NHLOKOMHAKA YA DJONDZO 19
LISIMU 22 Mfumu wa Xikwembu Se Wa Fuma!
Leswi Hi Swi Tivaka Hi Nkama Lowu Yehovha A Nga Ta Yavanyisa Vanhu
“Yehovha . . . a nga swi naveli leswaku ku helisiwa munhu ni mun’we.” — 2 PE. 3:9.
LESWI HI NGA TA SWI DJONDZA
Nhlokomhaka leyi, yi ta hi tiyisekisa swaku loko Yehovha a yavanyisa vanhu ka nkama lowu taka a ta yendla leswo hi ndlela yayinene ni ya ku lulama.
1. Hi mhaka muni hi vula swaku hi hanya ka minkama ya ku tsakisa?
HINA hi hanya ka minkama ya ku tsakisa! Siku ni siku hi vona wuprofeta la Bibele na li hetiseka. Hi xikombiso, hi vona a “hosi ya norte” ni “hosi ya sul” na ti lwa swaku ti fuma misava. (Dan. 11:40) Funtshi hi vona swaku a mahungu ya ku tsakisa ya Mfumu wa Xikwembu ma chumayeliwa hi ndlela ya ku hlamalisa. Naswona ku tlula minkama hinkwayu, vanhu va vanyingi hintamu swinene va langa ku tirhela Yehovha. (Esa. 60:22; Mat. 24:14) Naswona nhlengeletanu ya Yehovha yi hi nyika mabuku ni swilo swin’wani leswi hi pfunaka ku tiyisa wunghanu la hina na Yehovha “hi nkama wa kona.” — Mat. 24:45-47.
2. I mpsini leswi hi nga tiyisekaka hi swona, kambe hi fanele hi twisisa yini?
2 Yehovha a tama a hi pfuna ku twisisa ku yampsa minchumu ya ku tsakisa leyi nga ta yendleka swoswinyana. (Swiv. 4:18; Dan. 2:28) Ha tiyiseka swaku loko nhlomulu wawukulu wu sungula se hi ta va na hi swi tiva leswi hi faneleke hi swi yendla swaku hi tama hi tshinela ka Yehovha hi tlhela hi twanana. Kambe i swa lisima ku twisisa swaku ku ni minchumu leyi hi kalaka hi nga yi tivi leyi nga ta yendleka ka nkama lowu taka. Ka djondzo leyi, hi ta vona ku txintxa ka matwisiselo ya hina, hi gama hi vona leswi se hi swi tivaka leswi nga ta yendleka ka nkama lowu taka. Ni leswi Papayi wa hina Yehovha a nga ta swi yendla.
LESWI HI KALAKA HI NGA SWI TIVI
3. I mpsini leswi a hi swi vula khale hi ku ponisiwa loko nhlomulu wawukulu se wu sungulile, naswona hi mhaka muni?
3 A khale a hi vula swaku loko nhlomulu wawukulu wu sungula, vanhu a va nga ha ta nyikiwa nkama wa ku tilangela ku tirhela Yehovha swaku va ta pona ka nyimpi ya Armajedoni. Lexi a xi hi yendla hi vula leswo hileswaku a hi twisisa swaku leswi swi nga yendleka ka nkama wa Ndhambi ya Nowa a swi kombisa leswi swi nga ta yendleka ka nkama lowu taka. Hi xikombiso, a hi kholwa swaku ku fana ni leswi a ku nga ha ta nghena munhu ka ngalava nkama Yehovha a nga pfala xipfalu, a ku nga ha ta va ni munhu lweyi a a ta sungula ku tirhela Yehovha a tlhela a ponisiwa loko nhlomulu wawukulu se wu sungulile. — Mat. 24:37-39.
4. Hi mhaka muni hi nga ha vuli swaku leswi swi nga yendleka ka masiku ya Nowa swi kombisa leswi swi nga ta yendleka ka nkama lowu taka?
