1. ¿Jas yuj wa xbʼobʼ kaltik ke ayotik bʼa jun tyempo jel chaʼanyabʼal?

 ¡AYOTIK bʼa jun tyempo jel chaʼanyabʼal! Kada kʼakʼu wani xkilatik jastal wan kʼotel smeranil ja jastik alubʼalkan bʼa Biblia. Jun sjejel, wa xkilatik ja tiro yiʼoje «ja rey bʼa norte» sok «ja rey bʼa sur» bʼa oj yaʼe mandar ja luʼumi (Dan. 11:​40, nota). Chomajkil, wani cholxel ja lekil rason sbʼaja sGobyerno ja Dyos bʼa yibʼanal ja luʼumi, sok miyonik kristyanoʼik wane stsajel yaʼteltajel ja Jyoba (Is. 60:22; Mat. 24:14). Sok wani ajelkitik jitsan waʼelal bʼa Dyos «ja bʼa mero styempoʼili» (Mat. 24:​45-47).

2. ¿Jasa wa xbʼobʼ ajyukotik seguro, sok jasa tʼilan oj natiki?

² Ja Jyoba wani yajel kabʼtik mas stojolil ja jastik chaʼanyabʼal ojxta ekʼuki (Prov. 4:18; Dan. 2:28). Wani xbʼobʼ ajyukotik seguro ke yajni xkʼe ja niwan wokoli ojxani jnatik yibʼanal ja jas oj makunukujtik bʼa oj ajyukotik toj sok tsoman ja bʼa tyempo jaw jel wokoli. Pe tʼilani oj natik ke ay jastik junuk ke mi xnaʼatik sbʼaja jas ojto ekʼuk. Ja bʼa artikulo it, oj tatik tiʼal bʼajtan jas yuj jtukbʼestik ja jastal kabʼunejtik stojol jujuntik jastik junuk ojto ekʼuk. Tsaʼan oj paklaytik jujuntik jasunuk bʼa wa xnaʼatik ja bʼa jas ojto ekʼuki sok ja jastal oj skʼuluk ja kala Tatik bʼa satkʼinali.

JA JAS MI XNAʼATIKI

3. ¿Jasa wa xkalatik ajyi sbʼaja jas oj ekʼ sbʼaje ja kristyanoʼik yajni xkʼe ja niwan wokoli, sok jas yuj jach wa xpensarantik ajyi?

³ Ja bʼa tyempo ekʼta, wa xkalatik ke yajni xkʼe ja niwan wokoli, ja kristyanoʼiki mixani oj ajyukyujile tyempo bʼa oj skʼuʼuke bʼa Jyoba sok kanel sakʼan ja bʼa Armagedón.  Jachni kabʼunejtik stojol ajyi yujni wa xpensarantik ke yibʼanal ja jas ekʼ ja bʼa niwan Bʼutʼ Jaʼi juni senya bʼa jachtik oj ekʼuk ja bʼa tyempo jakumi. Jun sjejel, wani xkalatik ajyi ke jastalni ja Jyoba slutu ja spuertaʼil ja arka bʼajtanto oj kʼeʼuk ja niwan Bʼutʼ Jaʼi, cha jachni oj cha slut ja puerta yajni xkʼe ja niwan wokoli, sok mixani maʼ oj bʼobʼ staʼ skoltajel (Mat. 24:​37-39).

4. ¿Jas yuj mi xkalatik ke yibʼanal ja jas ekʼ ja bʼa skʼakʼu ja Noé jach oj cha ekʼuk ja bʼa jtyempotiki?

⁴ Pe ¿tʼilan maʼ oj pensaraʼuktik ke ja loʼil bʼa niwan Bʼutʼ Jaʼi juni senya ja bʼa jas ojto ekʼuki? a Miyuk, yujni mi xyala ja Biblia. Meran, ja Jesús ya slaj ja «skʼakʼujil ja Noé» soka tyempo tixa oj ajyuki. Pe mi kʼan yal ke yibʼanal ja jastik ekʼ ja bʼa niwan Bʼutʼ Jaʼi, jastal ja Jyoba slutu ja spuertaʼil ja arka, jach oj cha ekʼuk ja bʼa tyempo jakumi. Ama jachuk, jelni jas wa xbʼobʼ jnebʼtik ja bʼa loʼil it.

5. a) ¿Jasa skʼulan ja Noé bʼajtanto ja bʼa niwan Bʼutʼ Jaʼi? (Hebreos 11:7; 1 Pedro 3:20). b) ¿Bʼa jasa oj slaj ja jastal wa xcholotik ja wego yuja jastal skʼulan ja Noé?

