1. Ntchifukwa wuli tingakamba kuti tija mu nyengu yapade ukongwa?

 TIJA mu nyengu yapade ukongwa! Zuŵa lelosi tiwona mauchimi nga mu Bayibolu ngachifiskika. Mwakuyeruzgiyapu, tiwona “fumu ya kunkhondi” ndi “fumu ya kumwera” zichilimbana, chifukwa chakuti weyosi wakhumba kuti walamuliyengi charu chosi. (Dani. 11:​40, mazu ngamumphata) Tiwona uthenga wamampha wa ufumu uchipharazgika ukongwa pacharu chosi, ndipu ŵanthu mamiliyoni nganandi avwisiya mwakuti asankha kuteŵete Yehova. (Yesa. 60:22; Mate. 24:14) Kweniso kusazgiyapu yapa, tilonde chakurya chinandi chauzimu “pa nyengu yakwenere.”—Mate. 24:​45-47.

2. Kumbi ndi vinthu wuli vo tisimikiza, nanga ndi vinthu wuli vo titenere kuziŵa?

² Yehova walutirizga kutiwovya kuti tivwisengi umampha vinthu vakukhumbika ukongwa vo vichitikengi pambula kuswera yapa. (Nthanthi 4:18; Dani. 2:28) Tisimikiza kuti asani chisuzgu chikulu chaziyamba, tazamuziŵa vinthu vosi vo tikhumbika kuziŵa kuti tilutirizgi kuja akugomezgeka kwaku Yehova kweniso kuja akukoliyana pa nyengu yakusuzga yeniyi. Kweni titenere kuziŵa kuti pe vinthu vinyaki vo titiviziŵa cha vakukwaskana ndi vinthu vo vichitikengi kunthazi. Mu nkhani iyi, tikambiskanengi vifukwa vo tasinthiya vinthu vinyaki vo tagomezganga vakukwaskana ndi vinthu vo vichitikengi kunthazi. Tikambiskanengi so vinthu vinyaki vo tiziŵa vakukwaskana ndi vo vichitikengi kunthazi kweniso mo Awusefwi akuchanya azamuchitiya pa nyengu yo.

 VO TILEKA KUZIŴA

3. Kumbi kali tagomezganga kuti ntchinthu wuli cho chazamuchitikiya ŵanthu wo ateŵete Yehova cha asani chisuzgu chikulu chaziyamba, nanga ntchifukwa wuli tagomezganga venivi?

³ Kali, tagomezganga kuti asani chisuzgu chikulu chaziyamba, ŵanthu wo ateŵete Yehova cha azamuŵavi mwaŵi wakugomezga Yehova ndi kuzitaskika pa Aramagedoni. Tagomezganga venivi chifukwa taŵanaŵananga kuti vo vinguchitika pa nyengu ya Chigumula, wenga uchimi wo wamiyanga vinthu vo vazamuchitika kunthazi. Mwakuyeruzgiyapu, taŵanaŵananga kuti nge mo Yehova wangujaliya chisasa cha chombu Chigumula chechendayambi, ndivu so wazamuchita kukwamba kwa chisuzgu chikulu. Iyu “wazamujaliya kubwalu” charu chaku Satana, kung’anamuwa kuti wazamuzomereza cha kuti ŵanthu wo amuteŵetiyanga cha aje ndi chivwanu ndi kutaskika pa chisuzgu chikulu.—Mate. 24:​37-39.

4. Kumbi sonu tigomezga kuti nkhani ya Chigumula mbuchimi wo umiya vinthu vinyaki vo vazamufiskika kunthazi? Konkhoskani.

⁴ Kumbi nkhani ya Chigumula wenga uchimi wo wamiyanga vinthu vinyaki? Awa. Chifukwa wuli? Chifukwa chakuti Bayibolu likambapu cha venivi. a Mbuneneska kuti Yesu wanguyeruzgiya “mazuŵa ngaku Nowa” ndi kuŵapu kwaki. Kweni wangukambapu cha kuti chechosi cho chinguchitika mu nyengu yaku Nowa, nge kujala chisasa cha chombu vamiyanga vinthu vinyaki, mwakuti vinthu vo vazamufiskika kunthazi. Kweni venivi ving’anamuwapu cha kuti palivi cho tingasambirapu pa nkhani yaku Nowa kweniso Chigumula.

