EKICWEKA KY’OKWEGA 19
Ekizina 22 Obukama Hati Nibulema—Leka Bwije!
Biki Ebitumanyire ha Mulingo Yahwe Arukwija Kucwa Omusango omu Kasumi ak’Omu Maiso?
“[Yahwe] . . . tarukugonza omuntu wena okubura.”—2 PET. 3:9.
EBITURAYEGA
Nitukigumya ngu omu kasumi ak’omu maiso Yahwe naija kucwera abantu omusango gw’okuhikirra kandi ogw’obulyo.
1. Habwaki nitusobora kugamba ngu tuli omu kasumi akarukusemeza?
TULI omu kasumi akarukusemeza! Buli kiro niturora ebintu Baibuli yabalizeeho nibihikirra. Ekyokurorraho, niturora “omukama wobukiizi bwobulyo” hamu na “omukama wobukiizi bwemoso” nibasindikangana habwokuba buli omu nagonza kulema ensi. (Dan. 11:40.) Niturora amakuru amarungi ag’Obukama bwa Ruhanga nigatebezebwa omu nsi yoona kandi obukaikuru n’obukaikuru bw’abantu nibacwamu kuheereza Yahwe. (Is. 60:22; Mat. 24:14) Kandi nitutunga ebyokulya bingi eby’omwoyo omu kasumi akahikire.—Mat. 24:45-47.
2. Kiki ekiturukugumya, baitu kiki ekitusemeriire kumanya?
2 Yahwe nagumizaamu kutukonyera kwetegereza ebintu ebikuru ebiri haihi kubaho. (Nfu. 4:18; Dan. 2:28) Nitukigumiza kimu ngu omuhito omwingi gutakatandikire, nitwija kumanya byona ebitusemeriire kumanya kusobora kugumiisiriza n’obwesigwa n’okwikara tuli omu bumu omu kasumi ako akagumire. Baitu, tusemeriire kukimanya ngu haroho n’ebintu ebitutamanyire ebirukwija kubaho omu kasumi akatali ka hara. Omu kicweka kinu nitwija kubazaaho ensonga habwaki tuhindwire omulingo tubaire nitwetegerezaamu bimu ha bintu ebiraabaho. Hanyuma nitwija kweijukyamu ebintu ebitumanyire ha busumi obw’omu maiso n’omulingo Isiitwe ow’omu iguru arakoramu ebintu.
EBINTU EBITUTAMANYIRE
3. Kiki ekitwagambire ngu kirihika h’abantu abatamanyire Ruhanga omuhito omwingi obuguratandika, kandi habwaki twatekeriize tutyo?
3 Enyumaho, tukagamba ngu omuhito omwingi obuguratandika, abantu nibaija kuba batakyaine mugisa ogw’okwikiririza omuli Yahwe, n’okukiraho Haramagedoni. Tukagamba eki habwokuba tukatekereza ngu buli muntu na buli kintu ekyabaireho ha Kusandaara kw’Amaizi bikaba nibikikirra ebintu ebiribaho omu kasumi ak’omu maiso. Ekyokurorraho, tukatekereza ngu nk’oku Yahwe yakingireho orwigi rw’elyato Okusandaara kw’Amaizi kutakatandikire, nikyo kimu na ha kutandika kw’omuhito omwingi, Ruhanga naija kukingira aheeru ensi ya Sitaani kandi abantu abandi baliba batakyasobora kujunwa.—Mat. 24:37-39.
4. Habwaki tutarukugamba ngu ebintu byona ebyabaireho omu kasumi ak’Okusandaara kw’Amaizi nibiija kuhikirizibwa omu kasumi ak’omumaiso? Soborra.
4 Kihikire kugamba ngu buli kimu ekyabaireho omu Kusandaara kw’Amaizi nikikikirra ebintu ebiribaho omu kasumi ak’omu maiso? Eky’okugarukamu kiri nangwa. Habwaki? Habw’okuba Baibuli tinikyo erukugamba. a Ky’amananu ngu Yesu akalengesaniza ‘ebiro bya Nuha’ n’akasumi ak’okubaho kwe, baitu atagambe ngu buli kimu kyona ekyabaireho omu biro bya Nuha nikiija kuhikirizibwa omu mulingo nugwo gumu omu kasumi ak’omu maiso. Ekyokurraho, Yahwe kukinga orwigi rw’eryato. Baitu kinu tikirukumanyisa ngu titusobora kwegera ha bintu ebyabaireho omu biro bya Nuha n’Okusandaara kw’Amaizi.
5. (a) Kiki Nuha ekiyakozere Okusandaara kw’Amaizi kutakabaireho? (Abaheburaniya 11:7; 1 Petero 3:20) (b) Obukirukuhika ha mulimo ogw’okutebeza, enyikara yaitu n’esisana eta n’ey’omu biro bya Nuha?
