SAWO DIA WEKELO 19
OSAMBO 22 Diolelo diekɔ lo mbolɛ —Diɔ diaye!
Awui akɔna weyaso lo kɛnɛ kendana la kilombo ka Jehowa ka lo nshi yayaye?
“Jehowa . . . halange kaanga onto 1 ndanyema.”—2 PE. 3:9.
KƐNƐ KAYOTEKA
Sho koka monga l’eshikikelo dia kilombo ka Jehowa ka lo nshi yayaye kayonga ka dimɛna ndo ka losembwe.
1. Lande na kakokaso mbuta dia tekɔ lo nsɛna lo tena diasalema awui wa diambo?
TEKƆ lo nsɛna lo tena diasalema awui wa diambo! Lushi tshɛ, tekɔ lo mɛna ekotshamelo wa prɔfɛsiya ya lo Bible. Ɛnyɛlɔ tekɔ lo mɛna “nkumekanga ka nɔrdɛ” ndo “nkumekanga ka sidɛ” wekɔ lo nsɛmanɛ dia mbahemɛ andja w’otondo. (Dan. 11:40, nɔtɛ.) Tekɔ lo mɛna lokumu l’ɔlɔlɔ la Diolelo dia Nzambi lasambishama lo nkɛtɛ k’otondo lo woho welɔ latasambishamaka ndo miliyɔ y’anto wetawɔ dia kambɛ Jehowa. (Isa. 60:22; Mat. 24:14) Ndo tekɔ lo nongola mbo ya ndɛ ya lo nyuma efula “lo etena kahombama.”—Mat. 24:45-47.
2. Eshikikelo kakɔna kakokaso monga la tɔ, ko kakɔna kahombaso mbeya?
2 Jehowa ekɔ lo ntetemala tokimanyiya dia nshihodia akambo w’ohomba efula wayanga salema keema edja. (Tok. 4:18; Dan. 2:28) Sho koka monga l’eshikikelo dia l’etena kayotatɛ mfɔnu ka woke, tayeya kɛnɛ tshɛ kayotonga l’ohomba wa mbeya dia mbikikɛ la kɔlamelo tshɛ ndo dia nshika ntanga l’etena k’okakatanu kɛsɔ. Koko, sho pomboka mbeya dia ekɔ awui amɔtshi wahateye wendana la nshi yayaye yaya k’emembe. Lo sawo nɛ, tayɔkɛtshanya ntondotondo lande na kambototshikitanya eokelo kaso ka kɛnɛ kakatataka lo dikambo di’akambo amɔtshi l’atei w’akambo asɔ. Oma laasɔ, tayɔsɛdingola lo tshena pe awui amɔtshi weyaso lo kɛnɛ kendana la nshi yayaye ndo yoho yayosala Shɛso lele l’olongo akambo.
AWUI WAHATEYE
3. Kakɔna kakatataka lo kɛnɛ kendana l’etena kahatonga anto la diaaso dia monga la mbetawɔ le Jehowa ndo lande na kakatataka ngasɔ?
3 Lo nshi yakete, takataka di’etena kayotatɛ mfɔnu ka woke, ndooko anto wayokondja diaaso nto dia mɛnya mbetawɔ kawɔ le Jehowa ndo ndooko onto layoshimbamɛ lo Aramangɛdɔna. Takataka ngasɔ nɛ dia takafɔnyaka di’ɔkɔndɔ wendana la Mvula k’elola ekɔ prɔfɛsiya ka didjidji. Ɛnyɛlɔ, takafɔnyaka dia oko wakadihe Jehowa lokuke la waato wa luudu la ntondo ka Mvula k’elola ntatɛ, mbele l’etatelo ka mfɔnu ka woke, nde “ayodiha lokuke” la dikongɛ di’akambo dia Satana di’aha kaanga onto shimbamɛ nto.—Mat. 24:37-39.