⁵ Yajni ja Noé yabʼ ja srason ja Jyoba, sjeʼa ke ayiʼoj skʼuʼajel yajni stojbʼes ja arka (kʼuman ja Hebreos 11:7; 1 Pedro 3:20). Junxtani ja matik wa smaklaye ja lekil rason sbʼaja sGobyerno ja Dyosi tʼilani oj sjeʼe ke ayiʼoje skʼuʼajel soka jastik wa skʼulaneʼi (Hech. 3:​17-20). Ja  Pedro ya sbʼiʼiluk ja Noé «jun choluman ja bʼa jas toji» (2 Ped. 2:5). Pe jastalni kilatik ja bʼa artikulo ekʼi, mini xnaʼatik ta ja Noé sleʼa modo xcholjel yabʼ kada jujune ja kristyanoʼik ja bʼa Luʼumi sbʼaja niwan Bʼutʼ Jaʼi. Ja bʼa jtyempotiki, wani xleʼatik modo xcholjel bʼa yibʼanal ja luʼumi, sok kongana wa xkʼulantik ja aʼtel it. Pe ama jel xkʼujolantik, mini oj lajxukujtik xcholjel yabʼ yibʼanal ja kristyano bʼajtanto oj jakuk ja chʼakelali. ¿Jas yuj jach wa xkalatiki?

6, 7. ¿Jas yuj mi oj lajxukujtik xcholjel yabʼye yibʼanal ja kristyanoʼik bʼajtanto oj jakuk ja chʼakelali?

⁶ La kiltik ja jas yala ja Jesús bʼa man tikʼan oj kʼotuk ja xcholjeli. Ja yeʼn yalakan ke ja lekil rasoniki «ojni cholxuk bʼa yibʼanal ja luʼumi bʼa jachuk oj snaʼe yibʼanal ja chonabʼiki» (Mat. 24:14). Soka yaljelik it wani kʼotel smeranil ja bʼa jtyempotiki. Wani xcholotik ja lekil rason bʼa mas ja 1,000 kʼumali, sok stsʼakatal ja jsitiotik bʼa internet, ja jw.org, jitsan kristyano ja bʼa luʼumi wani kʼotel sbʼaje ja lekil rasoniki.

⁷ Pe ja Jesús cha yala yabʼ ja snebʼumaniki: «Mini oj chʼaka bʼejtayex yibʼanal ja chonabʼik bʼa Israel bʼajtantoyuj oj juluk ja Yunin ja Winiki». Ja it wa stojolan ke mini oj chʼak xchole yabʼ yibʼanal ja kristyanoʼik bʼajtanto oj jakuk ja yeʼn (Mat. 10:23; 25:​31-33). Ja bʼa jtyempotiki, miyonik kristyanoʼik ti aye bʼa lugarik bʼa mi x-aji permiso oj cholxuk. Chomajkil, kada minuto wa x-ajyi jitsan yal alats. Ja yujil, ama jel xkʼujolantik xcholjel yabʼye «yibʼanal ja chonabʼik, ja kʼoleʼik, ja kʼumalik sok ja lugariki», mini oj lajxukujtik xcholjel yabʼ yibʼanal ja kristyanoʼik ja bʼa luʼumi bʼajtanto oj jakuk ja chʼakelali (Apoc. 14:6).

8. ¿Jasa bʼobʼta oj jobʼ jbʼajtiki? (Cha kʼela ja potoʼik).

⁸ Yuja jas kilatikta, bʼobʼta wa xjobʼo jbʼajtik: «¿Jasa oj ekʼ sbʼaj ja kristyanoʼik bʼa mi bʼobʼ smaklaye ja lekil rasonik bʼajtanto oj kʼeʼuk ja niwan wokoli? ¿Jasa oj skʼulyile ja Jyoba sok ja Yunini ja maʼ yaʼunejyi ja cholal bʼa oj skʼul jusgar?» (Juan 5:​19, 22, 27; Hech. 17:31). Ja teksto bʼa elel ja artikulo it wa xya juljkʼujoltik ke ja Jyoba «mini june wa skʼana oj chʼaysnajel». Jaʼuktoma, «wani skʼana asutxuk skʼujol yibʼanal ja kristyano» (2 Ped. 3:9; 1 Tim. 2:4). Pe wani xnaʼatik ke ja Jyoba mitoni xyalakabʼtik jasa oj skʼul soka kristyanoʼik jawi. Sok ja smeranili, mini ay stʼilanil oj yalkabʼtik.

9. ¿Jasa yalunej kabʼtik ja Jyoba ja bʼa Yabʼali?

