1. ¿Bin yuʼun ya kaltik te bayal bin yak ta kʼoel ta pasel ta ora ini?

 ¡BAYAL bin yak ta kʼoel ta pasel ta ora ini! Ta jujun kʼajkʼal yakotik ta yilel te yak ta kʼoel ta pasel te bin ya yal te albilkʼopetik. Jich bitʼil, te ya skontrain sbaik «te ajwalil ta norte» sok «te ajwalil ta sur» yuʼun ya skʼan ya swentainik te balumilal (Dan. 11:40). Jaʼnix jich yak ta cholel ta swolol balumilal te lek yachʼil kʼop sok bayal millón ta tul ants winiketik ya skʼan ya yichʼik ta mukʼ te Jehová (Is. 60:22; Mat. 24:14). Sok «ta yorail» yakotik ta yichʼel te weʼelil ta swenta te schʼuunel koʼtantik (Mat. 24:​45-47).

2. ¿Bin-a te schʼuunoj koʼtantik, sok bin-a te ya skʼan ya xkʼot ta koʼtantik?

² Te Jehová yak skoltaybelotik yuʼun ya xkʼot ta koʼtantik ta lek te bin nopolix ya xkʼot ta pasel (Prov. 4:18; Dan. 2:28). Ya xjuʼ ya schʼuun koʼtantik te kʼoemix ta koʼtantik-a te bin ya jpastik kʼalal ya xjajch te tulan wokolil yuʼun jich jun koʼtan ya kakʼ jbatik sok junuknax ayotik ta yorail te tulan wokolile. Pero ya skʼan ya xkʼot ta koʼtantik te ma spisiluk ya jnaʼtik te bin ya xkʼot ta pasel ta pajel chaʼbej. Ta artículo ini ya xbajt kilbeytik skʼoplal te bin yuʼun jelon te bin kʼoem ta koʼtantik ta swenta te bin ya xkʼot ta pasele. Patil ya kilbeytik skʼoplal ta swenta te bin jnaʼojtik te ya xkʼot ta pasel ta pajel chaʼbej sok te bin ya xbajt spas te Jehová.

TE BIN MA JNAʼOJTIK

3. ¿Bin kalojtik-a te ya xkʼot ta pasel ta stojol te ants winiketik te kʼalal ya xjajch te yorail te tulan wokolil, sok bin yuʼun te jich jnopojtik-ae?

³ Te ayix tal jaʼbile ya kaltik-a te kʼalal ya xjajch te tulan wokolil, te ants winiketik ma xjuʼix ya yakʼ schʼuunel yoʼtanik ta stojol te Jehová sok te ya xkuxinik jilel ta yorail te Armagedón. Jich la kaltik, melel te bin kʼax ta yorail te Pulemal la jkuytik te jaʼ jun señail ta swenta te bin ya xkʼot ta  pasel ta pajel chaʼbej. Jun ejemplo, jich bitʼil te Jehová la smak te puerta yuʼun te arca te kʼalal mato jajchem-a te Pulemal ya kaltik-a te jaʼnix jich ya smak te puerta te kʼalal mato jajchem-a te tulan wokolil, sok te maʼyuk machʼa ya xjuʼ ya xkolix (Mat. 24:​37-39).

4. ¿Bin yuʼun ma xkaltikix te bin kʼax ta skʼajkʼalel te Noé jaʼ te bin ya xkʼax ta pajel chaʼbej?

⁴ ¿Stojilbal te ya kaltik te jaʼ señail te bin ya xkʼot ta pasel ta pajel chaʼbej te bin kʼax ta yorail te Pulemal? a Maʼuk, melel te Biblia ma jichuk ya yal. Melelnix-a, te Jesús la spajaltaybey skʼoplal te kʼalal liʼ ayix-a sok te «skʼajkʼalel te Noé». Pero, maba la yal te spisil te bin kʼax ta yorail te Pulemal jichnix ya xkʼot ta pasel ta pajel chaʼbej jich bitʼil te kʼalal te Jehová la smakbey stiʼil te arcae. Manchukme jich, bayal bin ya xjuʼ ya yakʼ jnoptik te relato ini.

5. 1) ¿Bin la spas te Noé kʼalal mato xtal-a te Pulemal? (Hebreos 11:7; 1 Pedro 3:20). 2) ¿Bin yuʼun pajal te bitʼil la schol te skʼop Dios te Noé sok te bitʼil ya jcholtik skʼop Dios ta ora ini?

