ӨӨРЕНИР СТАТЬЯ 19
ЫРЫ 22 Бурганның Чагыргазы чедип келзин!
Иегова коргунчуг хилинчек үезинде кижилерни канчаар шиидер?
«[Иегова] кымның-даа өлүп чидерин күзевейн... турар-дыр» (2 ПЕТ. 3:9).
КОЛ БОДАЛ
Иегованың коргунчуг хилинчек үезинде шииткелдери чөптүг база шынныг болурунга чүге бүзүреп болур бис?
1. Бисти чүге кайгамчыктыг үеде чурттап турар деп болур?
БИСТИҢ үевис дыка кайгамчык! Хүн бүрүде караавыска библейжи медеглелдер күүсеттинип турар. Чижээ, соңгу болгаш мурнуу хааннарның делегейни чагырар дээш демисели (Дан. 11:40). Бурганның Чагыргазының дугайында өөрүшкүлүг медээ туруп көрбээн хемчээлге тараттынып, ону сая-сая улустуң хүлээп алганын база хайгаарап турар бис (Иса. 60:22; Мф. 24:14). Бурган-биле найыралывысты быжыглаар ном-дептерни үе-шаанда элбээ-биле ап турар бис (Мф. 24:45—47).
2. Удавас келир үеге хамаарыштыр бүгүдени билбес-даа болзувусса, чүү чүвеге бүзүрелдиг бис?
2 Иегова чоокку келир үениң болуушкуннарын чоорту ажыдып турар (У. ч. 4:18; Дан. 2:28). Чамдыызын амдыызында билбес бис. Ынчалза-даа коргунчуг хилинчек үезинде, ол амыр эвес шагда, шынчы болгаш демниг артарынга бүгү херек чүүлдү Бурган ажыдып бээр деп чигзинмес бис. Бо статьяга баштай коргунчуг хилинчек дугайында билиишкинивисти чүге эде көргенивисти сайгарар бис. А ооң соонда келир үеге хамаарыштыр чүнү билиривисти база дээрде Адавыс канчаар хөделирин чугаалажыр бис.
ЧҮНҮ БИЛБЕС БИС?
3. Чүге кижилерге Иегованың чонунга каттыжар арга чок апаар деп бодалдыг турган бис?
3 Коргунчуг хилинчек эгелей бээрге, Иегованың Херечизи эвес улуска Бурганның чонунга каттыжып, Армагеддонга дириг артары болдунмас дээр турган бис. Чүге дизе Нойнуң үезинде суг халавын келир болуушкуннарның өттүр билген үлегер-чижээ деп бодаан бис. Чижээ, суг халавының бетинде Иегова бажың-хемениң эжиин хаапкан. Шак ынчаар коргунчуг хилинчектиң эгезинде Бурган доора уткалыг эжикти хааптарга, кымның-даа камгаланыр аргазы чок болур деп санап турган бис (Мф. 24:37—39).
4. Суг халавын амгы үеде өттүр медеглелдиг үлегер-чижек деп санаар бис бе? Тайылбырлаптыңар.
4 Суг халавын үлегер-чижек деп болур бе? Чок, чүге дизе библейжи үндезин чок a. Иисус «Нойнуң үезин» бодунуң кээр үезинге шынап-ла деңнээн. Ынчалза-даа суг халавының болуушкуннары келир үеде улуг хемчээлге күүсеттинерин ол чугаалаваан. Иегованың бажың-хемениң эжиин хаапканын база үлегер-чижек дивээн. Ындыг-даа бол, суг халавының дугайында медээден ажыктыг чүүлге өөренип ап болур бис.
5. а) Суг халавының мурнунда Ной бүзүрелин канчаар илереткен? (Еврейлерге 11:7; 1 Пётр 3:20, Чаа делегей). б) Суртаал ажылы Нойнуң бараалгалынга чүзү-биле дөмей?
