SEMANA 19
PIREKUA 22 ¡Juue Tata Diosïri Reinu!
¿Míteskichi néna jusgarpia Tata Diosï Jeoba?
‘Tata Diosï Jeoba [...] no uékasïndi eska nema kʼamajkunhaaka’ (2 PED. 3:9).
AMBE ENGACHI JORHENGUARHIAKA
Andichisï uaa seguru jarhani eska Tata Diosï Jeoba sési jusgariauaka kʼuiripuechani.
1. ¿Ambe xáni úkuarhixaki ini jurhiatikuechani jimbo?
¡MÁMARU ambe úkuarhixati ini jurhiatikuechani jimbo! Exexakachi na engaksï kumplirikuarhini jaka Biblieri profesiecha. Pori ejemplu, exexakachi na enga norterhu anapu rei uarhiperani jaka surirhu anapu reini jingoni paraksï exeni né sánderu uinhapikua jatsiski parhakpinirhu (Dan. 11:40, nota). Ístu sánderu iauanisï aianhpinhaxati Tata Diosïiri Reinueri ambe ka uánikua joperu uánikua kʼuiripuechaksï sánderu uékasïndia marhuakuni Tata Diosïni (Is. 60:22; Mat. 24:14). Ístu, jorhendanhaxakachi Tata Diosïiri ambe enga ísïika komueskajtsïni tʼirerani jiáni engachi sánderu uétarhinchani jarhajka (Mat. 24:45-47).
2. ¿Amberiichi uaa seguru jarhani, ka ambechi jatsiski para miáni?
2 Tata Diosï Jeobajtsïni seguirixati jarhuatani parachi sánderu sési kurhanguni ambe enga úkuarhiaka no ióni jimbo (Prov. 4:18; Dan. 2:28). Para imani jurhiatikuecha jimbo engaksï kʼuiripuecha ueenaaka kánikua no sési nitamakuarhini, uaakachi seguru jarhani eskachi tʼuini míteakia ambechisï jatsi para úni parachi no jurajkuni Tata Diosïni ka parachi májku kʼéri jarhani erachiicha jingoni. Joperu uétarhisïndi miáni eska jarhaska máru ambe engachi meru no míteka. Ini jorhenguarhikua jimbo, orhetachi exeni jauaka andichisï mójtaku máru ambe engachi antesi ménderueni kurhanguenga. Tátsekuachi exeaka ambe engachi kʼóru míteka imani ambeeri enga sánderu orhepatini úkuarhiaka ka na enga uaaka ambe ma juchaari Taati auandarhu anapu.
AMBE ENGACHI NO MÍTEKA
3. ¿Ambechi uandasïreeni ióntki ka andichisï ísï eratseeni?
3 Ióntkichi uandasïreenga eska nóteru nema úpiringuia mintsikani Tata Diosï Jeobani enga na ueenakuarhipiringia ima jurhiatikua engaksï kʼuiripuecha kánikua no sési nitamakuarhiaka ka nijtu tsípiti pakarani Armajedonirhu. Ka ísïchi uandasïreenga jimbokachi eratsesïreenga eska sánderu orhepatini májkueni úkuarhiripiringa ísï eska jiáni enga Dilubiu úkuarhipka. Pori ejemplu jiáni, Tata Diosï Jeoba míkaspti puertani ante de kʼéri janini. Ka pori ísï uandani, májkueni míkaapirindi puerteechani enga na ueenapiringia kánikua no sési nitamakuarhinhani ka eska nóteru nema úpiringia tsípiti pakarani (Mat. 24:37-39).
4. ¿Andichisï nóteru uandajkia eska ambe enga úkuarhipka Noeri jurhiatikuecha jimbo profesia máespka para ini jurhiatikuechani jimbo?
4 ¿Joperu sési jarhaski eratseni eska Dilubiu profesia máeska? a Nómbe jimboka Biblia no uandasïnga eska profesia máeska. Ísïisti, Jesúsi uandaspti eska ísï eska na jánhaskuarhipka Noéri jurhiatikuechani jimbo, májkueni jánhaskuarhipiringa jiáni enga ima ixú japiringia, joperu no uandaxapti eska ambe enga xáni Dilubiurhu úkuarhipka arhikuekasïreenga ambe ma. Pori ejemplu enga Tata Diosï Jeoba ísï míkaapka arkarhu anapu puerteechani, no profesia máesti, joperu uaakachi uánikua ambe jorhenguarhini Dilubiueri ambe.