4 Ku nga va swaku i swinene ku va hi vula swaku xin’wani ni xin’wani lexi nga yendleka ka Ndhambi ya Nowa xi kombisa leswi swi nga ta yendleka ka nkama lowu taka? Nada, a hi swinene. Hi mhaka muni? Hikusa Bibele a li swi vuli leswo. a I ntiyiso swaku Yesu a fanise “masiku ya Nowa” ni nkama wa ku ta ka yena. Kambe a nga zanga a vula swaku leswi swi nga yendleka ka masiku ya Nowa swa ku fana ni ku pfaliwa ka xipfalu xa ngalava, a swi ta hetiseka hi ndlela yayikulu ka nkama lowu taka. Kambe hi nga djondza minchumu ya yinyingi ka Nowa ni leswi nga yendleka ka nkama wa Ndhambi.
5. a) Nowa a swi kombisise ku yini swaku a a ni lipfumelo? (Vaheberu 11:7; 1 Pedru 3:20) b) Ntirho wa ku chumayela lowu hi wu yendlaka namuntlha wu fanisa ku yini ni lowu Nowa a nga wu yendla?
5 Nkama Nowa a nga twa swaku Yehovha a lava ku tisa Ndhambi, a kombise lipfumelo hi ku yaka ngalava. (Lerha Vaheberu 11:7; 1 Pedru 3:20.) Hi ku fana, loko vanhu va twa mahungu ya ku tsakisa ya Mfumu, swi lava va hanya hi leswi va nga swi djondza. (Min. 3:17-20) Pedru a vule swaku Nowa a a li “muchumayeli wa swa ku lulama.” (2 Pe. 2:5) Kambe, hilani hi nga swi vona hi kona ka nhlokomhaka leyi nga hundza, a hi swi tivi swaku Nowa a swi kotile ku chumayela vanhu hinkwavu va nkama wa yena. Namuntlha hi yendla hinkwaswu leswi hi nga swi kotaka swaku hi chumayela vanhu va vanyingi hilani hi nga kotaka hi kona amisaveni hinkwayu. Kambe, hambiloko ho zamisa ku yini, a hi nga ta swi kota ku chumayela vanhu hinkwavu na magamu ma nga se fika. Hi mhaka muni?
6-7. Hi mhaka muni hi nga vulaka swaku a hi nge swi koti ku chumayela vanhu hinkwavu na magamu ma nga se fika?
6 Pimisa hi leswi Yesu a nga swi vula hi ku chumayela mahungu ya ku tsakisa. Yena a vule swaku mahungu ya ku tsakisa ya Mfumu a “ma ta chumayeliwa amisaveni hinkwayu leswaku ma va wumboni ka matiko hinkwawu.” (Mat. 24:14) Phela ku tlula minkama hinkwayu a marito lawa ma hetiseka namuntlha. A mahungu ya ku tsakisa ya Mfumu ma chumayeliwa hi tirimi ta ku tlula 1.000, naswona ma kumeka ka site la jw.org. Leswo swi yendla swaku vanhu va vanyingi amisaveni hinkwayu va djondza hi ta Mfumu wa Xikwembu.
7 Kambe, Yesu a byele vadjondzisiwa va yena swaku a va nga ta swi kota ku chumayela ka madoropa hinkwawu. Leswi vulaka swaku a va nga ta swi kota ku chumayela vanhu hinkwavu na nkama wa ku ta ka yena wu nge se fika. (Mat. 10:23; 25:31-33) Phela marito ya Yesu ma tirha ni ka masiku ya hina. Vanhu va vanyingi hintamu swinene va tshama ka tindhawu leti hi kalaka hi nga pfumeleliwi ku chumayela na hi chunsekile. Handle ka leswo, ku ni swivanani swa swinyingi leswi swi psaliwaka nkama ni nkama. Hina hi yendla hinkwaswu leswi hi nga swi kotaka swaku hi kuma vanhu va “matiko ni tinxaka hinkwatu” hi tlhela hi va chumayela. (Nhl. 14:6) Kambe, ntiyiso hi leswaku a hi nga ta swi kota ku chumayela mun’wani ni mun’wani amisaveni na magamu ma nga se fika.
8. I mpsini leswi hi nga ha tivutisaka swona hi ndlela leyi Yehovha a nga ta yavanyisa vanhu ka nkama lowu taka? (Vona mafoto.)