5 Ной Иегованың сагындырыынга бүзүрелин илередип, бажың-хемени туткан. (Номчуптуңар: Еврейлерге 11:7; 1 Пётр 3:20, Чаа делегей.) Шак ынчаар бөгүн база улус Бургандан өөрүшкүлүг медээни дыңнааш, аңаа дүүштүр хөделир ужурлуг (Аж.-ч. 3:17—20). Пётр Нойну «чөптүг-шынныг чорукту суртаалдаан» дээн (2 Пет. 2:5). Оон алырга, Ной калбаа-биле кижи бүрүзүнге медеглээн бе? Ону билбезивисти эрткен статьяга көрген бис. Чагырга дугайында медээ бөгүн бүгү делегейде дыңналып турар. Ынчалза-даа төнчү кээрге чедир кайы хире-даа күш үндүрер болзувусса, делегейде кижи бүрүзү-биле чугаалажып шыдавас бис. Чүге?
6, 7. Төнчү келирге чедир, өөрүшкүлүг медээни черде кижи бүрүзүнге чедирери чүге болдунмас деп болур?
6 Суртаал ажылының кайы хире нептерээринге хамаарыштыр Иисустуң сөстерин көрүптээлиңер. Ол: «Дээрниң Чагыргазының дугайында бо Буянныг Медээни бүгү делегейге, хамык чоннарга медеглээн турар» деп баш удур сөглеп каан (Мф. 24:14). Ол медеглел кажан-даа туруп көрбээн хемчээлде күүсеттинип турар. JW.ORG сайттың ачызында Чагырга дугайында медээни 1 000 ажыг дылдарда черниң чурттакчыларының хөй кезии дыңнап болур.
7 Оон аңгыда, ол келбээнде өөреникчилери «хамык хоорайларны эргий кезип», кижи бүрүзү-биле чугаалажып четтикпес деп, Иисус чугаалаан (Мф. 10:23; 25:31—33). Ол сөстер бистиң үевиске база хамааржыр. Сая-сая кижилер суртаал ажылын шыңгыы кызыгаарлап каан черлерде чурттап чоруур. Минута бүрүзүнде чүс-чүс ажы-төл төрүттүнүп турар. Бис «янзы-бүрү дылдарлыг сөөк-язы, аймак-чон бүгүдезинге» өөрүшкүлүг медээни үлежир дээш, болдунар-ла чүүлдү кылып турар бис (Ажыд. 14:6). Ынчалза-даа канчап-даа кээрге, ол медээни төнчү келирге чедир кижи бүрүзүнге чедирери болдунмас.
8. Иегованың келир үеде шииткелинге хамаарыштыр кандыг айтырыглар тыптып болур? (Чурукту база көрүңер.)
8 Ынчангаш айтырыглар тыптып кээр: «Коргунчуг хилинчектиң мурнунда өөрүшкүлүг медээни дыңнаваан улус-биле чүү болур? Иегова биле Иисус оларны канчаар шиидер?» (Ин. 5:19, 22, 27; Аж.-ч. 17:31). Бо статьяның кол шүлүүнде Иегованы кымның-даа өлүп чидерин күзевес дээн. Харын-даа Бурган «бүгү улустуң бачыдын миннип» кээрин күзээр (2 Пет. 3:9; 1 Тим. 2:4). Ынчалза-даа бис өөрүшкүлүг медээни дыңнаар аргазы чок улусту канчаар шиидерин билбес бис. Иегова ону амдыызында ажытпаан. Ооң бүгү херектерин биске чугаалаары албан эвес болгай.
Коргунчуг хилинчектиң бетинде өөрүшкүлүг медээни дыңнаар аргазы чок болган улусту Иегова канчаар шиидер? (абзац 8). c
9. Библия таварыштыр Иегова биске чүнү ажыткан?
9 Ынчалза-даа Иегованың кылыр деп турар ажыл-херээн чамдыызын билир бис. Чижээ, өөрүшкүлүг медээни дыңнааш, өскерлип алыр аргазы турбаан «шынчы эвес» улусту диргизерин Библияга ол ажыдып каан (Аж.-ч. 24:15; Лк. 23:42, 43). Аңаа хамаарыштыр өске чугула айтырыглар база тыптып кээр.
