebé akontese iha rai-Ejitu iha Moisés nia tempu. Hanoin-hetan, “ema barak neʼebé laʼós ema Izraél” mós bá hamutuk ho ema Izraél kuandu sai husi rai-Ejitu. Karik ema sira-neʼe balu komesa haburas sira-nia fiar bainhira sira haree Moisés nia avizu kona-ba Susar Sanulu komesa sai loos. (Éx 12:38) Oinsá se buat neʼebé hanesan akontese kuandu Babilónia Boot lakon? Ita sei hanoin katak neʼe la justisa tanba ema hetan oportunidade atu adora Jeová antes mundu nia rohan mai ka lae? Klaru katak lae! Ita hakarak halo tuir ita-nia Aman iha lalehan nia hahalok. Bíblia hatete: “Maromak neʼebé laran-sadiʼa no laran-diʼak, la hirus lalais no nakonu ho domin neʼebé laran-metin no lia-loos.” b—Éx 34:6.
Ema balu neʼebé haree “Babilónia Boot” lakon sei hanoin-hetan katak uluk Testemuña ba Jeová fó sai ona kona-ba neʼe (Haree parágrafu 12-13) d
14-15. Ema nia moris ba nafatin depende ba bainhira mak nia mate ka ninia hela-fatin ka lae? Esplika toʼok. (Salmo 33:4, 5)
14 Dala ruma ita rona ema balu dehan: “Diʼak liu haʼu-nia família mate antes terus boot hahú, atu nuneʼe sira iha esperansa atu moris fali.” Klaru katak domin mak book ema atu koʼalia hanesan neʼe. Maibé ema nia moris ba nafatin la depende ba bainhira mak nia mate. Jeová mak Juís neʼebé perfeitu, no nia sempre tesi-lia iha dalan neʼebé loos no tuir justisa. (Lee Salmo 33:4, 5.) Ita bele fiar katak “Juís ba mundu tomak” sei halo buat neʼebé loos.—Gén 18:25.
15 Ita mós bele dehan katak ema nia moris ba nafatin la depende ba fatin neʼebé nia hela bá. Jeová sei nunka tesi-lia ba ema millaun ba millaun nuʼudar “bibi-timur” tan deʼit sira hela iha rai neʼebé nunka hetan oportunidade atu aprende kona-ba liafuan diʼak. (Mt 25:46) Jeová, Juís ba mundu tomak hadomi tebes ema sira-neʼe. Ita la hatene oinsá Jeová sei kontrola situasaun sira durante terus boot. Maibé karik sira balu sei hetan oportunidade atu aprende kona-ba Jeová, tau fiar ba nia, no hili atu apoia Jeová kuandu nia halo ninia naran santu iha mundu tomak.—Eze 38:16.
Depois terus boot hahú . . . karik ema balu neʼebé haree akontesimentu sira-neʼe komesa tau fiar ba Jeová.
16. Saida mak ita aprende ona kona-ba Jeová? (Haree mós dezeñu.)
16 Bainhira ita estuda Bíblia, ita aprende katak Jeová hafolin ema nia moris. Nia fó ninia Oan-Mane nia moris atu nuneʼe ita hotu bele iha oportunidade atu moris ba nafatin. (João 3:16) Ita hotu sente ona Jeová nia domin. (Isa 49:15) Nia hatene ita ida-idak nia naran. Loloos, nia hatene didiʼak ita no se ita mate, nia bele fó moris-hiʼas ba ita tanba nia hanoin-hetan didiʼak kona-ba ita no memória neʼebé ita iha! (Mt 10:29-31) Klaru katak ita iha razaun neʼebé diʼak atu fiar metin katak ita-nia Aman iha lalehan neʼebé domin sei tesi-lia ba ema ida-idak iha dalan neʼebé matenek, justisa, no laran-sadiʼa.—Tgo 2:13.
Ita bele fiar katak Jeová sei tesi-lia ba ema ida-idak iha dalan neʼebé matenek, justisa no laran-sadiʼa (Haree parágrafu 16)
17. Iha lisaun tuirmai, ita sei koʼalia kona-ba saida?
17 Hanorin foun neʼe ajuda ita komprende katak ita-nia serbisu haklaken mak urjente liu fali uluk. Tanbasá ita bele dehan nuneʼe? No saida mak motiva ita atu kontinua haklaken liafuan diʼak? Ita sei haree resposta ba pergunta sira-neʼe iha lisaun tuirmai.
KNANANUK 76 Ita sente oinsá?
a Atu hetan esplikasaun kona-ba tanbasá organizasaun halo mudansa neʼe, haree informasaun ho títulu “Dalan Jeová hanorin ninia povu” husi Livru Haklaken, 15 Marsu 2015 p. 7-11.
b Depois Babilónia Boot lakon, Jeová nia atan hotu sei hetan koko durante Gog husi rai-Magog nia ataka. No ema neʼebé hahú adora Maromak hamutuk ho ninia povu depois Babilónia Boot lakon mós sei hetan koko.
c ESPLIKASAUN BA DEZEÑU: Foto tolu hatudu tanbasá ema balu karik la rona ba lia-loos: (1) Feto ida hela iha rai neʼebé relijiaun mak domina no lori perigu, (2) kaben-naʼin ida hela iha nasaun neʼebé governu bandu ita-nia serbisu haklaken no perigu, no (3) mane ida neʼebé hela iha fatin neʼebé izoladu tebes.
d ESPLIKASAUN BA DEZEÑU: Joven feto ida neʼebé husik lia-loos hanoin-hetan buat neʼebé nia aprende ona kona-ba oinsá “Babilónia Boot” sei lakon. Nia deside atu fila fali ba Jeová no bá hela fali hamutuk ho ninia inan-aman neʼebé serbí Jeová. Se situasaun sira hanesan neʼe akontese, ita hakarak atu banati-tuir ita-nia Aman Jeová neʼebé laran-sadiʼa no laran-diʼak, no kontente tanba ema neʼe fila fali.