⁵ Kʼalal la spas te arca te Noé la yakʼ ta ilel te la schʼuun te bin albot yuʼun te Jehová (kʼopona Hebreos 11:7; 1 Pedro 3:20). Jaʼnix jich ta ora ini, te ants winiketik te ya yaʼiyik te lek yachʼil kʼop ta swenta te Wentainel yuʼun te Dios ya skʼan ya yakʼik ta ilel te ay schʼuunel yoʼtanike (Hech. 3:​17-20). Te Pedro la yal te Noé jaʼ «te machʼa la scholbey skʼoplal te bin toj ta pasel»  (2 Ped. 2:5). Pero, jich bitʼil la kiltikix ta yan artículo, ma jnaʼtik teme la yaltiklanbey ta jujuntul te ants winiketik te ya xtal jun pulemal. Jaʼnix jich ta ora ini, te joʼotik ya jpastik tulan yuʼun ya jcholbeytik skʼop Dios spisil te ants winiketik ta swolol balumilal. Manchukme ya jpastik tulan, mananix ya xjuʼ ya jcholbeytik skʼop Dios spisil-a te ants winiketik te kʼalal mato xtal-a te slajibal kʼajkʼal. ¿Bin yuʼun te jich ya kaltike?

6, 7. ¿Bin yuʼun mananix ya xjuʼ ya jcholbeytik skʼop Dios-a spisil te ants winiketik te kʼalal ya xtal te slajibal kʼajkʼale?

⁶ Ya kiltik te bin la yal te Jesús ta swenta te scholel skʼop Dios. Te Jesús la yal te ya xpujk ta alel «ta swolol balumilal te lek yachʼil kʼop yuʼun te Wentainel yuʼun te Diose, jichme ya yaʼiyik te skʼop Dios spisil te ants winiketik» (Mat. 24:14). Yak ta kʼoel ta pasel te bin la yale, melel kʼaxem ta jmil ta chajp kʼopiletik ya jcholtik te skʼop Dios sok ta swenta te página kuʼuntik ta Internet bayal ants winiketik ya xjuʼ ya yaʼiyik te lek yachʼil kʼope.

⁷ Te Jesús jich la yalbey te jnopojeletik yuʼune: «Jamal ya kalbeyex te mato lajem awuʼunik sbeentayel-a te mukʼul lumetik yuʼun Israel kʼalal ya xjul te sNichʼan te Winike», ya skʼan ya yal-abi te ma xbajt juʼuk yuʼunik scholbeyel skʼop Dios spisil te ants winiketik te kʼalal ya xjul te Jesuse (Mat. 10:23; 25:​31-33). Ta kʼajkʼal ini, bayal millón ta tul ants winiketik te kuxinemik ta lugaretik te banti maʼyuk permiso yuʼun ya jcholtik skʼop Dios. Jaʼnix jich, ta jujun minuto bayal alaletik ya x-ayinik. Jaʼ yuʼun, manchukme ya jpastik tulan yuʼun ya jcholtik te lek yachʼil kʼop «ta spisil ta chajp nacionetik, tsʼumbaliletik, kʼopiletik sok lumetik» mananix ya xjuʼ ya jcholbeytik skʼop Dios spisil-a te ants winiketik ta swolol Balumilal te kʼalal ya xtal te slajibal kʼajkʼal (Apoc. 14:6).

8. ¿Bin ya xjuʼ ya jojkʼoybey jbatik? (Jaʼnix jich ilawil te fotoetik).

⁸ Jich te bitʼil la kilbeytikix skʼoplal, yaniwan jojkʼoybey jbatik: «¿Bin ya xkʼot ta pasel ta stojol te ants winiketik te ma la yaʼiyik te lek yachʼil kʼop te kʼalal mato xtal-a te yorail te tulan wokolil? ¿Bin ya xbajt spas te Jehová sok te sNichʼan, te machʼa tsabil yuʼun ya yichʼ ta kʼop te ants winiketik-abi?» (Juan 5:​19, 22, 27; Hech. 17:31). Te texto yuʼun te artículo ini ya sjultes ta koʼtantik te Jehová «ma skʼan te ni jtuluk ya yichʼ lajinel, jaʼ ya skʼan te yakuk sujtes yoʼtanik ta spisilik» (2 Ped. 3:9; 1 Tim. 2:4). Manchukme jich-abi, te Jehová maba yalojbotik te bin ya xbajt spas sok te ants winiketik-abi, melel ma puersauk te ya yalbotike.