5. a) ¿Ambe úspi Noé ante de Dilubiu janoni? (Ebreu 11:7; 1 Pedru 3:20). b) ¿Néna terukuntasïni juchaari aianhpikua Noéri jingoni?
5 Jiáni enga Tata Diosï Jeoba arhipka Noéni eska ima kʼamajkuapiringa kʼuiripuechani, Noé xarhataspti eska mintsikasïreenga Tata Diosïni jimboka arkani ma úspka (arhinta je Ebreu 11:7; 1 Pedru 3:20). Májkueni, ima kʼuiripuecha engaksï kurhaajka Tata Diosïiri Reinueri ambe, jatsistiksï para úkuecha jingoni xarhatani eskaksï mintsikasïnga Tata Diosïni (Úku. 3:17-20). Pedru uandaspi eska Noé achamasï máespka enga “uandantani jámeenga ambe enga sési jaka” (2 Ped. 2:5). Joperu ísï eskachi na exekia máteru jorhenguarhikua jimbo, nóchi míteska sini Noé jánguarhintaspi iámindu kʼuiripuechani aianguani ka ístu mándani arhini ante de Dilubiu janoni. Ka ini jurhiatikuechani jimbo, juchajtuchi jánguarhintasïnga interu parhakpini aianhpini, joperu na uéjkichi xáni jánguarhintani, nóchi andajkuarhiaka iáminduechani aianguani ante de Tata Diosï kʼamajkuni parhakpini anapu ambe. ¿Andichisï ísï uandajki?
6, 7. ¿Andichisï no uaa iámindu kʼuiripuechani aianguani ambakiti aianhperakuani ante de kʼamajkunhani parhakpini anapu ambe?
6 Ju je exeni ambe enga uandapka Jesúsi nani enga jamberichi aianhpini japiringa. Ima uandaspti eska ambakiti aianhperakua ‘iámu parhakpinirhu uandanhantapiringa paraksï iámindu ireteecha mítetini jarhani’ (Mat. 24:14). Ka ini jurhiatikuechani jimbo, i profesia sánderu kumplirikuarhixatiia. Aianhpixakachi Reinueri ambe jukari 1,000 idiomecha jimbo ka pájinarhu jw.org jimbo uératini, uánikua kʼuiripuechaksï úsïndia míteni ambakiti aianhperakuani.
7 Joperu ístu Jesúsi arhiaspti imeeri chúxapatiichani: “Jimbokaksïni ji sési jimbo arhisïnga eskajtsï no andajkuarhiaka iámindu Israeliiri ireteecha jimbo jámani enga jamberi janoaka Achamasïiri Uájpa”. I ambe arhikuekasïndi eskaksï no úpiringa aianguani iámindu kʼuiripuechani ante de ima junguani (Mat. 10:23; 25:31-33). Ini jurhiatikuechani jimbo, uánikua kʼuiripuechaksï jimeesïsï anapuesti nani engachi no jurajkunhajka aianhpini. Ka ístu, mándani minutu uánikua charhakuechaksï andajpenusïndi. Ísï jimbo, na uéjkichi xáni jánguarhintani jarhani aianguani ambakiti aianhperakuani “iámindu kʼérati iretarhu anapuechani, kʼumanchikuarhu anapuechani, imeechani engaksï táchani jásï idioma uandajka ka iretarhu anapuechani”, nóchi uaaka méntku iámindu kʼuiripuechani aianguani ante de Tata Diosï kʼamajkuni parhakpini anapu ambe (Apok. 14:6).
8. ¿Ambechi úpirini eratseni? (Ístu exea je imajeniichani).