5 Nuha obuyatungire obutumwa kuruga hali Yahwe, akooleka ngu aine okwikiriza obuyayombekere eryato. (Soma Abaheburaniya 11:7; 1 Petero 3:20.) Omu mulingo nugwo gumu, abantu obubahurra amakuru amarungi ag’Obukama bwa Ruhanga, basemeriire kwoleka okwikiriza obu nibateeka omu nkora ebibeegere. (Eng. 3:17-20) Petero akeeta Nuha “omudumi wokuhikirra.” (2 Pet. 2:5) Baitu nk’oku twarozere omu kicweka ekyahoire, titumanyire Nuha obwaraaba yatandikireho kampaini ey’okutebeza buli muntu wena omu nsi Okusandaara kw’Amaizi kutakaizire. Omu kasumi kanu nitwejumbira omu mulimo ogw’okutebeza omu nsi yoona kandi nitukikora n’obwekambi. Baitu n’obuturalengaho tuta, titusobora kutebeza buli muntu omu nsi amakuru amarungi empero etakahikire. Habwaki?
6-7. Habwaki nitugamba ngu titusobora kuhikyaho buli muntu omu nsi amakuru amarungi empero etakaizire?
6 Tekerezaaho Yesu ekiyagambire ha mulimo gw’okutebeza. Akagamba ngu amakuru amarungi nigaija kutebezebwa “omunsi zona okuba kaiso hali amahanga gona.” (Mat. 24:14) Obunabbi obu buliyo nibuhikirizibwa kusumi kanu omu mulingo ogutakabahoga. Amakuru ag’Obukama gali omu ndimi ezirukuhingura 1,000, kandi kuraba ha mukura gwaitu ogwa jw.org, abantu baingi omu nsi nibahikwaho amakuru ganu.
7 Ekindi, Yesu akagambira abegeswa be ngu “timulihika okuraba omu mbuga zoona,” rundi kutebeza buli muntu, atakaizire. (Mat. 10:23; 25:31-33) Ebigambo bya Yesu nibiija kuhikirizibwa n’omu kasumi kaitu. Obukaikuru n’obukaikuru bw’abantu kasumi kanu nibaikara omu biikaro nambere omulimo gwaitu gutangirwe. Ekindi abaana baingi muno nibazaarwa buli dakiika. Nitukora kyona ekiturukusobora kuhikya amakuru amarungi h’abantu “nenganda n’endimi.” (Kus. 14:6) Baitu amananu gali ngu titusobora kuhikyaho buli muntu omu nsi amakuru amarungi empero etakaizire.
8. Kiki ekitusobora kwekaguza ha mulingo Yahwe alicweramu abantu omusango omu kasumi ak’omu maiso? (Rora n’ebisisani.)
8 Kusigikirra ha bitwabazaaho, nitusobora kwekaguza: Kiki ekirahika hali abo abaraaba batatungire omugisa ogw’okuhurra amakuru amarungi omuhito omwingi gutakatandikire? Yahwe hamu n’Omwana we, ouyahaire obusobozi obw’okucwa omusango, nibaija kucwera bata abantu omusango? (Yoh. 5:19, 22, 27; Eng 17:31) Ekyahandiikirwe ekyebembiire ekicweka kinu nikigamba ngu Yahwe “tarukugonza omuntu wena okubura.” Oihireho nagonza “bona bahike omu kwegarukamu.” (2 Pet. 3:9; 1 Tim. 2:4) Takatugambiire omulingo aracwera omusango abantu abatakatungire omugisa ogw’okuhurra amakuru amarungi. Kandi tikiri kiragiro ngu asemeriire kutugambira kyona ekyakozere rundi ekyalikora.
Kiki Yahwe ekyalikorra abo abaliba batasoboire kuhurra amakuru amarungi omuhito omwingi gutakatandikire? (Rora akacweka 8) c
9. Kiki Yahwe ekyatugambiire kuraba omu Kigambo kye?
9 Yahwe atugambiire bimu ha bintu ebyalikora kuraba omu Kigambo kye. Ekyokurorraho, Baibuli n’etugambira ngu Yahwe naija kuhumbuura “abatahikiriire” kandi abo nibo abantu abataratungire omugisa ogw’okuhurra amakuru amarungi bakahindura ha ngeso zaabo. (Eng. 24:15; Luk. 23:42, 43) Hati eki kireetaho ebikaguzo ebindi ebikuru.
