1. Kaia e mafai o fai atu tatou me ko ‵nofo tatou i taimi fakafiafia?

 KO OLA tatou i taimi fakafiafia! I aso takitasi e lavea faeloa ne tatou ki ‵tou mata te fakataunuga o valoaga i te Tusi Tapu. E pelā mo te mea tenei, ko lavea ne tatou a “te tupu i te feitu ki mātū” mo “te tupu i te feitu ki saute” e fakatau‵fai ke pule atu ki te lalolagi. (Tani. 11:​40, fml.) Ko lavea ne tatou a te tala ‵lei o te Malo o te Atua ko folafola atu i te lalolagi kātoa, kae e lau i miliona a tino ko ‵saga tonu mai ki ei. (Isa. 60:22; Mata. 24:14) Kae ko maua foki ne tatou a meakai faka-te-agaga e uke “i te taimi tonu.”—Mata. 24:​45-47.

2. Se a te mea e mafai o mautinoa i a tatou, kae ne a mea e ‵tau o masaua ne tatou?

² E fesoasoani mai eiloa a Ieova ke malamalama faka‵lei tatou i mea tāua ka ‵tupu i aso mai mua. (Faata. 4:18; Tani. 2:28) E mafai o mautinoa i a tatou me kafai ko kamata te fakalavelave lasi, ka iloa ei ne tatou a mea e ‵tau o iloa ne tatou ke kufaki mo te fakamaoni kae ke manuia foki i te taimi faigata tenā. Kae ke masaua me e isi ne mea e se iloa eiloa ne tatou e uiga ki aso mai mua. Ka sau‵tala tatou i te mataupu tenei ki pogai ne fakama‵fuli ei ne tatou a fakamatalaga ki nisi mea ‵tupu konā. Ka oti ko onoono tatou ki nisi mea kolā e iloa ne tatou e uiga ki aso mai mua mo te auala ka saga atu ei te ‵tou Tamana i te lagi ki ei.

 MEA E SE ILOA NE TATOU

3. Ne a pati ne fai atu ne tatou e uiga ki te taimi ka ‵pono ei ne Ieova te avanoaga mō tino ke ‵kau mai ki a tatou, kae kaia ne fai ei ne tatou te fakaikuga tenā?

³ I aso mua, ne fai atu tatou me i te taimi eiloa e kamata ei te fakalavelave lasi, e seai se tino sē talitonu e mafai o kau ki a Ieova kae sao atu i Amaketo. Ne fai ne tatou te fakaikuga tenā ona ko ‵tou malamalama me i mea ne ‵tupu i te Lolo e fakaata mai ei a mea ka ‵tupu i aso fakamuli. E pelā me se fakaakoakoga, ne fai atu tatou me e pelā loa mo Ieova ne ‵pono ne ia te mataloa o te vaka mai mua o ‵to te vaiua i te taimi o te Lolo, ka “‵pono foki ne ia te mataloa” i te kamataga o te fakalavelave lasi ki tino i te lalolagi a Satani, ko se toe ai ei se tino e mafai o sao.—Mata. 24:​37-39.

4. E mata, e ‵kilo atu tatou ki te tala o te Lolo e pelā me fakaata mai i ei a mea liki‵liki ka ‵tupu i aso mai mua? Fakamatala mai.

⁴ E mata, e ‵tau o ‵kilo atu tatou ki so se mea ne tupu i te Lolo pelā me fakaata mai ei se mea ka tupu i aso mai mua? Te tali ki ei ko te ikai. Kaia? Me seai se mea e fakaasi ‵tonu mai i te Tusi Tapu e uiga ki ei. a Ne fakapau‵pau ne Iesu a “aso o Noa” ki te taimi ka fakatasi mai ei a ia, kae ne seki fai mai a ia me i mea liki‵liki ne ‵tupu i te taimi o te Lolo e fakaata mai ei a mea ka ‵tupu i aso mai mua e pelā mo te ‵ponoga o te mataloa o te vaka. E se fakauiga i ei, me e seai ne akoakoga e mafai o tauloto ne tatou mai te tala o Noa mo te Lolo.

5. (a) Se a te galuega ne fai ne Noa mai mua o te Lolo? (Epelu 11:7; 1 Petelu 3:20) (e) E ‵pau pefea ‵tou tulaga i aso nei mo aso o Noa e uiga ki te faiga o te galuega talai?