8 Ini ambe exeparini, jamberichi eratsejka: “¿Ambe úkuarhia imeecha jingoni engaksï no niáraaka kurhaani ambakiti aianhperakuani ante de kʼuiripu ueenani kánikua no sési nitamakuarhini? ¿Ambeksï uaa Tata Diosï Jeoba ka imeeri Uájpa imani kʼuiripuecha jingoni, jimboka Tata Diosï íntskuska sésikua Uájpani para jusgariuani kʼuiripuechani?” (Juanu 5:19, 22, 27; Úku. 17:31). Karakata nani enga pʼitakata jaka i jorhenguarhikua, miátantasïndijtsïni eska Tata Diosï Jeoba “no uékasïnga eska nema kʼamajkunhaaka, sino eskaksï iámindu kʼuiripuecha móantaaka” (2 Ped. 3:9; 1 Tim. 2:4). Joperu ístu, mítetixakachi eskajtsïni Tata Diosï Jeoba nótki aianguxaka ambe uaa imani kʼuiripuecha jingoni, nájkirukajtsïni no jatsika para aianguni.
¿Ambe uaa Tata Diosï Jeoba imani kʼuiripuecha jingoni engaksï no uaaka kurhaani ambakiti aianhperakuani ante de ueenani kánikua no sési nitamakuarhinhani? (Exe je párrafu 8). c
9. ¿Ambejtsïni aiangusïni Tata Diosï Jeoba Bibliani úraparini?
9 Joperu Tata Diosï Jeoba Bibliani úrasïndi parajtsïni aianguni máru ambe enga uaaka. Pori ejemplu, aiangusïndijtsïni eska tsítantauaka imani kʼuiripuechani “engaksï no kaani sési jámaka” paraksï intsïnhani sésikua paraksï jorhenguarhini ambakiti aianhperakueri ambe ka ístuksï niárani mójtakurhini (Úku. 24:15; Luk. 23:42, 43). Ka jamberi i ambe ístu úpirindi eskachi ménderu máteru ambe kurhamarhikuarhiaka enga kánikua jukaparhakueka.
10. ¿Ambechi útasï úpirini kurhamarhikuarhini?
10 ¿Ambe úkuarhia imani kʼuiripuecha jingoni engaksï imani jurhiatikuechani jimbo uarhiaka enga kʼuiripu kánikua no sési nitamakuarhini jauaka? ¿Kʼamajkunhaaksï para méntkisï ka nóteruksï méni uaaia tsíntani? Biblia uandasïndi eskaksï no tsíntaaka ima kʼuiripuecha enga Tata Diosï Jeoba ka imeeri ánjeliicha Armajedonirhu kʼamajkuauaka jimbokaksï meru no sáni uékaspka kurhajchani (2 Tes. 1:6-10). Joperu imani tiempu jimbo enga kánikua no sési nitamakuarhinhaaka, ¿ambe úkuarhia imani kʼuiripuecha jingoni engaksï desastre naturali ma jimbo úkuarhiska, aksidenti ma jimbo o jimboka máteru nema uándikuaska? (Ecl. 9:11; Zac. 14:13). ¿Máruksï niáraa tsíntani jimbokaksï imani kʼuiripuecha jingoni kuenta úkuarhisïnga “engaksï no káni sési jámaka”? Nóchi míteska ambe meru úkuarhia imeecha jingoni.
AMBE ENGACHI KʼÓRU MÍTEKA
11. ¿Ambe exea Tata Diosï Jeoba mándani kʼuiripu jimbo para úni jusgariuani Armajedonirhu?
11 Uánikua ambe jarhasti engachi míteka ima ambeeri enga sánderu orhepani úkuarhiaka. Pori ejemplu, míteskachi eska Armajedonirhu, kʼuiripuechaksï ísï kánhaaka seguni na engaksï kaapka Kristueri ermanu jémbeechani (Mat. 25:40). Ima kʼuiripuecha engaksï jarhuataapka erakukateechani ka Kristuni, ísïksï exenhaati komueska karichiicha. Ístuchi míteska eska máru Kristueri ermanuecha útasï Echerirhu jauaka jiáni enga kánikua no sési nitamakuarhinhaaka ka eskaksï auandarhu pánhantaaka sanititu ante de Armajedoni ueenakuarhini. Engaksï útasï Echerirhu jauaka máru erakukateecha, jamberiksï jauati ambakiti kʼuiripuecha engaksï ueekaaka jarhuataani ka ístu jarhuajpeni indeni ánchikuarhitarhu engaksï erakukateecha úni jaka (Mat. 25:31, 32; Apok. 12:17). ¿Andisï xáni jukaparhakue iámindu inde ambe?