5. (a) Kumbi Nowa wanguchitanji Chigumula chechendazi? (Aheberi 11:7; 1 Peturo 3:20) (b) Pa nkhani yakupharazga, kumbi tiyanana wuli ndi vo vinguchitika mu nyengu yaku Nowa?

 ⁵ Nowa wati wavwa uthenga wakutcheŵesa wakutuwa kwaku Yehova wangulongo kuti we ndi chivwanu chifukwa wangukhoma chombu. (Ŵerengani Aheberi 11:7; 1 Peturo 3:20.) Mwakuyanana ŵaka, ŵanthu wo atuvwa uthenga wamampha wakukwaskana ndi Ufumu waku Chiuta, atenere kuchitapu kanthu chifukwa cha vo ŵavwa. (Machi. 3:​17-20) Peturo wangukamba kuti Nowa wenga “mupharazgi wa urunji.” (2 Petu. 2:5) Kweni nge mo takonkhoskiyapu kali mu nkhani yajumpha, tiziŵa cha asani Nowa wangunozga vakuti wapharazgiyi weyosi pacharu chapasi Chigumula chechendazi. Mazuŵa nganu, titesesa kupharazgiya ŵanthu pacharu chosi ndipu tichita phamphu kugwira ntchitu yeniyi. Kweni chinanga kuti tingayesesa wuli, tingafiska cha kupharazgiya weyosi pacharu umaliru wechendazi. Chifukwa wuli?

6-7. Ntchifukwa wuli tingakamba kuti tifiskengi cha kupharazgiya munthu weyosi pacharu chosi chapasi umaliru wechendazi? Konkhoskani.

⁶ Tiyeni tiwoni vo Yesu wangukamba vakukwaskana ndi ntchitu yidu yakupharazga. Iyu wangukambiya limu kuti uthenga wamampha wazamupharazgika “pacharu chosi chapasi kuti uje ukaboni ku ŵanthu amitundu yosi.” (Mate. 24:14) Uchimi wenuwu ufiskika ukongwa mazuŵa nganu kuluska kali. Uthenga wa Ufumu upharazgika mu vineneru vakujumpha 1,000. Ndipu kuziya pa webusayiti ya jw.org ŵanthu anandi pacharu chapasi mazuŵa nganu, angasambira vakukwaskana ndi uthenga wamampha wa Ufumu waku Chiuta.

⁷ Chinanga kuti ve viyo, Yesu wangukambiya so akusambira ŵaki kuti azamumaliza cha “kuzunguliya mumatawuni ngosi,” pamwenga kupharazgiya munthu weyosi iyu wechendazi. (Mate. 10:23; 25:​31-33) Vo Yesu wangukamba ndivu so vichitikengi mu nyengu yidu yinu. Ŵanthu mamiliyoni nganandi mazuŵa nganu, aja muvyaru vo ntchitu yidu yakupharazga njakukanizgika. Kweniso ŵana mahandiredi nganandi awaku pa miniti yeyosi. Tichita vosi vo tingafiska kuti ŵanthu akutuwa mu “mtundu wewosi, fuku lelosi, [ndi] lilimi lelosi” tiŵapharazgiyi uthenga wamampha. (Chivu. 14:6) Kweni uneneska ngwakuti tifiskengi cha kupharazga uthenga wamampha ku munthu weyosi yo we pacharu chapasi, umaliru wechendazi.

8. Kumbi ndi fumbu nili lo tingafumba pa nkhani ya mo Yehova wazamuyeruzgiya ŵanthu kunthazi? (Wonani so vithuzi.)

⁸ Venivi viyuska fumbu lakuti: Kumbi ndi vinthu wuli vo vazamuchitikiya ŵanthu wo alivi mwaŵi wakuvwa uthenga wamampha chisuzgu chikulu chechendayambi? Kumbi Yehova kweniso Mwana waki yo wakumupaska udindu wakuyeruzga, azakuŵayeruzga wuli ŵanthu ŵenaŵa? (Yoha. 5:​19, 22, 27; Machi. 17:31) Lemba lo patuwa mutu wa nkhani yinu lakamba kuti Yehova “wakhumba cha kuti weyosi wanangiki.” Kweni iyu “wakhumba kuti weyosi walapi.” (2 Petu. 3:9; 1 Timo. 2:4) Chinanga kuti tiziŵa vinthu venivi vakukwaskana ndi Yehova, kweni wechendativumbuliyi mo wazamuyeruzgiya ŵanthu wo azamuja kuti ŵeche ndi umoyu ndipu ŵengavi mwaŵi wakuvwa uthenga wamampha. Chinanga kuti ve viyo, iyu wakhumbika cha kutikambiya chechosi cho iyu wachita pamwenga cho wazamuchita.