10. Bikaguzo ki ebindi ebitusobora kwekaguza?
10 Boona abarafeera omu bintu ebiraabaho omu kasumi ak’omuhito omwingi, nibaija kuhwerekerra ebiro n’ebiro batatungire omugisa ogw’okuhumbuuka? Ebyahandiikirwe nibisoborra kurungi ngu abo boona abarukuhakaniza Yahwe, kandi Uwe n’ihe lye abaalihwerekereza ha bulemu bwa Haramagedoni tibarukwija kuhumbuuka. (2 Bas. 1:6-10) Baitu kandi abantu abandi, ekyokurorraho abo abaliitwa ebintu ebindi omu kasumi ak’omuhito omwingi nk’oburwaire, kukura omu myaka, butandwa rundi kwitwa abantu abandi? (Mug. 9:11; Zak. 14:13) Abantu banu nibasobora kuba bamu hali abo “abatahikiriire” abalihumbuurwa omu nsi empyaka? Titumanyire.
EBINTU EBITUMANYIRE
11. Abantu kucwerwa omusango ha Haramagedoni nikiija kusigikirra hali ki?
11 Haroho ebintu ebirukwahukana ebitumanyire ebirukukwata h’akasumi ak’omu maiso. Ekyokurorraho, nitukimanya ngu ha bulemu bwa Haramagedoni, abantu nibaija kucwerwa omusango kusigikirra ha mulingo batwaizemu bagenzi ba Kristo. (Mat. 25:40) Abo abalicwerwa omusango nk’entaama nubo abaayolekere obusagiki bwabo hali abaseserweho amagita na Kristo. Ekindi, nitukimanya ngu bamu ha bagenzi ba Kristo baliba bakyali omu nsi hanyuma y’omuhito omwingi kutandika kandi nibaija kutwarwa omu iguru nihaburayo kacu kake obulemu bwa Haramagedoni butandike. Akasumi bagenzi ba Kristo baraaba bakyali omu nsi, nikisoboka ngu abantu abamu abaine emitima emirungi nibaija kubasagika kandi basagike n’omulimo ogubarukukora. (Mat. 25:31, 32; Kus. 12:17) Habwaki ensonga zinu nkuru?
12-13. Abantu abamu nibaija kwetwaza bata hanyuma y’okurora okuhwerekerezebwa kwa “Baburoni Orukuru”? (Rora n’ebisisani.)
12 Nahanyuma y’omuhito omwingi kutandika, nikisobora kuba ngu bamu h’abantu abaararora okuhwerekerezebwa kwa “Baburoni Orukuru” nibaija kwijuka ngu Abakaiso ba Yahwe bamazire emyaka nibabazaaho ekintu kinu. Nikisoboka ngu bamu h’abararora okuhwerekerezebwa kwa “Baburoni Orukuru” omu muhito omwingi nibaija kutandika okwikiririza omuli Yahwe?—Kus. 17:5; Ez. 33:33.
13 Kakuba eki kibaho, nikiija kuba nikisisana n’eki ekyabaireho omu ihanga lya Misiri omu biro bya Musa. Ijuka ngu “ekitebe kyabanyaihanga” kiketeranizaaho Abaisaleri obu baali nibaruga Misiri. Bamu h’abantu abo baali batandikire kwoleka okwikiriza obubarozere okuhabura kwa Musa ha Mihito Ikumi eyahikiriziibwe. (Kurug. 12:38) Kakuba ekintu nk’eki kibaho hanyuma y’okuhwerekerezebwa kwa “Baburoni Orukuru,” turatekereza ngu tikiri ky’obwinganiza abantu abandi kutweteranizaaho nihaburayo akaire kake empero ehike? Eki tinikwo kiri! Nitugonza kuba nka Isiitwe ow’omu Iguru, anyakuli Ruhanga owaijwire “okuganyira kandi wembabazi, aikaraho okutabihirwa asagire ebyokuganyira namazima.” b—Kurug. 34:6.
Abamu abalirora okuhwerekerezebwa kwa “Baburoni Orukuru” baliijuka ngu Abakaiso ba Yahwe bamazire emyaka nibabazaaho ekintu kinu (Rora obucweka 12-13) d
14-15. Omuntu kutunga omugisa ogw’okwomeera ebiro n’ebiro nikisigikirra nidi obuyafiire, rundi nambere arukwikara? Soborra. (Zabuli 33:4, 5)
14 Obwire obumu, tuhurra ab’oruganda na banyaanya itwe nibagamba ngu, “kirungi omunyabuzaale wange kufa omuhito omwingi gutakatandikire habwokuba naija kuba aine okunihira okw’okuhumbuuka.” Busaho kugurukyagurukya, ebigambo ebi biine ekigendererwa ekirungi. Baitu omuntu kwomeera ebiro n’ebiro tikirukusigikirra nidi omuntu ogu obwarafa. Yahwe ali mucwi w’emisango ow’ahikiriire—encwamu ze ziba z’okuhikirra kandi z’obulyo. (Soma Zabuli 33:4, 5.) Nitukigumiza kimu ngu “[Omucwi] wemisango yensi zoona” naija kukora ekihikire.—Kub. 18:25.
