1. Nagnino ro miambake ze fotoagne iaignantika zao?

 MIAMBAKE ze fotoagne iaignantikagne zao! Isan’andro le mahatrea ty fahatanteraha ty faminania ty Baiboly tika. Mahatrea “ty mpanjaka i avaratse” naho “ty mpanjaka i atimo” mifanoseke ohatse tika satria sambe te hifehe ty tane toy iareo. (Dan. 11:40, f.a.p.) Toriegne magneran-tane ka ty talily soa miomba i Fanjakagney ty amy izao, le ndaty an-tapetrisa’e ty mifily hanompo i Jehovah. (Isaia 60:22; Mat. 24:14) Mahazo hanegne ara-pagnahy maro “amy ty fotoagne mete” ka tika.​—Mat. 24:45-47.

2. Ino ty raha atokisantikagne faie ino ty raha tsy maintsy ekentika?

² Magnampe antika mba hahatakatse ty raha lahibey hiseho tsy ho ela ty Jehovah. (Ohab. 4:18; Dan. 2:28) Matoky tika fa naho fa hanomboke i haoreagne lahibeỳ, le fa ho fantantikagne iaby ze raha ilaentika mba hagnampe antika hiaretse naho hiharo saigne avao sady tsy hivalike. Faie mila ekentikagne tie misy raha ila’e miomba ty hoavy tsy fantantikagne amy izao. Amy ty lahatsoratse toy tikagne, le handineke tie nagnino ro mila ahitsintikagne ty raha ila’e nirehafentika tie hiseho amy ty hoavy. Hagnente ty raha fantantikagne miomba ty hoavy naho ty raha hatao i Raentikagne an-dagnitse agney ka tika afara izay.

 INOGNE TY RAHA TSY FANTANTIKAGNE?

3. Arake ty ninoantika taloha, ino ty raha tsy hoazo ze ndaty tsy mino atao naho fa manomboke i haoreagne lahibeỳ, le nagnino tika ro nirehake izay?

³ Nirehake tika taloha tie naho fa hanomboke i haoreagne lahibeỳ, le tsy hisy ndaty tsy mpino hanjare ho afake hanompo i Jehovah sasa naho hovotso-belogne amy i Haramagedonay. Nirehake izay tika satria nieretseretse tie faminaniagne miomba ty raha hiseho amy ty hoavy ty raha niseho tamy i Safodranoy. Nieretseretse ohatse tika tie satria tsy nisy ndaty afake nilitse tamy i sambofiaray ao sasa naho fa narindry i Jehovah i lala’ey, le tsy hisy ndaty ka mbe ho afake hiova le haneho finoagne i Jehovah sady hovotso-belogne naho fa manomboke i haoreagne lahibeỳ.​—Mat. 24:37-39.

4. Faminaniagne miomba ty raha hiseho amy ty hoavy vao ty raha niseho tamy i Safodranoy? Hazavao.

⁴ Toko’e hieretseretse vao tika tie faminaniagne miomba ty raha hiseho amy ty hoavy ty raha niseho tamy i Safodranoy? Aha’a ty vale’e. Fa nagnino? Satria tsy mirehake izay ty Baiboly. a Nampitaha ty raha nisy “tamy ty andro i Noa” amy ty raha hisy amy ty fagnatreha’e avao ty Jesosy. Tsy nirehake reke tie ho tanterake amy ty hoavy ka ty raha nisy tamy ze fotoagne zay, agnisa izay i lala i sambofiaray narindry i Jehovah-y. Faie tsy midika zay tie tsy afake mandrambe fianaragne boake amy i Noa naho i Safodranoy tikagne.

5. a) Ino ty raha natao i Noa taloha i Safodranoy? (Hebreo 11:7; 1 Petera 3:20) b) Ino ty mampitovy ty asa fitoriagne ataontika amy izao naho ty natao i Noa?

 ⁵ Naho fa naharey i hafatse fampitaoagne boake amy i Jehovah-y ty Noa, le nagnamboatse i sambofiaray mba hampisehoa’e ty finoa’e. (Vakio ty Hebreo 11:7; 1 Petera 3:20.) Manahake izay ka fa ze ndaty maharey ty hafatse miomba i Fanjakagney, le tsy maintsy mampihatse ze raha ianara’e. (Asa. 3:17-20) Natao i Petera tihoe “mpitory ty hamarenagne” ty Noa. (2 Pet. 2:5) Faie nirehafentikagne tamy i lahatsoratse taloha itoỳ tie tsy fantantikagne tie nikezake nitory tamy ty ndaty tsikiraidraike vao ty Noa taloha ty niavia i Safodranoy. Amy hinane zao, le mikezake mitory amy ze ndaty iaby magneran-tane tika sady mafana fo naho fa manao izay. Faie ndra tie mikezake manao akore tika, le tsy ho vitantikagne ty hitory amy ze ndaty iaby magneran-tane aloha ty hiavia ty fara’e. Ino ty anto’e?