 ⁵ I te lagonaga ne Noa te faka‵pulaga a Ieova, ne fakaasi atu ne ia tena fakatuanaki mai te gasue o faite te vaka. (Faitau te Epelu 11:7; 1 Petelu 3:20.) E penā foki a tino kolā e lagona ne latou te tala ‵lei e uiga ki te Malo o te Atua e ‵tau o ga‵sue latou o fai a mea ne lagona ne latou. (Galu. 3:​17-20) Ne taku ne Petelu a Noa me se “tino talai o te amiotonu.” (2 Pe. 2:5) Kae e pelā mo mea ne sau‵tala ki ei i te mataupu mai mua, e se iloa ne tatou me isi se galuega talai lasi ne fai ne Noa ke oko atu a ia ki tino katoa mai mua o te Lolo io me ikai. I aso nei, e aofia tatou i te faiga o te galuega talai i te lalolagi kātoa, kae ma‵nako tatou ke ‵kau atu mo te loto finafinau ki ei. Kae faitalia a taumafaiga e uke e fai ne tatou, e se mafai o oko atu tatou mo te tala ‵lei ki tino katoa i te lalolagi mai mua o oko mai te gataga. Kaia?

6-7. Kaia e mafai ei o fai atu tatou me ka se mafai o fakaoko atu te tala ‵lei ki tino katoa i te lalolagi mai mua o oko mai te gataga? Fakamatala mai.

⁶ Mafaufau ki pati ne fai mai ne Iesu e uiga ki te lasi o te galuega talai e fai ne tatou. Ne ‵valo mai a ia me i te tala ‵lei ka talai atu “ki te lalolagi nofoaki kātoa mo fai se molimau ki atufenua katoa.” (Mata. 24:14) Ko lavea faka‵lei atu te fakataunuga o te valoaga tenei i aso nei i lō aso mua. Ko oti ne ‵lomi te fekau o te Malo i ‵gana e silia atu mo te 1,000, kae e auala i te fakatuatusi i te itaneti ko te jw.org, ko mafai foki o maua ne te tokoukega o tino i te lalolagi a te fekau tenā.

⁷ Kae ne fai atu foki a Iesu ki ana soko me “ka se mafai o palele i a [latou] a fakai katoa,” io me talai atu ki tino katoa, a koi tuai o vau a ia. (Mata. 10:23; 25:​31-33) Ka lavea atu foki te ‵tonu o pati a Iesu i ‵tou aso nei. E ‵nofo atu te fia miliona o tino i aso nei i koga kolā e fakatapu i ei te galuega talai. E se gata i ei, e fia selau a pepe e fa‵nau i minute takitasi. A te ‵tonuga loa, e se mafai o fakaoko atu ne tatou a te tala ‵lei ki tino taki tokotasi katoa i te lalolagi mai mua o oko mai te gataga, faitalia me fai ne tatou te ‵toe mea e mafai ke talai atu te tala ‵lei ki tino mai “atufenua mo matakāiga mo ‵gana” katoa.—Faka. 14:6.

8. Se a te fesili e mafai o fesili ne tatou e uiga ki fakamasinoga a Ieova i aso mai mua? (Onoono foki ki ata.)

⁸ Tela la, ko sae aka ei te fesili tenei: Kae pefea la a tino kolā e seki maua ne latou te avanoaga ke faka‵logo ki te tala ‵lei mai mua o oko mai te fakalavelave lasi? Ne a mea ka fai ne Ieova mo tena Tama, telā ne ‵tofi aka ke fai ne ia te fakamasinoga o latou? (Ioa. 5:​19, 22, 27; Galu. 17:31) A te tusi siki fakavae o te mataupu tenei e fakaasi mai me i a Ieova “e se manako . . . ke fakaseai se tino e tokotasi.” E manako malosi a ia ke “sala‵mo a tino katoa.” (2 Pe. 3:9; 1 Timo. 2:4) E tiga loa ko iloa ne tatou a mea konei e uiga ki a Ieova, kae e seki fakailoa mai loa ne ia te auala ka fakamasino ne ia a tino kolā e seki lagona ne latou te tala ‵lei. Kae iloa ne tatou me e se manakogina ke fakailoa mai ne ia so se mea ne fai io me ka fai ne ia.