4. Lande na kahatayota di’ɔkɔndɔ wa Mvula k’elola wekɔ ɔkɔndɔ wa prɔfɛsiya ka didjidji? Lembetshiya.
4 Onde sho koka mbɔsa di’ɔkɔndɔ wa Mvula k’elola wekɔ prɔfɛsiya ka didjidji? Okadimwelo ele ɔnɛ ndooko. Lande na? Nɛ dia Bible hasukɛ kanyi shɔ. a Yeso akɛdika “nshi ya Nɔa” l’etena ka woongelo ande, koko nde kombuta dia Mvula k’elola aki prɔfɛsiya kele onto tshɛ kana dui tshɛ dia lɔkɔ diekɔ la kitshimudi ɛlɔ kɛnɛ kana ɔnɛ odihelo wa lokuke wa waato wa luudu wekɔ la kitshimudi ya prɔfɛsiya. Koko dui sɔ halembetshiya dia hatokoke nkondja wetshelo oma l’ɔkɔndɔ wa Nɔa ndo wa Mvula k’elola.
5. a) Kakɔna kakasale Nɔa la ntondo ka Mvula k’elola? (Hɛbɛru 11:7; 1 Petero 3:20) b) Lo kɛnɛ kendana l’olimu w’esambishelo, ngande wafɔna awui weta ɛlɔ kɛnɛ la wanɛ waketaka lo nshi ya Nɔa?
5 Etena kakoke Nɔa losango l’ɔhɛmwɛlɔ l’oma le Jehowa, nde akɛnya mbetawɔ lo nsɛla waato wa luudu. (Adia Hɛbɛru 11:7; 1 Petero 3:20.) Woho akɔ waamɛ mbele, anto woka lokumu l’ɔlɔlɔ lendana la Diolelo dia Nzambi pombaka nsala akambo lo ndjela kɛnɛ kokawɔ. (Ets. 3:17-20) Petero akelɛ Nɔa ɔnɛ “osambisha w’akambo w’ɛlɔlɔ.” (2 Pe. 2:5) Koko, oko wakatadiɛnyi lo sawo di’etshi, hateye dia kana Nɔa akasale kapanyɛ dia nsambisha anto tshɛ wa la nkɛtɛ la ntondo ka Mvula k’elola. Ɛlɔ kɛnɛ, tekɔ lo mbisha lonya l’olimu w’esambishelo l’andja w’otondo ndo tekombokamba l’ohetoheto tshɛ. Kaanga mbadjaso welo ɛsɔ tshɛ, hatokokaki nsambisha onto tshɛ la la nkɛtɛ lokumu l’ɔlɔlɔ la ntondo k’ekomelo ndja. Lande na?
6-7. Lande na kakokaso mbuta dia aha onto tshɛ la la nkɛtɛ mbayosambishama la ntondo k’ekomelo ndja? Lembetshiya.
6 Tende kɛnɛ kakate Yeso lo kɛnɛ kendana l’olimu aso w’esambishelo. Nde akate dia lokumu l’ɔlɔlɔ pombaka sambishama “lo nkɛtɛ k’otondo oko ɔmɛnyi le anto wa lo wedja tshɛ.” (Mat. 24:14) Prɔfɛsiya kɛsɔ kekɔ lo kotshama ɛlɔ kɛnɛ lo yoho yele yatasalemaka. Losango la Diolelo lambotomba l’ɛtɛkɛta ndekana 1 000 ndo lo tshimbo ya sitɛ kaso k’Ɛtɛrnɛtɛ ka jw.org, anto efula wokoka mbeka awui wendana la lokumu l’ɔlɔlɔ la Diolelo dia Nzambi.
7 Koko, Yeso akatɛ ambeki ande nto dia vɔ hawotokoka “nshidiya nkindjakindja lo esomba,” kana nsambisha anto tshɛ, la ntondo ka nde ndja. (Mat. 10:23; 25:31-33) Mɛtɛ k’ɛtɛkɛta wa Yeso ɛsɔ kekɔ lo mɛnama lo nshi yaso nyɛ. Ɛlɔ kɛnɛ, miliyɔ y’anto wekɔ lo mbidjasɛ l’ahole wamboshimbama olimu aso w’esambishelo wolo. Ndo nto, nkama y’ana wekɔ lo mbotɔ lo minitɛ tshɛ. Sho salaka tshɛ dia nsambisha anto wa lo “wedja tshɛ ndo waoho tshɛ ndo ɛtɛkɛta tshɛ” lokumu l’ɔlɔlɔ. (Ɛny. 14:6) Koko kɛnɛ kele mɛtɛ ele, hatokokaki pondjo nsambisha onto tshɛ lokumu l’ɔlɔlɔ la ntondo k’ekomelo ndja.