9. Kumbi ndi vinthu wuli vo Yehova wativumbuliya kuziya mu Bayibolu?

⁹ Kuziya mu Mazu ngaki, Yehova wativumbuliya vinthu vinyaki vo iyu wazamuchita kunthazi. Mwakuyeruzgiyapu, Bayibolu lititikambiya kuti Yehova wazamuyuska ŵanthu “ambula urunji” wo ŵengavi mwaŵi wakusambira vakukwaskana ndi uthenga wamampha kweniso kusintha nkharu yawu. (Machi. 24:15; Luka 23:​42, 43) Venivi vichitiska kuti tije ndi mafumbu nganyaki ngakukhumbika ukongwa.

10. Kumbi ndi mafumbu nganyaki nanga ngo tingaŵa nangu?

 ¹⁰ Kumbi ŵanthu wosi wo azamukufwa pa chisuzgu chikulu azamufwiya limu mwakuti azamuŵavi chilindizga chakuziyuskika? Malemba ngakamba mwambula kubisa kuti ŵanthu wo asuska Yehova, wo Iyu limoza ndi magulu ngaki nga nkhondu azakuŵabaya pa Aramagedoni azamuyuskika so cha. (2 Ate. 1:​6-10) Kweni nanga wuli ŵanthu anyaki? Mwakuyeruzgiyapu, anyaki angazifwa pa chisuzgu chikulu chifukwa cha kutama, ukoti, ngozi pamwenga so kubayika ndi ŵanthu anyaki. (Waku. 9:11; Zeka. 14:13) Kumbi anyaki mwa ŵanthu ŵenaŵa angazija mu gulu la ŵanthu “ambula urunji” wo azamuyuskika mucharu chifya? Kumuka nkhwakuti, tiziŵa cha.

VO TIZIŴA

11. Kumbi ndi vinthu wuli vo vazamuchitiska kuti munthu wayeruzgiki?

¹¹ Pe vinthu vinandi vo tiziŵa vakukwaskana ndi vinthu va munthazi. Mwakuyeruzgiyapu, tiziŵa kuti Yesu wazamuyeruzga ŵanthu mwakukoliyana ndi mo achitiyanga vinthu ndi abali aku Khristu. (Mate. 25:40) Ŵanthu wo azamuyeruzgika kuti ndi mbereri ndi wo awovyanga Akhristu akusankhika kweniso Khristu. Ndipuso tiziŵa kuti abali anyaki aku Khristu azamuja kuti ŵeche pacharu chapasi chisuzgu chikulu chichiyamba ndipu yiwu azamuluta kuchanya asani Aramagedoni yaja kamanavi kwamba. Pa nyengu yosi yo abali anyaki aku Khristu azamuja kuti ŵeche pacharu chapasi, vingachitika kuti ŵanthu anyaki a mtima wamampha azamuja ndi mwaŵi wakuŵawovya pa ntchitu yo agwira kweniso mu nthowa zinyaki. (Mate. 25:​31, 32; Chivu. 12:17) Ntchifukwa wuli kuziŵa vinthu venivi nkhwakukhumbika ukongwa?

12-13. Kumbi ŵanthu anyaki angazichita wuli asani aziwona kuti “Babiloni Mukulu” wabwangandulika? (Wonani so vithuzi.)

¹² Chinanga mphanyengu ya chisuzgu chikulu, vingazichitika kuti ŵanthu anyaki wo azamuwona kubwangandulika kwa “Babiloni Mukulu,” azamukumbuka kuti venivi ndivu kwa vyaka vinandi Akaboni aku Yehova akambanga kuti vazamuchitika. Kumbi ŵanthu anyaki wo azamuwona venivi vichichitika angazisintha mtima wawu ndi kuja ndi chivwanu mwaku Yehova?—Chivu. 17:5; Ezeki. 33:33.