10. Оон ыңай кандыг айтырыглар тыптып болур?
10 Коргунчуг хилинчек үезинде чок апарган улус идегел чокка кезээ мөңгеде узуткаттырар бе? Библияда Иегованың аг-шерииниң Армагеддонга узуткаар удурланыкчылары дирилбес дээн (2 Фес. 1:6—10). Ынчалза-даа коргунчуг хилинчек үезинде аарыгдан, озал-ондактан азы кижи холундан чок болган улус дугайында чүү деп болур? (Эккл. 9:11; Зах. 14:13). Оларның чамдыызы чаа делегейге дирлип кээр «шынчы эвес улустуң» аразында бе? Ол айтырыгларга харыы бисте чок.
ЧҮНҮ БИЛИР БИС?
11. Иисустуң Армагеддонга кижилерни шиидер үндезини чүде?
11 Чогум чамдык чүүлдү билир бис. Чижээ, Иисус Армагеддон үезинде кижилерни ха-дуңмазынга хамаарылгазын көрүп, шиидери билдингир (Мф. 25:40). Иисус биле ооң ха-дуңмазын деткип чораан улусту хойлар кылдыр чарлаар. А Христостуң ха-дуңмазының чамдыызы коргунчуг хилинчектиң эгезинде кезек үе ишти черге чурттаар, оон Армагеддоннуң бичии-ле бетинде дээрже үне бээрин база билир бис. Христостуң ха-дуңмазы дээрже чорбаанда, биче сеткилдиг улус оларның ажыл-херээн деткиир аргалыг болуру чадапчок (Мф. 25:31, 32; Ажыд. 12:17). Ону билири чүге чугула?
12, 13. «Өндүр улуг Вавилоннуң» узуткаашкынын көргеш, чамдык улус кандыг базым кылыр чадавас? (Чурукту база көрүңер.)
12 Коргунчуг хилинчек «Өндүр улуг Вавилоннуң» узуткаашкыны-биле эгелээрин билир бис. Ынчан чамдык улус Иегованың Херечилери ону шагда-ла чугаалап турганын сактып кээр чадавас. Ону көргеш, Иегованың талазын шилип алыр кижилер турар бе? (Ажыд. 17:5; Иез. 33:33).
13 Моисейниң үезинде болуушкуннарны сактып кээли. Израильчилер-биле кады Египеттен «янзы-бүрү аймак-сөөктүг хөй улус» үнген (Хост. 12:38). Оларның чамдыызы Моисейниң он шииткелиниң күүсеттингенин көргеш, Иеговага бүзүрей берген чадавас. Ол ышкаш Өндүр улуг Вавилоннуң узуткаашкыны болуп турда, Армагеддон бетинде биске улус каттыжып кээр болза, муңгараар бис бе? Чок, болбайн канчаар! Бис дээрде «энерелдиг, кээргээчел, шыдамыккай, бүзүрелдиг болгаш бердинген ынакшыл-биле долган Бурган» Адавыс дег болуксаар бис (Хост. 34:6, Чаа делегей) b.
«Өндүр улуг Вавилоннуң» узуткаашкынын көргеш, чамдык улус Иегованың Херечилери ону шагда-ла чугаалап турганын сактып кээр чадавас (абзац 12, 13). d
14, 15. Келир үеде мөңге чуртталга кижиниң кажан өлгенинден азы кайда чурттап чоруурундан хамааржыр бе? Тайылбырлаптыңар (Ырлар 32:4, 5).
14 «Мээң төрелим коргунчуг хилинчектиң мурнунда чок апарган болза, ол албан дирлип кээр ийик» — деп бодал бар. Экини күзээш ынчаар чугаалаар болгай. Кижиниң мөңгеде келир үези кажан өлгенинден хамааржыр деп бе? Тергиин Шииткекчи Иегова чөптүг болгаш шынныг шиитпирлер үндүрер. (Номчуптуңар: Ырлар 32:4, 5.) «Бүгү черниң Шииткекчизиниң» чөптүүнге бисте чигзиниг чок (Э. д. 18:25).