6-7. Nagnino tika ro afake mirehake fa tsy ho afake hitory amy ty ndaty tsikiraidraike ambone tane etoy tikagne aloha ty hiavia ty fara’e?

⁶ Dineho ty raha nirehafe i Jesosy miomba ty asa fitoriagne ataontikagne. Nirehake reke fa ‘hotoriegne amy ty tane toy iaby ty talily soa i Fanjakagney, amy izay maharey o firenenao iaby.’ (Mat. 24:14) Fa tanterake mihoatse ty taloha o faminaniagne iohoe ty amy izao. Toriegne amy ty firehake mihoatse ty 1 000 ty hafatse miomba i Fanjakagney. Le noho ty fisia ty tragnom-porarontikagne jw.org, le ndaty maro ty afake maharey ty talily soa miomba i Fanjakàn’Andrianagnaharey.

⁷ Faie nirehake tamy i mpiana’e rey ka ty Jesosy tie ‘tsy ho vita iareo tsitsike iaby ty tanà o Israelio’ ndra ty hitory amy ty ndaty tsikiraidraike, aloha ty hiavia’e. (Mat. 10:23; 25:31-33) Mbe tanterake amo o androntika hinane zao o raha nirehafe i Jesosy rehoe. An-tapetrisa’e ty ndaty mitoboke amy ty toeragne tsy ahafahagne mitory i talily soay. Fagnampe izay, le ajaja an-jato’e ty aterake isa-minitra. Tsy ho afake hitory amy ty ndaty tsikiraidraike ambone tane etoy areke tika aloha ty hiavia ty fara’e ndra tie manao ze azontika atao aza mba hitoriagne amy ty ndaty boake “amy ty firenena naho ty foko vaho ty ndaty sambe hafa firehake.”​—Apok. 14:6.

8. Ino ty fagnonteneagne va’e hapetrantika mahakasike ty fitsarà i Jehovah amy ty hoavy? (Henteo i sarey.)

⁸ Izao areke ty fagnonteneagne: Akore ty miomba ze ndaty tsy afake naharey i talily soay aloha ty hanomboha i haoreagne lahibeỳ? Akore ty fomba hitsarà i Jehovah naho i Ana-dahi’e tinendre mba ho mpitsaray iareo? (Jaona 5:19, 22, 27; Asa. 17:31) Ty andinin-teny ioregna ty fianaragne toy le mirehake tie ‘tsy misy ndaty tea i Jehovah horingagne’, fa tea’e “hibebake iaby ze kila ndaty.” (2 Pet. 3:9; 1 Tim. 2:4) Mila ekentikagne areke tie mbe tsy nampahafantare i Jehovah antika ty fomba hitsara’e ze ndaty tsy naharey i talily soay. Mazava ho aze fa tsy voatere ho saontsie’e amantikagne iaby ty raha natao’e ndra ty raha hatao’e.

9. Ino ty raha nampahafantare i Jehovah antika amy Baiboly ao?

⁹ Nampahafantare i Jehovah antika amy ty Saontsi’e ao ty raha ila’e hatao’e. Mirehake ohatse ty Baiboly fa hovelomegne indraike ty ndaty “tsy maregne”, zane hoe ze ndaty tsy nanagne fahafahagne haharey i talily soay naho tsy niafake nanao fiovagne. (Asa. 24:15; Lioka 23:42, 43) Faie miterake fagnonteneagne lahibey hafa ka zay.

10. Ino ka ty fagnonteneagne hafa mipetrake?

¹⁰ Ze ndaty mate agnate i haoreagne lahibeỳ  ao vao lelia’e tsy hovelomegne sasa? Rehafe ty Baiboly mazava soa fa ze ndaty manohetse i Jehovah naho haringa i tafi’e rey ro tsy hovelomegne amy ty mate sasa. (2 Tes. 1:6-10) Faie akore ty amy ty ndaty hafa, ohatse i nimate noho ty loza arake ty natiora ndra loza hafa ndra i nisy namono rey? (Mpito. 9:11; Zak. 14:13) Va’e ho agnisa ty ndaty “tsy maregne” hovelogne amy i tontolo vaovaoy ao vao o ndaty reo? Tsy fantantikagne ty vale izay.

INOGNE TY RAHA FANTANTIKAGNE?

11. Miankigne amy ty ino ty hitsaràgne o ndatio amy i Haramagedonay?

¹¹ Maro ty raha fantantikagne miomba ty hoavy. Haintika zao ohatse fa hotsaraegne mifagnarake amy ty fomba nindesa’e o rahalahy i Kristy reo, o ndatio amy i Haramagedonay. (Mat. 25:40) Hatao tihoe agnondry ze ndaty nanohagne o voahosotseo naho i Kristy. Fantantika ka fa mbe ho ambone tane etoa ty ila’e amo o rahalahy i Kristy reo afara ty anomboha i haoreagne lahibeỳ. Hoentegne an-dagnitse agne iareo aloha kede ty hipoaha i Haramagedonay. Naho mbe ambone tane etoa areke o rahalahy i Kristy reo, le mbe managne fahafahagne hanohagne iareo naho hiara-miasa amy iareo ze ndaty managne toe-po soa. (Mat. 25:31, 32; Apok. 12:17) Nagnino zay ro tena lahibey?