⁹ Ja bʼa Yabʼali, ja Jyoba yalunej kabʼtik jujuntik jasunuk bʼa ojni skʼuluk. Jun sjejel, wa xyalakabʼtik ke ojni ya sakʼwuk ja «matik mi tojuk» bʼa mini bʼobʼ snebʼe sbʼaja lekil rasoni sok stukbʼesel ja smodoʼe (Hech. 24:15; Luc. 23:​42, 43). Ja jaw bʼobʼta ojni bʼobʼ yakan bʼa oj ka jbʼajtik tuk sjobʼjelik jel tʼilan.

10. ¿Jastik junuk mas oj bʼobʼ jobʼ jbʼajtik?

¹⁰ ¿Jasa oj ekʼ sbʼaje yibʼanal ja matik xchamye ja bʼa niwan wokoli? ¿Oj maʼ chʼayjuk snajele bʼa tolabida sok ja yuj mixa oj ajyukyujile ja smajlajel bʼa oj sakʼwuke? Ja Biblia wa xyala jaman lek ke ja matik mi oj sakʼwuki jani ja kristyanoʼik ke ja Jyoba soka soldadoʼiki xchʼaya snajele ja bʼa Armagedón yuja skontraʼane ja yeʼni (2 Tes. 1:​6-10). Pe ¿jasa oj ekʼ sbʼaje ja matik xchamye ja bʼa niwan wokoli yuj chikan jas desgrasya, accidenteʼik ma xmiljiye yuj tuk kristyanoʼik? (Ecl. 9:11; Zac. 14:13). ¿Ti maʼ oj ajyuk jujuntik bʼa  yeʼnle ja «bʼa matik mi tojuk» bʼa oj sakʼwuke ja bʼa yajkʼachil luʼumi? Ja smeranili, mini xnaʼatik.

JA JAS WA XNAʼATIKI

11. ¿Jasa oj iljuk yajni xkʼulaji jusgar kada kristyano ja bʼa Armagedón?

¹¹ Ay jitsan jastik wa xnaʼatik sbʼaja jas ojto ekʼuki. Jun sjejel, wani xnaʼatik ke ja bʼa Armagedón ja kristyanoʼiki ojni kʼulajuke jusgar yuja jastal yilawe ja yermanoʼik ja Kristo (Mat. 25:40). Ja matik skoltuneje ja matik oj wajuke bʼa satkʼinal soka Kristo ojni iljuke jastal yal chejik. Cha wani xnaʼatik ke jujuntik yermanoʼik ja Kristo titoni oj ajyuke bʼa Luʼum yajni xkʼe ja niwan wokoli sok oj ijuke kʼe bʼa satkʼinal tʼusan bʼajtanto oj kʼeʼuk ja Armagedón. Yajni ja bʼa Luʼum ojto ajyuke ja matik oj wajuke bʼa satkʼinali, bʼobʼta ojni ajyuk kristyanoʼik bʼa lek skʼujole bʼa oj skoltaye ja yeʼnleʼi sok ja aʼtel wa skʼulaneʼi (Mat. 25:​31, 32; Apoc. 12:17). ¿Jas yuj jel tʼilan yibʼanal ja it?

12, 13. ¿Jasa bʼobʼta oj skʼuluke jujuntik kristyanoʼik yajni xyilawe ja xchʼakelal «Ja Niwan Babilonia»? (Cha kʼela ja potoʼik).

¹² Asta yajni kʼeta ja niwan wokoli bʼobʼta jujuntik yajni xyilawe ja xchʼakelal «ja Niwan Babilonia» oj julskʼujole ke ja testigoʼik bʼa Jyoba jitsanxa jabʼil xcholuneje ke jachni oj ekʼuk. ¿Oj maʼ stsaʼe jujuntik bʼa oj ajyuke bʼa sparte ja Jyoba? (Apoc. 17:5; Ezeq. 33:33).