8 Kambe hi nga ha tivutisa leswi: Ku ta yendleka yini hi vanhu va ku a va vanga ni nkateko wa ku djondza hi mahungu ya ku tsakisa na nhlomulu wawukulu wu nga se sungula? Yehovha ni N’wana wa yena lweyi a nga mu langa swaku a yavanyisa, va ta va khomisa ku yini vanhu volavo? (Yoh. 5:19, 22, 27; Min. 17:31) A ndzimana leyi nga khoma nhlokomhaka leyi, yi vula swaku Yehovha “a nga swi naveli swaku ku helisiwa munhu ni mun’we.” Kambe, ku hambana ni leswo “a lava swaku vanhu hinkwavu va txintxa.” (2 Pe. 3:9; 1 Tm. 2:4) Hi fanele hi pfumela swaku Yehovha a nga se hi byela hinkwaswu loko swi ta ka ku yavanyisa vanhu va ku a va swi kotanga ku djondza hi mahungu ya ku tsakisa. I ntiyiso swaku Yehovha a nga boheki ku hi tlhamusela hinkwaswu leswi se a nga swi yendla ni leswi a nga ta swi yendla.
I mpsini leswi Yehovha a nga ta swi yendla hi vanhu lava kalaka va nga vanga ni nkateko wa ku twa mahungu ya ku tsakisa na nhlomulu wawukulu wu nga se sungula? (Vona paragrafu 8) c
9. I mpsini leswi Yehovha a nga ta swi yendla ka nkama lowu taka?
9 Hi ku tirhisa Bibele, Yehovha a hi byela swilo swin’wani leswi a nga ta swi yendla. Hi xikombiso, ka Bibele Yehovha a vula leswaku a ta pfuxa “lava kalaka va nga lulamanga,” ku nga vanhu lava va kalaka va nga vanga ni nkateko wa ku twa mahungu ya ku tsakisa va tlhela va txintxa mahanyelo ya vona. (Min. 24:15; Luk. 23:42, 43) Leswo swi hi yendla hi tivutisa swivutiso swin’wani swa lisima.
10. Hi swini swivutiso swin’wani leswi hi nga ha tivutisaka swona?
10 Ku nga va swaku vanhu hinkwavu lava va nga ta fa hi nkama wa nhlomulu wawukulu va ta helisiwa swa wugamu, va nga na ntshembo wa ku pfuxiwa? Bibele la swi basisa swaku vanhu lava va nga ta djikela Yehovha va ta helisiwa ka nyimpi ya Armajedoni, funtshi a va nga ha ta va ni ntshembo wa ku pfuxiwa. (2 Tes. 1:6-10) Kambe swi nga yendleka vanhu van’wani va fa hi nkama wa nhlomulu wawukulu, hi swivangelo swin’wani swa ku fana ni mavabyi, ku guga, tinghozi, kumbe ku dlayiwa hi vanhu van’wani. Se ku ta yendleka yini hi vanhu volavo? (Ekl. 9:11; Zak. 14:13) Ku nga va swaku vanhu volavo va ta va ka ntlawa wa vanhu va ku kala va nga lulamanga lava va nga ta pfuxiwa ka misava ya nyuwani? Hina a hi yi tivi nhlamulu.
LESWI HI SWI TIVAKA
11. Yehovha a ta txuvuka yini loko a yavanyisa vanhu ka nyimpi ya Armajedoni?
11 Ku ni leswi se hi swi tivaka leswi swi nga ta yendleka ka nkama lowu taka. Hi xikombiso, ha swi tiva swaku ka nkama wa Armajedoni vanhu va ta yavanyisiwa hi ku ya hi leswi va nga ta va va va khomise xiswona vamakwavu va Kreste. (Mat. 25:40) Lava va nga ta seketela vatotiwa na Kreste va ta yavanyisiwa tanihi tinyempfu. Hi tlhela hi tiva swaku vatotiwa van’wani va ha ta va lani misaveni loko nhlomulu wawukulu se wu sungulile, naswona va ta tekiwa va ya tilweni loko ku li kusuhi hintamu ni ku va ku sungula Armajedoni. Tanihi leswi ku nga ta va ka ha ni vatotiwa lani misaveni, swi nga ha yendleka swi koteka swaku vanhu va kuma lunghelo la ku va va seketela vatotiwa ni ntirho wa vona. (Mat. 25:31, 32; Nhl. 12:17) Hi mhaka muni swi li swa lisima ku tiva leswo?