8. Dimbola diakɔna diakokaso ndjaoka lo kɛnɛ kendana la kilombo ka Jehowa ka lo nshi yayaye? (Enda ndo esato.)
8 Laasɔ, dimbola nɛ monyiyamaka: Kayotota lo dikambo di’anto wahatokondja diaaso dia mpokamɛ lokumu l’ɔlɔlɔ la ntondo ka mfɔnu ka woke ntatɛ? Ngande wayowasalɛ Jehowa ndo Ɔnande lakandasha ɔkɛndɛ wa nombosha, akambo? (Jni. 5:19, 22, 27; Ets. 17:31) Divɛsa diɔsami ɔtɛ a dui wa sawo nɛ mbutaka dia Jehowa “halange kaanga onto 1 ndanyema.” Koko, nde nangaka dia “anto tshɛ nkondja diaaso dia ndjatshumoya.” (2 Pe. 3:9; 1 Tim. 2:4) Kɛsɔ nangaka mbuta dia, sho pombaka mbeya dia Jehowa atatosholɛ kɛnɛ kayondosala lo okadimwelo wa dimbola sɔ. Kɛnɛ kele mɛtɛ ele, nde hatshutshuyama la wolo dia totɛ oseka vuiwui tshɛ yendana la kɛnɛ kamondosalaka kana kayondosala.
Kakɔna kayosala Jehowa la wanɛ ondo wahokondja diaaso dia mboka lokumu k’ɔlɔlɔ la ntondo ka mfɔnu ka woke? (Enda odingɔ 8) c
9. Kakɔna kakatosholɛ Jehowa lo Bible?
9 L’Ɔtɛkɛta ande, Jehowa akatosholɛ awui amɔtshi wayondosala. Ɛnyɛlɔ, Bible totɛka dia Jehowa ayolola “anto wa kɔlɔ” wanɛ waki kokondja diaaso dia mboka lokumu l’ɔlɔlɔ ndo nsala etshikitanu lo nsɛnɔ yawɔ. (Ets. 24:15; Luka 23:42, 43) Dui sɔ monyiyaka ambola akina w’ohomba.
10. Ambola akɔna akina wonyiyama?
10 Onde onto tshɛ layovɔ lo mfɔnu ka woke ayovɔ pondjo aha l’elongamelo ka eolwelo? Afundelo mɛnyaka hwe dia wanɛ walɔsha Jehowa wayolanyema oma le nde l’alembe ande lo ta di’Aramangɛdɔna, hawotolɔ. (2 Tɛs. 1:6-10) Ko kayotota lo dikambo di’anto akina; ɛnyɛlɔ, wanɛ wavɔ l’ɔtɛ wa hemɔ kana l’ɔtɛ wa lotshundu l’osombe, wavɔ l’aksida kana wadiakema oma le anto? (Ond. 9:11; Zɛk. 14:13) Onde anto amɔtshi l’atei w’anto asɔ wayonga l’ɔnɔngɔ ‘w’anto wa kɔlɔ’ wayolɔ l’andja w’oyoyo? Lo tshena pe, hateye.
AWUI WEYASO
11. Lo na ayolomboshama anto lo Aramangɛdɔna?
11 Sho mbeyaka akambo efula wendana la nshi yayaye. Ɛnyɛlɔ, sho mbeyaka dia lo Aramangɛdɔna, anto wayolomboshama lo ndjela woho wakawasalɛ anango Kristo akambo. (Mat. 25:40) Wanɛ wayɔsama oko ɛkɔkɔ, ayonga wanɛ wakasukɛ akitami ndo Kristo. Sho mbeyaka nto dia anango Kristo amɔtshi wayonga la nkɛtɛ l’ɔkɔngɔ wa mfɔnu ka woke ntatɛ ndo wayɔsama otsha l’olongo paka yema tshitshɛ la ntondo ka Aramangɛdɔna ntatɛ. Edja tshɛ kayonga anango Kristo amɔtshi la nkɛtɛ, ondo anto amɔtshi w’etema ɛlɔlɔ wayokondja diaaso dia mbasukɛ ndo mbakimanyiya l’olimu awɔ. (Mat. 25:31, 32; Ɛny. 12:17) Lande na kele awui asɔ ohomba?