12-13. Va’e hanao akore o ndatio naho fa avy nahatrea ty fandravàgne i “Babilona Lahibey”? (Henteo i sarey.)

¹² Azo inoagne fa naho fa hahatrea ty fandravàgne i Babilona Lahibey ty ndaty ila’e afara ty anomboha i haoreagne lahibeỳ, le hahatadidy tie fa ela o Vavolombelo i Jehovah-o ro fa nirehake ty miomba izay. Va’e hiova vao o ndatio naho fa mahatrea izay?​—Apok. 17:5; Ezek. 33:33.

¹³ Naho izay ty raha hisy, le hanahake ty raha niseho ta Ejipta tagne tamy ty andro i Mosesy ty raha hiseho amy izay. Tadidio fa “nisy ndaty hafa firenena maro” niarake tamo o Israelio niala ta Ejipta agne. Va’e nanomboke nino i Jehovah iareo naho fa nahatrea i Loza Folo rey. (Eks. 12:38) Naho manahake izay ty raha hiseho afara ty handravàgne i  Babilona Lahibey, le hieretseretse vao tika fa tsy rare’e naho hiarake amantikagne i ndaty tsy nino rey aloha ty hipoaha i Haramagedonay, le avy eo hiaigne amy i tontolo vaovaoy ao? Mazava ho aze fa tsy izay! “Andrianagnahare mamindra fo, soa fagnahy, tsy tsiela vignetse, bey hatea naho tsy mivalike sady tea hamarenagne” i Raentikagne an-dagnitse agney, le te hanahake aze ka tika. b​—Eks. 34:6.

14-15. Miankigne amy ty fotoagne imateza’e ndra ty toeragne misy aze vao ty hoavy o ndatio? Hazavao. (Salamo 33:4, 5)

¹⁴ Misy fotoagne tika maharey ndaty mirehake tie: “Teako naho mba mate aloha i haoreagne lahibeỳ o longoko tsy vavolombelogneo amy izay hovelomegne amy ty mate iareo.” Azo antoke fa anto’e soa ty mahavy iareo mirehake izay. Faie ty hoavy ty ndaty raike le tsy miankigne amy tihoe ombia ty fotoagne imateza’e. Mpitsara voririke ty Jehovah, le lava ara-drare’e naho maregne avao ty fitsarà’e. (Vakio ty Salamo 33:4, 5.) Afake matoky tikagne fa hanao ty rare’e “i Mpitsara ty tane toy iabỳ.”​—Gen. 18:25.

¹⁵ Tsy miankigne amy ty toeragne misy aze ty hoavy ty ndaty raike. Azo antoke areke fa tsy le avy le hatao i Jehovah tihoe “ose” o ndaty an-tapetrisa’e mitoboke amy ty tane tsy nahafahagne nitory ty hafatse miomba i Fanjakagney agneo. (Mat. 25:46) Mitretré ty tsikiraidraike amo o ndaty reo mandikoatse antika i Mpitsara ty tane toy iaby manao ty rare’ey. Tsy fantantikagne ty fomba handamina  i Jehovah ty raha hiseho amy i haoreagne lahibeỳ. Va’e handrisike o ndatio hianatse ty miomba i Jehovah naho haneho finoagne aze ty raha hotrea iareo amy i haoreagne lahibeỳ naho fa hagnamasigne ty tegna’e agnatreha ty firenena iaby ty Jehovah.​—Ezek. 38:16.

16. Ino ty raha fantantikagne miomba i Jehovah? (Henteo i sarey.)

¹⁶ Naho fa itika nianatse Baiboly, le nitreantika fa tena sarobily amy i Jehovah ty fiay o ndatio. Nimea’e antika ty fiay i Ana-dahi’ey mba hahafahantika hiaigne nainai’e. (Jaona 3:16) Sambe mahatsapa tikagne iaby fa tea antika ty Jehovah. (Isaia 49:15) Oni’e ty agnarantikagne tsikiraidraike. Naho ty maregne le fanta’e soa tikagne tsikiraidraike ndra tie mate aza sady vita’e ty magneregne indraike ty pitsopitso’e miomba antika naho ty fitadidiantika! (Mat. 10:29-31) Matoky areke tikagne fa voririke naho ara-drare’e ty fomba itsarà i Raentikagne an-dagnitse agney satria hendre, maregne naho mamindra fo reke.​—Jak. 2:13.

17. Ino ty hodinehentikagne amy ty lahatsoratse magnarake?

¹⁷ Ze fagnazavagne vaovao zay, le vao mainke magnampe antika hahatsapa fa tena meke i asa fitoriagney. Nagnino tika ro mirehake izay, le ino ty mandrisike antika hitory i talily soay lognandro sady hafana fo? Handineke ty vale o fagnonteneagne reo amy ty pitsopitso’e tikagne amy ty lahatsoratse magnarake.