9. Ne a mea ko oti ne fakaasi mai ne Ieova ki a tatou i te Tusi Tapu?

⁹ Ko oti ne fakaasi mai ne Ieova i loto i tena Muna a nisi mea kolā ka fai ne ia. E pelā mo te mea tenei, e fai mai i te Tusi Tapu me ka toe faka‵tu aka ne Ieova a tino “sē amio‵tonu” kolā e seki maua ne latou te avanoaga ke tauloto ki te tala ‵lei kae ‵fuli olotou faifaiga. (Galu. 24:15; Luka 23:​42, 43) Tenā ko ‵sae aka ei a nisi fesili tāua.

10. Ne a nisi fesili e mafai o ‵sae aka?

¹⁰ E mata, a tino katoa kolā e ‵mate i te taimi o te fakalavelave lasi ka fakaseai atu eiloa ki te se-gata-mai e aunoa mo se fakamoemoega ke  toe faka‵tu aka? E fakaasi manino mai i te Tusi Tapu me i tino kolā e ‵teke tonu mai, kolā ka fakaseai ne Ieova i Amaketo, ka se toe faka‵tu aka. (2 Tesa. 1:​6-10) Kae pefea a nisi tino, kolā kāti e ‵mate ona ko fakalavelave o te natula, fakalavelave ‵tupu fakafuasei, io me tamate ne nisi tino? (Fai. 9:11; Saka. 14:13) E mata, e mafai o aofia a nisi tino konei i tino “sē amio‵tonu” kolā ka faka‵tu aka ki te lalolagi fou? E se iloa tonu ne tatou te mea tenā.

MEA E ILOA NE TATOU

11. Se a te mea ka fakavae ki ei te fakamasinoga o tino i Amaketo?

¹¹ E isi ne nai mea e iloa ne tatou e uiga ki mea ka ‵tupu i aso mai mua. E pelā mo te auala ka fakamasino ei a tino i Amaketo, e iloa ne tatou me ka fakamasino latou e ‵tusa mo olotou faifaiga ne fai ki taina o Keliso. (Mata. 25:40) A tino kolā e fakamasino pelā me ne mamoe ko latou kolā ne ‵lago ki te kau fakaekegina mo Keliso. E iloa foki ne tatou me i nisi taina o Keliso koi ‵nofo eiloa i te lalolagi mai tua o te kamataga o te fakalavelave lasi kae ka olo ki te lagi mai mua malie eiloa o Amaketo. I te taimi koi ‵nofo ei a taina o Keliso i te lalolagi, e mafai eiloa o maua ne tino loto ‵lei a te avanoaga ke ‵lago atu ki a latou mo te galuega e fai ne latou. (Mata. 25:​31, 32; Faka. 12:17) Kaia e tāua ei a manatu ‵tonu konā?

12-13. Kāti ka ‵saga mai pefea a nisi tino māfai ko lavea ne latou te fakaseaiatuga o “Papelonia te Sili”? (Onoono foki ki ata.)

¹² Kafai foki loa ko oti ne kamata te fakalavelave lasi, e mafai eiloa o masaua ne tino kolā ne lavea ne latou te fakaseaiga o “Papelonia te Sili” me ko leva ne talai atu ne Molimau a Ieova a te mea tenei. E mata, e mafai o ‵fuli a loto o tino kolā e lavea ne latou a mea konei ko ‵tupu?—Faka. 17:5; Eseki. 33:33.

¹³ Kafai tenā te mea ka tupu ko ‵pau ei mo te mea ne tupu i Aikupito i aso o Mose. Masaua me “e tokouke foki a tino valevale” ne olo fakatasi mo tino Isalaelu i te tiakinaga ne latou a Aikupito. Kāti ne fatoa kamata o ati aka ne tino konei te fakatuanaki i te taimi ne lavea ne latou a te fakataunuga o pati a Mose e auala i Mala e Sefulu. (Eso. 12:38) Kafai e  tupu se mea penā mai tua o te fakaseaiatuga o Papelonia te Sili, e mata, ka fanoa‵noa tatou me mafai o ‵kau mai a tino ki a tatou mai mua malie eiloa o oko mai te gataga? Ikai! E ma‵nako tatou o fakaakoako ki uiga o te ‵tou Tamana i te lagi, “te Atua alofa fakamagalo kae alofa atafai, e tuai o ita kae ‵fonu i te alofa fakamaoni mo te munatonu.” b—Eso. 34:6.