9. ¿Bin yalojbotik ta Biblia te Jehová?

⁹ Te Jehová yalojbotik ta Biblia te bin ya xbajt spase. Ya yalbotik te ya xbajt schaʼkuxajtes te machʼatik «maba toj yoʼtanik» te ma la snopik te lek yachʼil kʼop sok te maba juʼix sjeltayel te stalelike (Hech. 24:15; Luc. 23:​42, 43). Jaʼ yuʼun yaniwan jpasbey jbatik yantik jojkʼoyeletik te mukʼ skʼoplale.

10. ¿Binxan ya xjuʼ ya jojkʼoybey jbatik?

¹⁰ ¿Bin ya xkʼot ta stojol te ants winiketik te ya xlajik ta yorail te tulan wokolil? ¿Yabal yichʼik lajinel ta sbajtelkʼinal sok te maba ya xjuʼ ya xchaʼkuxajikix? Te Biblia jamal ya yal te maba ya xchaʼkuxajik te ants winiketik te ya slajin te Jehová sok te chʼul-abatetik ta Armagedón ta skaj te la skontrainike (2 Tes. 1:​6-10). Pero, ¿bin ya kaltik ta swenta te machʼatik lajik ta yorail te tulan wokolil ta skaj te ya xkʼax te bintik  ya xjinawan jilel, ta jun accidente o teme ay machʼa milot yuʼune? (Ecl. 9:11; Zac. 14:13). ¿Yabal xjuʼ ya xchaʼkuxajik-euk jich bitʼil ya xchaʼkuxajik te machʼatik «maba toj yoʼtanik»? Maba ya jnaʼtik.

TE BIN JNAʼOJTIKE

11. ¿Bin-utʼil ya yichʼik ichʼel ta kʼop te ants winiketik ta yorail te Armagedón?

¹¹ Ay bayal te bintik jnaʼojtikix te ya xkʼot ta pasel ta pajel chaʼbej. Jich bitʼil te jnaʼojtik, ta Armagedón te ants winiketik jich ya yichʼik ilel te bitʼil la yilik te yermanotak te Cristo (Mat. 25:40). Te machʼatik la yakʼik ta ilel te ya skoltayik te machʼatik chʼultesbilik sok te Cristo jich ya yichʼik ilel bitʼil tuminchijetik. Jaʼnix jich jnaʼojtik te ay chaʼoxtul te yermanotak te Cristo liʼto ayik ta Balumilal-a te ya xjajch te yorail te tulan wokolil ya yichʼik ikʼel bael ta chʼulchan te kʼalal nopolix-a te Armagedón. Jaʼ yuʼun, te bitʼil ayikto ta Balumilal te machʼatik chʼultesbilik, te ants winiketik te lek yoʼtanik ya xjuʼ ya skoltayik te machʼatik chʼultesbilik sok te aʼtelil ya spasike (Mat. 25:​31, 32; Apoc. 12:17). ¿Bin yuʼun kʼax mukʼ skʼoplal spisil ini?

12, 13. ¿Binwan ya xbajt spasik chaʼoxtul ants winiketik kʼalal ya yilik te ya yichʼ lajinel te Mukʼul Babilonia? (Jaʼnix jich ilawil te fotoetik).

¹² Te kʼalal ya xjajchix-a te yorail te tulan wokolil, ayniwan ants winiketik te kʼalal ya yilik te ya yichʼ lajinel te «Mukʼul Babilonia» ya xjul ta yoʼtanik te bayalix jaʼbil yakik ta yalel te testigoetik yuʼun Jehová te jich ya xkʼot ta pasele. ¿Aybal ants winiketik te ya xjuʼ ya yakʼ sbaik ta stojol te Jehová ta yorail-abi? (Apoc. 17:5; Ezeq. 33:33).