15 Kandi kihikire kugamba ngu omuntu kutunga omugisa ogw’okwomeera ebiro n’ebiro tikirukwija kusigikirra nambere arukwikara. Yahwe tasobora kucwera omusango obukaikuru n’obukaikuru obw’abantu abarukwikara omu biikaro nambere batasobora kutunga omugisa ogw’okuhurra amakuru amarungi “nk’emburabuzi.” (Mat. 25:46) Omucwi w’emisango y’ensi zoona ow’ahikiriire n’afaaho abantu banu kukira itwe. Titumanyire omulingo Yahwe arakoramu ebintu omu muhito omwingi. Obundi bamu h’abantu nibaija kutunga omugisa gw’okwegaho Yahwe kandi bakamwikiririzaamu obwaliba namanyisa ibara lye omu nsi yoona.—Ez. 38:16.
Hanyuma y’omuhito omwingi kutandika, . . . nikisoboka kuba ngu abantu abamu abalirora ebintu binu nibibaho balitandika okwiririza omuli Yahwe?
16. Biki ebiturukumanya hali Yahwe? (Rora n’ekisisani.)
16 Kuruga omu kwesomesa Baibuli, nitukimanya ngu obwomeezi bw’abantu bw’omuhendo muno hali Yahwe. Akahayo obwomeezi bw’Omwana we nukwo itwena tutunge okunihira okw’okwomeera ebiro n’ebiro. (Yoh. 3:16) Itwena tweroliire omulingo Yahwe atugonza. (Is. 49:15) Namanya ibara lya buli omu haliitwe. Natumanya kurungi muno kuhika ha rulengo ngu n’obutwakufa, nasobora kutuhumbuura habwokuba naijuka buli kimu kyona ekirukutukwataho n’ebintu byona ebiturukwijuka! (Mat. 10:29-31) Mali twine ensonga enungi habwaki nitukigumya ngu Isiitwe ow’omu iguru ow’okugonza naija kucwera buli omu omusango omu mulingo ogw’obwinganiza kandi ogw’embabazi.—Yak. 2:13.
Nitusobora kukigumya ngu Yahwe naija kucwera buli omu omusango omu mulingo ogw’obwinganiza, ogw’okuhikirra kandi ogw’embabazi (Rora akacweka 16)
17. Nitwija kubazaaho ki omu kicweka ekirukuhonderaho?
17 Amananu gali ngu enyetegereza zinu empyaka ziretera omulimo gwaitu ogw’okutebeza kuba mukuru muno kukira na kara. Habwaki nitugamba tuti? Kandi kiki ekitwekambisa kugumizaamu nitutebeza amakuru amarungi n’obwekambi? Nitwija kubazaaho eby’okugarukamu eby’ebikaguzo binu omu bwijwire omu kicweka ekirukuhonderaho.
EKIZINA 76 Oyehurra Ota?
a Kumanya habwaki empindahinduka enu yakozerwe, rora ekicweka “This Is the Way You Approved” omu Watchtower eya Maaci 15, 2015, orupapura. 7-11.
b Hanyuma y’okuhwerekerezebwa kwa Baburoni Orukuru, abaheereza ba Yahwe boona nibaija kulengwa omu kutaahirra kwa Gogi owa Magogi. Omuntu wena ow’alyeteranizaaho abantu ba Ruhanga hanyuma y’okuhwerekerezebwa kwa Baburoni Orukuru nauwe naija kulengwa.
c KUSOBORRA EBISISANI: Ebisisani bisatu ebirukwoleka habwaki bamu nibasobora kutahikwaho amakuru amarungi: (1) Omukazi naikara nambere ediini ey’ekiikaro ekifoora ky’akabi kutebezaayo, (2) abaswerangaine nibaikara omu ihanga nambere eby’obulemi ebiroho bifoora okutebeza kuba ekintu ekirukucwa ebiragiro kandi eky’akabi, (3) omusaija naikara omu kiikaro eky’omu kyaro muno nambere kitanguhire kuhika.
d KUSOBORRA EKISISANI: omukazi ayarugire omu mananu aijuka ebiyayegere ha kuhwerekerezebwa kwa “Baburoni Orukuru.” Ahinduka kandi agaruka hali bazaire be Abakristaayo. Kakuba ebintu nk’ebi bibaho, nitugonza kuba nka Isiitwe ow’omu iguru ow’embabazi kandi ow’arukusaalirirwa abandi.