14-15. E mata, a te fakamoemoega o se tino ke ola ki te se-gata-mai i aso mai mua e fakalagolago ki te taimi ne mate ei a ia io me ko te koga ne ola ei a ia? Fakamatala mai. (Salamo 33:​4, 5)

¹⁴ Nisi taimi, e lagona ne tatou a tino e fai penei, “E ‵lei atu ke mate toku kāiga mai mua o kamata te fakalavelave lasi ko te mea ke isi sena fakamoemoega ke toetu mai.” E fakaasi mai i vaegā pati penā a te alofa o te tino. Kae ko te fakamoemoega o te tino tenā ke ola ki te se-gata-mai i aso mai mua e se fakalagolago ki te taimi ne mate ei a ia. A Ieova ko te Famasino ‵lei katoatoa—e fai ne ia a fakaikuga ‵tonu kae amio‵tonu. (Faitau te Salamo 33:​4, 5.) E tali‵tonu katoatoa tatou me ka fai eiloa ne “te Famasino o te lalolagi kātoa” a te mea tonu.—Kene. 18:25.

¹⁵ Se mea ‵lei foki ke fakaiku aka me i te fakamoemoega o te tino ke ola ki te se-gata-mai i aso mai mua e se fakalagolago ki te koga e ola a ia i ei. E se taitai eiloa o taku ne Ieova me ne “kouti” a te fia miliona o tino e ola i fenua kolā e seki maua ne latou te avanoaga ke fakalogo‵logo ki te fekau o te Malo. (Mata. 25:46) E sili fakafia atu te alofa atafai o te Famasino  o te lalolagi kātoa ki tino taki tokotasi konei i lō tatou ki a latou. E se iloa ne tatou me ka fai pefea ne Ieova a mea kolā ka ‵tupu i te fakalavelave lasi. Kāti ka mafai o maua ne nisi tino konei a te avanoaga ke tauloto e uiga ki a ia, ke fakatuanaki ki a ia, kae ‵tu i te feitu o Ieova māfai ko fakamaluga aka ne ia a ia eiloa i mua o atufenua katoa.—Eseki. 38:16.

16. Ne a mea ko iloa ne tatou e uiga ki a Ieova? (Onoono foki ki te ata.)

¹⁶ E auala i ‵tou sukesukega ki te Tusi Tapu, ko iloa ne tatou a te lasi o te fakatāua ne Ieova a te ola o te tino. Ne tuku mai ne ia te ola o tena Tama ko te mea ke mafai o maua ne tatou katoa a te fakamoemoega ke ola ki te se-gata-mai. (Ioa. 3:16) Ko oti ne lavea ne tatou katoa a te alofa atafai o Ieova. (Isa. 49:15) E iloa ne ia a igoa o tatou taki tokotasi. A te tonuga loa, ona ko te iloa faka‵lei ne ia a tatou taki tokotasi, tela la, kafai e ‵mate tatou e mafai fua o toe faka‵tu aka ne ia tatou me masaua ne ia a fakamatalaga liki‵liki e uiga ki a tatou mo mea katoa i ‵tou mafaufau! (Mata. 10:​29-31) Tela la, e uke a pogai ko maua ne tatou ke tali‵tonu me ka ‵lei katoatoa te fakamasinoga a te ‵tou Tamana alofa i te lagi ki tino taki tokotasi me i a ia e poto, amiotonu, kae alofa fakamagalo.—Iako. 2:13.

17. Ne a mea ka sau‵tala tatou ki ei i te suā mataupu?

¹⁷ A fakamainaga maea konei ko fai ei ke fakava‵vave eiloa te faiga o te ‵tou galuega talai i lō aso mua. Kaia e fai atu tatou penā? Kae ne a mea ka fakamalosi aka ei tatou ke tumau te talai atu te tala ‵lei e aunoa mo te ‵fiu? Ka sau‵tala tatou ki tali o fesili konei i te suā mataupu.