12-13. Kakɔna ondo kayosala anto amɔtshi l’ɔkɔngɔ wa mɛna elanyelo ka “Babilɔna ka Woke”? (Enda ndo esato.)
12 Kaanga l’ɔkɔngɔ wa mfɔnu ka woke ntatɛ, anto efula wayɛna woho wayolanyema “Babilɔna ka Woke” wayohɔ di’aya ɛnɔnyi efula wakataka Ɛmɛnyi wa Jehowa dikambo diambosalema nɛ. Onde anto amɔtshi wayɛna awui asɔ wayokadimola etema?—Ɛny. 17:5; Ɛzk. 33:33.
13 Naka dui dia ngasɔ diambosalema, kete ayonga oko kɛnɛ kakakomɛ ase Edjibito lo nshi ya Mɔsɛ. Tohɔke dia “anto akina efula wakasɔhana” l’ase Isariyɛlɛ etena kakawayatombaka oma l’Edjibito. Anto amɔtshi l’atei w’anto asɔ ondo wakatatɛ monga la mbetawɔ etena kakawɛnyi mɛtɛ ka kɛnɛ kakate Mɔsɛ kendana l’Asui Dikumi. (Eto. 12:38) Naka dui dia ngasɔ diambotomba l’ɔkɔngɔ w’elanyelo ka Babilɔna ka Woke, onde tayokɔmɔ l’ɔtɛ w’ɔnɛ anto akina wambosangana la so yema tshitshɛ la ntondo k’ekomelo ndja? Ndooko! Sho nangaka nkɛnɛmɔla lonto la Shɛso lele l’olongo, “Nzambi ka kɛtshi ndo kokana kandji, kahoke nkɛlɛ esadi ndo koludi tɔɔ la ngandji ka kɔlamelo ndo la mɛtɛ.” b—Eto. 34:6.
Anto amɔtshi wayɛna elanyelo ka “Babilɔna ka Woke” wayohɔ di’Ɛmɛnyi wa Jehowa wakatatshi edja efula la ntondo dia dui nɛ diayosalema (Enda odingɔ 12-13) d
14-15. Onde onto ayokondja diɛsɛ dia nsɛna pondjo pondjo lo nshi yayaye lo ndjela etena kakandavu kana dihole diadjasɛnde? Lembetshiya. (Osambo 33:4, 5)
14 Lo tena dimɔtshi, sho mbokaka anto amɔtshi wata ɔnɛ: “Otoleka dimɛna dia owotɔ ami mvɔ la ntondo ka mfɔnu ka woke ntatɛ dia nde monga l’elongamelo ka eolwelo.” Anto asɔ koka monga l’eyango w’amɛna l’edia ka ditelo sɔ. Koko nshi yaye ya pondjo y’onto halemɛna la etena kakandavu. Jehowa ekɔ shushi ya kokele, mbuta ate tɛdikɔ tande mongaka nshi tshɛ losembwe ndo ɔlɔlɔ. (Adia Osambo 33:4, 5.) Sho koka monga l’eshikikelo dia “Shushi ya nkɛtɛ k’otondo” ayosala kɛnɛ kele ɔlɔlɔ.—Eta. 18:25.
15 Ekɔ nto dui dia dimɛna dia sho mbuta dia lɔsɛnɔ la pondjo l’onto halemanɛ la dihole diadjasɛnde. Jehowa hatɔsa pondjo miliyɔ y’anto oko waa “mbudi” paka l’ɔtɛ wadjasɛwɔ lɛnɛ ahawakondjisha diaaso dia mboka losango la Diolelo. (Mat. 25:46) Shushi yosembwe ya nkɛtɛ k’otondo toleka ndjakiyanya lo dikambo di’anto asɔ. Hateye woho wayosala Jehowa akambo lo mfɔnu ka woke. Ondo anto amɔtshi l’atei w’anto asɔ wayokondja diaaso dia mbeka awui wendana la Jehowa, wayonga la mbetawɔ le nde ndo wayeta lo wedi wa Jehowa etena kayondoyakidia la ntondo ka wedja tshɛ.—Ɛzk. 38:16.