12, 13. ¿Ambeksï uaa máru kʼuiripuecha engaksï exeaka eska Kʼéri Babilonia kʼamajkunhaskia?
12 Jamberi imani tiempu jimbo engaksï kʼuiripuecha kánikua no sési nitamakuarhiaka, kʼuiripuechaksï exeati eska “Kʼéri Babilonia” kʼamajkunhaskia ka miántaatiksï eskaksï Jeobaeri testiguecha ióni páxapkia uandantani eska inde ambe úkuarhipiringa. ¿Niáraaksï máru kʼuiripuecha mintsikani Tata Diosï Jeobani engaksï indeni ambe exeaka? (Apok. 17:5; Ezeq. 33:33).
13 Ju exeni ambe enga úkuarhipka Moisésiiri jurhiatikuecha jimbo. Jiáni engaksï israeliteecha Ejiptu uéakuntapka, imeecha jingonksï niraspti mámaru jásï kʼuiripuecha ka uániisptiksï (Éx. 12:38). Jamberiksï máru ueenapti mintsikani Tata Diosï Jeobani jimbokaksï exespka eskaksï ísï úkuarhispka 10 plaguecha enga Moisési uandaapka. Ka enga sáno májkueni ambe úkuarhiska jiáni enga na kʼamajkunhakia Kʼéri Babilonia, ¿no sésichi exea engajtsïni inde kʼuiripuecha jiáni jámaska kurhini ante de kʼamajkunhani parhakpini anapu ambe? ¡Nóchi jatsiska para no sési exeni! Sánderu sési, uékasïngachi ísïini eska juchaari Taati auandarhu anapu, ima Tata Diosï enga pʼamojpitiika ka “enga sési kámpijka, enga no sóntku ikiajka ka enga kánikua uékpijka ka jurhimbitiini” (Éx. 34:6). b
Máruksï exeati na enga “Kʼéri Babilonia” kʼamajkunhaaka, ka jamberiksï miántaati eskaksï Jeobaeri testiguecha ióni uandantaspkia eska inde ambe úkuarhipiringa. (Exea je párrafuechani 12 ka 13). d
14, 15. ¿Úpirinchi uandani sini kʼuiripu ma uaa irekani para méntkisï o nómbe solu míteparini na enga jatini uarhika o nani enga irekaka? (Salmo 33:4, 5).
14 Jamberijtsï kurhachakuka erachini o pirenchini ma ísï uandani imeeri familiariri ma enga no Testigueka: “Sánderuni uékapiringa eska ima tʼuini uarhipiringia ante de kánikua no sési nitamakuarhinhani para úni tsíntani”. Ka jamberijtsïni ísï arhiti jimboka sési ambe uékasïnga para imeeri familiari. Joperu ambe engachi kʼóru jatsika para mítetini jarhani, jindeesti eska na enga jatini uarhijka kʼuiripu ma, no arhikuekasïndi eska niáraaka irekani para méntkisï. Tata Diosï Jeoba jindeesti ima Juesi enga perfektueka ka ambe enga ima uandajka úni, méntkisï sési úsïndi (arhinta je Salmo 33:4, 5). Uaakachi seguru jarhani eska iámu parhakpinirhu anapu Juesi méntkisï sési ambe uaaka (Gén. 18:25).
15 Ístu, Tata Diosï Jeoba no exeati nani enga irekaka kʼuiripu ma para úni uandani sini uaa irekani para méntkisï o nómbe. Ima no méni ísï exeauati komueska “chibuecha” imani kʼuiripuechani engaksï iauanisï irekaka ka engaksï no méni kurhaaka Reinueri ambe (Mat. 25:46). Engachi jucha jukaparharaajka indeni kʼuiripuechani, seguruchi jarhaska eska iámu parhakpinirhu anapu Juesi sánderu jukaparharaasïnga. Nóchi míteska na enga uaaka ambe ma Tata Diosï Jeoba jiáni enga kánikua no sési nitamakuarhinhaaka. Jamberiksï máru kʼuiripuecha intsïnhaati sésikua paraksï míteni ka mintsikani Tata Diosïni jiáni enga ima pímbinhaxentaaka iáminduechani japarini (Ezeq. 38:16).