¹³ Asani ŵanthu anyaki angazisintha, vingaziyanana ndi vo vinguchitika mu nyengu yaku  Mozesi ku Ijipiti. Kumbukani kuti “gulu la ŵanthu amitundu yakupambanapambana” lingutuliya limoza ndi Ayisirayeli mu Ijipiti. (Eki. 12:38) Anyaki mwa ŵanthu ŵenaŵa angwamba kugomezga Yehova ŵati awona kuti Milili 10 yo Mozesi wangutcheŵesa yichitika nadi. Asani venivi vazichitika, pavuli pakuti Babiloni Mukulu wabwangandulika, kumbi tingaziguŵa kuwona kuti ŵanthu anyaki ayamba kuteŵete Yehova kwaja kamanavi kuti Aramagedoni yiyambi? Awa, cha pe! Tazamukhumba kuyezga mijalidu ya Awusefwi akuchanya yo ndi “Chiuta walisungu kweniso wawezi, wambula kukwiya liŵi ndipuso wakuzaza ndi chanju chambula kumala kweniso uneneska.” b—Eki. 34:6.

14-15. Kumbi kuzija ndi umoyu wambula kumala kunthazi, vithemba nyengu yo munthu wafwiya pamwenga ko waja? Konkhoskani. (Salimo 33:​4, 5)

¹⁴ Nyengu zinyaki tingavwa abali ndi azichi achikamba kuti, “Vingaja umampha asani mubali wangu yo ndi Kaboni cha wangafwa chisuzgu chikulu chechendayambi kuti panyaki wangazija ndi chilindizga chakuziyuskika.” Ŵanthu wo ŵe ndi maŵanaŵanu ngenanga ŵe ndi vilatu vamampha. Kweni mwaŵi wakuzija ndi umoyu wamuyaya uthemba nyengu yo munthu wafwiya cha. Yehova ngwakweruzga wakufikapu, ndipu nyengu zosi vo iyu wasankha vija va urunji kweniso vakwenere. (Ŵerengani Salimo 33:​4, 5.) Mwaviyo tingasimikiza kuti “wakweruzga wa charu chosi chapasi” wazamuchita vinthu mwaurunji.—Gene. 18:25.

¹⁵ Mphakuvwika so kukamba kuti, kuti munthu wazisaniyi umoyu wamuyaya kunthazi vithemba ko waja cha. Mwaviyo, vakuvwika cha kuŵanaŵana  kuti Yehova wazamuyeruzga ŵanthu mamiliyoni nganandi kuti ndi “mbuzi” chifukwa chakuti ajanga kumalu ko ŵengavi mwaŵi wakusambira vakukwaskana ndi uthenga wa Ufumu. (Mate. 25:46) Chiuta yo ngwakweruzga murunji wacharu chosi watiŵaŵanaŵaniya ukongwa ŵanthu wosi nge ŵenaŵa kuphara mo isi tingachitiya. Tiziŵa cha mo Yehova wazamuyendese vinthu pa nyengu ya chisuzgu chikulu. Panyaki anyaki mwa ŵanthu ŵenaŵa azamuja ndi mwaŵi wakwamba kugomezga Yehova pa nyengu yo Yehova wazamuziŵikisa zina laki ku munthu weyosi pacharu chapasi.—Ezeki. 38:16.

16. Kumbi tiziŵanji vakukwaskana ndi Yehova? (Wonani so chithuzi.)

¹⁶ Kuziya mu vo tisambira mu Bayibolu, taziŵa kuti Yehova wawona kuti munthu weyosi ngwakuzirwa. Iyu wangupereka umoyu wa Mwana waki kuti tosi tije ndi mwaŵi wakuzija ndi umoyu kwamuyaya. (Yoha. 3:16) Tosi tiwona kuti Yehova watitiyanja ukongwa. (Yesa. 49:15) Iyu waziŵa zina la munthu weyosi. Iyu watitiziŵa umampha ukongwa, mwakuti chinanga tingafwa iyu wangatiyuska ndi kuweziyamu chechosi chakukwaskana ndi isi kweniso vosi vo takumbukanga techendafwi! (Mate. 10:​29-31) Kukamba uneneska, te ndi chifukwa chakuvwika chakugomezge kuti Awusefwi akuchanya wo mbachanju azamuyeruzga munthu weyosi mwambula kwanjiya, mwaurunji kweniso mwalisungu.—Yako. 2:13.

17. Kumbi tazamukambiskananji mu nkhani yakulondopu?

¹⁷ Kuziŵa vinthu venivi kutitiwovya kuziŵa kuti pasonu panu, ntchitu yakupharazga yikhumbika kugwirika mwaliŵi ukongwa kuluska kali. Ntchifukwa wuli tikamba viyo? Nanga ntchinthu wuli cho chititichiska kuti tilutirizgi kupharazga mwaphamphu uthenga wamampha? Mu nkhani yakulondopu tazamumuka mafumbu ngenanga.