12-13. Vanhu van’wani va nga ha yendla yini loko va vona swaku “Babilona Wamukulu” a helisiwile? (Vona mafoto.)
12 Ndzhaku ka ku va nhlomulu wawukulu wu sungulile swi nga yendleka vanhu lava va nga vona ku helisiwa ka Babilona Wamukulu, va swi khumbuka swaku Timboni ta Yehovha ti hete malembe ya manyingi na ti vula swaku leswi a swi ta yendleka. Indjhe vanhu van’wanyani va ta sungula ku va ni lipfumelo ka Yehovha? — Nhl. 17:5; Eze. 33:33.
13 Loko leswo swo yendleka, swi ta fana ni leswi swi nga yendleka aGibita ka nkama wa Moxe. Khumbuka swaku ka nkama wolowo “ntlawa wawukulu wa vanhu” wu fambe ni Vayisrayele nkama va nga huma Gibita. Swi nga yendleka van’wani va vanhu volavo va sungule ku kombisa lipfumelo ka Yehovha nkama va nga vona swaku leswi Moxe a nga swi vula hi 10 wa Makhombo swi yendlekile hikakunene. (Eks. 12:38) Loko ko yendleka swa ku fana ndzhaku ka loko Babilona Wamukulu a helisiwile, ku nga va swaku hi ta kwata hi tlhela hi vona swaku a hi swinene kuva vanhu van’wani va tipatsa na hina na magamu ma nga se fika? I ntiyiso swaku a hi nge swi yendli leswo! Hina hi lava ku fana ni Papayi wa hina wa le matilweni lweyi a nga “Xikwembu xa timpsalu ni ntwelawusiwana, lweyi a hlwelaka ku kwata naswona a nga tala hi lirhandzu ni ntiyiso.” b — Eks. 34:6.
Van’wani va lava va nga ta vona ku helisiwa ka “Babilona Wamukulu,” va ta khumbuka swaku se i khale na Timboni ta Yehovha ti vulavula hi leswi (Vona maparagrafu 12-13) d
14-15. Indjhe a ku kuma wutomi swi ta ya hi swaku vanhu va fe siku muni naswona a va tshama kwini? Tlhamusela. (Tipisalema 33:4, 5)
14 Minkama yin’wani hi nga ha twa vamakwerhu na va vula leswi hi xaka la vona: “A swi ta va swinene loko xaka la mina a lo fa na nhlomulu wawukulu wu nga se sungula, hikusa a li ta va ni ntshembo wa ku pfuxiwa.” Phela munhu a nga ha vula leswo hileswi a swi lavaka hintamu ku vona xaka la yena. Kambe a mhaka ya leswaku munhu a ta pfuxiwa a tlhela a hanya hi masiku ni masiku a swi yi hi nkama lowu a nga fa hi wona. Phela Yehovha i Muyavanyisi wa ku hetiseka naswona swiboho swa yena minkama hinkwayu i swinene naswona swi lulamile. (Lerha Tipisalema 33:4, 5.) Hi nga tiyiseka swaku “Muyavanyisi wa misava hinkwayu” minkama hinkwayu a yendla leswi nga swinene. — Gen. 18:25.
15 Ha tiyiseka swaku a ku kuma wutomi la ku kala li nga heli a swi yi hi swaku vanhu a va tshama kwini. Yehovha a nge yavanyisi vanhu va vanyingi tanihi “timbuti” hileswi lomu a va tshama kona a mahungu ya ku tsakisa a ma nga se tshama ma chumayeliwa. (Mat. 25:46) Hina hi ni mhaka ni vanhu lava, hi nga tiyiseka swaku Yehovha Muyavanyisi wa misava hinkwayu a ni mhaka na vona ku hi tlula. A hi swi tivi swaku Yehovha a ta yendla yini ka xiyimu lexi. Swi nga ha yendleka van’wani va vanhu lava, loko se va vone leswi nga yendleka ka nhlomulu wawukulu va ta va ni lipfumelo ka Yehovha, va langa ku nyima na Yena loko a basisa vito la yena amisaveni hinkwayu. — Eze. 38:16.