¹³ La jpensaraʼuktik ja jas ekʼ ja bʼa skʼakʼu ja Moisés. Yajni ja israʼelenyoʼik elye ja bʼa Egipto, elye soka yeʼnle «jitsan lek kristyanoʼik bʼa tuktukil tikʼe» (Éx. 12:38). Bʼobʼta jujuntik bʼa yeʼnle kʼeni skʼuʼuke bʼa Jyoba yajni yilawe ke wan ekʼel ja lajune desgrasya yalunej ja Moisés. Ta jachtik ekʼ tsaʼan yajni chʼayta snajel ja Niwan Babilonia, ¿oj maʼ jpensaraʼuktik ke mi stojoluk yuja x-ajyito kristyanoʼik bʼa oj ochuke jmoktik bʼajtanto oj jakuk ja chʼakelali? ¡Mini tʼusan! Wani xkʼanatik oj nochtik ja kala tatik bʼa satkʼinali, bʼa kʼotel «jun Dyos wa snaʼa yajulal sok wa  xyabʼ syajal, ay spasensya sok jel ja syajal skʼujol mey stikʼanil sok tolabida wa xyala ja smeranil» (Éx. 34:6). b

14, 15. ¿Jas yuj wa xnaʼatik ke ja ajyel sakʼan bʼa tolabida mini jaʼuk ja yajni wala chamtik ma bʼa jbʼajtika? (Salmo 33:​4, 5).

¹⁴ Bʼobʼta kabʼunejtik ay maʼ yalunej jachuk bʼa jun spamilya ke mi xyaʼteltay ja Jyoba: «Mastoni lek ja oj chamuk bʼajtanto oj kʼeʼuk ja niwan wokoli bʼa jachuk oj ajyukyuj ja smajlajel bʼa oj sakʼwuk». Sen mini ay smaloʼil yuja jach wa xyala, pe ja smeranili ja maʼ oj bʼobʼ ajyuk sakʼan bʼa tolabida mini ti chʼikanuk ja yajni wa xchami. Ja Jyoba yeʼnani ja tojil Juesi, soka jastik wa stsaʼa oj skʼuluki tolabida kʼotel toj sok lek (kʼuman ja Salmo 33:​4, 5). Seguroni aytik ke «ja Jues bʼa yibʼanal ja luʼumi» oj skʼuluk ja bʼa toji (Gén. 18:25).

¹⁵ Ja ajyel sakʼan bʼa tolabida cha mini ti chʼikanuk bʼa jbʼajtika. Ja Jyoba cha mini oj yil «chiboʼik» ja miyonik kristyano kechanta yuja teye bʼa lugarik bʼa mini yabʼye ja lekil rasonik (Mat. 25:46). Ta ja keʼntiki wa xcham jkʼujoltik ja kristyanoʼik jaw, seguro ke mastoni wa xcham skʼujol ja «Jues bʼa yibʼanal ja luʼumi». Mini xnaʼatik jastal oj skʼuluk ja jastik junuk ja Jyoba ja bʼa niwan wokoli. Bʼobʼta jujuntik ja kristyanoʼik jaw ojni bʼobʼ snaʼe sbʼaj sok skʼuʼajel bʼa yeʼna yajni x-aji sakbʼuk bʼa stiʼ sat bʼa yibʼanal ja chonabʼiki (Ezeq. 38:16).

16. ¿Jastik junuk wa xnaʼatik sbʼaja Jyoba? (Cha kʼela ja poto).

 ¹⁶ Stsʼakatal ja Biblia, jnebʼunejtik ke ja Jyoba jelni chaʼanyabʼal xyila ja sakʼanili. Yaʼani ja Yunini bʼa jachuk kibʼanaltik oj ajyukujtik ja smajlajel bʼa ajyel sakʼan bʼa tolabida (Juan 3:16). Bʼa jun ekʼele ja bʼa jsakʼaniltiki, kabʼunejtik ke ja Jyoba yajxta wa yilawotik sok wa snaʼa jyajulaltik (Is. 49:15). Wani snaʼa jbʼajtik kada jujune ja keʼntiki soka jbʼiʼiltiki. Asta yuja wa snaʼa jbʼajtik leki ta ti chamtik wani xbʼobʼ skʼulukotik yajkʼachil ekʼele ja jastalni mero kʼotelotik ajyi sok yibʼanal ja jas wa xjul jkʼujoltiki (Mat. 10:​29-31). Ayni kiʼojtik jitsan rason bʼa wa xbʼobʼ jipjkʼujoltik ke ja kala Tatik bʼa satkʼinali ojni skʼul jusgar kada kristyano ja bʼa modo mas lek, yujni bibo, toj sok wa snaʼa jyajulaltik (Sant. 2:13).

17. ¿Jasa oj kiltik ja bʼa artikulo jakumi?

¹⁷ Yuja maxani wa xkabʼtik stojol ja it ja wego, wani xkaʼa jbʼajtik kuenta ke ja xcholjeli maxani jel tʼilan. ¿Jas yuj jach wa xkalatiki? Sok ¿jasa oj snikotik bʼa mi oj katikan xcholjel ja lekil rasoni? Ja bʼa artikulo jakumi oj yayi sjakʼjel ja sjobʼjelik it.