¹³ Jnop kaʼiytik te bin kʼot ta pasel ta skʼajkʼalel te Moisés. Kʼalal te israeletik lokʼik ta Egipto, jaʼnix jich «bayal ta chajp ants winiketik» lokʼik bael-euk (Éx. 12:38). Ayniwan te machʼatik jajch yakʼ schʼuunel yoʼtanik ta stojol te Jehová kʼalal la yilik te kʼot ta pasel te bin la yal te Moisés ta swenta te lajunchajp wokoliletik. Teme ay jich ya xkʼot ta pasel te kʼalal la yichʼix lajinel-a te Mukʼul Babilonia, ¿lekbal ya kiltik te kʼalal ay ants winiketik  te ya sujtes yoʼtanik ta yorail-abi? ¡Lek ya kiltik! Melel jaʼ ya jkʼan ya jkʼayinbeytik stalel te jTatik te ay ta chʼulchan, te «jaʼ jun Dios te ya snaʼbey yoʼbolil sba te yantik, te ay yutsil yoʼtan, te ma x-ilin ta ora, te ya yakʼ ta ilel kʼuxul oʼtanil te ma x-ijkitaywan sok te smelelil ya xkʼopoj» (Éx. 34:6). b

14, 15. Yuʼun ay machʼa ya xkuxin ta sbajtelkʼinal, ¿jaʼbal ya yichʼ ichʼel ta wenta te bin-ora laj sok te banti kuxineme? (Salmo 33:​4, 5).

¹⁴ Ayniwan kaʼiyojtik te ay machʼa jich ya yal kʼalal ma Testigouk te sfamiliae: «Jaʼ lek te yakuk xlaj te kʼalal mato xtal-a te yorail te tulan wokolil, yuʼun jich ya xjuʼ ya xchaʼkuxaj-a». Maniwan sok schopoliluk yoʼtan te jich ya yale. Pero te kʼalal ay machʼa ya xchaʼkuxaj ta sbajtelkʼinal ma jaʼuk ya yichʼ ichʼel ta wenta te bin-ora laje. Te Jehová jaʼ te tojil Juez, sok stojil te bin ya sta ta nopele (kʼopona Salmo 33:​4, 5). Schʼuunoj koʼtantik te ya spas te bin stojil te «Juez yuʼun swolol te balumilal» (Gén. 18:25).

¹⁵ Te kʼalal ay machʼa ya xkuxaj ta sbajtelkʼinal, ma jaʼuk ya yichʼ ichʼel ta wenta te banti kuxineme. Te Jehová maba ya skuy ta tentsunetik te bayal millón ta tul ants winiketik ta skajnax te kuxinemik ta lugaretik te banti maʼyuk yichʼoj pukel te skʼop Dios (Mat. 25:46). Teme mukʼ skʼoplal ta koʼtantik te ants winiketik-abi, jaʼuktobalix-a te «Juez yuʼun swolol te balumilal». Ma jnaʼtik te bintik ya xbajt spas te  Jehová ta yorail te tulan wokolil. Ayniwan ants winiketik ya skʼan ya snaʼbeyik sba sok te ya yakʼ schʼuunel yoʼtanik ta stojol kʼalal ya yichʼ chʼultesel ta stojol spisil te nacionetike (Ezeq. 38:16).

16. ¿Bintik jnaʼojtik ta swenta te Jehová? (Jaʼnix jich ilawil te foto).

¹⁶ Ta swenta te bin ya yal te Biblia jnopojtik te Jehová kʼax mukʼ skʼoplal ya yil te kuxlejalile. La yakʼ te sNichʼan yuʼun jich ya sta skuxlejalik ta sbajtelkʼinal te ants winiketik (Juan 3:16). Kilojtik te kʼux ya yaʼiyotik te Jehová sok te ya snaʼ yoʼbolil jbatik (Is. 49:15). Ya snaʼbotik jbiiltik ta jujuntul, jaʼ yuʼun te kʼalal ya xlajotik jichnix ya schaʼkuxajtesotik te bitʼil kileltik-a sok ya yakʼ xjul ta koʼtantik te bin kʼax ta jkuxlejaltik (Mat. 10:​29-31). Schʼuunoj koʼtantik te stojil ya xbajt schajpan Jehová te ants winiketik, melel ay spʼijil yoʼtan, toj sok ya snaʼ yoʼbolil jbatik (Sant. 2:13).

17. ¿Bin ya kilbeytik skʼoplal ta yan artículo?

¹⁷ Te bin la jnoptik ya yakʼ kiltik te kʼax mukʼ skʼoplal te scholel skʼop Dios. ¿Bin yuʼun te jich ya kaltike? Sok ¿bin ya stij koʼtantik yuʼun ma jkom jbatik ta scholel skʼop Dios? Ta yan artículo ya kakʼbeytik sujtib te jojkʼoyeletik ini.