Loko nhlomulu wawukulu se wu sungulile, . . . ku nga va swaku ku ta va ni vanhu lava va nga ta txintxa mahanyelo ya vona?
16. I yini leswi hi swi tivaka hi Yehovha? (Vona mufoto.)
16 Nkama hi nga djondza Bibele, hi djondze swaku mun’wani ni mun’wani i wa lisima ka Yehovha. Yena a hi nyike wutomi hi ku tirhisa N’wana wa yena swaku hinkwerhu hi kuma nkateko wa ku hanya wutomi la ku kala li nga heli. (Yoh. 3:16) Hinkwerhu ha li vona lirhandzu leli Yehovha a hi kombaka lona. (Esa. 49:15) Yena a hi tiva hi vito, funtshi a hi tiva ku yampsa lakakuva hambi hi fa a ta hi pfuxisa xileswi a hi tshamise xiswona a tlhela a pfuxeta mimpimiso ya hina! (Mat. 10:29-31) A hi kanakani swaku Papayi wa hina wa lirhandzu a ta yavanyisa vanhu hi ndlela yayinene ni ya timpsalu. — Yak. 2:13.
Hi nga tiyiseka swaku Yehovha a ta yavanyisa munhu mun’wani ni mun’wani hi ndlela ya ku lulama, ya wutlharhi ni hi timpsalu (Vona paragrafu 16)
17. Hi ta bula hi yini ka nhlokomhaka leyi landzelaka?
17 Leswi matwisiselo ya hina ka mhaka leyi ma nga yampsisiwa, ha swi vona swaku a ntirho wa hina wa ku chumayela i wa xihantla ku tlula minkama hinkwayu. Hi mhaka muni hi vula leswo? Naswona i mpsini swi nga hi pfunaka swaku hi tama hi chumayela mahungu ya ku tsakisa hi ku hiseka? Hi ta bula hi tinhlamulu ta swivutiso leswi ka nhlokomhaka leyi landzelaka.
LISIMU 76 Swa Tsakisa Kutirhela Yehovha!
a Swaku u tiva swin’wani hi ku txintxa loku, vona nhlokomhaka leyi nge Leyi I “Ndlela Leyi Amukeriwaka Hi Wena,” ka Murindzi wa 15 ka Março wa 2015 mapaj. 7-11 (hi Xitsonga).
b Ndzhaku ka ku helisiwa ka Babilona Wamukulu vanhu va Yehovha va ta ringiwa nkama lowu Goge na Magoge a nga ta hi hlasela. Lava va nga ta tipatsa ni vanhu va Yehovha ndzhaku ka ku helisiwa ka Babilona Wamukulu, na vona va ta ringiwa.
c NTHLAMUSELO WA MAFOTO: Mafoto manharhu lawa ma kombisaka swiyimu leswi nga ha yendlaka van’wani va nga ma twi mahungu ya ku tsakisa: 1) Wansati lweyi a tshamaka ka tiko leli swi tsimbisiwaka ku txintxa wukhongeli, 2) nuna na nsati lava tshamaka ka tiko leli swi tsimbisiwaka naswona swi nga ni nghozi ku djondza ntiyiso, 3) wanuna lweyi a tshamaka ka ndhawu ya le kule naswona swi karhataka ku fika ka yona.
d NTLHAMUSELO WA MUFOTO: Ntombhi leyi nga tshika ku tirhela Yehovha na yi khumbuka leswi yi nga tshama yi swi djondza hi ku helisiwa ka “Babilona Wamukulu.” Se yi boha ku tlhelela ka Yehovha yi tlhela yi kombela ku pfuniwa hi vapsali va yona. Se loko swo tshuka swi yendleka swa ku fana ni leswo, hi lava ku tekelela Yehovha Papayi wa hina wa timpsalu ni wa lirhandzu, naswona hi ta tsaka ni vanhu hinkwavu lava va nga ta boha ku tlhelela ka Yehovha hi nkama wolowo.