15 Кижиниң мөңгеде келир үези ооң кайда чурттап турарындан хамаарышпас деп түңнээри угаан-сарыылдыг. Бөгүн өөрүшкүлүг медээни дыңнаар аргазы чок чурттарда сая-сая кижилер чурттап чоруур. Ол дээш Иегова оларны «өшкүлер» деп чарлавас (Мф. 25:46). Бүгү черниң чөптүг-шынныг Шииткекчизиниң сагыжы олар дээш бистен артык аарып турар. Коргунчуг хилинчек үезинде болуушкуннарны Иегова канчаар углаптарын билбес бис. Бүгү чоннарга Иегова бодунуң ыдыктыын көргүзерге, чамдык улус аңаа бүзүреп, ооң талазынче туруп ап болур (Иез. 38:16).
Коргунчуг хилинчек «Өндүр улуг Вавилоннуң» узуткаашкынындан эгелээр. Ону көргеш, Иегованың талазын шилип алыр улус турар бе?
16. Бис Иегованың дугайында чүнү билир бис? (Чурукту база көрүңер.)
16 Библияны шинчилээш, Иегова кижиниң амы-тынын кайы хире үнелээрин билип алган бис. Бисти мөңге чурттаар аргалыг болзун дээш, ол бодунуң Оглун берипкен (Ин. 3:16). Бис шупту ооң эрге-чассыг сагыш човаашкынын миннип турар бис (Иса. 49:15). Бурган кижи бүрүзүнүң адын билир. Чок апаар-даа болзувусса, аажы-чаңывысты, угаан-медереливисти, бодалдарывысты база сактыышкыннарывысты шуптузун эгидиптер. Бурган бисти ол хире эки билир (Мф. 10:29—31). Иегова кижи бүрүзүнге тергиин шииткелди үндүрер деп бүзүреп болур бис. Дээрде Адавыс мерген угаанныг, чөптүг-шынныг, энерелдиг болгай (Иак. 2:13).
Иегованың кижи бүрүзүнге шииткели тергиин болурунга долузу-биле бүзүрээр бис. Чүге дизе дээрде Адавыс мерген угаанныг, чөптүг-шынныг база энерелдиг (абзац 16).
17. Дараазында статьяга чүнү сайгарар бис?
17 Бо чаартылгалар суртаал ажылының онза чугулазын немей демдеглээн. Чүге ынча деп болур? Бисти чүткүлдүг суртаалдаарынче чүү оттуруп турар? Бо айтырыгларга харыыны дараазында статьяга тодаргай сайгарар бис.
ЫРЫ 76 Чүнү миннип тур сен?
a Оон хөй информацияны «Так было угодно тебе» деп статьядан тып ап болур, «Таңныыл суургазы» 2015 чыл, март 15, арын 7— 11.
b Өндүр улуг Вавилонну узуткаан соонда кезек үе болгаш, Бурганның чонунче Магог черден Гог халдай бээр. Ол үеде Иегованың бараалгакчыларындан аңгыда, коргунчуг хилинчектиң эгезинде каттыжып келген улус база шенеттирер.
c ЧУРУКТАРДА. Өөрүшкүлүг медээни бүгү черде суртаалдап турар-даа болза, чамдык улустуң ону дыңнаар аргазы чок. Дараазында чүгле үш чылдагааны: 1) кол шажынның салдарындан суртаалдаары айыылдыг черде чурттап турар херээжен кижи; 2) политиктиг тургузугнуң хоойлулары суртаалдаарынга айыылдыг чуртта өг-бүле болгаш 3) Иегованың Херечилери чедип шыдавас черде чурттап турар кижи.
d ЧУРУКТАРДА. Чыыштан ырай берген уруг «Өндүр улуг Вавилоннуң» узуткаашкынын Библияда чугаалаанын сактып келген. Оон Иеговадан камгалал дилеп, Иегованың Херечилери болур ада-иезинге чедип келген. Бачыттыг улустуң Иеговага эглип келгенинге өөрүп, дээрде Адавыс ышкаш энерелдиг, кээргээчел болуксаар бис.