Jiáni engaksï kʼuiripuecha ueenaakia kánikua no sési nitamakuarhini, ¿jamberiksï máru niáraa mintsikani Tata Diosï Jeobani exeparini ambe enga úkuarhini jaka?
16. ¿Ambe ka ambechi míteski Tata Diosï Jeobaeri?
16 Juchachi jorhenguarhiskia eska Tata Diosï Jeoba kánikua jukaparharasïnga kʼuiripuni ma, ima íntspisti imeeri Uájpani parachi jucha úni irekani para méntkisï (Juanu 3:16). Niáraskachi exeni eskajtsïni Tata Diosï Jeoba sési kámasïnga ka pʼamojkuni (Is. 49:15). Ka engachi niáraska uarhini, imajtsïni ménderu ísï tsítantaati eskachi námindu jáxeka jimbokajtsïni sési sési míteska ka iámindu ambechi miántaaka (Mat. 10:29-31). Jiájkani, jatsiaskachi uánikua rasoniichani para mintsikani eska juchaari Taati auandarhu anapu kánikua sési jusgariuaka mándani kʼuiripuni ka ísï uaati jimboka ima jánhaskatiiska, sési úsïndi iámindu ambe ka pʼamojpesïndi (Sant. 2:13).
Uaakachi seguru jarhani eska Tata Diosï Jeoba sési jusgariuaka mándani kʼuiripuni jimboka ima jánhaskatiiska, iámindu ambe sési úsïndi ka pʼamojpesïndi. (Exe je párrafu 16).
17. ¿Ambechi exeni jaua máteru jorhenguarhikua jimbo?
17 Iásï engachi sánderu sési kurhangukia ini ambe, exesïngachi eska sánderu uétarhixakaia aianhpini. ¿Andichisï ísï uandajki? Ka ¿ambejtsïni jarhuataa parachi no kuatantani aianhpini ambakiti aianhperakuani? Máteru jorhenguarhikua jimbochi exeni jauaka inde ambe.
PIREKUA 76 Kánikua sési pʼikuarherasïnga
a Artikulurhu “A Jehová le gusta enseñar de forma sencilla” enga utusï jimbo uéraka rebistarhu Aianhpiri 15 de marsu de 2015 pájina 7 a 11, uaakajtsï arhintani andichisï nóteru uandajkia eskaksï máru relatuecha ísïispka komueska profesia ma.
b Enga na kʼamajkunhakia Kʼéri Babilonia, Gog de Magog tsʼéjkuauati iámindu Tata Diosïiri marhuariichani. Ka ima enga ísï tátsekua niáraska Gog de Magog jingoni úkuarhini, ístu tsʼéjkunhaati.
c AMBE ENGAKSÏ XARHATAJKA IMAJENIICHA: Tanimu imajeniicha engaksï xarhatajka andichisï no uaa méntku iámindu kʼuiripuecha aianguani Tata Diosïiri ambe: 1) Uarhiti ma jima irekasti nani engaksï sáno iámindu kʼuiripuecha no kristianueka ka kánikua úkua jukasti jimeesïsï aianhpini; 2) temungurhiri ma jima irekasti nani enga politika jimbo, nóchi újka aianhpini ka ístu kánikua úkua jukani; 3) acheeti ma jima irekasti nani enga kánikua iauaniika ka enga kánikua úkua jukaka jima nirani.
d AMBE ENGAKSÏ XARHATAJKA IMAJENIICHA: Uátsï ma enga jurajkupka jurhimbikuani, miántasïndi eska jorhenguarhispka eska Kʼéri Babilonia kʼamajkunhapiringa. Iásï ménderu uékasïndia andarhientani Tata Diosï Jeobani ka imeeri taatiicha jingoni níntani engaksï Testigueka. Engachi niáraska ini ambe exeni, ju je ísïini eska juchaari Taati auandarhu anapu ka pʼamojkuani ka tsípini jimboka no sési úri ma ménderu andarhientaskia Tata Diosï Jeobani.