L’ɔkɔngɔ wa mfɔnu ka woke ntatɛ, . . . onde anto amɔtshi wayɛna awui asɔ wayokadimola etema?
16. Kakɔna kamboteya lo kɛnɛ kendana la Jehowa? (Enda ndo osato.)
16 Lo wekelo aso wa Bible, tambeya awui efula lo woho wɔsa Jehowa nsɛnɔ y’anto la nɛmɔ. Nde akakimɔ lɔsɛnɔ l’Ɔnande dia sho tshɛ monga la diɛsɛ dia nsɛna pondjo pondjo. (Jni. 3:16) Sho tshɛ ndjaokaka dia sho nangemaka oma le Jehowa. (Isa. 49:15) Nde mbeyaka onto l’onto lo lokombo lande. Lo mɛtɛ, nde teyaka dimɛna l’onto ndo l’onto dia kaanga etena kayotovɔ, nde koka tolola nɛ dia nde mbohɔka vuiwui tshɛ yendana la so ndo kɛnɛ tshɛ kakiso latɔ lo wɔɔngɔ! (Mat. 10:29-31) Eelo, tekɔ l’ɛkɔkɔ w’eshika wa nshikikɛ dia Shɛso ka ngandji lele l’olongo ayolombosha onto l’onto la wɛdimo, la losembwe ndo la kɛtshi tshɛ.—Jak. 2:13.
Sho koka monga l’eshikikelo dia Jehowa ayolombosha onto tshɛ la wɛdimo, la losembwe ndo la kɛtshi (Enda odingɔ 16)
17. Kakɔna kayotɔsɛdingola lo sawo diayela?
17 Elembetshielo w’eyoyo ɛnɛ mbetɛka olimu aso w’esambishelo dui dia wanyandja oleki woho wakatawɔsaka ntondo. Lande na kakokaso mbuta ngasɔ? Ndo kakɔna katotshutshuya dia ntetemala nsambisha lokumu l’ɔlɔlɔ l’ohetoheto? Tayɔsɛdingola ekadimwelo wa ambola asɔ lo yoho ya lotshimola lo sawo diayela.
OSAMBO 76 Ngande wayaokaso?
a Dia mbeya elembetshielo wɛnya lande na kambotosala otshikitanu ɔnɛ, enda sawo dia Tshoto y’Etangelo ya Ngɔndɔ ka sato 15, 2015, lk. 7-11, diele l’ɔtɛ a dui ɔnɛ: “Wɛ akasale dikambo sɔ lo ndjela lolango layɛ.”
b L’ɔkɔngɔ wa Babilɔna ka Woke ndanyema, ekambi wa Jehowa tshɛ wayohembama l’etena kayowalɔsha Ngɔngɔ ka la Mangɔngɔ. Onto tshɛ layeta lo wedi w’ekambi wa Nzambi l’ɔkɔngɔ wa Babilɔna ka Woke ndanyema ayodjama ndo nde lawɔ l’ohemba.
c ELEMBETSHIELO W’ESAT: Esato 3 wɛnya lande na kele anto amɔtshi ondo hawotokoka sambishama l’esambishelo kaso ka l’andja w’otondo: 1) Womoto ɔmɔtshi ladjasɛ lɛnɛ ele ɔtɛmwɛlɔ woleki wa lɛkɔ mbodjaka lo waale efula dia ntɛmɔla Jehowa, 2) atshukanyi amɔtshi wadjasɛ lɛnɛ ele awui wa pɔlitikɛ mbashimbaka ndo ekɔ waale dia ntɛmɔla Jehowa ndo 3) pami kɛmɔtshi kadjasɛ l’ɛtshi ka nkɛtɛ kele ekɔ okakatanu efula dia nkoma lɛkɔ.
d ELEMBETSHIELO W’OSATO: Osekaseka ɔmɔtshi wakatshike akambo wa mɛtɛ ekɔ lo mbohɔ kɛnɛ kakandeke lo dikambo di’elanyelo ka “Babilɔna ka Woke.” Nde ambosala etshikitanu ndo ambokalola otsha le ambutshi ande w’Akristo. Naka awui wa nganɛ wambosalema, kete sho nangaka nkɛnɛmɔla kɛtshi kele la Shɛso lele l’olongo ndo ngɛnangɛna di’otshi wa pɛkato ambokalola
